ဘုရားသခင့်နှုတ်မြွက်စကားတော်အားဖြင့် သင်ခွန်အားရသလော

အခက်အခဲများနှင့် ရင်ဆိုင်ကြုံတွေ့ ရသောအခါ သင်မည်သို့ ကိုင်တွယ်ဖြေရှင်းသနည်း။ ယေရှု၏အဖြစ်တွင် သက်ဆိုင်ရာကျမ်းချက်ကို ပြန်သတိရခြင်းကြောင့် စာတန်၏စိန်ခေါ်ချက်များကို ရင်ဆိုင်နိုင်ခဲ့သည်။ (မဿဲ ၄:၁-၁၁) ထိုနည်းတူ ဒါဝိဒ်မင်းသည် ကိုယ်ရေးကိုယ်တာအခက်အခဲများ ရင်ဆိုင်ကြုံတွေ့ရသောအခါ ဘုရားသခင့်နှုတ်မြွက်စကားတော်အားဖြင့် ခွန်အားရရှိခဲ့သည်။ သူက “အကျွန်ုပ်၏စိတ်ထဲမှာ စိုးရိမ်ကြောင့်ကြခြင်းများပြားသောအခါ နှစ်သိမ့်တော်မူခြင်းသည် အကျွန်ုပ်ကိုရွှင်လန်းစေပါ၏” ဟုမြွက်ဆိုခဲ့သည်။—ဆာလံ ၉၄:၁၉၊ သမ္မာ။

ထိုနည်းထပ်တူ အခက်အခဲပြဿနာများကြုံတွေ့ရသောအခါ အနှစ်သက်ဆုံး ကျမ်းချက်တစ်ချက်ကို ပြန်သတိရခြင်းက ကျွန်ုပ်တို့ကို စိတ်သက်သာစေ သို့မဟုတ် ခွန်အားရှိစေနိုင်သည်။ သာဓကအနေနှင့် ယခု အသက် ၈၉ နှစ်ရှိပြီဖြစ်သော ရက်ခ်စ်သည် ၁၉၃၁ မှစ၍ အချိန်ပြည့်ဧဝံဂေလိတရားဟောပြောသူဖြစ်လာခဲ့သည်။ သို့တိုင် သူဤသို့ပြောပြသည်– “ဓမ္မအမှုမှာ အထူးတာဝန်တစ်ခုပေးအပ်ခံရတဲ့အခါ အရည်အချင်းမပြည့်မီဘူးလို့ ကျွန်တော်ခံစားရလေ့ရှိတယ်။” သူမည်သို့ကိုင်တွယ်ဖြေရှင်းသနည်း။ “‘ယေဟောဝါကို စိတ်နှလုံးအကြွင်းမဲ့ကိုးစားလော့။ ကိုယ်ဉာဏ်ကိုအမှီမပြုနှင့်’ လို့ဆိုတဲ့ ကျွန်တော်အကြိုက်ဆုံးကျမ်းချက် နယပုံပြင် ၃:၅ ကိုပြန်သတိရလိုက်တယ်။ ဒီကျမ်းချက်ကို ပြန်သတိရပြီး လက်တွေ့ကျင့်သုံးခြင်းက တာဝန်တွေကို အောင်မြင်စွာထမ်းဆောင်ဖို့ ကူညီပေးပါတယ်။”

လူငယ်များပင်လျှင် အနှစ်သက်ဆုံး ကျမ်းချက်တစ်ချက်မှ အကျိုးရရှိကြသည်။ ခြောက်နှစ်သားဂျက်က မဿဲ ၂၄:၁၄ သည် သူအနှစ်သက်ဆုံးကျမ်းချက်ဖြစ်သည်ဟုဆို၏။ မိဘများနှင့်အတူ ဟောပြောခြင်း လုပ်ငန်းတွင်ပါဝင်ရန် ထိုကျမ်းချက်က လှုံ့ဆော်ပေးသည်။ သူက “စနေနေ့တိုင်း ကျွန်တော့်အမေ၊ အဖေ၊ အမတို့နဲ့အတူ သက်သေခံထွက်ရတာကို ကြိုက်တယ်” ဟုဆို၏။

တစ်ခါတစ်ရံ ယေရှုကဲ့သို့ သင်၏ယုံကြည်ခြင်းနှင့်ဆိုင်သော တိုက်ရိုက်စိန်ခေါ်ချက်များကို ရင်ဆိုင်ကြုံတွေ့ရသလော။ သို့ဖြစ်လျှင် ဖိလိပ္ပိ ၄:၁၃ သည် သင်အကြိုက်ဆုံး ကျမ်းချက်များထဲမှ တစ်ချက်ဖြစ်လာနိုင်သည်။ ဘုရင်ဒါဝိဒ်ကဲ့သို့ သင်၏ “စိတ်ထဲမှာ စိုးရိမ်ကြောင့်ကြခြင်းများပြား” သလော။ သို့ဖြစ်လျှင် ဖိလိပ္ပိ ၄:၆၊ ၇ ကိုပြန်သတိရခြင်းသည် ကိုင်တွယ်ဖြေရှင်းရန် အထောက် အကူရနိုင်သည်။ တစ်ခါတစ်ရံ သင်သည် ဘုရားသခင့်အမှုတော်ဆောင်ရာ၌ အကျိုးမဖြစ်ထွန်းဟု စိတ်အနှောင့်အယှက်ဖြစ်မိပါသလော။ သို့ဖြစ်လျှင် ၁ ကောရိန္သု ၁၅:၅၈ ကို  ပြန်သတိရခြင်းက အားရှိစေပါလိမ့်မည်။

သင့်လျော်ရာကျမ်းချက်များကို ပြန်အမှတ်ရခြင်းဖြင့် ကျွန်ုပ်တို့၏အသက်တာများကို တန်ခိုးနှင့်ပြုပြင်ရန် ဘုရားသခင့် နှုတ်မြွက်စကားတော်ကို အခွင့်ပေးကြသည်။ (ဟေဗြဲ ၄:၁၂) ဤသို့သော အနှစ်သက်ဆုံးကျမ်းချက်များသည် ကျွန်ုပ်တို့ကို ခွန်အားနှင့် နှစ်သိမ့်မှု ပေးနိုင်ပါသည်။—ရောမ ၁၅:၄။