Ndáa ki̱ʼva viíní kuniñúʼuyó nu̱ú káʼa̱nña “Ndáa ki̱ʼva natúʼunyó xíʼin na̱ yiví”

Táʼví ña̱ naní “Ndáa ki̱ʼva natúʼunyó xíʼin na̱ yiví” ki̱xáʼaña ke̱eña tá enero ña̱ ku̱i̱ya̱ 2018 nu̱ú Tutu nu̱ú va̱xi ña̱ kéʼéyó reunión Ña̱ Kéʼé na̱ Ndásakáʼnu Ndióxi̱. ¿Ndáa ki̱ʼva kuniñúʼuyó ña̱yóʼo?

Ña̱ yáʼana nu̱ú plataforma ña̱ taxina discurso á demostración. Xíniñúʼu viíní kuniñúʼuyó pregunta xíʼin texto, ta saátu ña̱ ndakuiinyó inka yichi̱ ña̱ va̱xi nu̱úña. Soo, va̱ása xíniñúʼu ka̱ʼa̱nyó iin tá iin tu̱ʼun nda̱a̱ táki̱ʼva káʼa̱n na̱ yáʼa nu̱ú video ña̱ sánáʼa̱ miíyó ndáa ki̱ʼva natúʼunyó xíʼin na̱ yiví. Tá nu̱ú video, na̱ publicador xíkana nátúʼunna nu̱ú íyo iin hospital miíún tá ná ya̱ʼún ti̱xin reunión kivi na̱ʼún ña̱ xíkaún nátúʼun iin mercado á inkaka lugar, ta saátu nasamaún ña̱ ka̱ʼún xa̱ʼa̱. Ta inka ña̱ kivi keʼéyó kúú ña̱ taxiyó iin tutu ña̱ kúúmiíyó ndaʼa̱na ni kǒo ña̱ káʼa̱n xíʼinyó ña̱ xíniñúʼu taxiyóña.

Ti̱xin predicación. Ña̱ táʼví yóʼo kivi chindeétáʼanña xíʼinyó tá ku̱a̱ʼa̱nyó predicación. Tá iin na̱ yiví va̱ʼaní xíniso̱ʼona ta kúni̱na kunda̱a̱ka-inina, va̱ʼa ka̱ʼa̱nkayó xíʼinna ta nda̱a̱ kivi kuniñúʼuyó ña̱ va̱xi nu̱ú “Ña̱ ndikóún yichi̱ nu̱ú” ña̱ ka̱ʼa̱nyó xíʼinna. Su̱ví nda̱a̱ táki̱ʼva va̱xiña nu̱úña saáví kooña ka̱ʼa̱nyó, chi kivi nasama loʼoyó ña̱ káʼa̱nyó á kivitu kuniñúʼuyó inkakaña. ¿Á va̱ʼaníka kuniso̱ʼona miíyó tá ná ka̱ʼa̱nyó xíʼinna xa̱ʼa̱ iin tema ña̱ xi̱niñúʼuyó inka yo̱o̱, á tá ná kuniñúʼuyó inka texto? ¿Á íyo iin ña̱ ku̱u nu̱ú íyo na̱ yiví á iin noticia ña̱ ndíʼi̱ní-inina xa̱ʼa̱? Miíyó ndaka̱xin ndáa ki̱ʼva kuniñúʼuyó ña̱ va̱xi nu̱ú káʼa̱nña xíʼinyó “ndáa ki̱ʼva natúʼunyó xíʼin na̱ yiví”, soo viíní ná kuniñúʼuyóña, chi kúni̱yó natúʼunyó xíʼin inkana xa̱ʼa̱ ña̱ káʼa̱n Ndióxi̱ (1Co 9:22, 23).