Ta̱ David xíʼin ta̱ Goliat

Jehová ni̱ka̱ʼa̱nra xíʼin ta̱ Samuel: “Kúaʼan veʼe ta̱ Jesé. Chi iin se̱ʼera xa̱a̱ kuu rey na̱ ñuu Israel”. Tasaá ku̱a̱ʼa̱n ta̱ Samuel, tá xi̱nira ta̱ se̱ʼe nu̱ú ta̱ Jesé nda̱kanixi̱níra: “Ta̱yóʼo kúúvara”. Soo Jehová ni̱ka̱ʼa̱nra xíʼin ta̱ Samuel su̱ví ta̱yóʼo kúúra, ta ni̱ka̱ʼa̱nkara xíʼinra: “Yi̱ʼi̱ xítoi̱ nda̱saa íyo ini na̱ yiví su̱ví nda̱saa chí sa̱tá kuitína xítoi̱”.

Ta̱ Jesé ni̱na̱ʼa̱ra inka i̱ñu̱ se̱ʼera nu̱ú ta̱ Samuel. Soo ta̱ Samuel ni̱ka̱ʼa̱nra: “Nda̱a̱ ni iin na̱yóʼo va̱ása níndaka̱xin Jehová. ¿Á íyoka se̱ʼún?”. Ta̱ Jesé nda̱kuiinra: “Ta̱ loʼoka kúú ta̱ kúma̱ní, ta̱ David, ndikachiva ndáara”. Tá ki̱xa̱a̱ ta̱ David, Jehová ni̱ka̱ʼa̱nra xíʼin ta̱ Samuel: “Ta̱yóʼo kúúra”. Tasaá sa̱káa ta̱ Samuel aceite xi̱ní ta̱ David. Saá ke̱ʼéra ña̱ nda̱ka̱xinrara kuura rey.

Ni̱ya̱ʼa tiempo, na̱ ñuu Israel kánitáʼanna xíʼin na̱ ñuu Filistea, na̱yóʼo kúúmiína iin ta̱a ta̱ káʼnuní ta̱ naní Goliat. Ndiʼi ki̱vi̱ kúsi̱kindaara na̱ ñuu Israel ta káchira: “Ndaka̱xinndó iin ta̱ kanitáʼan xíʼi̱n. Tá ná kuchiñura, ndi̱ʼi̱ kuundi̱ na̱ kachíñu nu̱úndó. Soo tá ná kuchiñui̱ kaʼníi̱ra, ndóʼó kachíñu nu̱úndi̱”.

Na̱ ñani ta̱ David na̱ xíka nu̱ú ku̱a̱chi kúúna, ta xa̱ʼa ña̱yóʼo ta̱ David ku̱a̱ʼa̱nra xíʼin ña̱ʼa kuxuna. Kán xi̱niso̱ʼora ña̱ káʼa̱n ta̱ Goliat, ta ni̱ka̱ʼa̱nra: “Yi̱ʼi̱ kanitáʼan xíʼinra”. Ta̱ rey Saúl nda̱kuiinra: “Soo iin ta̱ loʼova kúún”. Ta̱ David ni̱ka̱ʼa̱nra: “Jehová chindeé yi̱ʼi̱”.

Tasaá ta̱ Saúl ta̱xira ña̱ ndíxira xíkara nu̱ú ku̱a̱chi ndaʼa̱ ta̱ David, soo ta̱ David ni̱ka̱ʼa̱nra: “Va̱ása kuchiñui̱ kanitáʼi̱n tá ná kuniñúʼi̱ ña̱yóʼo”. Ña̱kán va̱ʼaka honda ki̱ʼinra ku̱a̱ʼa̱n xíʼinra. Ña̱ honda iin yoʼo̱ ña̱ xíniñúʼuna ña̱ va̱ʼa sakánana yu̱u̱ kúúña. Ni̱xa̱ʼa̱nra chí yu̱ta ta ki̱ʼinra u̱ʼu̱n yu̱u̱ válí ta̱ánraña ini lékara. Ta xínura ku̱a̱ʼa̱nra nu̱ú ta̱ Goliat, ta̱ ta̱a káʼnuní yóʼo ni̱ka̱ʼa̱nra: “Yóʼó ta̱ loʼo chóʼo kixiún ta taxii̱ yóʼó kaxí saa xíʼin kití”. Soo ta̱ David va̱ása yíʼvira ta káchira: “Yóʼó va̱xiún nu̱úi̱ ta níʼún iin yuchu̱ xíʼin yitu̱n ka̱a, soo yi̱ʼi̱ ku̱xa̱i̱ nu̱ún xíʼin ki̱vi̱ Jehová. Su̱ví xíʼin ndi̱ʼi̱ kúni̱ún kanitáʼún chi xíʼin Ndióxi̱ kúni̱ún kanitáʼún. Ndiʼi na̱ ki̱xa̱a̱ yóʼo kunina, Jehová kúú ta̱ ndakúka nu̱ú ndiʼina. Ta miíra taxi ndóʼó ndaʼa̱ndi̱”.

Ta̱ David chi̱ka̱a̱ra yu̱u̱ ini ña̱ honda ta sa̱kánaraña xíʼin ndiʼi ndéera. Jehová chi̱ndeé táʼan xíʼinra ña̱ va̱ʼa ka̱niña mií teʼé ta̱ Goliat, ta ndu̱vara ta ni̱xi̱ʼi̱ra. Na̱ filisteo xi̱nuna ku̱a̱ʼa̱nna ña̱ va̱ʼa ná kǒo kaʼnínana. ¿Ta yóʼó á kandíxaún Jehová nda̱a̱ táki̱ʼva ke̱ʼé ta̱ David?