Ñá Dina ndo̱ʼoñá tu̱ndóʼo

¿Á XÍNI̱ÚN ndáana ku̱a̱ʼa̱n ñá Dina kuniñá? Ku̱a̱ʼa̱nñá kuniñá ná si̱ʼí ná ñuu Canaán. ¿Á xi̱kutóo yiváñá ña̱ xi̱xa̱ʼa̱nñá ñuu yóʼo? Iin ña̱ va̱ʼa chindeé yóʼó ña̱ kunda̱a̱-iniún xa̱ʼa ña̱yóʼo kúú ña̱ ndakaʼún xa̱ʼa ña̱ xi̱ndakanixi̱ní ta̱ Abrahán xíʼin ta̱ Isaac xa̱ʼa ná si̱ʼí ná ñuu Canaán.

¿Á xi̱kutóo ta̱ Abrahán ña̱ tindaʼa̱ ta̱ Isaac se̱ʼera xíʼin iin ñaʼá ñuu Canaán? Kǒo níxikutóora. Ni ta̱ Isaac xíʼin ñá Rebeca kǒo níxikuni̱na ña̱ tindaʼa̱ ta̱ Jacob se̱ʼena xíʼin ná si̱ʼí ná ñuu Canaán. ¿Á xíni̱ún ndachun kǒo níxikutóona?

Saáchi na̱ yiví kán su̱ví Jehová níndasakáʼnuna, inkava ndióxi̱ xi̱ndasakáʼnuna. Su̱ví na̱ yiví va̱ʼa kúúna ña̱ tindaʼa̱na xíʼinna ta ni ña̱ koona migona. Xa̱ʼa ña̱yóʼo va̱ʼa kúnda̱a̱-iniyó ña̱ kǒo níxikuni̱ ta̱ Jacob ña̱ ku̱ʼu̱n se̱ʼera ndakutáʼanñá xíʼin ná siʼí ná ñuu Canaán.

Koto nu̱ú na̱ʼná, yóʼo va̱xi iin ta̱a ta̱ ñuu Canaán, Siquem naníra, ta xítora nu̱ú ñá Dina. Iin ki̱vi̱ ni̱xa̱ʼa̱n ñá Dina ñuu Canaán ta kán ti̱in kuíʼnarañá ta ni̱ki̱si̱ra xíʼinñá. Ña̱yóʼo kúú tu̱ndóʼo ndo̱ʼo ñá Dina. Ta va̱ása va̱ʼa ña̱yóʼo chi iinlá na̱ xa̱tindaʼa̱va va̱ʼa ku̱su̱n xíʼin táʼan. Xa̱ʼa ña̱ ke̱ʼé ta̱ Siquem yóʼo, ku̱a̱ʼání tu̱ndóʼo ki̱xi nu̱úna.

Tá na̱kunda̱a̱-ini na̱ ku̱ʼva ñá Dina ña̱ ndo̱ʼoñá ni̱sa̱a̱nína. Soo ta̱ Simeón xíʼin ta̱ Leví ni̱sa̱a̱ka na̱yóʼo. Ta na̱yóʼo xíʼin ñanina nda̱kiʼinna yuchu̱na ta ku̱a̱ʼa̱nna ñuu Canaán. Tá ni̱xa̱a̱na ñuu kán, xa̱ʼnína ta̱ Siquem xíʼin ndiʼi ta̱a na̱ ñuu kán, ta xa̱ʼa ña̱yóʼo ni̱sa̱a̱ní yivána ta̱ Jacob.

¿Ndachun ki̱xaʼá tu̱ndóʼo yóʼo? Xa̱ʼa ña̱ xi̱ndakutáʼan ñá Dina xíʼin na̱ yiví na̱ kǒo xíniso̱ʼo ña̱ káʼa̱n Ndióxi̱. Ta miíyó va̱ása keʼéyó táʼan ña̱ ke̱ʼé ñáyóʼo.