ARTÍCULO ÑA̱ KAʼVIYÓ 22
¿Ndáa ki̱ʼva chindeétáʼanyó xíʼin na̱ káʼviyó xíʼin ña̱ xa̱a̱na ndakuchina?
“Iin tá iin ndóʼó ndakuchindó” (HECH. 2:38).
YAA 72 Ka̱ʼi̱n xa̱ʼa Reino
ÑA̱ KA̱ʼA̱NYÓ XA̱ʼA̱a
1. Tá ni̱nda̱ka̱tu̱ʼun ku̱a̱ʼání na̱ yiví ndáaña keʼéna, ¿ndáaña ni̱ka̱ʼa̱nna xíʼinna?
KU̱A̱ʼÁNÍ na̱ yiví ni̱xa̱a̱na ñuu Jerusalén. Ta xa̱a̱ síín síín ñuu ke̱ena ta xa̱a̱ síín síín tu̱ʼun káʼa̱nna. Ta ki̱vi̱ kán ku̱u iin ña̱ʼa ña̱ nda̱kanda̱ní-inina xíʼin, chi iin kama ki̱xáʼa na̱ judío káʼa̱nna tu̱ʼun ña̱ káʼa̱n na̱ yiví kán. Soo su̱ví ña̱ ndáyáʼvika kúú ña̱ ki̱xáʼana káʼa̱nna inka tu̱ʼun, chi ña̱ ndáyáʼvika kúú ña̱ ni̱ka̱ʼa̱nna, ta saátu ña̱ ni̱ka̱ʼa̱n ta̱ apóstol Pedro xíʼin ndiʼina. Tá kúú ni̱ka̱ʼa̱nra xíʼinna ña̱ kivi ka̱kuna tá ná kandíxana ta̱ Jesús. Ta ña̱yóʼo ni̱xa̱a̱ña nda̱a̱ níma̱na ña̱kán ni̱nda̱ka̱tu̱ʼunna: “¿Ndáaña xíniñúʼu keʼéndi̱?”. Ta̱ Pedro nda̱kuiinra ta ka̱chira: “Iin tá iinndó ndakuchindó” (Hech. 2:37, 38).
Iin ta̱ hermano xíʼin ñá síʼira, sánáʼa̱ra iin ta̱a xa̱ʼa̱ tu̱ʼun Ndióxi̱ ta níʼina libro ña̱ naní Kivi koo si̱íún. (Koto párrafo 2).
2. ¿Ndáaña ka̱ʼa̱nyó xa̱ʼa̱ nu̱ú artículo yóʼo? (Koto na̱ʼná ña̱ va̱xi chí sa̱tá tutu yóʼo).
2 Tándi̱ʼi, íyo iin ña̱ ndáyáʼviní ku̱u ki̱vi̱ kán: chi ki̱ʼva 3,000 na̱ yiví nda̱kuchi ta ni̱xa̱a̱na ndu̱una discípulo ta̱ Cristo. Tasaá ki̱xáʼa na̱ discípulo ta̱ Jesús kéʼéna chiñu ña̱ ndáyáʼviní ña̱ ni̱ka̱ʼa̱nra xíʼinna keʼéna. Ta nda̱a̱ tiempo vitin kéʼéyó chiñu yóʼo. Soo tiempo vitin su̱ví iin ki̱vi̱ kuití kivi chindeétáʼanyó xíʼin iin na̱ yiví ña̱ va̱ʼa xa̱a̱na ndakuchina. Saáchi sana xíniñúʼu ya̱ʼa ku̱a̱ʼá yo̱o̱ á ku̱a̱ʼá ku̱i̱ya̱ tasaá xa̱a̱na keʼéna ña̱yóʼo. Soo ndiʼivayó kúnda̱a̱-iniyó ña̱ xíniñúʼu chika̱a̱níyó ndee̱ ña̱ va̱ʼa chindeétáʼanyó xíʼin na̱ káʼviyó xíʼin ña̱ xa̱a̱na koona discípulo ta̱ Jesús. Nu̱ú artículo yóʼo sákuaʼayó ndáa ki̱ʼva chindeétáʼanyó xíʼin na̱ káʼviyó xíʼin ña̱ xa̱a̱na ndakuchina.
NÁ CHINDEÉTÁʼANYÓ XÍʼINNA KEʼÉNA ÑA̱ SÁKUAʼANA
3. Nda̱a̱ táki̱ʼva káchi Mateo 28:19, 20, ¿ndáaña xíniñúʼu keʼé na̱ káʼviyó xíʼin ña̱ va̱ʼa xa̱a̱na ndakuchina?
3 Tá kúma̱níka xa̱a̱ na̱ káʼviyó xíʼin ndakuchina, siʼna xíniñúʼu keʼéna ña̱ káʼa̱n tu̱ʼun Ndióxi̱ (kaʼvi Mateo 28:19, 20).b Ta tá kéʼéna ña̱yóʼo kéʼéna nda̱a̱ táki̱ʼva ke̱ʼé ta̱ ta̱a ta̱ ni̱ka̱ʼa̱n ta̱ Jesús xa̱ʼa̱, ta̱ kúnuní xa̱ta ña̱ va̱ʼa ixava̱ʼara veʼera sa̱tá iin yu̱u̱ (Mat. 7:24, 25; Luc. 6:47, 48). Vitin ná ka̱ʼa̱nyó xa̱ʼa̱ u̱ni̱ ña̱ʼa ña̱ kivi keʼéyó ña̱ va̱ʼa chindeétáʼanyó xíʼin na̱ káʼviyó xíʼin, tasaá xa̱a̱na keʼéna ña̱ sákuaʼana.
