Septiembre

Ndióxi̱ ta̱xira ndee̱ ndaʼa̱ ta̱ Jesús ña̱ va̱ʼa sandíʼi-xa̱ʼa̱ra ndiʼi tu̱ndóʼo ña̱ íyo ñuyǐví yóʼo. Sava tu̱ndóʼo ña̱ kúúmiíyó va̱ása kúchiñuyó sandíʼi-xa̱ʼa̱yóña. Soo ta̱ Jesús ni̱na̱ʼa̱ra xíʼin milagro ña̱ ke̱ʼéra ña̱ kuchiñuvara sandíʼi-xa̱ʼa̱raña. Kúúmiíra ndee̱ ña̱ sandíʼi-xa̱ʼa̱ra ku̱a̱chi ña̱ sa̱ndákoo ta̱ Adán xíʼin ñá Eva ndaʼa̱yó. Tá kúú, kue̱ʼe̱ xíʼin ña̱ xíʼiyó (Mat. 9:​1-6; Rom. 5:​12, 18, 19). Milagro ña̱ ke̱ʼéra ni̱na̱ʼa̱ña ña̱ kivi sandíʼi-xa̱ʼa̱ra ndiʼi kue̱ʼe̱ ña̱ sáxo̱ʼvi̱ miíyó ta saátu sandátakura na̱ ni̱xi̱ʼi̱ (Mat. 4:23; Juan 11:​43, 44). Saátu kúúmiíra ndee̱ ña̱ sáya̱a̱ra sa̱vi̱ ta kuchiñura kanitáʼanra xíʼin na̱ ta̱chí ndi̱va̱ʼa (Mar. 4:​37-39; Luc. 8:2). Ta ña̱yóʼo sándi̱koníña-iniyó chi kúnda̱a̱-iniyó ña̱ mií Jehová ta̱xi ndee̱ ndaʼa̱ra ña̱ keʼéra ndiʼi ña̱yóʼo. Kivi kandíxayó ña̱ xi̱nu nu̱ú ndiʼi ña̱ káʼa̱n Jehová keʼéra. Milagro ña̱ ke̱ʼé ta̱ Jesús tá ki̱xira nu̱ú ñuʼú yóʼo ni̱na̱ʼa̱ña ña̱ saá keʼéra tá ná kaʼndachíñura iníísaá nu̱ú ñuʼú ti̱xin Reino Ndióxi̱. w23.04 3 párr. 5-7

Tá ku̱a̱ʼání kúú na̱ publicador ñúʼu ti̱xin congregación nu̱ú xáʼún, sana sava yichi̱ kǒo nda̱a̱ ni iin comentario táxiún. Tá saá ndóʼún, sana ndákanixi̱níún ña̱ va̱ása ndaniʼikaún ndaʼún chi kǒo xíínna taxina comentario ndaʼún. Kǒo ndakava-iniún tá ndóʼún ña̱yóʼo. Ku̱a̱ʼá va̱ʼa comentario taváún. Tasaá tá ná kǒo taxina ña̱ nu̱ú ndaʼún, xa̱a̱ kúúmiíún inka ña̱ kivi taxiún. Tá xa̱a̱ káʼviún Tutu Ña̱ Nátúʼun xíʼinyó, kiʼin kuenta ndáa ki̱ʼva kítáʼan iin tá iin párrafo xíʼin títuloña. Tasaá ndiʼi tiempo koo comentario ña̱ taxiún. Inka ña̱ kivi keʼún kúú ña̱ xa̱a̱ kaʼvi kúeún párrafo ña̱ yo̱ʼvi̱ka káʼa̱n, ta kivi nandukú va̱ʼún xa̱ʼa̱ña ta ña̱yóʼo kivi ka̱ʼún xa̱ʼa̱. Chi xa̱ʼa̱ ña̱ yo̱ʼvi̱ní káʼa̱nña loʼoní na̱ hermano táxi comentario. Soo, ¿ndáaña kivi keʼún tá ni saá kǒo comentario táxina ndaʼún? Tá kúma̱níka kixáʼa reunión ka̱ʼa̱n xíʼin ta̱ hermano ta̱ taxi Tutu Ña̱ Nátúʼun xíʼinyó ndáa párrafo kúni̱ún taxiún iin comentario. w23.04 21, 22 párr. 9, 10

Ta̱ José ndi̱ku̱n kama xi̱keʼéra ña̱ xi̱ka̱ʼa̱n Jehová ta ña̱yóʼo chi̱ndeétáʼan xíʼinra ña̱ va̱ʼaní xi̱kiʼinra kuenta xíʼin na̱ veʼera. U̱vi̱ yichi̱ kuití ni̱ka̱ʼa̱n Jehová xíʼinra ndáaña xi̱niñúʼu keʼéra xíʼin na̱ veʼera. Ta kamaní ke̱ʼéra ña̱ ni̱ka̱ʼa̱n Jehová ni ixayo̱ʼvi̱níña xíʼinra (Mat. 1:20; 2:​13-15, 19-21). Ta xa̱ʼa̱ ña̱ va̱ʼaní xi̱niso̱ʼo ta̱ José ndiʼi ña̱ ni̱ka̱ʼa̱n Jehová xíʼinra, ña̱yóʼo chi̱ndeétáʼanña xíʼinra ña̱ va̱ʼaní xi̱ndaara ñá María. Ta xa̱ʼa̱ ña̱yóʼo xi̱kuʼvi̱ní-ini ñá María xi̱xiniñára ta xi̱ ixato̱ʼóñára. Ndóʼó ta̱ xa̱a̱ ti̱ndaʼa̱, kivi keʼéndó nda̱a̱ táki̱ʼva ke̱ʼé ta̱ José, kivi nandukúndó consejo ña̱ va̱xi nu̱ú tu̱ʼun Ndióxi̱, ña̱ kivi chindeétáʼan xíʼinndó ña̱ viíní kundaandó na̱ veʼendó. Tá ná kuniso̱ʼondó consejo ña̱ va̱xi nu̱ú Biblia, saá kúú ña̱ na̱ʼa̱ndó ña̱ kúʼvi̱-inindó xínindó ñá síʼindó ni sava yichi̱ xíniñúʼu nasamandó ña̱ kéʼéndó. Tá ná keʼéndó ña̱yóʼo, saá kúú ña̱ viíka kutáʼanndó xíʼin na̱ ti̱ndaʼa̱ xíʼinndó. Iin ñá hermana ñá íyo chí Vanuatu xa̱a̱ íyo 20 ku̱i̱ya̱ ti̱ndaʼa̱ñá, ta ñáyóʼo káchiñá: “Tá xítoi̱ ña̱ nándukú yiíi̱ consejo ña̱ va̱xi nu̱ú tu̱ʼun Ndióxi̱ ta kéʼéra ña̱ káʼa̱nña, ña̱yóʼo chíndeétáʼanníkaña xíʼi̱n ña̱ ixato̱ʼóníkai̱ra. Va̱ʼaní kúnii̱ xíʼin ña̱ ndáka̱xinra keʼéra chi va̱ʼaníva íyoña”. w23.05 21 párr. 5

