ဖတ်ရလွယ်ငြား တိကျ၏လော
စက်တင်ဘာ၊ ၂၀၀၅ ခုနှစ်တွင် အင်္ဂလီကန်ချာ့ချ်သည် မိနစ် ၁၀၀ ကျမ်းစာ (The 100-Minute Bible) ကို ထုတ်ဝေကြောင်း ထက်သန်စွာအတည်ပြုခဲ့သည်။ မိနစ် ၁၀၀ ဖြင့်ဖတ်ပြီးရန်ရည်ရွယ်ထားသော ယင်းဘာသာပြန်ကျမ်းသစ်သည် ဟေဗြဲကျမ်းများကို တစ်မျက်နှာစီရှိသော အပိုင်း ၁၇ ပိုင်းနှင့် ဂရိကျမ်းများကို တစ်မျက်နှာစီရှိသောအပိုင်း ၃၃ ပိုင်းအဖြစ် အကျဉ်းချုံးထားသည်၊ သို့ဖြင့် သုံးသပ်သူတစ်ဦးပြောသကဲ့သို့ “ငြီးငွေ့ရာအပိုင်းများ” အားလုံးကို ချန်လှပ်ထားသည်။ ယင်းသည် ဖတ်ရလွယ်ငြား တိကျ၏လော။
ဘုရားသခင့်နာမတော်ယေဟောဝါကို ချန်လှပ်ထားရုံမက သမ္မာကျမ်းစာကို အလေးအနက်ထားလေ့လာသော ကျောင်းသားများသတိပြုမိမည့် အခြားသွေဖည်ရာများလည်းရှိသည်။ (ယေရမိ ၃၃:၂) ဥပမာ၊ အပိုင်း ၁ တွင် ဘုရားသခင်သည် “ကောင်းကင်နှင့်မြေကြီးကို ခြောက်ရက်အတွင်းဖန်ဆင်းသည်” ဟုဆိုထားသည်။ သို့သော် ကမ္ဘာဦး ၁:၁ တွင် “အစအဦး၌ ဘုရားသခင်သည် ကောင်းကင်နှင့်မြေကြီးကို ဖန်ဆင်းတော်မူ၏” ဟုရိုးရိုးလေးဖော်ပြထားသည်။ ယင်းနောက် မူရင်းမှတ်တမ်းက မြေကြီးနှင့်ပတ်သက်သော ဖန်ဆင်းခြင်းကိုဆက်လက်ဖော်ပြထားကာ ခြောက် “ရက်” သို့မဟုတ် အချိန်ကာလများကြာညောင်းခဲ့သည်။ ထို့နောက် ကမ္ဘာဦး ၂:၄ က ဖန်ဆင်းရာကာလတစ်ခုလုံးကို အကျဉ်းချုံးပြီး “ဘုရားသခင်သည် ကောင်းကင်နှင့်မြေကြီးကို ဖန်ဆင်းတော်မူသောနေ့ ဖန်ဆင်းရာကာလ” ဟုခေါ်ထားသည်။
မိနစ် ၁၀၀ ကျမ်းစာအရ သမာဓိစောင့်သိသူ ယောဘကို “လူတို့ကိုစွပ်စွဲသူအဖြစ်ပြုမူရန်တာဝန်ရှိသော . . . [ဘုရားသခင်၏] ကျေးကျွန်တစ်ပါးဖြစ်သူ စာတန်” က တိုက်ခိုက်ခဲ့သည်။ ဤတွင် ရှေ့နောက်မညီမှုကို သင်တွေ့ပါသလော။ “စာတန်” ဟူသောစကားလုံးမှာ “ဆန့်ကျင်သူ” ဟုအဓိပ္ပာယ်ရှိသည်။ ဘုရားသခင့်ကျေးကျွန်ဖြစ်မည့်အစား စာတန်သည် ဘုရားသခင်၏အဓိကရန်သူ၊ လူတို့ကိုစွပ်စွဲသူအဖြစ် မိမိကိုယ်ကိုခန့်အပ်သူဖြစ်သည်။—ဗျာ. ၁၂:၇-၁၀။
မိနစ် ၁၀၀ ကျမ်းစာ၏ ခရစ်ယာန်ဂရိကျမ်းပိုင်းနှင့်ပတ်သက်၍ကော အသို့နည်း။ သိုးနှင့်ဆိတ်ပုံဥပမာတွင် ကျမ်းသစ်က “အရေးမပါသူမည်သူမဆို” ကို အကူအညီပေးသူတို့သည် ယေရှု၏ မျက်နှာသာခံစားရသည်ဟုဆိုသည်၊ အမှန်တွင် ယေရှုက ကိုယ်တော်၏ခြေရာကို လိုက်လျှောက်သူ မိမိ “ညီတို့” အား ကောင်းမှုပြုသူတို့ကို ကောင်းချီးပေးသည်ဟု ဆိုလိုနေခြင်းဖြစ်သည်။ (မဿဲ ၂၅:၄၀) အကျဉ်းချုံးထားသောဗျာ.ကျမ်းက ယင်းကိုဖတ်ရှုသူတို့အား “ဗာဗုလုန်မြို့ကြီးဖြစ်သော ရောမသည် လုံးလုံးဖျက်ဆီးခံရမည်” ဟုဆိုထားသည်။ သို့သော် ကျမ်းစာကျောင်းသားများက မူရင်းစာပေများတွင် “ဗာဗုလုန်မြို့ကြီး” ကို ယင်းသို့ဖော်ပြထားခြင်းမရှိကြောင်း သိထားသည်။—ဗျာ. ၁၇:၁၅-၁၈:၂၄။
ကျွန်ုပ်တို့၏ဖန်ဆင်းရှင်ကိုသိရန်နှင့် ကိုယ်တော်၏ရည်ရွယ်ချက်ကိုနားလည်ရန် ရှာဖွေလေ့လာသူတို့အတွက် အပြည့်အစုံဖြစ်သောသမ္မာကျမ်းစာကို အစားထိုးနိုင်သည့်အရာ မရှိပါ။ မှန်သည်၊ သမ္မာကျမ်းစာကိုဖတ်ရာတွင် မိနစ် ၁၀၀ ထက်မကအချိန်ယူရမည်၊ သို့သော် ထိုသို့ပြုခြင်းက တန်ဖိုးမဖြတ်နိုင်သောဆုကျေးဇူးကို ရရှိစေမည်။ (ယောဟန် ၁၇:၃) သင်သည် ဤကြိုးပမ်းအားထုတ်မှုကို လက်ခံပြီး ကိုယ်တိုင် ဆုကျေးဇူးကို ရိတ်သိမ်းနိုင်ပါစေ။—၂ တိမောသေ ၃:၁၆၊ ၁၇။