4. ¿Ndáa ki̱ʼva chindeétáʼanyó xíʼin na̱ káʼviyó xíʼin ña̱ va̱ʼa xa̱a̱na ndakuchina? (Koto recuadro “Chindeétáʼan xíʼin na̱ káʼviún xíʼin ña̱ kuumiína meta ta saxínunaña”).
4 Ná chindeétáʼanyó xíʼin na̱ káʼviyó xíʼin ña̱ kuumiína meta. ¿Nda̱chun ndáyáʼviní keʼéyó ña̱yóʼo? Ná ka̱ʼa̱nyó xa̱ʼa̱ iin ejemplo: tá ku̱a̱ʼa̱nyó iin ñuu ña̱ xíkání ndíka̱a̱, sana xíniñúʼu kunditayó yichi̱ ña̱ va̱ʼa ndakindee̱ loʼoyó, tasaá va̱ása xíkaní kooña nu̱úyó. Ta ki̱ʼva saátu kooña nu̱ú na̱ káʼviyó xíʼin, tá kúúmiína meta válí ta kúchiñuna sáxi̱nunaña. Chi saá kiʼinna kuenta ña̱ va̱ása ixayo̱ʼvi̱ña xíʼinna ña̱ xa̱a̱na ndakuchina. Ña̱ va̱ʼa chindeétáʼanyó xíʼin na̱ káʼviyó xíʼin ña̱ kuaʼnuna xíʼin tu̱ʼun Ndióxi̱, kivi kuniñúʼuyó recuadro ña̱ naní “Chika̱a̱ ndee̱ ña̱ keʼún ña̱yóʼo” ña̱ va̱xi nu̱ú libro Kivi koo si̱íún. Tándi̱ʼi ka̱ʼviyó iin lección xíʼinna ná ka̱ʼa̱nyó xa̱ʼa̱ recuadro yóʼo xíʼinna, ta ndáa ki̱ʼva kítáʼan ña̱yóʼo xíʼin ña̱ sa̱kán sa̱kuaʼana. Ta tá kúni̱yó ña̱ ná keʼéna inkaka ña̱ʼa, kivi kaʼyínaña nu̱ú káʼa̱nña “Inkaka ña̱ kivi keʼún”. Tá xa̱a̱ ni̱xa̱a̱yó nu̱ú táʼví yóʼo, ná chika̱a̱yó ndee̱ ña̱ ka̱ʼa̱nyó xíʼin na̱ káʼviyó xíʼin xa̱ʼa̱ meta ña̱ kúúmiína ña̱ kuchiñuna sáxi̱nuna ti̱xin loʼo tiempo á ku̱a̱ʼá tiempo.
5. Nda̱a̱ táki̱ʼva káchi Marcos 10:17-22, ¿ndáaña ni̱ka̱ʼa̱n ta̱ Jesús xíʼin iin ta̱ ku̱i̱ká, ta nda̱chun?
5 Ná chindeétáʼanyó xíʼin na̱ káʼviyó xíʼin ña̱ nasamana ña̱ kéʼéna (kaʼvi Marcos 10:17-22).c Ta̱ Jesús ni̱ka̱ʼa̱nra xíʼin iin ta̱ ku̱i̱ká ña̱ ná xi̱kóra ndiʼi ña̱ʼa ña̱ kúúmiíra, ni xi̱kunda̱a̱va-ini ta̱ Jesús ña̱ ixayo̱ʼvi̱ña xíʼin ta̱ ta̱a yóʼo (Mar. 10:23). ¿Nda̱chun ni̱ka̱ʼa̱n ta̱ Jesús ña̱yóʼo xíʼinra? Saáchi ku̱ndáʼvi-inira xi̱nirara. Sana va̱ása xíínyó ka̱ʼa̱nyó xíʼin na̱ káʼviyó xíʼin ña̱ kixáʼana keʼéna ña̱ sákuaʼana, chi túviyó ña̱ ta̱ʼán koo tu̱ʼvana keʼéna ña̱yóʼo. Ña̱ nda̱a̱ kúú ña̱ sana xíniñúʼu ya̱ʼa tiempo ta saáví nasamana ña̱ kéʼéna (Col. 3:9, 10). Soo tá kama nátúʼunyó xíʼin na̱ káʼviyó xíʼin xa̱ʼa̱ ña̱ va̱ása xíniñúʼu keʼéna, saá kúú ña̱ kamaka kixáʼana nasamana ña̱ kéʼéna. Ta xíʼin ña̱yóʼo na̱ʼa̱yó ña̱ kúʼvi̱-iniyó xíniyóna (Sal. 141:5; Prov. 27:17).
