Marzo

Ña̱ nda̱a̱ kúú ña̱ va̱ása kúni̱yó ña̱ ná sa̱a̱-inina kunina miíyó á ña̱ ná ixandi̱va̱ʼana xíʼinyó xa̱ʼa̱ ña̱ kándíxayó Ndióxi̱. Tá saá, ¿nda̱chun kivi kusi̱í-iniyó ni tá sáa̱-inina xínina miíyó? Kivi kusi̱í-iniyó xa̱ʼa̱ u̱ni̱ ña̱ʼa. Ña̱ nu̱ú, saáchi tá kúndeé-iniyó kúsi̱í-ini Ndióxi̱ xíʼin ña̱ kéʼéyó (1 Ped. 4:13, 14). Ña̱ u̱vi̱, chi saá kúú ña̱ ndáyáʼvika ña̱ kándíxayó Ndióxi̱ ta ndúndakúníkaña (1 Ped. 1:7). Ña̱ u̱ni̱, saáchi chí nu̱únínu ndakiʼinyó iin ña̱ ndáyáʼviní: ña̱ kutakuyó ndiʼi tiempo (Rom. 2:6, 7). Tá ni̱ya̱ʼa loʼo tiempo ña̱ nda̱taku ta̱ Jesús, na̱ apóstolra ku̱si̱í-inina nda̱a̱ táki̱ʼva xa̱a̱ ni̱ka̱ʼa̱nra xíʼinna. Ni ka̱ninana ta ni ni̱ka̱ʼa̱nna xíʼinna ña̱ ná va̱ása natúʼunkana xíʼin na̱ yiví xa̱ʼa̱ Ndióxi̱, na̱yóʼo ni̱kusi̱í-inina “saáchi ta̱xi Ndióxi̱ ña̱ kundoʼona ña̱ kaʼan nu̱ú xa̱ʼa̱ ki̱vi̱ ta̱ Jesús” (Hech. 5:40-42). Ndakúka ni̱xi̱yo ña̱ kúʼvi̱-inina xínina ta̱ Jesús, nu̱úka ña̱ yi̱ʼvína kunina na̱ sáa̱-ini xíniñaʼá. Ni̱na̱ʼa̱na ña̱ kúʼvi̱-inina xíninara tá ni̱xi̱ka ni̱ʼina na̱túʼunna xíʼin na̱ yiví xa̱ʼa̱ Ndióxi̱. Tiempo vitin, ku̱a̱ʼání na̱ hermanoyó ndákundeéna káchíñuna nu̱ú Jehová ni yáʼana nu̱ú tu̱ndóʼo. Kúnda̱a̱-inina ña̱ va̱ása nandósó-inira xa̱ʼa̱ ña̱ kéʼéna ni ña̱ náʼa̱na ña̱ kúʼvi̱-inina xínina ki̱vi̱ra. w21.03 25 párr. 18, 19

Mií Jehová kúú ta̱ chíka̱a̱ níma̱ na̱ ndáka̱xinra ña̱ kutóona koona chí ndiví. Na̱yóʼo ndákanixi̱nína xa̱ʼa̱ ña̱ ndátuna ndakiʼinna, káʼa̱nna xa̱ʼa̱ña ti̱xin oración ta saátu kúni̱nína ndakiʼinna ña̱ koona chí ndiví. Ni va̱ása kúnda̱a̱-inina ndáa ki̱ʼva koo ku̱ñuna tá ná koona chí ndiví, soo xa̱a̱ kúni̱nína ndakiʼinna chiñu ña̱ kuumiína ti̱xin Reino ña̱ íyo chí ndiví (Filip. 3:20, 21; 1 Juan 3:2). Na̱ kúú inkaka ndikachi ndátuna kutakuna nu̱ú ñuʼú yóʼo nda̱a̱ táki̱ʼva kúni̱ ndiʼi na̱ yiví. Kúni̱nína ña̱ ná kixaa̱ ki̱vi̱ ña̱ kachíñuna ña̱ ndulivi nu̱ú ñuʼú yóʼo, tasaá ixava̱ʼana veʼena ta chiʼina ña̱ kuxuna á inkaka planta. Ta va̱ása kuumiíkana kue̱ʼe̱ ta va̱ʼaní kundoona xíʼin na̱ veʼena (Is. 65:21-23). Ta kúni̱nína ku̱ʼu̱nna kotona ña̱ íyo iníísaá nu̱ú ñuʼú. Tá kúú, kotona tá mar xíʼin yuku̱ nu̱ú íyo yitu̱n, ta saátu sakuaʼakana xa̱ʼa̱ ndiʼi ña̱ʼa ña̱ i̱xava̱ʼa Jehová. Soo iin ña̱ sákusi̱íníka-inina kúú ña̱ viíka kutáʼanna xíʼin Jehová ki̱vi̱ tá ki̱vi̱. w21.01 18, 19 párr. 17, 18

Tándi̱ʼi sa̱ndíʼi-xa̱ʼa̱ na̱ ñuu Babilonia ña̱ ñuu kán, na̱ yiví na̱ xi̱ya̱ʼa kán xi̱ka̱ʼa̱nna: “Kǒo nda̱a̱ ni iin ña̱ʼa nu̱úña, ni na̱ yiví ni kití, ta ndaʼa̱ na̱ caldeo nda̱taxinaña” (Jer. 32:43). Tá xa̱a̱ ni̱ya̱ʼa 200 ku̱i̱ya̱ ña̱ ni̱ka̱ʼa̱n ta̱ Joel xa̱ʼa̱ ña̱ profecía yóʼo, Jehová xi̱niñúʼura ta̱ Jeremías ña̱ ka̱ʼa̱nkara xa̱ʼa̱ ña̱yóʼo, ni̱ka̱ʼa̱nra ña̱ na̱ soldado nandukúna na̱ ñuu Israel na̱ kéʼé ña̱ va̱ása va̱ʼa ta tiinna ndiʼi na̱yóʼo. Jeremías 16:16, 18 káchiña: “Kanai̱ ku̱a̱ʼání na̱ tíin ti̱a̱ká, káchi Jehová, ta na̱yóʼo tiinnana. Tándi̱ʼi kanai̱ ku̱a̱ʼání na̱ xáʼní kití, ta na̱yóʼo kaʼnínana ndiʼi yuku̱ xíʼin xi̱kí xíʼin nu̱ú ni̱nda̱tá yu̱u̱”. Ta káʼa̱nkaña: “Saxóʼvi̱i̱na xa̱ʼa̱ ña̱ va̱ása va̱ʼa ña̱ ke̱ʼéna xíʼin xa̱ʼa̱ ku̱a̱china”. Ta na̱ ñuu Israel na̱ va̱ása níndandikó-ini va̱ása kivi chise̱ʼéna miína chí mar ni chí yuku̱. Chi na̱ soldado ña̱ ñuu Babilonia ndani̱ʼívana na̱yóʼo. w20.04 5 párr. 12, 13

Iin ki̱vi̱ ña̱ ndáyáʼviní, ta̱ Lot va̱ása kama níxiniso̱ʼora ña̱ ni̱ka̱ʼa̱n Jehová. Sana kivi ndakanixi̱níyó ña̱ va̱ása níndi̱ʼi̱-ini ta̱ Lot xa̱ʼa̱ ña̱ ni̱ka̱ʼa̱n Jehová kuu, ta va̱ása níxiniso̱ʼora. Soo Jehová kúee ni̱xi̱yo inira xíʼinra, ta ku̱ndáʼvi-inira xi̱nirara, ña̱kán na̱ ángel ti̱inna ndaʼa̱ra ta saátu na̱ veʼera ta ta̱vánana ña̱ ñuu kán (Gén. 19:15, 16). ¿Nda̱chun ku̱ndáʼvi-ini Jehová xi̱nira ta̱ Lot? Sana ke̱ʼéraña xa̱ʼa̱ ku̱a̱ʼá ña̱ʼa. Sana va̱ása kama níkita ta̱ Lot veʼera xa̱ʼa̱ ña̱ xi̱yi̱ʼvíra na̱ yiví na̱ ni̱xi̱yo chí sa̱tá ña̱ ñuu Sodoma. Soo su̱ví iinlá ña̱yóʼo kúú ña̱ níxiyi̱ʼvíra nu̱ú. Sana ku̱nda̱a̱-inira xa̱ʼa̱ u̱vi̱ na̱ rey na̱ ni̱ko̱yo ini ya̱vi̱ nu̱ú ñúʼu alquitrán chí yoso̱ ña̱ íyo yatin kán (Gén. 14:8-12). Ta sanatu ni̱ndi̱ʼi̱-inira xa̱ʼa̱ ñá síʼíra ta saátu ná se̱ʼera. Saátu xi̱kuura ta̱ ku̱i̱ká, ña̱kán sana xi̱kuumiíra iin veʼe va̱ʼa (Gén. 13:5, 6). Soo ña̱yóʼo va̱ása kúni̱ kachiña, ña̱ iin ña̱ va̱ʼava kúú ña̱ va̱ása níxiniso̱ʼo kamara ña̱ ni̱ka̱ʼa̱n Jehová. Soo Ndióxi̱ va̱ása níkiʼinníra kuenta xíʼin ña̱ va̱ása va̱ʼa ña̱ ke̱ʼé ta̱ Lot, chi ni̱ka̱ʼa̱nra ña̱ kúúra iin ta̱a ta̱ nda̱kúní-ini (2 Ped. 2:7, 8). w20.04 18 párr. 13, 14