Na̱ judío na̱ xi̱niñúʼu ndikó ñuu Israel xi̱niñúʼu yi̱i̱ koona nu̱ú Jehová (Deut. 7:6). ¿Á ndiʼi na̱ ndi̱kó ñuu Israel va̱ʼa xi̱xiyo ña̱ xi̱keʼéna? Va̱ásaví. Chi xi̱niñúʼu nasamana ña̱ xi̱keʼéna ña̱ va̱ʼa sakúsi̱ína-ini Jehová. Ku̱a̱ʼání na̱ judío, chí ñuu Babilonia ka̱kuna ta ku̱a̱ʼání na̱yóʼo xi̱ndakanixi̱nína ta xi̱keʼéna nda̱a̱ táki̱ʼva xi̱keʼé na̱ ñuu kán. Tá xa̱a̱ ni̱ya̱ʼa ku̱a̱ʼá ku̱i̱ya̱ ña̱ ndi̱kó iin tiʼvi na̱ judío chí ñuu Israel, ta̱ chíñu Nehemías nda̱kanda̱ní-inira tá na̱kunda̱a̱-inira ña̱ sava na̱ se̱ʼe na̱ judío na̱ ndi̱kó ñuu Israel va̱ása káʼa̱nna tu̱ʼun hebreo (Deut. 6:​6, 7; Neh. 13:​23, 24). Ta xa̱ʼa̱ ña̱ va̱ása níxi̱kunda̱a̱-inina xíʼin tu̱ʼun ña̱ ni̱ka̱ʼyi̱ tu̱ʼun Ndióxi̱, va̱ása kiviví xa̱a̱na kuʼvi̱-inina kunina Jehová ta ndasakáʼnunara (Esd. 10:​3, 44). Ña̱kán na̱ judío xi̱niñúʼu nasamana ku̱a̱ʼání ña̱ xi̱keʼéna, ta ña̱ ndikóna ñuu Israel kúú ña̱ va̱ʼaníka chindeétáʼan xíʼinna ña̱ kixáʼana ndasakáʼnuna Jehová (Neh. 8:​8, 9). w23.05 15 párr. 6, 7

Ni kúni̱vayó saxínuyó ña̱ ki̱ndooyó keʼéyó, soo sava yichi̱ íyo sava ña̱ sási nu̱úyó. Tá kúú, iin sana kivi kundoʼoyó iin ña̱ va̱ása ndátuyó ta ña̱yóʼo kivi kindaaña tiempoyó ña̱ saxínuyó ña̱ kúni̱yó keʼéyó (Ecl. 9:11). Ta saátu kivi kundoʼoyó iin tu̱ndóʼo ta ña̱yóʼo kivi sandákavaña-iniyó (Prov. 24:10). Xa̱ʼa̱ ña̱ kúúyó na̱ yiví ku̱a̱chi, kivi keʼéyó iin ña̱ va̱ása va̱ʼa ta xa̱ʼa̱ ña̱kán va̱ása kuchiñukayó saxínuyó ña̱ xi̱kuni̱yó keʼéyó (Rom. 7:23). Á sava yichi̱ kúnaanívayó (Mat. 26:43). Soo, ¿ndáaña kivi chindeétáʼan xíʼinyó ña̱ va̱ʼa saxínuyó ña̱ kúni̱yó keʼéyó? Tá íyo iin ña̱ sási nu̱ún ña̱ sáxi̱nún iin ña̱ kúni̱ún keʼún ña̱yóʼo va̱ása kúni̱ kachiña ña̱ kǒo kuchiñukaún keʼúnña. Biblia káʼa̱nña xíʼinyó ña̱ koo sava ña̱ʼa ña̱ kivi kasi nu̱úyó ña̱ saxínuyó ña̱ kúni̱yó keʼéyó. Ña̱kán ni íyova ña̱ íxayo̱ʼvi̱ xíʼinyó keʼéyó iin ña̱ʼa, soo chíkaa̱níyó ndee̱ ña̱ keʼéyóña ta xíʼin ña̱yóʼo náʼa̱yó ña̱ kúni̱yó sakúsi̱íyó-ini Jehová. Á loʼoví kúsi̱í-ini Jehová tá xítora ña̱ chíkaa̱yó ndee̱ ña̱ saxínuyó ña̱ nda̱kaxinyó keʼéyó. w23.05 30 párr. 14, 15

Tá ndákanixi̱níún ña̱ koún precursor, ña̱yóʼo kivi chindeétáʼan xíʼún ña̱ kachíñún xíʼin inka na̱ hermano ta saátu ña̱ viíní kuniñúʼún xu̱ʼún (Filip. 4:​11-13). ¿Nda̱chun ndáyáʼviní ña̱ koún precursor auxiliar? Saáchi ña̱yóʼo kivi chindeétáʼanña xíʼún ña̱ xa̱ún koún precursor regular tasaá kivi kachíñún ku̱a̱ʼáka tiempo nu̱ú Jehová. Tá kúú, ña̱ kachíñún nu̱ú íxava̱ʼana veʼe nu̱ú ndásakáʼnuyó Ndióxi̱ á ña̱ kachíñún Betel. Ndiʼi ta̱ hermano kivi chikaa̱ra ndee̱ ña̱ xa̱a̱ra koora anciano ti̱xin congregación. Ña̱kán ndiʼi ta̱ hermano ta̱ kúni̱ keʼé chiñu yóʼo iin ña̱ va̱ʼaní kúú ña̱ ndáka̱xinra keʼéra (1 Tim. 3:1). Siʼna xíniñúʼu koún siervo ministerial. Na̱ siervo ministerial va̱ʼaní chíndeétáʼanna xíʼin na̱ anciano ña̱ keʼéna ku̱a̱ʼá chiñu. Na̱ anciano xíʼin na̱ siervo ministerial vitá íyo inina ta kúsi̱í-inina nátúʼunna xíʼin na̱ yiví xa̱ʼa̱ Ndióxi̱. w23.12 28 párr. 14, 15

Tá ni̱xi̱yo loʼoví ta̱ rey Josías xi̱kuni̱ra sakúaʼara xa̱ʼa̱ Jehová. Xi̱kuni̱ra kunda̱a̱-inira ndáa ki̱ʼva íyo Jehová ta keʼéra ña̱ kúni̱ra. Soo, i̱xayo̱ʼvi̱vaña xíʼinra ña̱ koora rey. Tiempo tá ni̱xi̱yo ta̱ Josías ku̱a̱ʼání na̱ yiví xi̱ndasakáʼnu ndióxi̱ vatá, ña̱kán xi̱niñúʼu ndakúní koo inira ña̱ va̱ʼa ndasakáʼnura Jehová. Ta va̱ʼaníva chiñu ke̱ʼéra saáchi tá kúma̱níka xi̱nura 20 ku̱i̱ya̱ xa̱a̱ ki̱xáʼara sa̱ndíʼi-xa̱ʼa̱ra ndióxi̱ vatá (2 Crón. 34:​1, 2). Ni loʼoníún kiviva koún nda̱a̱ táki̱ʼva ni̱xi̱yo ta̱ Josías. Soo, ¿ndáa ki̱ʼva keʼún ña̱yóʼo? Chikaa̱ ndee̱ ña̱ sakuaʼún xa̱ʼa̱ Jehová xíʼin xa̱ʼa̱ ña̱ va̱ʼa ña̱ kúúmiíra. Tá ná keʼún ña̱yóʼo va̱ʼaní chindeétáʼanña xíʼún ña̱ ndataxiún miíún ndaʼa̱ Jehová ta ndakuchiún. Tá ná xa̱ún ndakuchiún, ¿ndáa ki̱ʼva chindeétáʼan ña̱yóʼo xíʼún? Ta̱ Luke 14 ku̱i̱ya̱ra tá nda̱kuchira ta ña̱yóʼo káchira: “Vitin ña̱ siʼna kéʼíi̱ kúú ña̱ chíkai̱ ndee̱ ña̱ kachíñui̱ nu̱ú Jehová ta saátu ña̱ sakusi̱í-inira” (Mar. 12:30). Ku̱a̱ʼání ña̱ va̱ʼa ndakiʼún tá ná ndaka̱xi̱ún ña̱ kachíñún nu̱ú Jehová. w23.09 11 párr. 12, 13

