Ná chindeétáʼanyó xíʼin na̱ yáʼa nu̱ú tu̱ndóʼo

1. ¿Ndáaña kéʼé Jehová ña̱ va̱ʼa ndakuiinra oración ña̱ kéʼé na̱ hermano nu̱úra?

TÁ KÁʼA̱N iin na̱ hermano xíʼin Jehová ña̱ ná chindeétáʼanra xíʼinna, ¿á xa̱a̱ kúnda̱a̱-iniún ña̱ kivi kuniñúʼu Jehová yóʼó ña̱ va̱ʼa chindeétáʼanra xíʼinna? Ni kúúyó na̱ anciano á siervo ministerial, precursor, publicador, na̱ va̱lí, na̱ chée, ta̱a á ñaʼá. Jehová kivi kuniñúʼura miíyó ña̱ va̱ʼa chindeétáʼanra xíʼin inkana. Tá iin na̱ káchíñu nu̱ú Jehová káʼa̱nna xíʼinra ña̱ ná chindeétáʼanra xíʼinna, ta̱yóʼo kivi kuniñúʼura na̱ anciano á inkaka na̱ káchíñu nu̱úra ña̱ va̱ʼa sandíkora-ini na̱yóʼo (Col. 4:11). Kúsi̱íní-iniyó ña̱ ndásakáʼnuyó Jehová ta saátu ña̱ chindeétáʼanyó xíʼin na̱ hermano. Ta kivi chindeétáʼanyó xíʼinna tá íyo iin kue̱ʼe̱ xíkun, tá iin kama kúu iin tu̱ndóʼo á tá íxandi̱va̱ʼa na̱ chíñu xíʼinna.

TÁ ÍYO IIN KUE̱ʼE̱ XÍKUN

2. ¿Nda̱chun kivi ixayo̱ʼvi̱ña xíʼinyó ña̱ chindeétáʼanyó xíʼin na̱ hermano tá íyo kue̱ʼe̱ xíkun?

² Sana íxayo̱ʼvi̱níkaña xíʼinyó chindeétáʼanyó xíʼin na̱ hermano tá ndíkaa̱ iin kue̱ʼe̱ xíkun. Sana kúni̱yó ku̱ʼu̱nyó kotoyóna, soo va̱ása kívi ku̱ʼu̱nyó. Ta sana kúni̱yó kanayó sava na̱ hermano na̱ kǒo ña̱ kuxu ña̱ va̱ʼa kuxuna xíʼinyó, soo ki̱ví keʼéyó ña̱yóʼo. Ta sana kúni̱tuyó chindeétáʼanyó xíʼin inka na̱ hermano, soo na̱ veʼeyó xóʼvi̱tu na̱yóʼova. Soo nisaá ndúkúvayó ki̱ʼva ña̱ chindeétáʼanyó xíʼin na̱ hermanoyó ta Jehová kúsi̱íní-inira tá kéʼéyó ña̱yóʼo (Prov. 3:27; 19:17). Tá saá, ¿ndáaña kivi keʼéyó ña̱ va̱ʼa chindeétáʼanyó xíʼinna?

3. ¿Ndáaña sákuaʼayó xíʼin ña̱ kéʼé na̱ anciano na̱ ñúʼu ti̱xin congregación nu̱ú ndíkaa̱ ñá Desi?

³ Ña̱ kivi keʼé na̱ anciano. Tá iin na̱ anciano na̱ ndíkaa̱ ti̱xin iin congregación kúún, xíniñúʼu kuxini̱ va̱ʼún na̱ hermano (kaʼvi Jeremías 23:4).b Ñá Desi ñá ni̱ka̱ʼa̱nyó xa̱ʼa̱ nu̱ú artículo ña̱ ni̱ya̱ʼa káchiñá: “Na̱ anciano na̱ ñúʼu ti̱xin grupo ña̱ predicación nu̱ú ndíka̱i̱, xi̱chika̱a̱na ndee̱ ña̱ keena predicación xíʼi̱n ta saátu xíʼin inkana na̱ hermano”.c Ta xa̱ʼa̱ ña̱ xi̱keʼé na̱ anciano ña̱yóʼo va̱ása ní ixayo̱ʼvi̱ña xíʼinna ña̱ chindeétáʼanna xíʼin ñá Desi tá ki̱xáʼa ña̱ kue̱ʼe̱ COVID-19, chi sava na̱ veʼeñá ni̱xi̱ʼi̱na xíʼin kue̱ʼe̱ yóʼo.

