တရားဟောဆရာအားလုံး မိမိတို့သွန်သင်ရာကို ယုံကြည်ပါသလော

အမျိုးသမီးတစ်ဦး၏ ခင်ပွန်းသည် မကြာမီကပင် သေဆုံးသွားသည်။ ခရစ်ယာန်ဘုန်းတော်ကြီးက သူမ၏ခင်ပွန်းသည် ကောင်းကင်သို့တိုက်ရိုက်သွားနိုင်ဖို့ရန် အလွန်ကောင်းသူတစ်ဦးမဟုတ်သကဲ့သို့ မီးငရဲထဲကျရလောက်အောင်လည်း အဆိုးကြီးမဟုတ်ပါဟူ၍ရှင်းပြ၏။ သို့ဖြင့် ခရစ်ယာန်ဘုန်းတော်ကြီး၏အဆိုအရ သူသည်ကောင်းကင်တက်နိုင်ဖို့ အရည်အချင်းပြည့်မီသည့်အထိ အပြစ်ပေးခြင်းကိုခံနေရမည်ဖြစ်သည်။ သူမသည် မိမိ၏ခင်ပွန်းငရဲကလေးမှ စောစောလွတ်မြောက်စေဖို့ ဆုတောင်းပေးရန် ခရစ်ယာန်ဘုန်းတော်ကြီးကိုအခပေး၏။ အဆိုပါ ဘုန်းတော်ကြီးသည် မိမိစိတ်ရင်းမှန်ဖြင့်ယုံကြည်သည်နည်းတူ ယုံကြည်သည်ဟု ထိုမုဆိုးမယူမှတ်ကာ အခပေးရခြင်းကို သူမကျေနပ်နေသည်။

ခရစ်ယာန်ဘုန်းတော်ကြီးသည် သေဆုံးပြီးနောက်အပြစ်ပေးခံရခြင်းကို တကယ်မယုံကြည်ကြောင်း သူမသိရှိခဲ့ပါက ထိုမုဆိုးမသည် စိတ်ပျက်အားလျော့သွားမည်ဟု သင်ထင်သလော။ တရားဟောဆရာအများစုသည် သူတို့ကိုယ်တိုင်သွန်သင်ပေးရာကို မယုံကြည်ကြကြောင်း လူအများသိလာကြသောအခါ စိတ်အနှောင့်အယှက်ဖြစ်ခဲ့ကြ၏။ နေရှင်နယ်ကက်သလစ်ရီပိုတာက “လိင်ထက် သာ၍ကြီးမားသည့် ဘုန်းတော်ကြီးပြဿနာ” ဟုခေါ်ဆိုသောအကြောင်းနှင့်ပတ်သက်၍ ဤသို့ဆိုသည်– “ဘုရားသခင်တည်ရှိတော်မူခြင်း သို့မဟုတ် ဆုကျေးဇူးပေးသနားခြင်းနှင့် အပြစ်ပေးခြင်းအယူအဆ သို့မဟုတ် ရှင်ပြန်ထမြောက်ခြင်း အစရှိသည်တို့ကို ယုံကြည်မှုမရှိတော့သည့် ဓမ္မဆရာများစွာရှိရာ . . . ယင်းအသိုင်းအဝိုင်းကို ဤမယုံကြည်သောစိတ်ဓာတ်သည် မြူခိုးကဲ့သို့လွှမ်းခြုံလျက်ရှိသည်။”

. . . လေ့လာဆန်းစစ်ချက်တစ်ခုပြုခဲ့ရာ များစွာတို့သည် “ခရစ်ယာန်တို့၏ ယုံကြည်ခြင်းအစဉ်အလာဖြစ်သော အပျိုကညာမှမွေးဖွားခြင်း၊ ယေရှု၏အံ့ဖွယ်အမှုများ၊ ဒုတိယအကြိမ် မေရှိယကြွလာခြင်းကဲ့သို့သော အခြေခံတရားများကိုယုံကြည်မှုမရှိ” ကြကြောင်းဖော်ပြသည်ဟု ဩစတြေးလျနိုင်ငံမှ ကန်ဘဲရာ တိုင်းမ် သတင်းစာကအစီရင်ခံ၏။

ဘာသာရေးစာရေးသူ ဂျော့်ဂ်ျ အာရ်၊ ပလာဂန်ဇ်က အမှုဆောင်သူတစ်ဦးအနေဖြင့် မိမိကိုယ်တိုင်မယုံကြည်သောအယူဝါဒတစ်ခုကို ကြည်လင်သည့်ကိုယ်ကိုကိုယ်သိသောစိတ်ဖြင့် မည်သို့အလွတ်ရွတ်ဆိုနိုင်မည်နည်းဟု မေးမြန်းခဲ့သည်။ ဓမ္မအမှုဆောင်တစ်ဦးက သူသည် အယူဝါဒ၏အဖွင့်စကားဖြစ်သည့်“ကျွန်ုပ် ယုံကြည်သည်” ကိုအစားထိုးလိုက်ရုံပြုသည်ဟုဆို၏။ သူက ဤသို့ပြောပြသည်– “ထိုအယူဝါဒကို ကျွန်တော်ဒီလိုစတင်ရွတ်ဆိုတယ်၊ ‘သူတို့သည် အကြီးမြတ်ဆုံးသောခမည်းတော်ဘုရားသခင်ကို ယုံကြည်ကြ၏ . . .။’” ပလာဂန်ဇ်က ထိုသို့သောအရေခြုံမှုကို “နိုင်ငံတွင် အကြီးမားဆုံးသောလိမ်လည်လှည့်ဖြားမှု” ဟုခေါ်ဆိုထားသည်။

ဝမ်းနည်းစရာကား ခရစ်ယာန်ဘုန်းတော်ကြီးများ၏ ထိုသို့သောမယုံကြည်မှုနှင့် မရိုးသားမှုတို့က ခရစ်ယာန်ဘာသာတရားအပေါ် များစွာသောသူတို့ကို စိတ်ဓာတ်ကျစေခဲ့ပြီးဖြစ်သည်။ သို့သော် ယနေ့ ယင်းတစ်ခုတည်းကသာ ဘာသာတရားကို စိတ်ပျက်စရာဖြစ်စေနေသည် မဟုတ်ချေ။ ချာ့ချ်တက်သူအများစုအနေဖြင့် သမ္မာကျမ်းစာသည် ဘုရားသခင်၏နှုတ်မြွက်စကားတော်ဖြစ်ကြောင်း သွန်သင်ခံခဲ့ကြရ၏။ ချာ့ချ်အယူဝါဒများအဖြစ် အချိန်အတန်ကြာ လက်ခံထားသောအယူဝါဒအချို့သည် သမ္မာကျမ်းစာတွင် သွန်သင်ထားခြင်းမရှိကြောင်း သိလာကြရသောအခါ သူတို့အံ့အားသင့်ကြမည်လော။ နောက်ဆောင်းပါးတွင် ဥပမာတစ်ခုကို သုံးသပ်မည်။