Ná ndakanixi̱níyó xa̱ʼa̱ congregación ña̱ ni̱xi̱yo chí Tesalónica. Tá ka̱ʼyí ta̱ apóstol Pablo carta yóʼo nu̱úna, sa̱kán loʼoníva yo̱o̱ ki̱xáʼa congregación kán íyoña, xa̱ʼa̱ ña̱kán na̱ anciano na̱ ni̱xi̱yo tiempo saá kǒo níxi̱kunda̱a̱ví-inina ndáa ki̱ʼva keʼéna sava ña̱ʼa, soo ni saá xi̱niñúʼu ixato̱ʼóvanana. Xa̱a̱ ku̱nu̱míní kixaa̱ ña̱ gran tribulación ña̱kán xíniñúʼu kandíxaníyó ta kuniso̱ʼoyó ña̱ káʼa̱n na̱ anciano xíʼinyó, saáchi tá ná kixaa̱ ki̱vi̱ kán, sana va̱ása kivika ka̱ʼa̱n na̱ káchíñu Betel xíʼinyó ndáaña kivi keʼéyó. Ña̱kán, ndáyáʼviní ña̱ ixato̱ʼóyó na̱ anciano ta saátu ná kuʼvi̱ní-iniyó kuniyóna. Nda̱a̱ ndáaka ña̱ ná kuu ná ixato̱ʼóníyóna ta ná kǒo kotoyó ña̱ va̱ása va̱ʼa kéʼéna. Ná ndakaʼányó saáchi mií Jehová xíniñúʼura ta̱ Jesús ña̱ kuniʼira yichi̱ nu̱úyó, ta ta̱ Jesús kúú ta̱ níʼi yichi̱ nu̱ú na̱ anciano. Nda̱a̱ táki̱ʼva ndáa iin casco xi̱ní iin ta̱ soldado ta̱ ku̱a̱ʼa̱n nu̱ú ku̱a̱chi, ki̱ʼva saá ndáa ña̱ ndátuyó koo chí nu̱únínu ña̱ ndákanixi̱níyó. Ña̱ ndátuyó koo chí nu̱únínu chíndeétáʼanña xíʼinyó ña̱ kǒo kundayáʼviní ña̱ʼa ña̱ íyo nu̱ú ñuʼú yóʼo nu̱úyó saáchi ña̱ ndiʼi-xa̱ʼa̱va kúúña (Filip. 3:8). Ña̱ ndátuyó koo chí nu̱únínu sándi̱koña-iniyó tasaá kǒo ndíʼi̱ní-iniyó. w23.06 11, 12 párr. 11, 12

Ndiʼi na̱ xíniso̱ʼo ña̱ káʼa̱n ñá ñaʼá kíʼví, xíniñúʼu ndaka̱xinna ndáaña keʼéna: ña̱ ku̱ʼu̱nna nu̱ú íyoñá á va̱ása ku̱ʼu̱nna. Íyo ku̱a̱ʼá ña̱ va̱ʼa ndakiʼinyó tá ná kǒo keʼéyó ku̱a̱chi kini. Nu̱ú Proverbios va̱xi ña̱ káʼa̱n ñá ñaʼá kíʼví, ñáyóʼo káchiñá: “Ti̱kui̱í tá íxakuíʼnána vi̱si̱níra” (Prov. 9:17). ¿Ndáaña ndána̱ʼa̱ “ti̱kui̱í tá íxakuíʼnána”? Biblia káʼa̱nña xa̱ʼa̱ na̱ ti̱ndaʼa̱ tá kísi̱ xíʼin táʼanna, íyoña nda̱a̱ táki̱ʼva íyo ti̱kui̱í tá sándi̱ko-inina (Prov. 5:​15-18). Iin ta̱a xíʼin iin ñaʼá na̱ xa̱a̱ ti̱ndaʼa̱ kiviva ku̱su̱n xíʼin táʼanna. Soo tá káʼa̱n Proverbios xa̱ʼa̱ “ti̱kui̱í tá íxakuíʼnána” ña̱yóʼo kúni̱ kachiña, ña̱ kísi̱ iin ta̱a xíʼin iin ñaʼá ta ta̱ʼán tindaʼa̱na, á na̱ xa̱a̱ ti̱ndaʼa̱ kísi̱na xíʼin na̱ kǒo nítindaʼa̱ xíʼinna, ta xa̱ʼa̱ ña̱yóʼo yáʼanndosóna ley Ndióxi̱. Na̱ yiví na̱ kéʼé ña̱yóʼo kéʼé se̱ʼénaña, nda̱a̱ táki̱ʼva kéʼé iin ta̱ kui̱ʼná tá ku̱a̱ʼa̱nra ixakuíʼnára. Tá “ti̱kui̱í tá íxakuíʼnána” vi̱si̱níra nu̱ú na̱ kǒo xíín natúʼun xa̱ʼa̱ ku̱a̱china, soo sándaʼvina miívana, saáchi Jehová xítora ndiʼi ña̱ kúú ta kǒo kivi sandáʼviyóra. Ndáyáʼviníka ña̱ kitáʼanyó xíʼin Jehová nu̱úka ña̱ keʼéyó ña̱ kini (1 Cor. 6:​9, 10). w23.06 22 párr. 8, 9

Tá xa̱a̱ kéʼún oración nu̱ú Jehová, ¿á kúsi̱íka-iniún káʼún xíʼinra? Ta saátu, ¿á kúsi̱íka-iniún nátúʼún xíʼin na̱ yiví xa̱ʼa̱ Ndióxi̱? Tá kíʼún kuenta ña̱ kǒo kúsi̱íka-iniún kéʼúnña, kǒo ndakanixi̱níún ña̱ sa̱ndákoo ndaʼa̱ Jehová yóʼó. Xa̱ʼa̱ ña̱ kúúyó na̱ yiví ku̱a̱chi sava yichi̱ ndákava-iniyó. Tá kíʼún kuenta ña̱ kǒo kúsi̱íka-iniún kéʼún sava ña̱ʼa nu̱ú Jehová, ndakanixi̱ní xa̱ʼa̱ ña̱ ndo̱ʼo ta̱ apóstol Pablo. Ni chi̱kaa̱ní ta̱ apóstol Pablo ndee̱ ña̱ keʼéra nda̱a̱ táki̱ʼva ke̱ʼé ta̱ Jesús, soo xi̱kunda̱a̱-inira ña̱ sava yichi̱ xi̱ i̱xayo̱ʼvi̱ña xíʼinra keʼéra ña̱ va̱ʼa nu̱ú Ndióxi̱. Ta̱ Pablo chi̱kaa̱ra ndee̱ ña̱ kachíñura nu̱ú Ndióxi̱ ni xi̱ndakava-inira á xi̱yaʼara nu̱ú tu̱ndóʼo. Ta saátu miíún sana yáʼún nu̱ú tu̱ndóʼo, soo kǒo taxiún kasiña nu̱ún. Va̱ʼaka chika̱a̱ ndee̱ ña̱ keʼún ña̱ va̱ʼa ni sava yichi̱ kǒo kúni̱ún keʼúnña. Tá ná ya̱ʼa tiempo sana kixáʼa kusi̱í tuku iniún kachíñún nu̱ú Jehová (1 Cor. 9:16). w24.03 11, 12 párr. 12, 13

Kivi na̱ʼa̱yó ña̱ kúʼvi̱-iniyó xíniyó na̱ hermanoyó ta vií kutáʼanyó xíʼinna (2 Cor. 6:​11-13). Ti̱xin iin tá iin congregación íyo ku̱a̱ʼání na̱ ñaniyó xíʼin ku̱ʼvayó, xa̱a̱ síín síín ñuu na̱yóʼo ta saátu xa̱a̱ síín síín xa̱ʼnu iin tá iinna, ¿ndáaña chindeétáʼan xíʼinyó ña̱ kuʼvi̱-iniyó kuniyó ndiʼina? Ña̱ kotoyó ña̱ va̱ʼa ña̱ kúúmiína nda̱a̱ táki̱ʼva kéʼé Jehová. Tá xa̱a̱ ndíkaa̱ ña̱ gran tribulación xíniñúʼu kuʼvi̱níka-iniyó kuniyó na̱ hermanoyó. ¿Ndáa ki̱ʼva kundaa Jehová miíyó tá ná kixáʼa ña̱ gran tribulación? Ná ndakaʼányó ndáaña ni̱ka̱ʼa̱n Jehová xíʼin na̱ ñuura keʼéna tá xa̱a̱ ku̱numí ndiʼi-xa̱ʼa̱ ñuu Babilonia: “Kamandó na̱ ñui̱, ki̱ʼvindó cuarto ña̱ ñúʼu chí maá, tá xa̱a̱ ni̱ki̱ʼvindó ndakasindó yéʼé, chise̱ʼéndó miíndó loʼo tiempo nda̱a̱ ná ya̱ʼa tu̱ndóʼo” (Is. 26:20). Ta sananí miíyó keʼétuyó ña̱ káʼa̱n tu̱ʼun yóʼo tá ná koo ña̱ gran tribulación. w23.07 6, 7 párr. 14-16

