Ku̱a̱ʼání ña̱ va̱ʼa táxi Jehová ndaʼa̱yó tá xáʼa̱nyó Conmemoración

1, 2. ¿Nda̱chun xáʼa̱nyó Conmemoración ndiʼi ku̱i̱ya̱?

XA̱A̱ íyo u̱vi̱ mil ku̱i̱ya̱ ni̱xi̱ʼi̱ ta̱ Jesús xa̱ʼa̱yó ta tíxa̱ʼvi ña̱yóʼo kivi ni̱ʼíyó ña̱ kutakuyó ndiʼi tiempo, ñuú tá kúma̱ní kuvi ta̱ Jesús ke̱ʼéra iin ña̱ʼa ña̱ va̱ʼa ndakaʼányó xa̱ʼa̱ ña̱ kuvira ta xi̱niñúʼura si̱táva̱ʼa xíʼin vino ña̱ va̱ʼa keʼéra ña̱yóʼo. Ni̱ka̱ʼa̱nra xíʼin na̱ discípulora ña̱ ná ndakaʼánna xa̱ʼa̱ ña̱ kuvira (1 Cor. 11:23-26).

² Miíyó na̱ ndásakáʼnu Ndióxi̱ ndíku̱nyó ña̱ ni̱ka̱ʼa̱n ta̱ Jesús saáchi kúʼvi̱ní-iniyó xíniyóra (Juan 14:15). Tá xíyo ña̱ Conmemoración saá náʼa̱yó ña̱ chíndayáʼviníyó ña̱ ke̱ʼéra xa̱ʼa̱yó, tá kúú, táváyó tiempo ña̱ ka̱ʼa̱nyó xíʼin Jehová ta saátu ña̱ ndakanixi̱níyó nda̱chun kúú ña̱ ni̱xi̱ʼi̱ ta̱ Jesús xa̱ʼa̱yó. Saátu táváyó tiempo ña̱ va̱ʼa kanayó ku̱a̱ʼání na̱ yiví ña̱ ku̱ʼu̱nna Conmemoración xíʼinyó, ta va̱ása táxiyó ña̱ kasi nda̱a̱ ni iin ña̱ʼa nu̱úyó ña̱ va̱ʼa ku̱ʼu̱nyó.

3. ¿Ndáaña sakúaʼayó nu̱ú artículo yóʼo?

³ Miíyó na̱ ndásakáʼnu Jehová chíka̱a̱níyó ndee̱ ña̱ ndakaʼányó ña̱ ni̱xi̱ʼi̱ ta̱ Jesús xa̱ʼa̱yó. Nu̱ú artículo yóʼo ka̱ʼa̱nyó xa̱ʼa̱ u̱ni̱ ña̱ʼa: 1) ña̱ keʼéyó ña̱ Conmemoración nda̱a̱ táki̱ʼva ni̱ka̱ʼa̱n ta̱ Jesús xíʼinyó, 2) kánayó inkana ña̱ ná ku̱ʼu̱nna xíʼinyó 3) ni yáʼayó nu̱ú tu̱ndóʼo chíka̱a̱níyó ndee̱ ña̱ ku̱ʼu̱nyó Conmemoración.

ÑA̱ KEʼÉYÓ ÑA̱ CONMEMORACIÓN NDA̱A̱ TÁKI̱ʼVA NI̱KA̱ʼA̱N TA̱ JESÚS

4. a) ¿Ndáaña káʼa̱nna xa̱ʼa̱ ku̱i̱ya̱ tá ku̱i̱ya̱ tá xíyo ña̱ Conmemoración? (Lucas 22:19, 20). b) ¿Nda̱chun ndáyáʼviní kunda̱a̱-iniyó xa̱ʼa̱ ña̱yóʼo?

