Isaías
8 Jehová ni̱ka̱ʼa̱nra xíʼi̱n: “Kiʼin iin tabla tú káni̱ ta xíʼin ña̱ xíniñúʼu ndiʼina tá káʼyina, kaʼyiún ña̱yóʼo nu̱únú: ‘Maher-Salal-Has-Baz’.* 2 Ta kúni̱i̱ ña̱ ná kaʼyi ta̱ su̱tu̱ Urías xíʼin ta̱ Zacarías se̱ʼe ta̱ Jeberekías ña̱ xi̱nina tá ka̱ʼyiún ña̱yóʼo”.
3 Tasaá ni̱ki̱si̱i̱ xíʼin ñá kúú profeta;* ñáyóʼo ni̱ke̱e se̱ʼeñá ta tá ni̱ya̱ʼa yo̱o̱ ka̱ku iin ta̱ loʼo se̱ʼeñá. Ta ni̱ka̱ʼa̱n Jehová xíʼi̱n: “Maher-Salal-Has-Baz ná kunaníra, 4 saáchi tá kúma̱níka sakúaʼa ta̱ loʼo yóʼo ka̱ʼa̱nra ‘apá’ xíʼin ‘amá’, ndakiʼinna ña̱ʼa ña̱ kúúmií na̱ ñuu Damasco xíʼin ña̱ kúúmií na̱ ñuu Samaria ta taxinaña ndaʼa̱ ta̱ rey ñuu Asiria”.
5 Tuku ni̱ka̱ʼa̱n Jehová xíʼi̱n, ta ka̱chira:
6 “Xa̱ʼa̱ ña̱ ku̱ndasí na̱ ñuu yóʼo xi̱nina ti̱kui̱í tá Siloé* tá kúeení ku̱a̱ʼa̱n,
ta kúsi̱í-inina xíʼin ña̱ kéʼé ta̱ Rezín ta̱ saátu ta̱ se̱ʼe ta̱ Remalías,
7 Jehová chindaʼára ta̱ rey ñuu Asiria xíʼin ndiʼi na̱ soldadora
ña̱ kanitáʼanna xíʼin na̱ ñuu yóʼo,
ta koora nda̱a̱ táki̱ʼva íyo yu̱ta Éufrates,
tá kée nu̱ú xínurá ku̱a̱ʼa̱nrá, tá ndeéní xínu, tá kúnúní
8 ta ki̱ʼvira iníí ñuu Judá.
Koora nda̱a̱ táki̱ʼva íyo ti̱kui̱í tá ndákutú ñuu yóʼo,
ndakutúrá ta nda̱a̱ su̱kúnna xa̱a̱rá.
Emmanuel,* nda̱a̱ táki̱ʼva keʼé iin saa tí ndándika ndi̱xi̱n iníí sa̱tá ñuʼún saá keʼéra”.
9 Ndóʼó na̱ ñuu ixandi̱va̱ʼandó xíʼinna, soo koo na̱ sandíʼi-xa̱ʼa̱ ndóʼó.
Kuniso̱ʼo ndiʼi ndóʼó na̱ ndóo xíká.
Ixatu̱ʼvandó miíndó ña̱ ku̱ʼu̱nndó kanitáʼanndó, soo sandíʼi-xa̱ʼa̱na ndóʼó.
Ixatu̱ʼvandó miíndó ña̱ ku̱ʼu̱nndó kanitáʼanndó, soo sandíʼi-xa̱ʼa̱na ndóʼó.
10 Ka̱ʼa̱n-táʼanndó ndáa ki̱ʼva sandíʼi-xa̱ʼa̱ndóna, soo va̱ása kuchiñundó.
Nda̱a̱ ndáaka ña̱ ná ndaka̱xinndó keʼéndó xíʼinna, va̱ása vií kanaña,
saáchi Ndióxi̱ íyora xíʼinndi̱.*
11 Tá ni̱ka̱ʼa̱n Jehová xíʼi̱n, ta̱xira ndee̱ra ndaʼíi̱ ta ni̱ka̱ʼa̱nra xíʼi̱n ña̱ ná va̱ása kundiku̱i̱n yichi̱ na̱ ñuu yóʼo, ka̱chira:
12 “Va̱ása ka̱ʼa̱nndó ña̱ nda̱kutáʼan na̱ ñuu yóʼo ña̱ keʼéna ña̱ va̱ása va̱ʼa xíʼinndó.
