Julio

Ixato̱ʼó ña̱ nda̱kaxin na̱ anciano keʼéna. Tá kíta iinna ti̱xin ñuu Jehová saá náʼa̱ra ña̱ kúʼvi̱-inira xínirana, ta kéʼéraña xa̱ʼa̱ ña̱ kúni̱ra kundaara na̱ congregación ta saátu ña̱ va̱ʼa chindeétáʼanra xíʼin na̱ ki̱ta kán. Sava na̱ hermano kivi ka̱ʼa̱nna ña̱ su̱ví ña̱ va̱ʼa kúú ña̱ níndaka̱xin na̱ anciano keʼéna, ta va̱ása natúʼunvína xíʼún xa̱ʼa̱ ndiʼi ña̱ va̱ása va̱ʼa ke̱ʼé na̱ ki̱ta, ta saátu va̱ása kúnda̱a̱ví-iniún xa̱ʼa̱ ndiʼi ña̱ ku̱u. Ña̱kán va̱ása kaka-iniún ña̱ viíva nda̱tiin na̱ anciano ku̱a̱chi yóʼo nda̱a̱ táki̱ʼva kúni̱ mií Jehová ta xi̱ndiku̱nna ndiʼi ña̱ káʼa̱n tu̱ʼunra (2 Crón. 19:6). Tá íxato̱ʼún ña̱ nda̱kaxin na̱ anciano keʼéna, ña̱ ta̱vána iin na̱ veʼún ti̱xin ñuu Jehová, ña̱yóʼo chindeétáʼan xíʼinna ña̱ kixáʼa tukuna ndasakáʼnunara. Iin ñá hermana ñá naní Elizabeth káchiñá: “I̱xayo̱ʼvi̱níña xíʼi̱n ña̱ va̱ása ka̱ʼa̱nkai̱ xíʼin ta̱ loʼo se̱ʼi̱ tá ki̱tara ti̱xin ñuu Ndióxi̱. Soo tá ndi̱kóra ni̱ka̱ʼa̱nra ña̱ va̱ʼava kúú ña̱ nda̱kaxin na̱ anciano ke̱ʼéna. Ta tá ni̱ya̱ʼa tiempo ni̱ka̱ʼa̱nra ña̱ ku̱a̱ʼání ña̱ sa̱kúaʼara”. w21.09 28, 29 párr. 11, 12

Ná ndakanixi̱níyó xa̱ʼa̱ ña̱ ke̱ʼé ñá ñaʼá ndáʼvi ñá ni̱xi̱ʼi̱ yií. Sana xi̱kuni̱kavañá taxiñá ku̱a̱ʼá ña̱ʼa ndaʼa̱ Jehová, soo ni saá ta̱xivañá ndiʼi ña̱ va̱ʼa ña̱ xi̱kuumiíñá ndaʼa̱ra. Ta̱ Jesús xi̱kunda̱a̱-inira ña̱ ndáyáʼviní ña̱ ta̱xi ñáyóʼo nu̱ú yivára. Íyo iin ña̱ ndáyáʼviní sákuaʼayó xíʼin ña̱yóʼo: kúsi̱íní-ini Jehová tá táxiyó ndiʼi ña̱ va̱ʼa ña̱ kúúmiíyó ndaʼa̱ra ta xíʼin ndiʼi níma̱yó káchíñuyó nu̱úra (Mat. 22:37; Col. 3:23). Kúsi̱íní-ini Jehová tá chíka̱a̱yó ndee̱ ña̱ kachíñuyó nu̱úra. Tá kúú tá xíniñúʼuyó tiempoyó xíʼin ndee̱yó ña̱ ndasakáʼnuyóra, tá ku̱a̱ʼa̱nyó nátúʼunyó xa̱ʼa̱ra ta saátu tá ku̱a̱ʼa̱nyó reunión. ¿Ndáaña keʼéyó xíʼin ña̱ sa̱kuaʼayó xa̱ʼa̱ ñá ñaʼá ñá ni̱xi̱ʼi̱ yií? Ná ndakanixi̱níyó xa̱ʼa̱ sava na̱ hermano na̱ kivi ka̱ʼa̱nyó xíʼin ña̱ kúsi̱í-ini Jehová xíʼin chiñu ña̱ kéʼéna. Sana xíni̱yó iin ñá hermana ñá xa̱a̱ chée, ta va̱ása va̱ʼa kúniñá á túviñá ña̱ va̱ása ndáyáʼvikañá xa̱ʼa̱ ña̱ va̱ása ku̱a̱ʼáka tiempo nátúʼunñá xa̱ʼa̱ Ndióxi̱. w21.04 6 párr. 17, 19, 20

Xa̱a̱ kúnda̱a̱va-ini Jehová ama sandíʼi-xa̱ʼa̱ra ñuyǐví ta̱ Ndi̱va̱ʼa. Xa̱ʼa̱ ña̱ kúee íyo inira, vitin íyo ku̱a̱ʼání na̱ káchíñu nu̱úra ta ndásakáʼnunara. Ndiʼi na̱yóʼo táxinína tíxa̱ʼvi ndaʼa̱ Jehová xa̱ʼa̱ ña̱ kúndeé-inira, saáchi tíxa̱ʼvi ña̱yóʼo ni̱xa̱a̱na sa̱kuaʼana xa̱ʼa̱ra ta nda̱taxina miína ndaʼa̱ra. Tá ná taxi Jehová ña̱ va̱ʼa ndaʼa̱yó xa̱ʼa̱ ña̱ ku̱ndeé-iniyó, saá xa̱a̱yó kunda̱a̱-iniyó ña̱ va̱ʼaní ke̱ʼé Jehová ña̱ xi̱ndatura ku̱a̱ʼá tiempo. Ni xóʼvi̱níva Ndióxi̱ xa̱ʼa̱ ña̱ va̱ása va̱ʼa kéʼé ta̱ Ndi̱va̱ʼa soo ndákundeéra kúsi̱í-inira (1 Tim. 1:11). Saátu miíyó kivi ndakundeéyó kusi̱í-iniyó nani ndátuyó ña̱ ná ndasayi̱i̱ Jehová ki̱vi̱ra, ña̱ na̱ʼa̱ra ña̱ iinlá miíra kúú ta̱ xíniñúʼu kaʼndachíñu, ta saátu ña̱ sandíʼi-xa̱ʼa̱ra ndiʼi ña̱ va̱ása va̱ʼa, xíʼin ndiʼi tu̱ndóʼo ña̱ íyo nu̱úyó. Ña̱kán ná chika̱a̱yó ndee̱ ña̱ kundeé-iniyó nda̱a̱ táki̱ʼva kúndeé-ini Jehová, chi ña̱yóʼo kúú ña̱ kivi sándi̱ko-iniyó. w21.07 13 párr. 18, 19

Ku̱a̱ʼání na̱ yiví va̱ása níkandíxana ta̱ Jesús tá siglo nu̱ú. Va̱ása níxi̱ndayáʼvira nu̱úna xa̱ʼa̱ ña̱ xi̱kuura se̱ʼe iin ta̱ carpintero. Ta saátu xi̱kuura ta̱ ñuu Nazaret, iin ñuu ña̱ va̱ása níxi̱ndayáʼvi nu̱ú sava na̱ yiví. Ta nda̱a̱ ta̱ Natanael ta̱ ni̱xa̱a̱ ku̱u discípulo ta̱ Jesús, ni̱ka̱ʼa̱nra ña̱yóʼo: “¿Á kiviví kana iin na̱ yiví va̱ʼa chí ñuu Nazaret?”. Sana nda̱kanixi̱níra xa̱ʼa̱ profecía ña̱ va̱xi nu̱ú Miqueas 5:2, nu̱ú ni̱ka̱ʼa̱nña ña̱ kaku ta̱ Mesías ñuu Belén ta su̱ví ñuu Nazaret. Ta̱ profeta Isaías ni̱ka̱ʼa̱nra ña̱ na̱ sáa̱-ini xíni ta̱ Jesús va̱ása kaʼvina xa̱ʼa̱ ndiʼi ña̱ káʼa̱n xa̱ʼa̱ ta̱ Mesías (Is. 53:8; nota). Nu̱ú profecía kúú nu̱ú kivi ndani̱ʼína ndiʼi ña̱ káʼa̱n xa̱ʼa̱ ta̱ Mesías, ta tá níndi̱ʼi̱-inina nandukúna ndáa míí ke̱e ta̱ Jesús, kunda̱a̱va-inina ña̱ ka̱kura Belén ta ki̱xira ti̱xin na̱ veʼe ta̱ rey David (Luc. 2:4-7). Ta̱ Jesús ka̱kuvara ñuu ña̱ káʼa̱n profecía ña̱ Miqueas 5:2 xa̱ʼa̱. Tá saá, ¿nda̱chun va̱ása níxi̱kandíxanara? Saáchi va̱ása níxi̱kunda̱a̱-inina xa̱ʼa̱ ndiʼi ña̱ xi̱ka̱ʼa̱n xa̱ʼa̱ra, ta xa̱ʼa̱ ña̱yóʼo ni̱xi̱ka-inina ta va̱ása níxiinna kandíxanara. w21.05 2, 3 párr. 4-6