4. ¿Nda̱chun va̱ʼa chi̱ndeétáʼan na̱ anciano xíʼin ñá Desi, ta ndáaña sákuaʼayó xíʼin ña̱yóʼo?

⁴ Ñá Desi káchiñá: “Xa̱ʼa̱ ña̱ xi̱kuu na̱ anciano migoi̱ va̱ása ní ixayo̱ʼvi̱ña xíʼi̱n ka̱ʼi̱n xíʼinna xa̱ʼa̱ ña̱ xi̱ndoʼi̱ xíʼin xa̱ʼa̱ ña̱ xi̱sandíʼi-inii̱”. ¿Ndáaña sákuaʼa na̱ anciano xíʼin ña̱yóʼo? Kundaandó na̱ hermano ta koondó migona ta kúma̱níka kixaa̱ iin tu̱ndóʼo nu̱úna. Tá íyo iin kue̱ʼe̱ xíkun ta va̱ása kívi ku̱ʼu̱nndó kotondó na̱ hermano veʼena, kivi ndukúndó inka ki̱ʼva ña̱ va̱ʼa ka̱ʼa̱nndó xíʼinna. Ñá Desi káchiñá: “Sava ki̱vi̱, na̱ anciano inkáchi xi̱kanana yi̱ʼi̱ xíʼin teléfono á xi̱chindaʼána mensaje nu̱úi̱. Texto ña̱ xi̱chindaʼána ndaʼíi̱ nda̱a̱ níma̱i̱ xi̱xaa̱ña ni xa̱a̱ xi̱xini̱vai̱ña”.

5. ¿Ndáa ki̱ʼva kivi kunda̱a̱-ini na̱ anciano ndáaña xíniñúʼu na̱ hermano, ta ndáaña kivi keʼéna ña̱ va̱ʼa chindeétáʼanna xíʼinna?

⁵ Iin ña̱ kivi keʼé na̱ anciano ña̱ va̱ʼa kunda̱a̱-inina ndáaña xíniñúʼu na̱ hermano kúú ña̱ viíní nda̱ka̱tu̱ʼunnana (Prov. 20:5). ¿Á íyo ndiʼi ña̱ xíniñúʼuna? Tá kúú, ¿á íyo ña̱ xíxina á ta̱tán ña̱ xíniñúʼuna? ¿Á kindaana veʼena á chiñu ña̱ kúúmiína? ¿Á kivi chindeétáʼanyó xíʼinna ña̱ ndukúna ña̱ xíniñúʼuna nu̱ú na̱ chíñu? Ku̱a̱ʼá na̱ hermano xi̱taxina na̱ xi̱xiniñúʼu ñá Desi. Soo ña̱ va̱ʼaní chi̱ndeétáʼan xíʼinña kúú ña̱ sava na̱ anciano xi̱na̱ʼa̱na ña̱ kúʼvi̱ní-inina xíninañá ta saátu ña̱ xi̱xiniñúʼuna tu̱ʼun Ndióxi̱ ña̱ va̱ʼa chika̱a̱na ndee̱ xíʼinñá. Ñáyóʼo káchiñá: “Na̱ anciano xi̱keʼéna oración xíʼi̱n. Va̱ása ndákaʼíi̱n ndáa tu̱ʼun kúú ña̱ xi̱ka̱ʼa̱nna, soo ndákaʼánvai̱ ndáa ki̱ʼva xi̱kuni̱. Nda̱a̱ táki̱ʼva íyo ña̱ xi̱ka̱ʼa̱n Jehová xíʼi̱n ña̱ va̱ása íyo mitúʼi̱n saá ni̱xi̱yoña” (Is. 41:10, 13).