⁴ Ndiʼi ku̱i̱ya̱ tá xíyo Conmemoración táxina iin discurso nu̱ú káʼa̱nna xa̱ʼa̱ sava pregunta xíʼinyó tasaá ndákanika̱naña nu̱úyó, ta xíniñúʼuna tu̱ʼun Ndióxi̱ ña̱ va̱ʼa taxina ña̱yóʼo. Tá kúú, ¿nda̱chun xi̱niñúʼu kuvi ta̱ Jesús xa̱ʼa̱yó? Ta saátu ¿ndáa ki̱ʼva ndóo ku̱a̱chiyó xa̱ʼa̱ ña̱ ni̱xi̱ʼi̱ra xa̱ʼa̱yó? Ta saátu sándakaʼánña miíyó ndáana xíxi si̱táva̱ʼa ta saátu xíʼina tá vino, ta káʼa̱nna xíʼinyó ndáaña ndána̱ʼa ña̱yóʼo (kaʼvi Lucas 22:19, 20). Tá xa̱a̱ táxina discurso káʼa̱nna ndáaña ndátuyó ndakiʼinyó nu̱ú ñuʼú yóʼo (Is. 35:5, 6; 65:17, 21-23). Ndáyáʼviní kunda̱a̱-iniyó xa̱ʼa̱ ndiʼi ña̱yóʼo saáchi ku̱a̱ʼání na̱ yiví kǒo chíndayáʼvina ña̱ ni̱xi̱ʼi̱ ta̱ Jesús xa̱ʼa̱na ta kǒo ndátakana ña̱ ndasakáʼnuna ki̱vi̱ yóʼo nda̱a̱ táki̱ʼva ni̱ka̱ʼa̱n miíra. Ta, ¿nda̱chun kéʼéna saá?

5. Tá xa̱a̱ ni̱xi̱ʼi̱ ku̱a̱ʼání na̱ apóstol, ¿ndáa ki̱ʼva ki̱xáʼa kéʼé ku̱a̱ʼání na̱ yiví ña̱ ndakaʼánna xa̱ʼa̱ ña̱ ni̱xi̱ʼi̱ ta̱ Jesús?

⁵ Tá xa̱a̱ ni̱xi̱ʼi̱ ku̱a̱ʼání na̱ apóstol ta̱ Jesús, ki̱xáʼa ni̱ki̱ʼvi na̱ yiví na̱ sánáʼa̱ ña̱ vatá ti̱xin congregación (Mat. 13:24-27, 37-39). Xi̱ka̱ʼa̱nna ña̱ va̱ása va̱ʼa, ta sa̱ndáʼvina na̱ discípulo ña̱ kundiku̱nna sa̱tána (Hech. 20:29, 30). Iin ña̱ vatá ña̱ ki̱xáʼa sa̱náʼa̱na kúú; ña̱ su̱ví iinlá yichi̱ níxi̱ʼi̱ ta̱ Jesús xa̱ʼa̱yó, kǒo nísanáʼa̱na nda̱a̱ táki̱ʼva va̱xiña nu̱ú Biblia, saáchi xi̱ka̱ʼa̱nna ña̱ tuku ta tuku xíniñúʼu kuvi ta̱ Jesús xa̱ʼa̱yó (Heb. 9:27, 28). Tiempo vitin ku̱a̱ʼání na̱ yiví na̱ ndixa kúni̱ sakúaʼa xa̱ʼa̱ Ndióxi̱ kándíxana ña̱ vatá ña̱ sánáʼa̱ na̱yóʼo, ta xa̱ʼa̱ ña̱yóʼo xáʼa̱nna ndiʼi semana á ndiʼi ki̱vi̱ veʼe-ñu̱ʼu ña̱ va̱ʼa keʼéna ña̱ káʼa̱nna xíʼin sacrificio de la misab ta saátu íyo religión nu̱ú loʼoní ndákaʼánna xa̱ʼa̱ ña̱ ni̱xi̱ʼi̱ ta̱ Jesús. Soo, ndiʼi na̱ xáʼa̱n veʼe-ñu̱ʼu yóʼo kǒo kúnda̱a̱-inina ndáaña kúni̱ kachiña. Savana kǒo kúnda̱a̱ káxi inina á ndixa ixakáʼnu-ini Ndióxi̱ xa̱ʼa̱na ni ni̱xi̱ʼi̱va ta̱ Jesús xa̱ʼa̱na. Ndákanixi̱nína saá, saáchi ña̱yóʼo kúú ña̱ sa̱náʼa̱na miína ña̱ va̱ása íyo káʼnu-ini Ndióxi̱ xa̱ʼa̱na ni ni̱xi̱ʼi̱ ta̱ Jesús xa̱ʼa̱na, soo na̱ discípulo ta̱ Cristo, ¿ndáaña kéʼéna?

