Canal ña̱ televisión ña̱ kúúmiíndi̱ ña̱ xíniñúʼu satélite xáa̱ña nda̱a̱ nu̱ú va̱ása íyo Internet

Ndi̱ʼi yo̱o̱ ndátuyó ta kúni̱níyó kotoyó programa xíʼin video ña̱ chíka̱a̱ní ndee̱ xíʼinyó ña̱ kána nu̱ú JW Broadcasting. Soo ku̱a̱ʼání na̱ hermanoyó na̱ íyo chí África va̱ása kívi kotona ña̱yóʼo nu̱ú Internet. ¿Nda̱chun?

Saáchi ku̱a̱ʼá ñuu ña̱ íyo chí África kǒo Internet íyo. Soo sava ñuu nu̱ú íyo Internet yaʼviníña á kúeení káchíñuña. Tá kúú iin yichi̱ iin ta superintendente ña̱ circuito ta íyo chí Madagascar, sa̱núura programa ña̱ JW Broadcasting ña̱ kána yo̱o̱ tá yo̱o̱ ti̱xin iin cibercafé soo xi̱niñúʼu chaʼvira 16 dólar.a Soo ña̱yóʼo ku̱a̱ʼáka kúúña nu̱ú xu̱ʼún ña̱ kíʼin iin na̱ yiví tá ná kachíñuna iin semana.

Ni íxayo̱ʼvi̱ ña̱yóʼo xíʼinna, ku̱a̱ʼání na̱ íyo chí África kivi kotona JW Broadcasting nu̱ú kǒo Internet kúúmiína. ¿Ndáa ki̱ʼva kéʼéna ña̱yóʼo?

Nda̱a̱ tá ku̱i̱ya̱ 2017, na̱ íyo chí África subsahariana kivi kotona JW Broadcasting saáchi ña̱yóʼo sáya̱ʼanaña nu̱ú televisión ña̱ xíniñúʼu señal ña̱ satélite. Ta ña̱yóʼo sáya̱ʼanaña ndiʼi ki̱vi̱ ña̱ semana nu̱ú 16 tu̱ʼun.

Ña̱ va̱ʼa keʼéna ña̱yóʼo na̱ testigo Jehová cháʼvina ndaʼa̱ na̱ kíʼin kuenta xíʼin ña̱ satélite ña̱ va̱ʼa sáya̱ʼanaña nu̱ú ña̱ televisión. Ña̱ señal ña̱ televisión xáa̱ña ki̱ʼva 35 país ña̱ África subsahariana, ta ña̱ va̱ʼa kuniñúʼuna ña̱yóʼo cháʼvina yo̱o̱ tá yo̱o̱ yáʼaka 12,000 dólar. Soo sava yichi̱ ku̱a̱ʼá loʼoka xíniñúʼu chaʼvina ña̱ va̱ʼa kotona programa ña̱ kúú míí ki̱vi̱ saá nu̱ú inka canal. Tíxa̱ʼvi ña̱yóʼo ku̱a̱ʼání na̱ yiví kivi kotona asamblea regional ta saátu programa ña̱ tává na̱ ñuu Ndióxi̱ tá kúú, tá xáʼa̱n iin ta̱ representante ña̱ central mundial xítora sucursal kán.

Ku̱a̱ʼání na̱ kúú testigo ta saátu na̱ va̱ása kúú testigo xítona canal yóʼo nu̱ú televisión ña̱ kúúmiína. Soo sava na̱ hermano va̱ása kúúmiína xu̱ʼún ña̱ va̱ʼa satána ña̱ xíniñúʼu ña̱yóʼo ña̱ va̱ʼa kotonaña. Xa̱ʼa̱ ña̱kán ti̱xin 3,670 Salón ña̱ Reino kúúmiíña equipo ña̱ ndákiʼin señal ña̱ satélite tasaá na̱ hermano kivi kotona JW Broadcasting ti̱xin salón. Tá Salón ña̱ Reino xa̱a̱ kúúmiíña iin televisión á iin proyector ya̱ʼviña ki̱ʼva 70 dólar. Soo tá salón va̱ása kúúmiíña ña̱ equipo yóʼo ya̱ʼviña ki̱ʼva 530 dólar.