Ta̱ loʼo, sana na̱ xíni̱ yóʼó nda̱a̱ tá loʼún kivi ixayo̱ʼvi̱ña xíʼinna ña̱ xa̱a̱na kandíxana ña̱ kúún iin ta̱ loʼo ta̱ xa̱a̱ xu̱xa-ini. Soo ndakaʼún, Jehová va̱ása xíto kuitíra ndáa ki̱ʼva náʼún chi xítora ndáaña íyo níma̱ún. Ta saátu xíni̱ va̱ʼara yóʼó ta kúnda̱a̱-inira ndáaña kivi keʼún (1 Sam. 16:7). Xíniñúʼu ndasandakún ña̱ kítáʼún xíʼinra. Ta̱ David ke̱ʼéra ña̱yóʼo tá xi̱xitora ña̱ʼa ña̱ i̱xava̱ʼa Jehová, ta xi̱ndakanixi̱níra ndáaña kúú ña̱ xi̱sanáʼa̱ ña̱yóʼo miíra xa̱ʼa̱ Jehová (Sal. 8:3, 4; 139:14; Rom. 1:20). Inka ña̱ kivi keʼún kúú ña̱ ndukún ndee̱ nu̱ú Jehová. Tá kúú, tá na̱ káʼvi xíʼún escuela kúsi̱kindaana yóʼó xa̱ʼa̱ ña̱ kúún testigo Jehová, ka̱ʼa̱n xíʼinra ña̱ ná chindeétáʼanra xíʼún ña̱ ndakú koo iniún. Saátu kivi kundiku̱ún consejo ña̱ ndáni̱ʼún nu̱ú tu̱ʼunra xíʼin nu̱ú tutu á video ña̱ tává na̱ ñuura. Tá kíʼún kuenta ña̱ chíndeétáʼan Jehová xíʼún tá yáʼún nu̱ú iin tu̱ndóʼo, xa̱ún kandíxakaúnra. Ta tá ná kuni inkana ña̱ táxiún ña̱ chindeétáʼan Jehová xíʼún, xa̱a̱na kundaaka-inina yóʼó. w21.03 3 párr. 7

Inka ña̱ ku̱i̱ká ña̱ va̱ása kívi kuniyó kúú ña̱ oración. Na̱ va̱ʼaní kítáʼan kútóona ka̱ʼa̱nna xa̱ʼa̱ ña̱ ndákanixi̱nína xíʼin xa̱ʼa̱ ña̱ ndóʼona. Ki̱ʼva saá íyo ña̱ kítáʼanyó xíʼin Jehová. Chi xíniñúʼura tu̱ʼunra ña̱ va̱ʼa ka̱ʼa̱nra xíʼinyó, ta xíʼin ña̱yóʼo va̱ʼa kúnda̱a̱-iniyó xa̱ʼa̱ ña̱ ndákanixi̱níra xíʼin ña̱ ndóʼora. Ta miíyó va̱ʼa káʼa̱nyó xíʼinra ti̱xin ña̱ oración. Tá káʼa̱nyó xíʼinra, kivi natúʼunyó xíʼinra xa̱ʼa̱ ndiʼi ña̱ ndóʼoyó xíʼin ña̱ ndákanixi̱níyó. Kúúra iin migo ta̱ kúʼvi̱ní-ini xíni miíyó, xa̱ʼa̱ ña̱yóʼo su̱ví xíniso̱ʼo kuitíra ña̱ káʼa̱nyó xíʼinra chi saátu ndákuiinraña. Sava yichi̱ kamava ndákuiinra yuʼúyó. Soo savatu xíniñúʼu ndakundeékayó ka̱ʼa̱nyó xíʼinra. Nda̱a̱ ndáaka ña̱ ná kuu, kiviva kandíxayó ña̱ ndakuiinra yuʼúyó mií tiempo ña̱ xíni̱ miíra ta va̱ʼaní koo ña̱yóʼo. Ña̱ nda̱a̱ kúúña, sana va̱ása ndakuiinra nda̱a̱ táki̱ʼva kúni̱ miíyó. Sana va̱ása sakǎkura miíyó nu̱ú iin tu̱ndóʼo, soo taxivara ña̱ ndíchi xíʼin ndee̱ ndaʼa̱yó ña̱ kundeé-iniyó ya̱ʼayó nu̱ú ña̱yóʼo (1 Cor. 10:13). ¿Ndáa ki̱ʼva kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱ oración? Tá ná kundiku̱nyó ña̱ consejo yóʼo: “Ka̱ʼa̱n ni̱ʼindó xíʼin Ndióxi̱” (1 Tes. 5:17). w20.05 27, 28 párr. 7, 8

Na̱ xínu, iinlá kuití chí nu̱ú xítona ña̱ va̱ʼa va̱ása ndakavana. Tá nda̱kavana, ndáku̱ndichina ta ndákundeéna xínuna. Ta va̱ása ndákaniníxi̱nína xa̱ʼa̱ ña̱ sa̱ndákavañaʼá, chi ña̱ ndíʼi̱ka-inina xa̱ʼa̱ kúú ña̱ xa̱a̱na nda̱a̱ nu̱ú ndíʼi ta ndakiʼinna ña̱ va̱ʼa. Tá xínu miíyó na̱ ndásakáʼnu Ndióxi̱ kivi ku̱a̱ʼá yichi̱ ndakavayó, xíʼin ña̱ káʼa̱nyó á xa̱ʼa̱ ña̱ kéʼéyó iin ña̱ va̱ása va̱ʼa, á ña̱ kéʼé iin na̱ hermano iin ña̱ va̱ása kútóoyó. Ta va̱ása xíniñúʼu ndakanda̱-iniyó xíʼin ña̱yóʼo, saáchi ndiʼiyó kúúyó na̱ yiví ku̱a̱chi ta inkáchi xínuyó chí yichi̱ táñu ña̱ va̱ʼa ndakiʼinyó ña̱ kutakuyó, xa̱ʼa̱ ña̱yóʼo sava yichi̱ kivi kanindatáʼanyó á sava yichi̱ kivi keʼé na̱ hermanoyó iin ña̱ va̱ása va̱ʼa xíʼinyó ta ka̱ʼa̱n kúáchiyó xa̱ʼa̱na (Col. 3:13). Soo ná va̱ása ndakaniníxi̱níyó xa̱ʼa̱ ña̱ sa̱ndákava miíyó, ná kundi̱ʼi̱ka-iniyó xa̱ʼa̱ ña̱ ndakiʼinyó tá ná sandiʼiyó kunuyó. Ná va̱ása kindo̱oyó kundúʼuyó nu̱ú ñuʼú ta sa̱a̱yó ta ka̱ʼa̱n kúáchiyó, chi tá saá ná keʼéyó va̱ása xa̱a̱yó nda̱a̱ nu̱ú ndíʼi ta ndakiʼinyó ña̱ va̱ʼa. Ta nda̱a̱ kivi kasiyó nu̱ú inka na̱ xínu ku̱a̱ʼa̱n chí yichi̱ táñu, ña̱ va̱ʼa ndakiʼinna ña̱ kutakuna. w20.04 26 párr. 1; 28 párr. 8, 9