6. ¿Nda̱chun ndáyáʼviní nda̱ka̱tu̱ʼunyó na̱ káʼviyó xíʼin xa̱ʼa̱ ña̱ ndákanixi̱nína?
6 Ndáyáʼviní nda̱ka̱tu̱ʼunyó na̱ káʼviyó xíʼin ndáaña ndákanixi̱nína xa̱ʼa̱ ña̱ sákuaʼana. Saáchi ña̱yóʼo chindeétáʼan xíʼinyó kunda̱a̱-iniyó ndáaña kúnda̱a̱-inina xíʼin ña̱ sákuaʼana ta ndáaña kándíxana. Ta tá ná ka̱anyó nda̱ka̱tu̱ʼunyóna, saá kúú ña̱ va̱ása ixayo̱ʼvi̱ña xíʼinyó ka̱ʼa̱nyó xíʼinna xa̱ʼa̱ ña̱ʼa ña̱ yo̱ʼvi̱. Nu̱ú libro ña̱ naní Kivi koo si̱íún va̱xi ku̱a̱ʼání pregunta ña̱ kivi chindeétáʼan xíʼinna ka̱ʼa̱nna ndáaña ndákanixi̱nína. Tá kúú nu̱ú lección 4 va̱xi pregunta yóʼo: “¿Ndáaña ndóʼo Jehová tá xíniñúʼún ki̱vi̱ra?”. Ta nu̱ú lección 9 va̱xi inka pregunta yóʼo: “¿Ndáa ña̱ʼa kúú ña̱ kivi ka̱ʼún xa̱ʼa̱ tá ná keʼún oración?”. Tá sa̱kán ki̱xáʼayó káʼviyó xíʼinna, sana va̱ása kamaví ndakuiinna pregunta yóʼo, ña̱kán sava yichi̱ xíniñúʼu kundatu loʼoyó ña̱ va̱ʼa ndakuiinna. Ta kivi chindeétáʼanyó xíʼinna ña̱ ndakanixi̱nína xa̱ʼa̱ texto ña̱ va̱xi nu̱ú lección yóʼo xíʼin na̱ʼná ña̱ va̱xi nu̱úña.
7. ¿Ndáa ki̱ʼva kuniñúʼuyó experiencia ña̱ va̱ʼa chindeétáʼanyó xíʼin na̱ káʼviyó xíʼin?
7 Tá xa̱a̱ ku̱ndaa̱-ini na̱ káʼviyó xíʼin ndáaña xíniñúʼu keʼéna, ná kuniñúʼuyó sava experiencia ña̱ va̱ʼa chindeétáʼanyó xíʼinna ña̱ nasamana ña̱ va̱ása va̱ʼa kéʼéna. Tá kúú tá íxayo̱ʼvi̱ña xíʼinna ku̱ʼu̱nna reunión ná na̱ʼa̱yó video yóʼo nu̱úna Jehová ndíʼi̱-inira xa̱ʼíi̱, ña̱ va̱xi nu̱ú táʼví “Nandukúka xa̱ʼa̱ ña̱yóʼo” ña̱ va̱xi nu̱ú lección 14. Nu̱ú ku̱a̱ʼání lección ña̱ va̱xi nu̱ú libro yóʼo, va̱xi ku̱a̱ʼá experiencia ti̱xin táʼví ña̱ naní “Ná sákuaʼakayó xa̱ʼa̱ ña̱yóʼo” á ña̱ naní “Nandukúka xa̱ʼa̱ ña̱yóʼo”.d Ná va̱ása chitáʼanyóna xíʼin inkana ta ná va̱ása ka̱ʼa̱nyó ña̱yóʼo xíʼinna: “Tá ku̱chiñu na̱kán kuchiñutu yóʼóva”. Chi miívana xíniñúʼu kiʼin kuenta ña̱ kuchiñuvana nasamana ña̱ kéʼéna. Ná ka̱ʼa̱nyó xa̱ʼa̱ ña̱ chi̱ndeétáʼan xíʼin na̱ yiví na̱ ni̱ya̱ʼa nu̱ú video yóʼo ña̱ va̱ʼa ke̱ʼéna ña̱ káʼa̱n Biblia. Tá kúú kivi ka̱ʼa̱nyó xa̱ʼa̱ iin texto á xa̱ʼa̱ iin ña̱ʼa ña̱ ke̱ʼé na̱ yiví yóʼo. Ta saátu kivi ka̱ʼa̱nyó xíʼin na̱ káʼviyó xíʼin ndáa ki̱ʼva chi̱ndeétáʼan Jehová xíʼin na̱ ni̱ya̱ʼa nu̱ú video yóʼo.
8. ¿Ndáa ki̱ʼva chindeétáʼanyó xíʼin na̱ káʼviyó xíʼin ña̱ kuʼvi̱-inina kunina Jehová?
