Ku̱a̱ʼání ña̱ va̱ʼa ta̱xi Jehová ndaʼa̱ndi̱

Na̱ yivái̱ sa̱ndákoona ñuu Estonia tá xa̱a̱ íyo Segunda Guerra Mundial ta nda̱kiʼinna ku̱a̱ʼa̱nna chí Alemania ta kán ka̱kui̱. Tá ni̱ya̱ʼa tiempo nda̱kiʼinndi̱ ku̱a̱ʼa̱nndi̱ chí Canadá. Veʼe nu̱ú ni̱xa̱a̱ndi̱ ni̱xi̱yondi̱, xi̱kindo̱oña chí ñuu Ottawa. Ta veʼe nu̱ú ni̱xi̱yondi̱ kán, ni̱xi̱yoní nduxú. Ndáʼviní ni̱xi̱yondi̱, soo ni saá ni̱xi̱yova ndi̱ví xi̱xixindi̱.

Iin ki̱vi̱, na̱ testigo Jehová ka̱ʼvina Apocalipsis 21:3, 4 nu̱ú siʼíi̱ ta nda̱a̱ xa̱kuñá xíʼin ña̱yóʼo saáchi va̱ʼaní ku̱ndaa̱-iniñá xíʼinña. Ta tá ni̱ya̱ʼa loʼo tiempo, siʼíi̱ xíʼin yivái̱ nda̱kuchina.

Loʼova xi̱xini̱ na̱ yivái̱ tu̱ʼun inglés, soo ni saá va̱ʼaní sa̱kúaʼana xa̱ʼa̱ Ndióxi̱. Ndiʼi sábado ni xi̱kunaaní yivái̱ ña̱ xi̱kachíñura iníísaá ñuú ti̱xin iin fábrica nu̱ú sándutana ka̱a ña̱ naní níquel chí Sudbury (Ontario), xi̱chika̱a̱níra ndee̱ ña̱ kitara predicación ki̱vi̱ kán xíʼinndi̱, xíʼin ku̱ʼvai̱ ñá loʼoka ñá naní Sylvia. Ta ndiʼi semana xi̱ndakutáʼanndi̱ ña̱ kaʼvindi̱ Tutu Ña̱ Nátúʼun xíʼinyó xíʼin na̱ veʼi̱. Siʼíi̱ xíʼin yivái̱ sa̱náʼa̱na yi̱ʼi̱ ña̱ kuʼvi̱ní-inii̱ kunii̱ Jehová. Ta ña̱yóʼo chi̱ndeétáʼanña xíʼi̱n ña̱ nda̱kuchii̱ tá ku̱i̱ya̱ 1956, tá xi̱kuumiíi̱ 10 ku̱i̱ya̱. Xa̱ʼa̱ ña̱ kúʼvi̱ní-ini na̱ yivái̱ xínina Jehová, ña̱yóʼo va̱ʼaní chi̱ndeétáʼanña xíʼi̱n.

Tándi̱ʼi ka̱ʼvii̱ escuela secundaria i̱xayo̱ʼvi̱níña xíʼi̱n kunda̱a̱-inii̱ ndáaña kúú ña̱ ndáyáʼvika keʼíi̱. Nda̱kanixi̱níi̱ ña̱ tá ná koi̱ precursor va̱ása kuumiíi̱ xu̱ʼún ña̱ ku̱ʼi̱n xíʼin tú avión ña̱ va̱ʼa ku̱ʼu̱n si̱íi̱ inka ñuu. Ta nda̱ni̱ʼíi̱ chiñu ti̱xin iin estación ña̱ radio nu̱ú xi̱chikai̱ yaa ta xi̱kutóoníi̱ keʼíi̱ chiñu yóʼo. Soo xa̱ʼa̱ ña̱ xi̱kachíñui̱ nda̱a̱ xi̱kuaá va̱ása níkivi ku̱ʼi̱n ndiʼi reunión, ta saátu xi̱kitáʼi̱n xíʼin na̱ yiví na̱ va̱ása ndásakáʼnu Jehová. Soo tándi̱ʼi, ña̱ xínitúnii̱ ki̱xáʼaña sándi̱ʼi̱níña-inii̱ xa̱ʼa̱ ña̱kán ki̱xáʼíi̱ na̱samai̱ ña̱ kéʼíi̱.