Ta̱ profeta Daniel káʼa̱nra xa̱ʼa̱ iin estatua ña̱ káʼnuní ña̱ na̱kuva̱ʼa xíʼin xa̱a̱ síín síín nu̱ú ña̱ʼa. Iin iin táʼví ña̱ estatua yóʼo kúú na̱ chíñu na̱ íyo ñuyǐví yóʼo, na̱ íxandi̱va̱ʼa xíʼin na̱ ñuu Ndióxi̱. Xa̱ʼa̱ ña̱ estatua ña̱ na̱kuva̱ʼa xíʼin hierro ta saátu xíʼin nda̱ʼyi̱, kúú na̱ chíñu na̱ koo tiempo nu̱ú ndíʼi, na̱yóʼo kúú na̱ Gran Bretaña xíʼin na̱ Estados Unidos. Ña̱ profecía yóʼo káʼa̱nña ña̱ kookava na̱yóʼo tá ná kixáʼa Reino Ndióxi̱ sandíʼi-xa̱ʼa̱ña na̱ chíñu na̱ íyo ñuyǐví yóʼo. Ta saátu ta̱ apóstol Juan káʼa̱nra xa̱ʼa̱ na̱ chíñu náʼnu na̱ íxandi̱va̱ʼa xíʼin na̱ ñuu Jehová. Nu̱ú profecía ña̱ ni̱ka̱ʼa̱nra, chi̱táʼanra na̱ chíñu náʼnu yóʼo xíʼin tí kití yukú tí kúúmií u̱xa̱ xi̱ní. Xi̱ní ña̱ u̱xa̱ ña̱ kúúmií tí kití yukú yóʼo, kúú na̱ chíñu náʼnu ña̱ Gran Bretaña xíʼin Estados Unidos. Iin ña̱ ndáyáʼviní kúú ña̱ kunda̱a̱-iniyó xa̱ʼa̱ ña̱yóʼo, chi xi̱ní ña̱ u̱xa̱ kúú ña̱ so̱ndíʼi. Xi̱ní ña̱ u̱xa̱ kaʼndachíñukavaña, tá ná kixaa̱ ta̱ Cristo xíʼin na̱ kítáʼan xíʼinra ña̱ sandíʼi-xa̱ʼa̱naña xíʼin tí kití yukú (Apoc. 13:1, 2; 17:13, 14). w20.05 14 párr. 11, 12

Kúnda̱a̱-iniyó ña̱ mií Ndióxi̱ kúú ta̱ ta̱xi ña̱ tákuyó, ta saátu ta̱yóʼo kúú ta̱ ta̱xi ña̱ kuʼvi̱-iniyó kuniyó inkana. Jehová kúʼvi̱-inira xínira miíyó ta xa̱ʼa̱ ña̱yóʼo va̱ása yíʼviyó, si̱í íyoyó, ta kǒo ña̱ʼa kúma̱ní nu̱úyó. Miíyó na̱ ndásakáʼnu Ndióxi̱ va̱ása kívi ndaka̱xinyó á na̱ʼa̱yó ña̱ kúʼvi̱-iniyó xíniyó inkana á va̱ása, chi ña̱yóʼo iin chiñu ña̱ xa̱ʼnda ta̱ Jesús nu̱úyó kúúña (Mat. 22:37-40). Tá sákuaʼakayó xa̱ʼa̱ Jehová, va̱ása íxayo̱ʼvi̱ña xíʼinyó ña̱ kandíxayó ña̱ nu̱ú xa̱ʼndara nu̱úyó keʼéyó, saáchi Jehová kǒo ku̱a̱chi kúúmiíra, viíní kéʼéra xíʼinyó ta náʼa̱ra ña̱ ndíʼi̱-inira xa̱ʼa̱yó. Soo sana íxayo̱ʼvi̱ña xíʼinyó ña̱ kandíxayó ña̱ u̱vi̱ xa̱ʼndara nu̱úyó keʼéyó. ¿Nda̱chun? Saáchi na̱ hermanoyó na̱ yiví ku̱a̱chi kúúna ta xa̱ʼa̱ ña̱yóʼo kivi ka̱ʼa̱nna á keʼéna iin ña̱ʼa ña̱ va̱ása va̱ʼa, ta saxóʼvi̱na miíyó. Xa̱ʼa̱ ña̱yóʼo, Jehová chi̱ka̱a̱ra ini sava na̱ ka̱ʼyí Biblia ña̱ ka̱ʼa̱nna ndáa ki̱ʼva na̱ʼa̱yó ña̱ kúʼvi̱-iniyó xíniyó inkana, ta nda̱chun ndáyáʼviní keʼéyó ña̱yóʼo. Iin na̱yóʼo kúú ta̱ apóstol Juan (1 Juan 3:11, 12). w21.01 8 párr. 1, 2

Ni loʼo á ku̱a̱ʼá kúú tiempo ña̱ káchíñuyó nu̱ú Ndióxi̱, xíniñúʼu ndakanixi̱níyó xa̱ʼa̱ ña̱yóʼo: “¿Á chíka̱i̱ ndee̱ ña̱ va̱ása taxii̱ ña̱ ndataʼví ta̱ Ndi̱va̱ʼa níma̱i̱?”. Tá kúú, ¿ndáaña kéʼéyó tá xítoyó nu̱ú televisión á Internet iin na̱ʼná á iin película ña̱ va̱ása va̱ʼa, ña̱ kivi chindaʼá miíyó keʼéyó ña̱ kini? Kivi sandáʼviyó miíyó ta ndakanixi̱níyó ña̱ su̱ví pornografía kúúña. Soo, ¿á kivi kuniñúʼu ta̱ Ndi̱va̱ʼa ña̱yóʼo ña̱ ndataʼvíra níma̱yó? Ña̱yóʼo kivi chitáʼanyóña xíʼin iin ka̱a si̱ín ña̱ xíniñúʼuna ña̱ va̱ʼa ndatána iin yitu̱n. Sana kíxáʼana chíka̱a̱na ka̱a yóʼo ti̱xin tú yitu̱n ña̱ va̱ʼa ndatánanú. Tá ndákundeéna chíka̱a̱na ka̱a yóʼo, tú yitu̱n yóʼo loʼo tá loʼo ndáta̱nú. Na̱ʼná ña̱ va̱ása va̱ʼa kivi kooña nda̱a̱ táki̱ʼva íyo ka̱a ña̱ si̱ín yóʼo. Tá kíxáʼayó xítoyóña sana kivi ndakanixi̱níyó ña̱ va̱ása ndeéví ña̱yóʼo, soo kamaní kivi ndataʼvíña níma̱yó ta chindaʼáña miíyó ña̱ xa̱a̱yó keʼéyó ña̱ va̱ása va̱ʼa, ta va̱ása nda̱kúka koo iniyó xíʼin Jehová. Xa̱ʼa̱ ña̱yóʼo, ná va̱ása taxiyó ki̱ʼvi nda̱a̱ ni iin ña̱ʼa ña̱ va̱ása va̱ʼa níma̱yó. Ná chika̱a̱yó ndee̱ ña̱ va̱ása taxiyó ndataʼví níma̱yó, ta ná yi̱ʼvíyó kuniyó Jehová. w20.06 12 párr. 14, 15

Tá xa̱a̱ nda̱ndikó na̱ ku̱xíka nu̱ú Jehová, xíniñúʼu ndakundeéyó chindeétáʼanyó xíʼinna ta chika̱a̱yó ndee̱ xíʼinna. Sana xóʼvi̱na nda̱a̱ táki̱ʼva ndo̱ʼo ta̱ loʼo ta̱ ni̱ka̱ʼa̱n ta̱ Jesús xa̱ʼa̱ (Luc. 15:17-24). Ta sana xa̱ʼa̱ ña̱ ku̱xíkána nu̱ú Jehová va̱ása viíka íyo ña̱ kítáʼanna xíʼinra. Xa̱ʼa̱ ña̱yóʼo, xíniñúʼu chindeétáʼanyó xíʼinna ña̱ ndundakú ña̱ kándíxanara. Nu̱ú parábola ña̱ káʼa̱n xa̱ʼa̱ tí ndikachi tí nda̱ñúʼu, ta̱ Jesús ni̱ka̱ʼa̱nra ña̱ nda̱kiʼin ta̱ pastor tíyóʼo númindaara ta níʼirarí ku̱a̱ʼa̱n xíʼinra nu̱ú ndóo tí inka. Ta̱ pastor xi̱niñúʼura tiempora xíʼin ndee̱ra ña̱ na̱ndukúrarí. Ta kúnda̱a̱-inira ña̱ xíniñúʼu chindeétáʼanra xíʼinrí ña̱ ndandikórí, chi va̱ása kuchiñu iinlá miírí keʼérí ña̱yóʼo (Luc. 15:4, 5). Ta sana xíniñúʼu kuniñúʼuyó tiempoyó xíʼin ndee̱yó, ña̱ chindeétáʼanyó xíʼin na̱ ku̱xíká nu̱ú Jehová ña̱ ndakutáʼan viína xíʼinra. Ta ña̱ kivi chindeétáʼan xíʼinyó kúú espíritu santo Jehová, Biblia xíʼin tutu ña̱ tává na̱ ñuura. w20.06 28 párr. 14, 15

