Kúáʼanndó ta sanáʼa̱ndó na̱ yiví ña̱ ná kundiku̱nna yi̱ʼi̱

1, 2. ¿Ndáaña ni̱ka̱ʼa̱n iin ta̱ ángel xíʼin ná ñaʼá ná ni̱xa̱ʼa̱n nu̱ú ni̱ndu̱xu̱n ta̱ Jesús, ta ndáaña ni̱ka̱ʼa̱n mií ta̱ Jesús xíʼinná?

TÁ SA̱KÁN ku̱a̱ʼa̱n túvi, tá 16 tí nisán ña̱ ku̱i̱ya̱ 33. Sava ná ñaʼá ná kúʼvi̱ní-ini xíni Ndióxi̱, kúsuchíní-ininá ku̱a̱ʼa̱nná nu̱ú xa̱a̱ íyo u̱vi̱ ki̱vi̱ ni̱ndu̱xu̱n ta̱ Jesucristo. Ku̱a̱ʼa̱nná chika̱a̱ná ña̱ʼa ña̱ xáʼa̱n támi xíʼin aceite tá xáʼa̱n támi ku̱ñura. Tá ni̱xa̱a̱ná nu̱ú ni̱ndu̱xu̱nra, iin nda̱kanda̱-ininá tá xi̱niná ña̱ kǒokara ndíka̱a̱ kán. Iin ta̱ ángel ni̱ka̱ʼa̱nra xíʼinná ña̱ xa̱a̱ nda̱taku ta̱ Jesús, ta ka̱chira: “Siʼnara ku̱a̱ʼa̱n nu̱úndó chí Galilea; kán kunindóra” (Mat. 28:1-7; Luc. 23:56; 24:10).

² Tá nda̱kiʼin ná ñaʼá yóʼo ku̱a̱ʼa̱nná, ku̱yatin ta̱ Jesús ta ni̱ka̱ʼa̱nra xíʼinná: “Kúáʼanndó ta ka̱ʼa̱nndó xíʼin na̱ ñanii̱ ña̱ ná ku̱ʼu̱nna chí Galilea; kán kunina yi̱ʼi̱” (Mat. 28:10). Ña̱ nu̱ú ke̱ʼé ta̱ Jesús tá nda̱takura kúú ña̱ nda̱kutáʼanra xíʼin na̱ discípulora, ña̱ va̱ʼa taxira iin chiñu ña̱ ndáyáʼviní ndaʼa̱na.

¿NDÁANA NI̱KA̱ʼA̱N TA̱ JESÚS XÍʼIN ÑA̱ KU̱ʼU̱NNA NATÚʼUNNA XÍʼIN NA̱ YIVÍ?

3, 4. ¿Nda̱chun káʼa̱nyó ña̱ su̱ví kuití ndaʼa̱ na̱ apóstol nítaxi ta̱ Jesús chiñu ña̱ va̱xi nu̱ú Mateo 28:19, 20? (Koto na̱ʼná ña̱ va̱xi chí sa̱tá tutu yóʼo).

³ (Kaʼvi Mateo 28:16-20).b Tá nda̱kutáʼan ta̱ Jesús xíʼin na̱ discípulora, ta̱xira iin chiñu ña̱ ndáyáʼviní ndaʼa̱na ña̱ keʼéna tá siglo nu̱ú, ta ña̱kán kúú ña̱ kéʼé miíyó nda̱a̱ tiempo vitin. Ni̱ka̱ʼa̱nra xíʼinna: “Ña̱kán, kúáʼanndó ta sanáʼa̱ndó na̱ yiví ña̱ iníísaá ñuyǐví, ña̱ ná kundiku̱nna yi̱ʼi̱. [...] Sanáʼa̱ndóna ña̱ ná kuniso̱ʼona ndiʼi ña̱ ni̱ka̱ʼi̱n xíʼinndó”.

