ပြင်သစ်နိုင်ငံတွင်—မှားယွင်းသောစွပ်စွဲချက်များကို တန်ပြန်ချေပခြင်း
မကြာသေးမီက ပြင်သစ်နိုင်ငံရှိ ယေဟောဝါသက်သေများသည် မှားယွင်းသောစွပ်စွဲချက်များ၏ပစ်မှတ်များဖြစ်ခဲ့ကြရသည်။ ဥရောပနှင့် ဂျပန်နိုင်ငံရှိ ဘာသာရေးတစ်ယူသန်ဂိုဏ်းများပါဝင်ပတ်သက်သော ဝမ်းနည်းဖွယ်ဖြစ်ရပ်များကို စာလုံးကြီးဖြင့်ရေးကာ လူထုဆက်သွယ်ရေးမှတစ်ဆင့် သက်သေခံများအကြောင်း မဟုတ်မမှန်သတင်းဖြန့်ခဲ့သည်။ သူတို့သည် အကြီးမားဆုံးနှင့် အန္တရာယ်အရှိဆုံးတစ်ယူသန်ဂိုဏ်းများမှ တစ်ဂိုဏ်းအဖြစ် မှားယွင်းစွာဖော်ပြခံရသည်။
ကိစ္စရပ်များကိုအမှန်ဖြစ်စေဖို့ကြိုးပမ်းရာတွင် ယေဟောဝါသက်သေများသည် ဤကဲ့သို့သောမေးခွန်းများကို ဖြေကြားပေးသည့်ဝေစာတစ်စောင်ကို ထုတ်ဝေလိုက်သည်– မည်သူတို့သည် ယေဟောဝါသက်သေများနည်း။ သူတို့သည် ခရစ်ယာန်များဖြစ်သလော။ သူတို့သည် ဆေးကုသမှုကိုလက်ခံသလော။ သူတို့ အဘယ်ကြောင့် တစ်အိမ်မှတစ်အိမ်သွားကြသနည်း။ သူတို့၏လုပ်ငန်းကို မည်သည့်နည်းဖြင့် ငွေကြေးထောက်ပံ့သနည်း။ ယေဟောဝါသက်သေများသည် ပြည်သူလူထုကို မည်သို့အကျိုးပြုသနည်း။
ပြင်သစ်ဘာသာစကားဖြင့် သိကောင်းစရာများပါဝင်သော ဤဝေစာကို ယေဟောဝါသက်သေများ—သင်သိဖို့လိုအပ်သည့်အရာ ဟုခေါင်းစဉ်တပ်ထားသည်။ ဝေစာကို လူများနိုင်သလောက်များများထံရောက်ရှိရန် ကင်ပိန်းတစ်ခုကို စီစဉ်ခဲ့သည်။ ၁၉၉၆ ခုနှစ်၊ မေလ ၁၃ ရက်မှ ဇွန်လ ၉ ရက်အထိ စောင်ရေကိုးသန်းကျော် ဖြန့်ဝေခဲ့သည်။
ဤဝေစာသည် အစိုးရအရာရှိများအပါအဝင် များစွာသောသူတို့ကို စွဲမှတ်သွားစေသည်။ “ယေဟောဝါသက်သေများကို ဦးတည်ပြီး အပြစ်ရှာဝေဖန်ခြင်းက ကျွန်တော့်ကို အလွန်ဒေါသထွက်စေပါတယ်။ သင်တို့ရဲ့ သဒ္ဒါတရားရှိမှုနဲ့ ကိုယ်ကျိုးမဖက်မှုကို အချိန်တိုင်းဆိုသလို တန်ဖိုးထားလေးမြတ်မိပါတယ်” ဟုဝေစာကိုဖတ်ရပြီးနောက် ဒေသန္တရအကြံပေးပုဂ္ဂိုလ်တစ်ဦးက ရေးသားလိုက်သည်။ ဝေစာကိုတုံ့ ပြန်ရာတွင် ဥရောပပါလီမန်အဖွဲ့ဝင်တစ်ဦးက ဤသို့ရေးသည်– “သင်တို့ပါဝင်တဲ့ခရစ်ယာန်အဖွဲ့နဲ့ တစ်ယူသန်ဂိုဏ်းတွေကြားမှာ ကွာခြားမှုရှိတယ်ဆိုတာ လူအများစုက ကောင်းကောင်းသိထားပါတယ်။”
ဘရစ်တနီခရိုင်တွင် သက်သေခံတစ်ဦးသည် ဓမ္မဆရာတစ်ဦးအား ဝေစာကိုရှင်းလင်းတင်ပြရာ လိုလိုလားလားလက်ခံခဲ့သည်။ “မင်းတို့ရဲ့လုပ်ဆောင်မှုတွေကို ငါချီးကျူးပါတယ်” ဟုဓမ္မဆရာကပြောသည်။ သူဤသို့ထပ်ဆိုသည်– “အိမ်တွေမှာ မင်းတို့ကိုလက်ခံခွင့်ပြုဖို့နဲ့ ကော်ဖီပါချပေးဖို့ ငါ့ရဲ့အသင်းသားတွေကို တိုက်တွန်းပါတယ်။ ငါ့အိမ်ကိုရောက်ခဲ့တဲ့အကြောင်း မင်းတို့တွေ့တဲ့လူတိုင်းကိုတောင်ပြောပြနိုင်တယ်။ မင်းတို့ရဲ့စာပေတွေကိုဖတ်ရတာကို တန်ဖိုးထားလေးမြတ်ကြောင်း ပြောလိုပါတယ်။”
ဝေစာကိုလက်ခံပြီးနောက် အဲလ်စပ်စ်ခရိုင်ရှိ ပရိုတက်စတင့်အသင်းသားတစ်ဦးသည် ကင်းမျှော်စင်အသင်းသို့စာရေးကာ ကျမ်းစာသင်အံမှုတောင်းဆိုသည်။ “ကျွန်တော့်ရဲ့အသင်းကို လုံးလုံးအယုံအကြည် မရှိတော့ဘူး။ ဝိညာဉ်ရေးအသစ်ကိုအစပြုဖို့ ကျွန်တော်စောင့်မျှော်နေပါတယ်” ဟုသူရေးခဲ့သည်။ ပြင်သစ်နိုင်ငံရှိ—အမှန်ပင်၊ ကမ္ဘာ့ဒေသအားလုံးရှိ—ယေဟောဝါသက်သေများသည် မှားယွင်းသည့်စွပ်စွဲချက်များကို ကြိမ်ဖန်များစွာခံရသည့်ကြားမှ သမ္မာကျမ်းစာတွင်ဖော်ပြထားသော ဘုရားသခင့်ရည်ရွယ်ချက်များဆိုင်ရာ တိကျမှန်ကန်သည့်အသိပညာရရှိရန် လူတို့အား ဆက်၍ကူညီပေးလျက်ရှိသည်။—၂ တိမောသေ ၃:၁၆၊ ၁၇။