“Ka̱ʼa̱nndó xíʼin na̱ anciano”

1. ¿Ndáa ki̱ʼva náʼa̱ Jehová ña̱ kúni̱níra xínira ndikachi sa̱na̱ra?

JEHOVÁ kúni̱níra xínira ndikachi válí sa̱na̱ra. Nda̱satára na̱yóʼo xíʼin ni̱i̱ ta̱ Jesús ta ta̱xira chiñu ndaʼa̱ na̱ anciano ña̱ congregación ña̱ ná kundaana na̱yóʼo (Hech. 20:28). Ndióxi̱ kúni̱ra ña̱ viíní ná keʼéna xíʼinna, ta na̱ anciano chíkaa̱na ndee̱ xíʼinna ta ndáana miína nu̱ú ña̱ kivi sákuxíka miína nu̱ú Ndióxi̱. Xíniñúʼu kundiku̱nna ña̱ káʼa̱n ta̱ Jesús chi ta̱yóʼo kúú ta̱ níʼi yichi̱ nu̱ú ña̱ congregación (Is. 32:​1, 2).

2. ¿Ndáana ndíʼi̱ka-ini Jehová xa̱ʼa̱? (Ezequiel 34:​15, 16).

² Jehová ndíʼi̱ní-inira xa̱ʼa̱ ndikachi válí sa̱na̱ra soo na̱ ndíʼi̱ka-inira xa̱ʼa̱ kúú na̱ xóʼvi̱. Xíniñúʼura na̱ anciano ña̱ va̱ʼa chindeétáʼanna xíʼin na̱ xóʼvi̱ ta ku̱xíkána nu̱úra (kaʼvi Ezequiel 34:​15, 16).a Tá saá, ¿ndáaña xíniñúʼu keʼéyó tá xíniñúʼuyó ña̱ chindeétáʼanna xíʼinyó? Ndióxi̱ kúni̱ra ña̱ ná ka̱ʼa̱nyó xíʼinra soo saátu kivi ka̱ʼa̱nyó xíʼin na̱ anciano na̱ ñúʼu ti̱xin congregación ña̱ chindeétáʼanna xíʼinyó (Efes. 4:​11, 12).

3. ¿Nda̱chun kivi chindeétáʼan artículo yóʼo xíʼin ndiʼiyó?

³ Nu̱ú artículo yóʼo sakúaʼayó ndáa ki̱ʼva xíniñúʼu Jehová na̱ anciano ña̱ va̱ʼa chindeétáʼanna xíʼinyó. Ta ndakuiinyó pregunta yóʼo: ¿ama kúú ña̱ ka̱ʼa̱nyó xíʼin na̱ anciano ña̱ chindeétáʼanna xíʼinyó?, ¿nda̱chun xíniñúʼu keʼéyóña? ta, ¿ndáa ki̱ʼva chíndeétáʼanna xíʼinyó? Saátu chíndeétáʼan ña̱yóʼo xíʼin na̱ vií kítáʼan xíʼin Jehová chi saá kúú ña̱ chindayáʼvikayó na̱ anciano, chi Ndióxi̱ xíniñúʼura na̱yóʼo ña̱ va̱ʼa chindeétáʼanna xíʼinyó ta saátu sakúaʼayó ndáaña kivi keʼéyó ña̱ va̱ʼa ka̱ʼa̱nyó xíʼin na̱ anciano.

AMA XÍNIÑÚʼU KA̱ʼA̱NYÓ XÍʼIN NA ANCIANO

4. ¿Nda̱chun va̱ʼa kúnda̱a̱-iniyó ña̱ káʼa̱n Santiago 5:​14-16, 19, 20 kǒo káʼa̱nña xa̱ʼa̱ iin na̱ kúúmií kue̱ʼe̱? (Koto na̱ʼná).