⁴ Ta̱ Jesús kúni̱ra ña̱ ndiʼi na̱ ndíku̱nñaʼá ná ku̱ʼu̱nna natúʼunna xíʼin na̱ yiví. Ta su̱ví nda̱saa ndaʼa̱ na̱ 11 apóstol nítaxira chiñu yóʼo. ¿Nda̱chun káʼa̱nyó ña̱yóʼo? Saáchi, su̱ví nda̱saa na̱ apóstol kúú na̱ ndóo tá ta̱xi ta̱ Jesús chiñu ndaʼa̱na chí yuku̱ ña̱ Galilea, ña̱ ku̱ʼu̱nna sanáʼa̱na na̱ yiví. Ná ndakaʼányó chi ta̱ ángel ni̱ka̱ʼa̱nra xíʼin ná ñaʼá, ña̱ chí Galilea kuniná ta̱ Jesús. Ña̱kán, sana ni̱xa̱ʼa̱ntu ku̱a̱ʼá ná ñaʼá tá nda̱kutáʼanna chí Galilea. Ta saátu, ta̱ apóstol Pablo ni̱ka̱ʼa̱nra ña̱ ta̱ Jesús “yáʼaka 500 na̱ hermano ki̱tara nu̱ú” (1 Cor. 15:6). ¿Ndáa míí?

5. ¿Nda̱chun kándíxayó ña̱ káʼa̱n 1 Corintios 15:6, xa̱ʼa̱ ña̱ nda̱kutáʼanna chí Galilea ña̱ va̱xi nu̱ú Mateo capítulo 28?

⁵ Kiviva kandíxayó, ña̱ xi̱ndakanixi̱ní ta̱ Pablo xa̱ʼa̱ ña̱ nda̱kutáʼanna chí Galilea, ña̱ káʼa̱n Mateo capítulo 28 xa̱ʼa̱. ¿Nda̱chun? Ña̱ nu̱ú, saáchi ndiʼi na̱ discípulo ta̱ Jesús na̱ ñuu Galilea xi̱kuuna. Ña̱kán, chí yuku̱ ña̱ Galilea kúú nu̱ú kivi ndakutáʼan ku̱a̱ʼá na̱ yiví, nu̱úka ña̱ ndakutáʼanna iin veʼe chí Jerusalén. Ña̱ u̱vi̱, ta̱ Jesús xa̱a̱ nda̱kutáʼanra xíʼin na̱ 11 apóstolra iin veʼe chí Jerusalén tá nda̱takura. Ña̱kán, tá nda̱saa ndaʼa̱ na̱ apóstol xi̱kuni̱ ta̱ Jesús taxira chiñu, ña̱ ku̱ʼu̱nna natúʼunna xíʼin na̱ yiví ña̱ koona discípulora, kiviva ka̱ʼa̱nra ña̱yóʼo xíʼinna chí Jerusalén, nu̱úka ña̱ ka̱ʼa̱nra xíʼin ndiʼina ña̱ ndakutáʼanna xíʼinra chí Galilea (Luc. 24:33, 36).

6. ¿Ndáa ki̱ʼva náʼa̱ Mateo 28:20 ña̱ xíniñúʼu saxínuyó ña̱ káʼa̱nña tiempo vitin, ta ndáa ki̱ʼva xa̱a̱ kéʼéyó ña̱yóʼo?

⁶ Ña̱ u̱ni̱, ta̱ Jesús su̱ví nda̱saa xíʼin na̱ 11 apóstol na̱ nda̱kú ni̱xi̱yo ini níka̱ʼa̱nra xíʼin, ña̱ ku̱ʼu̱nna natúʼunna xíʼin na̱ yiví ña̱ koona discípulora. ¿Nda̱chun va̱ʼa kúnda̱a̱-iniyó ña̱yóʼo? Ña̱ so̱ndíʼi ña̱ ni̱ka̱ʼa̱n ta̱ Jesús xíʼin na̱ discípulora kúú ña̱yóʼo: “Koi̱ xíʼinndó ndiʼi tiempo nda̱a̱ ná ndiʼi-xa̱ʼa̱ ñuyǐví” (Mat. 28:20). Nda̱a̱ táki̱ʼva ni̱ka̱ʼa̱n ta̱ Jesús, tiempo vitin ku̱a̱ʼání na̱ yiví nátúʼunna xíʼin inkana xa̱ʼa̱ Ndióxi̱, ña̱kán ndiʼi ku̱i̱ya̱ ki̱ʼva 300,000 na̱ discípulo ta̱ Jesús ndákuchi, ta xáa̱na ndúuna testigo Jehová.

