LECCIÓN 30
Na̱ veʼún na̱ ni̱xi̱ʼi̱ kivi ndikóna kutakuna
Tá xíʼi̱ iin na̱ táʼanyó kúsuchíní-iniyó ta xóʼvi̱níyó xa̱ʼa̱ ña̱yóʼo. Ña̱ Biblia káʼa̱nña, ña̱ xíʼi̱yó iin ña̱ sáa̱-ini xíni miíyó kúúña (1 Corintios 15:26). Nu̱ú lección 27 sa̱kuaʼún, Jehová sandíʼi-xa̱ʼa̱ra ña̱ sáa̱-ini xíni miíyó yóʼo. ¿Ndáaña kuu xíʼin na̱ xa̱a̱ ni̱xi̱ʼi̱? Nu̱ú ña̱ lección yóʼo sakuaʼún xa̱ʼa̱ inka ña̱ káʼa̱n Jehová keʼéra: Jehová sandátakura ku̱a̱ʼání na̱ yiví ña̱ va̱ʼa kutakuna ndiʼi tiempo ta si̱íní koona. Soo, ¿á kivi kandíxayó ña̱yóʼo? ¿Á ndatakuna chí ndiví a nu̱ú ñuʼú yóʼova?
1. ¿Ndáaña kúni̱ Jehová keʼéra xa̱ʼa̱ na̱ táʼanyó na̱ xa̱a̱ ni̱xi̱ʼi̱?
Jehová kúni̱níra sandátakura na̱ táʼanyó na̱ xa̱a̱ ni̱xi̱ʼi̱, ta̱ Job iin ta̱a ta̱ xi̱kandíxaní Ndióxi̱ xi̱kuura, ta xi̱kandíxara ña̱ va̱ása nandósó-ini Ndióxi̱ xa̱ʼa̱ra tá ná kuvira, ta ni̱ka̱ʼa̱nra xíʼin Ndióxi̱: “Yóʼó kanaún yi̱ʼi̱, ta yi̱ʼi̱ ndakuii̱n yuʼún” (kaʼvi Job 14:13-15).
2. ¿Nda̱chun va̱ʼa kúnda̱a̱-iniyó ña̱ kivi ndataku na̱ ni̱xi̱ʼi̱?
Tá ni̱xi̱yo ta̱ Jesús nu̱ú ñuʼú yóʼo, Ndióxi̱ ta̱xira ndee̱ ndaʼa̱ra ña̱ va̱ʼa sa̱ndátakura na̱ yiví. Xa̱ʼa̱ ña̱kán ta̱ Jesús sa̱ndátakura iin ñá loʼo ñá xi̱kuumií 12 ku̱i̱ya̱ xíʼin iin ta̱ loʼo se̱ʼé iin ñá ni̱xi̱ʼi̱ yií (Marcos 5:41, 42; Lucas 7:12-15). Tá ni̱ya̱ʼa tiempo ni̱xi̱ʼi̱ migora ta̱ Lázaro. Ni xa̱a̱ ni̱ya̱ʼa ku̱mí ki̱vi̱ ña̱ ni̱xi̱ʼi̱ra ta sa̱ndúxu̱nnara, ta̱ Jesús sa̱ndátakurara. Tándi̱ʼi ni̱ka̱ʼa̱nra xíʼin Ndióxi̱, ndeé va̱ʼa ka̱nara: “Lázaro, kita”. “Ta ta̱ ni̱xi̱ʼi̱ yóʼo ki̱tara”, ta nda̱takuvara (Juan 11:43, 44). ¿Á ndákanixi̱níún ña̱ ni̱kusi̱íní-ini na̱ veʼe ta̱ Lázaro xíʼin na̱ migora tá nda̱takura?
3. ¿Á ndataku na̱ táʼún na̱ xa̱a̱ ni̱xi̱ʼi̱?
