NÁ XA̱A̱NA NDASAKÁʼNUNA NDIÓXI̱
LECCIÓN 11
Va̱ása yo̱ʼvi̱ sanáʼúnna
Ña̱ káʼa̱n tu̱ʼun Ndióxi̱: “Tá kǒo káxi káʼa̱nndó, ¿ndáa ki̱ʼva kunda̱a̱-ini iinna xíʼin ña̱ káʼa̱nndó?” (1 Cor. 14:9).
Ña̱ ke̱ʼé ta̱ Jesús
1. Koto VIDEO á kaʼvi Mateo 6:25-27. Tándi̱ʼi, ndakanixi̱ní xa̱ʼa̱ pregunta ña̱ va̱xi yóʼo:
¿Ndáa ejemplo xi̱niñúʼu ta̱ Jesús ña̱ na̱ʼa̱ra ña̱ va̱ʼaní ndáa Jehová miíyó?
¿Nda̱chun va̱ʼaní xi̱niñúʼu ta̱ Jesús tí saa ña̱ sanáʼa̱ra iin ña̱ ndáyáʼviní na̱ yiví? Ta, ¿nda̱chun va̱ʼaní ejemplo nda̱kaxinra?
¿Ndáaña sákuaʼayó xíʼin ña̱ ke̱ʼé ta̱ Jesús?
2. Tá va̱ása yo̱ʼvi̱ íyo ña̱ sána̱ʼa̱yó na̱ yiví va̱ʼaní kunda̱a̱-inina xíʼinña, ta saátu va̱ʼaní ndakaʼánna xa̱ʼa̱ña.
Keʼé táki̱ʼva ke̱ʼé ta̱ Jesús
3. Va̱ása ku̱a̱ʼání ka̱ʼún. Tá xa̱a̱ káʼviún xíʼinna xa̱ʼa̱ iin tema ña̱ xa̱a̱ xíni̱ún kǒo ndakaniníúnña nu̱úna, va̱ʼaka xa̱ʼa̱ ña̱ káʼvina ka̱ʼún xíʼinna. Tá kéʼún iin pregunta xíʼinna, kundatún ña̱ ná ndakuiinna. Soo, ¿ndáaña kivi keʼún tá xítoún ña̱ va̱ása kúnda̱a̱-inina ndáaña ndakuiinna, á ña̱ ndákuiinna va̱ása kítáʼanña xíʼin ña̱ káʼa̱n Biblia? Kivi keʼún inka pregunta xíʼinna. Tá xa̱a̱ ku̱nda̱a̱-inina xíʼin ña̱ káʼviún xíʼinna ya̱ʼandó xíʼin inka párrafo.
4. Kuniñúʼu ña̱ xa̱a̱ xíni̱na ña̱ va̱ʼa sanáʼúnna xa̱ʼa̱ inka ña̱ʼa. Tá kúú, tá xa̱a̱ ná kixáʼandó kaʼvindó xa̱ʼa̱ iin lección ña̱ káʼa̱n xa̱ʼa̱ na̱ ndataku, ña̱ kivi keʼún kúú ña̱ sándakaʼúnna ndáaña ndóʼoyó tá xa̱a̱ xíʼi̱yó.
5. Va̱ʼaní ndaka̱xiún ejemplo ña̱ kuniñúʼún. Tá kúma̱níka ndaka̱xiún ndáa ejemplo kuniñúʼún, ndakanixi̱ní xa̱ʼa̱ pregunta yóʼo:
“¿Á iin ejemplo ña̱ va̱ása yo̱ʼvi̱ kúúña?”.
“¿Á kama kunda̱a̱-inina xíʼinña?”.
“¿Á ndakaʼánna xa̱ʼa̱ ña̱ ndáyáʼviní sa̱kuaʼana? ¿Á nda̱saa ejemplo ña̱ ni̱ka̱ʼún xíʼinvana ndakaʼánna xa̱ʼa̱?”.