Tu̱ʼun Ndióxi̱ káʼa̱ntuña xíʼinyó xa̱ʼa̱ sava na̱ yiví na̱ xi̱ndiku̱n consejo ña̱ ta̱xina ndaʼa̱na, ta ku̱a̱ʼání ña̱ va̱ʼa ta̱xi Jehová ndaʼa̱na xa̱ʼa̱ ña̱ xi̱ndiku̱nnaña. Ná ka̱ʼa̱nyó xa̱ʼa̱ ña̱ ndo̱ʼo ta̱ Job. Ni xi̱kuni̱ra sakúsi̱íra-ini Ndióxi̱, soo tá xi̱ndika̱a̱ra ndaʼa̱ tu̱ndóʼo ni̱ka̱ʼa̱nra sava ña̱ va̱ása va̱ʼa, saáchi iin ta̱ ku̱a̱chiva xi̱kuura. Ña̱kán ta̱xi Jehová xíʼin ta̱ Elihú consejo ndaʼa̱ra. ¿Ndáaña ke̱ʼéra tá ta̱xina consejo ndaʼa̱ra? Vitá ni̱xi̱yo inira ta xi̱ndiku̱nraña, ta nda̱kunira ña̱ va̱ása va̱ʼa íyo ña̱ ni̱ka̱ʼa̱nra. Ña̱kán ni̱ka̱ʼa̱nra ña̱yóʼo: “Ndíkóní-inii̱ xa̱ʼa̱ ña̱ ni̱ka̱ʼi̱n, ña̱kán xíkundúʼíi̱ nu̱ú ya̱a̱ ta saátu nu̱ú yáká” (Job 42:3-6, 12-17). Ta ta̱xiva Jehová ku̱a̱ʼá ña̱ va̱ʼa ndaʼa̱ ta̱ Job xa̱ʼa̱ ña̱ vitá ni̱xi̱yo inira (Job 32:6, 7). Ta saátu miíyó tá vitá íyo iniyó, kundiku̱nvayó consejo ña̱ táxina ndaʼa̱yó ni túviyó ña̱ va̱ása xíniñúʼu ndakiʼinyóña á ni válíní na̱ táxiña ndaʼa̱yó. Ndiʼivayó xíniñúʼu chika̱a̱ ndee̱ ña̱ kuumiíyó ña̱ va̱ʼa ña̱ táxi espíritu santo Ndióxi̱, ta saátu xíniñúʼu viíka sanáʼa̱yó inkana. w22.02 11 párr. 8; 12 párr. 12

Ndiʼiyó xíniñúʼu chika̱a̱yó ndee̱ ña̱ vií kutáʼanyó ti̱xin congregación ta kuʼvi̱-iniyó kuniyó na̱ hermano. Tasaá nda̱a̱ ni iinna va̱ása kuni mitúʼunna. Ña̱ kéʼéyó á ña̱ káʼa̱nyó kúú ña̱ kivi chindeétáʼan xíʼinna. Sava na̱ hermano kúni mitúʼunna saáchi na̱ veʼena va̱ása ndásakáʼnuna Jehová, ¿ndáa ki̱ʼva chindeétáʼanyó xíʼin na̱yóʼo? Siʼna miíyó ná chika̱a̱ ndee̱ ña̱ kutáʼanyó xíʼinna. Vií ná ndakiʼinyó na̱ hermano na̱ sa̱kán kíxaa̱ ti̱xin congregaciónyó á na̱ sa̱kán kíxáʼa sákuaʼa xa̱ʼa̱ Ndióxi̱ (Rom. 15:7). Soo va̱ása xíniñúʼu chindeé kuitíyóna chi kúni̱yó xa̱a̱yó kooyó migona. Ña̱kán viíní ná keʼéyó xíʼinna ta ná na̱ʼa̱yó ña̱ ndíʼi̱-iniyó xa̱ʼa̱na. Ná chika̱a̱yó ndee̱ ña̱ kunda̱a̱-iniyó xíʼin ña̱ ndóʼona, soo ná va̱ása sákukaʼanyó nu̱úna xíʼin ña̱ ndáka̱tu̱ʼunyóna. Sana savana íxayo̱ʼvi̱ña xíʼinna ña̱ natúʼunna ndáaña ndóʼona, ña̱kán ná kiʼinyó kuenta ña̱ va̱ása ixandúxayó xíʼinna ña̱ natúʼunna xíʼinyó xa̱ʼa̱ iin ña̱ʼa. Va̱ʼaka viíní ná nda̱ka̱tu̱ʼunyóna, kúee ná koo iniyó ta kuniso̱ʼoyó ña̱ káʼa̱nna. Tá kúú, kivi nda̱ka̱tu̱ʼunyóna ndáa ki̱ʼva ni̱xa̱a̱na sa̱kuaʼana xa̱ʼa̱ Jehová. w21.06 11 párr. 13, 14

Táxiníyó tíxa̱ʼvi ndaʼa̱ Jehová xa̱ʼa̱ ña̱ inkáchi kítáʼanyó ndásakáʼnuyóra, ta iinlá miíra kúú ta̱ níʼi yichi̱ nu̱úyó. Libro ña̱ naní Organizados para hacer la voluntad de Jehová, página 165 káchiña: “Chiñu ña̱ kúúmiíyó kúú ña̱ chindeétáʼanyó xíʼin na̱ congregación ña̱ vií kutáʼanna”. Ta káchikaña: “Ndiʼi tiempo vií kutáʼanyó xíʼin na̱ hermanoyó tá ná kotoyóna nda̱a̱ táki̱ʼva xíto Jehová na̱yóʼo”. Nu̱ú Jehová nda̱a̱ táki̱ʼva íyo “na̱ va̱lí” saá íyoyó ta ndáyáʼviníyó nu̱úra. Ta ki̱ʼva saá kúú ña̱ xíniñúʼu koo na̱ hermanoyó nu̱úyó. Ta̱kán xítora ta chíndayáʼvira ndiʼi ña̱ kéʼéyó ña̱ va̱ʼa chindeétáʼanyó xíʼin na̱ hermanoyó ta kundaayóna (Mat. 10:42). Kúʼvi̱ní-iniyó xíniyó na̱ hermanoyó. Xa̱ʼa̱ ña̱yóʼo chíka̱a̱-iniyó ña̱ va̱ása keʼéyó nda̱a̱ ni iin ña̱ʼa ña̱ sandákava-inina (Rom. 14:13). Kúnda̱a̱-iniyó ña̱ ndáyáʼviníka na̱ hermanoyó nu̱ú miíyó, ta kúni̱yó ixakáʼnu-iniyó xa̱ʼa̱na xíʼin ndiʼi níma̱yó. Ña̱kán tá kéʼé na̱ hermanoyó iin ña̱ va̱ása kutóoyó, ná va̱ása taxiyó kasiña nu̱úyó ña̱ kachíñuyó nu̱ú Jehová. Va̱ʼaka “ná chika̱a̱níyó ndee̱ ña̱ vií kutáʼanyó xíʼin inkana ta chika̱a̱yó ndee̱ xíʼin táʼanyó ña̱ ndasandakúyó-ini táʼanyó” (Rom. 14:19). w21.06 24 párr. 16, 17