⁴ Ta̱ discípulo Santiago ni̱ka̱ʼa̱nra ndáa ki̱ʼva xíniñúʼu Jehová na̱ anciano ña̱ va̱ʼa chindeétáʼanna xíʼinyó ta ña̱yóʼo ka̱ʼyíra: “Tá íyo iin ndóʼó na̱ ndeéndóʼo, ka̱ʼa̱nndó xíʼin na̱ anciano ña̱ congregación” (kaʼvi Santiago 5:​14-16, 19, 20). Nu̱ú versículo yóʼo ta̱ Santiago ni̱ka̱ʼa̱nra xa̱ʼa̱ iin na̱ ku̱xíká nu̱ú Ndióxi̱, ¿ndáa ki̱ʼva kúnda̱a̱-iniyó ña̱yóʼo? Saáchi chí nu̱ú inka versículo káʼa̱nña xa̱ʼa̱ na̱yóʼo. Kǒo níka̱ʼa̱nra tá iin na̱ ndeéndóʼo ná ka̱ʼa̱nna xíʼin na̱ doctor, saáchi ni̱ka̱ʼa̱nra ña̱ ná ka̱ʼa̱nna xíʼin na̱ anciano. Ta saátu ni̱ka̱ʼa̱nra iin na̱ ndeéndóʼo ndúva̱ʼana tá íxakáʼnu-inina xa̱ʼa̱na. Ña̱yóʼo va̱ʼaní kítáʼanña xíʼin iin na̱ ndeéndóʼo xíʼin iin na̱ ku̱xíká nu̱ú Ndióxi̱. Tá kúúmiíyó iin kue̱ʼe̱, xáʼa̱nyó nu̱ú na̱ doctor ta káʼa̱nyó xa̱ʼa̱ ña̱ ndóʼoyó tasaá kéʼéyó ña̱ káʼa̱nna xíʼinyó. Ta ki̱ʼva saá kéʼéyó tá xa̱a̱ ku̱a̱ʼa̱n kúxíkáyó nu̱ú Ndióxi̱, xíniñúʼu natúʼunyó xíʼin na̱ anciano xa̱ʼa̱ ña̱ ndóʼoyó ta kundiku̱nyó consejo ña̱ táxina ndaʼa̱yó ña̱ va̱xi nu̱ú Biblia.

5. ¿Ndáa ki̱ʼva kunda̱a̱-iniyó á vií íyo ña̱ kítáʼanyó xíʼin Ndióxi̱?

