ICIPANDE CA KUSAMBILILAMO 28
Tukazanamo Ivizima Mukutina Yehova
‘Wa wemusuwilwa ulanjizye akatina ku Mfumu e Leza.’—IMILU. 14:2.
ULWIMBO 122 Womani, Mutasyembuka!
VINO TWANDI TUSAMBILILEa
1-2. Antazi ci zino tukapitamo izikolaneko na zino Loti wapitangamo?
NGA TWALOLA iviwipe vino vikucitika munsi, tukayivwa ngati avino Loti wayivwanga. E Loti “wayimbanga ni miwele ya wukwelengusi wa wawembu,” amuno wamanyile ukuti Umukwasi witu uwa kwi yulu wapata imiwele imiwipe. (2 Pet. 2:7, 8) Pamulandu wakuti e Loti walinji na katina kwe Yehova, atacitangako iviwipe vino wano wamuzingulusile wacitanga. Na sweswenye tukakwikala na wantu wano wasikonka amasundo ya kwe Yehova ukulingana na vino akalonda. Lelo nanti ciwe wo-o, tungatwalilila ukuwa awasanguluke nga cakuti twatwalilila ukukunda Yehova nu kuwa nakatina kwe weliwe.—Imilu. 14:2.
2 E Yehova akatwavwa ukucita wo-o, ukupitila mu mazwi yakuwomelezya yano yakazanwa mwi buku lya Imilumbe. Fwandi awantu wonsinye wangazanamo ivizima mukusunda kuno kwawa mwe lyo ibuku.
UKUTINA YEHOVA KU KATUCINJILILA
Pano tuli pa ncito twalola iviwuza vyakuzanwa navyo nu kukana nga watwita ukuya mukucita vino vitanga visecelesye e Yehova (Lolani paragrafu 3)
3. Ukulingana ni Imilumbe 17:3, amulandu ci wuno tuzipizile ukucinjilila umwezo witu? (Lolani ni cikope.)
3 Umulandu uwucindamisye wuno tuzipizile twacinjilila umwezo witu uwamankolanya, akumanya ukuti e Yehova akalola vino vili mu mwezo. Co-o cikusula mukuti e Yehova asipelela vye pakulola ku londe ndi vino awantu wanji wakalola, lelo akalola na vino twawa mukasi. (Wazyani Imilumbe 17:3.) Alitukunda nkaninye nga twatwalilila ukwelenganya pe vino akatusambilizya vino vililenga tuwe nu wumi wamuyayaya. (Yoha. 4:14) Co-o cililenga tutacita iviwipe swinya tulilewuka nu wufi wa kwe Satana na wantu wakwe awawipe awa mwe yo-o insi. (1 Yoh. 5:18, 19) Nga twawa na wuciwuza uwuwome ne Yehova tulimukunda swinya tuliwa na katina kwe weliwe. Cinji acakuti pa mulandu wakuti tusilonda ukulumisya umukwasi witu umwezo, tulipata nu kwelenganya pa ku muwembucila. Nga cakuti twelezwa ukucita iciwipe tuliwayikolowozya ukuti, ‘Amulandu ci wuno ni ngawembucila wino wankunda wo-o ku mufulonye?’—1 Yoh. 4:9, 10.
4. Uzye ukutina Yehova, kwavwizye wuli e nkazi ukukanacita iviwipe?
4 E Nkazi Marta uwa ku Croatia welezizwepo ukucita iviwipe. Watili “Naposilwe ukwelenganya icete cete swinya cambomezile ukwelezya na maka ukukanacita iviwipe. Lelo ukutina Yehova akuno kwancinjilizile.”b Uzye ukutina Yehova kwamwavwizye wuli? Watili welenginyepo sana pe vino vyalinji nu kufumamo nga cakuti wacita iviwipe. Nasweswenye tungamukolanya we-e nkazi. Amuno nga twacita iviwipe tungalumisya e Yehova umwezo swinya tutalitwalilila ukumupepa.—Inta. 6:5, 6.