Ndiʼiyó xíniñúʼu kuʼvi̱-iniyó kunitáʼanyó, ña̱ va̱ʼa na̱ʼa̱yó ña̱ ndixa ndíku̱nyó ta̱ Cristo. Soo, saátu xíniñúʼu ndakundeéyó sakúaʼayó, ta vií ndakanixi̱níyó (Filip. 1:9). Tá ná va̱ása keʼéyó ña̱yóʼo, kivi kixáʼayó kandíxayó inka ña̱ʼa á tu̱ʼun vatá ña̱ káʼa̱n na̱ yiví na̱ sándaʼvi, tá kúú na̱ apóstata (Efes. 4:14). Tá siglo nu̱ú, tá sa̱ndákoo ku̱a̱ʼánína ta̱ Jesús ta va̱ása níxi̱yokana discípulora, ta̱ apóstol Pedro ni̱ka̱ʼa̱nra ña̱ iinlá ta̱ Jesús “kúú ta̱ káʼa̱n tu̱ʼun ña̱ taxi ña̱ kutaku na̱ yiví ndiʼi tiempo” (Juan 6:67, 68). Tá ni̱ka̱ʼa̱n ta̱ Pedro ña̱yóʼo, va̱ása níkunda̱a̱ va̱ʼa inira ndáaña kúni̱ kachiña, soo nda̱kú ni̱xi̱yo inira saáchi xi̱kandíxara ta̱ Cristo. Ta saátu miíyó tá ná kandíxayó ña̱ nda̱a̱ kúú ña̱ sánáʼa̱ Biblia, ndakundeéyó kandíxayó Ndióxi̱ ni nda̱a̱ ndáaka nu̱ú tu̱ndóʼo ná ya̱ʼayó, ta chindeétáʼanyó xíʼin inkana ña̱ ndakú koo ña̱ kándíxanara (2 Juan 1, 2). w20.07 8 párr. 2; 13 párr. 18

Kivi chindeétáʼanyó xíʼin na̱ hermano ña̱ ndakundeéna kandíxana ña̱ nda̱a̱ tá kúndáʼvi-iniyó xíniyóna (1 Juan 3:10, 11, 16, 17). Ndiʼi tiempo kúú ña̱ xíniñúʼu kuʼvi̱-iniyó kunitáʼanyó. Tá kúú, ¿á xíni̱yó iin na̱ hermano na̱ sa̱kán ni̱xi̱ʼi̱ iin táʼan, ta xíniñúʼu sandíkoyó-inina á chindeétáʼanyó xíʼinna? ¿Á kúnda̱a̱-iniyó ña̱ íyo sava na̱ hermano na̱ xíniñúʼu chindeétáʼanyó xíʼin ña̱ ndasaviíyó veʼe nu̱ú ndátakana ña̱ sakúaʼana xa̱ʼa̱ Ndióxi̱? ¿Á ña̱ sandáʼayó veʼena xa̱ʼa̱ ña̱ ndeéní ku̱un sa̱vi̱ á xa̱ʼa̱ ña̱ ni̱ta̱an? Tá ndixa kúʼvi̱-iniyó xíniyó na̱ hermano, va̱ása ka̱ʼa̱n kuitíyóña chi saátu na̱ʼa̱yóña xíʼin ña̱ kéʼéyó. Tá náʼa̱yó ña̱ kúʼvi̱-iniyó xínitáʼanyó, kéʼéyó nda̱a̱ táki̱ʼva kéʼé yiváyó ta̱ íyo chí ndiví (1 Juan 4:7, 8). Tá íxakáʼnu-iniyó xa̱ʼa̱ inkana saá kúú ña̱ náʼa̱yó ña̱ kúʼvi̱-iniyó xíniyóna. Tá kéʼéna ña̱ va̱ása va̱ʼa xíʼinyó, íxakáʼnu-iniyó xa̱ʼa̱na ta nándósóyó xa̱ʼa̱ ña̱ ke̱ʼéna xíʼinyó chi kúʼvi̱-iniyó xíniyóna (Col. 3:13). w20.07 24 párr. 14, 15

¿Á iin tá iin na̱ ndataku sanáʼa̱yó xa̱ʼa̱ Ndióxi̱ nda̱a̱ táki̱ʼva xa̱a̱ kéʼéyó tiempo vitin? ¿Á koo congregación na̱ ndataku yóʼo ta á xíniñúʼu ka̱ʼa̱nna xíʼinna ndáa ki̱ʼva sanáʼa̱na inkaka na̱ ndataku? Tá ná kuu ña̱yóʼo saáví kunda̱a̱-iniyó xa̱ʼa̱ña. Soo kúnda̱a̱va-iniyó ña̱ tá ná ndiʼi ña̱ mil ku̱i̱ya̱ ña̱ kaʼndachíñu ta̱ Cristo ndiʼi na̱ yiví na̱ kundoo nu̱ú ñuʼú yóʼo kunda̱a̱-inina xa̱ʼa̱ Jehová (Is. 11:9). Kooní chiñu ti̱xin ña̱ mil ku̱i̱ya̱ ta liviní kooña. Ti̱xin ña̱ mil ku̱i̱ya̱ ndiʼi na̱ ndásakáʼnu Ndióxi̱ xíniñúʼu nasamana ki̱ʼva ña̱ íyona ña̱ va̱ʼa sakúsi̱ína-inira. Xa̱ʼa̱ ña̱yóʼo, kúee koo inina xíʼin na̱ ndataku chi chindeétáʼanna xíʼinna ña̱ nasamana ña̱ ndákanixi̱nína xíʼin ña̱ kéʼéna, tasaá kutakuna nda̱a̱ táki̱ʼva kúni̱ mií Jehová (1 Ped. 3:8). Tá ná kuni na̱ ndataku, ña̱ vitání-ini na̱ ñuu Ndióxi̱ ta chíka̱a̱na ndee̱ ña̱ nasamana ña̱ kéʼéna ta sákusi̱ína-inira, saátu na̱ ndataku kuni̱na ndasakáʼnunara (Filip. 2:12). w20.08 15, 16 párr. 6, 7

Tá ná kundiku̱nyó consejo ña̱ ta̱xi ta̱ apóstol Pablo ta viíní kotoyó ndáaña kúú ña̱ kéʼéyó, sana kivi kunda̱a̱-iniyó ña̱ íyo sava ña̱ʼa ña̱ xíni̱yó keʼéyó soo va̱ása xíni̱ inkana keʼénaña. Tá kúú, sana iin ta̱ anciano íxayo̱ʼvi̱ña xíʼinra taxira discurso, soo va̱ʼaní nátúʼunra xíʼin na̱ yiví xa̱ʼa̱ Ndióxi̱. Á sana íxayo̱ʼvi̱ña xíʼinra keʼéra chiñura nda̱a̱ táki̱ʼva kéʼé inka na̱ anciano ti̱xin congregación, soo kúʼvi̱-inira xínira na̱ hermano ña̱kán va̱ʼaní kúnina tá ndúkúna consejo nu̱úra. Á sanatu ku̱a̱ʼána xíni̱na ña̱ va̱ʼaní-inira (Heb. 13:2, 16). Tá ná kunda̱a̱ káxi iniyó ndáaña kúú ña̱ xíni̱yó keʼéyó, saá kúú ña̱ kusi̱í-iniyó xa̱ʼa̱ ña̱ chíndeétáʼanyó xíʼin na̱ congregación. Ta saátu va̱ása sa̱a̱-iniyó kuniyó na̱ hermano na̱ xíni̱ keʼé inka ña̱ʼa nu̱ú miíyó. Ni nda̱a̱ ndáaka chiñu kúú ña̱ kúúmiíyó ti̱xin congregación, ndiʼiyó xíniñúʼu chika̱a̱-iniyó ña̱ va̱ʼaníka keʼéyó chiñu nu̱ú Ndióxi̱ ta viíníka sanáʼa̱yó inkana. w20.08 23, 24 párr. 16-18

