BIBLIOTECA NU̱Ú INTERNET Watchtower

BIBLIOTECA NU̱Ú INTERNET

w13 1/8
Ña̱ pornografía ¿Iin ña̱ va̱ʼa kúúña á iin ña̱ kini kúúña?

Tutu Ña̱ Nátúʼun xíʼinyó Xa̱ʼa Reino Jehová 2013

w13 1/8

TEMA ÑA̱ PORTADA

Ña̱ pornografía ¿Iin ña̱ va̱ʼa kúúña á iin ña̱ kini kúúña?

Ña̱ pornografía iníísaá ñuyǐví ndíkaa̱ña.a Kánaña nu̱ú televisión, saátu xíʼin ki̱ʼva ña̱ ndíxi na̱ yiví, yaa ña̱ távána káʼa̱nña xa̱ʼa̱ ña̱yóʼo ta va̱xiña nu̱ú Internet (á inkaka nu̱ú chíndaʼána na̱ʼná); kánaña nu̱ú película, tutu ña̱ káʼvina xíʼin videojuego ña̱ sísikína, saátu va̱xiña nu̱ú celular ña̱ kúúmiína. Ta tiempo ña̱ ndóoyó vitin ku̱a̱ʼánína xítoña nu̱úka ku̱i̱ya̱ chí sa̱tá (koto recuadro “Ña̱ káʼa̱n xa̱ʼa̱ ña̱ pornografía”).

Ña̱ káʼa̱n na̱ yiví xa̱ʼa̱ ña̱ pornografía xa̱a̱ ku̱a̱ʼa̱n nása̱maníña. Ñá profesora Gail Dines ka̱ʼyiñá ña̱yóʼo: “Na̱ʼná ña̱ va̱xi na̱ yiví chálá, tá ya̱chi̱ iin ña̱ kaʼan nu̱ú kúú ña̱ kotona ña̱yóʼo, soo tiempo vitin ku̱a̱ʼání na̱ yiví xítoña ta kǒo kúkaʼanka nu̱úna xíʼin ña̱yóʼo”.

Ta miíún, ¿ndáaña ndákanixi̱níún xa̱ʼa̱ ña̱yóʼo? ¿Á iin ña̱ʼa ña̱ sákusi̱í-iniyó kúúña, á iin ña̱ʼa ña̱ sandíʼi-xa̱ʼa̱ miíyó kúúña? Ta̱ Jesús ni̱ka̱ʼa̱nra: “Ta saátu iin tú yitu̱n va̱ʼa ku̱i̱ʼi va̱ʼa táxinú, soo iin yitu̱n táʼyi táxinú ku̱i̱ʼi ña̱ táʼyi” (Mateo 7:17). ¿Ndáaña táxi ña̱ pornografía? Ña̱ va̱ʼa kunda̱a̱-iniyó xíʼin ña̱yóʼo, ná kotoyó ndáaña ndóʼo na̱ xítoña.

¿Ndáaña ndóʼo na̱ xíto pornografía?

ÑA̱ KÁʼA̱N NA̱ XÍNI̱VA̱ʼA XA̱ʼA̱ ÑA̱YÓʼO: Ña̱ pornografía kútóonína kotonaña. Na̱ káʼvi va̱ʼa xa̱ʼa̱ ña̱yóʼo xíʼin na̱ terapeuta chítáʼannaña xíʼin ki̱ʼva íyo ña̱ cocaína.

Ta̱ Brian,b ta̱ xi̱kutóoní koto ña̱ pornografía nu̱ú Internet, ni̱ka̱ʼa̱nra ña̱yóʼo: “Nda̱a̱ ni iin ña̱ʼa kǒo níkivi keʼíi̱. Saáchi nda̱a̱ tá íyo ta̱ xi̱xaʼmi droga xi̱kui̱. Va̱ása va̱ʼa níxikuni̱, xi̱ki̱siníi̱ ta xi̱kuʼvi̱ní xi̱níi̱. Ku̱a̱ʼání ña̱ʼa ke̱ʼíi̱ ña̱ va̱ʼa sandákoi̱ ña̱yóʼo, soo ku̱a̱ʼání ku̱i̱ya̱ ni̱ya̱ʼa saá va̱ʼa ku̱chiñui̱ xíʼinña”.

