Ta̱ Juan, ta̱ sándakuchi sánáʼa̱ra miíyó ña̱ ná chika̱a̱yó ndee̱ kusi̱í-iniyó

¿Á KÚNI̱YÓ kuumiíyó iin chiñu ti̱xin congregación ta va̱ása kívi ndakiʼinyóña? Sana ña̱ chiñu yóʼo kúú táʼan ña̱ kúúmií inka na̱ hermano á táʼan ña̱ xa̱a̱ xi̱kuumiíyó tá ya̱chi̱. Ta sana ña̱ sási nu̱úyó ña̱ ndakiʼinyó iin chiñu ña̱ kútóoyó kúú ña̱ xa̱a̱ ku̱chéeyó á xa̱ʼa̱ ña̱ ndeé ndóʼoyó, á ña̱ kúma̱ní sava ña̱ʼa nu̱úyó á xa̱ʼa̱ ña̱ xíniñúʼu taxiyó ña̱ xíniñúʼu na̱ veʼeyó. Á sanatu sa̱ndákooyó iin chiñu ña̱ ke̱ʼéyó ku̱a̱ʼání tiempo xa̱ʼa̱ ña̱ na̱sama sava ña̱ʼa ti̱xin ñuu Ndióxi̱. Nda̱a̱ ndáaka xa̱ʼa̱ kúúña, sana ndákanixi̱níyó ña̱ va̱ása kéʼéyó ndiʼi chiñu ña̱ kúni̱yó nu̱ú Jehová, ta xa̱ʼa̱ ña̱yóʼo sava ndákava-iniyó. Ña̱kán, ¿ndáaña kivi keʼéyó ña̱ va̱ása ndakava-iniyó á sa̱a̱yó? ¿Ndáaña chindeétáʼan xíʼinyó ña̱ kusi̱í-iniyó?

Ña̱ ndo̱ʼo ta̱ Juan, ta̱ sándakuchi íyo iin ña̱ sánáʼa̱ña miíyó. Ta̱yóʼo xi̱kuumiíra chiñu ña̱ ndáyáʼviní nu̱ú Jehová. Soo sana va̱ása níndakanixi̱níra ña̱ kixi tu̱ndóʼo nu̱úra, ña̱ ku̱a̱ʼáníka ku̱i̱ya̱ kundika̱a̱ra veʼeka̱a nu̱úka ña̱ kakara natúʼunra xa̱ʼa̱ Ndióxi̱. Soo ni saá ndo̱ʼora, si̱íva xi̱kunira ndiʼi tiempo. ¿Ndáaña chi̱ndeétáʼan xíʼinra? Ta, ¿ndáaña kivi keʼéyó ña̱ kusi̱í-iniyó ni ná ya̱ʼayó nu̱ú tu̱ndóʼo?

IIN CHIÑU ÑA̱ SA̱KUSI̱ÍNÍ-INIRA

Tá abril ña̱ ku̱i̱ya̱ 29 ña̱ tiempo ndóoyó vitin, ta̱ Juan ki̱xáʼara nátúʼunra xíʼin na̱ yiví xa̱ʼa̱ ña̱ kixi ta̱ Mesías, nda̱a̱ táki̱ʼva ni̱ka̱ʼa̱n Jehová xíʼinra. Ka̱chira: “Ndikó-inindó chi xa̱a̱ ku̱yatin ki̱vi̱ ña̱ kaʼndachíñu Ndióxi̱ ta̱ íyo chí ndiví” (Mat. 3:2; Luc. 1:12-17). Ku̱a̱ʼána va̱ʼaní xi̱niso̱ʼo ña̱ ni̱ka̱ʼa̱nra. Ta saátu ku̱a̱ʼání na̱ yiví na̱ ke̱e inka ñuu ki̱xina ña̱ va̱ʼa kuniso̱ʼona ña̱ káʼa̱nra, ta ku̱a̱ʼánína nda̱ndikó-inina ta nda̱kuchina. Saátu ni̱ka̱ʼa̱nra xíʼin na̱ níʼi yichi̱ nu̱ú na̱ veʼe-ñu̱ʼu xa̱ʼa̱ castigo ña̱ ndakiʼinna tá va̱ása ndándikó-inina (Mat. 3:5-12). Iin chiñu ña̱ ndáyáʼviníka ke̱ʼéra tá octubre ña̱ ku̱i̱ya̱ 29 kúú ña̱ sa̱ndákuchira ta̱ Jesús. Nda̱a̱ tá tiempo saá ki̱xáʼara chíka̱a̱ra ndee̱ xíʼin na̱ yiví ña̱ ná kundiku̱nna ta̱ Jesús, ta̱ Mesías ta̱ nda̱ka̱xin Ndióxi̱ (Juan 1:32-37).