¿Á xíto inkana ña̱ vií ndákanixi̱níyó? Kivi nda̱ka̱tu̱ʼúnyó miíyó: “¿Á xíto inkana ña̱ vií ndákanixi̱níi̱, ña̱ va̱ása kama sái̱, ta su̱ví ndiʼi tiempo kéʼíi̱ ña̱ kúni̱ miíi̱? ¿Á ndákanixi̱nína ña̱ nina ña̱ kúni̱ miíi̱ kéʼíi̱, ta kǒo kúnda̱a̱-inii̱ xíʼin ña̱ ndóʼo inkana, ta so̱ʼoníi̱? ¿Á xíniso̱ʼi̱ ña̱ káʼa̱n inkana ta kǒo íxandúxai̱ xíʼinna ña̱ keʼéna ña̱ kúni̱ miíi̱?”. Tá kúnda̱a̱-iniyó xíʼin ña̱ ndóʼo inkana saá kúú ña̱ keʼéyó nda̱a̱ táki̱ʼva kéʼé Jehová xíʼin ta̱ Jesús. Ná ndakani vií xi̱níyó tá nása̱ma ña̱ ndóʼoyó, ta ná chikaa̱yó ndee̱ ña̱ keʼéyó ña̱ kivi keʼéyó. Sana iin kama nasa̱ma ña̱ ndóʼoyó tá kúú ña̱ kiʼin kue̱ʼe̱ miíyó, ña̱ kuma̱ní xu̱ʼún nu̱úyó á ña̱ ixandi̱va̱ʼa na̱ chíñu xíʼinyó. Tá iin kama ná kundoʼoyó ña̱yóʼo ixayo̱ʼvi̱níña xíʼinyó (Ecl. 9:11). Ta saátu nda̱a̱ chiñu ña̱ kéʼéyó ti̱xin ñuu Ndióxi̱ kivi nasa̱maña, xa̱ʼa̱ ña̱kán kivi ixayo̱ʼvi̱ña xíʼinyó ña̱ nda̱kú koo iniyó xíʼin Ndióxi̱. Ña̱ kivi chindeétáʼan xíʼinyó kúú ña̱yóʼo. Ña̱ nu̱ú, ná chikaa̱yó ndee̱ ña̱ kusi̱í-iniyó tá nása̱ma ña̱ ndóʼoyó. Ña̱ u̱vi̱, ná ndakanixi̱níyó xa̱ʼa̱ ña̱ koo chí nu̱únínu. Ña̱ u̱ni̱, nina ña̱ va̱ʼa ná ndakanixi̱níyó xa̱ʼa̱. Ta ña̱ ku̱mí, ná chindeétáʼanyó xíʼin inkana. w23.07 22 párr. 7, 8

Tá ni̱xi̱yo loʼo ta̱ Daniel, na̱ ñuu Babilonia ti̱innara ta nda̱kiʼinnara ku̱a̱ʼa̱n xíʼinna ñuuna, ña̱kán nda̱koora ñuura ta xíkání ku̱a̱ʼa̱nra xíʼinna. Nu̱ú na̱ ñuu Babilonia xi̱ndayáʼviní ta̱ loʼo yóʼo saáchi “liviní ni̱xi̱yora” ta ti̱xin iin familia na̱ ndáyáʼviní ki̱xira (1 Sam. 16:7). Ña̱kán va̱ʼaní sa̱náʼa̱nara ña̱ keʼéra chiñu ña̱ ndáyáʼviní ti̱xin ñuu Babilonia (Dan. 1:​3, 4, 6). Xi̱kuʼvi̱-ini Jehová xi̱xinira ta̱ Daniel. Saáchi xa̱ʼa̱ ki̱ʼva ña̱ xi̱ndasakáʼnurara kúú ña̱ ni̱xa̱a̱ra ni̱kuʼvi̱ní-inira xi̱nirara. Kúnda̱a̱-iniyó xa̱ʼa̱ ña̱yóʼo saáchi tá xi̱kuumií ta̱ Daniel 20 ku̱i̱ya̱, Jehová ni̱ka̱ʼa̱nra ña̱ nda̱kúní íyo inira xíʼinra nda̱a̱ táki̱ʼva ni̱xi̱yo ta̱ Noé xíʼin ta̱ Job chi na̱yóʼo ndiʼi tiempo va̱ʼaní nda̱sakáʼnunara (Gén. 5:32; 6:​9, 10; Job 42:​16, 17; Ezeq. 14:14). Ndiʼi tiempo ni̱kuʼvi̱ní-ini Jehová xi̱nira ta̱ Daniel ta xa̱ʼa̱ ña̱yóʼo si̱íní ni̱xi̱yora nda̱a̱ tá ni̱xi̱ʼi̱ra (Dan. 10:​11, 19). w23.08 2 párr. 1, 2

Ndakanixi̱ní ña̱ kúni̱ún satáún iin veʼe. ¿Ndáaña xíniñúʼu keʼún ña̱ va̱ʼa kunda̱a̱-iniún á satáún veʼe yóʼo á va̱ása? Sana kuni̱ún ku̱ʼu̱n kotoún ndáa ki̱ʼva káaña, ndáa ki̱ʼva íyo cuartoña. Ki̱ʼva saá xíniñúʼu keʼéyó tá káʼviyó Biblia. Tá kamaní káʼviyóña, va̱ása kivi kunda̱a̱-iniyó xa̱ʼa̱ inkaka ña̱ʼa ña̱ ndáyáʼvi va̱xi nu̱úña (Heb. 5:12). Ña̱kán tá káʼviyóña, viíní ná nandukúyó xa̱ʼa̱ña ña̱ va̱ʼaní kunda̱a̱-iniyó xíʼinña. Ta ná kotoyó ndáa ki̱ʼva kítáʼanña xíʼin inkaka ña̱ va̱xi nu̱úña. Ña̱kán, su̱ví xíniñúʼu kandíxa kuitíyó ña̱ va̱xi nu̱úña, chi saátu xíniñúʼu kunda̱a̱-iniyó ndáa xa̱ʼa̱ kúú ña̱ kándíxayóña. Ña̱ va̱ʼa kunda̱a̱-iniyó xíʼin ña̱ va̱xi nu̱ú Biblia xíniñúʼu viíní kaʼviyóña ta viíní nandukúyó xa̱ʼa̱ ña̱ káʼviyó. Ta̱ apóstol Pablo ni̱ka̱ʼa̱nra xíʼin na̱ cristiano ña̱ ná chikaa̱na ndee̱ ña̱ va̱ʼaní kunda̱a̱-inina xíʼin tu̱ʼun Ndióxi̱ “ndáa ki̱ʼva ndíka̱ña, ndáa ki̱ʼva káni̱ña, ndáa ki̱ʼva súkunña, ta ndáa ki̱ʼva kúnuña”. Xi̱niñúʼu keʼéna ña̱yóʼo ña̱ va̱ʼa kandíxakana Ndióxi̱ (Efes. 3:​14-19). Ki̱ʼva saá xíniñúʼu keʼéyó tá káʼviyó Biblia. w23.10 18 párr. 1-3