Tá ná kaʼviyó tu̱ʼun Ndióxi̱ ta kundiku̱nyó consejo ña̱ va̱xi nu̱úña, ta saátu consejo ña̱ táxi na̱ ñuura, loʼo tá loʼo kixáʼayó keʼéyó nda̱a̱ táki̱ʼva ke̱ʼé ta̱ Cristo ta kuxini̱kayó Ndióxi̱. Ta̱ Jesús chi̱táʼanra ña̱ nátúʼunyó xa̱ʼa̱ Reino Ndióxi̱ xíʼin iin si̱ʼva̱ ña̱ xáʼnu loʼo tá loʼo níma̱ na̱ yiví. Ka̱chira: “Si̱ʼva̱ yóʼo ndúta̱ña ta xáʼnuña, ni kǒo kúnda̱a̱ va̱ʼa inira ndáa ki̱ʼva kúu ndiʼi ña̱yóʼo. Ñuʼú yóʼo kúee kúee sákuaʼnuñaña: siʼna xáʼnuña, saá xáʼnu yo̱kóña ta tándi̱ʼi saá kána si̱ʼva̱ña” (Mar. 4:27, 28). Na̱ yiví na̱ kíxáʼa sákuaʼa xa̱ʼa̱ Ndióxi̱, loʼo tá loʼo xáʼnuna xíʼin tu̱ʼunra nda̱a̱ táki̱ʼva xáʼnu iin planta. Tá kúú, kivi kotoyó ña̱yóʼo tá kíxáʼa na̱ káʼviyó xíʼin kúyatinna nu̱ú Jehová, ta násamana ña̱ va̱ása va̱ʼa kéʼéna (Efes. 4:22-24). Soo ná ndakaʼányó chi mií Jehová kúú ta̱ sákuaʼnu ña̱ nda̱a̱ níma̱na. w21.08 8, 9 párr. 4, 5

Ná kusi̱í-iniyó xíʼin ña̱ʼa ña̱ kúúmiíyó ta saátu xíʼin ña̱ʼa ña̱ kívi keʼéyó. Soo tá ndíku̱nyó “sa̱tá ña̱ʼa ña̱ kúni̱yó” kúni̱ kachiña, ña̱ kúni̱yó kuumiíyó ña̱ʼa ña̱ va̱ása kívi kuumiíyó. ¿Ndáaña sákuaʼayó xíʼin ña̱yóʼo? Tá kúni̱yó si̱í xa̱a̱yó kooyó xíniñúʼu kusi̱í-iniyó xíʼin ña̱ xa̱a̱ kúúmiíyó ta va̱ása kundi̱ʼi̱ní-iniyó xa̱ʼa̱ ña̱ʼa ña̱ va̱ása kívi kuumiíyó. Ndiʼiyó kútóoyó keʼéyó iin chiñu xa̱á. Tá saá, ¿á kivi kusi̱í-iniyó xíʼin chiñu ña̱ xa̱a̱ kúúmiíyó? Kiviva. ¿Ndáaña kivi keʼéyó ña̱ va̱ʼa kusi̱í-iniyó? Ña̱ va̱ʼa kunda̱a̱-iniyó xa̱ʼa̱ ña̱yóʼo ná ka̱ʼa̱nyó xa̱ʼa̱ na̱ ni̱ka̱ʼa̱n ta̱ Jesús xa̱ʼa̱ nu̱ú Mateo 25:14-30. Ta saátu ná sakúaʼayó ndáaña xíniñúʼu keʼéyó ña̱ va̱ʼa kusi̱íka-iniyó ni íyo ña̱ íxayo̱ʼvi̱ xíʼinyó. w21.08 21 párr. 5, 6

Jehová ndíʼi̱ní-inira xa̱ʼa̱ na̱ ndákava-ini. Su̱ví nda̱saa na̱ anciano kivi chika̱a̱ ndee̱ xíʼin na̱ hermano na̱ ndákava-ini, chi saátu kivi keʼé miíyó ña̱yóʼova. Ta kivi keʼéyó ña̱yóʼo tá ná na̱ʼa̱yó ña̱ ndíʼi̱-iniyó xa̱ʼa̱na. Jehová kúni̱ra ña̱ ná na̱ʼa̱yó nu̱ú na̱ hermanoyó ña̱ kúʼvi̱-inira xínirana (Prov. 19:17). Ta inka ki̱ʼva ña̱ chindeétáʼanyó xíʼinna kúú ña̱ vitá koo iniyó. Ta va̱ása ndukúyó ki̱ʼva ña̱ ka̱ʼa̱n va̱ʼanína xa̱ʼa̱yó. Chi kivi kixáʼana sa̱a̱-inina kunina miíyó, va̱ʼaka ná kuniñúʼuyó ña̱ xa̱a̱ xíni̱yó keʼéyó ña̱ va̱ʼa chika̱a̱yó ndee̱ xíʼin inkana (1 Ped. 4:10, 11). Tá ná kotoyó ndáa ki̱ʼva ke̱ʼé ta̱ Jesús xíʼin na̱ discípulora, saá kivi sákuaʼayó ndáa ki̱ʼva keʼéyó xíʼin inkana. Ni xi̱kuura iin ta̱a ta̱ xi̱ndayáʼviní soo vitá ni̱xi̱yo inira (Mat. 11:28-30). Va̱ása yo̱ʼvi̱ níxi̱sanáʼa̱ra na̱ yiví, ta xi̱niñúʼura ejemplo ña̱ xi̱kutóona, ta nda̱a̱ níma̱na xi̱xaa̱ ña̱yóʼo (Luc. 10:21). w21.07 23 párr. 11, 12

Siʼna miíyó ná kuyatin nu̱ú na̱ hermano na̱ xa̱a̱ ku̱chée ta ná natúʼunyó xíʼinna. Sana va̱ása kívika kotona táki̱ʼva xi̱xitona tá ya̱chi̱, á sana kúeeka xíkana ta kúeeka káʼa̱nna. Soo ni xa̱a̱ ku̱chéena si̱íníva íyo inina. Ta kúsi̱íní-ini Jehová xa̱ʼa̱ ndiʼi ña̱ xa̱a̱ kéʼéna nu̱úra (Ecl. 7:1). Ná ndakaʼányó nda̱chun ndáyáʼvinína nu̱ú Jehová, ta ná ndakundeéyó ixato̱ʼóyóna. Ná keʼéyó nda̱a̱ táki̱ʼva ke̱ʼé ta̱ Eliseo, saáchi tá xa̱a̱ ku̱numí kuvi ta̱ Elías, va̱ása níxiinra sandákoorara. Ta nda̱a̱ u̱ni̱ yichi̱ ni̱ka̱ʼa̱nra ña̱yóʼo xíʼin ta̱ Elías: “Va̱ása sandákoi̱ yóʼó” (2 Rey. 2:2, 4, 6). Kivi na̱ʼa̱yó nu̱ú na̱ hermano na̱ xa̱a̱ ku̱chée ña̱ ndixa ndíʼi̱-iniyó xa̱ʼa̱na tá viíní ná nda̱ka̱tu̱ʼunyóna (Prov. 1:5; 20:5). Tá kúú, kivi nda̱ka̱tu̱ʼunyóna ña̱yóʼo: “¿Ndáaña chi̱ndeétáʼan xíʼún tá ni̱xi̱yo loʼún ña̱ va̱ʼa ka̱ndíxaún ña̱ nda̱ni̱ʼún ña̱ nda̱a̱?”, “¿Ndáaña ndo̱ʼún tá ya̱chi̱ kúú ña̱ sa̱kúyatinka yóʼó nu̱ú Jehová?”, “¿Ndáaña xa̱a̱ chíndeétáʼan xíʼún ña̱ ndakundeéún kusi̱í-iniún kachíñún nu̱ú Jehová?” (1 Tim. 6:6-8). Tándi̱ʼi, viíní ná kuniso̱ʼoyó ña̱ natúʼunna xíʼinyó. w21.09 5 párr. 14; 7 párr. 15

Tá chíka̱a̱yó ndee̱ ña̱ natúʼunyó xíʼin na̱ yiví ta saátu ña̱ sanáʼa̱yóna, saá náʼa̱yó ña̱ kúʼvi̱-iniyó xíniyó Ndióxi̱ (1 Juan 5:3). Ná ndakanixi̱níyó xa̱ʼa̱ ña̱yóʼo: xa̱ʼa̱ ña̱ kúʼvi̱-iniyó xíniyó Jehová ña̱kán ki̱xáʼayó nátúʼunyó xíʼin na̱ yiví veʼe tá veʼe. Soo sana i̱xayo̱ʼvi̱ña xíʼinyó keʼéyó ña̱yóʼo tá xa̱ʼa̱, ta sana ni̱yi̱ʼvíyó tá ni̱xa̱ʼa̱nyó ña̱ yichi̱ nu̱ú na̱túʼunyó xíʼin na̱ yiví. Soo ke̱ʼéyó ña̱yóʼo saáchi xi̱kunda̱a̱-iniyó ña̱ mií ta̱ Jesús kúú ta̱ kúni̱ ná keʼéyó chiñu yóʼo. Ta vitin, sana va̱ása íxayo̱ʼvi̱kaña xíʼinyó natúʼunyó xíʼin na̱ yiví xa̱ʼa̱ Ndióxi̱, soo ¿á íxayo̱ʼvi̱ña xíʼinyó kaʼviyó xíʼinna? Sana yíʼviníyó keʼéyó ña̱yóʼo, soo ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ va̱ása yi̱ʼvíyó, ta saátu ña̱ chindeétáʼanra xíʼinyó ña̱ ka̱ʼa̱nyó xíʼin na̱ yiví á kúni̱na kaʼviyó xíʼinna. Tasaá chindeétáʼanra xíʼinyó ña̱ kutóokayó sanáʼa̱yó na̱ yiví. w21.07 5 párr. 7