Na̱ kútóoní koto ña̱ pornografía, se̱ʼéní kéʼénaña. Kǒo kútóokana kutáʼanna xíʼin inkana ta káʼa̱nna ña̱ vatá, kǒo ndakanda̱ví-iniún ña̱ kúxíkána ta kúkaʼan nu̱úna, ndóʼona ansiedad, ndákava-inina ta nda̱a̱ sáa̱na. Ta savana ndákanixi̱nína ña̱ kúni̱na kaʼnína miína. Ta̱ Sergio, ta̱ xi̱sanúu ña̱ pornografía nu̱ú celular ndiʼi ki̱vi̱, káchira: “Ku̱xíkái̱ nu̱ú ndiʼina ta ni̱ndi̱ʼi̱ní-inii̱. Xi̱ndoʼi̱ nda̱a̱ táki̱ʼva ndóʼo iin na̱ yiví na̱ kǒo kívi keʼé nda̱a̱ ni iin ña̱ʼa á iin na̱ xi̱kuumií ku̱a̱chi ta xi̱kuni mitúʼi̱n. Xi̱kukaʼanní nu̱íi̱ xíʼin ña̱yóʼo ta xi̱yiʼvíi̱ ña̱ ndukúi̱ na̱ chindeétáʼan xíʼi̱n.”

Tá iin sana kuití ná ya̱ʼa nu̱úyó kotoyó ña̱ pornografía kivi saxóʼvi̱ña miíyó. Ñá Judith Reisman, ñá nándukú va̱ʼa xa̱ʼa̱ ña̱ pornografía ni̱ka̱ʼa̱nñá nu̱ú na̱ comité del Senado de Estados Unidos: “Kíndo̱oña xi̱nína ta sáxo̱ʼvi̱ñana. Ta ku̱a̱ʼání tiempo kíndo̱oña ti̱xin ña̱ naní memoria bioquímica [...] ta yo̱ʼvi̱ní xa̱a̱ ña̱yóʼo ndooña xi̱níyó”. Ñá Susan ñá kúúmií 19 ku̱i̱ya̱ ni̱ka̱ʼa̱nña ña̱ sana kuití ka̱na pornografía yóʼo nu̱úñá nu̱ú Internet, tándi̱ʼi ki̱xáʼañá xítoñá ña̱yóʼo, ta ka̱chiñá: “Ña̱ na̱ʼná yóʼo ni̱ndo̱oña xi̱níi̱. Va̱xi miíña xi̱níi̱ ni kǒo kúni̱i̱. Túvii̱ ña̱ va̱ása kivi ndakatai̱ña xi̱níi̱”.

ÑA̱ XA̱A̱ SA̱KÚAʼAYÓ: Ña̱ pornografía tá íyo iin droga saá íyoña, ta sáxo̱ʼvi̱níña na̱ xítoña (2 Pedro 2:19).

¿Ndáaña ndóʼo na̱ veʼe na̱ yiví na̱ xíto ña̱ pornografía?

ÑA̱ KÁʼA̱N NA̱ XÍNI̱VA̱ʼA XA̱ʼA̱ ÑA̱YÓʼO: “Ña̱ pornografía sándiʼi-xa̱ʼa̱ña na̱ ti̱ndaʼa̱ xíʼinna ta saátu na̱ veʼena.” (The Porn Trap [Las trampas del porno], de Wendy y Larry Maltz.)

Ña̱ pornografía saxóʼvi̱ña na̱ ti̱ndaʼa̱ xíʼinna ta saátu na̱ veʼena...