⁵ Nu̱ú capítulo 5 ta̱ Santiago káʼa̱nra xíʼinyó ña̱ ná ka̱ʼa̱nyó xíʼin na̱ anciano ña̱ chindeétáʼanna xíʼinyó tá kíʼinyó kuenta ña̱ íyo iin ña̱ kivi sákuxíka miíyó nu̱ú Ndióxi̱. Soo ná kǒo kundatuvíyó nda̱a̱ tá xa̱a̱ ku̱xíkávíyó nu̱ú Ndióxi̱ saáví ka̱ʼa̱nyó xíʼinna, va̱ʼaka kama ná ka̱ʼa̱nyó xíʼinna ña̱ chindeétáʼanna xíʼinyó. Ta ná kiʼinyó kuenta saáchi Biblia káʼa̱nña xíʼinyó ña̱ ná kǒo sandáʼviyó miíyó ña̱ ndakanixi̱níyó ña̱ va̱ʼaníva kítáʼanyó xíʼin Jehová (Sant. 1:22). Ña̱yóʼo kúú ña̱ ndo̱ʼo sava na̱ cristiano na̱ ñuu Sardis, saáchi na̱yóʼo nda̱kanixi̱nína ña̱ va̱ʼaní kítáʼanna xíʼin Ndióxi̱ soo ta̱ Jesús ni̱ka̱ʼa̱nra xíʼinna ña̱ su̱ví saáví íyoña (Apoc. 3:​1, 2). ¿Ndáa ki̱ʼva kunda̱a̱-iniyó á vií íyo ña̱ kítáʼanyó xíʼin Ndióxi̱? Iin ki̱ʼva ña̱ keʼéyóña kúú ña̱ ndakanixi̱níyó á kúsi̱íka-iniyó kéʼéyó chiñu nu̱ú Ndióxi̱ vitin nda̱a̱ táki̱ʼva xi̱keʼéyóña tá nda̱kuchiyó (Apoc. 2:​4, 5). Kivi ndakanixi̱níyó ña̱yóʼo: “¿Á kúsi̱íka-inii̱ káʼvii̱ Biblia ta ndákanixi̱níi̱ xa̱ʼa̱ña nda̱a̱ táki̱ʼva xi̱keʼíi̱ tá ya̱chi̱? ¿Á xáʼi̱n ndiʼi reunión ta xa̱a̱ ya̱chi̱ka káʼvi kúei̱? ¿Á ndáyáʼvi predicación nu̱úi̱ á ña̱ ndáyáʼvika nu̱úi̱ kúú ña̱ keʼíi̱ inka ña̱ʼa ña̱ va̱ʼa kusi̱í-inii̱ ta saátu ña̱ kuumiíi̱ ku̱a̱ʼá ña̱ʼa?”. Ña̱ ndakanixi̱níyó xa̱a̱ ña̱yóʼo chindeétáʼanña xíʼinyó ta kiʼinyó kuenta á íyo iin ña̱ kivi sákuxíka miíyó nu̱ú Ndióxi̱. Tá kǒo kivi nasamayó ña̱ kéʼéyó á xa̱a̱ ke̱ʼéyó iin ña̱ kǒo kútóo Jehová, xíniñúʼu ka̱ʼa̱nyó xíʼin na̱ anciano ña̱ chindeétáʼanna xíʼinyó.

6. ¿Ndáaña xíniñúʼu keʼé iinna tá ni̱ki̱ʼvina iin ku̱a̱chi ndeé?

⁶ Tá iinna xa̱a̱ ni̱ki̱ʼvina iin ku̱a̱chi ndeé á nda̱a̱ kivi tavánana ti̱xin congregación, xíniñúʼu ka̱ʼa̱nna xíʼin na̱ anciano ña̱ chindeétáʼanna xíʼinna (1 Cor. 5:​11-13). Na̱ yiví yóʼo xíniñúʼu chindeétáʼanna xíʼinna ña̱ va̱ʼa kutáʼan viína xíʼin Ndióxi̱. Jehová íxakáʼnu-inira xa̱ʼa̱ na̱ náʼa̱ ña̱ ndixa ndíkó-inina (Hech. 26:20). Ta iin ki̱ʼva ña̱ náʼa̱na ña̱yóʼo kúú ña̱ káʼa̱nna xíʼin na̱ anciano tá ni̱ki̱ʼvina iin ku̱a̱chi ndeé.

7. ¿Ndáana xíniñúʼu chindeétáʼanka na̱ anciano xíʼin?

⁷ Na̱ anciano su̱ví kuití chíndeétáʼanna xíʼin na̱ ni̱ki̱ʼvi iin ku̱a̱chi ndeé chi saátu íyo tu̱ʼvana ña̱ chindeétáʼanna xíʼin iin na̱ ku̱a̱ʼa̱n kúxíká nu̱ú Ndióxi̱ (Hech. 20:35). Ná ndakanixi̱níyó ña̱ kúni̱ún keʼún iin ña̱ va̱ása va̱ʼa ta túviún ña̱ va̱ása kuchiñún ya̱ʼún nu̱ú ña̱yóʼo. Sana túviún ña̱ íxayo̱ʼvi̱ña xíʼún chi sana tá kúma̱níka kunda̱a̱-iniún xa̱ʼa̱ ña̱ nda̱a̱ xi̱xiniñúʼún droga, xi̱xitoún pornografía á ku̱a̱ʼáníka ña̱ kini xi̱keʼún. Ndakaʼán chi va̱ása íyo mitúʼún. Kivi ka̱ʼún xíʼin na̱ anciano na̱ túviún na̱ va̱ʼaní kuniso̱ʼo yóʼó. Va̱ʼaní consejo kivi taxina ndaʼún ta ka̱ʼa̱nna xíʼún ña̱ kiviva sakúsi̱íún-ini Jehová tá chíka̱ún ndee̱ ña̱ kǒo keʼún ña̱ va̱ása va̱ʼa (Ecl. 4:12). Tá sava yichi̱ kúni̱ún keʼún ña̱ va̱ása va̱ʼa ta xa̱ʼa̱ ña̱yóʼo ndákava-iniún, na̱ anciano ka̱ʼa̱nna xíʼún ña̱ va̱ʼaní kúú ña̱ kéʼún chi kǒo kúni̱ún kuxíkáún nu̱ú Jehová ta ndáa-iniúnra (1 Cor. 10:12).