Tá tiempo xi̱naʼá, na̱ yiví na̱ xi̱kachíñu ndáʼvi xi̱kuumiína iin tuni̱ ña̱ xi̱na̱ʼa̱ ndáana káchíñuna nu̱ú. Ta ki̱ʼva saátu kúu tiempo vitin, ku̱a̱ʼání na̱ yiví kúúmiína iin tuni̱ ndaʼa̱na á te̱ʼéna. Ña̱yóʼo kúni̱ kachiña, ña̱ ndiʼi na̱yóʼo náʼa̱na xíʼin ña̱ kéʼéna á xíʼin ña̱ ndákanixi̱nína ña̱ chíndeétáʼanna xíʼin na̱ chíñu na̱ íyo nu̱ú ñuʼú yóʼo. Soo, ¿ndáaña keʼé miíyó? ¿Á taxiyó ña̱ ná kanina tuni̱ yóʼo miíyó ta chindeétáʼanyó xíʼin na̱ chíñu na̱ íyo nu̱ú ñuʼú yóʼo? Tá ná va̱ása kandíxayó ndakiʼinyó ña̱ tuni̱ yóʼo, ya̱ʼayó nu̱ú tu̱ndóʼo ña̱ i̱yoní. Libro ña̱ Apocalipsis káʼa̱ntuña ña̱yóʼo: “Ta nda̱a̱ ni iinna kǒo kívi satána á xi̱kóna tá kǒo tuni̱ yóʼo kúúmiína” (Apoc. 13:17). Soo miíyó na̱ ndásakáʼnu Ndióxi̱ kúnda̱a̱-iniyó ña̱ sandíʼi-xa̱ʼa̱ra na̱ yiví na̱ kuumií tuni̱ yóʼo (Apoc. 14:9, 10). Xa̱ʼa̱ ña̱kán va̱ása kuumiíyó tuni̱ kán, saáchi ndaʼa̱vayó ka̱ʼyi̱ tu̱ʼun yóʼo: “Kuenta Jehová kúi̱” (Is. 44:5). Ña̱kán, vitin kúú ña̱ xíniñúʼu chika̱a̱yó ndee̱ ña̱ nda̱kú koo iniyó xíʼin Jehová. Tá saá ná keʼéyó, kusi̱íní-inira ka̱ʼa̱nra ña̱ kúúyó kuentara. w21.09 18 párr. 15, 16

Ña̱ va̱’a sáxi̱nuyó chiñu ña̱ kéʼéyó nu̱ú Ndióxi̱, kivi chindeétáʼan na̱ hermano xíʼinyó. Ta̱ Pablo sa̱náʼa̱ra ta̱ Timoteo ndáa ki̱ʼva natúʼunra xíʼin na̱ yiví ta saátu ndáa ki̱ʼva sanáʼa̱rana, nda̱a̱ táki̱ʼva xi̱keʼé miíra (1 Cor. 4:17). Ta saátu miíyó ku̱a̱ʼání ña̱ kivi sákuaʼayó xíʼin na̱ xa̱a̱ ku̱a̱ʼání ku̱i̱ya̱ kúú publicador, ta saátu ná ka̱ʼa̱nyó xíʼin Jehová ña̱ chindeétáʼanra xíʼinyó. Tá kúma̱ní ku̱ʼu̱nyó natúʼunyó xíʼin na̱ yiví, ná ka̱ʼa̱nyó xíʼin Jehová ña̱ kuniʼira yichi̱ nu̱úyó. Saáchi tá ná va̱ása chindeétáʼan espíritu santo xíʼinyó, va̱ása kuchiñuyó keʼéyó nda̱a̱ ni iin chiñu (Sal. 127:1; Luc. 11:13). Tá káʼa̱nyó xíʼin Jehová, káxi ná koo ña̱ ndukúyó nu̱úra. Tá kúú, ná ka̱ʼa̱nyó xíʼinra ña̱ ná chindeétáʼanra xíʼinyó ndani̱ʼíyó na̱ yiví na̱ kúni̱ sákuaʼa xa̱ʼa̱ra. Ta saátu ná taváyó tiempo ña̱ kaʼviyó Biblia. Tu̱ʼun Ndióxi̱ káchiña: “Tasaá kunda̱a̱-inindó ndáaña kúú ña̱ kúni̱ Ndióxi̱ keʼéndó ta ndáaña kúú ña̱ va̱ʼa ta ndáaña kúú ña̱ kútóora” (Rom. 12:2). Tá va̱ása xíka-iniyó xa̱ʼa̱ ndiʼi ña̱ sákuaʼayó xa̱ʼa̱ Ndióxi̱ ña̱ kúúña ña̱ nda̱a̱, va̱ʼaníka natúʼunyó xíʼin na̱ yiví saá. w21.05 17, 18 párr. 14-16

Sana íyo iin na̱ yiví na̱ káʼviyó xíʼin xa̱ʼa̱ Ndióxi̱, soo va̱ása chíka̱a̱na ndee̱ ña̱ kuaʼnuna xíʼin tu̱ʼunra, ni chíka̱a̱nívayó ndee̱ xíʼinna ta kéʼéyó oración xa̱ʼa̱na. Ta xa̱ʼa̱ ña̱ va̱ása chíka̱a̱na ndee̱ xíniñúʼu sandákooyó kaʼviyó xíʼinna. Á sanatu ta̱ʼán chindeétáʼanyó xíʼin nda̱a̱ ni iinna ña̱ xa̱a̱na ndakuchina. ¿Á xíniñúʼu ndakava-iniyó ta ndakanixi̱níyó ña̱ va̱ása chíndeétáʼan Jehová xíʼinyó? Jehová xítora tá chíka̱a̱yó ndee̱ ta kúndeé-iniyó. Ni xíniso̱ʼo na̱ yiví ña̱ nátúʼunyó xíʼinna á va̱ása, ña̱ ndáyáʼvika nu̱ú Jehová kúú ña̱ chíka̱a̱yó ndee̱ ña̱ keʼéyó chiñu yóʼo, ta kéʼéyóña xa̱ʼa̱ ña̱ kúʼvi̱-iniyó xíniyó na̱ yiví. Ta̱ Pablo ka̱ʼyíra ña̱yóʼo: “Ndióxi̱ nda̱kúní-inira, va̱ása nándósó-inira xa̱ʼa̱ ndiʼi chiñu ña̱ ke̱ʼéndó, saátu ña̱ ni̱na̱ʼa̱ndó ña̱ kúʼvi̱ní-inindó xínindó ki̱vi̱ra xa̱ʼa̱ ña̱ ka̱chíñundó nu̱ú na̱ nda̱kaxinra ta ndákundeéndó káchíñundó nu̱úna” (Heb. 6:10). Va̱ása nándósó-ini Jehová xa̱ʼa̱ ña̱ chíka̱a̱níyó ndee̱ ña̱ natúʼunyó xíʼin na̱ yiví, ta kúʼvi̱-iniyó xíniyóna ni va̱ása xíínna kuniso̱ʼona. Ta ku̱a̱ʼání ña̱ va̱ʼa ndakiʼinyó nda̱a̱ táki̱ʼva káchi texto ña̱ káʼviyó ki̱vi̱ vitin. w21.10 25 párr. 4, 6