Na̱ hermano táxinína tíxa̱ʼvi xa̱ʼa̱ canal yóʼo. Iin ta̱ anciano ta̱ íyo chí Camerún káchira: “Nu̱ú na̱ veʼi̱ xíʼin yi̱ʼi̱ ña̱yóʼo íyoña nda̱a̱ táki̱ʼva íyo maná ña̱ ni̱ko̱yo chí nu̱ú ñuʼú yi̱chí”. Ta̱ Odebode iin ta̱ hermano ta̱ íyo chí Nigeria káchira: “Ndákutáʼi̱n xíʼin na̱ veʼi̱ u̱ni̱ yichi̱ ti̱xin semana ña̱ va̱ʼa kotondi̱ ña̱ canal yóʼo. Na̱ va̱lí se̱ʼi̱ kúni̱nína ña̱ ná xa̱a̱ ki̱vi̱ ña̱ kotondi̱ ña̱ canal yóʼo. Ta sava yichi̱ nda̱a̱ káʼa̱nna xíʼinndi̱ ña̱ ná chika̱a̱ndi̱ ña̱ canal yóʼo kotona”. Ñá Rose, ñá íyo chí Nigeria káʼa̱ntu ñáyóʼo xíʼinyó xa̱ʼa̱ ña̱yóʼo: “Kúsi̱íní-inii̱, tá ya̱chi̱ xi̱kutóoní kotoi̱ canal ña̱ noticia, soo vitin kutóokai̱ kotoi̱ canal ña̱ JW. Tá xi̱xitoi̱ canal ña̱ noticia kamaní xi̱sa̱a̱i̱ xa̱ʼa̱ ña̱kán xi̱ndaa presión miíi̱. Soo ña̱ yáʼa nu̱ú JW chíka̱a̱ña ndee̱ xíʼi̱n ta saátu chíndeétáʼanña xíʼi̱n ña̱ táxi̱n koi̱, kútóoní canal yóʼo iin bendición Jehová kúúña”.

Iin ta̱ superintendente ña̱ circuito ta̱ íyo chí Mozambique káʼa̱nra xíʼinyó ña̱ ti̱xin Salón ña̱ Reino xa̱a̱ kúúmiíña equipo ña̱ va̱ʼa ndakiʼinña señal ña̱ satélite tasaá va̱ʼa kotona canal ña̱ JW. Na̱ hermano ya̱chi̱ka kíxaa̱na Salón ña̱ va̱ʼa kotona JW Broadcasting tá kúma̱níka kixáʼa reunión.

Tá ni̱xi̱yo asamblea internacional ku̱i̱ya̱ 2019 chí Johannesburgo (Sudáfrica), xi̱niñúʼuna canal yóʼo ña̱ va̱ʼa sáya̱ʼana sava discurso nu̱ú inka lugar kán, tá kúú ña̱ ta̱xi na̱ Cuerpo Gobernante. Ta̱ Sphumelele, ta̱ káchíñu ti̱xin Departamento Local ña̱ Broadcasting chí sucursal ña̱ Sudáfrica, káchira: “Tá ya̱chi̱ xi̱ sayáʼandi̱ discurso nu̱ú Internet. Ña̱ va̱ʼa keʼéna ña̱yóʼo xi̱niñúʼu viíní koo ña̱ Internet ta saátu xi̱xiniñúʼu satándi̱ datos. Soo ña̱ sáyáʼandi̱ña xíʼin señal ña̱ satélite va̱ása ku̱a̱ʼá xu̱ʼún xíniñúʼundi̱ ta viíka kana ña̱yóʼo”.

Tíxa̱ʼvindó xa̱ʼa̱ ña̱ va̱ʼaní-inindó xa̱ʼa̱ ña̱ táxindó donación. Na̱ hermano na̱ íyo chí África va̱ʼa xítona JW Broadcasting. Tíxa̱ʼviníndó xa̱ʼa̱ ña̱ donación ña̱ táxindó nu̱ú ku̱a̱ʼá ki̱ʼva ti̱xin obra mundial ña̱ va̱xi nu̱ú donate.jw.org.