... ña̱ kándíxa táʼanna ndíʼi-xa̱ʼa̱ña xíʼin ña̱ kútóo táʼanna (Proverbios 2:12-17).
... ña̱ keʼéna ña̱ kútóo miína, kúxíkána nu̱ú táʼanna, ta kǒo kútóokana ku̱su̱nna xíʼin yiína á ñá síʼina (Efesios 5:28, 29).
... ña̱ ndákanixi̱nína xa̱ʼa̱ ku̱a̱ʼání ña̱ʼa ña̱ kini ta kúni̱na keʼénaña (2 Pedro 2:14).
... ña̱ íxandúxana xíʼin na̱ ti̱ndaʼa̱ xíʼinna ña̱ ná ku̱su̱nna xíʼinna (Efesios 5:3, 4).
... ña̱ ndakanixi̱nína ña̱ ku̱su̱nna xíʼin inka na̱ yiví na̱ kǒo nítindaʼa̱ xíʼinna (Mateo 5:28).

Biblia káʼa̱nña xa̱ʼa̱ na̱ ti̱ndaʼa̱ ña̱ kǒo xíniñúʼu sandáʼvi-táʼanna (Malaquías 2:16). Ña̱ sándaʼvi-táʼanna sándiʼi-xa̱ʼa̱ña ña̱ ti̱ndaʼa̱na ta xáa̱na táʼví-táʼanna ta ña̱yóʼo sáxo̱ʼvi̱níña se̱ʼena.

[Na̱ʼná]

Ña̱ pornografía sáxo̱ʼvi̱ña nda̱a̱ na̱ va̱lí. Ta̱ Brian káchikara: “Tá xi̱kuumiíi̱ 10 ku̱i̱ya̱ nda̱ni̱ʼíi̱ revista yivái̱ ña̱ va̱xi pornografía nu̱ú tá xi̱sasíkíi̱. Ki̱xáʼíi̱ xíto se̱ʼíi̱ ña̱yóʼo ni kǒo níxi̱kunda̱a̱-inii̱ nda̱chun xi̱kutói̱ kotoi̱ na̱ʼná ña̱ va̱xi nu̱ú ña̱yóʼo. Saá kúú ña̱ ki̱xáʼíi̱ xítoi̱ ña̱ sa̱xóʼvi̱ní yi̱ʼi̱ nda̱a̱ tá xa̱a̱ ku̱chéi̱.” Ku̱a̱ʼání estudio náʼa̱ ña̱ pornografía kivi chindaʼáña na̱ va̱lí ña̱ ku̱su̱nna xíʼin inkana á xíʼin ku̱a̱ʼání na̱ yiví ta kininí kéʼénaña, ni kǒo ku̱i̱ya̱na keʼéna ña̱yóʼo. Ta xa̱ʼa̱ ña̱yóʼo xáa̱na síínní ndákanixi̱nína xíʼin ña̱ kéʼéna.

ÑA̱ XA̱A̱ SA̱KÚAʼAYÓ: Ña̱ pornografía kúúña iin veneno, sándiʼi-xa̱ʼa̱ña ña̱ kúʼvi̱-inina xínitáʼanna ta sáxo̱ʼvi̱níña miína (Proverbios 6:27).

¿Ndáaña káʼa̱n Tu̱ʼun Ndióxi̱ xa̱ʼa̱ ña̱ pornografía?

ÑA̱ KÁʼA̱N BIBLIA: “Sandíʼi-xa̱ʼa̱ndó ndiʼi ña̱ kútóo ku̱ñundó keʼéña tá kúú ña̱ ki̱ʼvindó ku̱a̱chi kini, ña̱ kutóondó keʼéndó ña̱ yaku̱a̱, ña̱ kuni̱níndó ku̱su̱nndó xíʼin inkana, ña̱ ndakanixi̱níndó xa̱ʼa̱ ña̱ va̱ása va̱ʼa, ta saátu ña̱ kutóondó kuumiíndó ku̱a̱ʼání ña̱ʼa, chi ña̱yóʼo nda̱a̱ táki̱ʼva íyo ña̱ ndasakáʼnundó inka ndióxi̱ saá íyoña” (Colosenses 3:5).

Jehovác, kúndasíníra xínira ña̱ pornografía. Soo su̱ví ña̱yóʼo kúni̱ kachiña ña̱ kǒo kúni̱ra ña̱ ku̱su̱n xíʼin táʼan na̱ yiví. Chi saá ke̱ʼérana ña̱ ku̱su̱n xíʼin táʼanna ña̱ tá ná tindaʼa̱na, ta saá kusi̱í-inina ta kuyatin xíʼin táʼanna ta kusi̱í-inina ña̱ koo se̱ʼena (Santiago 1:17).