6. ¿Ndáa ki̱ʼva kivi chindeétáʼanyó xíʼin táʼanyó ti̱xin congregación? (Koto na̱ʼná).

⁶ Ña̱ kivi keʼéna na̱ congregación. Kúnda̱a̱va-iniyó ña̱ siʼna na̱ anciano kúú na̱ chíndeétáʼan xíʼin na̱ hermanoyó. Soo Jehová káʼa̱nra xíʼin ndiʼiyó ña̱ ná chika̱a̱yó ndee̱ xíʼin ndiʼi na̱ hermanoyó ta saátu ná chindeétáʼanyó xíʼinna (Gál. 6:10). Ta ni ña̱ loʼoní kúú ña̱ kéʼéyó xa̱ʼa̱ na̱ ndeéndóʼo, soo kivi chika̱a̱ní ña̱yóʼo ndee̱ xíʼinna. Na̱ va̱lí kivi keʼéna iin tarjeta loʼo á iin dibujo loʼo ña̱ taxina ndaʼa̱ na̱ hermano, ña̱ chika̱a̱na ndee̱ xíʼinna. Tá kúú na̱ ku̱a̱chí kúa̱an kivi ku̱ʼu̱nna satána ña̱ʼa ña̱ xíniñúʼu iin ñá hermana. Inkana kivi ixava̱ʼana ña̱ kuxu iin na̱ ndeéndóʼo ta ku̱ʼu̱nna nda̱kanaña veʼena. Soo ni saá, tá ndeéní ndíkaa̱ iin kue̱ʼe̱ xíkun, ndiʼiyó xíniñúʼu ña̱ chika̱a̱na ndee̱ xíʼinyó. Ña̱kán ndiʼiyó kivi kindo̱oyó tá ndíʼi ña̱ reunión ña̱ va̱ʼa natúʼunyó xíʼin na̱ hermano, kúúña ti̱xin salón á nu̱ú ña̱ videoconferencia. Saátu na̱ anciano xíniñúʼuna ña̱ chika̱a̱na ndee̱ xíʼinna. Sava na̱ hermano káʼyína nu̱ú iin tutu loʼo nu̱ú táxina tíxa̱ʼvi ndaʼa̱ na̱ anciano xa̱ʼa̱ ndiʼi ña̱ kéʼéna, ni sava yichi̱ xa̱ʼa̱ ña̱ ndíkaa̱ kue̱ʼe̱ xíkun yóʼo íyoní chiñu nu̱ú na̱yóʼo. Iin ña̱ va̱ʼaní kúúña tá ndiʼiyó ndákundeéyó ndíku̱nyó consejo yóʼo: “Ndakundeéndó sandíkondó-ini táʼanndó ta ndasandakúndó-ini táʼanndó” (1 Tes. 5:11).

TÁ IIN KAMA KÚU IIN TU̱NDÓʼO

7. ¿Ndáaña kivi kundoʼo iin na̱ yiví tá iin kama kúu iin tu̱ndóʼo?

⁷ Tá kúu iin tu̱ndóʼo, ña̱yóʼo kivi nasamaña ña̱ táku na̱ yiví. Saáchi kivi ndiʼi-xa̱ʼa̱ ña̱ʼa ña̱ kúúmiína, veʼena á kivi kuvi iin na̱ veʼena. Ta na̱ hermanoyó ndóʼona táʼan ña̱yóʼo. ¿Ndáaña kivi keʼéyó ña̱ va̱ʼa chindeétáʼanyó xíʼinna?

8. ¿Ndáaña xíniñúʼu keʼé na̱ anciano tá saátu na̱ íyo se̱ʼe tá kúma̱níka kuu iin tu̱ndóʼo?