Nda̱kiʼi̱n ku̱a̱ʼi̱n koi̱ chí Oshawa, Ontario. Ta kán xi̱nii̱ ta̱ Ray Norman xíʼin ku̱ʼvara ñá Lesli xíʼin inkaka na̱ precursor. Ndiʼina ni̱na̱ʼa̱na ña̱ kúʼvi̱ní-inina xínina yi̱ʼi̱. Xi̱nii̱ ña̱ kúsi̱íní-inina káchíñuna nu̱ú Jehová. Ña̱yóʼo chi̱ndeétáʼan xíʼi̱n ña̱ kotoi̱ ndáaña kúú ña̱ xi̱kuni̱i̱ keʼíi̱. Na̱yóʼo chi̱kaa̱nína ndee̱ xíʼi̱n ña̱ xa̱i̱ koi̱ precursor. Ta tá yo̱o̱ septiembre ña̱ ku̱i̱ya̱ 1966 saá ki̱xáʼíi̱ kúi̱ precursor. Xi̱kusi̱íní-inii̱ ña̱ xi̱kachíñui̱ nu̱ú Jehová, soo íyo iin ña̱ ku̱u ta ña̱yóʼo na̱samaña ki̱ʼva ña̱ íyoi̱.

TÁ TÁXI JEHOVÁ CHIÑU NDAʼÚN, CHIKAA̱ NDEE̱ ÑA̱ KEʼÚNÑA

Tá xi̱ndika̱i̱ escuela secundaria sa̱ndákutúi̱ solicitud ña̱ va̱ʼa ku̱ʼi̱n Betel ña̱ ndíkaa̱ chí Toronto (Canadá). Ta tá xa̱a̱ kúi̱ precursor ka̱nana yi̱ʼi̱ ña̱ ku̱ʼi̱n kachíñui̱ Betel ku̱mí ku̱i̱ya̱. Soo xi̱kutóoníi̱ ñá Lesli ta xi̱yiʼvíníi̱ ña̱ va̱ása kivika ndikói̱ kunii̱ñá tá ná ku̱ʼi̱n Betel. Ni̱ka̱ʼa̱nníi̱ xíʼin Jehová xa̱ʼa̱ ña̱yóʼo. Tasaá ni̱nda̱yíi̱ ñá Lesli, ni kúsuchíníva-inii̱ nda̱kaxii̱n ña̱ ku̱ʼi̱n kachíñui̱ Betel.

Tá ni̱xa̱i̱ Betel xi̱kachíñui̱ nu̱ú xi̱ndakatana ti̱ko̱to̱, ta tándi̱ʼi ki̱xáʼíi̱ kúi̱ secretario. Ta ñá Lesli ki̱xáʼañá kúúñá precursora especial chí Gatineau (Quebec). Ku̱a̱ʼání yichi̱ xi̱ndakanixi̱níi̱ xa̱ʼa̱ ndáaña kéʼéñá ta saátu xi̱ndakanixi̱níi̱ á ña̱ va̱ʼa kúú ña̱ nda̱kaxii̱n ke̱ʼíi̱. Saá ku̱u iin ña̱ nda̱kanda̱ní-inii̱ xíʼin, saáchi ka̱nana ta̱ Ray ku̱ʼva ñá Lesli ña̱ kachíñura Betel. Ta inkáchi cuarto xi̱ndoondi̱. Saá ki̱xáʼa tukui̱ nátúʼi̱n xíʼin ñá Lesli, ta 27 tí febrero ña̱ ku̱i̱ya̱ 1971 ti̱ndaʼíi̱ xíʼinñá. Mií ki̱vi̱ kán ki̱tai̱ ti̱xin Betel ta ku̱mí ku̱i̱ya̱ ka̱chíñui̱ kán.

