‘ငြိမ်သက်ရာ ရေများအနီးသို့ ဆောင်သွားတော်မူ၏’

သမ္မာကျမ်းစာပါ နယ်မြေ၏ ပူအိုက်သောရာသီဥတုတွင် သိုးများသည် နေ့စဉ်ရေသောက်ဖို့လိုသည်။ သို့ ဖြစ်၍ သိုးထိန်းတစ်ဦးသည် သိုးအုပ်ကိုရေတိုက်ပေးဖို့ အလွန်အရေးကြီးသည်။ တစ်ခါတစ်ရံ သိုးထိန်းများသည် သူတို့၏သိုးအုပ်ရေသောက်နိုင်ဖို့ ရေတွင်းထဲမှရေကို စားခွက်ထဲလောင်းထည့်ပေးကြရသည်။ (ကမ္ဘာဦး ၂၉:၁-၃) သို့သော် အထူးသဖြင့် မိုးရာသီတွင် မြစ်၊ ချောင်းငယ်များဝန်းကျင်ဒေသသည် ဆိတ်ငြိမ်၍ ‘ရေပေါများသော နားနေရာ’ အရပ်ဖြစ်သည်။—ဆာလံ ၂၃:၂။

သိုးထိန်းကောင်းတစ်ဦးသည် မိမိသိုးအုပ်အတွက် ရေနှင့် သင့်လျော်သောစားကျက် အဘယ်နေရာတွင်ရှိသည်ကို သိထားရမည်။ နယ်မြေဒေသတစ်ခုကို သူနှံ့နှံ့စပ်စပ်သိထားခြင်းက သူ၏သိုးအုပ် မပျောက်ပျက် မဆုံးရှုံးရန်အတွက် အရေးပါ၏။ ယုဒတောင်တန်းဒေသတွင် နှစ်ပေါင်းများစွာ သိုးကျောင်းခဲ့သော ဒါဝိဒ်သည် ဘုရားသခင်၏ဝိညာဉ်ရေးလမ်းညွှန်မှုကို စိမ်းလန်းသောစားကျက်နှင့် အသက်ရေရှိရာသို့ မိမိသိုးများကိုပို့ဆောင်သည့် သိုးထိန်းနှင့် နှိုင်းယှဉ်ခဲ့သည်။ ခရစ်ယာန်ဘာသာပြန်ကျမ်းတစ်ခုအရ ဒါဝိဒ်က ‘ငြိမ်သက်ရာရေများအနီးသို့ ငါ့ကိုဆောင်သွားတော်မူ၏’ ဟုဆိုခဲ့သည်။—ဆာလံ ၂၃:၁-၃၊ သမ။

နှစ်များစွာကုန်လွန်ပြီးနောက် ယေဟောဝါသည် အလားတူပုံဥပမာတစ်ခုကို ပရောဖက်ယေဇကျေလမှတစ်ဆင့်ဖော်ပြခဲ့သည်။ သိုးထိန်းသည် သူ၏သိုးများကို စုသိမ်းသကဲ့သို့ တိုင်းနိုင်ငံများသို့ ပြန့်ကျဲနေသော မိမိ၏လူမျိုးတော်ကို စုသိမ်းမည်ဟု ကိုယ်တော်ကတိပြုတော်မူ၏။ “အတိုင်းတိုင်းအပြည်ပြည်တို့ကခေါ်ခဲ့၍ . . . ဣသရေလတောင်တို့အပေါ်၊ မြစ်တို့အနားအစရှိသော နေစရာအရပ်ရပ်တို့ ၌ ကျွေးမွေးမည်” ဟုသူတို့ကို ကိုယ်တော်စိတ်ချစေသည်။—ယေဇကျေလ ၃၄:၁၃။

ယေဟောဝါဘုရားသခင်သည် ဝိညာဉ်ရေးရေ တိုက်ကျွေးရန် အလွန်စိတ်ဝင်စားတော်မူ၏။ ဘုရားသခင့်ပလ္လင်တော်မှ စီးထွက်လာသော “အသက်ရေစီးရာမြစ်” တစ်ခုကို ဗျာဒိတ်ကျမ်းက ဖော်ပြသည်။ (ဗျာ. ၂၂:၁) ဤမြစ်ရေကိုသောက်သုံးဖို့ လူအားလုံးအားဖိတ်ခေါ်ထားသည်။ “အလိုရှိသောသူသည် အဖိုးကိုမပေးဘဲ အသက်ရေကိုယူ” သောက်နိုင်သည်။—ဗျာ. ၂၂:၁၇။

ဤပုံဆောင်အသက်ရေသည် ထာဝရအသက်ရရန် ဘုရားသခင်စီစဉ်ပေးရာများကို ပုံတင်ပြသည်။ ‘တစ်ဆူတည်းသော မှန်သောဘုရားသခင်နှင့် စေလွှတ်တော်မူသော ယေရှုခရစ်နှင့် သက်ဆိုင်သော အသိပညာကို ဆည်းပူးခြင်း’ ဖြင့် မည်သူမဆို ဤရေကို စ၍သောက်သုံးနိုင်ပါသည်။—ယောဟန် ၁၇:၃။