⁸ Ña̱ kivi keʼé na̱ anciano. Ndóʼó na̱ anciano chindeétáʼanndó xíʼin na̱ hermano ña̱ ná koo tu̱ʼvana tá kúma̱níka kuu iin tu̱ndóʼo. Sanáʼa̱ndóna ndáaña kivi keʼéna ña̱ va̱ʼa sakǎkuna miína ta ya̱chi̱ka ná natúʼunna xíʼinndó. Ñá Margaret ñá ni̱ka̱ʼa̱nyó xa̱ʼa̱ nu̱ú artículo ña̱ ni̱ya̱ʼa, káchiñá: “Ti̱xin iin discurso ña̱ xíniñúʼu na̱ congregación, na̱ anciano sa̱ndákaʼánna ndi̱ʼi̱ ña̱ tiempo ña̱ xíxi̱ yuku̱ ta̱ʼán ndiʼivíña. Ta tá na̱ chíñu ná ka̱ʼa̱nna xíʼinndi̱ ña̱ xíniñúʼu keendi̱ nu̱ú ndóondi̱ chi i̱yo kuvindi̱, xi̱xiniñúʼu kama keʼéndi̱ ña̱yóʼo”. Discurso yóʼo va̱ʼaní chi̱ndeétáʼanña xíʼin na̱ hermano, saáchi tá ni̱ya̱ʼa u̱ʼu̱n semana ki̱xáʼa ndeéní xíxi̱ yuku̱. Ndóʼó na̱ íyo se̱ʼe, tá káʼvindó xíʼin na̱ veʼendó ka̱ʼa̱nndó xíʼin iin tá iin na̱ se̱ʼendó ndáaña xíniñúʼu keʼéna tá iin kama ná kuu iin tu̱ndóʼo. Tá miíndó xíʼin na̱ va̱lí se̱ʼendó íyo tu̱ʼvandó, va̱ása kundi̱ʼi̱ní-inindó tá ná kuu iin tu̱ndóʼo.

9. ¿Ndáaña xíniñúʼu keʼé na̱ anciano tá kúma̱níka kuu iin tu̱ndóʼo á ta̱ xa̱a̱ ndi̱ʼi ni̱xi̱yoña?

⁹ Tá kúún superintendente grupo ña̱ predicación, va̱ása kundatún nda̱a̱ ná kixi iin tu̱ndóʼo saá ndukún número ndiʼi na̱ hermano na̱ ñúʼu ti̱xin grupoún á ña̱ káʼa̱n xa̱ʼa̱ nu̱ú ndóona. Xíniñúʼu kaʼyíún ña̱yóʼo nu̱ú iin tutu ña̱ va̱ʼa va̱ása ixayo̱ʼvi̱ña xíʼún ña̱ kama kanaún na̱ hermano tá iin kama ná kuu iin tu̱ndóʼo. Kivitu taxiún tutu yóʼo ndaʼa̱ ta̱ coordinador na̱ anciano, ta ta̱kán ka̱ʼa̱nra xíʼin ta̱ superintendente ña̱ circuito. Tá inkáchi ná kachíñundó saá kúú ña̱ vií kana ña̱ kéʼéndó. Tándi̱ʼi ni̱xi̱xi̱ chí nu̱ú ni̱xi̱yo ñá Margaret, ta̱ superintendente ña̱ circuito nu̱ú ndíkaa̱ña, 36 hora va̱ása níki̱si̱ra saáchi chindeétáʼanra xíʼin na̱ anciano ña̱ nandukúna 450 na̱ hermano na̱ ke̱e ti̱xin veʼena xa̱ʼa̱ ña̱ ni̱xi̱xi̱ ta chindeétáʼanna xíʼina (2 Cor. 11:27). Ta xa̱ʼa̱ ña̱ ke̱ʼé na̱ anciano kán ña̱yóʼo, nda̱ni̱ʼína veʼe nu̱ú kundoo na̱ hermano na̱ ke̱e ti̱xin veʼena xa̱ʼa̱ ña̱ ni̱xi̱xi̱.

10. ¿Nda̱chun ndáyáʼviní kundaa na̱ anciano na̱ hermano? (Juan 21:15).