8. ¿Á xíniñúʼuví ka̱ʼún xíʼin na̱ anciano xa̱ʼa̱ iin tá iin ña̱ va̱ása va̱ʼa kéʼún?

⁸ Va̱ása xíniñúʼuví ka̱ʼún xíʼin na̱ anciano xa̱ʼa̱ iin tá iin ña̱ va̱ása va̱ʼa kéʼún. Tá kúú, ná ndakanixi̱níyó ña̱ ni̱ka̱ʼún sava tu̱ʼun ña̱ sa̱xóʼvi̱-ini iin ta̱ hermano ta ndeéní ni̱saún. Nu̱úka ña̱ ka̱ʼún xíʼin na̱ anciano xa̱ʼa̱ ña̱yóʼo, kivi kundiku̱ún consejo ña̱ ni̱ka̱ʼa̱n ta̱ Jesús ña̱ ndasaviíyó ku̱a̱chi xíʼin inkana (Mat. 5:​23, 24). Ta saátu kivi nandukúkaún tutu ña̱ tává na̱ ñuu Ndióxi̱ ña̱ káʼa̱n xa̱ʼa̱ ña̱ kúee koo iniún ta ka̱ʼnu̱-iniún. Soo tá xa̱a̱ ke̱ʼún ña̱yóʼo ta túviún ña̱ kǒo kuchiñún ndasaviíún ku̱a̱chi, kiviva ka̱ʼún xíʼin na̱ anciano ña̱ chindeétáʼanna xíʼún. Nu̱ú carta ña̱ ka̱ʼyí ta̱ Pablo ku̱a̱ʼa̱n ndaʼa̱ na̱ ñuu Filipo, ni̱ka̱ʼa̱nra xíʼin iin ta̱ hermano ta̱ ndíkaa̱ ti̱xin congregación kán ña̱ ná chindeétáʼanra xíʼin ñá Evodia xíʼin ñá Síntique ña̱ ná ndasaviíná ku̱a̱chiná. Ki̱ʼva saá kivi keʼé iin ta̱ anciano ta̱ ndíkaa̱ ti̱xin congregación nu̱ú ndíka̱ún ña̱ chindeétáʼanra xíʼún (Filip. 4:​2, 3).

