Síín ni̱xi̱yo iin iin ta̱ kúáti

U̱VI̱ saá ta̱ va̱lí ta̱ va̱xi nu̱ú na̱ʼná yóʼo síín káa iin iin ta̱yóʼo. ¿Á xíni̱ún nda̱saa xi̱naní iin iin ta̱yóʼo? Esaú xi̱naní ta̱ xi̱xaʼní kití, ta ta̱ loʼo xi̱ndaa ndikachi xi̱naní Jacob.

Ta̱ Esaú xíʼin ta̱ Jacob na̱ kúáti xi̱kuu na̱yóʼo, se̱ʼe ta̱ Isaac xíʼin ñá Rebeca xi̱kuuna. Ta̱ Isaac xi̱kuni̱ra ta̱ Esaú, saáchi ta̱yóʼo va̱ʼa xi̱xaʼníra kití xi̱xixina. Soo ñá Rebeca xi̱kuni̱ñá ta̱ Jacob, saáchi ta̱yóʼo vitá ni̱xi̱yo inira.

Tá tákuka ta̱ táta xi̱ína Abrahán xíʼinna, sana xi̱kutóo ta̱ Jacob kuniso̱ʼora ña̱ xi̱ka̱ʼa̱n xi̱íra xa̱ʼa Jehová. Ta̱ Abrahán tá ndíka̱a̱ra 175 ku̱i̱ya̱ra saá ni̱xi̱ʼi̱ra, ta na̱ va̱lí yóʼo 15 ku̱i̱ya̱na tá ni̱xi̱ʼi̱ra.

Soo ta̱ Esaú tá xi̱ndíka̱a̱ra 40 ku̱i̱ya̱ra saá ti̱ndaʼa̱ra xíʼin u̱vi̱ ná si̱ʼí ná ñuu Canaán. Ña̱yóʼo sa̱ndákavaña-ini ta̱ Isaac xíʼin ñá Rebeca, chi ta̱ Esaú ti̱ndaʼa̱ra xíʼin ná si̱ʼí ná kǒo ndásakáʼnu Jehová.

Ta iin ki̱vi̱ íyo iin ña̱ ku̱u, ta xa̱ʼa ña̱yóʼo ni̱sa̱a̱-ini ta̱ Esaú xi̱nira ñanira ta̱ Jacob. Saáchi ki̱xa̱a̱ iin ki̱vi̱ ña̱ taxi ta̱ Isaac bendición ndaʼa̱ ta̱ Esaú. Saáchi ta̱yóʼo kúú ta̱ chée nu̱ú ta̱ Jacob, ta bendición yóʼo xa̱ndátu ta̱ Esaú ña̱ ndakiʼinraña. Soo ta̱yóʼo xa̱ni̱xi̱kóra bendición yóʼo nu̱ú ñanira ta̱ Jacob. Ta saátu tá ki̱vi̱ ka̱ku ta̱ va̱lí yóʼo, Ndióxi̱ ni̱ka̱ʼa̱nra ta̱ Jacob kúú ta̱ ndakiʼin ña̱ bendición. Tasaá ku̱u, ta̱ Isaac ta̱xira bendición ndaʼa̱ se̱ʼera ta̱ Jacob.

Tá na̱kunda̱a̱-ini ta̱ Esaú xa̱ʼa ña̱yóʼo, ni̱sa̱a̱níra xi̱nira ta̱ Jacob. Ndeéní ni̱sa̱a̱ra nda̱a̱ ni̱ka̱ʼa̱nra ña̱ kaʼníra ta̱ Jacob. Tá na̱kunda̱a̱-ini ñá Rebeca ña̱yóʼo, ni̱ndi̱ʼi̱ní-iniñá. Ña̱kán, ni̱ka̱ʼa̱nñá xíʼin ta̱ Isaac yiíñá: ʼKu̱a̱ʼáníka ña̱ ndoʼoyó xíʼin ta̱ Jacob ná tindaʼa̱ra xíʼin ná si̱ʼí ná ñuu Canaánʼ.

Ña̱kán ka̱na ta̱ Isaac ta̱ Jacob ta káchira xíʼinra: ʼKǒo tindaʼún xíʼin ná si̱ʼí ná ñuu Canaán. Va̱ʼaka kuaʼán nu̱ú íyo xi̱ún ta̱ Betuel ña̱ ñuu Harán. Ta kán tindaʼún xíʼin iin ñá se̱ʼe ta̱ Labán ta̱ se̱ʼe xi̱ún Betuelʼ.

Ta̱ Jacob xi̱niso̱ʼora ña̱ ni̱ka̱ʼa̱n yivára, ta ndi̱ku̱n ki̱tara ku̱a̱ʼa̱nra ñuu Harán nu̱ú ndóo na̱ táʼanra.