Xa̱ʼa̱ ña̱ káʼnuní chiñu ke̱ʼé ta̱ Juan, ni̱ka̱ʼa̱n ta̱ Jesús ña̱yóʼo xa̱ʼa̱ra: “Kǒo ni iin na̱ ka̱ku ti̱xin iin ñaʼá na̱ íyo táki̱ʼva íyo ta̱ Juan ta̱ sákuchi na̱ yiví” (Mat. 11:11). Nu̱ú ta̱ Juan xi̱ndayáʼviní ndiʼi chiñu ña̱ ke̱ʼéra nu̱ú Jehová ta ni̱kusi̱íní-inira xa̱ʼa̱ ndiʼi ña̱ va̱ʼa ña̱ nda̱kiʼinra. Saátu tiempo vitin ku̱a̱ʼání na̱ hermano kúsi̱íní-inina ndákiʼinna ña̱ va̱ʼa xa̱ʼa̱ ña̱ kéʼéna chiñu Ndióxi̱ xíʼin ndiʼi níma̱na. Ná kotoyó ña̱ ndo̱ʼo ta̱ hermano ta̱ naní Terry xíʼin ñá síʼíra ñá Sandra, ta̱yóʼo xa̱a̱ yáʼaka 50 ku̱i̱ya̱ káchíñura nu̱ú Jehová ku̱a̱ʼá tiempo. Káchira: “Ku̱a̱ʼání chiñu xi̱kuumiíi̱. Xi̱kui̱ precursor regular, ka̱chíñui̱ Betel, xi̱kui̱ precursor especial xíʼin superintendente ña̱ circuito xíʼin ña̱ distrito, ta vitin tuku kúi̱ precursor especial”. Kúsi̱íní-iniyó tá ndákiʼinyó táʼan chiñu yóʼo. Soo ña̱ ke̱ʼé ta̱ Juan sánáʼa̱ña miíyó ña̱ su̱ví xa̱ʼa̱ chiñu ña̱ kúúmiíyó kivi kusi̱í-iniyó, ta ña̱ va̱ása ndiʼi ña̱ kusi̱í-iniyó xíniñúʼu chika̱a̱yó ndee̱.