¹⁰ Na̱ anciano xíniñúʼu sandíkona-inina na̱ hermano xíʼin tu̱ʼun Ndióxi̱ (1 Ped. 5:2). Tá iin kama kúu iin tu̱ndóʼo, siʼna xíniñúʼu kotona á íyo va̱ʼa na̱ hermano ta kotona á íyo ña̱ kuxuna, ti̱ko̱to̱ kundixina á nu̱ú kundoona. Na̱ hermano na̱ yáʼa nu̱ú tu̱ndóʼo sana ku̱a̱ʼáva yo̱o̱ xíniñúʼuna ña̱ sandíkoyó-inina xíʼin tu̱ʼun Ndióxi̱ (kaʼvi Juan 21:15). Ta̱ Harold ta̱ kúú Comité ña̱ Sucursal xa̱a̱ káʼa̱nra xíʼin ku̱a̱ʼá na̱ yáʼa nu̱ú tu̱ndóʼo, ta̱yóʼo káchira: “Ku̱a̱ʼáva tiempo yáʼa tasaá va̱ʼa kúni na̱ hermano tá yáʼana nu̱ú iin tu̱ndóʼo. Kiviva ndakaʼánna xa̱ʼa̱ ña̱ ndo̱ʼona. Tá kúú, kivi ndakaʼánna xa̱ʼa̱ iin na̱ veʼena na̱ ni̱xi̱ʼi̱, xa̱ʼa̱ iin ña̱ʼana ña̱ ndáyáʼviní ndi̱ʼi-xa̱ʼa̱ á xa̱ʼa̱ iin ña̱ ndeéní sa̱xóʼvi̱-inina. Ta kusuchíva-inina tá ná ndakaʼánna xa̱ʼa̱ ña̱yóʼo. Ta su̱ví ña̱yóʼo kúni̱ kachiña ña̱ va̱ása kándíxana Ndióxi̱, chi ndiʼivayó kivi ndakaʼányó xa̱ʼa̱ ña̱ ndóʼoyó ta su̱ví iin ku̱a̱chiví kúúña”.

11. ¿Ndáaña sana kuniñúʼu na̱ hermano ku̱a̱ʼá tiempo?

¹¹ Ndáyáʼviní kundiku̱n na̱ anciano consejo yóʼo: “Kuakundó xíʼin na̱ xáku” (Rom. 12:15). Na̱ ni̱ka̱ku ti̱xin iin tu̱ndóʼo xíniñúʼu sandákaʼányóna ña̱ kúʼvi̱ní-ini Jehová xínirana ta saátu na̱ hermano. Na̱ anciano kivi chindeétáʼanna xíʼinna ña̱ ndakundeéna sakúaʼana xa̱ʼa̱ Ndióxi̱, tá kúú ña̱ kéʼéna oración, ña̱ kaʼvina tu̱ʼun Ndióxi̱, ña̱ ku̱ʼu̱nna reunión xíʼin ña̱ keena predicación. Saátu na̱ anciano kivi chika̱a̱na ndee̱ xíʼin na̱ íyo se̱ʼe ña̱ ná ka̱ʼa̱nna xíʼin se̱ʼena ña̱ va̱ása kuchiñu tu̱ndóʼo sandíʼi-xa̱ʼa̱ña ña̱ kítáʼanna xíʼin Jehová. Ta ná ka̱ʼa̱nna xíʼinna ña̱ iníísaá nu̱ú ñuʼú yóʼo íyo na̱ hermano xíʼin ná hermana na̱ chindeétáʼan xíʼin na̱ va̱lí yóʼo (1 Ped. 2:17).

