Iin caja loʼo ña̱ kúúmií ku̱a̱ʼání ña̱ tává na̱ ñuu Ndióxi̱

Tiempo vitin na̱ testigo Jehová kúúmiína ku̱a̱ʼání video ta saátu inkaka ña̱ káʼa̱n xa̱ʼa̱ tu̱ʼun Ndióxi̱ nu̱ú página ña̱ Internet. Soo, ku̱a̱ʼání lugar nu̱ú iníísaá ñuyǐví na̱ hermanoyó va̱ása kívi chaʼvina xa̱ʼa̱ Internet. Ta inkana íyona nu̱ú íxayo̱ʼvi̱ña xíʼinna ña̱ kuumiína Internet á va̱ása íyoña.

Soo vitin ku̱a̱ʼání na̱ hermano kivi ndakiʼinna ña̱ tává na̱ ñuu Ndióxi̱ ni va̱ása kúúmiína Internet. ¿Ndáa ki̱ʼva kéʼéna ña̱yóʼo?

JW Box kúú iin caja loʼo ña̱ chíndaʼána ndaʼa̱ na̱ congregación na̱ íyo nu̱ú va̱ása kivi kuumiína ku̱a̱ʼá Internet. Ña̱yóʼo kúú iin rúter ña̱ sa̱tána ti̱xin iin empresa, ta saátu kúúmiíña iin programa informático ña̱ ke̱ʼé na̱ Departamento ña̱ Computación ña̱ íyo Betel ta saátu va̱xi video, tutu a inkaka ña̱ va̱xi nu̱ú jw.org ti̱xinña. Iin tá iin caja loʼo yóʼo ya̱ʼviña ki̱ʼva 75 dólar.

Ti̱xin Salón ña̱ Reino na̱ hermano xíniñúʼuna JW Box ña̱ va̱ʼa sánuuna ña̱ tává na̱ ñuu Ndióxi̱ nu̱ú celular á tableta. Ni celular ña̱ yatá á ña̱ va̱ása yaʼvi kivi kuniñúʼunaña ña̱ va̱ʼa sánuuna ña̱ va̱xi ti̱xin ña̱ caja loʼo yóʼo, soo tá iin congregación kǒo kúúmiíña Internet, ¿ndáa ki̱ʼva kuumiína ña̱ xa̱á ña̱ kána ti̱xin JW Box? Tá yáʼa loʼo tiempo na̱ sucursal chíndaʼána ndaʼa̱ na̱ congregación memoria USB, ña̱yóʼo ya̱ʼviña ki̱ʼva 4 dólar ta ña̱yóʼo kúúmiíña ña̱ xa̱á ña̱ kána nu̱ú jw.org. Ña̱ memoria USB yóʼo va̱ʼa chíka̱a̱naña ti̱xin JW Box ña̱ va̱ʼa sánuu na̱ hermano ña̱ xa̱á ña̱ kána.

¿Ndáa ki̱ʼva chíndeétáʼan ña̱ JW Box xíʼin na̱ hermanoyó? Ta̱ Nathan Adruandra, ta̱ íyo chí República Democrática del Congo káchira: “Ku̱a̱ʼání yichi̱ xi̱kuni̱ sanúui̱ video ña̱ naní ‘Jehová, yóʼó kúú ta̱ kándíxai̱’ ta saátu ña̱ Ndakaʼánndó xa̱ʼa ñá síʼí ta̱ Lot, soo va̱ása ní kuchiñui̱ keʼíi̱ ña̱yóʼo ta nda̱kava-ini xa̱ʼa̱ña. Soo vitin va̱ʼa sánuui̱ video yóʼo nu̱ú celular ta ña̱yóʼo chíndeétáʼanña xíʼinndi̱ ña̱ viíka sanáʼa̱ndi̱ na̱ va̱lí se̱ʼendi̱”.

Iin ta̱ hermano ta̱ chíndeétáʼan xíʼin na̱ congregación ndáa ki̱ʼva kuniñúʼuna JW Box chí Nigeria káchira: “Na̱ hermano xítona JW Box nda̱a̱ táki̱ʼva íyo iin regalo ña̱ ta̱xi Jehová ndaʼa̱na. Kúsi̱íní-inina saáchi vitin va̱ása íxayo̱ʼvi̱ña xíʼinna ña̱ kuumiína tutu ta saátu video ña̱ xíniñúʼuyó ña̱ va̱ʼa sanáʼa̱yó na̱ yiví”.

Xa̱a̱ chi̱ndaʼána yáʼaka 1,700 JW Box ndaʼa̱ na̱ congregación na̱ íyo chí África, Oceanía xíʼin Sudamérica, ta xa̱a̱ nda̱kanixi̱nína ña̱ chindaʼána ku̱a̱ʼáka caja loʼo yóʼo ndaʼa̱ na̱ congregación. ¿Ndáa mií kána xu̱ʼún ña̱ va̱ʼa keʼéna ña̱yóʼo? Ña̱yóʼo ka̱naña ti̱xin donación ña̱ táxina obra mundial ta ku̱a̱ʼání ña̱yóʼo táxinaña nu̱ú donate.jw.org. Tíxa̱ʼviníndó xa̱ʼa̱ ña̱ táxindó ña̱yóʼo.