Ta̱ Jesús viíní xi̱keʼéra xíʼin na̱ discípulora ta xi̱kuʼvi̱ní-inira xi̱xinirana. Ta xi̱kunda̱a̱-inira ña̱ xa̱a̱ síín íyo ña̱ xa̱a̱ xíni̱na keʼéna ta xa̱a̱ síín íyo ña̱ ndóʼo iin tá iinna, ña̱kán su̱ví inkáchi íyo chiñu ña̱ kivi keʼé ndiʼina saáchi savana ku̱a̱ʼákaña kivi keʼéna á savatuna loʼo ña̱ kivi keʼéna. Soo ña̱ xi̱ndayáʼvika nu̱ú ta̱ Jesús kúú ña̱ xi̱chika̱a̱na ndee̱ ña̱ kachíñuna nu̱ú Ndióxi̱. Ta ni̱na̱ʼa̱ra ña̱yóʼo tá ni̱ka̱ʼa̱nra xa̱ʼa̱ u̱ni̱ na̱ ta̱a na̱ nda̱kiʼin talento. Ta̱ xi̱kachíñuna nu̱ú xi̱kunda̱a̱-inira nda̱saa talento kivi kundaa iin tá iin na̱yóʼo. U̱vi̱ na̱ ta̱a yóʼo va̱ʼava ke̱ʼéna chiñuna, ta iinra ku̱a̱ʼákaña nda̱kiʼinra. Soo ta̱ xi̱kachíñuna nu̱ú inkáchi íyo tu̱ʼun ña̱ ni̱ka̱ʼa̱nra xíʼinna. Ka̱chira: “Va̱ʼaní íyo ña̱ ke̱ʼún, ta̱a va̱ʼa kúún” (Mat. 25:14-23). Saátu tiempo vitin vií kéʼé ta̱ Jesús xíʼinyó ta kúʼvi̱ní-inira xínira miíyó. Kúnda̱a̱-inira ña̱ síín íyo ña̱ xíni̱yó keʼéyó, ta síín íyo ña̱ ndóʼoyó, soo kúsi̱í-inira tá xítora ña̱ chíka̱a̱yó ndee̱ keʼéyó chiñu nu̱ú Ndióxi̱. ¿Ndáa ki̱ʼva kundiku̱nyó yichi̱ra? Ná kiʼinyó kuenta ña̱ va̱ása keʼéyó á ka̱ʼa̱nyó ña̱ʼa ña̱ kivi sandákava-ini na̱ hermano. w21.07 23 párr. 12-14

Soo su̱ví ndiʼi tiempo níkundáʼvi-ini ta̱ David kunira inkana. Tá kúú, iin ta̱a ta̱ ndi̱va̱ʼaní-ini ta̱ xi̱naní Nabal, ni̱ka̱ʼa̱n-ndi̱va̱ʼara xíʼinra ta va̱ása níxiinra taxira ña̱ kuxura xíʼin na̱ ta̱a na̱ xi̱kitáʼan xíʼinra. Ta̱ David ni̱sa̱a̱níra ta ni̱ka̱ʼa̱nra ña̱ kaʼníra ta̱ Nabal xíʼin ndiʼi na̱ veʼera. Soo ñá síʼi ta̱ Nabal, ñá xi̱naní Abigaíl, kúee ni̱xi̱yo iniñá ta va̱ʼa ni̱xi̱yo iniñá xíʼin ta̱ David, ta xa̱ʼa̱ ña̱yóʼo va̱ása níxaʼníra ta̱ Nabal ni na̱ veʼera (1 Sam. 25:9-22, 32-35). Xa̱ʼa̱ ña̱ ni̱sa̱a̱ní ta̱ David xi̱kuni̱ra kaʼníra ta̱ Nabal xíʼin na̱ veʼera. Ta saátu ni̱sa̱a̱níra tá na̱túʼun ta̱ Natán xíʼinra xa̱ʼa̱ iin ta̱a ta̱ i̱xakuíʼná, ta ni̱ka̱ʼa̱nra ña̱ xi̱niñúʼu kuvi ta̱ ta̱a kán. Ta̱ David va̱ʼaní ni̱xi̱yo inira. Tá saá, ¿nda̱chun ni̱ka̱ʼa̱nra ña̱ xi̱niñúʼu kuvi ta̱ ta̱a kán? Ná ndakanixi̱níyó ndáaña kúú ña̱ ndóʼo ta̱ David tá ni̱ka̱ʼa̱nra ña̱yóʼo. Tá tiempo saá, xi̱ndi̱ʼi̱ní-inira xa̱ʼa̱ ña̱ ke̱ʼéra ña̱ va̱ása va̱ʼa. Ta va̱ása vií níndatiinra ku̱a̱chi saáchi va̱ása vií kítáʼanra xíʼin Jehová tiempo saá. w21.10 12 párr. 17, 18, 20

Xíʼin texto ña̱ ki̱vi̱ vitin sákuaʼayó, ña̱ kiviva yi̱i̱ kooyó nda̱a̱ táki̱ʼva íyo mií Jehová. Ta xíniñúʼu yi̱i̱ kooyó ni túviyó ña̱ va̱ása kuchiñuyó keʼéyóña xa̱ʼa̱ ña̱ kúúyó na̱ yiví ku̱a̱chi. Nda̱a̱ ta̱ apóstol Pedro ke̱ʼé ña̱ va̱ása va̱ʼa sava yichi̱, soo ni̱na̱ʼa̱ra ña̱ kiviva yi̱i̱ kooyó. ¿Ndáaña ndákanixi̱ní ku̱a̱ʼánína xa̱ʼa̱ iin na̱ yiví na̱ yi̱i̱? Ku̱a̱ʼánína ndákanixi̱nína xa̱ʼa̱ iin na̱ yiví na̱ va̱ása si̱í-ini ta ndíxina ti̱ko̱to̱ táʼan ña̱ ndíxi na̱ su̱tu̱. Soo su̱ví saá íyo iin na̱ yiví na̱ yi̱i̱. Biblia káʼa̱nña xa̱ʼa̱ Jehová ña̱ kúúra iin Ndióxi̱ ta̱ si̱í-ini ni kuura ta̱ yi̱i̱ (1 Tim. 1:11). Ta saátu káʼa̱nña xa̱ʼa̱ na̱ ñuura ña̱ kúúna na̱ si̱í-ini (Sal. 144:15). Ta̱ Jesús va̱ása níxi̱kutóora ña̱ xi̱keʼé na̱ maestro na̱ xi̱sanáʼa̱ xa̱ʼa̱ ley ta xi̱ndixina ti̱ko̱to̱ náni̱, saáchi xi̱keʼéna ña̱ va̱ʼa xa̱ʼa̱ ña̱ xi̱kuni̱na ná kuni na̱ yiví ña̱ xi̱keʼéna (Mat. 6:1; Mar. 12:38). Miíyó na̱ ndásakáʼnu Ndióxi̱ kúnda̱a̱va-iniyó ndáa ki̱ʼva íyo iin na̱ yiví na̱ yi̱i̱, saáchi tu̱ʼunra káʼa̱nña xíʼinyó ndáa ki̱ʼva íyo na̱yóʼo. Kúnda̱a̱-iniyó ña̱ kúʼvi̱ní-ini Jehová xínira miíyó, ta va̱ása ka̱ʼa̱nra xíʼinyó keʼéyó iin ña̱ʼa ña̱ va̱ása kuchiñuyó keʼéyó. w21.12 2 párr. 1, 3

Ku̱a̱ʼání ña̱ va̱ʼa ta̱xi Jehová ndaʼa̱yó, soo mií ña̱ ndáyáʼvi va̱ʼaka kúú ña̱ kivi ndasakáʼnuyóra. Tá kéʼéyó ndiʼi chiñu ña̱ xáʼndara nu̱úyó, saá náʼa̱yó ña̱ ndixa kúʼvi̱-iniyó xíniyóra (1 Juan 5:3). Ta iin ña̱yóʼo kúú chiñu ña̱ ta̱xi ta̱ Jesús ndaʼa̱yó: ña̱ ku̱ʼu̱nyó sanáʼa̱yó na̱ yiví ña̱ xa̱a̱na koona discípulora ta ndakuchina (Mat. 28:19). Ta saátu ni̱ka̱ʼa̱nra xíʼinyó ña̱ kuʼvi̱-iniyó kunitáʼanyó (Juan 13:35). Ta ndiʼi na̱ xíniso̱ʼo ña̱ káʼa̱n Jehová kivi xa̱a̱na koona na̱ ñuura (Sal. 15:1, 2). Ná kuʼvi̱-iniyó kuniyó inkana. Chi saá kéʼé Jehová, kúʼvi̱ní-inira xínira miíyó (1 Juan 4:8). Ta xa̱a̱ kúʼvi̱va-inira xínira miíyó tá kúma̱ní sakúaʼayó xa̱ʼa̱ra (1 Juan 4:9, 10). Ta tá kúʼvi̱-iniyó xíniyó inkana, saá náʼa̱yó ña̱ ndíku̱nyó yichi̱ra (Efes. 5:1). Iin ki̱ʼva ña̱ na̱ʼa̱yó ña̱ kúʼvi̱-iniyó xíniyó na̱ yiví kúú ña̱ chindeétáʼanyó xíʼinna ña̱ xa̱a̱na sákuaʼana xa̱ʼa̱ Jehová tá íyoka tiempo (Mat. 9:36-38). Chi saá kúú ña̱ chíndeétáʼanyó xíʼinna ña̱ xa̱a̱na koona se̱ʼe Ndióxi̱ chí nu̱únínu. w21.08 5, 6 párr. 13, 14