6. ¿Ndáaña ni̱xa̱a̱ iin tiʼvi na̱ xi̱kaʼvi Biblia ku̱nda̱a̱-inina xa̱ʼa̱ tá ku̱i̱ya̱ 1872?

⁶ Tá ku̱i̱ya 1870 iin ti̱ʼvi na̱ xi̱kaʼvi Biblia na̱ xi̱kitáʼan xíʼn ta̱ Charles Russel ki̱xáʼana nándukú va̱ʼakana xa̱ʼa̱ ña̱ káʼa̱n Biblia. Na̱yóʼo xi̱kuni̱na kunda̱a̱ káxi inina á ndáyáʼviní ña̱ ndakaʼányó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó ta keʼéyóña nda̱a̱ táki̱ʼva sa̱náʼa̱ra. Tá ku̱i̱ya̱ 1872 Biblia kúú ña̱ chi̱ndeétáʼan xíʼinna ña̱ ni̱xa̱a̱na ku̱nda̱a̱-inina ña̱ cha̱ʼvi ta̱ Jesús xa̱ʼa̱ ku̱a̱chi ndiʼiyó. Kǒo níchise̱ʼéna ña̱ ku̱nda̱a̱-inina xa̱ʼa̱, ka̱ʼyínaña nu̱ú libro saátu nu̱ú revista xíʼin nu̱ú periódico. Tándi̱ʼi ki̱xáʼana ndákaʼánna xa̱ʼa̱ ña̱ ni̱xi̱ʼi̱ ta̱ Jesús iin yichi̱ nu̱ú ku̱i̱ya̱ nda̱a̱ táki̱ʼva ke̱ʼé na̱ cristiano na̱ xi̱ndoo tá siglo nu̱ú.

7. ¿Ndáa ki̱ʼva chíndeétáʼan ña̱ na̱ndukú na̱ xi̱kaʼvi Biblia xíʼin miíyó tiempo vitin?

⁷ Ña ke̱ʼé na̱ cristiano na̱ xi̱ndoo tá tiempo saá, ¿ndáa ki̱ʼva chíndeétáʼanña xíʼin miíyó tiempo vitin? Jehová chi̱ndeétáʼanra xíʼinna ña̱ ku̱nda̱a̱-inina xíʼin ña̱yóʼo ta tíxa̱ʼvi ña̱yóʼo nda̱a̱ miíyó kúnda̱a̱-iniyó vitin nda̱chun kúú ña̱ ni̱xi̱ʼi̱ ta̱ Jesús xa̱ʼa̱yó ta ndáa ña̱ va̱ʼa ndakiʼinyó chí nu̱únínu xa̱ʼa̱ ña̱yóʼo (1 Juan 2:1, 2). Ta íyo u̱vi̱ ña̱ ndáyáʼviní ni̱xa̱a̱yó ku̱nda̱a̱-iniyó xa̱ʼa̱ nu̱ú Biblia: ña̱ íyo na̱ ku̱ʼu̱n koo chí ndiví ta íyotu na koo nu̱ú ñuʼú yóʼo ndiʼi tiempo. Tá xa̱a̱ ndákanika̱xi̱níyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó ta saátu ña̱ ke̱ʼé Jehová, xáa̱yó kúʼvi̱níka-iniyó xíniyó Jehová (1 Ped. 3:18; 1 Juan 4:9). Ña̱kán nda̱a̱ táki̱ʼva ke̱ʼé na̱ hermano na̱ xi̱ndo̱o tiempo xi̱naʼá, saátu miíyó káʼa̱nyó xíʼin inkana ña̱ ná ndatakana xíʼinyó ña̱ ndakaʼányó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó ta keʼéyóña nda̱a̱ táki̱ʼva ke̱ʼé miíraña.

KÁNAYÓ INKANA ÑA̱ NÁ KU̱ʼU̱NNA XÍʼINYÓ CONMEMORACIÓN

8. ¿Ndáaña xa̱a̱ kéʼé miíyó na̱ ndásakáʼnu Jehová ña̱ va̱ʼa kanayó na̱ yiví ña̱ ku̱ʼu̱nna Conmemoración? (Koto na̱ʼná).

