စာရှုသူများထံမှ မေးခွန်းလွှာ

ဆာလံ ၁၄၄:၁၂-၁၅ ဟာ ဘုရားသခင့်လူမျိုးနဲ့ သက်ဆိုင်သလား၊ ဒါမှမဟုတ် အခန်းငယ် ၁၁ မှာဖော်ပြထားတဲ့ ဆိုးညစ်တဲ့ တိုင်းတစ်ပါးသားတွေနဲ့ သက်ဆိုင်သလား။ ဟီဘရူးစကားလုံးက နှစ်မျိုးစလုံးကို ရည်ညွှန်းတာဖြစ်နိုင်တယ်။ အယူအဆမှန်ကို နားလည်ဖို့ အောက်ပါအချက်တွေက ကူညီပေးတယ်–

1. ဒီဆာလံကျမ်းရဲ့ ရှေ့နောက်စကားတွေကို သုံးသပ်ကြည့်ပါ။ အခန်းငယ် ၁၂ မှာပါတဲ့ “ဒါဆိုရင်” ဆိုတဲ့ စကားလုံးက အခန်းငယ် ၁၂ ကနေ ၁၄ မှာ ဖော်ပြထားတဲ့ ကောင်းချီးတွေဟာ လူဆိုးတွေလက်ကနေ “ကယ်တင်” ခံရဖို့ တောင်းဆိုနေတဲ့ ဖြောင့်မတ်သူတွေကို ဆိုလိုတယ်လို့ နားလည်စေတယ်။ အခန်းငယ် ၁၅ မှာ နှစ်ကြိမ်သုံးထားတဲ့ “ပျော်ရွှင်ချမ်းမြေ့” ဆိုတဲ့ စကားလုံးကလည်း “ယေဟောဝါကို ဘုရားသခင်အဖြစ် ကိုးကွယ်နေ” တဲ့ အဲဒီဖြောင့်မတ်သူတွေနဲ့ပဲ သက်ဆိုင်တယ်။

2. ဒီနားလည်မှုက ဘုရားသခင်ရဲ့ သစ္စာရှိသူတွေကို ကတိပေးထားတဲ့ တခြားကျမ်းချက်ပါ ဘုရားကောင်းချီးတွေနဲ့ ကိုက်ညီတယ်။ ဒီဆာလံကျမ်းက အစ္စရေးလူမျိုးကို ရန်သူလက်ကနေ ဘုရားသခင် ကယ်လွှတ်ပြီး ပျော်ရွှင်ကြွယ်ဝစေမယ်ဆိုတဲ့ ဒါဝိဒ်ရဲ့ မျှော်လင့်ချက်ကို ဖော်ပြထားတယ်။ (ဝတ်. ၂၆:၉၊ ၁၀။ တရား. ၇:၁၃။ ဆာ. ၁၂၈:၁-၆) ဥပမာ၊ တရားဟောရာ ၂၈:၄ မှာ “ခင်ဗျားတို့ရဲ့ သားသမီးတွေ၊ မြေထွက်သီးနှံတွေ၊ တိရစ္ဆာန်သားပေါက်တွေ၊ သိုးနွားသားပေါက်တွေ ကောင်းချီးခံစားရလိမ့်မယ်” လို့ ဖော်ပြထားတယ်။ အဲဒီကတိအတိုင်း ဒါဝိဒ်ရဲ့သား ရှောလမုန်အုပ်ချုပ်ချိန်မှာ တိုင်းပြည်ဟာ ငြိမ်သက်အေးချမ်းမှုနဲ့ ကြွယ်ဝမှုခံစားခဲ့ရတယ်။ အဲဒီအပြင် ရှောလမုန်အုပ်ချုပ်မှုက မကြာခင်ရောက်လာတော့မယ့် မေရှိယအုပ်ချုပ်မှုကို တင်ကူးဖော်ပြတယ်။—၁ ဘု. ၄:၂၀၊ ၂၁။ ဆာ. ၇၂:၁-၂၀။

ဆာလံ ၁၄၄ နဲ့ပတ်သက်တဲ့ ဒီနားလည်မှုက ဆာလံကျမ်း တစ်ကျမ်းလုံးမှာပါတဲ့ ယေဟောဝါကျေးကျွန်တွေရဲ့ တောက်ပတဲ့ မျှော်လင့်ချက်ကို ပိုရှင်းလင်းစေတယ်။ အဲဒါကတော့ လူဆိုးတွေကို ဘုရားသခင် ဖျက်ဆီးပြီး ဖြောင့်မတ်သူတွေကို ထာဝရ ငြိမ်သက်ခြင်းနဲ့ ကြွယ်ဝတဲ့ ကောင်းချီးတွေ ခံစားစေမယ်ဆိုတဲ့ မျှော်လင့်ချက်ပါပဲ။—ဆာ. ၃၇:၁၀၊ ၁၁။