Iin discurso ña̱ nani “La grande muchedumbre”. Ta̱ hermano Joseph Rutherford kúú ta̱ ta̱xi ña̱yóʼo tá ku̱i̱ya̱ 1935, ti̱xin iin asamblea ña̱ ni̱xi̱yo chí ñuu Washington (Estados Unidos). Ti̱xin discurso ña̱ ta̱xi ta̱ hermano Rutherford ni̱ka̱ʼa̱nra ndáana kúú na̱ “gran muchedumbre” na̱ káʼa̱n Apocalipsis 7:9 xa̱ʼa̱. Na̱ xi̱kaʼvi Biblia xi̱ndakanixi̱nína ña̱ na̱ gran muchedumbre kúúna inka tiʼvi na̱ yiví na̱ ku̱ʼu̱n chí ndiví, soo va̱ása nda̱kúní níxi̱yo inina xíʼin Ndióxi̱. Ta̱ hermano Rutherford xi̱niñúʼura Biblia ña̱ va̱ʼa ka̱ʼa̱nra xa̱ʼa̱ na̱ gran muchedumbre ña̱ va̱ása níndaka̱xin Ndióxi̱ na̱yóʼo ña̱ koona chí ndiví, chi na̱yóʼo kúú na̱ inkaka ndikachi na̱ kúú kuenta ta̱ Cristo, na̱ ka̱ku tá ná kuu ña̱ gran tribulación ta kutakuna ndiʼi tiempo nu̱ú ñuʼú yóʼo (Apoc. 7:14). Ta̱ Jesús ni̱ka̱ʼa̱nra ña̱yóʼo: “Íyo inkaka ndikachi sa̱na̱i̱, ta kǒorí ñúʼu ti̱xin ña̱ corra yóʼo; ku̱ʼu̱ntui̱ ndakiʼi̱n tíyóʼova, ta tíyóʼo kuniso̱ʼorí ña̱ káʼi̱n. Ta iin ndakutáʼan ndiʼirí ta iinlá nduu pastor tíyóʼo” (Juan 10:16). Na̱ inkaka ndikachi yóʼo kúú na̱ testigo Jehová na̱ nda̱kú-ini, ta ndátuna koona ndiʼi tiempo nu̱ú ñuʼú yóʼo tá ná nduliviña (Mat. 25:31-33, 46). w21.01 14 párr. 1, 2

Miíyó na̱ yiví kútóokayó keʼéyó chiñu ña̱ va̱ása yo̱ʼvi̱. Soo sava yichi̱ iin chiñu ña̱ ndáyáʼvi yo̱ʼvi̱va keʼéyóña. Xa̱ʼa̱ ña̱yóʼo xíniñúʼu chika̱a̱níyó ndee̱ keʼéyóña (Mat. 28:19, 20). Ña̱kán, tá kúni̱yó keʼéyó iin chiñu ña̱ íxayo̱ʼvi̱ xíʼinyó xíniñúʼu chindeétáʼanna xíʼinyó. Ta mií Jehová kúú ta̱ kivi kuniñúʼu espíritu santora ña̱ va̱ʼa chindeétáʼanra xíʼinyó (Gál. 5:22, 23). Ta̱ apóstol Pablo chi̱ka̱a̱níra ndee̱ ña̱ vií ke̱ʼéra chiñura, soo nda̱kunira ña̱ xi̱niñúʼu chika̱a̱níra ndee̱ keʼéra ña̱ nda̱kú (1 Cor. 9:25-27). Ta ni̱ka̱ʼa̱nra xíʼin na̱ cristiano ña̱ ná chika̱a̱na ndee̱ ña̱ viíní ná keʼéna chiñuna (1 Cor. 14:40). Xíniñúʼu chika̱a̱níyó ndee̱ ña̱ vií keʼéyó chiñuyó ña̱ ku̱ʼu̱nyó natúʼunyó xíʼin na̱ yiví xa̱ʼa̱ Ndióxi̱, tá saá ná keʼéyó ndakundeéyó ndasakáʼnuyó Jehová (Hech. 2:46). w20.09 6, 7 párr. 15-17

Tiempo vitin, íyo ku̱a̱ʼání lugar nu̱ú va̱ása sásina nu̱úyó ña̱ natúʼunyó xíʼin na̱ yiví xa̱ʼa̱ Ndióxi̱. Tá ndóoyó iin país nu̱ú táxina ndasakáʼnuyó Ndióxi̱, ná ndakanixi̱níyó xa̱ʼa̱ ña̱yóʼo: “¿Á vií xíniñúʼi̱ tiempo yóʼo?”. Tiempo nu̱ú ndíʼi vitin, na̱ ñuu Jehová kéʼéna iin chiñu ña̱ káʼnuní ña̱ nátúʼunna xíʼin na̱ yiví xa̱ʼa̱ Ndióxi̱ ta sánáʼa̱nana. Kúsi̱íní-iniyó saáchi íyo ku̱a̱ʼání ki̱ʼva ña̱ kachíñukayó nu̱ú Jehová. Tá ndóoyó tiempo ña̱ kǒo ku̱a̱chi, ¿ndáa ki̱ʼva kivi kuniñúʼuyóña? (2 Tim. 4:2). Ná ndakanixi̱níyó xa̱ʼa̱ ña̱ kivi keʼé miíyó á iin na̱ veʼeyó ña̱ va̱ʼa natúʼunkana xa̱ʼa̱ Ndióxi̱ xíʼin na̱ yiví, ta nda̱a̱ kivi xa̱a̱na koona precursor. Va̱ása kúúña tiempo ña̱ kuumiíyó ku̱a̱ʼáka ña̱ ku̱i̱ká, chi ña̱ ndiʼi-xa̱ʼa̱va kúú ña̱yóʼo ti̱xin ña̱ gran tribulación (Prov. 11:4; Mat. 6:31-33; 1 Juan 2:15-17). Ku̱a̱ʼání na̱ publicador xa̱a̱ sákuaʼana inka tu̱ʼun ña̱ va̱ʼa natúʼunna, ta sanáʼa̱na inka na̱ yiví xa̱ʼa̱ Ndióxi̱. Ta na̱ ñuu Jehová yáʼaka 1,000 nu̱ú tu̱ʼun sándaya̱ʼana tutu ña̱ távána ña̱ va̱ʼa chindeétáʼanna xíʼinna. w20.09 16 párr. 9-11

Nda̱kúní-ini iin soldado. Chíka̱a̱níra ndee̱ ña̱ va̱ʼa sakǎkura iin na̱ kúʼvi̱ní-inira xínira á iin ña̱ʼa ña̱ ndáyáʼviní nu̱úra. Ta̱ Pablo ni̱ka̱ʼa̱nra xíʼin ta̱ Timoteo ña̱ ná ndasakáʼnura iinlá Ndióxi̱, ña̱yóʼo kúni̱ kachiña ña̱ kuʼvi̱-inira kunira Ndióxi̱ ta nda̱kú koo inira xíʼinra (1 Tim. 4:7). Tá ná kuʼvi̱ka-iniyó kuniyó Ndióxi̱, va̱ása kuni̱yó sandákooyó ña̱ nda̱a̱ (1 Tim. 4:8-10; 6:6). Iin ta̱ kúú soldado xíniñúʼu chika̱a̱ra ndee̱ ña̱ saxínura chiñura. Ta saátu ta̱ Timoteo sa̱xínura chiñura ña̱ xi̱kuura soldado ta̱ Cristo, saáchi xi̱ndiku̱nra consejo ña̱ ta̱xi ta̱ Pablo ndaʼa̱ra ña̱ kǒo keʼéra ña̱ va̱ása va̱ʼa, ña̱ kuumiíra ña̱ va̱ʼa ña̱ xíniñúʼu kuumií na̱ ndíku̱n ta̱ Cristo ta saátu ña̱ kutáʼanra xíʼin na̱ hermano (2 Tim. 2:22). Xi̱niñúʼu chika̱a̱níra ndee̱ ña̱ va̱ʼa keʼéra ña̱yóʼo. Ta saátu miíyó xíniñúʼu chika̱a̱yó ndee̱ ña̱ kǒo keʼéyó ña̱ va̱ása va̱ʼa (Rom. 7:21-25). Ta xíniñúʼu chika̱a̱yó ndee̱ ña̱ nasamayó ña̱ xi̱keʼéyó tasaá keʼéyó ña̱ kúni̱ Ndióxi̱ (Efes. 4:22, 24). Ta, tá íyo iin ki̱vi̱ ña̱ ku̱naáníyó sana saá kúú ña̱ xíniñúʼu chika̱a̱níkayó ndee̱ ña̱ ku̱ʼu̱nyó reunión (Heb. 10:24, 25). w20.09 28 párr. 9-11