Va̱ása yi̱ʼvíndó ña̱ yíʼvi na̱kán;
va̱ása kisindó nu̱ú ña̱yóʼo.
13 Jehová ta̱ xáʼndachíñu nu̱ú na̱ ángel..., ta̱kán kúú ta̱ xíniñúʼu koo Ndióxi̱ ta̱ yi̱i̱ nu̱úndó,
ta̱kán kúú ta̱ xíniñúʼu yi̱ʼvíndó
ta ta̱kán kúú ta̱ xíniñúʼu kisindó nu̱ú”.
14 Táki̱ʼva koo iin lugar ña̱ yi̱i̱ saá koora nu̱úndó,
ta koora nda̱a̱ táki̱ʼva íyo iin yu̱u̱ nu̱ú kanindaandó
ta saátu koora nda̱a̱ táki̱ʼva íyo iin yu̱u̱ nu̱ú kachiʼindó*
saá koora nu̱ú u̱vi̱ saá na̱ rey ña̱ ñuu Israel,
ta̱yóʼo táki̱ʼva koo ta̱ sandákava na̱ ñuu Jerusalén saá koora,
ta tiinrana xíʼin ñunú.*
15 Ku̱a̱ʼání na̱yóʼo kachiʼina, ndakavana ta ndiʼi-xa̱ʼa̱na;
ko̱yona ta tiinrana.
16 Ndativí* ña̱ ka̱ʼyina;
kani sello nu̱ú ley ta taxiña ndaʼa̱ na̱ discípuloi̱.
17 Xíʼin ndinuʼu-inii̱ kundatui̱ Jehová, ta̱ kǒo xíín chindeétáʼan xíʼin na̱ veʼe ta̱ Jacob, ta ta̱yóʼo kúú ta̱ kandíxai̱.
18 Kotondó, miíi̱ xíʼin na̱ se̱ʼi̱ na̱ ta̱xi Jehová ndaʼíi̱, íyondi̱ nda̱a̱ táki̱ʼva íyo iin señal xíʼin milagro nu̱ú na̱ ñuu Israel ña̱ chi̱ndaʼá Jehová ta̱ xáʼndachíñu nu̱ú na̱ ángel, ta̱ íyo chí yuku̱ Sion.
19 Ta tá ná ka̱ʼa̱nna xíʼinndó “Kúáʼanndó nu̱ú na̱ káʼa̱n ña̱ kivi ka̱ʼa̱nna xíʼin na̱ ni̱xi̱ʼi̱, á nu̱ú na̱ ndáku* na̱ káʼa̱n ya̱á”, ¿á su̱ví Ndióxi̱ kúú ta̱ xíniñúʼu nda̱ka̱tu̱ʼunna? ¿Á na̱ ni̱xi̱ʼi̱va kúú na̱ xíniñúʼu ka̱ʼa̱nna xíʼin ña̱ ná chindeétáʼanna xíʼin na̱ táku? 20 Nu̱úka ña̱ keʼéna ña̱yóʼo, xíniñúʼu kotona ña̱ káʼa̱n ley ta saátu ña̱ ka̱ʼyina.
Ta tá káʼa̱nna contra ley yóʼo, nda̱a̱ táki̱ʼva koo na̱ va̱ása xíka nu̱ú túu̱n ñuʼu̱ saá koona. 21 Ta iin tá iin na̱yóʼo xo̱ʼvi̱na* kakana nu̱ú ñuʼú ta kuni̱na kuxuna; ta xa̱ʼa̱ ña̱ kuni̱nína kuxuna sa̱a̱nína, ndakotona chí ndiví ta sakúisochiʼñana* ta̱ rey ta̱ xáʼndachíñu nu̱úna ta saátu Ndióxi̱. 22 Tándi̱ʼi, ndakotona nu̱ú ñuʼú ta kunina ña̱ nina tu̱ndóʼova koo, ña̱ naaní koo, ña̱ yo̱ʼvi̱ní* koo tiempo, koo vi̱kó ndáá ta va̱ása kutuu̱n ñuʼu̱.