Chi̱ndaʼána ndi̱ʼi̱ ti̱xin iin congregación nu̱ú káʼa̱nna tu̱ʼun francés chí Quebec. Tá ni̱ya̱ʼa loʼo ku̱i̱ya̱ ta̱xina chiñu ndaʼíi̱ ña̱ koi̱ superintendente ña̱ circuito. Tiempo saá sa̱kán 28 ku̱i̱ya̱ xi̱kuumiíi̱, xa̱ʼa̱ ña̱kán xi̱ndakanixi̱níi̱ ña̱ va̱ása kuchiñui̱ keʼíi̱ chiñu kán. Soo ña̱ va̱xi nu̱ú Jeremías 1:7, 8, chi̱kaa̱níña ndee̱ xíʼi̱n. Ñá Lesli ndo̱ʼoñá sava tu̱ndóʼo xíʼin tú carro, xa̱ʼa̱ ña̱kán xi̱ ixayo̱ʼvi̱níña xíʼinñá ku̱su̱nñá. Ña̱kán ni̱ndi̱ʼi̱ní-inii̱ xa̱ʼa̱ñá ndáaña kivi kundoʼoñá tá ná kixáʼíi̱ koi̱ superintendente ña̱ circuito. Ta ñákán ni̱ka̱ʼa̱nñá xíʼi̱n: “Tá Jehová táxi chiñu yóʼo ndaʼa̱yó ná keʼévayóña”. Ta ke̱ʼévandi̱ chiñu yóʼo ta 17 ku̱i̱ya̱ ni̱xi̱yoi̱ superintendente ña̱ circuito.

Ku̱a̱ʼání chiñu xi̱kuumiíi̱ xa̱ʼa̱ ña̱kán ni kǒo tiempo níxi̱yo nu̱úi̱ ña̱ natúʼi̱n xíʼin ñá Lesli. Ta sa̱kúaʼi̱ iin ña̱ ndáyáʼviní xíʼin ña̱yóʼo. Iin lunes xi̱ta̱a̱n ka̱ni-ndaʼa̱na yéʼíi̱, soo tá xu̱nái̱ kǒo nda̱a̱ ni iin na̱ yiví. Saáchi ña̱ xi̱nii̱ kúú iin canasta ta ti̱xin canasta kán ñúʼu ku̱i̱ʼi, queso, si̱ta̱váʼa, u̱vi̱ copa xíʼin iin botella tá vino. Ta saátu xi̱ndikaa̱ iin tutu ña̱ xi̱ka̱ʼa̱n: “Kúáʼan si̱í xíʼin ñá síʼún ta kuxundó ña̱yóʼo”. Liviní ni̱xi̱yo ki̱vi̱ kán, soo ku̱a̱ʼání chiñu ni̱xi̱yo nu̱úi̱ saáchi xi̱niñúʼu tavái̱ sava discurso. Ta ni̱ka̱ʼi̱n xíʼin ñá Lesli ña̱ va̱ása kivi ku̱ʼu̱n si̱índi̱, ñá Lesli ka̱ndíxavañá ña̱ ni̱ka̱ʼi̱n xíʼinñá, soo tándi̱ʼi ku̱suchíva-iniñá. Tá ki̱xáʼíi̱ távái̱ discurso ña̱ xínitúnii̱ ki̱xáʼaña sándi̱ʼi̱níña-inii̱. Tasaá nda̱kaʼíi̱n ña̱ káʼa̱n Efesios 5:25 xíʼin 28. Ta nda̱kanixi̱níi̱, ¿á mií Jehová ki̱xáʼa sándakaʼán yi̱ʼi̱ ña̱ xíniñúʼu kiʼi̱n kuenta xíʼin ña̱ ndóʼo ñá síʼíi̱? Ke̱ʼíi̱ iin oración, tándi̱ʼi ni̱ka̱ʼi̱n xíʼin ñá Lesli: “Ná ku̱ʼu̱nyó”. Ta ñáyóʼo ndeéní ku̱si̱í-iniñá, tasaá ni̱xa̱ʼa̱nndi̱ iin lugar ña̱ liviní nu̱ú ndíkaa̱ yu̱ta. Ta kán chi̱ndúʼundi̱ iin mantel ta nu̱úña kán xi̱ndoondi̱ xi̱xindi̱. Livikaví ni̱xi̱yo ki̱vi̱ kán nu̱úndi̱ ta ni̱xi̱yokava tiempo nu̱úi̱ ña̱ sandíʼi̱ discursoi̱.