7. ¿Ndáaña ka̱ʼa̱nyó xa̱ʼa̱, ta nda̱chun?

⁷ Ku̱a̱ʼání na̱ káʼviyó Biblia xíʼin, chíka̱a̱na ndee̱ ta xáa̱na ndákuchina. Soo, savana yíʼvina ña̱ xa̱a̱na koona discípulo ta̱ Cristo. Kútóovana kaʼvina, soo va̱ása chíka̱a̱na ndee̱ ña̱ ndakuchina. Ndiʼiyó na̱ káʼvi xíʼin na̱ yiví, kúni̱yó chindeétáʼanyó xíʼinna ña̱ keʼéna ña̱ sákuaʼana, ta xa̱a̱na koona discípulo ta̱ Cristo. Nu̱ú ña̱ artículo yóʼo sakuaʼayó ndáa ki̱ʼva xa̱a̱ ña̱ sánáʼa̱yó nda̱a̱ níma̱ na̱ káʼviyó xíʼin, ta kuaʼnuna xíʼin tu̱ʼun Ndióxi̱. ¿Nda̱chun ndáyáʼviní ka̱ʼa̱nyó xa̱ʼa̱ ña̱yóʼo? Saáchi sava xíniñúʼu ndaka̱xinyó á kaʼvikayó xíʼinna á va̱ása.

NÁ CHIKA̱A̱YÓ NDEE̱ ÑA̱ XA̱A̱ ÑA̱ SÁNÁʼA̱YÓ NDA̱A̱ NÍMA̱ NA̱ KÁʼVIYÓ XÍʼIN

8. ¿Nda̱chun kivi ixayo̱ʼvi̱ña xíʼinyó ña̱ xa̱a̱ ña̱ sánáʼa̱yó nda̱a̱ níma̱ na̱ káʼviyó xíʼin?

⁸ Jehová kúni̱ra ña̱ na̱ yiví ná ndasakáʼnunara xa̱ʼa̱ ña̱ kúʼvi̱-inina xíninara. Ña̱kán, kúni̱yó chindeétáʼanyó xíʼin na̱ káʼviyó xíʼin, ña̱ kunda̱a̱-inina ña̱ ndíʼi̱ní-ini Jehová xa̱ʼa̱ iin iinna, ta kúʼvi̱ní-inira xínirana. Kúni̱yó chindeétáʼanyó xíʼinna, ña̱ kotona Jehová nda̱a̱ táki̱ʼva íyo yivá na̱ va̱lí na̱ ndáʼvi, ta̱ ndáa ná ñaʼá ná ni̱xi̱ʼi̱ yií (Sal. 68:5). Tá ná kunda̱a̱-ini na̱ káʼviyó xíʼin ña̱ kúʼvi̱ní-ini Jehová xínirana, saátu miína xa̱a̱na kuʼvi̱ka-inina kuninara. Soo, sava na̱ káʼviyó xíʼin íxayo̱ʼvi̱ña xíʼinna ña̱ kotona Jehová nda̱a̱ táki̱ʼva íyo iin yivá ta̱ kúʼvi̱ní-ini xíniñaʼá, chi sana na̱ yivána va̱ása nína̱ʼa̱na ña̱ kúʼvi̱-inina xíninana (2 Tim. 3:1, 3). Ña̱kán ná ka̱ʼa̱nyó xíʼin na̱ káʼviyó xíʼin xa̱ʼa̱ ndiʼi ña̱ va̱ʼa ña̱ kúúmií Jehová. Ná chindeétáʼanyó xíʼin na̱ káʼviyó xíʼin, ña̱ kunda̱a̱-inina ña̱ kúni̱ Jehová ña̱ ná ndakiʼinna ña̱ kutakuna ndiʼi tiempo, ta íyo tu̱ʼvara ña̱ chindeétáʼanra xíʼinna. ¿Ndáaka ña̱ kivi keʼéyó?