12. ¿Ndáaña kivi keʼé na̱ congregación? (Koto na̱ʼná)

¹² Ña̱ kivi keʼé na̱ congregación. Tá yatin nu̱ú íyoún ná kuu iin tu̱ndóʼo, nda̱ka̱tu̱ʼun na̱ anciano ndáaña kivi keʼún ña̱ va̱ʼa chindeétáʼún xíʼin na̱ hermano. Tá kúú, kivi taxiún veʼe kundoo na̱ hermano na̱ ndo̱ʼo tu̱ndóʼo á na̱ hermano na̱ ki̱xaa̱ chindeétáʼan xíʼin na̱yóʼo. Á saátu kivi kakaún ndaxaxaún ña̱ kuxu na̱ hermano á inkaka ña̱ xíniñúʼuna. Ta ni xíká ku̱u tu̱ndóʼo kiviva chindeétáʼún xíʼin na̱ hermano. ¿Ndáa ki̱ʼva? Tá kúú, kivi ka̱ʼún xa̱ʼa̱na xíʼin Jehová á saátu kivi taxiún loʼo xu̱ʼún ña̱ kuniñúʼuna (2 Cor. 1:8-11; 8:2-5). Ta tá kivi ku̱ʼún nda̱a̱ nu̱ú ku̱u iin tu̱ndóʼo, kivi nda̱ka̱tu̱ʼún na̱ anciano ndáa ki̱ʼva chindeétáʼún xíʼin na̱ hermano. Tá ná ka̱ʼa̱nna xíʼún ña̱ kiviva chindeétáʼún xíʼin na̱ hermano, sana sanáʼa̱na yóʼó ña̱ va̱ʼa viíní chindeétáʼún xíʼinna, ta kivi ka̱ʼa̱nna xíʼún mií kivi chindeétáʼankaún xíʼin na̱ hermano.

TÁ SÁSI NA̱ CHÍÑU NU̱ÚYÓ ÑA̱ KEʼÉYÓ CHIÑU NDIÓXI̱

13. Na̱ hermano na̱ ndóo nu̱ú va̱ása xíín na̱ chíñu taxina keʼéyó chiñu Ndióxi̱, ¿ndáa tu̱ndóʼo kúú ña̱ yáʼana nu̱ú?

¹³ Íxayo̱ʼvi̱níkaña xíʼin na̱ hermano tá sásina nu̱úna ña̱ ndasakáʼnuna Ndióxi̱. Na̱ ndóo nu̱ú kǒo xíínna taxina keʼéyó chiñu nu̱ú Ndióxi̱ xóʼvi̱nína, kǒo xu̱ʼún ndaʼa̱na, kíʼinna kue̱ʼe̱ ta savana xíʼi̱ na̱ veʼena. Ta xa̱ʼa̱ ña̱yóʼo íxayo̱ʼvi̱ña xíʼin na̱ anciano ña̱ ku̱ʼu̱nna kotona na̱ hermano á ka̱ʼa̱nna xíʼinna ña̱ va̱ʼa chika̱a̱na ndee̱ xíʼinna. Ña̱yóʼo kúú ña̱ ndo̱ʼo ta̱ Andréi, ta̱ ni̱ka̱ʼa̱nyó xa̱ʼa̱ nu̱ú artículo ña̱ ni̱ya̱ʼa. Iin ñá hermana ñá xi̱ndikaa̱ ti̱xin grupo ña̱ predicación ña̱ xi̱kiʼinra kuenta xíʼin ni̱ya̱ʼañá nu̱ú ku̱a̱ʼá tu̱ndóʼo, saáchi xi̱kuma̱ní xu̱ʼún ndaʼa̱ñá, ndo̱ʼoñá tu̱ndóʼo tá ku̱a̱ʼa̱nñá xíʼin carro, ku̱a̱ʼá yichi̱ nda̱tánañá ta va̱ása níkivika kachíñuñá. Soo ni xi̱sasi na̱ chíñu nu̱úna ta ni xi̱ndikaa̱ ña̱ pandemia, na̱ hermano ndu̱kúna ki̱ʼva ña̱ chi̱ndeétáʼanna xíʼinñá ta Jehová xi̱niñúʼura na̱ hermano yóʼo ña̱ va̱ʼa chi̱ndeétáʼanra xíʼinñá.

14. ¿Ndáa ki̱ʼva náʼa̱ na̱ anciano ña̱ ndáa-inina Jehová?