Ku̱a̱ʼání circuito ni̱xa̱ʼa̱nndi̱ xi̱tondi̱ chí Columbia Británica iin saá nda̱a̱ Terranova, ta xi̱kusi̱íní-ini na̱ hermano tá xi̱xa̱ʼa̱nndi̱ xi̱xitondi̱na ta saátu miíndi̱. Ña̱ xi̱kunii̱ keʼíi̱ tá ni̱xi̱yo loʼi̱ ki̱xáʼíi̱ kéʼíi̱ña vitin. Ni̱xi̱yo iin tiempo ña̱ xi̱kunii̱ ku̱ʼi̱n escuela ña̱ Galaad, soo va̱ása níxikunii̱ koi̱ misionero ta ku̱ʼi̱n inka país, saáchi xi̱ndakanixi̱níi̱ ña̱ iin chiñu ña̱ ndáyáʼviní kúú ña̱ xi̱keʼé na̱ misionero, ña̱kán nda̱kanixi̱níi̱ ña̱ va̱ása kuchiñui̱ keʼíi̱ chiñu kán. Ta saátu xi̱yiʼvíníi̱ ña̱ chindaʼána yi̱ʼi̱ ña̱ ku̱ʼi̱n chí África, chi ñuu ña̱ íyo kán íyoní kue̱ʼe̱ xíʼin guerra. Saáchi xi̱kusi̱íníva-inii̱ ña̱ ni̱xi̱yoi̱ chí Canadá.

KA̱NANA NDI̱ʼI̱ ÑA̱ KU̱ʼU̱NNDI̱ CHÍ ESTONIA XÍʼIN INKAKA PAÍS BÁLTICO

Tá ku̱i̱ya̱ 1992 na̱ chíñu ta̱xina ña̱ natúʼun na̱ hermano xa̱ʼa̱ Ndióxi̱ xíʼin na̱ yiví sava ñuu ña̱ ni̱xi̱yo chí Unión Soviética. Tasaá ni̱ka̱ʼa̱nna xíʼinndi̱ á kúni̱ndi̱ ku̱ʼu̱nndi̱ ñuu Estonia ña̱ koondi̱ misionero. Xa̱ʼa̱ ña̱ kamaní ni̱ka̱ʼa̱nna xíʼinndi̱ ña̱ ku̱ʼu̱nndi̱ lugar kán, ña̱kán ni̱ka̱ʼi̱n xíʼin Jehová ná chindeétáʼanra xíʼinndi̱. Saá nda̱kanituku xi̱níndi̱: “Tá mií Jehová táxi chiñu yóʼo ná keʼévayóña”. Tándi̱ʼi, ka̱ndíxavandi̱ ku̱ʼu̱nndi̱. Tasaá ndakanixi̱níi̱: “Va̱ʼachi su̱ví África kúú nu̱ú ku̱ʼu̱nndi̱”.

Ndi̱ku̱n saá ki̱xáʼandi̱ sákuaʼandi̱ tu̱ʼun estonio. Tá ni̱ya̱ʼa loʼo yo̱o̱ ña̱ ni̱xa̱a̱ndi̱ ñuu yóʼo ni̱ka̱ʼa̱nna xíʼi̱n ña̱ koi̱ superintendente ña̱ circuito. Ta xi̱niñúʼu ku̱ʼi̱n kotoi̱ 46 congregación xíʼin grupo ti̱xin u̱ni̱ ñuu báltico, saátu chí Kaliningrado (Rusia). Xa̱ʼa̱ ña̱kán ki̱xáʼandi̱ sákuaʼandi̱ tu̱ʼun letón, lituano xíʼin ruso. I̱xayo̱ʼvi̱níña xíʼinndi̱, soo na̱ hermano chi̱kaa̱nína ndee̱ xíʼinndi̱ ta saátu chi̱ndeétáʼanna xíʼinndi̱. Ku̱i̱ya̱ 1999 nda̱kuna iin Betel xa̱á chí Estonia ta nda̱kaxinna yi̱ʼi̱ ña̱ koi̱ Comité xíʼin ta̱ Toomas Edur, ta̱ Lembit Reile xíʼin ta̱ Tommi Kauko.