9, 10. ¿Ndáa libro kúú ña̱ xíniñúʼu kaʼviyó xíʼin na̱ yiví, ta nda̱chun?

⁹ Ná kuniñúʼuyó ña̱ libro, ¿Ndáaña kúú míí ña̱ ndixa sánáʼa̱ Biblia? xíʼin ña̱ Ná ndakundeéyó kuʼvi̱ka-iniyó kuniyó Ndióxi̱. Ña̱ libro yóʼo ku̱va̱ʼaña, ña̱ va̱ʼa chindeétáʼanña xíʼinyó ña̱ xa̱a̱ ña̱ sánáʼa̱yó nda̱a̱ níma̱ na̱ káʼviyó xíʼin. Tá kúú, nu̱ú ña̱ capítulo 1 ña̱ libro Ña̱ sánáʼa̱ Biblia ndákuiinña ña̱yóʼo: ¿á ndixa kǒo ndíʼi̱-ini Ndióxi̱ xa̱ʼayó?, ¿nda̱saa ndóʼo Ndióxi̱ tá xítora ndóʼoyó tu̱ndóʼo? ta ¿á kivi kuyatinyó nu̱ú Jehová? Ta ña̱ libro Ná kuʼvi̱ka-iniyó, kivi chindeétáʼanña xíʼin na̱ káʼviyó xíʼin, ña̱ kunda̱a̱-inina ña̱ tá ná keʼéna ña̱ káʼa̱n Biblia viíka kutakuna, ta viíka kutáʼanna xíʼin Jehová. Ni tá xa̱a̱ ka̱ʼviyó ña̱ libro yóʼo xíʼin inkana, xíniñúʼu tuku sakuaʼa kúeeyó xíʼinña ña̱ va̱ʼa chindeétáʼanyó xíʼin inka na̱ káʼviyó xíʼin.

¹⁰ Soo ná kachiyó ña̱ na̱ káʼviyó xíʼin kúni̱na kunda̱a̱-inina xa̱ʼa̱ ña̱ káʼa̱n inka publicación, ña̱ kǒo íyo nu̱ú va̱xi tutu ña̱ xíniñúʼuyó. Tá saá, kivi ka̱ʼa̱nyó xíʼinna ña̱ ná kaʼvi miína ña̱ tutu yóʼo, ta ná ndakundeéyó kaʼviyó libro ña̱ xa̱a̱ ni̱ka̱ʼa̱nyó xa̱ʼa̱ xíʼinna.

11. ¿Ama xíniñúʼu kixáʼayó keʼéyó oración xíʼin na̱ káʼviyó xíʼin, ta nda̱saa kivi chindeéyóna ña̱ kunda̱a̱-inina ña̱ ndáyáʼviní ña̱yóʼo?

¹¹ Tá kíxáʼayó káʼviyó xíʼinna ná keʼéyó oración. Ta, ¿ama kúú ña̱ xíniñúʼu kixáʼayó keʼéyó oración tá káʼviyó xíʼin na̱ yiví, ta saátu tá sándiʼiyó? Ndi̱ku̱n tá xa̱a̱ ki̱xáʼayó káʼviyó xíʼinna. Xíniñúʼu chindeétáʼanyó xíʼin na̱ káʼviyó xíʼin ña̱ kunda̱a̱-inina, ña̱ xíʼin espíritu santo Jehová kivi kunda̱a̱-iniyó xíʼin tu̱ʼunra. Savana ña̱ va̱ʼa chindeétáʼanna xíʼin na̱ káʼvina xíʼin ña̱ kunda̱a̱-inina ña̱ ndáyáʼviní keʼéyó oración, káʼvina Santiago 1:5 ña̱ káchi: “Ndáa ndóʼó kúma̱ní ña̱ ndíchi nu̱ú, ndakundeékandó ndukúndóña nu̱ú Ndióxi̱, chi ta̱yóʼo taxivaraña ndaʼa̱ndó”. Tándíʼi ndáka̱tu̱ʼunna na̱ káʼvina xíʼin: “¿Nda̱saa kivi ndukúyó ña̱ ndíchi nu̱ú Ndióxi̱?”. Ta sana na̱yóʼo káʼa̱nna ña̱ xíniñúʼu ka̱ʼa̱nyó xíʼin Ndióxi̱.