NÁ TAXIYÓ TÍXA̱ʼVI NDAʼA̱ JEHOVÁ

Iin ña̱ chi̱ndeétáʼanní xíʼin ta̱ Juan ta̱ sándakuchi ña̱ kusi̱í-inira kúú ña̱ ndiʼi tiempo xi̱taxira tíxa̱ʼvi ndaʼa̱ Jehová xa̱ʼa̱ chiñu ña̱ xi̱kuumiíra. Tá kúú, tá nda̱kuchi ta̱ Jesús, si̱lóʼo na̱ yiví ki̱xáʼa ndíku̱n ta̱ Juan ta ku̱a̱ʼáka kúú na̱ ki̱xáʼa ndíku̱n ta̱ Jesús. Ta xa̱ʼa̱ ña̱yóʼo ni̱ndi̱ʼi̱-ini na̱ ndíku̱n ta̱ Juan, ta ni̱ka̱ʼa̱nna xíʼinra: “Koto, sákuchira na̱ yiví ta ndiʼina ku̱a̱ʼa̱n nu̱úra” (Juan 3:26). Ta̱ Juan ka̱chira: “Ta̱ kúúmií ñá novia kúú ta̱ novio. Soo tá níndichi migo ta̱ novio ta xíniso̱ʼora ña̱ káʼa̱n ta̱ novio, kúsi̱íní-inira xa̱ʼa̱ ña̱ xíniso̱ʼora káʼa̱n ta̱ novio. Ña̱kán kúú ña̱ ndeéní kúsi̱í-inii̱ vitin” (Juan 3:29). Ta̱ Juan va̱ása nísa̱a̱-inira kunira ta̱ Jesús ni va̱ása níndakanixi̱níra ña̱ kǒo ndáyáʼvika chiñu ña̱ kéʼéra á ndakanixi̱níra ña̱ ndáyáʼvika kúú chiñu ña̱ kúúmií ta̱ Jesús. Chi ña̱ ke̱ʼéra kúú ña̱ chi̱ka̱a̱ra ndee̱ ña̱ kusi̱í-inira xa̱ʼa̱ ña̱ kúúra “migo ta̱ novio”.

Ña̱ va̱ʼa ña̱ xi̱kuumií ta̱ Juan kúú ña̱ chi̱ndeétáʼan xíʼinra ña̱ si̱í xi̱kunira ni yo̱ʼvi̱ ni̱xi̱yo chiñura. Tá kúú, xa̱ʼa̱ ña̱ xi̱kuura nazareo nda̱a̱ tá ka̱kura, va̱ása níxikuchiñu koʼora vino (Luc. 1:15). Ta̱ Jesús ni̱ka̱ʼa̱nra ña̱ síínva ni̱xi̱yo ña̱ xi̱takura: “Ta̱ Juan, kǒo níxiʼira vino ta va̱ása níxixira”. Soo ta̱ Jesús xíʼin na̱ xi̱ndiku̱nñaʼá su̱ví nazareo níxikuuna ña̱kán xi̱takuna nda̱a̱ táki̱ʼva íyo inkaka na̱ yiví (Mat 11:18, 19). Ni ta̱ Juan va̱ása níkeʼéra milagro nda̱a̱ ni iin yichi̱, soo xi̱kunda̱a̱-inira ña̱ kiviva keʼé na̱ discípulo ta̱ Jesús milagro, ta saátu nda̱a̱ na̱ xi̱ndiku̱n sa̱tá miíra tá ya̱chi̱ (Mat. 10:1; Juan 10:41). Soo ta̱ Juan va̱ása níndi̱ʼi̱ní-inira xa̱ʼa̱ ña̱yóʼo, chi ña̱ ni̱ndi̱ʼi̱ka-inira xa̱ʼa̱ kúú ña̱ keʼéra chiñu ña̱ ta̱xi Jehová ndaʼa̱ra.

Ta saátu miíyó tá chíndayáʼviyó chiñu ña̱ kéʼéyó nu̱ú Jehová vitin, ndiʼi tiempo kusi̱í-iniyó. Ta̱ Terry, ta̱ xa̱a̱ ni̱ka̱ʼa̱nyó xa̱ʼa̱ káchira: “Chi̱ka̱i̱ ndee̱ ña̱ ke̱ʼíi̱ iin iin chiñu ña̱ ta̱xina ndaʼíi̱”. Tá ndákanixi̱níra xa̱ʼa̱ ndiʼi chiñu ña̱ ke̱ʼéra nu̱ú Jehová, káchira: “Va̱ása ndándikó-inii̱ xa̱ʼa̱ ni iin ña̱ʼa. Chi nina ña̱ va̱ʼa ndákaʼíi̱n xa̱ʼa̱”.