NDA̱CHUN XÍNIÑÚʼU KA̱ʼA̱NYÓ XÍʼIN NA̱ ANCIANO

9. Ni kúkaʼan nu̱úyó ka̱ʼa̱nyó xíʼin na̱ anciano, ¿nda̱chun xíniñúʼu ka̱ʼa̱nyó xíʼinna? (Proverbios 28:13).

⁹ Tá túviyó ña̱ kǒo kuchiñuvíyó keʼéyó ña̱ va̱ʼa á ni̱ki̱ʼviyó iin ku̱a̱chi ndeé, sana xíniñúʼu ndakú koo iniyó ña̱ va̱ʼa ka̱ʼa̱nyó xíʼin na̱ anciano. Soo ni kúkaʼan nu̱úyó ná kǒo taxiyó ña̱ kasi ña̱yóʼo nu̱úyó ña̱ natúʼunyó xíʼinna. ¿Nda̱chun? Ná ndakaʼányó chi Jehová ta̱xira na̱yóʼo ña̱ chindeétáʼanna xíʼinyó ña̱ ndakú kooyó ta saá kǒo kuxíkáyó nu̱úra. Ña̱kán tá káʼa̱nyó xíʼinna xa̱ʼa̱ ña̱ va̱ása va̱ʼa ke̱ʼéyó, náʼa̱yó ña̱ kándíxayó Ndióxi̱ ta kúni̱yó kuniso̱ʼoyóra. Kúnda̱a̱va-iniyó ña̱ chindeétáʼanva Jehová xíʼinyó (Sal. 94:18). Tá nátúʼunyó xa̱ʼa̱ ku̱a̱chiyó ta kǒo kéʼékayóña, Ndióxi̱ ixakáʼnuva-inira xa̱ʼa̱yó (kaʼvi Proverbios 28:13).b

10. ¿Ndáaña kivi kundoʼoyó tá va̱ása káʼa̱nyó xa̱ʼa̱ ku̱a̱chi ña̱ kíʼviyó?

¹⁰ Nda̱a̱ táki̱ʼva xa̱a̱ ku̱ndaa̱-iniyó tá káʼa̱nyó xíʼin na̱ anciano xa̱ʼa̱ ña̱ va̱ása va̱ʼa ke̱ʼéyó, ku̱a̱ʼání ña̱ va̱ʼa ndákiʼinyó. Soo tá va̱ása nátúʼunyó xa̱ʼa̱ ku̱a̱chi ña̱ kíʼviyó, kivi kuxíkáyó nu̱ú Ndióxi̱. Ná ndakanixi̱níyó xa̱ʼa̱ ta̱ rey David, xa̱ʼa̱ ña̱ va̱ása nínatúʼunra xa̱ʼa̱ ku̱a̱chira ku̱xíkára nu̱ú Ndióxi̱, nda̱kava-inira ta ni̱xo̱ʼvi̱níra (Sal. 32:​3-5). Ña̱ kúxíkáyó nu̱ú Ndióxi̱ íyoña nda̱a̱ táki̱ʼva íyo ña̱ tu̱kue̱ʼe̱yó, tá va̱ása kama káʼa̱nyó xa̱ʼa̱ ña̱yóʼo xóʼvi̱kayó. Jehová kúnda̱a̱-inira xa̱ʼa̱ ña̱yóʼo ña̱kán káʼa̱nra xíʼinyó ña̱ ná ka̱ʼa̱nyó xíʼin na̱ anciano ta ndasaviíyó ku̱a̱chiyó tasaá ndakutáʼan viíyó xíʼin Jehová (Is. 1:​5, 6, 18).

11. ¿Ndáaña kivi kuu tá kǒo káʼa̱nna xa̱a̱ ku̱a̱chi ña̱ kíʼvina?

¹¹ Tá kǒo káʼa̱nyó xa̱ʼa̱ ku̱a̱chi ña̱ kíʼviyó kivi saxóʼvi̱yó inka na̱ yiví. Tá saá ná keʼéyó, Jehová va̱ása taxikara espíritu santora ña̱ chindeétáʼanra xíʼin ña̱ congregación ta nda̱a̱ kivi kuaʼnu ku̱a̱chi ti̱xin ña̱yóʼo (Efes. 4:30). Tá ku̱ndaa̱-iniyó ña̱ iin na̱ ndíkaa̱ ti̱xin congregación ni̱ki̱ʼvina iin ku̱a̱chi ndeé, ná ka̱ʼa̱nyó xíʼinna ña̱ ná ka̱ʼa̱nna xíʼin na̱ anciano.c Chi tá kǒo nátúʼunyó xa̱ʼa̱na nda̱a̱ miíyó kúúmií ku̱a̱chi (Lev. 5:1). Xa̱ʼa̱ ña̱ kúʼvi̱-iniyó xíniyó Jehová ka̱ʼa̱nyó ña̱ nda̱a̱. Tá saá ná keʼéyó, limpio koo ña̱ congregación ta na̱ yiví kán xa̱a̱na vií kutáʼanna xíʼin Ndióxi̱.