⁸ Xa̱a̱ ku̱a̱ʼání ku̱i̱ya̱ kánayó na̱ yiví ña̱ ná ku̱ʼu̱nna xíʼinyó Conmemoración. Tá ku̱i̱ya̱ 1881 ña̱ revista yóʼo ni̱ka̱ʼa̱nña xíʼin na̱ hermano na̱ Estados Unidos ña̱ ná ndakutáʼanna iin veʼe ña̱ xi̱ndika̱a̱ chí Allegheny (Pensilvania) ña̱ va̱ʼa ndakaʼánna ña̱ ni̱xi̱ʼi̱ ta̱ Jesús xa̱ʼa̱yó. Tá ni̱ya̱ʼa tiempo iin tá iin congregación ki̱xáʼana kéʼéna ña̱ Conmemoración. Yo̱o̱ marzo ña̱ ku̱i̱ya̱ 1940 ni̱ka̱ʼa̱nna xíʼin na̱ publicador ña̱ kivi kanana na̱ yiví ña̱ ná ku̱ʼu̱nna xíʼinna Conmemoración. Ku̱i̱ya̱ 1960 na̱ Betel ki̱xáʼana íxaa imprimina invitación ta chi̱ndaʼanaña ndaʼa̱ na̱ congregación, ña̱yóʼo xi̱kuu yichi̱ nu̱ú ña̱ ki̱xáʼana kéʼéna ña̱yóʼo. Ta nani saá miíyó na̱ testigo Jehová xa̱a̱ ku̱a̱ʼání invitación xáxayó nu̱ú na̱ yiví. ¿Nda̱chun chíka̱a̱níyó ndee̱ ña̱ kéʼéyó chiñu yóʼo?

9, 10. ¿Ndáana kúú inka na̱ ndákiʼin ña̱ va̱ʼa xa̱ʼa̱ ña̱ kánayóna ña̱ ku̱ʼu̱nna Conmemoración? (Juan 3:16).

⁹ Iin xa̱ʼa̱ ña̱ káʼa̱nyó xíʼin na̱ yiví ña̱ ná ku̱ʼu̱nna xíʼinyó Conmemoración kúú, ña̱ kúni̱yó ña̱ ná kunda̱a̱-inina xa̱ʼa̱ ña̱ ke̱ʼé Jehová xíʼin ta̱ Jesús xa̱ʼa̱ ndiʼiyó (kaʼvi Juan 3:16). Kúni̱yó ña̱ ndiʼi ña̱ ná kuniso̱ʼona ñuú saá ná chindeétáʼanña xíʼinna ña̱ kuni̱kana sakúaʼana xa̱ʼa̱ Jehová ta xa̱a̱na ndasakáʼnunara. Soo su̱ví na̱yóʼo kuití kúú na̱ káʼa̱nyó xíʼin ña̱ ná ku̱ʼu̱nna Conmemoración xíʼinyó chi káʼa̱ntuyó xíʼin inkavana.

