Na̱ ñani ta̱ José sáa̱-inina xíninara

KOTO nu̱ú na̱ʼná, kúsuchíní-ini ta̱ loʼo yóʼo ta ni kǒo na̱ chíndeé miíra, José naníra. Na̱ ñanira ni̱xi̱kónara nu̱ú na̱ ku̱a̱ʼa̱n ñuu Egipto. Ta kán kachíñura nu̱úna. ¿Ndachun ke̱ʼé na̱ ñani ndáʼvi ta̱ José ña̱yóʼo xíʼinra? Saáchi sáa̱-inina xíninara.

Yivána ta̱ Jacob xi̱kuni̱níra ta̱ José. Ña̱kán i̱xava̱ʼara iin ti̱ko̱to̱ káni̱ ta liviní ni̱xi̱yoña ta ta̱xiraña ndaʼa̱ ta̱ José se̱ʼera. Tá xi̱ni 10 saá ñanira ña̱ ma̱níka yivána ta̱ José ni̱sa̱a̱ní-inina xi̱ninara. Soo ni̱xi̱yoka inka xa̱ʼa ña̱ ni̱sa̱a̱-inina xi̱nina miíra.

Ta̱ José ni̱xa̱níra u̱vi̱ xa̱ni. Ta u̱vi̱ saá xa̱ni ña̱ ni̱xa̱níra, na̱ ñanira xi̱kuxítína nu̱úra. Ta ni̱sa̱a̱ va̱ʼakana xi̱ninara tá ni̱ka̱ʼa̱nra xíʼinna xa̱ʼa u̱vi̱ saá xa̱ni ña̱ ni̱xa̱níra.

Iin ki̱vi̱ tá ndáa na̱ ñani ta̱ José ndikachi sa̱na̱ yivána, ta̱ Jacob yivána ni̱ka̱ʼa̱nra xíʼin ta̱ José ná ku̱ʼu̱nra kotora nu̱ú ñúʼu na̱ ñanira xíʼin ndikachi. Tá xi̱ni na̱ ñani ta̱ José va̱xira, savana ni̱ka̱ʼa̱nna: “Ná kaʼníyóra”. Soo ñanina ta̱ chée, ta̱ Rubén ni̱ka̱ʼa̱n: ʼKǒo kaʼníndóraʼ. Saá chi̱ka̱a̱nara ini pozo yi̱chíva. Ta saá ki̱xaʼána káʼa̱nna ndáaña keʼéna xíʼinra.

Tá káʼa̱nkana ña̱yóʼo saá xi̱nina va̱xi sava na̱ ñuu Ismael. Ta̱ Judá ni̱ka̱ʼa̱nra xíʼin na̱ ñani ndáʼvira: ʼNá xi̱kóyóra nu̱ú na̱yóʼovaʼ. Ta saá i̱xaana xíʼinra, 20 xu̱ʼún ña̱ plata ki̱ʼinna xa̱ʼara. Va̱ása va̱ʼa ña̱ níkeʼéna xíʼinra.

¿Ndáaña kachi na̱yóʼo xíʼin yivána? Xa̱ʼnína iin ti̱xúʼu ta ku̱a̱ʼá yichi̱ ka̱vanuna ti̱ko̱to̱ ta̱ José xíʼin ni̱i̱rí. Saá níʼina ti̱ko̱to̱ra ku̱a̱ʼa̱nna nu̱ú yivána ta̱ Jacob ta káchina xíʼinra: ʼKoto chi káa nda̱niʼíndi̱ ti̱ko̱to̱ yóʼo á su̱ví ti̱ko̱to̱ ta̱ José kúúñaʼ.

Ta̱ Jacob nda̱kunira ti̱ko̱to̱ yóʼo ta̱ káchira: ʼIin kití yukú kúú tí xa̱ʼní ta̱ Joséʼ. Ta ña̱yóʼo kúú ña̱ kúni̱va na̱ ñanira ná ndakanixi̱ní yivána xa̱ʼa ta̱ José. Ta̱ Jacob ni̱kusuchíní-inira xa̱ʼa se̱ʼera. Ta ku̱a̱ʼá ki̱vi̱ xa̱kura xa̱ʼara. Soo ta̱ José tákuvara. Ná kotoyó ndáaña ndo̱ʼora ñuu nu̱ú ku̱a̱ʼa̱nra.