Xi̱ni táʼanndi̱ xíʼin ku̱a̱ʼání na̱ testigo na̱ ta̱vána chí ñuu Siberia. Xi̱xoʼvi̱nína tá xi̱ñuʼuna veʼeka̱a ta saátu kǒo níxi̱xinina na̱ veʼena. Soo ni saá kǒo níxi̱ndakava-inina. Ndiʼi tiempo xi̱kusi̱í-inina xi̱natúʼunna xa̱ʼa̱ Ndióxi̱. Xíʼin ña̱ ndo̱ʼo na̱ hermano yóʼo sa̱kuaʼandi̱ ña̱ kiviva kundeé-inindi̱ ta kusi̱í-inindi̱ ni yáʼandi̱ nu̱ú tu̱ndóʼo.

Xa̱ʼa̱ ña̱ kǒo níxitavándi̱ tiempo ña̱ ndakindee̱ndi̱ ñá Lesli ki̱xáʼañá kúnaáníñá. Tasaá ki̱ʼinndi̱ kuenta ña̱ kúúmiíñá iin kue̱ʼe̱ ña̱ naní fibromialgia. Ña̱kán nda̱kanixi̱níndi̱ ña̱ ndikóndi̱ chí ñuu Canadá. Tá ni̱ka̱ʼa̱nna xíʼinndi̱ ña̱ ku̱ʼu̱nndi̱ escuela nu̱ú xáʼa̱n na̱ Comité ña̱ Sucursal xíʼin ñá síʼina chí Patterson (Nueva York), nda̱kanixi̱níndi̱ ña̱ va̱ása kivi ku̱ʼu̱nndi̱. Ta tándi̱ʼi, ni̱ka̱ʼa̱nníndi̱ xíʼin Ndióxi̱, tasaá ni̱xa̱ʼa̱nvandi̱ escuela kán. Jehová ku̱a̱ʼání ña̱ va̱ʼa ta̱xira ndaʼa̱ndi̱ xa̱ʼa̱ ña̱ nda̱kaxinndi̱ ke̱ʼéndi̱ ña̱yóʼo. Mií tiempo ña̱ xi̱ñuʼundi̱ curso kán, ñá Lesli ni̱xa̱ʼa̱nñá nu̱ú na̱ doctor ta va̱ʼaní chi̱ndeétáʼanna xíʼinñá. Tasaá ndi̱kó tukundi̱ kéʼéndi̱ chiñu ña̱ xi̱keʼéndi̱ tá ya̱chi̱.

CHI̱NDAʼÁNA NDI̱ʼI̱ INKA CONTINENTE

Iin ñuú tá ku̱i̱ya̱ 2008, tá xa̱a̱ ndi̱kóndi̱ chí Estonia, na̱ káchíñu sede mundial ni̱ka̱ʼa̱nna xíʼinndi̱ á kúni̱ndi̱ ku̱ʼu̱nndi̱ kachíñundi̱ chí República Democrática del Congo. Nda̱kanda̱ní-inii̱ saáchi tá inka ki̱vi̱ xi̱niñúʼu ndakuiinndi̱ yuʼúna á kúni̱ndi̱ ku̱ʼu̱nndi̱ lugar kán á va̱ása. Ñuú saá va̱ása níka̱ʼi̱n xíʼin ñá Lesli, saáchi nda̱kanixi̱níi̱ ña̱ va̱ása kivi ku̱su̱nñá. Soo yi̱ʼi̱ iníísaá ñuú va̱ása níkivi ku̱su̱i̱n. Saáchi ni̱ka̱ʼi̱n xíʼin Jehová xa̱ʼa̱ ña̱ sándi̱ʼi̱-inii̱ xa̱ʼa̱ ña̱ ku̱ʼu̱nndi̱ chí África.