8 Ná chindeétáʼanyó xíʼin na̱ káʼviyó xíʼin ña̱ kuʼvi̱-inina kunina Jehová. Ná taváyó tiempo ña̱ ka̱ʼa̱nyó xíʼinna xa̱ʼa̱ ña̱ va̱ʼa ña̱ kúúmií Jehová. Ná chindeétáʼanyó xíʼin na̱ káʼviyó xíʼin ña̱ kunda̱a̱-inina xa̱ʼa̱ Jehová ña̱ kúúra iin Ndióxi̱ ta̱ si̱í-ini, ta ndiʼi tiempo íyora ña̱ chindeétáʼanra xíʼin na̱ kúʼvi̱-ini xíniñaʼá (1 Tim. 1:11; Heb. 11:6). Ná ka̱ʼa̱nyó xa̱ʼa̱ ña̱ va̱ʼa ña̱ ndakiʼinna tá ná keʼéna ña̱ sákuaʼana, chi saá náʼa̱ Jehová ña̱ kúʼvi̱-inira xínirana (Is. 48:17, 18). Tá ná kuʼvi̱ka-inina kunina Jehová saá kúú ña̱ kuni̱kana nasamana ña̱ kéʼéna (1 Juan 5:3).
NÁ NA̱ʼA̱YÓ INKAKA NA̱ HERMANO NU̱ÚNA
9. Nda̱a̱ táki̱ʼva káchi Marcos 10:29, 30, ¿ndáaña chindeétáʼan xíʼin na̱ káʼviyó xíʼin ña̱ sandákoona sava ña̱ʼa tasaá ndakuchina?
9 Ña̱ va̱ʼa xa̱a̱ na̱ káʼviyó xíʼin ndakuchina, xíniñúʼu sandákoona sava ña̱ʼa. Nda̱a̱ táki̱ʼva ndo̱ʼo ta̱ ku̱i̱ká ta̱ ni̱ka̱ʼa̱nyó xa̱ʼa̱ nu̱ú párrafo 5, sana sava na̱ káʼviyó xíʼin xíniñúʼu sandákoona sava ña̱ ku̱i̱ká ña̱ kúúmiína. Á nda̱a̱ sana sandákoona chiñu ña̱ kúúmiína, saáchi yáʼandosóña ña̱ káʼa̱n tu̱ʼun Ndióxi̱. Ta saátu nda̱a̱ kivi sandákoona ña̱ kutáʼanna xíʼin na̱ yiví na̱ va̱ása ndásakáʼnu Ndióxi̱, ta savana íxandi̱va̱ʼa na̱ veʼena xíʼinna saáchi na̱yóʼo kúndasína xínina na̱ testigo Jehová. Ta̱ Jesús ni̱ka̱ʼa̱nra ña̱ ixayo̱ʼvi̱ña xíʼin sava na̱ yiví ña̱ sandákoona ña̱yóʼo. Soo ni̱ka̱ʼa̱nra ña̱ taxi Jehová na̱ ñuura ña̱ koona na̱ veʼena (kaʼvi Marcos 10:29, 30).e ¿Ndáa ki̱ʼva chindeétáʼanyó xíʼin na̱ káʼviyó xíʼin ña̱ ndakiʼinna bendición yóʼo?
10. ¿Ndáaña sákuaʼayó xíʼin ña̱ ni̱ka̱ʼa̱n ta̱ Manuel?
10 Viíní ná kutáʼanyó xíʼin na̱ káʼviyó xíʼin. Xíniñúʼu na̱ʼa̱yó ña̱ ndíʼi̱-iniyó xa̱ʼa̱na. ¿Nda̱chun? Iin ta̱ hermano ta̱ naní Manuel ta̱ íyo chí México káʼa̱nra ña̱yóʼo xa̱ʼa̱ ta̱ hermano ta̱ sa̱náʼa̱-ñaʼá: “Tá kúma̱níka kixáʼandi̱ kaʼvindi̱ xi̱nda̱ka̱tu̱ʼunra yi̱ʼi̱ á íyo va̱ʼi̱. Ta ña̱yóʼo xi̱chindeétáʼanña xíʼin ña̱ va̱ʼa natúʼi̱n xíʼinra xa̱ʼa̱ nda̱a̱ ndáaka ña̱ʼa. Xi̱kunda̱a̱-inii̱ ña̱ ndixa xi̱ndi̱ʼi̱-inira xa̱ʼíi̱”.
11. ¿Nda̱chun ndáyáʼviní taváyó tiempo ña̱ kutáʼanyó xíʼin na̱ káʼviyó xíʼin?
11 Ta̱ Jesús xi̱tavára tiempo ña̱ kutáʼanra xíʼin na̱ discípulora, ta saátu miíyó ná taváyó tiempo ña̱ kutáʼanyó xíʼin na̱ káʼviyó xíʼin (Juan 3:22). Ta tá xítoyó ña̱ xa̱a̱ chíka̱a̱nína ndee̱ keʼéna ña̱ sákuaʼana, ná kanayóna veʼeyó ña̱ va̱ʼa kuxuna xíʼinyó á kivitu kotonde̱ʼéyó programa ña̱ JW Broadcasting. Ta tá kúúña tiempo ña̱ kéʼé na̱ ñuyǐví yóʼo vikó, ná kanayóna ña̱ ku̱ʼu̱nna veʼeyó tasaá va̱ása kuni mitúʼunna. Ta̱ Kazibwe ta̱ íyo chí Uganda káchira: “Tá xi̱kitáʼi̱n xíʼin ta̱ xi̱sanáʼa̱ yi̱ʼi̱ xa̱ʼa̱ Ndióxi̱ ku̱a̱ʼání ña̱ va̱ʼa xi̱sakuaʼi̱ xa̱ʼa̱ Jehová, saátu tá xi̱kaʼvindi̱ ku̱a̱ʼání ña̱ʼa xi̱sakuaʼi̱. Ki̱ʼi̱n kuenta ña̱ ndíʼi̱ní-ini Jehová xa̱ʼa̱ na̱ káchíñu nu̱úra ta si̱íní íyona, tasaá xi̱kuni̱tu miíi̱ koi̱”.
