¿Nda̱saa va̱ʼa kuniñúʼuyó ndiʼi libro ña̱ íyo ti̱xin Veʼe nu̱ú Ndákutáʼanyó?

¿Á kǒo kútóún sakuaʼakaún xa̱ʼa Ndióxi̱? ¿Á kǒo kútóún sakuaʼakaún xa̱ʼa iin versículo, á xa̱ʼa iin na̱ ni̱xi̱yo xi̱naʼá á xa̱ʼa iin ñuu á xa̱ʼa iin ña̱ʼa ña̱ káʼa̱n Biblia xa̱ʼa? ¿Á kǒo ndákatu̱ʼún miíún á kuchiñu tu̱ʼun Ndióxi̱ chindeéña yóʼó ña̱ va̱ʼa ya̱ʼún nu̱ú tu̱ndóʼo ndóʼún? Tá saá íyoña, kivi kuniñúʼún libro ña̱ íyo Veʼe nu̱ú Ndákutaʼanyó ña̱ va̱ʼa sakuaʼakaún xa̱ʼa ña̱yóʼo.

Ku̱a̱ʼání ña̱ʼa va̱xi nu̱ú libro yóʼo. Sana kǒo ndiʼi tutu ña̱ tává na̱ testigo Jehová nu̱ún ña̱ tu̱ʼun miíún, soo Veʼe nu̱ú Ndákutáʼanyó íyo ku̱a̱ʼání tutu ña̱ sa̱kán kána ña̱ kivi chindeé yóʼó. Sana ñúʼu inka Biblia, diccionario, ta ñúʼu ku̱a̱ʼáka inka nu̱ú tutu ña̱ kivi chindeé yóʼó ña̱ va̱ʼa nandukún ña̱ kúni̱ún kunda̱a̱-iniún xa̱ʼa. Va̱ʼa kuniñúʼúnña tá kúma̱níka kixaʼá reunión á tá ndi̱ʼiña. Tá íyo iin computadora, sana kúúmiínú programa ña̱ naní Watchtower Library, yóʼo va̱xi ku̱a̱ʼání tutu tu̱ʼun Ndióxi̱. Va̱ása yo̱ʼvi nandukuyó ña̱ kúni̱yó kunda̱a̱-iniyó xa̱ʼa, chi va̱ʼa nandukuyóña xíʼin ki̱vi̱ña, xíʼin versículo ta va̱ʼa taayó iin tu̱ʼun kuitíva ta ndani̱ʼiyó ña̱ kúni̱yó.

Va̱ʼaní chindeéña na̱ yá’a ti̱xin ña̱ reunión Ña̱ Ké’é na̱ Ndásaká’nu Ndióxi̱. Va̱ʼa kuniñúʼún libro ña̱ ñúʼu Veʼe nu̱ú Ndákutáʼanyó ña̱ va̱ʼa nandukún xa̱ʼa ña̱ ka̱ʼún. Ta̱ kíʼin kuenta xíʼin ña̱ reunión ña̱ naní Ña̱ Kéʼé na̱ Ndásakáʼnu Ndióxi̱, kúú ta̱ ndáa tutu ña̱ ñúʼu veʼe nu̱ú ndatakayó ta kíʼinra kuenta xíʼin ndiʼi tutu ña̱ sa̱kán kána ná kǒo kuma̱ní ña̱yóʼo ta vií ná kooña. Ta̱yóʼo, á na̱ sánáʼa̱ yóʼó kivi chindeé yóʼó ña̱ va̱ʼa nandukún ña̱ xíniñúʼún. Soo ndakaʼún iinlaa veʼe yóʼo va̱ʼa kuniñúʼúnña kǒo kívi taváúnña ku̱ʼu̱n xíʼún inka xiyo, vivíi kuniñúʼúnña kǒo káʼyún nu̱úña.

Ña̱ Biblia káchiña ña̱ va̱ʼa ndani̱ʼiyó míí ña̱ káʼa̱n Ndióxi̱, xíniñúʼu nandukuyóña táki̱ʼva nandukuyó iin oro ña̱ ñúʼu seʼé (Proverbios 2:1-5). Ndiʼi ña̱ kúni̱yó kunda̱a̱-iniyó xa̱ʼa kivi nandukuyóña ti̱xin libro ña̱ ñúʼu Veʼe nu̱ú Ndákutáʼanyó.

• ¿Ndáaña kúúmií Veʼe nu̱ú Ndákutáʼanyó ña̱ va̱ʼa chindeé miíyó ndani̱ʼiyó ña̱ kúni̱yó kunda̱a̱-iniyó xa̱ʼa?

• ¿Ndáana va̱ʼa sanáʼa̱ yóʼó ña̱ va̱ʼa kuniñúʼún ña̱ ñúʼu Veʼe nu̱ú Ndákutáʼanyó?