5. Avyani vino mungasambililako kwe Leo?
5 Nga cakuti tukutina Yehova, tutaliwakwizya na wantu wano wakacita iviwipe. E Leo wino akakwikala ku Democratic Republic Congo, wasinincizizye ukuti co-o acisinka. Pano papisile imyaka 4 ukufuma pano wabatizizwe, wizile atalika ukwizya na wano wacitanga iviwipe. Weni welenganyanga ukuti calinji icetenye ukwizya nawo, cikulu vye nga cakuti atakucitako iviwipe vino wacitanga. Patanzimvile wa-a wano wizyanga nawo, walenzile wawa we cakolwa swinya watalisile ni kucita iviwipe vinji. Pano calinji wo-o, apano wizile atalika ukwelenganya pe vino awakwasi wakwe wamusambilizizye, na vino walinji ni nsansa pano wawombelanga e Yehova. Avyani vino vyafumilemo? Wizile atalika ukucita ivizima na swinya. Cinji acakuti, wa eluda wamwavwizye ukunyoka kwe Yehova. Pe yo-o impindi wawa ni nsansa nkaninye ukuwomba wu eluda na wu payiniya uwuyiwele.
6. Awanaci ci wawili wano twandi tulandepo.?
6 Lekani tulandeko pa mazwi yano yawa mu Imilumbe icipandwa 9 muno tukawazya pa mano ya cisinka nu kutumpa, vino vikakwimililako awanaci wawili.c Pano tukusambilila mwakwizuka ukuti, awantu mwe yo-o insi ya kwe Satana wasendwa kukucita uwuzelele nu kutamba ivya misiku. (Efes. 4:19) Fwandi awuli umulandu wuno cicindamizile ukutwalilila ukuwa na katina kwe Yehova nu kukanacita iviwipe. (Imilu. 16:6) Ukwasowa nu kuvwilika, swensinye tungazanamo ivizima mukusambilila pa wupiliwulo wawanaci wano walandwapo mwe co-o icipande. Wa-a awanaci wawalondolola ukuti wakakwita iviwelewele nanti “awantu watumpe.” Cawa ngati wonsinye wakalanda ukuti, ‘Zanji mulye icakulya mung’anda yane.’ (Imilu. 9:1, 5, 6, 13, 16, 17) Lelo vino vikaciticila wano wakazumila kuno wakuwita vikapusana pusana.
MUTAWAYA KU MWANACI UMUTUMPE
Ukwita kwa ‘mwanaci umutumpe’ kungatuwika mu ntazi (Lolani paragrafu 7)
7. Ukulingana ni Imilumbe 9:13-18, avyani vino vikaciticila wano wakazumila nga cakuti umwanaci umutumpe wawita? (Lolani ni cikope.)
7 Lekani tulande pa kwita kwa ‘mwanaci umutumpe.’ (Wazyani Imilumbe 9:13-18.) We-e umwanaci asikwivwa ni nsoni ukwita awawelewele ukuti “zanji koo” ku ng’anda yane tulile caponga. Avyani vino vikaciticila wano wazumila? E Baibolo yikati “Wano wakuyanga kweneko wakafwa.” Mufwile mwizuka na mazwi amakolaneko, yano yalandwapo kukutalika kwi buku lya milumbe. Acino watusoka pa mwanaci ‘ichipopo’ swinya ‘cino cikafunkula.’ Watunena ukuti: “Ndiwaya ku ng’anda yakwe utela ukupita munzila yino yaya kumfwa.” (Imilu. 2:11-19) Pa Imilumbe 5:3-10 pakatusoka pa mwanaci winji ‘wino akaya kunsi yawafwe.’
8. Avyani vino swensinye tuzipizile ukupingulapo?
8 Wonsinye wano ‘umwanaci’ umutumpe akakwita, wazipizile ukupingulapo: nampo nga akuzumila nanti ukukana. Lelo naswenye tuzipizile ukupingulapo nga cakuti ivya musango wo-o vyacitika. Nomba tungacita wuli nga cakuti wumwi akulonda tucite uwuzelele nanti pano tuli pa intaneti kwiza ivikope vya misiku?
9-10. Amilandu ci yino yizipizile ukulenga tutacita uwuzelele?