Xíniñúʼu kúee koo iniyó ña̱ va̱ʼa chindeétáʼanyó xíʼin na̱ káʼviyó xíʼin ña̱ ndataxina miína ndaʼa̱ Ndióxi̱, ta ndakuchina. Soo saátu xíniñúʼu kunda̱a̱-iniyó á kúni̱na kachíñuna nu̱ú Jehová á va̱ása. ¿Á chíka̱a̱na ndee̱ ña̱ keʼéna ña̱ ni̱ka̱ʼa̱n ta̱ Jesús? ¿Á káʼvina xa̱ʼa̱ ña̱ kútóo kuitína ña̱ sákuaʼana nu̱ú Biblia? Ná kotoyó á xa̱a̱ ku̱a̱ʼa̱n xáʼnuna xíʼin tu̱ʼun Ndióxi̱. Tá kúú, ¿á káʼa̱nna ña̱ kúʼvi̱-inina xínina Jehová? ¿Á kéʼéna oración? (Sal. 116:1, 2). ¿Á kútóona kaʼvina Biblia? (Sal. 119:97). ¿Á xáʼa̱n ni̱ʼina reunión? (Sal. 22:22). ¿Á xa̱a̱ na̱samana ña̱ kéʼéna? ¿Á xa̱a̱ nátúʼunna xíʼin na̱ veʼena á xíʼin na̱ migona xa̱ʼa̱ ña̱ sákuaʼana? (Sal. 9:1). Soo ña̱ ndáyáʼvika kúú, ¿á kúni̱na koona testigo Jehová? (Sal. 40:8). Tá xítoyó ña̱ kǒo kéʼéna nda̱a̱ ni iin ña̱yóʼo, ná kotoyó nda̱chun kúú ña̱ íxayo̱ʼvi̱ña xíʼinna, tándi̱ʼi vií ná ka̱ʼa̱nyó xíʼinna xa̱ʼa̱ña, soo káxi ná ka̱ʼa̱nyó xíʼinna. w20.10 18 párr. 14, 15

Yivá ta̱ Jesús ta̱ íyo chí ndiví va̱ʼaní íyo ña̱ ndáka̱xinra keʼéra, ta saátu na̱ xi̱kuu yivára nu̱ú ñuʼú yóʼo va̱ʼaní íyo ña̱ nda̱kaxinna ke̱ʼéna. Soo tá xa̱ʼnu ta̱ Jesús xi̱niñúʼu ndaka̱xin miíra ña̱ keʼéra (Gál. 6:5). Nda̱a̱ táki̱ʼva íyo miíyó ña̱ kivi ndaka̱xinyó ña̱ keʼéyó, saá ni̱xi̱yo ta̱kán. Kiviva ndaka̱xinra keʼéra ña̱ kúni̱ miíra soo nda̱kaxinra ña̱ vií kutáʼanra xíʼin Jehová. Tá ku̱ndaa̱-ini ta̱ Jesús ndáaña kúú ña̱ keʼéra ña̱ va̱ʼa xi̱nu ña̱ kúni̱ Jehová, nda̱kaxinra keʼéraña (Juan 6:38). Xi̱kunda̱a̱-inira ña̱ ku̱a̱ʼání na̱ yiví sa̱a̱-inina kuninara ta sana va̱ása níkutóora ña̱yóʼo. Soo chi̱ka̱a̱-inira ña̱ kandíxara ña̱ káʼa̱n Jehová. Tá nda̱kuchira ku̱i̱ya̱ 29, iinlá ña̱ ni̱ndi̱ʼi̱-inira xa̱ʼa̱ kúú ña̱ keʼéra ña̱ kúni̱ yivára (Heb. 10:5-7). Chi Iinlá ña̱yóʼo kúú ña̱ xi̱kuni̱ra keʼéra ni ni̱xo̱ʼvi̱ra tá xi̱tikaara ndaʼa̱ yitu̱n (Juan 19:30). w20.10 29 párr. 12; 30 párr. 15

¿Á kúnda̱a̱-iniyó xa̱ʼa̱ iin na̱ hermano na̱ íyo ti̱xin congregación ta xóʼvi̱na xa̱ʼa̱ ña̱ kúúmiína iin tu̱ndóʼo, iin kue̱ʼe̱ á xa̱ʼa̱ ña̱ ni̱xi̱ʼi̱ iin na̱ veʼena? Tá kúnda̱a̱-iniyó xa̱ʼa̱ iin na̱ xóʼvi̱, kivi ka̱ʼa̱nyó xíʼin Jehová ña̱ ná chindeétáʼanra xíʼinyó ña̱ vií ka̱ʼa̱nyó xíʼinna á ña̱ chindeétáʼanyó xíʼinna. Ta ña̱yóʼo kivi chika̱a̱ña ndee̱ xíʼinna (1 Ped. 4:10). Kúnda̱a̱-iniyó ña̱ chíndeétáʼan Jehová xíʼinyó. Ña̱ va̱ʼa keʼéra ña̱yóʼo xíniñúʼura ta̱ Jesús, na̱ ángel ta saátu kivi kuniñúʼura na̱ kúúmií iin chiñu ña̱ va̱ʼa chindeétáʼanra xíʼinyó tasaá xi̱nu ña̱ kúni̱ra. Ta saátu xa̱a̱ kúnda̱a̱-iniyó ña̱ xíniñúʼura espíritu santora ña̱ va̱ʼa kuni̱yó chindeétáʼanyó xíʼin na̱ hermanoyó. Tasaá, kivi ka̱ʼa̱nyó nda̱a̱ táki̱ʼva ni̱ka̱ʼa̱n ta̱ apóstol Pablo: “Jehová kúú ta chíndeétáʼan xíʼi̱n. Va̱ása yi̱ʼvíi̱. ¿Ndáaña keʼé na̱ yiví xíʼi̱n?” (Heb. 13:6). w20.11 17 párr. 19, 20

Na̱ apóstol xi̱kunda̱a̱-inina ña̱ xi̱chindeétáʼan Jehová xíʼinna, saáchi ta̱xira ndee̱ ndaʼa̱na ña̱ va̱ʼa ke̱ʼéna milagro (Hech. 5:12-16; 6:8). Tiempo vitin va̱ása táxika Jehová ndee̱ ndaʼa̱yó ña̱ keʼéyó milagro, soo nu̱ú tu̱ʼunra káʼa̱nra xíʼinyó ña̱ taxira espíritu santora ndaʼa̱yó tá sásina nu̱úyó ña̱ ndasakáʼnuyóra, ta kusi̱í-inira xíʼin ña̱ kéʼéyó (1 Ped. 3:14; 4:14). Ña̱kán, nu̱úka ña̱ ndakaniníxi̱níyó ndáaña keʼéyó chí nu̱únínu tá ná ixandi̱va̱ʼana xíʼinyó, va̱ʼaka ná ndakanixi̱níyó ndáaña kivi keʼéyó vitin ña̱ va̱ʼa kandíxakayó ña̱ chindeétáʼan Jehová xíʼinyó, ta sakǎkura miíyó. Ta ná ndakaʼányó xa̱ʼa̱ ña̱ ni̱ka̱ʼa̱n ta̱ Jesús: “Saáchi yi̱ʼi̱ taxi tu̱ʼun ña̱ ka̱ʼa̱nndó ta taxii̱ ña̱ ndíchi ndaʼa̱ndó ta ndiʼi na̱ sáa̱-ini xíni ndóʼó kǒo ni̱ʼína ndáaña ndakuiinna”. Ta saátu ni̱ka̱ʼa̱nra ña̱yóʼo: “Tá ná kundeé-inindó saá kúú ña̱ ka̱kundó” (Luc. 21:12-19). Ta ná ndakaʼányó, tá xíʼi̱ iin na̱ nda̱kú ni̱xi̱yo ini xíʼin Jehová ndákaʼánra ndáa ki̱ʼva ni̱xi̱yona ta sandátakurana. w21.01 4 párr. 12

Su̱ví nda̱saa ta̱ apóstol Pablo níka̱ʼa̱n xa̱ʼa̱ ña̱ ndataku na̱ ni̱xi̱ʼi̱, chi saátu ta̱ Job iin ta̱ xi̱ndasakáʼnu Ndióxi̱, xa̱a̱ ni̱ka̱ʼa̱nra ña̱ kándíxara ña̱ ndakaʼán Ndióxi̱ xa̱ʼa̱ra ta sandátakurara (Job 14:7-10, 12-15). Iin ña̱ kándíxaní na̱ cristiano kúú ña̱ ndataku na̱ ni̱xi̱ʼi̱, ta ña̱yóʼo kúú ña̱ siʼna ki̱xáʼayó sákuaʼayó xa̱ʼa̱ (Heb. 6:1, 2). Viíní ni̱ka̱ʼa̱n ta̱ apóstol Pablo xa̱ʼa̱ ña̱yóʼo nu̱ú 1 Corintios capítulo 15. Ña̱ ni̱ka̱ʼa̱nra chi̱ka̱a̱níña ndee̱ xíʼin na̱ hermano na̱ ni̱xi̱yo tá siglo nu̱ú, ta saátu kivi chika̱a̱ña ndee̱ xíʼinyó ni xa̱a̱ ku̱a̱ʼání ku̱i̱ya̱ kúú ña̱ kándíxayó ña̱ ndataku na̱ ni̱xi̱ʼi̱. Kivi kandíxayó ña̱ ndataku na̱ táʼanyó na̱ ni̱xi̱ʼi̱ xa̱ʼa̱ ña̱ kándíxayó ña̱ nda̱taku ta̱ Jesucristo. Ta ña̱yóʼo kúú tu̱ʼun va̱ʼa ña̱ na̱túʼun ta̱ Pablo xíʼin na̱ ñuu Corinto (1 Cor. 15:1, 2). Ta saátu ni̱ka̱ʼa̱nra xíʼinna ña̱ kǒo ndáyáʼvi ña̱ kándíxana Ndióxi̱ tá kǒo kándíxana ña̱ nda̱taku ta̱ Cristo (1 Cor. 15:17). w20.12 2 párr. 2-4