Tá inka ki̱vi̱ ni̱ka̱ʼi̱n xíʼin ñá Lesli xa̱ʼa̱ ndiʼi ña̱yóʼo. Ta u̱vi̱ saándi̱ ni̱ka̱ʼa̱n: “Jehová kúú ta̱ káʼa̱n xíʼinyó ná ku̱ʼu̱nyó África. Kiviva kusi̱í-iniyó kooyó lugar kán ni kǒo xíni̱yóña”. Ki̱ʼva 16 ku̱i̱ya̱ ni̱xi̱yondi̱ chí Estonia, tasaá nda̱kiʼinndi̱ ku̱a̱ʼa̱nndi̱ chí Kinsasa, chí República Democrática del Congo, ta ña̱ Betel kán xi̱kuumiíña iin jardín ña̱ liviní. Tá ni̱xa̱a̱ndi̱ cuarto nu̱ú koondi̱, ñá Lesli ta̱váñá iin tarjeta ña̱ ta̱xi na̱ hermano ndaʼa̱ndi̱ tá ke̱endi̱ Canadá, ta nu̱ú tarjeta yóʼo káchiña: “Nda̱a̱ ndáaka lugar nu̱ú xáún, kusi̱í-iniún”. Xa̱ʼa̱ ña̱ xi̱ni táʼanndi̱ xíʼin na̱ hermano ta saátu xa̱ʼa̱ ña̱ xi̱sanáʼa̱ndi̱ na̱ yiví xa̱ʼa̱ Ndióxi̱. Ki̱ʼinndi̱ kuenta ña̱ kooyó misionero sákusi̱íníña-iniyó. Ta tá ni̱ya̱ʼa tiempo ki̱ʼva 13 Betel ni̱xa̱ʼa̱nndi̱ xi̱tondi̱ chí África. Tá ni̱xa̱ʼa̱nndi̱ ki̱ʼinndi̱ kuenta ña̱ liviní íyo ñuu válí ña̱ íyo kán. Ta va̱ása níxi̱yiʼvíkai̱ ña̱ kakai̱ lugar kán. Ta ta̱xindi̱ tíxa̱ʼvi ndaʼa̱ Jehová xa̱ʼa̱ ña̱ chi̱ndaʼára ndi̱ʼi̱ chí África.

Chí Congo-Kinsasa na̱ hermano ta̱xina kití válí xa̱xíndi̱, ta nda̱a̱ ni iin yichi̱ va̱ása níndakanixi̱níndi̱ ña̱ kaxíndi̱rí. Soo tá xi̱nindi̱ ña̱ ya̱sínní kúú yuʼú na̱ hermano xáxínarí, saátu ndi̱ʼi̱ xa̱xívandi̱rí ta ku̱tóoníndi̱rí.

Ni̱xa̱ʼa̱nndi̱ chi̱ndeétáʼanndi̱ xíʼin iin ñuu loʼo nu̱ú xi̱ ixandi̱va̱ʼaní iin tiʼvi na̱ yiví xíʼin ná ñaʼá xíʼin na̱ va̱lí, ta ta̱xindi̱ loʼo ña̱ kuxuna ta saátu na̱túʼunndi̱ xíʼinna xa̱ʼa̱ Ndióxi̱. Ta ku̱a̱ʼání na̱ hermano na̱ ndóo ñuu kán, kǒo ku̱a̱ʼá ña̱ʼa níxi̱kuumiína. Xi̱ndakanda̱ní-inindi̱ xíʼin ña̱ xi̱keʼé na̱yóʼo. Saáchi xi̱kandíxanína ña̱ mií Jehová sándatakura na̱ ni̱xi̱ʼi̱ chí nu̱únínu, xi̱kuʼvi̱ní-inina xi̱xininara ta saátu nda̱kúní ni̱xi̱yo-inina xíʼin na̱ ñuura. Ta ña̱ ke̱ʼé na̱ hermano yóʼo va̱ʼaní chi̱kaa̱ña ndee̱ xíʼinndi̱ ña̱ kiʼinndi̱ kuenta ndáa ña̱ʼa kúú ña̱ ndáyáʼvika. Sava na̱ hermano ndi̱ʼi-xa̱ʼa̱ veʼena xíʼin ña̱ʼa na̱ chi̱ʼina. Xíʼin ña̱yóʼo ki̱ʼi̱n kuenta ña̱ kamaní kivi ndiʼi-xa̱ʼa̱ ña̱ʼa ña̱ kúúmiíyó, soo ña̱ kítáʼanyó xíʼin Jehová ndiʼi tiempo kooña. Tá ni̱ya̱ʼa na̱ hermano yóʼo nu̱ú tu̱ndóʼo, va̱ása níka̱ʼa̱n kúáchivína. Ña̱ ke̱ʼé na̱yóʼo chi̱ndeétáʼanña xíʼinndi̱ ña̱ ndakú koo inindi̱ tá yáʼandi̱ nu̱ú tu̱ndóʼo, tá kúú ña̱ kíʼin kue̱ʼe̱ ndi̱ʼi̱ á ndóʼondi̱ inkaka ña̱ʼa.