9 Kwawa imilandu imicindame yino yikalenga tutacita uwuzelele. ‘Umwanaci umutumpe’ wamulondolola ngati akulanda ukuti “aminzi yakwiwa” yanonelela. Nomba uzye yanye “aminzi yakwiwa” avyani? E Baibolo yakolanya ukusunkana kwa mwitwala ukwa mulume nu muci ku minzi yakumala ulusala. (Imilu. 5:15-18) Awatwalane vye ukulingana ni sundo, awano wazumilizwa ukuyitopwa ukusunkana kwa mwitwala. Ko-o ukusunkana kwapusanako nkaninye na kuno Baibolo yikakwita ukuti “aminzi yakwiwa.” Amuno ya-a “aminzi yakwiwa” yafwile yakakwimililako wano wakasunkana mu wumfisolo swinya wano wasitwalana ukulingana na masundo. Cinji acakuti wakavwama kwe wanji ngati awulyanye vino umung’o akacita pakwiwa. Wa-a awantu wangalola ngati ukucita wo-o kukakwivwika icete, maka maka nga wakwelenganya ukuti pasi uwili wensinye wino alimanya. Nomba ukwelenganya kwa musango wo-o kutazipa nanti katicinye. Amuno lyo wakuyiwipa vye, e Yehova akalola vyonsinye. Ukumala wuciwuza ne Yehova acili cintu iciwipe nkaninye cino tutazipizile twakwelenganyapo. Fwandi patawa nanti pamwi pano uwuzelele wazipila, wungatuletelela vye. (1 Kor. 6:9, 10) Amuno kwawa na vinji nye iviwipe vino vikafumamo.
10 Umuntu wino akacita uwuzelele akakwelenguka, angayilola ngati atacindama, angapempa ifumo swinya angalenga wapusane mu lupwa. Fwandi cacindama nkaninye ukukana pano umwanaci mutumpe akumita ku ng’anda mukulya ivyakulya. Amuno wano wakacita uwuzelele wasipelela vye pakumala wuciwuza wawo ne Yehova, lelo wakakwambula ni ndwala zino zingalenga wafwe zuwa. (Imilu. 7:23, 26) Imilumbe 9:18 yalecelezya na mazwi yakuti: “Wano winjila kali wali pansi-pansi munsi yawafwe.” Acani cino cikalenga wamwi wazumila pano umwanaci mutumpe akuwita, po wamanyile nu kumanya ukuti wakuya ku mfwa?—Imilu. 9:13-18.
11. Amulandu ci wuno ukutamba ivya misiku kwawipila?
11 Cimwi cino cikalenga wamwi wazumila pano umwanaci mutumpe akuwita, akutamba ivya misiku. Wakakwelenganya ukuti pasi iciwipe icili consinye cino cingafumamo mukuvitamba. Lelo wo-o vino wakalanda avya wufi. Amuno wano wakatamba ivya misiku wakayisula nu kukana cindika wanji, swinya citapepuka nanti katicinye ukuleka ukutamba. Nga cakuti umuntu walola ivikope iviwipe, catala nkaninye ukwiwililako. Cinji acakuti, ukutamba ivya misiku kusikwavwa, lelo kukalenga vye umuntu awavwambisya ukucita iviwipe. (Kolo. 3:5; Jemu. 1:14, 15) Awuli umulandu wuno awavule wano wakatamba ivya misiku wakacitila ivintu iviwipe.
12. Tungalanjizya wuli ukuti tukakwelezya na maka ukukanatamba ivikope vino vingalenga twakwelenganya pa kucita iviwipe?
12 Tungacita wuli nga cakuti twalola ivikope vya misiku ukwasowa ukwenecela? Tuzipizile ukufumyako aminso paponye. Cino cingatwavwa ukucita wo-o akwizuka ukuti, twacindamika wuciwuza witu ne Yehova. Kwawa ivikope vimwi vino vitawa avya misiku lelo vino vingalenga twakwelenganya pa kucita iviwipe. Fwandi navyonye tutazipizile twavitamba. Amuno tusilonda nanti katicinye ukucita cino cingalenga tutalike ukwelenganya pa kucita iviwipe. (Mat. 5:28, 29) E eluda wumwi uwaku Thailand uwizina lyakuti David watili: “Nga nkutamba ivikope nkayikolowozya ukuti ‘Nanti acakuti vyo-o ivikope asa vya misiku, uzye e Yehova wandi ayivwe wuli nganatwalilila ukuvitamba?’ Ukuyikolowozya kwa musango wo-o kukanjavwa ukupingulapo icete pa vintu.”