NDÁA KI̱ʼVA CHÍNDEÉTÁʼAN NA̱ ANCIANO XÍʼINYÓ

12. ¿Ndáa ki̱ʼva chíndeétáʼan na̱ anciano xíʼin na̱ ku̱a̱ʼa̱n kúxíká nu̱ú Ndióxi̱?

¹² Biblia káʼa̱nña xíʼin na̱ anciano ña̱ ná chindeétáʼanna xíʼin na̱ xa̱a̱ ku̱a̱ʼa̱n kúxíká nu̱ú Ndióxi̱ (1 Tes. 5:14). Tá ni̱ki̱ʼviún ku̱a̱chi nu̱ú Jehová, na̱yóʼo kivi keʼéna pregunta xíʼún ña̱ chindeétáʼan xíʼún ña̱ ka̱ʼún xa̱ʼa̱ ña̱ ndóʼún xíʼin ña̱ ndákanixi̱níún (Prov. 20:5). Kivi ka̱ʼún xíʼin na̱yóʼo xa̱ʼa̱ ña̱ ndóʼún ni íxayo̱ʼvi̱ña xíʼún á ni kúkaʼan nu̱ún xa̱ʼa̱ ña̱ ke̱ʼún. Kǒo kundi̱ʼi-iniún ni íxayo̱ʼvi̱ña xíʼún ka̱ʼún xa̱ʼa̱ ña̱ ke̱ʼún á ndáa ki̱ʼva natúʼún xa̱ʼa̱ ña̱yóʼo (Job 6:3). Na̱ anciano chikaa̱vana ndee̱ ña̱ kuniso̱ʼona ña̱ ka̱ʼún xíʼinna ta saá kunda̱a̱-inina xa̱ʼa̱ ña̱ kéʼún ta taxina consejo ndaʼún (Prov. 18:13). Na̱ anciano kúnda̱a̱-inina ña̱ ku̱a̱ʼáva yichi̱ kivi natúʼunna xíʼin iin na̱ ke̱ʼé ña̱ va̱ása va̱ʼa.

13. ¿Ndáaka ña̱ keʼé na̱ anciano ña̱ va̱ʼa chindeétáʼanna xíʼinyó? (Koto na̱ʼná).

¹³ Na̱ anciano va̱ása ka̱ʼa̱nvína xíʼún tu̱ʼun ña̱ kivi sandákavaka-iniún chi na̱yóʼo keʼéna oración xa̱ʼún. Ña̱yóʼo chika̱a̱níña ndee̱ xíʼún ña̱ va̱ʼa ndakú koo iniún. Ta saátu chindeétáʼan Jehová xíʼún ña̱ “chika̱a̱na aceite” xi̱níún (Sant. 5:​14-16). Aceite yóʼo kúú ña̱ nda̱a̱ ña̱ káʼa̱n tu̱ʼun Ndióxi̱. Ña̱kán viíní kuniñúʼuna Biblia ña̱ sandíkona-iniún ta chindeétáʼanna xíʼún ña̱ vií kutáʼan tukún xíʼin Jehová (Is. 57:18). Ta consejo ña̱ taxina ndaʼún ña̱ va̱xi nu̱ú Biblia taxiña ndee̱ ndaʼún ña̱ va̱ʼa keʼún ña̱ va̱ʼa. Jehová kuniñúʼura na̱yóʼo ña̱ va̱ʼa ka̱ʼa̱nra xíʼún: “Ña̱yóʼo kúú yichi̱. Yichi̱ yóʼo kúú ña̱ ku̱ʼún nu̱ú” (Is. 30:21).