Tásaá, ¿Nda̱chun káʼa̱nyó ña̱ kúndasí Jehová ña̱ pornografía? Ná kotoyó savaña.

Jehová kúnda̱a̱-inira, ña̱ pornografía kivi sandíʼi-xa̱ʼa̱ña ña̱ táku iin na̱ yiví (Efesios 4:17-19).
Jehová kúʼvi̱-inira xínira miíyó ta kǒo kúni̱ra ña̱ ná xo̱ʼvi̱yó (Isaías 48:17, 18).
Kúni̱ra kundaara na̱ xa̱a̱ ti̱ndaʼa̱ xíʼin na̱ veʼena (Mateo 19:4-6).
Kúni̱ra ña̱ ná kooyó na̱ yiví va̱ʼa ta ná ixato̱ʼóyó inkana (1 Tesalonicenses 4:3-6).
Kúni̱ra ña̱ ná ixato̱ʼóna ña̱ ku̱su̱n xíʼin táʼanna (Hebreos 13:4).
Miíra xíni̱ra ña̱ pornografía kúúña iin ña̱ kininí, na̱ xíto ña̱yóʼo náʼa̱na ña̱ xa̱ʼa̱ mií kuitína ndíʼi̱-inina xa̱ʼa̱, ta kuenta ta̱ Ndi̱va̱ʼa kúúña (Génesis 6:2; Judas 6, 7).

ÑA̱ XA̱A̱ SA̱KÚAʼAYÓ: Ña̱ pornografía sandíʼi-xa̱ʼa̱ña ña̱ va̱ʼa kitáʼan na̱ yiví xíʼin Ndióxi̱ (Romanos 1:24).

Jehová kúndá’vi-inira xínira na̱ kúni sandákoo keʼé ña̱yóʼo. Biblia káchiña: “Jehová iin Ndióxi̱ va̱ʼaní kúúra ta kúndáʼviní-inira xínira na̱ ndóʼo tu̱ndóʼo, va̱ása kama sáa̱ra ta ku̱a̱ʼání ña̱ʼa va̱ʼa kúúmiíra. Saáchi xíni̱ va̱ʼara ndáa ki̱ʼva ku̱va̱ʼayó, ta ndákaʼánra ña̱ xíʼin ñuʼú ku̱va̱ʼayó” (Salmo 103:8, 14). Ndióxi̱ kánara na̱ yiví na̱ vitá ini ná kuyatinna nu̱úra ña̱ va̱ʼa na̱ʼa̱ra ña̱ va̱ʼaní-inira xíʼinna ta kúndáʼvi-inira xínira miína ‘tasaá kúú ña̱ kivi na̱ʼa̱ra ña̱ va̱ʼaní-inira xíʼinna míí tiempo ña̱ xíniñúʼunaña’ (Hebreos 4:16; koto recuadro “Ndáa ki̱ʼva sandákoona kotona ña̱ pornografía”).

Ku̱a̱ʼání na̱ yiví xa̱a̱ táxina ña̱ ná chindeétáʼan Ndióxi̱ xíʼinna. ¿Á xa̱a̱ ku̱chiñuna sa̱ndákoona ke̱ʼéna ña̱yóʼo? Ná kotoyó ña̱ káʼa̱n Biblia xa̱ʼa̱ sava na̱ sandákoo na̱ ke̱ʼé ña̱ va̱ása va̱ʼa: “Sava ndóʼó, [...] xa̱a̱ ndu̱undó na̱ yiví limpio, xa̱a̱ ndu̱undó na̱ yi̱i̱, xa̱ʼa̱ ki̱vi̱ tátayó Jesucristo ta saátu xa̱ʼa̱ espíritu Ndióxi̱ ni̱xa̱a̱ndó ndu̱undó na̱ yiví na̱ nda̱kú-ini” (1 Corintios 6:11). Na̱ yiví yóʼo ndo̱ʼona nda̱a̱ táki̱ʼva káʼa̱n ta̱ apóstol Pablo: “Kúúmiíi̱ ndee̱ ña̱ keʼíi̱ nda̱a̱ ndáaka ña̱ʼa chi íyo ta̱ táxi ndee̱ ndaʼíi̱ ña̱ keʼíi̱ña” (Filipenses 4:13).