Tá xa̱a̱ síín síín na̱ hermano ná ku̱ʼu̱n xíʼinyó tá ku̱a̱ʼa̱nyó sánáʼa̱yó na̱ yiví, va̱ása ixayo̱ʼvi̱ña xíʼinna ku̱ʼu̱nna reunión. (Koto párrafo 12).h
12. ¿Nda̱chun iin ña̱ va̱ʼa kúú ña̱ ku̱ʼu̱n xa̱a̱ síín síín na̱ hermano xíʼinyó?
12 Xa̱a̱ síín síín na̱ hermano ná ku̱ʼu̱n xíʼinyó tá ku̱a̱ʼa̱nyó sanáʼa̱yó na̱ káʼviyó xíʼin. Sana túviyó ña̱ va̱ʼaníka kúú ña̱ ku̱ʼu̱n mitúʼunyó á iinlá kuití na̱ hermano ku̱ʼu̱n xíʼinyó ndiʼi tiempo. Ni kiviva keʼéyó ña̱yóʼo sava yichi̱. Soo va̱ʼaníka chindeétáʼanyó xíʼin na̱ káʼviyó xíʼin tá ná ku̱ʼu̱n xa̱a̱ síín síín na̱ hermano xíʼinyó. Ta̱ Dimitri ta̱ íyo chí Moldavia káchira: “Na̱ hermano na̱ xi̱xa̱ʼa̱n xíʼin ta̱ hermano ta̱ xi̱sanáʼa̱ yi̱ʼi̱, xa̱a̱ síín síín xi̱sanáʼa̱na. Ta va̱ʼaní xi̱chindeétáʼan ña̱yóʼo xíʼi̱n ña̱ kotoi̱ ndáa ki̱ʼva keʼíi̱ ña̱ xi̱sakuaʼi̱. Ta saátu va̱ása níkukaʼanní nu̱úi̱ tá ni̱xa̱ʼi̱n ña̱ yichi̱ nu̱ú reunión, saáchi xa̱a̱ xi̱xinii̱ ku̱a̱ʼá na̱ hermano”.
13. ¿Nda̱chun xíniñúʼu chindeétáʼanyó xíʼin na̱ káʼviyó xíʼin ña̱ ku̱ʼu̱nna reunión?
13 Ná chindeétáʼanyó xíʼin na̱ káʼviyó xíʼin ña̱ ku̱ʼu̱nna reunión. ¿Nda̱chun? Saáchi mií Jehová kúú ta̱ káʼa̱n xíʼinyó ña̱ ku̱ʼu̱nyó reunión, ta iin ki̱ʼva ña̱ ndásakáʼnuyóra kúú ña̱yóʼo (Heb. 10:24, 25). Ta saátu, na̱ hermano na̱ íyo ti̱xin congregación nda̱a̱ táki̱ʼva íyo na̱ veʼeyó saá íyo na̱yóʼo. Ta tá ndákutáʼanyó xíʼinna ti̱xin reunión, nda̱a̱ táki̱ʼva íyo na̱ ndákutáʼan xíxi iin comida ña̱ ya̱sinní saá íyoyó. Tá chíndeétáʼanyó xíʼin na̱ káʼviyó xíʼin ña̱ ku̱ʼu̱nna reunión, saá kúú ña̱ chíndeétáʼanyó xíʼinna ña̱ xa̱a̱na ndakuchina. Soo kivi kasi sava ña̱ʼa nu̱úna ña̱ va̱ʼa xa̱a̱na ndakuchina. ¿Ndáa ki̱ʼva kuniñúʼuyó libro ña̱ naní Kivi koo si̱íún ña̱ va̱ʼa chindeétáʼanyó xíʼinna?
14. ¿Ndáa ki̱ʼva chika̱a̱yó ndee̱ xíʼin na̱ káʼviyó xíʼin ña̱ ku̱ʼu̱nna reunión?