Xa̱ʼa̱ ña̱ xi̱kuʼvi̱ní-ini ta̱ Jesús xi̱xinira Jehová kúú ña̱ chi̱ka̱a̱-inira ña̱ keʼéra nda̱a̱ ndáaka ña̱ʼa xa̱ʼa̱ra ta saátu xa̱ʼa̱ miíyó (Juan 14:31). Ta xíʼin ndiʼi ña̱ ke̱ʼéra tá ni̱xi̱yora nu̱ú ñuʼú yóʼo ni̱na̱ʼa̱ra ña̱ xi̱kuʼvi̱ní-inira xi̱xinira na̱ yiví. Saáchi va̱ʼaní ni̱xi̱yo inira xíʼinna ta xi̱kundáʼvi-inira xi̱xinirana nda̱a̱ na̱ xi̱sa̱a̱-ini xi̱xiniñaʼá. Saátu ni̱na̱ʼa̱ra ña̱ xi̱kuʼvi̱ní-inira xi̱xinirana saáchi xi̱natúʼunra xíʼinna xa̱ʼa̱ Reino Ndióxi̱ (Luc. 4:43, 44). Ta ni̱na̱ʼa̱ra ña̱ xi̱kuʼvi̱ní-inira xi̱xinira Ndióxi̱ ta saátu na̱ yiví chi ta̱xira ña̱ ná saxóʼvi̱nara ta kaʼnínara. Ta tíxa̱ʼvi ña̱ ke̱ʼéra kivi kutakuyó ndiʼi tiempo. Xa̱ʼa̱ ña̱ kúʼvi̱ní-iniyó xíniyó Jehová kúú ña̱ nda̱taxiyó miíyó ndaʼa̱ra ta nda̱kuchiyó. Ña̱kán xíniñúʼu viíní keʼéyó xíʼin na̱ yiví ña̱ va̱ʼa na̱ʼa̱yó ña̱ kúʼvi̱-iniyó xíniyó Jehová nda̱a̱ táki̱ʼva xi̱keʼé ta̱ Jesús. Ta̱ apóstol Juan ka̱ʼyíra ña̱yóʼo: “Na̱ va̱ása kúʼvi̱-ini xíni na̱ ñanina na̱ va̱ʼa xínina, va̱ása kívi kuʼvi̱-inina kunina Ndióxi̱ ta̱ va̱ása kívi kunina”. w22.03 10 párr. 8, 9

Ni kútóovayó taváyó tiempo ña̱ kutáʼanyó xíʼin Jehová, soo sava yichi̱ íxayo̱ʼvi̱vaña xíʼinyó. Xa̱ʼa̱ ña̱ íyoní chiñu nu̱úyó íxayo̱ʼvi̱ña xíʼinyó taváyó tiempo ña̱ keʼéyó chiñu nu̱úra. Saáchi xíniñúʼu ku̱ʼu̱nyó kachíñuyó, kundaayó na̱ veʼeyó á saátu xíniñúʼu keʼéyó inkaka chiñu, ta túviyó ña̱ kǒoka tiempo nu̱úyó ña̱ ka̱ʼa̱nyó xíʼin Ndióxi̱, ña̱ kaʼviyó tu̱ʼunra ta ndakanixi̱níyó xa̱ʼa̱ña. Soo íyo iin ña̱ xíniñúʼu kiʼinníyó kuenta xíʼin, saáchi kivi kindaaña tiempo nu̱úyó ña̱ kutáʼanyó xíʼin Jehová. Ndiʼivayó xíniñúʼu taváyó tiempo ña̱ ndakindee̱yó ta koo si̱íyó. Soo tá ná va̱ása kiʼinyó kuenta xíʼin ña̱yóʼo, kivi kindaaña tiempo nu̱úyó ña̱ keʼéyó chiñu nu̱ú Ndióxi̱. Soo ná ndakaʼányó chi su̱ví ña̱ koo si̱íyó kúú ña̱ ndáyáʼvi va̱ʼaka, chi íyo inka ña̱ ndáyáʼvi va̱ʼaka nu̱ú ña̱yóʼo (Prov. 25:27; 1 Tim. 4:8). w22.01 26, 27 párr. 2, 3

Tá ni̱ka̱ʼa̱n Jehová xíʼin na̱ ñuu Israel ña̱ xíniñúʼu kuʼvi̱-inina kunina inkana, va̱ása níka̱ʼa̱nra xíʼinna ña̱ xíniñúʼu kuʼvi̱ kuití inina kunina na̱ ñuu miína. Chi saátu ni̱ka̱ʼa̱nra xíʼinna ña̱ kuʼvi̱-inina kunina na̱ ke̱e inka ñuu na̱ xi̱ndoo yatin xíʼinna. Tasaá íyo ña̱ káʼa̱n Levítico 19:33, 34. Nda̱a̱ táki̱ʼva xi̱keʼéna xíʼin na̱ ñuu miína saá xi̱niñúʼu keʼéna xíʼin na̱yóʼo, ta kuʼvi̱-inina kuninana nda̱a̱ táki̱ʼva kúʼvi̱-inina xínina miína. Tá kúú, xi̱taxina ña̱ ná ndakaya na̱ ke̱e inka ñuu á na̱ nda̱ʼví ña̱ʼa ña̱ xi̱kindo̱o nu̱ú xi̱chiʼina (Lev. 19:9, 10). Ta saátu miíyó tiempo vitin xíniñúʼu kuʼvi̱-iniyó kuniyó na̱ inka ñuu (Luc. 10:30-37). ¿Ndáa ki̱ʼva keʼéyó ña̱yóʼo? Tiempo vitin ku̱a̱ʼání na̱ yiví sándakoona ñuuna ta ku̱a̱ʼa̱nna inka país, ta savana ndóona yatin nu̱ú ndóoyó. Ña̱kán ndáyáʼviní ixato̱ʼóyó na̱yóʼo. w21.12 12 párr. 16

Tá ná sakúaʼayó kundaa-iniyó Jehová, va̱ása ixayo̱ʼvi̱ña xíʼinyó kandíxayó ña̱ chindeétáʼanra xíʼinyó chí nu̱únínu. Xíniñúʼu kandíxaníyó ña̱ chindeétáʼan Jehová xíʼinyó tá káʼa̱nyó xíʼin na̱ káchíñuyó nu̱ú ña̱ ná taxina ku̱ʼu̱nyó iin asamblea, á tá káʼa̱nyó xíʼinna ña̱ ná nasamana hora ña̱ káchíñuyó ña̱ va̱ʼa ku̱ʼu̱nyó ndiʼi reunión á ña̱ va̱ʼa keeyó natúʼunyó xíʼin na̱ yiví xa̱ʼa̱ Ndióxi̱. Ná ndakanixi̱níyó ña̱ va̱ása níxiinna keʼéna ña̱ ndu̱kúyó nu̱úna ta ta̱vána miíyó nu̱ú káchíñuyó. ¿Á kandíxayó ña̱ va̱ása sandákoo ndaʼa̱ Jehová miíyó, ta taxira ña̱ xíniñúʼuyó? (Heb. 13:5). Ku̱a̱ʼání na̱ káchíñu nu̱ú Jehová xa̱a̱ kíʼinna kuenta ndáa ki̱ʼva chíndeétáʼanra xíʼinna mií tiempo ña̱ xíniñúʼunaña, saáchi va̱ása sándakoo ndaʼa̱rana. Xa̱ʼa̱ ña̱ chíndeétáʼan Jehová xíʼinyó va̱ása xíniñúʼu yi̱ʼvíyó ña̱ kuu chí nu̱únínu. Tá siʼna chiñu miíra ná kundi̱ʼi̱-iniyó xa̱ʼa̱, va̱ása sandákoo ndaʼa̱ra miíyó. w22.01 7 párr. 16, 17