Ña̱ Biblia káʼa̱nña “ña̱ ndataku na̱ ni̱xi̱ʼi̱” (Hechos 24:15). Na̱ yiví na̱ sa̱ndátaku ta̱ Jesús, su̱ví chí ndiví níxa̱ʼa̱nna tá ni̱xi̱ʼi̱na (Juan 3:13). Ndiʼina ni̱kusi̱íní-inina tá nda̱takuna nu̱ú ñuʼú. Nda̱a̱ táki̱ʼva ku̱u tiempo saá, si̱lóʼo kúma̱ní ta̱ Jesús sandátakura ku̱a̱ʼání na̱ yiví ña̱ va̱ʼa kusi̱í-inina kutakuna ndiʼi tiempo nu̱ú ñuʼú yóʼo tá ná nduliviña. Ta̱kán ni̱ka̱ʼa̱nra ndiʼi na̱ ndákaʼán Ndióxi̱ xa̱ʼa̱, ndatakuna, nda̱a̱ na̱ kǒo nda̱a̱ ni iin na̱ yiví ndákaʼán xa̱ʼa̱ (Juan 5:28, 29, nota).
NÁ SAKUAʼAKAYÓ XA̱ʼA̱ÑA
Ná ka̱ʼa̱nyó xa̱ʼa̱ prueba ña̱ va̱xi nu̱ú Biblia ña̱ kiviva ndataku na̱ ni̱xi̱ʼi̱, ta ña̱ xi̱nu kúúvaña, ta ná kotoyó ndáa ki̱ʼva ndíko-iniyó tá kúnda̱a̱-iniyó ña̱ ndataku na̱ ni̱xi̱ʼi̱ ta va̱ʼaní kooyó chí nu̱únínu.
4. Ta̱ Jesús ni̱na̱ʼa̱ra ña̱ kivi sandátakura na̱ ni̱xi̱ʼi̱
Kunda̱a̱ka-ini xa̱ʼa̱ ña̱ ke̱ʼé ta̱ Jesús xa̱ʼa̱ migora ta̱ Lázaro. Kaʼvindó Juan 11:14 xíʼin 38-44, ta ka̱ʼa̱nndó xa̱ʼa̱ ña̱yóʼo:
¿Nda̱chun va̱ʼa xíni̱yó ña̱ ndixa ni̱xi̱ʼi̱ ta̱ Lázaro? (Kotondó versículo 39).
Tá chí ndiví ni̱xa̱ʼa̱n ta̱ Lázaro, ¿á túviún ña̱ iin ña̱ va̱ʼa kúú ña̱ ke̱ʼé ta̱ Jesús ña̱ sa̱ndándikó tukura ta̱yóʼo ña̱ koora nu̱ú ñuʼú yóʼo?
5. Ku̱a̱ʼánína ndataku
Kaʼvindó Salmo 37:29 ta ka̱ʼa̱nndó xa̱ʼa̱ ña̱yóʼo:
¿Ndáa míí kundoo ndi̱ʼi̱ na̱ yiví na̱ ndataku?
Ta̱ Jesús va̱ása sandátaku kuitíra na̱ ndásakáʼnu Jehová, saáchi sandátakura ku̱a̱ʼáníka na̱ yiví. Kaʼvindó Hechos 24:15 ta ka̱ʼa̱nndó xa̱ʼa̱ ña̱yóʼo:
Tá ná ndataku na̱ ni̱xi̱ʼi̱, ¿ndáana kútóún ndakuniún?
Ndakanixi̱ní xa̱ʼa̱ ña̱yóʼo, nu̱ú ta̱ Jesús su̱ví ña̱ yo̱ʼvi̱ kúú ña̱ sandátakura na̱ ni̱xi̱ʼi̱, keʼéra nda̱a̱ táki̱ʼva kéʼé iin ta̱ íyo se̱ʼe tá sándotora se̱ʼera.