14 Ña̱ va̱ʼa chika̱a̱yó ndee̱ xíʼinna ña̱ ku̱ʼu̱nna reunión, kivi kuniñúʼuyó lección 10 ña̱ va̱xi nu̱ú libro ña̱ naní Kivi koo si̱íún. Tá kúma̱ní kana tutu yóʼo ni̱ka̱ʼa̱nna xíʼin sava na̱ publicador, ña̱ ná kaʼvina lección yóʼo xíʼin na̱ sánáʼa̱na, ta ni̱ka̱ʼa̱nna ña̱ va̱ʼaní chi̱ndeétáʼan ña̱yóʼo xíʼin na̱ sánáʼa̱na. Va̱ása xíniñúʼu kundatuvíyó ña̱ xa̱a̱yó lección 10 tasaá ka̱ʼa̱nyó xíʼinna ña̱ ku̱ʼu̱nna reunión xíʼinyó. Chi kivi ndi̱ku̱n kixáʼayó ka̱ʼa̱nyó xíʼinna ña̱ ku̱ʼu̱nna reunión, ta ná va̱ása sandákooyó keʼéyó ña̱yóʼo. Xa̱a̱ síín síín íyo na̱ káʼviyó xíʼin ta saátu ña̱ íxayo̱ʼvi̱ xíʼinna, ña̱kán ná ndakanixi̱níyó xa̱ʼa̱ ña̱ xíniñúʼu iin tá iin na̱yóʼo, ta ná ndukúyó ki̱ʼva ña̱ chindeétáʼanyó xíʼinna. Ná va̱ása ndakava-iniyó tá va̱ása ndi̱ku̱n ku̱a̱ʼa̱nna reunión xíʼinyó. Kúee ná koo iniyó xíʼinna, soo ná ndakundeéyó ka̱ʼa̱nyó xíʼinna ña̱ ku̱ʼu̱nna xíʼinyó.
NÁ CHINDEÉTÁʼANYÓ XÍʼINNA ÑA̱ VA̱ÁSA YI̱ʼVÍNA
15. ¿Ndáa ña̱ʼa kivi sáyi̱ʼví na̱ káʼviyó xíʼin?
15 Ná ndakaʼányó tá ki̱xáʼayó sákuaʼayó xa̱ʼa̱ Ndióxi̱, sana xi̱yi̱ʼvíyó ña̱ xa̱a̱yó kooyó testigo Jehová. Ta xi̱ndakanixi̱níyó ña̱ va̱ása kuchiñuyó natúʼunyó xíʼin na̱ yiví veʼe tá veʼe. Ta sana xi̱yi̱ʼvíyó ña̱ sa̱a̱ na̱ veʼeyó xíʼinyó á na̱ migoyó. Tá saá, kúnda̱a̱va-iniyó xíʼin ña̱ ndóʼo na̱ káʼviyó xíʼin. Ta̱ Jesús ni̱ka̱ʼa̱nra ña̱ savana yi̱ʼvína, soo ni̱ka̱ʼa̱nra xíʼin na̱ discípulora ña̱ va̱ása taxina kasi ña̱yóʼo nu̱úna ña̱ xa̱a̱na ndasakáʼnuna Jehová (Mat. 10:16, 17, 27, 28). ¿Ndáa ki̱ʼva chi̱ndeétáʼan ta̱ Jesús xíʼinna ña̱ va̱ása níyi̱ʼvíkana? Ta, ¿ndáa ki̱ʼva chindeétáʼantu miíyó xíʼin na̱ káʼviyó xíʼin?
16. ¿Ndáa ki̱ʼva sanáʼa̱yó na̱ káʼviyó xíʼin ña̱ natúʼunna xíʼin inkana xa̱ʼa̱ ña̱ sákuaʼana?
16 Loʼo tá loʼo ná sanáʼa̱yó na̱ káʼviyó xíʼin ña̱ natúʼunna xa̱ʼa̱ ña̱ sákuaʼana. Sana ni̱yi̱ʼvíva na̱ discípulo ta̱ Jesús tá ni̱ka̱ʼa̱nra xíʼinna ña̱ ku̱ʼu̱nna natúʼunna xíʼin na̱ yiví. Soo chi̱ndeétáʼanra xíʼinna tá ni̱ka̱ʼa̱nra xíʼinna ndáana natúʼunna xíʼin ta ndáaña ka̱ʼa̱nna (Mat. 10:5-7). ¿Ndáa ki̱ʼva kundiku̱nyó yichi̱ra? Ndíku̱nyó yichi̱ra tá chíndeétáʼanyó xíʼin na̱ káʼviyó xíʼin ña̱ kunda̱a̱-inina ndáana natúʼunna xíʼin. Tá kúú kivi nda̱ka̱tu̱ʼunyóna á xíni̱na iin na̱ yiví na̱ xíniñúʼu sákuaʼa xa̱ʼa̱ ña̱ va̱xi nu̱ú tu̱ʼun Ndióxi̱. Tándi̱ʼi, ná chindeétáʼanyó xíʼinna ña̱ kunda̱a̱-inina ndáa ki̱ʼva natúʼunna xíʼin na̱ yiví yóʼo. Ta tá va̱ʼa túviyó, ná kuniñúʼuyó táʼví ña̱ naní “Ña̱ káʼa̱n sava na̱ yiví” xíʼin ña̱ naní “Ña̱ ndáka̱tu̱ʼun sava na̱ yiví”, ña̱ va̱xi nu̱ú libro Kivi koo si̱íún ña̱ va̱ʼa sákuaʼa kúeeyó xíʼinna. Ta tá kéʼéyó ña̱yóʼo ná sanáʼa̱yóna kuniñúʼuna tu̱ʼun Ndióxi̱ ña̱ vií ndakuiinna yuʼú iin na̱ yiví.