Ñá Susan, ñá sa̱ndákoo xi̱xito ña̱ pornografía, káchiñá: “Iinlá Jehová kúú ta̱ kivi chindeé miíyó ña̱ kǒo keʼékayó ña̱ va̱ása va̱ʼa yóʼo. Tá káʼa̱nyó xíʼinra ña̱ chindeéra miíyó, va̱ʼaní kooyó ta saátu va̱ʼaní kitáʼanyó xíʼinra. Ndióxi̱ nda̱a̱ ni iin yichi̱ kǒo sandákoo ndaʼa̱ra miíyó”.

Ndáa ki̱ʼva sandákoona kotona ña̱ pornografía

¿Á xíni̱ún iin na̱ yiví na̱ chíkaa̱ ndee̱ ña̱ sandákoona kotona ña̱ pornografía? Koto ña̱ xa̱a̱ chi̱ndeétáʼan xíʼin sava na̱ yiví.

1. Ka̱ʼa̱n xíʼin Ndióxi̱.

“Iin ña̱ ndáyáʼvi keʼé iin na̱ yiví na̱ kúni̱ sandákoo ña̱ va̱ása kotokana ña̱ pornografía kúú ña̱ ka̱ʼa̱n ndáʼvina xíʼin Jehová ña̱ chindeéra miína.” (Ta̱ Franz.)

Ndióxi̱ táxira espíritu santo ndaʼa̱ na̱ yiví, soo su̱ví kuití ndaʼa̱ na̱ kúni̱ keʼé ña̱ va̱ʼa, chi táxiraña ndaʼa̱na ña̱ va̱ʼa keʼéna ña̱ va̱ʼa (Filipenses 2:13). Espíritu santo chíndeéña miína ña̱ sandákoona ña̱ va̱ása keʼékana ña̱ va̱ása va̱ʼa (Gálatas 5:16, 24).

2. Ka̱ʼa̱n xíʼin inkana ña̱ ná chindeétáʼanna xíʼún.

“Ña̱ xítona pornografia iin ña̱ kaʼan nu̱ú kúúña, xa̱ʼa̱ ña̱kán kúkaʼan nu̱úna ña̱ ka̱ʼa̱nna xíʼin inkana ña̱ chindeétáʼanna xíʼinna; ndákanixi̱nína ña̱ kuchiñu miína sandákoonaña. Soo su̱ví saá íyoña. Ki̱ʼi̱n kuenta ña̱ xíniñúʼu chindeétáʼan inkana xíʼi̱n. Xa̱ʼa̱ ña̱kán i̱xandakú-inii̱ ta na̱túʼi̱n xíʼin ñá síʼi̱ xa̱ʼa̱ ña̱yóʼo. Ta saátu ni̱ka̱ʼi̱n xíʼin iin migoi̱ ña̱ ná chindeétáʼanra xíʼi̱n. Ña̱yóʼo kúú ña̱ i̱xayo̱ʼvi̱ní xíʼi̱n soo chi̱ndeétáʼanvana xíʼi̱n.” (Ta̱ Yoshi.)

Ndakú koo inina ta ka̱ʼa̱nna xa̱ʼa̱ ña̱yóʼo xíʼin inkana. Xa̱ʼa̱ ña̱kán, tá kúni̱na sandákoona ña̱yóʼo ta kixáʼana kitáʼan viína xíʼin na̱ veʼena, xíniñúʼu keʼéna ña̱ ni̱ka̱ʼa̱nyó xa̱ʼa̱ yóʼo. Ñá Susan, ñá xa̱a̱ ni̱ka̱ʼa̱nyó xa̱ʼa̱, káchiñá: “Tá ni̱ka̱ʼi̱n xíʼin iinna xa̱ʼa̱ ña̱ ke̱ʼíi̱ va̱ʼaní ku̱nii̱. Ni i̱xayo̱ʼvi̱níña xíʼi̱n, ta saátu va̱ʼa ni̱xi̱yo ña̱ xínitúni̱” (Santiago 5:16).