Biblia káʼa̱nña xa̱ʼa̱ inka na̱ yiví na̱ kúee ni̱xi̱yo ini. ¿Á kivi nandukún ña̱ káʼa̱n xa̱ʼa̱ na̱yóʼo tá káʼviún Biblia? Tá kúú, ta̱ David, loʼovíra nda̱kaxinnara ña̱ koora rey, soo xi̱niñúʼu kundatura ku̱a̱ʼá ku̱i̱ya̱ ña̱ va̱ʼa kaʼndachíñura. Ta̱ Simeón xíʼin ñá Ana nda̱kúní ni̱xi̱yo inina xíʼin Jehová nani xi̱ndatuna ña̱ kixaa̱ ta̱ Mesías (Luc. 2:​25, 36-38). Tá xa̱a̱ káʼviún xa̱ʼa̱ na̱yóʼo, ndakanixi̱ní xa̱ʼa̱ pregunta yóʼo: ¿Ndáaña chi̱ndeétáʼan xíʼinna ña̱ kúee ni̱xi̱yo inina? Ta, ¿ndáaña va̱ʼa nda̱kiʼinna xa̱ʼa̱ ña̱yóʼo? ¿Ndáa ki̱ʼva kundiku̱i̱n yichi̱na? Saátu kivi sákuaʼún xíʼin ña̱ ke̱ʼé na̱ kamaní ni̱xi̱yo ini ta kǒo níxindatuna (1 Sam. 13:​8-14). Tá xa̱a̱ káʼviún xa̱ʼa̱ na̱yóʼo, kivi ndakanixi̱níún xa̱ʼa̱ pregunta yóʼo: ¿Nda̱chun kamaní ni̱xi̱yo inina ta kǒo níxindatuna? ¿Ndáaña ndo̱ʼona xa̱ʼa̱ ña̱ kamaní ni̱xi̱yo inina? w23.08 25 párr. 15

Ta̱ apóstol Pedro nda̱kúní ni̱xi̱yo inira ta kǒo nítaxira ña̱ sandákavana-inira. Iin yichi̱ ni̱na̱ʼa̱ra ña̱ nda̱kúní íyo inira xíʼin ta̱ Jesús, saáchi ta̱ Jesús ni̱ka̱ʼa̱nra iin ña̱ʼa, soo na̱ discípulo kǒo níkunda̱a̱-inina xíʼinña (Juan 6:68). Na̱ discípulo yóʼo kǒo níxiinna kundatuna ña̱ ka̱ʼa̱n ta̱ Jesús xíʼinna ndáaña xi̱kuni̱ra ka̱ʼa̱nra, ta nda̱kiʼinna ku̱a̱ʼa̱nna. Soo ta̱ Pedro ni̱ndoovara ta nda̱a̱ ni̱ka̱ʼa̱nra xa̱ʼa̱ ta̱ Jesús ña̱ kúúmiíra “tu̱ʼun ña̱ taxi kutakuna ndiʼi tiempo”. Ta̱ Jesús xi̱kunda̱a̱-inira ña̱ ñuú tá ná tiinnara, ta̱ Pedro xíʼin ndiʼika na̱ apóstol sandákoovanara. Soo nisaá xi̱kunda̱a̱-inira ña̱ ndikóva ta̱ Pedro kundiku̱nra sa̱tára ta nda̱kú koo inira xíʼinra (Luc. 22:​31, 32). Ta̱ Jesús xi̱kunda̱a̱-inira ña̱ miíyó na̱ yiví kúni̱vayó keʼéyó ña̱ va̱ʼa soo xa̱ʼa̱ ña̱ kúúyó na̱ ku̱a̱chi íxayo̱ʼvi̱ña xíʼinyó (Mar. 14:38). Ña̱kán ni ni̱ka̱ʼa̱n ta̱ Pedro ña̱ kǒo xíni̱ra ta̱ Jesús, soo ta̱yóʼo kǒo níndakanixi̱níra ña̱ va̱ása ndáyáʼvika ta̱ Pedro. Tá xa̱a̱ nda̱taku ta̱ Jesús ki̱tara nu̱ú ta̱ Pedro (Mar. 16:7; Luc. 24:34; 1 Cor. 15:5). Ña̱yóʼo chi̱ndeétáʼanníña xíʼinra ña̱ kǒo ndakava-inira. w23.09 22 párr. 9, 10

Ndióxi̱ íxaká’nu-inira xa̱’a̱ ku̱a̱chi na̱ yiví na̱ kándíxa miíra ta kǒo ndákaʼánkara xa̱ʼa̱ ña̱ ke̱ʼéna (Sal. 32:​1, 2). Ña̱kán, tá iin na̱ yiví kándíxanína Jehová, nda̱kú íyo inina xí’inra ta kǒoka ku̱a̱china. Ta̱ Abrahán, ta̱ David xíʼin inkaka na̱ xi̱ndasakáʼnu Jehová tiempo xi̱naʼá, na̱ ku̱a̱chi xi̱kuuna soo ni saá ni̱ka̱ʼa̱nva Jehová ña̱ nda̱kú ni̱xi̱yo inina xíʼinra, ta nda̱a̱ táki̱ʼva ni̱xi̱yo na̱ yiví na̱ kǒo ku̱a̱chi saá ni̱xi̱yona nu̱úra (Efes. 2:12). Nu̱ú carta ña̱ chi̱ndaʼá ta̱ apóstol Pablo ku̱a̱ʼa̱n nu̱ú na̱ Romano ni̱ka̱ʼa̱nra xíʼinna ña̱ tá kúni̱yó kooyó migo Jehová xíniñúʼu kandíxayóra. Saá ke̱ʼé ta̱ Abrahán xíʼin ta̱ David, ta saátu xíniñúʼu keʼé miíyó. w23.12 3 párr. 6, 7

Ndiʼi miíyó kivi so̱kóyó ña̱ʼa nu̱ú Jehová. Soo, ¿ndáa ña̱ʼa kivi taxiyó ndaʼa̱ra? Ña̱yóʼo kúú, tiempoyó, ndee̱yó xíʼin xu̱ʼúnyó. Tá siʼna chiñu Ndióxi̱ ndíʼi̱-iniyó xa̱ʼa̱, saá náʼa̱yó ña̱ ndáyáʼviní ña̱ ndásakáʼnuyóra. Ta̱ apóstol Pablo káʼa̱nra xa̱ʼa̱ ña̱ʼa ña̱ kǒo xíniñúʼu sandákooyó keʼéyó (Heb. 10:​22-25). Tá kúú, ni̱ka̱ʼa̱nra ña̱ ndáyáʼviní ndasakáʼnuyó Jehová, ña̱ natúʼunyó xíʼin na̱ yiví xa̱ʼa̱ ña̱ ndátuyó ndakiʼinyó chí nu̱únínu, ña̱ ku̱ʼu̱nyó reunión ta saátu ña̱ chikaa̱yó ndee̱ xíʼin táʼanyó. Ta xíniñúʼu keʼéníkayó ña̱yóʼo chi xa̱a̱ ku̱nu̱míní kixaa̱ ki̱vi̱ Jehová. Nu̱ú tutu ña̱ Apocalipsis, ta̱ ángel Jehová káchira: “Ndasakáʼnu Ndióxi̱”. U̱vi̱ yichi̱ ni̱ka̱ʼa̱nra tu̱ʼun yóʼo ta xíʼin ña̱yóʼo náʼa̱ra ña̱ ndáyáʼviníña (Apoc. 19:10; 22:9). Ná kǒo nandóso-iniyó xa̱ʼa̱ ña̱ sa̱kúaʼayó xa̱ʼa̱ templo espiritual ña̱ kúúmií Jehová, ta saátu xa̱ʼa̱ chiñu ña̱ ndáyáʼviní ña̱ kúúmiíyó ña̱ ndasakáʼnuyóra. w23.10 29 párr. 17, 18