Kivi kusi̱í-iniyó tá ndákanixi̱níyó nda̱a̱ xa̱ʼa̱ kúú ña̱ ndáyáʼviní chiñu ña̱ kúúmiíyó: ña̱ kúúyó na̱ chíndeétáʼan xíʼin Ndióxi̱ (1 Cor. 3:9). Ná ka̱ʼa̱nyó xa̱ʼa̱ iin ejemplo. Tá ndáayó ta ndáyaku̱nyó iin ña̱ʼa ña̱ liviní ña̱ xi̱kuumií na̱ veʼeyó, ta ni tá ná ya̱ʼa tiempo ña̱yóʼo livi kooña. Ki̱ʼva saá íyo ña̱ kéʼéyó tá ndákanixi̱níyó xa̱ʼa̱ chiñu ña̱ kéʼéyó nu̱ú Jehová, ta nda̱a̱ ni ña̱ʼa va̱ása kasiña nu̱úyó ña̱ kusi̱í-iniyó. Ná va̱ása chitáʼanyó chiñuyó xíʼin chiñu ña̱ kéʼé inkana á ña̱ ndakanixi̱níyó ña̱ ndáyáʼvika chiñu ña̱ nda̱kiʼinna nu̱úyó (Gál. 6:4).

NÁ KUNDI̱ʼI̱KA-INIYÓ XA̱ʼA̱ CHIÑU NDIÓXI̱

Sana ku̱nda̱a̱-ini ta̱ Juan ña̱ loʼova tiempo keʼéra chiñu Ndióxi̱, soo va̱ása níndakanixi̱níra ña̱ iin kama ndiʼiña (Juan 3:30). Tá ku̱i̱ya̱ 30, tá ni̱ya̱ʼa i̱ñu̱ yo̱o̱ ña̱ sa̱ndakuchira ta̱ Jesús, ni̱ka̱ʼa̱n ta̱ rey Herodes ña̱ ná chi̱ka̱a̱nara veʼeka̱a. Soo ni saá nda̱kundeéra na̱túʼunra xa̱ʼa̱ Ndióxi̱ (Mar. 6:17-20). ¿Ndáaña chi̱ndeétáʼan xíʼinra ña̱ si̱í xi̱kunira ni xi̱ndika̱a̱ra nu̱ú tu̱ndóʼo? Ña̱ ni̱ndi̱ʼi̱ka-inira xa̱ʼa̱ chiñu Ndióxi̱.

Tá xi̱ndika̱a̱ ta̱ Juan veʼeka̱a, ku̱nda̱a̱-inira xa̱ʼa̱ ndiʼi chiñu ña̱ kéʼé ta̱ Jesús (Mat. 11:2; Luc. 7:18). Ta̱ Juan ka̱ndíxara ña̱ ndixa ta̱ Mesías kúú ta̱ Jesús, soo sana ni̱nda̱ka̱tu̱ʼun xíʼin miíra á ndixa saxínura ndiʼi ña̱ ni̱ka̱ʼa̱n tu̱ʼun Ndióxi̱ keʼé ta̱ Mesías. Tá kúú ña̱ xa̱a̱ra koora rey, ¿á kama kixáʼara kaʼndachíñura? ¿Á tavárara veʼeka̱a? Ta̱ Juan xi̱kuni̱kara kunda̱a̱-inira xa̱ʼa̱ ña̱ keʼé ta̱ Jesús, ña̱kán chi̱ndaʼára u̱vi̱ na̱ xi̱ndiku̱nñaʼá ña̱ ku̱ʼu̱nna nda̱ka̱tu̱ʼunnara: “¿Á yóʼó kúú ta̱ ni̱ka̱ʼa̱n Ndióxi̱ kixi, á inkara xíniñúʼu kundatundi̱?” (Luc. 7:19). Tá nda̱ndikóna, sana ta̱ Juan va̱ʼaní xi̱niso̱ʼora ña̱ na̱túʼunna xíʼinra xa̱ʼa̱ milagro ña̱ kéʼé ta̱ Jesús, xíʼin xa̱ʼa̱ ña̱ ni̱ka̱ʼa̱nra xíʼinna ña̱ ná ka̱ʼa̱nna xíʼinra: “Na̱ va̱ása túvi nu̱ú xa̱a̱ túvi nu̱úna, na̱ va̱ása kívi kaka xa̱a̱ xíkana, na̱ ki̱ʼin kue̱ʼe̱ lepra xa̱a̱ ndu̱va̱ʼana, ta na̱ va̱ása xíniso̱ʼo xa̱a̱ xíniso̱ʼona, na̱ ni̱xi̱ʼi̱ ndátakuna ta na̱ nda̱ʼví kúnda̱a̱-inina xa̱ʼa̱ tu̱ʼun Ndióxi̱” (Lucas 7:20-22).

