“ယေဟောဝါဟာ ကျွန်တော့်အပေါ် သိပ်ကောင်းခဲ့တယ်!”

၁၉၈၅ ခုနှစ် မတ်လ၏ အလွန်သာယာသောညနေခင်းတစ်ခုတွင် ယူ.အက်စ်.အေ၊ နယူးယောက်မြို့ရှိ ယေဟောဝါသက်သေများ၏ဌာနချုပ် စာပေပြုစုရေးဌာနမှ အမျိုးသား၊ အမျိုးသမီးများသည် တိုးတက်မှုတွင်ထူးခြားချက်တစ်ခုကို သတိပြုမိခဲ့ကြသည်။ ထိုအချိန်က ကားလ် အက်ဖ်. ကလိုင်းန်သည် အချိန်ပြည့်ဓမ္မအမှုတွင် နှစ်ပေါင်း ၆၀ အမှုထမ်းခဲ့ပြီးဖြစ်သည်။ “ယေဟောဝါဟာ ကျွန်တော့်အပေါ် သိပ်ကောင်းခဲ့တယ်!” ဟုညီအစ်ကိုကလိုင်းန်က အားပါးတရပြောဆိုခဲ့သည်။ ဆာလံ ၃၇:၄ သည်သူအလွန်နှစ်သက်သော ကျမ်းချက်တစ်ခုဖြစ်ကြောင်းကိုလည်း ထုတ်ဖော်ပြောပြခဲ့သည်။ ထို့နောက် သူ၏တယောကိုထိုးပြလိုက်ရာ အားလုံးပျော်ရွှင်ခဲ့ကြသည်။

နောက် ၁၅ နှစ်တိုင် ညီအစ်ကိုကလိုင်းန်သည် စာပေပြုစုရေးအမှုထမ်းတစ်ဦးအဖြစ်နှင့် ယေဟောဝါသက်သေများ၏အုပ်ချုပ်ရေးအဖွဲ့ဝင်အဖြစ်ပါ ဆက်လက်အမှုထမ်းဆောင်ခဲ့သည်။ ထို့နောက် ဇန်နဝါရီ ၃၊ ၂၀၀၁ တွင်အသက် ၉၅ နှစ်အရွယ်၌ ကားလ်ကလိုင်းန်၏မြေကြီးအသက်တာ သစ္စာရှိစွာကုန်ဆုံးခဲ့သည်။

ကားလ်သည် ဂျာမနီနိုင်ငံတွင် မွေးဖွားခဲ့သည်။ သူ၏မိသားစုသည် အမေရိကန်ပြည်ထောင်စုသို့ ပြောင်းရွှေ့ခဲ့ပြီး ကားလ်သည် အီလီနွိုက်စ်၊ ချီကာဂိုဆင်ခြေဖုံးအရပ်တစ်ခုတွင် ကြီးပြင်းခဲ့သည်။ ငယ်ရွယ်စဉ်၌ပင် ကားလ်နှင့် သူ၏ညီဖြစ်သူတက်ဒ်တို့သည် သမ္မာကျမ်းစာကို အလွန်စိတ်ဝင်စားခဲ့ကြသည်။ ကားလ်သည် ၁၉၁၈ ခုနှစ်တွင် နှစ်ခြင်းခံခဲ့ပြီး ၁၉၂၂ ခုနှစ်တွင် ကျမ်းစာကျောင်းသားများ၏စည်းဝေးကြီးတစ်ခု၌ သူကြားသိခဲ့ရသည့် စိတ်လှုပ်ရှားဖွယ်ရာများက လယ်ကွင်းလုပ်ငန်းကို တစ်သက်တာလုံး နှစ်သက်စရာဖြစ်စေခဲ့သည်။ ဟောပြောခြင်းလုပ်ငန်းတွင် မပါဝင်ဘဲ သီတင်းပတ်တစ်ပတ်ကို ကုန်ဆုံးမသွားစေလိုခဲ့ပေ၊ သူ၏အသက်တာ နောက်ဆုံးသီတင်းပတ်များ၌ပင် ဟောပြောခဲ့သေးသည်။

ကားလ်သည် ၁၉၂၅ ခုနှစ်တွင် ဌာနချုပ်အမှုထမ်းတစ်ဦးဖြစ်လာခဲ့ပြီး ပုံနှိပ်တိုက်တွင် ဦးဆုံးလုပ်ဆောင်ခဲ့သည်။ သူသည် တေးဂီတကို အလွန်နှစ်သက်သူတစ်ဦးဖြစ်ပြီး ခရစ်ယာန်ရေဒီယို အသံလွှင့်လုပ်ငန်းကဏ္ဍဖြစ်သော သံစုံတီးဝိုင်းတစ်ခုတွင် နှစ်အနည်းငယ် တယောထိုးခဲ့သည်။ ထို့နောက် လုပ်ငန်းတော်ဌာနတွင် အမှုထမ်းခဲ့ပြီး ယင်း၏ကြီးကြပ်မှူးဖြစ်သူ တီ. ဂျေ. ဆလီဗန်နှင့်ပေါင်းသင်းခွင့်ရခြင်းကို အထူးနှစ်သက်ခဲ့သည်။ ထိုအတောအတွင်း တက်ဒ်သည် အိမ်ထောင်ပြုခဲ့ပြီး သူ၏ဇနီးဒေါရစ္စနှင့် ပွာတီရီကိုတွင် ခရစ်ယာန်သာသနာပြုလုပ်ငန်းဆောင်ရွက်ခဲ့ကြသည်။