¹⁰ Ta saátu káʼa̱nyó xíʼin inkana ña̱ ná ku̱ʼu̱nna Conmemoración xíʼinyó, ta na̱yóʼo kúú, na̱ inactivo, kánayóna ña̱ ná ku̱ʼu̱nna Conmemoración xíʼinyó chi ña̱yóʼo chindeétáʼannña xíʼinna ña̱ ndákaʼánna ña̱ kúʼvi̱kava-ini Jehová xínirana. Ta kúsi̱íní-iniyó tá xítoyó ña̱ ku̱a̱ʼání na̱yóʼo xáʼa̱n Conmemoración. Ñuú saá va̱ʼaní chíndeétáʼanña xíʼinna chi ndákaʼánna ña̱ si̱íní ni̱xi̱yona tá xi̱ndasakáʼnuna Jehová. Ná ka̱ʼa̱nyó xa̱ʼa̱ ñá Mónica.c Tá ki̱xáʼa pandemia ña̱ COVID-19 saá ki̱xáʼa tukuñá nátúʼunñá xa̱ʼa̱ Ndióxi̱. Tándi̱ʼi ni̱xa̱ʼa̱nñá Conmemoración ña̱ 2021, ñáyóʼo ka̱chiñá: “Conmemoración yóʼo ndáyáʼviníña nu̱úi̱. Xa̱a̱ 20 ku̱i̱ya̱ ni̱ya̱ʼa ña̱ kǒo níkitai̱ predicación, ta nda̱a̱ vitin ki̱xáʼa tukui̱ nátúʼi̱n xíʼin na̱ yiví ta ni̱ka̱ʼi̱n xíʼinna ña̱ ku̱ʼu̱nna Conmemoración. Xíʼin ndiʼi níma̱i̱ ke̱ʼíi̱ ña̱yóʼo ña̱ va̱ʼa na̱ʼi̱ nu̱ú Jehová xíʼin ta̱ Jesús ña̱ táxiníi̱ tíxa̱ʼvi ndaʼa̱na xa̱ʼa̱ ndiʼi ña̱ ke̱ʼéna xa̱ʼíi̱” (Sal. 103:1-4). Sava na̱ yiví kandíxavana ku̱ʼu̱nna Conmemoración ta inkatuna va̱ása kandíxavína, soo nisaá chíka̱a̱níyó ndee̱ ña̱ kánayó ndiʼina, ta Jehová chíndayáʼviníra ndiʼi ña̱ kéʼéyó.

11. ¿Ndáaña va̱ʼa ndákiʼinyó xa̱ʼa̱ ña̱ chíka̱a̱níyó ndee̱ ña̱ káʼa̱nyó xíʼin inkana ña̱ ku̱ʼu̱nna Conmemoración? (Ageo 2:7).

¹¹ Jehová ku̱a̱ʼání ña̱ va̱ʼa táxira ndaʼa̱yó xa̱ʼa̱ ña̱ chíka̱a̱níyó ndee̱ ña̱ kánayó inka na̱ yiví ña̱ ku̱ʼu̱nna xíʼinyó Conmemoración. Tá kúú ku̱i̱ya̱ 2021, ni kǒo níkivi keeyó veʼe tá veʼe ña̱ natúʼunyó xa̱ʼa̱ Ndióxi̱ xa̱ʼa̱ ña̱ xi̱ndi̱kaa pandemia ña̱ COVID-19, soo ku̱a̱ʼání kúú na̱ nda̱taka xíʼinyó chi yáʼaka̱ 21.367.603 na̱ yiví xi̱kuuna. Na̱yóʼo ku̱a̱ʼáníka xi̱kuuna nu̱úka na̱ testigo Jehová na̱ íyo nu̱ú iníísaá ñuyǐví. Ni ku̱a̱ʼání número kúú na̱yóʼó túviyó, soo su̱ví número yóʼo kúú ña̱ ndáyáʼvika nu̱ú Jehová, chi na̱ ndáyáʼvika nu̱úra kúú na̱ yiví na̱ ni̱xa̱ʼa̱n kán (Luc. 15:7; 1 Tim. 2:3, 4). Jehová xíniñúʼura campaña ña̱ Conmemoración ña̱ va̱ʼa chindeétáʼanra xíʼinyó ña̱ ndani̱ʼíyó na̱ yiví na̱ ndixa kúni̱ sakúaʼa xa̱ʼa̱ra (kaʼvi Ageo 2:7).

NI ÍYO TU̱NDÓʼO NU̱ÚYÓ KÉʼÉVAYÓ CONMEMORACIÓN

12. ¿Ndáaña kivi kasi nu̱úyó ña̱ keʼéyó Conmemoración? (Koto na̱ʼná).

¹² Ta̱ Jesús ni̱ka̱ʼa̱nra ña̱ tiempo so̱ndíʼi ña̱ ndóoyó vitin kooní tu̱ndóʼo, tá kúú, kundiva̱ʼa na̱ veʼeyó xíʼinyó, ixandiva̱ʼa inka na̱ yiví xíʼinyó, koo guerra, koo kue̱ʼe̱ xíkun… (Mat. 10:36; Mar. 13:9; Luc. 21:10, 11). Ña̱yóʼo kivi kasiña nu̱úyó ña̱ keʼéyó Conmemoración. Soo, ¿ndáaña kéʼé na̱ hermanoyó tá yáʼana nu̱ú tu̱ndóʼo yóʼo, ta ndáa ki̱ʼva chíndeétáʼan Jehová xíʼinna?