14. Nda̱a̱ táki̱ʼva káchi Gálatas 6:​1, ¿ndáa ki̱ʼva chíndeétáʼan na̱ anciano xíʼin na̱ va̱ása ku̱a̱ʼa̱n “yichi̱ nda̱kú”? (Koto na̱ʼná).

¹⁴ (Kaʼvi Gálatas 6:1). “Tá iinna va̱ása ku̱a̱ʼa̱nna yichi̱ nda̱kú”, kúni̱ kachiña ña̱ va̱ása ndíku̱nna ña̱ káʼa̱n Ndióxi̱ xíʼinna. Ña̱yóʼo kúni̱ kachiña ña̱ va̱ása vií níndaka̱xinna ña̱ keʼéna á ni̱ki̱ʼvina iin ku̱a̱chi ndeé nu̱ú Ndióxi̱. Xa̱ʼa̱ ña̱ kúʼvi̱-ini na̱ anciano xíninana chindeétáʼanna xíʼinna ña̱ ndikó tukuna yichi̱ nda̱kú. Nda̱a̱ táki̱ʼva kéʼé iin ta̱ doctor, viíní ndáchikaa̱ra leke iin na̱ yiví ña̱ va̱ʼa kǒo xo̱ʼvi̱na. Ki̱ʼva saá kéʼé na̱ anciano, viíní káʼa̱nna xíʼin na̱ ni̱ki̱ʼvi iin ku̱a̱chi ndeé ña̱ va̱ʼa kǒo saxóʼvi̱na-inina. Ta Biblia káʼa̱nña xíʼin iin tá iin na̱ anciano tá táxina consejo ndaʼa̱ inkana ná kiʼinnína kuenta xíʼin ña̱ káʼa̱nna saáchi na̱ yiví ku̱a̱chitu kúú na̱yóʼova ta kivi ka̱ʼa̱nna ña̱ va̱ása va̱ʼa. Nu̱úka ña̱ ka̱ʼa̱nna ña̱ va̱ása va̱ʼa xa̱ʼa̱ na̱ hermano yóʼo á ndakanixi̱nína ña̱ ndáyáʼvika miína nu̱úna, na̱ anciano yóʼo chíkaa̱na ndee̱ ña̱ vitá koo inina ta náʼa̱na ña̱ kúndáʼvi-inina xíninana (1 Ped. 3:8).

15. ¿Ndáaña kivi keʼéyó tá kúúmiíyó iin tu̱ndóʼo?

¹⁵ Kivi kundaa-iniyó na̱ anciano na̱ ñúʼu ti̱xin congregación. Na̱yóʼo kúnda̱a̱-inina ña̱ kǒo xíniñúʼu ka̱ʼa̱nna xa̱ʼa̱ ña̱ xíni̱na xa̱ʼa̱. Na̱yóʼo xa̱a̱ sa̱kuaʼana ña̱ xíniñúʼu kuniñúʼuna consejo ña̱ va̱xi nu̱ú Biblia ña̱ va̱ʼa ka̱ʼa̱nna xíʼin na̱ hermano nu̱úka ña̱ ka̱ʼa̱nna ña̱ ndákanixi̱ní miína ta saá va̱ʼa chindeétáʼanna xíʼinyó (Prov. 11:13; Gál. 6:2). Iin tá iin na̱ anciano xa̱a̱ síín íyona ta savana xa̱a̱ ku̱a̱ʼá tiempo kúúna anciano nu̱ú inkana soo tá kúúmiíyó iin tu̱ndóʼo kivi ka̱ʼa̱nyó xíʼin nda̱a̱ ndáaka na̱yóʼo. Soo va̱ása xíniñúʼu ka̱ʼa̱nyó xíʼin iin tá iin na̱ anciano ña̱ ndukúyó consejo nu̱úna nda̱a̱ ná ka̱ʼa̱nna xíʼinyó ña̱ kúni̱yó ná ka̱ʼa̱nna xíʼinyó. Tá ná keʼéyó saá, kooyó nda̱a̱ táki̱ʼva kéʼé sava na̱ yiví na̱ kúni̱ kuití kuniso̱ʼo ña̱ kúni̱na kunda̱a̱-inina xa̱ʼa̱ soo va̱ása kúni̱na kuniso̱ʼona ña̱ sánáʼa̱ Jehová miína nu̱ú tu̱ʼunra (2 Tim. 4:3). Tá káʼa̱nyó xíʼin iin ta̱ anciano xa̱ʼa̱ iin tu̱ndóʼo ña̱ kúúmiíyó sana nda̱ka̱tu̱ʼunra miíyó á xa̱a̱ ni̱ka̱ʼa̱nyó xa̱ʼa̱ ña̱yóʼo xíʼin inka na̱ anciano ta ndáa consejo ta̱xina ndaʼa̱yó. Ta xa̱ʼa̱ ña̱ vitá-inira sana ka̱ʼa̱nra xíʼin inka ta̱ anciano ndáaña ndákanixi̱níra xa̱ʼa̱ ña̱yóʼo (Prov. 13:10).