¿Ndáaña chi̱ndeétáʼan xíʼin ta̱ apóstol Pedro ña̱ va̱ása ndakavaka-inira? Nda̱kaʼánra ña̱ ni̱ka̱ʼa̱n ta̱ Jesús xíʼin Ndióxi̱ xa̱ʼa̱ra ña̱ va̱ʼa ná ndakundeéra kandíxarara. Ta nda̱kuiinva Jehová ña̱ ni̱ka̱ʼa̱n ta̱ Jesús xíʼinra, tá ni̱ya̱ʼa loʼo tiempo ta̱ Jesús ki̱tara nu̱ú ta̱ Pedro ña̱ va̱ʼa ndasandakúra-inira (Luc. 22:32; 24:33, 34; 1 Cor. 15:5). Inka yichi̱, tá ka̱chíñu na̱ apóstol iníí ñuú ña̱ va̱ʼa tiinna ti̱a̱ká soo kǒorí nítiina, ta̱ Jesús ki̱tara nu̱úna ta kán kúú nu̱ú ni̱ka̱ʼa̱n ta̱ Pedro xíʼinra ña̱ kúʼvi̱-inira xínirara. Ta ni̱na̱ʼa̱ ta̱ Jesús ña̱ i̱xakáʼnu-inira xa̱ʼa̱ra, chi ta̱xikara ku̱a̱ʼá chiñu ndaʼa̱ra (Juan 21:15-17). Ña̱ ke̱ʼé ta̱ Jesús xíʼin ta̱ Pedro ni̱na̱ʼa̱ña ña̱ ku̱ndáʼvi-inira xi̱nirara, nda̱a̱ táki̱ʼva kéʼé yivára. Ña̱kán tá ná keʼéyó iin ña̱ va̱ása va̱ʼa ná kǒo ndakanixi̱níyó ña̱ va̱ása ixakáʼnu-ini Jehová xa̱ʼa̱yó. Ná ndakaʼányó chi ta̱ Ndi̱va̱ʼa kúú ta̱ kúni̱ ña̱ ná ndakanixi̱níyó saá. Ña̱kán ná ndakanixi̱níyó xa̱ʼa̱ ña̱ kúʼvi̱-ini Jehová ta kundáʼvi-inira xínira miíyó, ta kúni̱ra ixakáʼnu-inira xa̱ʼa̱yó. Ta ná kundiku̱nyó yichi̱ra tá kéʼé inkana ña̱ va̱ása va̱ʼa xíʼinyó (Sal. 103:13, 14). w20.12 20, 21 párr. 17-19

Kivi sakuaʼayó xíʼin ña̱ va̱ása va̱ʼa ke̱ʼé savana, saáchi va̱ása táxi̱n níxi̱yo inina ta ni va̱ása níkandíxana Jehová. Tá ná kaʼviyó xa̱ʼa̱ na̱yóʼo chindeétáʼanña xíʼinyó ña̱ va̱ása keʼéyó táʼan ña̱ ke̱ʼéna. Tá ki̱xáʼa ta̱ rey Asá xáʼndachíñura xi̱ka̱ʼa̱nra xíʼin Jehová ña̱ ná chindeétáʼanra xíʼinra tá ni̱xi̱yo tu̱ndóʼo nu̱úra. Soo tá ni̱ya̱ʼa tiempo va̱ása níka̱ʼa̱nkara xíʼin Jehová ña̱ chindeétáʼanra xíʼinra, ta ki̱xáʼara kéʼéra ña̱ kúni̱ miíra (2 Crón. 16:1-3, 12). Ta̱ Asá nda̱kanixi̱níra ña̱ iin ña̱ va̱ʼava kúú ña̱ ka̱ʼa̱nra xíʼin na̱ ñuu Siria ña̱ ná chindeétáʼanna xíʼinra ña̱ kanitáʼanra xíʼin na̱ ñuu Israel. Soo va̱ása va̱ʼa níkana ña̱ nda̱kaxinra ke̱ʼéra. Jehová xi̱niñúʼura iin profeta ña̱ va̱ʼa ka̱ʼa̱nra ña̱yóʼo xíʼinra: “Xa̱ʼa̱ ña̱ ka̱ndíxaún ta̱ rey ñuu Siria ta va̱ása níkandíxaún Jehová Ndióxi̱ miíún, va̱ása kivika kanitáʼún xíʼin na̱ soldado ta̱ rey ñuu Siria” (2 Crón. 16:7). Ta saátu miíyó xíniñúʼu kiʼinyó kuenta ña̱ va̱ása ndakanixi̱níyó ña̱ xa̱a̱ xíni̱níyó keʼéyó iin ña̱ʼa, ta xa̱ʼa̱ ña̱yóʼo va̱ása ka̱ʼa̱nyó xíʼin Jehová ña̱ chindeétáʼanra xíʼinyó. Sava yichi̱ tá yáʼayó nu̱ú iin tu̱ndóʼo xíniñúʼu kamaní ndaka̱xinyó ndáaña keʼéyó. Soo ni saá, tá táxi̱n ná koo iniyó ta kandíxayó Jehová, vií kana ña̱ ndaka̱xinyó keʼéyó. w21.01 6 párr. 13-15

Tiempo vitin sava na̱ hermano kǒo ña̱ kuxuna saáchi kǒo xu̱ʼún kúúmiína, á xóʼvi̱na xa̱ʼa̱ ña̱ íyoní tu̱ndóʼo xíʼin ku̱a̱chi ñuu nu̱ú íyona. Ta inkana ñúʼuna veʼeka̱a xa̱ʼa̱ ña̱ ndásakáʼnuna Ndióxi̱. Na̱ gran muchedumbre kúsi̱í-inina chi tá ná ndiʼi-xa̱ʼa̱ ñuyǐví ta̱ Ndi̱va̱ʼa, kooní ña̱ kuxuna saátu ña̱ sakúaʼana xa̱ʼa̱ Jehová. Tá ná sandíʼi-xa̱ʼa̱ Jehová ñuyǐví ta̱ Ndi̱va̱ʼa, kundaara na̱ gran muchedumbre nu̱ú ña̱ sáa̱ra, ña̱ íyo nda̱a̱ táki̱ʼva íyo “ña̱ niʼníní”. Tá ná ndiʼi ña̱ gran tribulación, ta̱ Jesús kuniʼira yichi̱ nu̱ú na̱ ka̱ku ta ku̱ʼu̱nra xíʼinna nu̱ú kána “ti̱kui̱í tá taxi ña̱ kutakuna ndiʼi tiempo” (Rev. 7:17). Ndakanixi̱ní xa̱ʼa̱ ña̱ va̱ʼaní ndakiʼin na̱ gran muchedumbre: xa̱a̱ ku̱a̱ʼání na̱ yiví ni̱xi̱yo nu̱ú ñuʼú yóʼo ta ni̱xi̱ʼi̱na, soo na̱ gran muchedumbre va̱ása kunda̱a̱-inina ndáa ki̱ʼva ndóʼo iin na̱ yiví tá xíʼi̱na chi sana va̱ása kuvina (Juan 11:26). Na̱ kúú inkaka ndikachi táxinína tíxa̱ʼvi ndaʼa̱ Jehová ta saátu ta̱ Jesús, xa̱ʼa̱ ña̱ va̱ʼaní ndátuna ndakiʼinna chí nu̱únínu. w21.01 17 párr. 11, 12