¹⁴ Ña̱ kivi keʼé na̱ anciano. Ta̱ Andréi ni̱ka̱ʼa̱nra xíʼin Jehová ta ndu̱kúra ki̱ʼva ña̱ chindeétáʼanra xíʼin ñá hermana kán. ¿Ndáa ki̱ʼva nda̱kuiin Jehová oración ña̱ ke̱ʼéra? Ta̱yóʼo xi̱niñúʼura na̱ hermano na̱ xi̱kuchiñu kee ña̱ va̱ʼa chindeétáʼanna xíʼin ñá hermana kán. Savana xi̱xa̱ʼa̱n xíʼin ñá hermana yóʼo nu̱ú na̱ médico ta savana xi̱taxi xu̱ʼún ndaʼa̱ñá ña̱ kuniñúʼuñá. Jehová chi̱ndeétáʼanra xíʼin na̱ hermano kán ña̱ va̱ʼa chi̱ndeétáʼanna xíʼin ñá hermana kán (Heb. 13:16). Ndóʼó na̱ anciano, tá va̱ása xíín na̱ chíñu taxina keʼéndó chiñu nu̱ú Ndióxi̱ ñuu nu̱ú ndóondó, ka̱ʼa̱nndó xíʼin inkana ná chindeétáʼanna xíʼinndó (Jer. 36:5, 6). Soo kundaa-inindó Jehová ña̱ chindeétáʼanra xíʼinndó. Ta̱kán chindeétáʼanra xíʼinndó ña̱ va̱ʼa chindeétáʼanndó xíʼin na̱ hermano.

15. ¿Ndáaña kivi keʼéyó ña̱ inkáchi kutáʼanyó tá va̱ása xíín na̱ chíñu taxina keʼéyó chiñu nu̱ú Ndióxi̱?

¹⁵ Ña̱ kivi keʼé na̱ congregación. Tá va̱ása xíín na̱ chíñu taxina keʼéyó chiñu nu̱ú Ndióxi̱, sana loʼovayó kivi ndakutáʼan. Ña̱kán ndáyáʼviní vií kutáʼanyó xíʼin na̱ hermanoyó. Chi ta̱ kánitáʼanyó xíʼin kúú ta̱ Ndi̱va̱ʼa ta su̱ví na̱ hermanoyó. Ná koo káʼnu-iniyó xa̱ʼa̱ ña̱ kéʼé na̱ hermano xíʼinyó ta kama ná ndukúyó ki̱ʼva ña̱ ndasaviíyó ku̱a̱chi ña̱ kúúmiíyó xíʼinna (Prov. 19:11; Efes. 4:26). Siʼna miíyó ná ndukú ki̱ʼva ña̱ chindeétáʼanyó xíʼin na̱ hermanoyó (Tito 3:14). Na̱ grupo ña̱ predicación na̱ kíʼin ta̱ Andréi kuenta xíʼin, va̱ʼaní chi̱ndeétáʼanna xíʼin ñá hermana kán, ta ña̱yóʼo va̱ʼaní chindeétáʼanña xíʼin ndiʼika na̱ hermano ña̱ inkáchi viíní kutáʼanna (Sal. 133:1).

16. Nda̱a̱ táki̱ʼva káchi Colosenses 4:3, 18, ¿Ndáaña kivi keʼéyó xa̱ʼa̱ na̱ hermano na̱ ndóo ñuu nu̱ú va̱ása xíín na̱ chíñu taxina ndasakáʼnuna Jehová?

¹⁶ Ku̱a̱ʼání na̱ hermanoyó ndákundeéna ndásakáʼnuna Jehová ni sási na̱ chíñu nu̱úna ña̱ keʼéna ña̱yóʼo. Savana ñúʼuna veʼeka̱a xa̱ʼa̱ ña̱ kándíxana Jehová. Ná ka̱ʼa̱nyó xíʼin Jehová xa̱ʼa̱na ta saátu xa̱ʼa̱ na̱ veʼena. Saátu ná ka̱ʼa̱nyó xa̱ʼa̱ na̱ hermanoyó na̱ chíka̱a̱ní ndee̱ ña̱ chíndeétáʼanna xíʼinna ña̱ va̱ʼa kandíxakana Jehová. Ná ka̱ʼa̱ntuyó xa̱ʼa̱ na̱ ndákiʼin tu̱ʼun na̱ hermanoyó nu̱ú na̱ chíñu (kaʼvi Colosenses 4:3, 18).d Ná va̱ása kaka-iniyó chi oración ña̱ kéʼéyó nu̱ú Jehová kivi chindeétáʼanña xíʼin inka na̱ hermanoyó (2 Tes. 3:1, 2; 1 Tim. 2:1, 2).