13. Acani cino cingatwavwa ukupingula icete pa vintu?
13 Ukuwa nakatina kwe Yehova kungatwavwa ukupingula icete pa vintu. E Baibolo yikatunena ukuti “pakuwa namano chazipila ukutina Imfumu e Leza pakutalika.” (Imilu. 9:10) Tukazana co-o icisinka kukutalika kwa Imilumbe icipandwa 9, pano wakolanya ‘amano ya cisinka’ ku mwanaci wa mano.
MWAKONKA ‘UMWANACI WAMANO’
14. Akwita ci kunji kuno kwalandwapo pa Imilumbe 9:1-6?
14 Wazyani Imilumbe 9:1-6. Pe lyo-o iwaliko tukawazyapo ukwita kwa kwe Yehova, e Kelewula swinya intaliko ya mano. (Imilu. 2:6; Roma. 16:27) Lyo-o iwaliko lyalanda pa ng’anda inkulu yino yazengwa ni mpanda 7. Co-o icakulolelako, cikutulanjizya apatiswenye ukuti e Yehova wawa nu mwezo wakupa swinya akapocelela wonsinye wano wakasambilila kwe weliwe pa kuti wawe na mano.
15. Avyani vino e Yehova akalonda twacita?
15 E Yehova wawa nu mwezo wakupa swinya asitwima nanti cimwi cino tukulonda. Yo-o imiwele yikakwimililako ‘amano ya cisinka’ yano yalandwapo mu Imilumbe icipandwa 9 ukuti umwanaci. Lyo-o ilyasi likalondolola ukuti, umwanaci wisile awantu mukulya ivya kulya ni vya kumwa vino wapekinye icete mu ng’anda yakwe. (Imilu. 9:2.) Ku cakulolelako, mu vesi 4 ne 5: “we-e umwanaci wawuzizye awawelewele ukuti: ‘zanji mulye icakulya cane.’” Nomba amulandu ci wuno tuzipizile ukuzumila ukuya mu kulya ivya kulya kwe we-e umwanaci? Amuno e Yehova akalonda tuwe na mano nu kutucinjilila. Swinya asilonda twacita ivintu vino vingalenga pansizi twayivwa uwuwi. Wo-o awuli umulandu wuno “akakwavwa nukucinjilila awantu wasuwilwa.” (Imilu. 2:7) Acino nga tuli na katina kwe Yehova tuliwamusecelesya. Cinji acakuti tuliwakonka ukusunda kwakwe ukwa mano swinya tuliwasecelela nga tukuvikonka—Jemu. 1:25.
16. Uzye ukutina Yehova kwavwizye wuli umwanawitu Alain ukupingulapo icete, swinya avyani vino vyafumilemo?
16 Lekani tulande pe cino cavwizye umwanawitu Alain ukupingulapo icete. We-e umwanawitu we eluda swinya amusambilizya. Watili: “Awasambilizya awanji awavule, walolanga ngati ukutamba ivya misiku anzila yakumanyilamo ivivule.” Lelo wamanyile ukuti vino wamunenanga vitalinji avya cisinka. Walanzile nu kuti, “Pa mulandu wakuti nakunda e Yehova swinya namucindika, nakanile ukutambako amafilimu. Swinya nanenileko nawanji umulandu wuno nakanilanga ukutambako.” Cino cavwizye we-e umwanawitu akuwomvya ‘amano yacisinka’ aya kwe Yehova yano yakalanda ‘pakukonka munzila zyacisinka izya mano.’ (Imilu. 9:6) Vino we-e umwanawitu wacisile vyalenzile awasambilizya wawuye wamwi watalike ukusambilila Baibolo nu kuzanwa mukulongana.