NDÁAÑA XÍNIÑÚʼU KEʼÉ IIN TÁ IINYÓ

16. ¿Ndáaña xíniñúʼu keʼéyó?

¹⁶ Na̱ anciano ndáana miíyó ta táxina consejo ndaʼa̱yó soo va̱ása káʼa̱nna xíʼinyó ndáaña xíniñúʼu keʼéyó. Iin tá iin miíyó xíniñúʼu na̱ʼa̱yó ña̱ kúni̱yó xíniyó Jehová xíʼin ña̱ kéʼéyó ta saátu xíʼin ña̱ káʼa̱nyó (Rom. 14:12). Miíra chindeétáʼan xíʼinyó ña̱ vií koo ña̱ ndaka̱xinyó keʼéyó xíʼin ña̱ nda̱kú koo iniyó xíʼinra. Ña̱kán na̱ anciano xíniñúʼuna Biblia ña̱ chindeétáʼanna xíʼinyó ña̱ kunda̱a̱-iniyó ndáa ki̱ʼva ndákanixi̱ní Jehová xa̱ʼa̱ iin tá iin ña̱ʼa ta táxina ña̱ ná ndaka̱xin miíyó ndáaña keʼéyó. Ña̱yóʼo chindeétáʼanña xíʼinyó ña̱ vií koo ña̱ ndákanixi̱níyó (Heb. 5:14).

17. ¿Ndáaña keʼéyó tá xa̱a̱ ku̱a̱ʼa̱n kúxíkáyó nu̱ú Ndióxi̱?

¹⁷ Iin ña̱ va̱ʼaní kúú ña̱ kúúyó ndikachi sa̱na̱ Jehová. Ta̱yóʼo chi̱ndaʼára ta̱ Jesús ña̱ va̱ʼa sa̱kǎkura miíyó ta saá kivi kutakuyó ndiʼi tiempo (Juan 10:11). Ta xíniñúʼura na̱ anciano na̱ ñúʼu congregación ña̱ va̱ʼa saxínura tu̱ʼun yóʼo: “Ta taxii̱ na̱ kundaa ndóʼó, ta na̱yóʼo keʼéna ña̱ kúni̱ miíi̱. Ta na̱yóʼo va̱ʼaní sanáʼa̱na ndóʼó ta xa̱a̱ndó ndíchiní koondó, ta nda̱a̱ táki̱ʼva koo ña̱ kuxundó saá koo ña̱yóʼo” (Jer. 3:15). Ña̱kán tá xa̱a̱ kúni̱ndó kuxíkándó nu̱ú Ndióxi̱, va̱ása kaka-inindó ña̱ ka̱ʼa̱nndó xíʼin na̱ anciano ña̱ chindeétáʼanna xíʼinndó. Ná kuniñúʼu viíyó regalo ña̱ ta̱xi Jehová ndaʼa̱yó.