NI̱KA̱ʼA̱NNA XÍʼINNDI̱ ÑA̱ KU̱ʼU̱NNDI̱ CHÍ ASIA

Iin kama ni̱ka̱ʼa̱nna xíʼinndi̱ ña̱ ná ku̱ʼu̱nndi̱ sucursal ña̱ ndíkaa̱ chí Hong Kong. Ni iin yichi̱ kǒo níndakanixi̱níndi̱ ña̱ ku̱ʼu̱nndi̱ ñuu yóʼo. Soo xa̱ʼa̱ ña̱ ki̱ʼi̱nndi̱ kuenta ña̱ mií Jehová kúú ta̱ chi̱ndeétáʼan xíʼinndi̱ tá ya̱chi̱, ña̱kán kǒo níxi̱ka-inindi̱ ña̱ miíra chindeétáʼanra xíʼinndi̱. Ku̱i̱ya̱ 2013, kúsuchíkaví-inindi̱ ni̱nda̱yíndi̱ na̱ ñanindi̱ xíʼin ná ku̱ʼvandi̱ na̱ ndóo chí África, tasaá ku̱a̱ʼa̱nndi̱ chí Asia.

Ñuu Hong Kong, káʼnuníña ta síínní íyoña nu̱ú ñuu ña̱ ni̱xi̱yondi̱ tá ya̱chi̱. Ta i̱xayo̱ʼvi̱níña xíʼinndi̱ ña̱ sakúaʼandi̱ tu̱ʼun chino cantonés, soo na̱ hermano va̱ʼaní nda̱kiʼinna ndi̱ʼi̱. Ta ku̱tóoníndi̱ comida ña̱ xíxina ñuu kán. Ku̱a̱ʼání na̱ yiví ki̱xáʼa sákuaʼa xa̱ʼa̱ Ndióxi̱. Ta xa̱ʼa̱ ña̱ yáʼviní ni̱xi̱yo veʼe tiempo saá, na̱ Cuerpo Gobernante ni̱ka̱ʼa̱nna ña̱ nasa̱ma Betel inka ñuu ta ni̱xi̱kóna ku̱a̱ʼání veʼe ña̱ xi̱kuumií na̱ ñuu Ndióxi̱. Tá ku̱i̱ya̱ 2015, nda̱kiʼinndi̱ ku̱a̱ʼa̱nndi̱ chí Corea del Sur, ta yóʼo ñúʼundi̱ nda̱a̱ tiempo vitin. Kúma̱níva sakúaʼandi̱ ka̱ʼa̱n va̱ʼandi̱ tu̱ʼun coreano. Soo na̱ hermano na̱ ñúʼu yóʼo káʼa̱nna xíʼinndi̱ ña̱ xa̱a̱ va̱ʼaníva kúnda̱a̱-inina xíʼin ña̱ káʼa̱nndi̱.

ÑA̱ SA̱KÚAʼANDI̱

Íxayo̱ʼvi̱ña xíʼinyó ndukúyó na̱ kitáʼan xíʼinyó tá xáʼa̱nyó inka ñuu. Soo ki̱ʼinndi̱ kuenta tá siʼna miíyó kána inkana ña̱ ku̱ʼu̱nna veʼeyó á ña̱ kuxuna xíʼinyó, saá kamaníka xáa̱yó kítáʼanyó xíʼinna. Ndiʼiyó na̱ ndásakáʼnu Ndióxi̱ iin ña̱ʼa kándíxa ndiʼivayó ta miíra kúú ta̱ i̱xava̱ʼa miíyó ña̱ keʼéyó ña̱yóʼo. Ña̱kán kiviva kutáʼanyó xíʼin inka na̱ hermano ta kixáʼana koona migoyó (2 Cor. 6:11).