12. ¿Ndáa ki̱ʼva kuniñúʼuyó ña̱ káʼa̱n Salmo 139:2-4, ña̱ chindeétáʼanyó xíʼin na̱ káʼviyó xíʼin ña̱ viíka ka̱ʼa̱nna xíʼin Jehová?

¹² Ná sanáʼa̱yó na̱ káʼviyó xíʼin ña̱ keʼéna oración. Ná ka̱ʼa̱nyó xíʼinna ña̱ kúni̱ Jehová kuniso̱ʼora oración ña̱ ka̱ʼa̱nna. Ta ná ka̱ʼa̱nyó xíʼinna ña̱ kiviva ka̱ʼa̱nyó xíʼin Jehová xa̱ʼa̱ ndiʼi ña̱ ndóʼoyó, ña̱ va̱ása kivi ka̱ʼa̱nyó xa̱ʼa̱ xíʼin inkana. Chi Jehová xa̱a̱ xíni̱ ndiʼivara ndáaña ndóʼoyó (kaʼvi Salmo 139:2-4).c Saátu kivi ka̱ʼa̱nyó xíʼin na̱ káʼviyó xíʼin, ña̱ ná ka̱ʼa̱nna xíʼin Jehová chindeétáʼanra xíʼinna, ña̱ nasamana ña̱ ndákanixi̱nína xíʼin costumbre ña̱ kúúmiína. Tá kúú, ná kachiyó ña̱ iin na̱ xa̱a̱ ku̱a̱ʼá tiempo káʼviyó xíʼin kéʼékana sava vikó ña̱ va̱ása kútóo Ndióxi̱. Ta xa̱a̱ kúnda̱a̱va-inina ña̱ va̱ása va̱ʼaña, soo kútóokavana keʼénaña. Ná ka̱ʼa̱nyó xíʼinna ka̱ʼa̱nna xíʼin Jehová xa̱ʼa̱ ña̱ ndóʼona, ta ná ka̱ʼa̱nna xíʼinra ña̱ chindeétáʼanra xíʼinna, ña̱ kuʼvi̱-inina kunina ña̱ va̱ʼa ña̱ kúʼvi̱-ini miíra xínira (Sal. 97:10).

13. a) ¿Nda̱chun xíniñúʼu ka̱ʼa̱nyó xíʼin na̱ káʼviyó xíʼin ña̱ ku̱ʼu̱nna reunión? b) ¿Ndáaña kivi keʼéyó ña̱ chindeétáʼanyó xíʼinna ña̱ va̱ʼa kunina, tá ná ku̱ʼu̱nna reunión?

¹³ Ná ka̱ʼa̱nyó xíʼin na̱ káʼviyó xíʼin ña̱ ná ku̱ʼu̱nna reunión. ¿Nda̱chun? Saáchi ña̱ xítona xíʼin ña̱ xíniso̱ʼona ti̱xin reunión kivi xa̱a̱ña nda̱a̱ níma̱na, ta chindeétáʼanña xíʼinna ña̱ kuaʼnuna xíʼin tu̱ʼun Ndióxi̱. Ña̱kán, ná na̱ʼa̱yó nu̱úna video ña̱ naní ¿Ndáaña kéʼé na̱ testigo Jehová nu̱ú ndátakana? ta ná ka̱ʼa̱nyó xíʼinna ña̱ ku̱ʼu̱nna xíʼinyó reunión. Ta tá kivi ná ku̱ʼu̱nyó ndakiʼinyóna. Ta saátu kivi ka̱ʼa̱nyó xíʼin xa̱a̱ síín síín na̱ hermano, ña̱ ku̱ʼu̱nna xíʼinyó nu̱ú na̱ káʼviyó xíʼin. Saá kúú ña̱ kivi xa̱a̱na kuxini̱na ku̱a̱ʼáka na̱ hermano ti̱xin congregación, ta va̱ʼa kunina tá ná ku̱ʼu̱nna reunión.