13. ¿Ndáaña va̱ʼa nda̱kiʼin ta̱ Artiom xa̱ʼa̱ ña̱ ndakúní ni̱xi̱yo inira ta chi̱ka̱a̱níra ndee̱ ña̱ ke̱ʼéra Conmemoración ti̱xin veʼeka̱a?

¹³ Veʼeka̱a. Na̱ hermano na̱ ñúʼu veʼeka̱a xa̱ʼa̱ ña̱ ndásakáʼnuna Jehová chíka̱a̱nína ndee̱ ña̱ ndakaʼánna xa̱ʼa̱ ña̱ ni̱xi̱ʼi̱ ta̱ Jesús. Ná ka̱ʼa̱nyó xa̱ʼa̱ ta̱ Artiom. Tá ni̱xi̱yo Conmemoración ña̱ 2020, xi̱ndika̱a̱ra iin veʼeka̱a ña̱ loʼoní, ta nda̱a̱ u̱ʼu̱n xi̱kuu na̱ yiví na̱ xi̱ñuʼu kán. Ni ni̱ya̱ʼara nu̱ú ndiʼi ña̱yóʼo, chi̱ka̱a̱ra ndee̱ ña̱ ndu̱kúra ña̱ʼa ña̱ kuniñúʼura tá ná koo Conmemoración, ta nda̱kanixi̱níra ña̱ taxira iin discurso ni kǒo na̱ kuniso̱ʼo miíra. Soo ni̱xi̱yo iin tu̱ndóʼo: na̱ xi̱ñuʼu xíʼinra veʼeka̱a kán xi̱xaʼmina ta ndiʼi ki̱vi̱ xi̱ka̱ʼa̱nna tu̱ʼun kini. ¿Ndáaña ke̱ʼe ta̱ Artiom? Ni̱ka̱ʼa̱nra xíʼinna ña̱ ná kǒo kaʼmina iin hora ta saátu ña̱ kǒo ka̱ʼa̱nna tu̱ʼun kini. Nda̱kanda̱ní-inira chi ka̱ndíxavana. Ta̱yóʼo káchira: “Ni̱ka̱ʼi̱n xíʼnna ña̱ kivi ndakanii̱ nu̱úna ndáaña kéʼéyó tá xíyo Conmemoración”. Na̱yóʼo ni̱ka̱ʼa̱nna xíʼinra ña̱ va̱ása kúni̱na kunda̱a̱-inina xa̱ʼa̱ña, soo tándi̱ʼi ke̱ʼéra Conmemoración ku̱yatinna nu̱úra ta ni̱nda̱ka̱tu̱ʼunnara xa̱ʼa̱ ña̱yóʼo.

14. Ni xi̱ndika̱a̱ pandemia ña̱ COVID-19, ¿ndáaña ke̱ʼé na̱ ñuu Jehová ña̱ va̱ʼa keʼéna Conmemoración?

¹⁴ Pandemia ña̱ COVID-19. Xa̱ʼa̱ ña̱ xi̱ndika̱a̱ kue̱ʼe̱ yóʼo, na̱ ñuu Jehová kǒo níkivi ndatakana ña̱ keʼéna Conmemoración. Soo va̱ása nísasi ña̱yóʼo nu̱úna ña̱ keʼénaña.d Na̱ congregación na̱ xi̱kuumií internet va̱ʼa xi̱tona ña̱yóʼo. Soo, ¿ndáaña ke̱ʼétu na̱ hermano na̱ kǒo Internet níxikuumií? Sava na̱yóʼo xi̱niso̱ʼona discurso ti̱xin televisión á radio. Ta saátu sava na̱ sucursal ke̱ʼéna grabación yáʼaka 500 nu̱ú tu̱ʼun ña̱ va̱ʼa ku̱ʼu̱nña ñuu ña̱ íyo xíka tasaá va̱ʼa kuniso̱ʼona discurso ña̱ Conmemoración. Ta ni̱xi̱yo sava na̱ hermano na̱ xi̱xa̱ʼa̱n xi̱taxi grabación yóʼo ndaʼa̱na.