Ndiʼiyó kúni̱yó keʼéyó ña̱yóʼo, ña̱ “ndakundeéyó kuʼvi̱-iniyó kunitáʼanyó”. Soo ná kǒo nandósó-iniyó xa̱ʼa̱ ña̱ ni̱ka̱ʼa̱n ta̱ Jesús, ña̱ “ku̱a̱ʼání na̱ yiví kǒo kuʼvi̱ka-inina kunitáʼanna” (Mat. 24:12). Ta̱ Jesús kǒo níxi̱kuni kachira ña̱ ku̱a̱ʼání na̱ discípulora sandákoona ña̱ kuʼvi̱-inina kunitáʼanna. Soo ni saá, xíniñúʼu kiʼinníyó kuenta ta kǒo keʼéyó nda̱a̱ táki̱ʼva kéʼé na̱ yiví na̱ ndóo tiempo vitin, na̱ kǒo kúʼvi̱-ini xínitáʼan. Vitin ná ndakuiinyó iin pregunta, ¿á íyo iin ña̱ kivi chindeétáʼan xíʼinyó ña̱ kotoyó á ndixa kúʼvi̱-iniyó xíniyó na̱ hermanoyó? Ña̱ chindeétáʼan xíʼinyó ña̱ kunda̱a̱-iniyó á ndixa kúʼvi̱-iniyó xíniyó na̱ hermanoyó kúú ña̱ kotoyó ndáaña kéʼéyó tá káku iin ku̱a̱chi (2 Cor. 8:8). Ña̱yóʼo kúú ña̱ ni̱ka̱ʼa̱n ta̱ apóstol Pablo: “Soo mií ña̱ ndáyáʼvika kúú ña̱ kuʼvi̱ní-inindó kunitáʼanndó, saáchi na̱ kúʼvi̱-ini xíni inkana ndiʼi tiempo íyo tu̱ʼvana ña̱ koo káʼnu-inina xa̱ʼa̱ táʼanna” (1 Ped. 4:8). Ña̱kán, tá ndixa kúʼvi̱-iniyó xíniyó na̱ hermanoyó ni káʼa̱nna iin ña̱ va̱ása va̱ʼa xa̱ʼa̱yó á kéʼéna iin ña̱ va̱ása va̱ʼa xíʼinyó, koo káʼnuva-iniyó xa̱ʼa̱na. w23.11 10, 11 párr. 12, 13

Tá sava kuití na̱ hermano na̱ ñúʼu ti̱xin congregación kúʼvi̱-iniyó xíniyó, kǒo kándíxayó ña̱ ni̱ka̱ʼa̱n ta̱ Jesús. Ña̱ nda̱a̱, sana íyo sava na̱ hermano na̱ va̱ʼaníka kítáʼanyó xíʼin nda̱a̱ táki̱ʼva ke̱ʼé mií ta̱ Jesús (Juan 13:23; 20:2). Soo, ta̱ apóstol Pedro sa̱ndákaʼánra miíyó ña̱ xíniñúʼu va̱ʼa koo iniyó xíʼin ndiʼi na̱ hermano ta na̱ʼa̱yó ña̱ ndixa kúʼvi̱-iniyó xíniyóna. Xíniñúʼu kúʼvi̱-iniyó kuniyóna nda̱a̱ táki̱ʼva kúʼvi̱-iniyó xíniyó na̱ veʼeyó (1 Ped. 2:17). Ta̱ Pedro ni̱ka̱ʼa̱nra, “xíʼin ndiʼi níma̱ndó kuʼvi̱-inindó kunitáʼanndó” (1 Ped. 1:22). Ña̱yóʼo kúni̱ kachiña ña̱ xíniñúʼu kuʼvi̱-iniyó kuniyó na̱ kéʼé ña̱ va̱ása va̱ʼa xíʼinyó. Tá kúú, ¿ndáaña ndóʼún tá iin na̱ hermano ke̱ʼéna iin ña̱ va̱ása va̱ʼa xíʼún? Sana sáa̱vaún ta kúni̱ún keʼún xíʼinna nda̱a̱ táki̱ʼva ke̱ʼéna xíʼún. Soo, tá saá ná keʼún kǒo kútóo Jehová ña̱yóʼo, nda̱a̱ táki̱ʼva ni̱ka̱ʼa̱n ta̱ Jesús xíʼin ta̱ Pedro (Juan 18:​10, 11). Ta̱ apóstol Pedro ka̱ʼyíra: “Tá kéʼéna ña̱ va̱ása va̱ʼa xíʼinndó va̱ása keʼéndó saá xíʼinna, tá káʼa̱n-ndi̱va̱ʼana xíʼinndó va̱ása ka̱ʼa̱n-ndi̱va̱ʼandó xíʼinna, nu̱úka ña̱yóʼo keʼéndó ña̱ va̱ʼa xíʼinna” (1 Ped. 3:9). Tá ndixa kúʼvi̱-iniún xíniún inkana, keʼévaún ña̱ va̱ʼa xíʼinna. w23.09 29 párr. 10, 11

¿Á su̱ví ndákanda̱ní-iniyó ña̱ kamaní xáʼnu na̱ va̱lí ta xáa̱na ndúuna na̱ chée? Ni kǒo kíʼinyó kuenta ta xa̱a̱ xa̱ʼnuva na̱yóʼo. Soo ña̱ sákuaʼayó xa̱ʼa̱ Ndióxi̱, su̱ví saáví íyoña chi loʼo tá loʼova sákuaʼayó xa̱ʼa̱ra (1 Cor. 13:11; Heb. 6:1). Ña̱ va̱ʼa sakúaʼakayó xa̱ʼa̱ Jehová, xíniñúʼu viíní kutáʼanyó xíʼinra. Ta xíniñúʼuyó espíritu santora ña̱ va̱ʼa chindeétáʼanña xíʼinyó keʼéyó ña̱ va̱ʼa. Tasaá sákuaʼayó keʼéyó chiñu ña̱ taxina ndaʼa̱yó chí nu̱únínu (Prov. 1:5). Jehová kúú ta̱ i̱xava̱ʼa na̱ yiví, i̱xava̱ʼara ta̱a ta i̱xava̱ʼara ñaʼá (Gén. 1:27). Na̱ ta̱a xíʼin ná ñaʼá síínní ku̱vaʼa na̱yóʼo, ta síínní ndákanixi̱nína. Síín chiñu ta̱xi Jehová ndaʼa̱ na̱ ta̱a keʼéna ta sííntu ña̱ keʼé ná ñaʼá. Ta ña̱ va̱ʼa sáxi̱nuna chiñu yóʼo xíniñúʼu sakúaʼana keʼénaña (Gén. 2:18). w23.12 18 párr. 1, 2

Ta̱ Jesús xi̱kuni̱ra ña̱ kuniñúʼuna ki̱vi̱ yivára. Sava na̱ xi̱niʼi yichi̱ nu̱ú na̱ judío xi̱ka̱ʼa̱nna ña̱ yi̱i̱ní ki̱vi̱ Ndióxi̱ ta kǒo kívi kuniñúʼunaña. Soo ta̱ Jesús kǒo nítaxira kasi ña̱yóʼo nu̱úra ña̱ ndasakáʼnura ki̱vi̱ yivára. Ná ndakanixi̱níyó ndáaña ku̱u tá sa̱ndaʼa ta̱ Jesús iin ta̱a ta̱ xi̱kuumií ta̱chí ndi̱va̱ʼa ñuu nu̱ú ni̱xi̱yo na̱ geraseno. Xa̱ʼa̱ ña̱ ni̱yi̱ʼvíní na̱ yiví kán, xa̱kundáʼvina nu̱ú ta̱ Jesús ña̱ ná ku̱ʼu̱nra (Mar. 5:​16, 17). Soo ta̱ Jesús xi̱kuni̱ra ña̱ ná kunda̱a̱-ini na̱ yiví xa̱ʼa̱ Jehová. Xa̱ʼa̱ ña̱kán ni̱ka̱ʼa̱nra xíʼin ta̱ ta̱a kán ña̱ ná natúʼunra xíʼin na̱ yiví xa̱ʼa̱ ña̱ ke̱ʼé Jehová xa̱ʼa̱ra (Mar. 5:19). Saátu kúni̱ ta̱ Jesús ña̱ ná natúʼunyó xíʼin na̱ yiví xa̱ʼa̱ Jehová (Mat. 24:14; 28:20). Tá kéʼéyó ña̱yóʼo, saá kúú ña̱ sákusi̱íyó-ini ta̱ Jesús. w24.02 10 párr. 10