Sana ña̱ na̱túʼunna xíʼin ta̱ Juan ta̱xiníña ndee̱ ndaʼa̱ra. Chi ña̱yóʼo náʼa̱ña ña̱ ndixa sáxi̱nu ta̱ Jesús ndiʼi profecía ña̱ ni̱ka̱ʼa̱nna keʼé ta̱ Mesías. Soo ni tá ná kǒo tavára ta̱ Juan veʼeka̱a, ta̱yóʼo xi̱kunda̱a̱-inira ña̱ ndáyáʼviníva chiñu ña̱ ke̱ʼéra. Ni xi̱ndika̱a̱ra veʼeka̱a xi̱kusi̱íva-inira.

Tá ná keʼéyó nda̱a̱ táki̱ʼva ke̱ʼé ta̱ Juan, ña̱ kundi̱ʼi̱ka-iniyó xa̱ʼa̱ chiñu Ndióxi̱ kundeé-iniyó xíʼin ña̱ si̱í-ini ta kúee koo iniyó (Col. 1:9-11). Tá ná kaʼviyó Biblia ta ndakanixi̱níyó xa̱ʼa̱ña chindeétáʼanña xíʼinyó ña̱ kusi̱í-iniyó, chi sándakaʼánña miíyó ña̱ ndáyáʼviní chiñu ña̱ kéʼéyó nu̱ú Jehová (1 Cor. 15:58). Ñá Sandra ñá xa̱a̱ ni̱ka̱ʼa̱nyó xa̱ʼa̱ káchiñá: “Ña̱ káʼvii̱ iin capítulo ña̱ Biblia ndiʼi ki̱vi̱ chíndeétáʼanña xíʼi̱n ña̱ kuyatinkai̱ nu̱ú Jehová ta kundi̱ʼi̱ka-inii̱ xa̱ʼa̱ chiñura nu̱úka chiñu miíi̱”. Saátu kivi ndakanixi̱níyó xa̱ʼa̱ ndiʼi chiñu ña̱ kéʼé na̱ hermanoyó xa̱ʼa̱ reino Ndióxi̱. Tasaá va̱ása ndakanixi̱níyó xa̱ʼa̱ ña̱ ndóʼoyó chi ña̱ ndakanikaxi̱níyó xa̱ʼa̱ kúú ndiʼi ña̱ kéʼé Jehová xa̱ʼa̱ na̱ ñuura. Ñá Sandra káchiñá: “Tíxa̱ʼvi programa ña̱ kána yo̱o̱ tá yo̱o̱ nu̱ú JW Broadcasting^®, chíndeétáʼanníkaña xíʼinndi̱ ña̱ yatinka íyondi̱ xíʼin na̱ ñuu Ndióxi̱ ta kúsi̱íní-inindi̱ xíʼin chiñu ña̱ kúúmiíndi̱”.

Ta̱ Juan, ta̱ sándakuchi sa̱xínura chiñura nda̱a̱ táki̱ʼva ke̱ʼé ta̱ Elías, chi ta̱ Elías ni̱xi̱yora nda̱a̱ táki̱ʼva íyo miíyó (Luc. 1:17; Sant. 5:17). Tá ná keʼéyó nda̱a̱ táki̱ʼva ke̱ʼé ta̱ Juan ña̱ kundi̱ʼi̱ka-iniyó xa̱ʼa̱ chiñu Ndióxi̱ kusi̱í-iniyó ni nda̱a̱ ndáaka ña̱ ná kuu.