17. ¿Ndáa ki̱ʼva kuniñúʼuyó Mateo 10:19, 20, 29-31 ña̱ va̱ʼa chindeétáʼanyó xíʼin na̱ káʼviyó xíʼin ña̱ kandíxana Jehová?
17 Ná chindeétáʼanyó xíʼin na̱ káʼviyó xíʼin ña̱ kandíxana Jehová. Ta̱ Jesús ni̱ka̱ʼa̱nra xíʼin na̱ discípulora ña̱ mií Jehová chindeétáʼan xíʼinna xa̱ʼa̱ ña̱ kúʼvi̱ní-inira xínirana (kaʼvi Mateo 10:19, 20,f 29-31).g Ná sandákaʼányó na̱ káʼviyó xíʼin ña̱ chindeétáʼantu Jehová xíʼin na̱yóʼova. Ná sánáʼa̱yóna ña̱ ka̱ʼa̱nna xíʼin Jehová xa̱ʼa̱ ña̱ kúni̱na keʼéna. Ta̱ Franciszek ta̱ íyo chí Polonia káchira: “Tá xi̱keʼé ta̱ xi̱kaʼvi xíʼi̱n oración, ndiʼi tiempo xi̱ka̱ʼa̱nra xa̱ʼa̱ ña̱ xi̱kuni̱i̱ keʼíi̱, ta tá xi̱kiʼi̱n kuenta ña̱ xi̱ndakuiin Jehová oración ña̱ xi̱keʼéra, saátu yi̱ʼi̱ ndi̱ku̱n ki̱xáʼíi̱ kéʼíi̱ oración. Ta saátu xi̱kiʼi̱n kuenta ndáa ki̱ʼva xi̱chindeétáʼan Jehová xíʼi̱n, tá xi̱ndukúi̱ permiso nu̱ú xi̱kachíñui̱ ña̱ va̱ʼa ku̱ʼi̱n asamblea á reunión”.
18. ¿Ndáaña ndóʼo Jehová xa̱ʼa̱ ndiʼi ña̱ kéʼéyó ña̱ va̱ʼa sanáʼa̱yó na̱ yiví?
18 Soo tá kǒo nda̱a̱ ni iin na̱ yiví káʼviyó xíʼin xa̱ʼa̱ Ndióxi̱. ¿Á kivi chindeétáʼanyó xíʼin na̱ yiví ña̱ xa̱a̱na ndakuchina? Kiviva keʼéyóña tá ku̱a̱ʼa̱nyó xíʼin na̱ hermano ña̱ kaʼvina xíʼin na̱ yiví. Ndíʼi̱níva-ini Jehová xa̱ʼa̱ na̱ sa̱kán sákuaʼa xa̱ʼa̱ Biblia. Saátu chíndayáʼviníra chiñu ña̱ kéʼéyó ña̱ chíndeétáʼanyó xíʼinna ña̱ va̱ʼa kuyatinna nu̱úra. Ta kúʼvi̱ní-inira xínira miíyó xa̱ʼa̱ ña̱ kéʼéyó ña̱yóʼo (Is. 52:7).
YAA 60 Nátúʼunyó ña̱ va̱ʼa ka̱kuna
a Nu̱ú artículo yóʼo kotoyó ndáaña ke̱ʼé ta̱ Jesús ña̱ va̱ʼa sa̱náʼa̱ra na̱ yiví, ta ndáa ki̱ʼva kundiku̱nyó yichi̱ra. Saátu ka̱ʼa̱nyó xa̱ʼa̱ sava ña̱ va̱xi nu̱ú libro xa̱á ña̱ naní Kivi koo si̱íún, ta ña̱ libro yóʼo ku̱va̱ʼaña ña̱ va̱ʼa chindeétáʼanña xíʼin na̱ káʼviyó xíʼin ña̱ xa̱a̱na ndakuchina.
b Mateo 28:19, 20: “Ña̱kán kúáʼanndó nu̱ú ndiʼi na̱ yiví ña̱ iníísaá ñuyǐví ta sanáʼa̱ndóna ña̱ ná kundiku̱nna yi̱ʼi̱. Ta sandákuchindóna xíʼin ki̱vi̱ yivái̱ xíʼin ki̱vi̱ se̱ʼera ta saátu xíʼin ki̱vi̱ espíritu santo. 20 Sanáʼa̱ndóna ná keʼéna ndiʼi ña̱ʼa ña̱ sa̱náʼi̱ ndóʼó. Ta ndakaʼánndó ña̱ íyoi̱ xíʼinndó ndiʼi ki̱vi̱ nda̱a̱ ná ndiʼi-xa̱ʼa̱ ñuyǐví”.