Kúsi̱íní-iniyó ña̱ ñúʼuyó ti̱xin ñuu Jehová. Tiempo vitin kininíka ku̱a̱ʼa̱n ndúu ñuyǐví nu̱ú ndóoyó yóʼo, soo va̱ʼaní kúni̱yó chi Jehová táxira na̱ hermano na̱ va̱ʼaní kítáʼan xíʼinyó ta inkáchi ndásakáʼnuyóra (Sal. 133:1). Tá kéʼéyó ña̱ káʼa̱n Jehová si̱íní íyoyó xíʼin na̱ veʼeyó (Efes. 5:33–6:1). Ta saátu táxira ña̱ ndíchi ndaʼa̱yó ña̱ va̱ʼa kǒo ndakanixi̱níyó xa̱ʼa̱ ña̱ʼa ña̱ sandákava-iniyó tasaá si̱í kooyó. Ña̱ va̱ʼa kǒo sandákooyó ña̱ ndasakáʼnuyó Jehová xíniñúʼu chikaa̱yó ndee̱ keʼéyó ku̱a̱ʼá ña̱ʼa. ¿Nda̱chun? Saáchi ña̱ kéʼé inkana á ña̱ káʼa̱nna kivi sása̱a̱ña miíyó. Saátu kivi ndakava-iniyó tá kéʼéyó ña̱ va̱ása va̱ʼa, ta ndákavaníka-iniyó tá ku̱a̱ʼá yichi̱ kéʼéyóña. Ña̱ nu̱ú, tá iin na̱ hermano káʼa̱nna á kéʼéna iin ña̱ʼa ña̱ sása̱a̱ miíyó. Ña̱ u̱vi̱, tá yii̱yó á ñá síʼíyó kéʼéna iin ña̱ʼa ña̱ sándakava-iniyó. Ña̱ u̱ni̱, tá ndákava-iniyó xa̱ʼa̱ ña̱ va̱ása va̱ʼa kéʼéyó. w24.03 14 párr. 1, 2

Sava yichi̱ kuniso̱ʼún experiencia ña̱ káʼa̱n xa̱ʼa̱ iin na̱ hermano na̱ va̱ʼaní chíkaa̱ ndee̱ ña̱ kachíñuna nu̱ú Jehová. Sana ni̱xa̱ʼa̱nna Escuela ña̱ naní Evangelizadores del Reino á nda̱kiʼinna ku̱a̱ʼa̱nna inka ñuu nu̱ú kúma̱ní na̱ natúʼun xa̱ʼa̱ Ndióxi̱. ¿Á kivi keʼún táʼan ña̱yóʼo? Tá kivi keʼúnña, keʼéña. Chi miíyó na̱ ndásakáʼnu Ndióxi̱ ndúkúyó ki̱ʼva ña̱ ku̱a̱ʼáka kachíñuyó nu̱úra (Hech. 16:9). Soo tá kǒo kívi keʼún ña̱yóʼo kǒo ndakanixi̱níún ña̱ va̱ása ndáyáʼviún nu̱ú Ndióxi̱. Ña̱ ndáyáʼvika xíniñúʼu keʼéyó kúú ña̱ kundeé-iniyó (Mat. 10:22). Kúsi̱íní-ini Jehová tá xítora ña̱ chíkaa̱níún ndee̱ ta saátu ña̱ xíniñúʼún ña̱ xíni̱ún keʼún ña̱ va̱ʼa kachíñún nu̱úra. Tá ná keʼún ña̱yóʼo saá kivi kundiku̱n yichi̱ ta̱ Jesús tá xa̱a̱ ndi̱ʼi nda̱kuchiún (Sal. 26:1). w24.03 10 párr. 11

Yiváyó Jehová káʼa̱nra xíʼinyó ña̱ ixakáʼnu-inira xa̱ʼa̱yó tá ndixa ndíkó-iniyó xa̱ʼa̱ ku̱a̱chiyó (Sal. 86:5). Ña̱kán, tá ndixa ndíkó-iniyó xa̱ʼa̱ ku̱a̱chiyó ixakáʼnuva-ini Jehová xa̱ʼa̱yó. ¿Ndáaña chindeétáʼan xíʼinyó ña̱ ndakanixi̱níyó saá? Ná ndakaʼányó chi va̱ʼaní-ini Jehová ta kǒo íxandúxara xíʼinyó keʼéyó ña̱ kǒo kúchiñuyó keʼéyó. Tá xíʼin ndinuʼu-iniyó káchíñuyó nu̱úra ni loʼo á ku̱a̱ʼá kúú ña̱ kéʼéyó kúsi̱íníva-inira xíʼinña ta ndáyáʼviníña nu̱úra. Saátu, ná ndakanixi̱níyó xa̱ʼa̱ na̱ xi̱ndoo tiempo xi̱naʼá na̱ va̱ʼaní xi̱ndasakáʼnu Jehová, tá kúú ta̱ apóstol Pablo ku̱a̱ʼání ñuu ni̱xa̱ʼa̱nra na̱túʼunra xíʼin na̱ yiví ta saátu ku̱a̱ʼání congregación ki̱xáʼa ni̱xi̱yo xa̱ʼa̱ chiñu ña̱ ke̱ʼéra. Soo ki̱xaa̱ iin tiempo ña̱ kǒo níkivi natúʼunkara xíʼin na̱ yiví nda̱a̱ táki̱ʼva xi̱keʼéra tá ya̱chi̱, ña̱kán ¿á xi̱kusi̱íka-ini Jehová xíʼinra? Xi̱kusi̱íva-inira, ni kǒo níkivi kachíñu ku̱a̱ʼáka ta̱ apóstol Pablo nu̱ú Jehová soo xi̱taxikava Jehová ña̱ va̱ʼa ndaʼa̱ra (Hech. 28:​30, 31). Ta saátu miíyó, sana kǒo kívi kachíñuyó nu̱ú Jehová nda̱a̱ táki̱ʼva xi̱keʼéyó tá ya̱chi̱ soo ña̱ ndáyáʼvika nu̱úra kúú ña̱ kéʼéyóña xíʼin ndiʼi níma̱yó. w24.03 27 párr. 7, 9

Va̱ʼaní yichi̱ chi̱núu ta̱ Jesús nu̱ú na̱ discípulora. Tá ni̱xi̱kara na̱túʼunra xa̱ʼa̱ Ndióxi̱ xíʼin na̱ yiví, xi̱keʼé ni̱ʼira oración. Ni ni̱xi̱yoní chiñu nu̱úra ta ku̱a̱ʼání na̱ yiví xi̱xa̱ʼa̱n nu̱úra, xi̱tavára tiempo ña̱ va̱ʼa ka̱ʼa̱nra xíʼin Jehová (Mar. 6:​31, 45, 46). Ya̱chi̱ní xi̱ndako̱ora ña̱ va̱ʼa ka̱ʼa̱nra xíʼin yivára. Iin yichi̱ iníí ñuú ni̱ka̱ʼa̱nra xíʼin Jehová tá kúma̱níka ndaka̱xinra iin ña̱ ndáyáʼviní keʼéra (Luc. 6:​12, 13). Ta ñuú tá kúma̱ní kuvira ku̱a̱ʼání yichi̱ ni̱ka̱ʼa̱nra xíʼin Jehová, chi xi̱kunda̱a̱-inira ña̱ ya̱ʼara nu̱ú iin tu̱ndóʼo ña̱ yo̱ʼvi̱níka (Mat. 26:​39, 42, 44). Ña̱ ke̱ʼé ta̱ Jesús náʼa̱ña nu̱úyó ña̱ ni íyoní chiñu nu̱úyó, xíniñúʼu taváyó tiempo ña̱ ka̱ʼa̱nyó xíʼin Jehová. Ta nda̱a̱ táki̱ʼva ke̱ʼé ta̱ Jesús, sana xa̱a̱ ya̱chi̱ka xíniñúʼu ndaka̱xinyó ndáa hora kivi ka̱ʼa̱nyó xíʼin Jehová. Sana ya̱chi̱ka loʼo xíniñúʼu ndako̱oyó ña̱ va̱ʼa ka̱ʼa̱nyó xíʼinra, á sana ñuúka loʼo ku̱su̱nyó ña̱ va̱ʼa ka̱ʼa̱nyó xíʼinra. Chi saá kúú ña̱ kivi na̱ʼa̱yó ña̱ ndáyáʼviní oración nu̱úyó. w23.05 3 párr. 4, 5