6. Ña̱ ndataku na̱ ni̱xi̱ʼi̱ kivi sandíkoña-iniún ta saátu ña̱ kundatún koo chí nu̱únínu
Ña̱ káʼa̱n Biblia xa̱ʼa̱ ñá se̱ʼe ta̱ Jairo sándíkoña-ini ku̱a̱ʼání na̱ yiví, ta chíka̱a̱ña ndee̱ xíʼin na̱ ni̱xi̱ʼi̱ na̱ veʼe. Ña̱yóʼo ndixa ku̱uña kaʼvi xa̱ʼa̱ña nu̱ú Lucas 8:40-42 xíʼin 49-56.
Tá kúma̱níka sandátaku ta̱ Jesús ñá se̱ʼe ta̱ Jairo ni̱ka̱ʼa̱nra xíʼinra: “Va̱ása yi̱ʼvíún, kandíxa Ndióxi̱” (kotondó versículo 50). Ña̱ ndataku na̱ ni̱xi̱ʼi̱ ¿Ndáa ki̱ʼva chindeétáʼanña xíʼún...
... tá ná kuvi iin na̱ veʼún?
... tá ná ya̱ʼún nu̱ú iin tu̱ndóʼo nu̱ú kivi kuviún?
Kotondó VIDEO ta ka̱ʼa̱nndó xa̱ʼa̱ ña̱yóʼo:
Ña̱ ndataku na̱ ni̱xi̱ʼi̱, ¿nda̱saa chi̱ka̱a̱ña ndee̱ ta sa̱ndíkoña-ini na̱ yivá ñá Phelicity?
ÑA̱ KÁʼA̱N SAVA NA̱ YIVÍ: “Íxayo̱ʼvi̱níña xíʼi̱n ña̱ kandíxai̱ ña̱ ndataku na̱ ni̱xi̱ʼi̱ ña̱ kundoona nu̱ú ñuʼú yóʼo”.
¿Ndáaña ndákanixi̱níún?
¿Ndáa texto ña̱ va̱xi nu̱ú Biblia kivi kuniñúʼún ña̱ na̱ʼún nu̱úna ña̱ ndataku na̱ ni̱xi̱ʼi̱ nu̱ú ñuʼú yóʼo?
ÑA̱ XA̱A̱ SA̱KUAʼAYÓ
Ña̱ Biblia káʼa̱nña ña̱ ku̱a̱ʼání na̱ yiví ndatakuna. Jehová kúni̱níra ña̱ ná ndatakuna ta ta̱xira ndee̱ ndaʼa̱ ta̱ Jesús ña̱ sandátakurana.
Ná ndakaʼányó xa̱ʼa̱ ña̱yóʼo
¿Nda̱chun va̱ʼa kúnda̱a̱-iniyó ña̱ kúni̱ní Jehová xíʼin ta̱ Jesús sandátakuna na̱ ni̱xi̱ʼi̱?
Tá ná ndataku ku̱a̱ʼání na̱ yiví, ¿ndáa mií kundoona, chí ndiví a nu̱ú ñuʼú yóʼova? ¿Nda̱chun kúú ña̱ ndákanixi̱níún saá?
¿Nda̱chun kándíxaún ña̱ ndataku na̱ táʼún na̱ ni̱xi̱ʼi̱?
NANDUKÚKA XA̱ʼA̱ÑA
Kaʼvi xa̱ʼa̱ ña̱ kivi chindeétáʼan xíʼinyó tá ná kuvi iin na̱ veʼeyó.
“Ña̱ kivi chindeétáʼan xíʼin na̱ xóʼvi̱ tá ni̱xi̱ʼi̱ iin na̱ veʼena” (¡Despertad!, núm. 3, 2018)
¿Á kivi chindeétáʼan Biblia xíʼin na̱ xóʼvi̱ xa̱ʼa̱ ña̱ ni̱xi̱ʼi̱ iin na̱ veʼena?
Koto ndáa ki̱ʼva chindeétáʼún xíʼin na̱ va̱lí na̱ ni̱xi̱ʼi̱ iin na̱ veʼe.
¿Á koo na̱ ndataku chí ndiví? ¿Á koo na̱ va̱ása ndataku?
“¿Ndáaña kúú ña̱ ndatakuna?” (Artículo ña̱ va̱xi nu̱ú jw.org)