Xa̱ni ña̱ ni̱xa̱ní ta̱ Faraón

XA̱NI̱YA̱ʼA u̱vi̱ ku̱i̱ya̱ ta ndíka̱a̱ka ta̱ José veʼeka̱a. Ta̱ táxi vino xíʼi ta̱ Faraón na̱ndosó-inira xa̱ʼa ta̱ José. Iin ñu̱ú ta̱ Faraón ni̱xa̱níra u̱vi̱ xa̱ni ta xíka-inira ndáaña kúni̱ kachi ña̱yóʼo. Koto nu̱ú na̱ʼná yóʼo kísi̱ra. Ta inka ki̱vi̱ ta̱ Faraón ka̱nara ta̱a na̱ ndíchixi̱ní na̱ káchíñu nu̱úra ta na̱túʼunra xíʼinna ña̱ ni̱xa̱níra. Soo na̱yóʼo kǒo níkuchiñuna ka̱ʼa̱nna xíʼinra ndáaña kúni̱ kachi ña̱ ni̱xa̱níra.

Nda̱a̱ vitin nda̱kaʼán ta̱ táxi vino xíʼi ta̱ Faraón xa̱ʼa ta̱ José. Ta káchira xíʼinra: ʼTá xi̱ndikai̱ veʼeka̱a, kán ndíka̱a̱ iin ta̱ xíni̱ ka̱ʼa̱n xa̱ʼa xa̱niʼ. Tá xi̱niso̱ʼo ta̱ Faraón ña̱yóʼo ndi̱ku̱n ta̱vára ta̱ José.

Ta̱ Faraón nátúʼunra xíʼin ta̱ José xa̱ʼa xa̱ni ña̱ ni̱xa̱níra, ta káchira: ʼXi̱nii̱ u̱xa̱ si̱ndi̱ki̱ náʼnu ta livikavírí. Tándi̱ʼi xi̱nii̱ inka u̱xa̱ si̱ndi̱ki̱ leke. Ta tí leke yóʼo xa̱xírí u̱xa̱ saá si̱ndi̱ki̱ náʼnuʼ.

ʼTa ña̱yóʼo kúú inka ña̱ ni̱xa̱níi̱, xi̱nii̱ u̱xa̱ yokó ta náʼnu ndikínña ta iinlá nu̱ú yitu̱n ka̱naña. Ta xi̱nii̱ inka u̱xa̱ yokó níi̱ ta yi̱chíkavíña. Ta ña̱ níi̱ yóʼo ki̱xaʼáña xáxíña u̱xa̱ saá yokó náʼnuʼ.

Ta̱ José ni̱ka̱ʼa̱nra xíʼin ta̱ Faraón: ʼU̱vi̱ saá xa̱ni ña̱ ni̱xa̱níún iin káʼa̱nvaña. U̱xa̱ saá tí si̱ndi̱ki̱ náʼnu xíʼin u̱xa̱ saá yokó náʼnu kúni̱ kachiña u̱xa̱ ku̱i̱ya̱, ta inka u̱xa̱ si̱ndi̱ki̱ leke xíʼin u̱xa̱ yokó níi̱ kúni̱ kachiña inka u̱xa̱ ku̱i̱ya̱. Koo u̱xa̱ ku̱i̱ya̱ ña̱ koo ku̱a̱ʼá ña̱ʼa kuxundó ñuu Egipto. Ta inka u̱xa̱ ku̱i̱ya̱ kooní so̱koʼ.

Tasaá ta̱ José káchira xíʼin ta̱ Faraón: ʼNdukún iin ta̱ ndíchixi̱ní ña̱ ná ndakayara ndiʼi ña̱ va̱ʼa koo u̱xa̱ ku̱i̱ya̱ ña̱ va̱xi. Tasaá kǒo kuvi na̱ yiví so̱ko chi va̱xi u̱xa̱ ku̱i̱ya̱ ña̱ koo so̱ko, chi kǒo ña̱ kuxuna kooʼ.

Ta̱ Faraón kúsi̱í-inira xíʼin ña̱ ni̱ka̱ʼa̱n ta̱ José. Tasaá nda̱ka̱xinra ta̱ José ña̱ ná ndakayara ña̱ kuxuna, ta taán va̱ʼaraña. Ta̱ José iin ta̱a káʼnuní ni̱xa̱a̱ra ku̱ura ña̱ ñuu Egipto chi sa̱tá ta̱ Faraón xi̱ndiku̱nra.

Tá ni̱ya̱ʼa u̱na̱ ku̱i̱ya̱, tá ki̱xaʼá so̱ko, ta̱ José xi̱nira va̱xi sava ta̱a. ¿Á xíni̱ún ndáana kúúna? U̱xu̱ ñanira na̱ chée nu̱úra kúúna. Ta̱ Jacob yivána chi̱ndaʼá miína ku̱a̱ʼa̱nna ñuu Egipto chi xa̱ku̱a̱ʼa̱n ndíʼi ña̱ʼa xíxina ñuu Canaán. Ta̱ José nda̱kunira ñanira, soo na̱yóʼo kǒo níndakuninara. ¿Á xíniún ndachun kǒo níndakuninara? Saáchi ta̱ José xa̱chéevara ta ndíxira iin ti̱ko̱to̱ va̱ʼa.

Ta̱ José nda̱kaʼánra xa̱ʼa ña̱ ni̱xa̱níra tá ni̱xi̱yo loʼora chi ñanira nda̱kuxítína nu̱úra. ¿Á ndákaʼún sa̱kuaʼún xa̱ʼa ña̱yóʼo? Saá na̱kunda̱a̱-inira chi Ndióxi̱ kúú ta̱ chi̱ndaʼá miíra ñuu Egipto. ¿Á xíni̱ún ndáaña kéʼé ta̱ José vitin? Ná kotoyó.