Kúʼvi̱ní-ini Jehová xínira na̱ ungido ta káʼa̱nra ña̱ íyona nda̱a̱ táki̱ʼva íyo iin yu̱ta nu̱ú ku̱a̱ʼa̱n ku̱a̱ʼání ti̱kui̱í. Na̱ ku̱ʼu̱n chí ndiví kúnda̱a̱-inina ña̱ kúʼvi̱ní-ini Ndióxi̱ xínirana (Jud. 1). Ndiʼi na̱yóʼo ndákanixi̱nína nda̱a̱ táki̱ʼva nda̱kanixi̱ní ta̱ apóstol Juan, chi ta̱yóʼo ni̱ka̱ʼa̱nra: “Kiʼin va̱ʼandó kuenta ña̱ kúʼvi̱ní-ini yiváyó Ndióxi̱ xínira miíyó, ña̱kán káʼa̱nra ña̱ kúúyó se̱ʼera” (1 Juan 3:1). Soo, ¿á nda̱saa na̱ ku̱ʼu̱n chí ndiví kuití kúʼvi̱-ini Jehová xínira? Va̱ása, chi kúʼvi̱ní-inira xínira ndiʼi na̱ ndásakáʼnu miíra. ¿Ndáaña ke̱ʼé Jehová tasaá ni̱na̱ʼa̱ra ña̱ kúʼvi̱ní-inira xínira miíyó? Cha̱ʼvira xa̱ʼa̱ ku̱a̱chiyó. Xíʼin ña̱yóʼo ni̱na̱ʼa̱ra ña̱ kúni̱níra xínira miíyó (Juan 3:16; Rom. 5:8). w24.01 28 párr. 9, 10

Texto ña̱ káʼviyó ki̱vi̱ vitin, káʼa̱nña xa̱ʼa̱ ña̱ ke̱ʼé ta̱ David ña̱ chi̱ndeétáʼan xíʼinra tasaá kǒo níyi̱ʼvíkara, chi nda̱kanixi̱níra xa̱ʼa̱ ña̱ keʼé Jehová xa̱ʼa̱ra chí nu̱únínu. Xi̱kunda̱a̱va-inira ña̱ kǒo taxiví Jehová ña̱ kuvira, saáchi mií Jehová ni̱ka̱ʼa̱n xíʼinra ña̱ koora rey ñuu Israel (1 Sam. 16:​1, 13). Ta saátu xi̱kandíxaníra ña̱ sáxi̱nu Jehová ña̱ ni̱ka̱ʼa̱nra. Kǒo káʼa̱nví Jehová xíʼinyó ña̱ sakútaʼara ndiʼi tu̱ndóʼo ña̱ kúúmiíyó tiempo vitin, soo ni̱ka̱ʼa̱nvara ña̱ chí nu̱únínu taxira ñuyǐví xa̱á nu̱ú kundooyó ta kán va̱ása xo̱ʼvi̱kayó (Is. 25:​7-9). Kúúmiíra ndee̱ ña̱ sandátakura na̱ ni̱xi̱ʼi̱, ña̱ sandáʼara miíyó ta saátu ña̱ sandíʼi-xa̱ʼa̱ra ndiʼi na̱ yiví na̱ kéʼé ña̱ va̱ása va̱ʼa (1 Juan 4:4). w24.01 6 párr. 12, 13

Ná ndakanixi̱níyó ndáa xa̱ʼa̱ kúú ña̱ nda̱taxiyó miíyó ndaʼa̱ Jehová ta nda̱kuchiyó. Ke̱ʼéyó ña̱yóʼo saáchi kúni̱yó ndasakáʼnuyóra. Ndakaʼán ndáaña chi̱ndeétáʼan xíʼún ña̱ ku̱ndaa̱-iniún ña̱ nda̱a̱ kúú ña̱ sákuaʼún. Ku̱ndaa̱-iniún xa̱ʼa̱ Jehová ta ki̱xáʼún kúʼvi̱-iniún xíniúnra ta íxato̱ʼúnra saáchi kúúra yiváún. Ki̱xáʼún kándíxaúnra ta ña̱yóʼo chi̱ndeétáʼan xíʼún ña̱ ndikó-iniún xa̱ʼa̱ ña̱ va̱ása va̱ʼa xi̱keʼún. Ta sa̱ndákoún kéʼún ña̱ʼa ña̱ kúndasíra xínira. Saátu ni̱kusi̱íní-iniún tá ku̱ndaa̱-iniún ña̱ xa̱a̱ i̱xakáʼnuva-inira xa̱ʼún (Sal. 32:2). Ki̱xáʼún xáʼún reunión ta saátu ki̱xáʼún nátúʼun xíʼin na̱ yiví xa̱ʼa̱ ndiʼi ña̱ va̱ʼa ña̱ káʼa̱n Ndióxi̱ keʼéra chí nu̱únínu. Vitin ña̱ xa̱a̱ nda̱taxiún miíún ndaʼa̱ Ndióxi̱ ta xa̱a̱ nda̱kuchiún chi̱kaa̱-iniún ña̱ iinlá nu̱ú miíra kachíñún ta nda̱a̱ ni iin ki̱vi̱ kǒo kúni̱ún sandákoún ña̱ ndasakáʼnúnra (Mat. 7:​13, 14). Nda̱kú ná koo iniyó xíʼin Jehová, ndiʼi tiempo ná kuʼvi̱-iniyó kuniyóra ta ná kuniso̱ʼoyó ndiʼi ña̱ káʼa̱nra xíʼinyó. w23.07 17 párr. 14; 19 párr. 19

Ña̱ ndakanixi̱níyó xa̱ʼa̱ ña̱ ki̱ndooyó keʼéyó ña̱ kúni̱ Jehová kúú ña̱ chindeétáʼan xíʼinyó ña̱ kǒo keʼéyó ña̱ kini. Tá kúú, ná ndakanixi̱níyó xa̱ʼa̱ pregunta yóʼo: “¿Á náʼi̱ nu̱ú iin na̱ ti̱ndaʼa̱ ña̱ kútói̱na?”. Ni kúúyó na̱ kúa̱an á na̱ xa̱a̱ ti̱ndaʼa̱ kǒo keʼévíyó ña̱yóʼo, saáchi tá ni̱ka̱ʼa̱nyó xíʼin Jehová ña̱ iinlá miíra ndasakáʼnuyó ni̱ka̱ʼa̱nyó xíʼinra ña̱ va̱ása keʼéyó ña̱ kǒo kútóora. Xa̱ʼa̱ ña̱ kǒo táxiyó ki̱ʼvi ña̱ va̱ása va̱ʼa níma̱yó kuchiñuvayó nda̱kú koo iniyó xíʼin Ndióxi̱, ta ña̱yóʼo chindeétáʼanña xíʼinyó ña̱ kǒo xo̱ʼvi̱yó. Tasaá kǒo keʼéyó ña̱ kini ña̱ kéʼé na̱ yiví na̱ kǒo íxato̱ʼó Ndióxi̱ (Prov. 4:​14, 15). Ña̱ ke̱ʼé ta̱ Jesús kivi chindeétáʼan xíʼinyó chi ña̱ xi̱kuni̱ra kúú ña̱ sakúsi̱íra-ini yivára. Ta saátu miíyó kúni̱yó sakúsi̱íyó-ini Jehová ta kǒo kéʼéyó nda̱a̱ ni iin ña̱ʼa ña̱ kivi sakúsuchí-inira á sandákava-inira (Mat. 4:10; Juan 8:29). Tu̱ndóʼo ña̱ yáʼayó nu̱ú kivi chindeétáʼanña xíʼinyó ña̱ kunda̱a̱-iniyó á ndixa ndíku̱nyó ña̱ káʼa̱n ta̱ Jesús. Ta kúnda̱a̱-iniyó ña̱ mií Jehová chindeétáʼan xíʼinyó ña̱ keʼéyóña. w24.03 9, 10 párr. 8-10