15. ¿Ndáaña sákuaʼayó xíʼin ña̱ ke̱ʼé ñá Sue?

¹⁵ Tá kúndiva̱ʼa na̱ veʼena xíʼinna. Iin tu̱ndóʼo ña̱ ndeéní ña̱ yáʼa sava na̱ hermano nu̱ú kúú, ña tá xíyo Conmemoración na̱ veʼena va̱ása táxina ña̱ keʼéna ña̱yóʼo. Ña̱yóʼo kúú ña̱ ndo̱ʼo iin ñá sa̱kán ki̱xáʼa káʼvi Biblia ña̱ naní Sue. Ku̱i̱ya 2021, tá kúma̱ní iin ki̱vi̱ ña̱ koo Conmemoración, ñá Sue ni̱ka̱ʼa̱nñá xíʼin ñá sánáʼa-ñaʼá ña̱ kǒo kivi kotoñá ña̱yóʼo sáachi na̱ veʼeña va̱ása ndasakáʼnuna Jehová ta kǒo taxina kotoñáña. Ñá sánáʼa̱-ñaʼá ka̱ʼviñá Lucas 22:44 nu̱úñá. Ta ni̱ka̱ʼa̱nñá xíʼinñá ña̱ tá yáʼayó nu̱ú tu̱ndóʼo, ña̱ va̱ʼa keʼéyó kúú, ña kundiku̱nyó yichi̱ ta̱ Jesús ta ka̱ʼa̱nyó xíʼin Jehová ña̱ chindeétáʼanra xíʼinyó. Tá inka ki̱vi̱, ñá Sue xa̱a̱ ni̱xi̱yo ti̱ʼva vino nu̱úña ta saátu i̱xava̱ʼañá si̱táva̱ʼa, ta xi̱tonde̱ʼéñá ña̱ káʼvina tá xi̱ta̱a̱n Betel nu̱ú jw.org. Tá xi̱kuaá ni̱ki̱ʼviñá cuartoñá ta xi̱niso̱ʼoñá Conmemoración xíʼin teléfonoñá. Tá ni̱ya̱ʼa loʼo ka̱ʼyíñá iin carta nu̱ú ña̱ sánáʼa-ñaʼá ta ka̱chiñá: “Ña̱ ni̱ka̱ʼún xíʼi̱n ki̱vi̱ kuni chi̱ndeétáʼanníña xíʼi̱n. Xa̱ʼa̱ ña̱kán chi̱ka̱a̱níi̱ ndee̱ ña̱ koi̱ Conmemoración, ta Jehová chi̱ndeétáʼanra xíʼi̱n. Kúsi̱íní-inii̱ xa̱ʼa̱ ndiʼi ña̱yóʼo”. Tá miíún yáʼún nu̱ú iin tu̱ndóʼo táʼan ña̱yóʼo, ¿á kivi chindeétáʼan Jehová xíʼún?

16. ¿Nda̱chun kúnda̱a̱-iniyó ña̱ ku̱a̱ʼání bendición taxi Jehová ndaʼa̱yó tá chíka̱a̱yó ndee̱ ña̱ ku̱ʼu̱nyó Conmemoración? (Romanos 8:31, 32).

¹⁶ Jehová chíndayáʼviníra ndiʼi ña̱ kéʼéyó ña̱ ndákaʼányó xa̱ʼa̱ ña̱ ni̱xi̱ʼi̱ se̱ʼera. Ni loʼo va̱ása xíka-iniyó ña̱ ku̱a̱ʼání ña̱ va̱ʼa taxi Jehová ndaʼa̱yó xa̱ʼa̱ ña̱ táxiyó tíxa̱ʼvi ndaʼa̱ra xa̱ʼa̱ ndiʼi ña̱ ke̱ʼéra xa̱ʼa̱yó (kaʼvi Romanos 8:31, 32). Ná kǒo taxiyó ña̱ kasi nda̱a̱ ni iin ña̱ʼa nu̱úyó ña̱ ku̱ʼu̱nyó Conmemoración ku̱i̱ya̱ vitin. Ná chi̱ka̱a̱níyó ndee̱ ña̱ keʼéyó ku̱a̱ʼáníka chiñu nu̱ú Jehová tá ná koo Conmemoración.