17. ¿Ndáaña kivi keʼéyó tiempo vitin ña̱ va̱ʼa koo tu̱ʼvayó tá ná ixandi̱va̱ʼa na̱ chíñu xíʼinyó?

¹⁷ Miíún xíʼin na̱ veʼún, xa̱a̱ kivi ya̱chi̱ka keʼéndó sava ña̱ kivi chindeétáʼan xíʼinndó koo tu̱ʼvandó tá kúma̱níka ixandi̱va̱ʼa na̱ chíñu xíʼinndó (Hech. 14:22). Va̱ása ndakanixi̱níndó xa̱ʼa̱ ña̱ʼa ña̱ kivi kundoʼondó. Va̱ʼaka chika̱a̱ndó ndee̱ ña̱ viíka kutáʼanndó xíʼin Jehová ta chindeétáʼanndó xíʼin se̱ʼe válíndó ña̱ saátu ná keʼé na̱kánva. Tá sava yichi̱ ndíʼi̱ní-inindó, ka̱ʼa̱nndó xíʼin Jehová (Sal. 62:7, 8). Ka̱ʼa̱nndó xíʼin na̱ veʼendó nda̱chun kúú ña̱ kivi kandíxayó Jehová.e Iin ña̱ va̱ʼaní kúú ña̱ chindeétáʼanyó xíʼin se̱ʼe válíyó ña̱ koo tu̱ʼvana tá kúma̱níka kuu iin tu̱ndóʼo, ta saátu ndáyáʼviní chindeétáʼanyó xíʼinna ña̱ koo tu̱ʼvana tá ná ixandi̱va̱ʼa na̱ chíñu xíʼinyó. Ná sanáʼa̱yóna ña̱ kandíxanína Jehová, chi saá kúú ña̱ ndakú koo inina ta va̱ása ndi̱ʼiní-inina.

18. ¿Ndáaña va̱ʼa ndátuyó ndakiʼinyó chí nu̱únínu?

¹⁸ Va̱ʼaní kúniyó tá sándi̱ko Jehová iniyó (Filip. 4:6, 7). Jehová chíndeétáʼanra xíʼinyó ña̱ táxi̱n koo iniyó tá íyo kue̱ʼe̱ xíkun, tá iin kama ndóʼoyó iin tu̱ndóʼo ta saátu tá íxandi̱va̱ʼana xíʼinyó. Xíniñúʼura na̱ anciano ña̱ va̱ʼa kundaara miíyó ta sánáʼa̱ra miíyó ña̱ chindeétáʼanyó xíʼin inkana. Ta xa̱ʼa̱ ña̱ táxi Jehová ña̱ táxi̱n koo iniyó, ña̱yóʼo va̱ʼaní chindeétáʼanña xíʼinyó ña̱ koo tu̱ʼvayó nu̱ú tu̱ndóʼo ña̱ va̱xi nu̱úyó chí nu̱únínu, tá kúú ña̱ gran tribulación (Mat. 24:21). Tá ná kuu ña̱yóʼo ndáyáʼviní táxi̱n koo iniyó ta saátu ña̱ chindeétáʼanyó xíʼin inkana ña̱ táxi̱n koo inina. Soo tá ná ya̱ʼa ña̱ gran tribulación, va̱ása kooka ña̱ʼa ña̱ ndeéní sandíʼi-iniyó tasaá va̱ʼaní kutakuyó nda̱a̱ táki̱ʼva xi̱kuni̱ Jehová tá xa̱ʼa̱: ña̱ táxi̱n koo iniyó (Is. 26:3, 4).