¿Ndáaña keʼéyó tá iin na̱ kúʼvi̱ní-iniyó xíniyó kúú iin na̱ ki̱ta ti̱xin congregación? Sana kakava-iniyó xíʼin ña̱ nda̱kaxin na̱ anciano ke̱ʼéna. Sana kixáʼayó ndakanixi̱níyó ña̱ va̱ása níkiʼinna kuenta xíʼin ndiʼi ña̱ ku̱u á sanatu ndakanixi̱níyó ña̱ va̱ása vií níndatiinna ku̱a̱chi xíʼinna nda̱a̱ táki̱ʼva kúni̱ mií Jehová. ¿Ndáaña chindeétáʼan xíʼinyó ña̱ vií ndakanixi̱níyó xa̱ʼa̱ ña̱ ke̱ʼé na̱ anciano? Ná ndakaʼányó chí Jehová kúni̱ra ña̱ ná kita iin na̱ ni̱ki̱ʼvi ku̱a̱chi ti̱xin congregación, saáchi kúni̱ra kundaara na̱ congregación ta kúni̱ra chindeétáʼanra xíʼin na̱ ni̱ki̱ʼvi ku̱a̱chi. Tá ná taxi Jehová kundika̱a̱kana ti̱xin congregación, kivi chindaʼána inkana ña̱ keʼéna ña̱ va̱ása va̱ʼa (Gál. 5:9). Ta saátu tá ná va̱ása kitana ti̱xin congregación, va̱ása kiʼinna kuenta ña̱ ndeéníva ku̱a̱chi ni̱ki̱ʼvina ta xíniñúʼu nasamana ki̱ʼva ña̱ ndákanixi̱nína, ta sandákoona keʼéna ña̱ va̱ása va̱ʼa tasaá kivi xa̱a̱na ndakutáʼan vií tukuna xíʼin Jehová (Ecl. 8:11). Tá xíto na̱ anciano á xíniñúʼu kita iinna ti̱xin congregación á va̱ása, ná kandíxayó ña̱ viíníva kéʼéna chiñu yóʼo. w22.02 5 párr. 13, 14

Ndáyáʼviní kúee koo iniyó xíʼin na̱ hermano ta kuʼvi̱-iniyó kuniyóna tá va̱ása xíínna kundiku̱nna consejo ña̱ táxiyó ndaʼa̱na á tá va̱ása kama ndíku̱nna consejo yóʼo. Ña̱kán va̱ása xíniñúʼu sa̱a̱ na̱ anciano tá kúu ña̱yóʼo. Xa̱ʼa̱ ña̱kán, na̱ anciano xíniñúʼu ka̱ʼa̱nna xíʼin Jehová ña̱ ná chindeétáʼanra xíʼin na̱ táxina consejo ndaʼa̱ ña̱ kunda̱a̱-inina nda̱chun kúú ña̱ ndákiʼinna consejo yóʼo, ta chindeétáʼanra xíʼinna ña̱ kundiku̱nnaña. Sana kúeeva ndakanixi̱nína xa̱ʼa̱ consejo ña̱ ta̱xina ndaʼa̱na. Ña̱kán, tá kúee íyo ini na̱ anciano xíʼinna ta kúʼvi̱-inina xíninana, na̱ hermano yóʼo kundi̱ʼi̱ka-inina xa̱ʼa̱ consejo ña̱ ta̱xina ndaʼa̱na, ta su̱ví ndáa ki̱ʼva ta̱xinaña ndaʼa̱na. Ta saátu xíniñúʼu ndakaʼán na̱ anciano ña̱ nina nu̱ú tu̱ʼun Ndióxi̱ xíniñúʼu tavána consejo ña̱ táxina. Ña̱kán kúni̱yó taxiyó consejo ña̱ ndixa chindeétáʼan xíʼinna ta sakúsi̱íña-inina (Prov. 27:9). w22.02 18 párr. 17; 19 párr. 19

Tá ndúkúyó ndee̱ nu̱ú Jehová ña̱ va̱ʼa ya̱ʼayó nu̱ú iin tu̱ndóʼo á tá káʼa̱nyó xíʼinra ña̱ ná chindeétáʼanra xíʼinyó ña̱ va̱ása keʼékayó iin ña̱ va̱ása va̱ʼa, sana túviyó ña̱ va̱ása kama ndákuiinra. ¿Nda̱chun va̱ása kama ndákuiin Jehová ndiʼi oración ña̱ kéʼéyó nu̱úra? Ta kúnda̱a̱-inira ña̱ xíʼin ña̱yóʼo náʼa̱yó ña̱ kándíxaníyóra (Heb. 11:6). Ta xítora á ndixa kúni̱yó keʼéyó ña̱ ndúkúyó nu̱úra, ta saátu á kéʼéyó ña̱ kúni̱ra (1 Juan 3:22). Soo tá kúni̱yó sandákooyó keʼéyó iin ña̱ va̱ása va̱ʼa, xíniñúʼu kúee koo iniyó ta keʼéyó ña̱ ndúkúyó nu̱ú Jehová. Ta̱ Jesús ni̱ka̱ʼa̱nra ña̱yóʼo nu̱ú: “Ndakundeéndó ndukúndó ña̱ va̱ʼa nu̱ú Ndióxi̱ ta taxiraña ndaʼa̱ndó, ndakundeéndó nandukúndóña ta ndani̱ʼívandóña, ndakundeéndó kani ndaʼa̱ndó yéʼé ta nu̱náña nu̱úndó. Saáchi ndiʼi na̱ ndúkúña ndákiʼinvanaña, ta ndiʼi na̱ nándukúña ndáni̱ʼívanaña, ta ndiʼi na̱ káni ndaʼa̱ yéʼé nu̱návaña nu̱úna” (Mat. 7:7, 8). w21.08 8 párr. 1; 10 párr. 9, 10

Sana xa̱a̱ xíni̱vayó xa̱ʼa̱ ña̱ sánáʼa̱ Biblia, soo ni saá xíniñúʼu ndakundeéyó vií kaʼviyóña ña̱ va̱ʼa kandíxakayó Ndióxi̱ (Jos. 1:8). Ta saátu ná kotoyó ña̱ xa̱a̱ xínu ndiʼi profecía ña̱ va̱xi nu̱úña, ta ndáa ki̱ʼva viíní kitáʼan ndiʼi ña̱ káʼa̱nña xa̱ʼa̱. Ña̱yóʼo chindeétáʼanña xíʼinyó, ña̱ kandíxayó ña̱ íyo iin ta̱ ndíchiní i̱xava̱ʼa miíyó, ta kúʼvi̱ní-inira xínira miíyó ta tu̱ʼunra kúú ña̱ va̱xi nu̱ú Biblia (2 Tim. 3:14; 2 Ped. 1:21). Tá káʼviyó tu̱ʼun Ndióxi̱ ná kotoyó ndáa ki̱ʼva chíndeétáʼanña xíʼinyó. Tá kúú, xa̱a̱ ya̱chi̱ví ni̱ka̱ʼyi̱ nu̱ú Biblia ña̱ kooní tu̱ndóʼo nu̱úyó ta xo̱ʼvi̱níyó, tá ná kuʼvi̱ní-iniyó kuniyó xu̱ʼún (1 Tim. 6:9, 10; Prov. 28:20; Mat. 6:24). Xíʼin ña̱yóʼo kúnda̱a̱-iniyó ña̱ va̱ʼaní consejo táxi tu̱ʼun Ndióxi̱ ndaʼa̱yó. ¿Á ndákaʼún xa̱ʼa̱ inka consejo ña̱ va̱xi nu̱ú Biblia ña̱ va̱ʼaní chíndeétáʼan xíʼún? Tá ná ndakanixi̱níyó ña̱ va̱ʼaní consejo kúú ña̱ táxi Jehová ndaʼa̱yó saá kúú ña̱ kundaa-iniyóra (Sant. 1:5). Ta si̱íní xa̱a̱yó kooyó xa̱ʼa̱ ña̱yóʼo (Is. 48:17, 18). w21.08 17, 18 párr. 12, 13

