NDIKÓ NU̱ÚNA
LECCIÓN 8
Kúee koo iniún
Ña̱ káʼa̱n tu̱ʼun Ndióxi̱: “Iin na̱ kúʼvi̱-ini xíni inkana va̱ása kamaní-inina á kúee íyo inina” (1 Cor. 13:4).
Ña̱ ke̱ʼé ta̱ Jesús
1. Koto VIDEO á ka’vi Juan 7:3-5 xíʼin 1 Corintios 15:3, 4, 7. Tándi̱ʼi, ndakanixi̱ní xa̱ʼa̱ pregunta ña̱ va̱xi yóʼo
¿Ndáa ki̱ʼva ni̱xi̱yo na̱ ñani ta̱ Jesús xíʼinra?
¿Ndáaña náʼa̱ ña̱ chi̱ndeétáʼanva ta̱ Jesús xíʼin ñanira ta̱ Santiago?
¿Ndáaña sákuaʼayó xíʼin ña̱ ke̱ʼé ta̱ Jesús?
2. Sava na̱ yiví ku̱a̱ʼáva tiempo yáʼa tasaá xáa̱na sákuaʼana xa̱ʼa̱ Ndióxi̱, ña̱kán xíniñúʼu kúee koo iniyó xíʼinna.
Keʼé táki̱ʼva ke̱ʼé ta̱ Jesús
3. Nasama ña̱ kéʼún. Tá kǒo kúni̱ na̱ yiví ña̱ kaʼviún xíʼinna kǒo ixandúxaún xíʼinna. Soo kivi na̱ʼún nu̱úna tutu á video nu̱ú káʼa̱nña ndáa ki̱ʼva káʼviyó xíʼin na̱ yiví, ta ka̱ʼa̱n xíʼinna ndáaña va̱ʼa ndakiʼinna tá ná kaʼvina xíʼinyó.
4. Kǒo sakítáʼúnna xíʼin inkana. Xa̱a̱ síín íyo iin tá iin na̱ yiví. Tá iin na̱ veʼún á iin na̱ yiví na̱ nda̱ni̱ʼún territorio ña̱ kúúmiíún kǒo xíínna kaʼvina á ña̱ kandíxana ña̱ va̱xi nu̱ú Biblia, ndakanixi̱ní xa̱ʼa̱ pregunta yóʼo. ¿Á kǒo xíínna kaʼvina xa̱ʼa̱ ña̱ kǒo xíínna sandákoona iin ña̱ kéʼéna ti̱xin veʼe-ñu̱ʼuna? ¿Á na̱ veʼena á na̱ íyo yatin xíʼinna kúú na̱ sási nu̱úna ña̱ kaʼvina? Taxi ná ndakanixi̱nína xa̱ʼa̱ ña̱ ni̱ka̱ʼún xíʼinna, chi saá xa̱a̱na kutóona ña̱ káʼa̱n Biblia.
5. Ka̱ʼa̱n xíʼin Jehová xa̱ʼa̱na. Ka̱ʼa̱n xíʼin Jehová ña̱ chindeétáʼanra xíʼún ña̱ kǒo ndakava-iniún ta saátu ña̱ vií ka̱ʼún xíʼinna. Ta saátu ka̱ʼa̱n xíʼinra ná chindeétáʼanra xíʼún ña̱ kunda̱a̱-iniún ama kúú ña̱ kǒo kaʼvikaún xíʼinna tá va̱ása kútóona sakúaʼana xa̱ʼa̱ra (1 Cor. 9:26).