Ukwita kwa ‘mwanaci wamano’ kungalenga tuwe ni nsansa pe yo-o impindi nu kulenga twize tuwe nu wumi wamuyayaya ku nkolelo (Lolani amaparagrafu 17-18)
17-18. Avizima ci vino wano wakakonka umwanaci wa mano wakayitopwa, swinya avyani vino waliyitopwa ku nkolelo? (Lolani ni cikope.)
17 E Yehova wawomvya ivilanjililo vya wanaci wawili pa kutulanjizya vino tuzipizile ukucita pa kuti twize tuwe ni nsansa ku nkolelo. Wano wakakonka ukwita kwa “mwanaci mutumpe” wakalola nge wakayitopwa ivintu ‘ivinonelele’ ivya mukuvwama swinya ivya pa kampindi vye katici. Lelo wasikwelenganya nanti katici nye ukuti vino wakacita vingiza viwaletelele. Nomba vino vilifumamo avya kuti waliya “pansi-pansi munsi yawafwe.”—Imilu. 9:13, 17, 18.
18 Wano wakakonka ukwita kwa mwanaci wino akakwimililako ‘amano ya cisinka’ weni vino viliwaciticila vilipusanako. Ku cakulolelako, pe yo-o impindi wawa ni nsansa nkaninye pa mulandu wakuti e Yehova akawapa vyonsinye vino vikalondekwa pa kuti watwalilile ukuwa na wuciwuza uwuwome na weliwe. (Ayize. 65:13) E Yehova walandizile mwe kasesema Ayizeya, ukuti: “Nteyelezyani mwivwe cino nkutaka apano muliyitopwa icakulya cilusye icakulya consi.” (Ayize. 55:1, 2) Cinji acakuti tukasambilila ukukunda vino Yehova wakunda nu kupata vino wapata. (Amalu. 97:10) Swinya tukakwivwa icete nkaninye ukwitako wanji ukwiza mukusambilila ‘amano ya cisinka.’ Twawa ngati awawomvi wano wakupunda “pamasyo matumpuke nkani ayakaya. Awati, ‘Zanji mwe viwelewele-mwe!’” Ivizima vino tukazanamo ponga na wantu wano wakakwivwila vino tukuwanena, vitalipelela vye panye, vilitwalilila. Swinya vililenga tuwe ‘nu wulanzi’ wa muyayaya nga cakuti twatwalilila ‘ukukonka inzila zyamano.’—Imilu. 9:3, 4, 6.
19. Ukulingana ne Ekawizya 12:13, 14, avyani vino tuzipizile ukutwalilila ukucita? (Lolani na kambokosi kakuti “Ivizima Vino Tukazanamo Mukutina Yehova.”)
19 Wazyani Ekawizya 12:13, 14. Ukutina Yehova kulitucinjilila swinya kulitwavwa ukuwa awasanguluke nu kutwalilila ukuwa na wuciwuza uwuwome ne Yehova mwe ya-a amanda yakulecelezya. Cinji acakuti, tulitwalilila ukwitako wanji ukwiza mu kusambilila ‘amano yacisinka’, amuno twawa na katina kwe Yehova swinya twamukunda ni myezo yitu yonsinye.
ULWIMBO 127 Vino Nzipizile Ukuwa
a Awina Klistu wazipizile ukuwa na katina kwe Yehova. Ka-a akatina kangacinjilila imyezo yitu. Swinya kangatwavwa ukukanatamba ivya misiku nanti ukucita uwuzelele. Mwe co-o icipande twandi tulande pa wupusano wuno wawa pa mano nu kutumpa, ukuwomvya awanaci wawili wano walandwapo mu Imilumbe icipandwa 9. Ukusunda kuno kwawa mwe co-o icipande, kungatwavwa pe yo-o impindi nga nakunkolelo.
b Amazina yamwi yapiluzilwe.
c Mu mawaliko na yanji e Baibolo yalondolola awantu mu mankolanya, lolani Waroma 5:14; Wagalatiya 4:24.