Sa̱kúaʼandi̱ ña̱ kǒo xíniñúʼu ndaka̱xinndi̱ na̱ yiví chi saá kéʼé Jehová kǒo ndáka̱xinra na̱ yiví. Ta saátu xíniñúʼu sakúaʼayó ña̱ mií Jehová kúú ta̱ níʼi yichi̱ nu̱úyó ta ndáara miíyó. Ndiʼi tiempo tá xi̱ndakanixi̱níndi̱ á xi̱kuni̱ inkana kutáʼanna xíʼinndi̱, ña̱ xi̱chindeétáʼan xíʼinndi̱ kúú ña̱ xi̱kaʼvindi̱ carta ña̱ xi̱chindaʼá na̱ migondi̱ ndaʼa̱ndi̱. Ki̱ʼinndi̱ kuenta ña̱ mií Jehová xi̱ndakuiin oración ña̱ xi̱keʼéndi̱ nu̱úra ta xi̱taxira ndee̱ ndaʼa̱ndi̱ ña̱ va̱ʼa kundeé-inindi̱.

Xa̱a̱ kíʼi̱n kuenta ña̱ xíniñúʼu tavái̱ tiempo ña̱ koi̱ xíʼin ñá Lesli ni íyo ku̱a̱ʼání chiñu nu̱úi̱. Saátu ki̱ʼinndi̱ kuenta ña̱ va̱ʼava ku̱a̱ku̱yó xa̱ʼa̱ miíyó tá va̱ása vií káʼa̱nyó iin tu̱ʼun. Ndiʼi ñuú káʼa̱nndi̱ xíʼin Jehová xa̱ʼa̱ ña̱ ku̱tóondi̱ ki̱vi̱ saá ta táxindi̱ tíxa̱ʼvi ndaʼa̱ra.

Mií ña̱ nda̱a̱ kǒo níndakanixi̱níi̱ ña̱ koi̱ misionero á ña̱ ku̱ʼi̱n inka ñuu. Soo kíʼi̱n kuenta ña̱ mií Jehová kúú ta̱ táxi chiñu yóʼo ndaʼa̱ndi̱ ta kúsi̱íní-inii̱ xíʼin ña̱yóʼo. Ndákanixi̱níi̱ nda̱a̱ táki̱ʼva ni̱ka̱ʼa̱n ta̱ profeta Jeremías: “Sa̱ndáʼviún yi̱ʼi̱ Jehová” (Jer. 20:7). Xa̱a̱ ku̱a̱ʼání ña̱ va̱ʼa táxi Jehová ndaʼa̱ndi̱ ña̱ kǒo níndakanixi̱níndi̱ ndakiʼinndi̱. Xa̱a̱ táxira ña̱ ku̱ʼi̱n xíʼin avión ta xa̱a̱ ku̱a̱ʼání ñuu xáʼi̱n. Tá ni̱xi̱yo loʼi̱ kǒo níndakanixi̱níi̱ ña̱ ku̱ʼi̱n ndiʼi ñuu yóʼo. Xa̱a̱ xáʼa̱nndi̱ Betel ña̱ íyo ti̱xin 5 continente, ta táxiníi̱ tíxa̱ʼvi ndaʼa̱ ñá Lesli, saáchi ndiʼi chiñu ña̱ táxina ndaʼíi̱ va̱ʼaní chíndeétáʼanñá xíʼi̱n.

Ndiʼi tiempo ndákaʼánndi̱ ña̱ xa̱ʼa̱ mií Jehová kéʼéndi̱ ña̱yóʼo. Ndiʼi ña̱ va̱ʼa ña̱ ndákiʼinyó vitin náʼa̱ña ndiʼi ña̱ va̱ʼa ña̱ taxi Jehová ndaʼa̱yó tá xa̱a̱ ná kooyó ñuyǐví xa̱á (Sal. 145:16).