“သားပိုက်ကောင် မိခင်ပြုစုစောင့်ရှောက်မှု”—အသက်အန္တရာယ်ဖြစ်စေသည့် ပြဿနာအတွက် ဖြေရှင်းနည်းလော

နေရာမှာ ကိုလံဘီယာနိုင်ငံ၊ ဘိုဂတားမြို့ရှိ ဆေးရုံတစ်ရုံတွင်ဖြစ်ကာ ၁၉၇၉ ခုနှစ်တွင်ဖြစ်သည်။ လမစေ့မီမွေးဖွားသောကလေးများ အသက်ရှင်နှုန်းသည် ကြောက်ခမန်းလိလိ ကျဆင်းနေသောကြောင့် ကိုလံဘီယာဆရာဝန်တစ်ဦးက ထူးဆန်းသောဖြေရှင်းနည်းတစ်ခု—“သားပိုက်ကောင် မိခင်ပြုစုစောင့်ရှောက်မှု”—ကိုတွေ့ရှိခဲ့သည်။

လမစေ့မီမွေးဖွားသောကလေးများ ဆက်အသက်ရှင်ဖို့ဟူသည် ဆရာဝန်များအတွက် ခက်ခဲသည့်အလုပ်တစ်ခုဖြစ်၏။ ကိုယ်အလေးချိန်မပြည့်ဘဲ မွေးဖွားလာသောကလေးများအား လိုအပ်သည့်အလေးချိန် ရလာသည်အထိ အနွေးသေတ္တာအိမ်တွင် နွေးနွေးထွေးထွေးထားလေ့ရှိသည်။ သို့သော် ဖွံ့ ဖြိုးဆဲတိုင်းပြည်များတွင် အဆောက်အအုံများ လူပြည့်ကျပ်လွန်းခြင်း၊ ရေနှင့်မိလ္လာစနစ်ညံ့ဖျင်းခြင်း၊ ဆေးဘက်ဆိုင်ရာဝန်ထမ်းနှင့် ပစ္စည်းကိရိယာများ ရှားပါးခြင်းတို့ကြောင့် အန္တရာယ်ရှိသောရောဂါကူးစက်မှုများ ဖြစ်ပေါ်လေ့ရှိသည်။

ကိုလံဘီယာနိုင်ငံရှိ ဆရာဝန်တစ်ဦးက ယင်းပြဿနာကို လျော့ပါးစေပုံရသောနည်းတစ်နည်း တွေ့ ရှိခဲ့သည်။ မည်သို့လုပ်ဆောင်သနည်း။ ကလေးငယ်တစ်ဦး လမစေ့ဘဲမွေးဖွားလာသောအခါ ယင်း၏အခြေအနေတည်ငြိမ်သည်အထိ စံသတ်မှတ်ထားသောနည်းအတိုင်း ပြုစုစောင့်ရှောက်သည်။ ထိုအတောအတွင်း မိခင်ဖြစ်သူအား ကလေးပြုစုနည်းကို လေ့ကျင့်ပေးထားသည်။ ကလေးကျန်းမာရေးကောင်းသောအခါ မိခင်သည် သက်ရှိအနွေးသေတ္တာအိမ်ဖြစ်လာသည်။ မည်သို့အားဖြင့်နည်း။ ကလေးကို ရင်ခွင်ထဲတွင် မတ်မတ်ထား၍ ထွေးပတ်ထားခြင်းဖြင့်ဖြစ်သည်။ ၎င်း၏သားပိုက်ကောင်နှင့်တူသော သားပိုက်အိတ်ထဲတွင် လုံလုံခြုံခြုံရှိနေရာ ကလေးသည် နွေးနွေးထွေးထွေးရှိကာ မိခင်၏နို့ရည်ကို အလွယ်တကူသောက်သုံးနိုင်သည်။ ထို့ကြောင့် ဤနည်းကို သားပိုက်ကောင် မိခင်ပြုစုစောင့်ရှောက်မှုဟု ခေါ်ဆိုလေ့ရှိသည်။

ဈေးကြီးသောပစ္စည်းကိရိယာများ မလိုအပ်ချေ။ မိခင်သည် ခါးစည်းတစ်ခုနှင့် သင့်တော်သောအင်္ကျီပွ သို့မဟုတ် ပုံမှန်အဝတ်အစားတစ်ထည်ကို ဝတ်ဆင်သည်။ ကလေးသည် ရှိသင့်သောကိုယ်အလေးချိန်ရှိလာသောအခါ မိခင်နှင့် ကလေးသည် အိမ်သို့ ပြန်၍ရပြီး ဆေးစစ်ရန်အတွက် ဆေးရုံသို့ မှန်မှန်ပြန်သွားနိုင်သည်။

ပဏာမသုတေသနပြုမှုက သားပိုက်ကောင် မိခင်ပြုစုစောင့်ရှောက်မှုသည် ထိရောက်မှုရှိကာ ဘေးအန္တရာယ်ကင်းကြောင်း ဖော်ပြသည်။ ထို့အပြင် ယင်းသည် ကလေးနှင့် မိခင်စပ်ကြား ပိုမိုရင်းနှီး သံယောဇဉ်ရှိစေပုံရသည်။ နိုင်ငံများစွာတွင် အသုံးပြုရန်အတွက် ဤနည်းကို အလိုက်သင့် ပြုပြင်ပြောင်းလဲခဲ့ကြသည်မှာ အံ့ဩစရာမဟုတ်ပေ။ မက္ကဆီကိုတွင် မိခင်များ ကောင်းကောင်းအနားယူဖို့လိုအပ်သည့်အခါ ကူညီပေးရန် ဆွေမျိုးသားချင်းများသည် “သားပိုက်ကောင် ဖခင်များ၊” “သားပိုက်ကောင် ဖွားအေများ” နှင့် “သားပိုက်ကောင် အစ်မများ” ဖြစ်လာရန် လေ့ကျင့်ခံရကြသည်။ မက္ကစီကိုနိုင်ငံတွင် သားပိုက်ကောင် မိခင်ပြုစုစောင့်ရှောက်မှုအစီအစဉ်ကိုစီမံသူ ဒေါက်တာ ဂွာဒါလူးပီ ဆန်တိုးစ် က နိုးလော့! အား ဤသို့ပြောပြခဲ့သည်– “၁၉၉၂ ခုနှစ်ကတည်းက ဒီနည်းကို ကျွန်တော်တို့အသုံးပြုခဲ့ကြတယ်၊ ဘယ်လောက် ထိရောက်မှုရှိတယ်ဆိုတာ တွေ့ ခဲ့ရတယ်။ အနွေးသေတ္တာအိမ်လည်း သိပ်မလို၊ ဆေးရုံလည်း စောစောဆင်းရတယ်။”