NÁ CHINDEÉTÁʼANYÓ XÍʼIN NA̱ KÁʼVIYÓ XÍʼIN ÑA̱ KUAʼNUNA XÍʼIN TU̱ʼUN NDIÓXI̱

14. ¿Ndáaña kivi chindeétáʼan xíʼin na̱ káʼviyó xíʼin ña̱ kuaʼnuna xíʼin tu̱ʼun Ndióxi̱?

¹⁴ Ña̱ kúni̱yó kúú ña̱ chindeétáʼanyó xíʼin na̱ káʼviyó xíʼin, ña̱ kuaʼnuna xíʼin tu̱ʼun Ndióxi̱ (Efes. 4:13). Savana kíxáʼana káʼvina xíʼinyó, chi kúni̱na kotona ndáa ki̱ʼva chindeétáʼan ña̱yóʼo xíʼinna. Tá ná kixáʼana kuʼvi̱ka-inina kunina Jehová, sana kixáʼana ndakanixi̱nína ndáa ki̱ʼva chindeétáʼanna xíʼin inkana, ta saátu xíʼin na̱ hermano ti̱xin congregación (Mat. 22:37-39). Ta ná ka̱ʼa̱nyó xíʼinna, ña̱ ndáyáʼviní taxiyó donación ña̱ va̱ʼa chindeétáʼanyó xíʼin na̱ ñuu Ndióxi̱.

15. ¿Nda̱saa kivi chindeétáʼanyó xíʼin na̱ káʼviyó xíʼin, ña̱ kotona ndáaña keʼéna tá yáʼana nu̱ú tu̱ndóʼo?

¹⁵ Ná sanáʼa̱yó na̱ káʼviyó xíʼin, ndáaña keʼéna tá yáʼana nu̱ú tu̱ndóʼo. Ná ka̱ʼa̱nyó xa̱ʼa̱ iin ejemplo. Tá iin na̱ káʼviyó xíʼin na̱ xa̱a̱ kúú publicador, káchina ña̱ iin na̱ hermano ti̱xin congregación ni̱ka̱ʼa̱nna iin ña̱ va̱ása va̱ʼa xíʼinna. ¿Ndáaña keʼéyó? Ná va̱ása ka̱ʼa̱nyó xíʼinna ndáana kúúmií ku̱a̱chi, va̱ʼaka ná ka̱ʼa̱nyó xíʼinna ndáaña káʼa̱n Biblia. Ná ka̱ʼa̱nyó xíʼinna ña̱ kivi keʼéna u̱vi̱ ña̱ʼa: ña̱ kukáʼnu-inina xa̱ʼa̱ na̱ hermano, soo tá va̱ása kivi nandósóna xa̱ʼa̱ ña̱ ku̱u, va̱ʼaka xíʼin ña̱ si̱í-ini ná ka̱ʼa̱nna xíʼin na̱ hermano yóʼo ña̱ kukáʼnu-inina xa̱ʼa̱na (chitáʼanña xíʼin Mateo 18:15). Ná chindeétáʼanyó xíʼin na̱ káʼviyó xíʼin ña̱ kotona ndáaña ka̱ʼa̱nna. Ta ná sanáʼa̱yóna kuniñúʼuna ña̱ aplicación JW Library^®, ña̱ Guía de estudio para los testigos de Jehová xíʼin ña̱ sitio jw.org^® ña̱ kivi chindeétáʼan xíʼinna ña̱ ndasaviína ku̱a̱chi ña̱ kúúmiína. Tá ná kutu̱ʼvana ya̱ʼana nu̱ú tu̱ndóʼo tá kúma̱níka ndakuchina, va̱ʼaníka xa̱a̱na kutáʼanna xíʼin na̱ hermano.

16. ¿Nda̱chun va̱ʼaní tá káʼa̱nyó xíʼin inka na̱ publicador ña̱ ku̱ʼu̱nna xíʼinyó nu̱ú na̱ káʼviyó xíʼin?

