Ta̱ José veʼeka̱a ndíka̱a̱ra

XA̱ʼU̱N u̱vi̱ ku̱i̱ya̱ ta̱ José tá ku̱a̱ʼa̱nra xíʼinna chí ñuu Egipto. Ta kán ni̱xi̱kónara nu̱ú iin ta̱a ta̱ naní Potifar. Ta̱ Potifar yóʼo káchíñura nu̱ú ta̱ rey ta̱ naní Faraón, ta̱ ñuu Egipto.

Ndeéní káchíñu ta̱ José nu̱ú ta̱ Potifar. Tá xa̱ʼnu ta̱ José, ta̱ Potifar ndiʼi chiñu veʼera ta̱xira ndaʼa̱ra. Soo, ¿ndachun ndíka̱a̱ ta̱ José veʼeka̱a? Xa̱ʼa ñá síʼí ta̱ Potifar kúúña.

Tá xa̱ʼnuka ta̱ José va̱ʼaní nda̱kuna̱ʼa̱ra, ta ñá síʼí ta̱ Potifar kúni̱ñá ná ku̱su̱nra xíʼinñá. Soo ta̱ José kǒo xíínra chi xíni̱ra su̱ví ña̱ va̱ʼa kúú ña̱yóʼo. Ta ñá síʼí ta̱ Potifar ni̱sa̱a̱níñá. Ña̱kán, tá ki̱xa̱a̱ yiíñá ni̱ka̱ʼa̱nñá tu̱ʼun vatá xíʼinra ta káchiñá: ʼTa̱ José yóʼo kúni̱ra ku̱su̱nra xíʼi̱nʼ. Ta̱ Potifar ka̱ndíxara ña̱ ni̱ka̱ʼa̱n ñá síʼíra xíʼinra, ta ni̱sa̱a̱níra xíʼin ta̱ José. Ta chi̱ka̱a̱rara veʼeka̱a.

Ta̱ kíʼin kuenta xíʼin na̱ ñúʼu veʼeka̱a xi̱nira ña̱ va̱ʼa ta̱a kúú ta̱ José. Tasaá ni̱ka̱ʼa̱nra xíʼinra ña̱ ná kiʼinra kuenta xíʼin na̱ ñúʼu veʼeka̱a. Ni̱ya̱ʼa loʼo tiempo ta̱ Faraón ni̱sa̱a̱ra xíʼin ta̱ táxi vino xíʼira ta saátu xíʼin ta̱ íxava̱ʼa si̱táva̱ʼa ta chi̱ka̱a̱rana veʼeka̱a. Iin ñu̱ú, iin iin na̱yóʼo ni̱xa̱nína iin xa̱ni, ta̱ kǒo xíni̱na ndáaña kúni̱ kachi ña̱yóʼo. Ta inka ki̱vi̱ ta̱ José káchira xíʼinna: “Ka̱ʼa̱nndó xíʼi̱n ndáaña ni̱xa̱níndó”. Ndióxi̱ chi̱ndeé ta̱ José ña̱ va̱ʼa ni̱ka̱ʼa̱nra xíʼinna ndáaña kúni̱ kachi ña̱ ni̱xa̱nína.

Ta̱ José ni̱ka̱ʼa̱nra xíʼin ta̱ xi̱taxi vino xi̱xiʼi ta̱ Faraón, ta̱ káchira: ʼTi̱xin ña̱ u̱ni̱ ki̱vi̱ kitaún veʼeka̱a, ta kachíñu tukún nu̱ú ta̱ Faraónʼ. Ta ni̱ka̱ʼa̱nka ta̱ José ña̱yóʼo xíʼinra: ʼTá ná kitaún ka̱ʼa̱n xíʼin ta̱ Faraón xa̱ʼíi̱, ta chindeún yi̱ʼi̱ ña̱ ná kitai̱ yóʼoʼ. Ta vitin ta̱ José ki̱xaʼára káʼa̱nra xíʼin ta̱ íxava̱ʼa si̱táva̱ʼa: ʼTi̱xin ña̱ u̱ni̱ ki̱vi̱ ta̱ Faraón kaʼndara su̱kúnʼ.

Tá ni̱ya̱ʼa u̱ni̱ ki̱vi̱, ni̱xi̱nu nu̱ú ña̱ ni̱ka̱ʼa̱n ta̱ José. Ta̱ Faraón xa̱ʼndara su̱kún ta̱ íxava̱ʼa si̱táva̱ʼa. Soo ta̱ táxi vino xíʼi ta̱ Faraón ki̱tara veʼeka̱a ta ki̱xaʼá káchíñu tukura nu̱ú ta̱ Faraón. Soo na̱ndosó-inira xa̱ʼa ta̱ José. Kǒo káʼa̱nra xa̱ʼa ta̱ José xíʼin ta̱ Faraón, tasaá ndíka̱a̱ka ta̱ José veʼeka̱a.