c Marcos 10:17-22: “Tá ku̱a̱ʼa̱nra chí yichi̱, iin ta̱a xínura ki̱xaa̱ra ta xi̱kuxítíra nu̱úra ta ni̱nda̱ka̱tu̱ʼunrara: ‘Maestro ta̱ va̱ʼa, ¿ndáaña xíniñúʼu keʼíi̱ ña̱ va̱ʼa kutakui̱ ndiʼi tiempo?ʼ. 18 Ta̱ Jesús ni̱ka̱ʼa̱nra xíʼinra: ‘¿Nda̱chun káʼún ta̱ va̱ʼa xíʼi̱n? Kǒo ni iin na̱ va̱ʼa, iinlá Ndióxi̱ kúú ta̱ va̱ʼa. 19 Xíni̱vaún chiñu ña̱ xáʼnda Ndióxi̱: va̱ása kaʼníún, va̱ása ku̱su̱ún xíʼin na̱ kǒo nítindaʼa̱ xíʼún, va̱ása ixakúiʼnáún, va̱ása ka̱ʼún ña̱ vatá xa̱ʼa̱ inkana, va̱ása sandáʼviún inkana ta ixato̱ʼó yiváún xíʼin siʼúnʼ. 20 Ta̱ ta̱a yóʼo ni̱ka̱ʼa̱nra xíʼin ta̱ Jesús: ‘Maestro tá loʼovíi̱ xa̱a̱ kéʼíi̱ ndiʼi ña̱yóʼoʼ. 21 Ta̱ Jesús xi̱tora nu̱úra ta ku̱ndáʼvi-inira xi̱nirara, ta ni̱ka̱ʼa̱nra xíʼinra: ‘Iinlá ña̱ʼa kúma̱ní nu̱ún: kúáʼan xi̱kó ña̱ʼa ña̱ kúúmiíún ta taxi xu̱ʼún ndaʼa̱ na̱ ndáʼvi; tasaá ni̱ʼún ña̱ va̱ʼa chí ndiví. Tándi̱ʼi, saá kixiún ta kundiku̱ún yi̱ʼi̱ʼ. 22 Soo tá xi̱niso̱ʼora ña̱yóʼo, nda̱kava-inira ta nda̱kiʼinra ku̱a̱ʼa̱nra ta ku̱suchíní-inira saáchi ku̱a̱ʼání ña̱ʼa xi̱kuumiíra”.
d Ta saátu ndani̱ʼíkayó experiencia nu̱ú Guía de estudio para los testigos de Jehová. Ña̱yóʼo va̱xiña ti̱xin táʼví ña̱ naní “La Biblia”, “Valor práctico”, “La Biblia les cambió la vida (sección de La Atalaya)”. Á kivitu kuniñúʼuyó aplicación JW Library® ta ki̱ʼviyó sección ña̱ naní “Multimedia”, “Entrevista xíʼin experiencia”.
e Marcos 10:29, 30: “Ta̱ Jesús ni̱ka̱ʼa̱nra xíʼinna: ‘Ña̱ nda̱a̱ káʼi̱n xíʼinndó nda̱a̱ ndáaka na̱ sandákoo veʼena, ñanina, ku̱ʼvana, siʼína, yivána, se̱ʼena á ñuʼúna xa̱ʼíi̱ ta saátu xa̱ʼa̱ tu̱ʼun va̱ʼa 30 ta tiempo vitin ndakiʼinna veʼena, ñanina, ku̱ʼvana, siʼína, se̱ʼena, ñuʼúna, ta nda̱a̱ yáʼaka cien yichi̱ ndakiʼinnaña nu̱úka ña̱ xi̱kuumiína, soo kixitu tu̱ndóʼo nu̱úna, ta chí nu̱únínu kutakuna ndiʼi tiempoʼ”.
f Mateo 10:19, 20: “Soo tá ná ndataxina ndóʼó ndaʼa̱na, va̱ása kundi̱ʼi̱ní-inindó xa̱ʼa̱ tu̱ʼun ña̱ ka̱ʼa̱nndó á ndáa ki̱ʼva ka̱ʼa̱nndó, chi tá ná kixaa̱ tiempo kunda̱a̱va-inindó ndáaña ka̱ʼa̱nndó. 20 Saáchi su̱ví ndóʼó kuití kúú na̱ ka̱ʼa̱n: chi espíritu yivándó kúú ña̱ ka̱ʼa̱n xa̱ʼa̱ndó”.
g Mateo 10:29-31: “¿Á su̱ví iin xu̱ʼún loʼo cháʼvina xa̱ʼa̱ u̱vi̱ saa válí tá íxi̱kónarí? Soo ni saá kúnda̱a̱-ini yivárí ta̱ íyo chí ndiví xa̱ʼa̱rí tá ndákava iinrí nu̱ú ñuʼú. 30 Soo ndóʼó, nda̱a̱ kúnda̱a̱ va̱ʼa inira nda̱saa kúú yixí xi̱níndó íyo. 31 Ña̱kán va̱ása yi̱ʼvíndó. Ndáyáʼviníka ndóʼó nu̱ú ku̱a̱ʼá tí saa válí”.
h ÑA̱ KÁʼA̱N XA̱ʼA̱ NA̱ʼNÁ: Iin ta̱ hermano xíʼin ñá síʼira káʼvina xíʼin iin ta̱ ta̱a. Ta xa̱a̱ síín síín na̱ hermano xáʼa̱n xíʼinra inka yichi̱.