¹⁶ Ná ka̱ʼa̱nyó xíʼin inka na̱ hermano ña̱ ku̱ʼu̱nna xíʼinyó nu̱ú na̱ káʼviyó xíʼin, ta saátu ta̱ Superintendente ña̱ circuito tá va̱xira xítora na̱ congregación. ¿Nda̱chun? Nu̱ú párrafo 13 xa̱a̱ ni̱ka̱ʼa̱nyó xa̱ʼa̱ña, chi sava kivi viíka chindeétáʼan inka na̱ publicador xíʼin na̱ káʼviyó xíʼin. Ná kachiyó, ña̱ na̱ káʼviyó xíʼin xa̱a̱ ku̱a̱ʼá yichi̱ kúni̱na sandákoona ña̱ kaʼmina, soo ta̱ʼán kuchiñuna keʼéna ña̱yóʼo. Tá saá ndóʼona, ná ka̱ʼa̱nyó xíʼin iin na̱ hermano na̱ ndo̱ʼo táʼan ña̱yóʼo ña̱ taxina sava consejo ndaʼa̱na, ña̱ kivi chindeétáʼan xíʼinna. Tá va̱ása va̱ʼa kúni̱yó xa̱ʼa̱ ña̱ íyo iin na̱ hermano na̱ xíni̱ va̱ʼa xíʼinyó tá káʼviyó xíʼinna, va̱ʼaka ná ka̱ʼa̱nyó xíʼin mií na̱ hermano yóʼo ña̱ ka̱ʼa̱nna xíʼinna. Ña̱kán ná ka̱ʼa̱nyó xíʼin na̱ hermano yóʼo ña̱ chindeétáʼanna xíʼin na̱ káʼviyó xíʼin. Ná ndakaʼányó chi ña̱ kúni̱yó kúú ña̱ chindeétáʼanyó xíʼin na̱ káʼviyó xíʼin, ña̱ kuaʼnuna xíʼin tu̱ʼun Ndióxi̱.

¿Á XÍNIÑÚʼU SANDÁKOOYÓ NA̱ KÁʼVIYÓ XÍʼIN?

17, 18. ¿Ndáaña xíniñúʼu kiʼinyó kuenta xíʼin tá ndákanixi̱níyó sandákooyó na̱ káʼviyó xíʼin?

¹⁷ Tá na̱ káʼviyó xíʼin va̱ása chíka̱a̱na ndee̱ ña̱ nasamana ña̱ kéʼéna, xíniñúʼu nda̱ka̱tu̱ʼun xíʼin miíyó á xíniñúʼu kaʼvikayó xíʼinna. Ta ná koto va̱ʼayó ndáa ki̱ʼva íyona. Chi savana kama násamana ña̱ kéʼéna, ta savana va̱ása kama kéʼénaña. Ña̱kán ná nda̱ka̱tu̱ʼun xíʼin miíyó: “¿Á chíka̱a̱ na̱ káʼvii̱ xíʼin ndee̱ ña̱ nasamana ña̱ kéʼéna? ¿Á chika̱a̱na ndee̱ ña̱ keʼéna ña̱ sákuaʼana?” (Mat. 28:20). Ni kúeeva násama na̱ káʼviyó xíʼin ña̱ kéʼéna, xíniñúʼu kiʼinyó kuenta ndáaña xa̱a̱ ku̱a̱ʼa̱nna násamana.

¹⁸ Ta, ¿ndáaña keʼéyó tá na̱ káʼviyó xíʼin, náʼa̱na ña̱ va̱ása ndáyáʼvi ña̱ káʼviyó Biblia xíʼinna? Ná ndakanixi̱níyó xa̱ʼa̱ ña̱yóʼo. Tá na̱ káʼviyó xíʼin, xa̱a̱ sa̱ndíʼina ka̱ʼvina ña̱ libro Ña̱ sánáʼa̱ Biblia ta ki̱xáʼana káʼvina ña̱ libro Ná kuʼvi̱ka-iniyó, ta ni ta̱ʼán ku̱ʼu̱nna reunión ni Conmemoración. Ta saátu, nina káʼa̱nna ña̱ va̱ása íyo tiempo nu̱úna ña̱ kaʼvina. Tá saá íyoña, xíniñúʼu ka̱ʼa̱nyó xíʼinna xa̱ʼa̱ ña̱yóʼo.d

19. ¿Ndáaña kivi ka̱ʼa̱nyó xíʼin na̱ káʼviyó xíʼin tá va̱ása ndáyáʼviña nu̱úna, ta ndáaña kiʼinyó kuenta xíʼin?