ကားလ်ကလိုင်းန်သည် ရှာဖွေလေ့လာရေးကို အလွန်နှစ်သက်ပြီး ကျမ်းစာကိုကောင်းစွာ သဘောပေါက်နားလည်ထားသူတစ်ဦးဖြစ်သောကြောင့် ရာစုနှစ်တစ်ဝက်တိုင် သူအမှုဆောင်ခဲ့သည့် စာပေပြုစုရေးဌာနတွင် ဆောင်းပါးများ ထူးခြားစွာရေးသားဖြည့်စွက်ပေးနိုင်ခဲ့သည်။ ၁၉၆၃ ခုနှစ်တွင် ကားလ်သည် ဘိုလီးဗီးယားတွင် အမှုဆောင်နေသော ဂျာမန်သာသနာပြုတစ်ဦးဖြစ်သူ မာဂရီတာကို ထိမ်းမြားခဲ့သည်။ အထူးသဖြင့် ကျန်းမာရေးချို့တဲ့လာချိန်တွင် သူ၏မေတ္တာပါသောထောက်မမှုဖြင့် ကားလ်သည် လူအများ အနားယူအငြိမ်းစားကြသည့်အသက်အရွယ်ကို အတော်အတန်ကျော်လွန်ပြီး အလုပ်များစွာလုပ်ကိုင်နိုင်ခဲ့သေးသည်။ ကားလ်၏ပင်ကိုရိုးသားပွင့်လင်းမှုနှင့်အတူ တေးဂီတသမားတစ်ဦး၏ စိတ်အားထက်သန်မှုတို့ကိုပေါင်းလိုက်ရာ အသင်းတော်အစည်းအဝေးများနှင့် စည်းဝေးကြီးများတွင် အမှတ်တရဖြစ်ခဲ့သော ဟောပြောချက်များစွာကို သူဟောပြောခဲ့ပါသည်။ သူမကွယ်လွန်မီလေးတွင် နယူးယောက်ဗေသလမိသားစုကြီး၏ နံနက်ကျမ်းချက်ဆွေးနွေးမှုတွင် သူဦးစီးခဲ့ရာ အားလုံးသဘောကျနှစ်သက်စရာဖြစ်ရုံမက အကျိုးခံစားစေခဲ့သည်။

ကင်းမျှော်စင်စာဖတ်ပရိသတ်များစွာသည် အောက်တိုဘာ ၁၊ ၁၉၈၄ ခုနှစ်တွင် ထုတ်ဝေထားသော ညီအစ်ကိုကလိုင်းန်၏ အတွေ့အကြုံများနှင့်ပတ်သက်၍ ဆွဲဆောင်မှုရှိသောမှတ်တမ်းတစ်ခုဖြစ်သည့် ဘဝအတ္တုပ္ပတ္တိကို မှတ်မိကြပါလိမ့်မည်။ ၎င်းဆောင်းပါးကိုရေးသားခဲ့သူသည် တည်ကြည်မှုရှိ၍ စိတ်ထက်သန်သောခရစ်ယာန်တစ်ဦးအဖြစ် နောက်ထပ်ဆယ့်ငါးနှစ် အမှုဆောင်ခဲ့ကြောင်းကို သတိရကာ ဖတ်ရှု သို့မဟုတ် ပြန်လည်ဖတ်ရှုလိုပေလိမ့်မည်။

သခင့်ဘိသိက်ခံတစ်ဦးအနေနှင့် ညီအစ်ကိုကလိုင်းန်သည် ကောင်းကင်တွင် ခရစ်တော်နှင့်အတူအုပ်စိုးရန် ဆန္ဒပြည့်ဝခဲ့သည်။ ယင်းဆန္ဒကို ယခုယေဟောဝါဖြည့်ဆည်းပေးလိုက်ပြီဟု ကျွန်ုပ်တို့ယုံကြည်နိုင်စရာအကြောင်းရှိပါသည်။—လုကာ ၂၂:၂၈-၃၀။

[စာမျက်နှာ ၃၁ ပါ ရုပ်ပုံ]

၁၉၄၃ ခုနှစ်တွင် တီ. ဂျေ. ဆလီဗန်၊ တက်ဒ်နှင့် ဒေါရစ္စတို့နှင့်အတူ ကားလ်ပုံ

[စာမျက်နှာ ၃၁ ပါပုံစာ]

ကားလ်နှင့် မာဂရီတာ၊ အောက်တိုဘာ၊ ၂၀၀၀