Ta̱ David ndakúní ni̱xi̱yo inira

¿Ndáaña kéʼún tá yíʼviún?... Sana kánaún ndi̱ʼi̱. Soo íyo inka ta̱ íyoka ndée ta kivi chindeéra yóʼó. Ta̱yóʼo ndakúkara nu̱ú ndiʼina. ¿Á xíni̱ún ndáa ta̱ kúúra?... Ta̱yóʼo kúú Jehová. Ndiʼi tiempo va̱ʼa ka̱ʼún xíʼinra ña̱ chindeéra yóʼó. Saá i̱xaa ta̱ David. Xa̱ʼa ña̱ ka̱ndíxaníra Jehová, xi̱kuura iin ta̱ loʼo ndakú-ini. Ña̱ Biblia nátúʼun xa̱ʼara xíʼinyó.

Nani tá loʼoví ta̱ David, yivára xíʼin siʼíra sa̱náʼa̱nara xa̱ʼa Jehová. Xa̱ʼa ña̱yóʼo va̱ása níyi̱ʼvíra. Ta̱yóʼo ku̱a̱ʼání ña̱ʼa ndo̱ʼora, sana inkana yi̱ʼvívana. Soo ta̱yóʼo xíni̱ra chi Jehová kivi chindeérara, chi tá íyo migora saá ni̱xi̱yora nu̱úra. Iin yichi̱ tá ndáa ta̱ David ndikachi sa̱na̱ra ki̱xi iin tí león ki̱ʼinrí iinrí ku̱a̱ʼa̱n xíʼinrí. ¿Á xíni̱ún ndáaña ke̱ʼéra? Xi̱ndiku̱nra sa̱tárí ta xíʼin ndaʼa̱ra xa̱ʼnírarí. Inka yichi̱ tá ti̱in iin tí oso ndikachi sa̱na̱ra, xa̱ʼnítura tíyóʼova. ¿Ndáana chi̱ndeé ta̱ David ña̱ ndakúní ni̱xi̱yo inira?... Ña̱ nda̱a̱ káʼún, Jehová chi̱ndeéñaʼá.

Inka yichi̱ ni̱na̱ʼa̱ ta̱ David ña̱ ndakúní ni̱xi̱yo inira. Ña̱ ka̱ʼa̱nyó xa̱ʼa yóʼo ku̱uña tá ka̱nitáʼan na̱ ñuu Israel xíʼin na̱ ñuu Filisteo. Iin ta̱ soldado ñuu yóʼo, ta̱ xi̱naní Goliat, súkunní ni̱xi̱yora. Ta̱yóʼo xi̱kusi̱kindaara na̱ ñuu Israel ta saátu xi̱kusi̱kindaara Jehová. Ta xi̱ka̱ʼa̱nra xíʼin na̱ soldado ñuu Israel: “¿Ndáandó kúni̱ kanitáʼan xíʼi̱n?” Soo ndiʼina yíʼvina xíninara nda̱a̱ ni iinna kǒo xíin kanitáʼan xíʼinra. Tá xi̱niso̱ʼo ta̱ David ña̱ ni̱ka̱ʼa̱n ta̱ Goliat, ni̱ka̱ʼa̱nra xíʼinra: “Yi̱ʼi̱ kanitáʼan xíʼún, Jehová chindeé yi̱ʼi̱ ta kuchiñui̱ xíʼún”. ¿Nda̱saa túvi yóʼó á ndakú ni̱xi̱yo ini ta̱ David?... Nda̱a̱ káʼún, ndakúva ni̱xi̱yo inira. Ta, ¿ndáaña ke̱ʼéra?

Ta̱ David nda̱kayara u̱ʼu̱n yu̱u̱ ta ki̱ʼinra iin honda ta ke̱era ku̱a̱ʼa̱nra kanitáʼanra xíʼin ta̱ Goliat. Tá xi̱ni ta̱ Goliat ta̱ David ni̱kusi̱kindaarara. Tasaá ni̱ka̱ʼa̱n ta̱ David xíʼinra: “Yóʼó va̱xiún nu̱íi̱ xíʼin yuchu̱ ta yi̱ʼi̱ ku̱xa̱i̱ nu̱ún xíʼin ki̱vi̱ Jehová”. Saá xínu ta̱ David ku̱a̱ʼa̱nra nu̱ú ta̱ Goliat. Chi̱ka̱a̱ra yu̱u̱ ini ña̱ʼa ña̱ níʼira ku̱a̱ʼa̱nra ta sa̱kánaraña xi̱ní ta̱yóʼo. Míí taanra ka̱niña, tasaá ndu̱va ta̱ Goliat ku̱a̱ʼa̱nra nu̱ú ñuʼú ta ni̱xi̱ʼi̱vara. Tá xi̱ni na̱ ñuu Filisteo ña̱ ku̱u, ni̱yi̱ʼvínína ta ke̱ena xínuna ku̱a̱ʼa̱nna. Kachi miíún iin ta̱ loʼo kúú ta̱ David ta ni̱kuchiñura xíʼin ta̱yóʼo. ¿Ndachun va̱ʼa ni̱kuchiñura xíʼinra túviún?... Saáchi Jehová chi̱ndeéñaʼá, chi Jehová ndakúkara nu̱ú ndiʼi na̱ yiví.

¿Ndáaña sákuaʼayó xíʼin ña̱ ke̱ʼé ta̱ David?.... Sákuaʼayó chi Jehová ndakúka ta̱yóʼo nu̱ú ndiʼi na̱ yiví. Ña̱kán tá yíʼviún ndakaʼán chi Jehová kúú migoún ta kivi chindeéra yóʼó ña̱ ndakú koo iniún.