Ñuú tá kúma̱níka kuvi ta̱ Jesús nda̱kanixi̱níra xa̱ʼa̱ tu̱ndóʼo ña̱ ya̱ʼa na̱ discípulora nu̱ú. Xa̱ʼa̱ ña̱ xi̱kuʼvi̱-inira xi̱xinirana ni̱ka̱ʼa̱nra xíʼin yivára ña̱ ná kundaarana nu̱ú ta̱ Ndi̱va̱ʼa (Juan 17:14, 15). Xi̱kunda̱a̱-inira ña̱ tá ná ndikóra chí ndiví, ta̱ Ndi̱va̱ʼa ndakundeéra kanitáʼanra xíʼin ndiʼi na̱ kúni̱ kachíñu nu̱ú Jehová. Ña̱yóʼo náʼa̱ káxiña ña̱ xíniñúʼu kundaa Jehová na̱ ñuura (Apoc. 12:12). Ta saátu sándaʼvira na̱ yiví ña̱ kixáʼana ndakanixi̱nína ña̱ “kéʼéna iin chiñu nu̱ú Ndióxi̱” tá íxandi̱va̱ʼana xíʼinyó (Juan 16:2). Ta na̱ va̱ása kándíxa Ndióxi̱ íxandi̱va̱ʼana xíʼinyó, saáchi va̱ása kéʼéyó táʼan ña̱ kéʼé na̱ ñuyǐví yóʼo. Ni nda̱a̱ ndáaka ña̱ ná keʼéna va̱ása yíʼviyó. ¿Nda̱chun? Chi iin ña̱ chíndeétáʼan xíʼinyó kúú ña̱ káʼa̱n ña̱ texto ki̱vi̱ vitin. w21.03 26 párr. 1, 3

Ndiʼi ña̱ kéʼé Jehová kéʼéraña xa̱ʼa̱ ña̱ kúʼvi̱-inira xínira miíyó, ta saátu táxira ndiʼi ña̱ʼa ña̱ xíniñúʼuyó. Xa̱ʼa̱ ña̱ kúʼvi̱-ini Jehová xínira miíyó ta̱xira se̱ʼera ña̱ va̱ʼa ndatavára miíyó ndaʼa̱ ku̱a̱chi, ta saátu kúʼvi̱ní-ini ta̱ Jesús xínira miíyó chi ka̱ndíxara kuvira xa̱ʼa̱yó (Juan 3:16; 15:13). Kǒo nda̱a̱ ni iin ña̱ʼa ña̱ kivi kasi nu̱ú Jehová ta saátu ta̱ Jesús ña̱ ndakundeéna kuʼvi̱-inina kunina miíyó (Juan 13:1; Rom. 8:35). Ndiʼi ña̱ kéʼé ta̱ níʼi yichi̱ nu̱ú na̱ veʼera xíniñúʼu keʼéraña xa̱ʼa̱ ña̱ kúʼvi̱-inira xínirana. ¿Nda̱chun ndáyáʼviní keʼéra ña̱yóʼo? Saáchi ta̱ apóstol Juan ka̱chira: “Na̱ va̱ása kúʼvi̱-ini xíni ñanina [á na̱ veʼena] na̱ xínina, kǒo kívi kuʼvi̱-inina kunina Ndióxi̱ ta̱ kǒo xínina” (1 Juan 4:11, 20). Xa̱ʼa̱ ña̱kán, tá kúʼvi̱-ini iin ta̱a xínira na̱ veʼera ta kúni̱ra kundiku̱nra yichi̱ Jehová ta saátu ta̱ Jesús, chíka̱a̱ra ndee̱ ña̱ chindeétáʼanra xíʼinna ña̱ sakuaʼana xa̱ʼa̱ Ndióxi̱, ña̱ na̱ʼa̱ra ña̱ kúʼvi̱-inira xínirana ta saátu ña̱ taxira ña̱ xíniñúʼuna (1 Tim. 5:8). Sánáʼa̱ra se̱ʼera ta saátu káʼa̱nra xíʼinna tá va̱ása vií íyo ña̱ kéʼéna. Ta saátu ndakundeéra sakuaʼara ña̱ vií koo ña̱ ndaka̱xinra keʼéra ta ña̱yóʼo ndasakáʼnuña Jehová ta saátu chindeétáʼanña xíʼin na̱ veʼera. w21.02 5 párr. 12, 13

Ku̱nda̱a̱va-ini Jehová ndáaña kúú ña̱ ndo̱ʼoyó tá ya̱chi̱, ta xa̱ʼa̱ ña̱yóʼo va̱ása vií ndákanixi̱níyó xa̱ʼa̱ miíyó. Saátu xítora ndáaña va̱ʼa kúú ña̱ kúúmiíyó ni sava yichi̱ ndákanixi̱níyó ña̱ kǒo ña̱ va̱ʼa kúúmiíyó (1 Juan 3:19, 20). Tá iinna chíka̱a̱nína ndee̱ ña̱ kǒo keʼéna iin ña̱ va̱ása va̱ʼa soo ndíkóna kéʼénaña, kivi ndakava-inina. Ña̱ nda̱a̱ kúúña, tá ni̱ki̱ʼviyó iin ku̱a̱chi nu̱ú Ndióxi̱ va̱ása va̱ʼa kúniyó (2 Cor. 7:10). Soo kǒo xíniñúʼu xa̱a̱yó ndakanixi̱níyó ña̱yóʼo ta kachiyó: “Va̱ása ndáyáʼvíi̱; ta ni kǒo ixakáʼnu-ini Jehová xa̱ʼíi̱”. Va̱ása va̱ʼa ña̱ ndakanixi̱níyó saá, chi nda̱a̱ kivi xa̱a̱yó kuxíkáyó nu̱ú Jehová. Va̱ʼaka ná ka̱ʼa̱nyó xíʼin Jehová ña̱ ná ixakáʼnu-inira xa̱ʼa̱yó tasaá vií ndakutáʼanyó xíʼinra (Is. 1:18). Jehová ixakáʼnu-inira xa̱ʼa̱yó tá ná kunira ña̱ ndándikó-iniyó xíʼin ndiʼi níma̱yó. Ta saátu ná ka̱ʼa̱nyó xíʼin na̱ anciano, ta na̱yóʼo kúee koo inina ta chindeétáʼanna xíʼinyó ña̱ va̱ʼa ndikóyó kachíñuyó nu̱ú Jehová (Sant. 5:14, 15). w20.12 23 párr. 5, 6

Ta̱ Jesús i̱xato̱ʼóra ná ñaʼá. Va̱ása níxi̱yora nda̱a̱ táki̱ʼva ni̱xi̱yo na̱ fariseo, chi na̱yóʼo xi̱kundasína xi̱xinina ná ñaʼá, va̱ása ni̱xika̱ʼa̱nna xíʼinná nu̱ú íyo ku̱a̱ʼá na̱ yiví, ta ni va̱ása nínatúʼunna xíʼinná xa̱ʼa̱ tu̱ʼun Ndióxi̱. Soo ta̱ Jesús xi̱sanáʼa̱ra ná ñaʼá ta saátu na̱ ta̱a xa̱ʼa̱ ña̱ ndáyáʼviní va̱xi nu̱ú tu̱ʼun Ndióxi̱ (Luc. 10:38, 39, 42). Ta saátu ta̱xira ña̱ ná kutáʼan ku̱a̱ʼání ná ñaʼá xíʼinra tá ni̱xi̱kara na̱túʼunra xíʼin na̱ yiví xa̱ʼa̱ Ndióxi̱ (Luc. 8:1-3). Ta ta̱xira iin chiñu ña̱ ndáyáʼviní ndaʼa̱ sava náyóʼo, ña̱ ku̱ʼu̱nná natúʼunná xíʼin na̱ apóstol ña̱ xa̱a̱ nda̱takura (Juan 20:16-18). Ta̱ apóstol Pablo ni̱ka̱ʼa̱nra xíʼin ta̱ Timoteo ña̱ ná ixato̱ʼóra ná ñaʼá. Ta̱ Pablo nda̱kunira ña̱ siʼí ta̱ Timoteo xíʼin xi̱tánra kúú ná sa̱náʼa̱ra xa̱ʼa̱ tu̱ʼun Ndióxi̱ (2 Tim. 1:5; 3:14, 15). Ta nu̱ú carta ña̱ chi̱ndaʼá ta̱ Pablo ndaʼa̱ na̱ hermano na̱ ñuu Roma, chi̱ndeéra ku̱a̱ʼá ná hermana ta saátu ni̱ka̱ʼa̱nra ki̱vi̱ná. Ki̱ʼinra kuenta xíʼin ndiʼi ña̱ xi̱keʼé ná hermana kán, ta ni̱na̱ʼa̱ra ña̱ xi̱chindayáʼvira chiñu ña̱ xi̱keʼéná (Rom. 16:1-4, 6, 12; Filip. 4:3). w21.02 15 párr. 5, 6