¹⁹ Tá ná kixáʼayó ka̱ʼa̱nyó xíʼinna, kivi nda̱ka̱tu̱ʼunyóna ña̱yóʼo: “¿Ndáaña íxayo̱ʼvi̱ xíʼún ña̱ xa̱ún koún testigo Jehová?”. Tá iin na̱ xa̱a̱ ku̱a̱ʼá tiempo káʼviyó xíʼin, káchina ña̱ kútóo kuitína kaʼvina Biblia soo va̱ása xa̱a̱na koona testigo Jehová, ¿á xíniñúʼu kaʼvikayó xíʼinna? Soo sanatu na̱ káʼviyó xíʼin kivi ka̱ʼa̱nna ña̱ íyo iin ña̱ íxayo̱ʼvi̱ xíʼinna. Tá kúú, sana ndákanixi̱nína ña̱ va̱ása kuchiñuna ku̱ʼu̱nna natúʼunna xíʼin na̱ yiví veʼe tá veʼe. Tá xa̱a̱ ku̱ndaa̱-iniyó ndáaña ndóʼona, va̱ása ixayo̱ʼvi̱ña xíʼinyó ña̱ chindeétáʼanyó xíʼinna.

20. ¿Nda̱saa chíndeétáʼan ña̱ káʼa̱n Hechos 13:48 xíʼinyó ña̱ kotoyó á kaʼvikayó xíʼinna á va̱ása?

²⁰ Sava na̱ káʼviyó xíʼin, íyona nda̱a̱ táki̱ʼva íyo na̱ yiví na̱ ni̱xi̱yo tá tiempo ta̱ Ezequiel. Jehová ni̱ka̱ʼa̱nra ña̱yóʼo xa̱ʼa̱na xíʼin ta̱ Ezequiel: “Koto, yóʼó íyoún nu̱ú na̱kán nda̱a̱ táki̱ʼva íyo iin yaa ña̱ liviní xítana, ña̱ sákaʼana xíʼin iin instrumento tú kúúmií yi̱ʼva̱. Kuniso̱ʼona ña̱ káʼún, soo nda̱a̱ ni iinna va̱ása keʼé ña̱ káʼún” (Ezeq. 33:32). Sana kivi ixayo̱ʼvi̱ña xíʼinyó, ña̱ ka̱ʼa̱nyó xíʼin na̱ káʼviyó xíʼin ña̱ va̱ása kaʼvikayó xíʼinna, soo va̱ása íyo ku̱a̱ʼáka tiempo nu̱úyó (1 Cor. 7:29). Ña̱kán, nu̱úka ña̱ kuniñúʼuyó tiempoyó ña̱ kaʼviyó xíʼin na̱ va̱ása chíka̱a̱ ndee̱ ña̱ nasamana ña̱ kéʼéna, va̱ʼaka ná ku̱ʼu̱nyó nandukúyó na̱ ndixa kúni̱ kutaku ndiʼi tiempo (kaʼvi Hechos 13:48).e

21. ¿Ndáaña kúú texto ña̱ ku̱i̱ya̱ 2020, ta nda̱chun ndáyáʼviní ña̱yóʼo?

²¹ Texto ña̱ ku̱i̱ya̱ 2020, chindeétáʼanña xíʼinyó ña̱ viíka sanáʼa̱yó na̱ yiví ña̱ xa̱a̱na koona discípulo ta̱ Jesús. Nu̱ú ña̱yóʼo va̱xi sava tu̱ʼun ña̱ ni̱ka̱ʼa̱n ta̱ Jesús tá nda̱kutáʼanna chí yuku̱ ña̱ Galilea:“Ña̱kán, kúáʼanndó ta sanáʼa̱ndó na̱ yiví [...] ña̱ ná kundiku̱nna yi̱ʼi̱. Ta sandákuchindóna” (Mat. 28:19).