Tá xa̱a̱ ku̱a̱ʼa̱n kúchéún, va̱ása kaka-iniún chi ndákaʼánva Jehová xa̱ʼa̱ ña̱ ke̱ʼún nu̱úra tá ya̱chi̱. Xa̱a̱ ku̱a̱ʼání ku̱i̱ya̱ kúsi̱í-iniún nátúʼun xíʼin na̱ yiví xa̱ʼa̱ Ndióxi̱ ta ña̱yóʼo sákusi̱íníña-inira. Xa̱a̱ kúndeé-iniún xíʼin tu̱ndóʼo ña̱ yo̱ʼvi̱ní, xa̱a̱ ndakúní íyo iniún káʼún xa̱ʼa̱ ña̱ kúni̱ Ndióxi̱ ná keʼéyó, xa̱a̱ xi̱kuumiíún chiñu ña̱ ndáyáʼviní ta xa̱a̱ sa̱náʼún inkana. Ta xa̱a̱ chíka̱ún ndee̱ ña̱ kundiku̱ún ndiʼi ña̱ káʼa̱n na̱ ñuu Ndióxi̱. Ta saátu xa̱a̱ chíka̱ún ndee̱ xíʼin na̱ káchíñu ku̱a̱ʼá tiempo nu̱ú Ndióxi̱, ta chíndeétáʼún xíʼinna. Kúʼvi̱ní-ini Jehová xínira yóʼó xa̱ʼa̱ ña̱ nda̱kú íyo iniún xíʼinra, ta káʼa̱nra ña̱ va̱ása sandákoondaʼa̱ra yóʼó (Sal. 37:28). Ta káʼa̱ntura ña̱yóʼo xíʼún: “Ni ná kana vi̱xi xi̱níún ndakundeíi̱ chindeétáʼi̱n xíʼún” (Is. 46:4). Soo va̱ása ndakanixi̱níún ña̱ va̱ása ndáyáʼvikaún ti̱xin ñuu Jehová xa̱ʼa̱ ña̱ xa̱a̱ ku̱chéún, saáchi ndáyáʼvinívaún. w21.09 3 párr. 4

Xa̱ʼa̱ ña̱ ndíchiní Jehová, ndiʼi ña̱ ndáka̱xinra keʼéra, kéʼéraña xa̱ʼa̱ ña̱ va̱ʼa miíyó. Ta Biblia káʼa̱nña xa̱ʼa̱ “ña̱ ndíchi ña̱ va̱xi chí ndiví” ña̱ “kúndáʼvi-iniña xíniña inkana ta kéʼéña” ña̱ va̱ʼa (Sant. 3:17). Jehová kúʼvi̱ní-inira xínira miíyó, ta kúnda̱a̱-inira ña̱ va̱ʼaní chíndeétáʼanra xíʼinyó tá kúndáʼvi-inira xínira miíyó (Is. 49:15). Ta xa̱ʼa̱ ña̱ náʼa̱ Jehová ña̱ kúndáʼvi-inira xínira miíyó, íyo ña̱ ndátuyó ndakiʼinyó chí nu̱únínu ni kúúyó na̱ yiví ku̱a̱chi. Ta xa̱ʼa̱ ña̱ ndíchiníra kúnda̱a̱-inira ama kúú ña̱ kivi ixakáʼnu-inira xa̱ʼa̱yó, soo ki̱ʼvaní kéʼéra ña̱yóʼo. Saáchi tá xítora ña̱ xíniñúʼu ndakiʼinyó consejo, táxivaraña ndaʼa̱yó. Ná kachiyó ña̱ iin na̱ ndásakáʼnu Ndióxi̱ kúnda̱a̱va-inina ña̱ va̱ása va̱ʼa ña̱ kéʼéna, soo ndákundeéna kéʼéña. Tá saá, ¿ndáaña xíniñúʼu keʼéna xíʼin na̱yóʼo? Ta̱ apóstol Pablo ka̱chira: “Sandákoondó ña̱ kutáʼanndó [...] xíʼin na̱ yiví kán” (1 Cor. 5:11). Na̱ ku̱a̱kiʼvi ku̱a̱chi ta va̱ása ndándikó-inina, xíniñúʼu kitana ti̱xin congregación. Tasaá kúú ña̱ ndáa na̱ anciano inkaka na̱ hermano, ta va̱ása kúyaku̱a̱ congregación. w21.10 9 párr. 7, 8

Ndásakáʼnuyó Jehová tá táxiyó donación. Na̱ ñuu Israel xi̱xiniñúʼu kuniʼina ña̱ʼa ña̱ taxina ndaʼa̱ Jehová (Deut. 16:16). Ña̱ xi̱kuumií kuitína kúú ña̱ xi̱sokóna nu̱ú Jehová. Saá xi̱na̱ʼa̱na ña̱ xi̱taxina tíxa̱ʼvi ndaʼa̱ Ndióxi̱ xa̱ʼa̱ ndiʼi ña̱ va̱ʼa ña̱ xi̱ndakiʼinna. Ta miíyó, ¿ndáa ki̱ʼva kivi na̱ʼa̱yó ña̱ kúʼvi̱-iniyó xíniyó Jehová ta táxiyó tíxa̱ʼvi ndaʼa̱ra xa̱ʼa̱ ndiʼi ña̱ va̱ʼa ña̱ ndákiʼinyó? Kivi taxiyó xu̱ʼún ña̱ kúúmiíyó ña̱ va̱ʼa kuniñúʼunaña ti̱xin congregación ta saátu ña̱ ku̱ʼu̱nña obra mundial. Ta̱ apóstol Pablo ni̱ka̱ʼa̱nra ña̱yóʼo: “Tá iinna kúni̱na chindeétáʼanna xíʼin inkana, ña̱ kéʼé na̱yóʼo iin ña̱ va̱ʼaní kúúña, saáchi táxina ña̱ kúúmiína ta su̱ví ña̱ kǒo kúúmiína” (2 Cor. 8:4, 12). Nu̱ú Jehová ndáyáʼviní ña̱ taxiyó donación xíʼin ndiʼi níma̱yó ni loʼo kúúña (Mar. 12:42-44). w22.03 24 párr. 13

Ná ndakaʼányó ña̱ kǒo kivi sakútaʼa na̱ anciano ndiʼi tu̱ndóʼo ña̱ yáʼayó nu̱ú. Soo Jehová kúni̱ra ña̱ ná ndakundeé na̱yóʼo chika̱a̱na ndee̱ xíʼin na̱ hermano ta saátu va̱ʼaní kundaana na̱yóʼo. Ta xa̱ʼa̱ ña̱ ku̱a̱ʼání chiñu kúúmiína, ¿ndáaña kivi keʼéna ña̱ va̱ʼa tavána tiempo ña̱ chindeétáʼanna xíʼin na̱ hermano? Kivi kundiku̱nna yichi̱ ña̱ sa̱ndákoo ta̱ apóstol Pablo. Ta̱ Pablo xi̱ka̱ʼa̱nra xíʼin na̱ hermano xa̱ʼa̱ ña̱ va̱ʼa ña̱ xi̱keʼéna ta xi̱chika̱a̱ra ndee̱ xíʼinna. Iin ña̱ va̱ʼaní kúúña tá ndíku̱n na̱ anciano yichi̱ ña̱ sa̱ndákoo ta̱ Pablo ta kúʼvi̱-inina xínina na̱ hermano ta viíní kéʼéna xíʼinna (1 Tes. 2:7). Ta̱ Pablo chi̱ndeétáʼanra xíʼin na̱ hermano ña̱ va̱ʼa kunda̱a̱-inina ña̱ kúʼvi̱ní-ini Jehová xínirana ta saátu miíra (2 Cor. 2:4; Efes. 2:4, 5). Nda̱a̱ táki̱ʼva xi̱keʼéra xíʼin na̱ migora saá xi̱keʼéra xíʼin ndiʼi na̱ hermano ta xi̱tavára tiempo ña̱ koora xíʼinna. Ni̱na̱ʼa̱ra ña̱ ndáa-inira na̱ hermano chi xi̱natúʼunra xíʼinna xa̱ʼa̱ ña̱ xi̱sandíʼi̱-inira ta saátu xa̱ʼa̱ ña̱ xi̱ ixayo̱ʼvi̱ xíʼinra (2 Cor. 7:5; 1 Tim. 1:15). Soo va̱ása níndi̱ʼi̱ní-inira xa̱ʼa̱ tu̱ndóʼo ña̱ xi̱kuumiíra, chi ña̱ xi̱kuni̱ra kúú ña̱ chindeétáʼanra xíʼin na̱ hermano. w22.03 28 párr. 9, 10