3. Ndakuni ndáaña kivi sandákava miíún ta va̱ása keʼúnña.

¿Ndáaña kéʼún á ña̱ ndákanixi̱níún kivi sandákava miíún ta kixáʼún keʼún ña̱ va̱ása va̱ʼa? ¿Á ña̱ kíʼviún nu̱ú internet? ¿Á ña̱ xítoún televisión ñuúní? ¿Á ña̱ káʼviún sava revista? ¿Á ña̱ ku̱ʼún playa? ¿Á kúni̱ún kuxún, ña̱ sa̱ún, ña̱ íyo mitúʼun, á ña̱ kúnaún? Ta̱ Sven káchira: “Koto ndáaña kivi sandákava miíún keʼún, ta kuxíkaún nu̱úña nda̱a̱ táki̱ʼva kúxíkaún nu̱ú iin kue̱ʼe̱ ndeé”. Ta̱ Jesucristo ta̱xira consejo yóʼo: “Ña̱kán tá nduchúnu̱ú kúaʼún sándakavarí yóʼó ndaʼa̱ ku̱a̱chi, tavárí ta sákana xíkárí” (Mateo 5:29).

Ta̱ Franz ni̱ka̱ʼa̱nkara ña̱yóʼo: “Tá kúni̱ kotoi̱ iin ñá ñaʼá, ndi̱ku̱n kama káʼa̱n ndáʼvii̱ xíʼin Jehová ta xítoi̱ inka táʼví”. Ta̱ Job ni̱ka̱ʼa̱nra ña̱yóʼo: “Xa̱a̱ ke̱ʼíi̱ iin trato xíʼin nduchúnu̱úi̱. Ña̱kán, ¿nda̱chun kúú ña̱ kotoi̱ nu̱ú iin ñá loʼo kúa̱an?” (Job 31:1).

4. Ná ndasandakúyó ña̱ kándíxayó Ndióxi̱.

Ta̱ Franz káchira: “Ndakanixi̱níndó xa̱ʼa̱ ña̱ʼa ña̱ va̱ʼa, ta keʼéndó ña̱ kútóo Ndióxi̱”.

Biblia káʼa̱nña ña̱yóʼo: “Ndiʼi ña̱ʼa ña̱ kúú ña̱ nda̱a̱, ndiʼi ña̱ʼa ña̱ ndáyáʼvi, ndiʼi ña̱ʼa ña̱ nda̱kú, ndiʼi ña̱ʼa ña̱ va̱ása yaku̱a̱, ndiʼi ña̱ʼa ña̱ chíkaa̱-iniyó kuʼvi̱-iniyó kunitáʼanyó, ndiʼi ña̱ʼa ña̱ káʼa̱n va̱ʼana xa̱ʼa̱, ndiʼi ña̱ʼa ña̱ va̱ʼa ta saátu ndiʼi ña̱ʼa ña̱ sákusi̱í-ini Ndióxi̱. Ndakundeéndó keʼéndó ndiʼi ña̱ sa̱náʼi̱ ndóʼó ta [...]; Ndióxi̱ ta̱ sándi̱ko-ini na̱ yiví koora xíʼinndó” (Filipenses 4:8, 9).

a Na̱sama ki̱vi̱ na̱ káʼa̱n ña̱yóʼo.

b Tu̱ʼun pornografía káʼa̱nña xa̱ʼa̱ na̱ʼná ña̱ xítona, á ña̱ xíniso̱ʼona, á libro ña̱ káʼvina ña̱ káʼa̱n xa̱ʼa̱ ña̱ kini ña̱ ku̱su̱nna xíʼin na̱ yiví.

c Biblia sanáʼa̱ña ña̱ ki̱vi̱ Ndióxi̱ kúú Jehová.