၁၉၉၀ ပြည့်နှစ် “စင်ကြယ်သောဘာသာစကား” ခရိုင်စည်းဝေးပွဲသို့လာရောက်ကြပါ

^၁ ၁၉၉၀ ခရိုင်စည်းဝေးပွဲ၏ အဓိကခေါင်းစဉ်မှာ “စင်ကြယ်သောဘာသာစကား” ဖြစ်၍ ၄င်းကိုတက်ရောက်ကြရန် ဖိတ်ခေါ်ပါသည်။ မြန်မာနိုင်ငံအတွက် ခရိုင်စည်းဝေးပွဲ ၄ နေရာစီစဉ်ထားသည်။ ၄င်းတို့ကို ရန်ကုန်မြို့တွင် အောက်တိုဘာ ၄-၇၊ ပြင်ဦးလွင်နှင့် ဟာခါးတွင် နိုဝင်ဘာ ၁-၄ နှင့် တာဟန်းတွင် နိုဝင်ဘာ ၈-၁၁ တွင် ကျင်းပမည်။

^၂ ဇေဖနိ ၃:၉ ပါယေဟောဝါ၏ပရောဖက်ပြုစကားက ဤသို့ဆိုသည်။ “အကယ်စင်စစ် လူမျိုးအပေါင်းတို့သည် ယေဟောဝါ၏အမှုတော်ကို တစ်ညီတစ်ညွတ်တည်း ဆောင်ရွက်မည်အကြောင်း၊ နာမတော်ကို ပတ္ထနာပြုစေခြင်းငှာ စင်ကြယ်သောဘာသာစကားကို သူတို့အား ငါပြန်ပေးမည်။” ဤနှစ်ခရိုင်စည်းဝေးပွဲသည် “စင်ကြယ်သောဘာသာစကား” ကိုသိမှတ်စေမည်သာမက ယင်းကိုသင်ယူ၍ သွက်လက်စွာပြောတတ်ရန် အဘယ်ကြောင့်အရေးကြီးကြောင်း နားလည်စေမည်သာမက ယင်းကိုသုံးစွဲနိုင်စွမ်းသည် ကမ္ဘာချီညီအစ်ကိုများအသင်းအပင်း၏စည်းလုံးမှုကို မည်သို့တည်ဆောက်ပေးကြောင်းကိုပါ တန်ဖိုးထားလေးစားစေမည်။

^၃ စောစောရောက်နေပါ။ ယေဟောဝါ၏အဖွဲ့အစည်းသည် ကိုယ်တော်၏ဝိညာဏစားပွဲတော်တွင် အစာစားသုံးကြရန် ဖိတ်ခေါ်နေပါသည်။ အချိန်မီရောက်နေခြင်းကား လေးစားတန်ဖိုးထားခြင်း၏လက္ခဏာဖြစ်သည်။ အမှန်မှာ ယင်း၏အဓိပ္ပာယ်ကား နေ့စဉ်စောစောရောက်နေပြီး အစီအစဉ်မစမီ နေရာယူကြရန်ဖြစ်သည်။ စည်းဝေးမစမီပြုလုပ်စရာများပြုလုပ်ခြင်းဖြင့် အချိန်အလုံအလောက်ရစေသည်။​—၁ ကော၊ ၁၄:၄၀။

^၄ လွန်ခဲ့သောနှစ်က ပိုလန်နိုင်ငံသို့ စည်းဝေးကြီးတက်ရန် ရောက်လာသူများသည် သူတို့ညီအစ်ကိုများ၏ ဘုရားဝတ်၌မွေ့လျော်ခြင်း၊ ချစ်ခြင်း၊ စည်းလုံးမှုကို မြင်တွေ့စွဲမှတ်ခဲ့သည်။ စည်းဝေးပွဲကြီးတွင်ရရှိမည့် ဝိညာဏပြင်ဆင်ချက်များအတွက် ကျေးဇူးတင်လေးစားမှုလည်း ထင်ရှားခဲ့သည်။ နံနက်တိုင်း စည်းဝေးကြီးကျင်းပရာနေရာတွင် ညီအစ်ကိုများ စောစောရောက်ရှိနေကြသည်။ အဖွင့်သီချင်းနှင့်ဆုတောင်းချက်မတိုင်မီ ထိုင်ခုံများတွင် အသင့်ထိုင်နေကြလေပြီ။ နိဂုံးချုပ်သီချင်းနှင့်ဆုတောင်းချက်အထိ ရှိနေရုံမက သူတို့ညီအစ်ကိုများနှင့် ပေါင်းသင်းနိုင်ရန် အစီအစဉ်ပြီးနောက်လည်း ချက်ချင်းမပြန်ကြသေးချေ။

^၅ ညီအစ်ကိုများ၏စည်းကမ်းသေဝပ်မှုသည်လည်း အတုယူစရာကောင်းသည်။ သူတို့နားထောင်၍ သင်ယူရန်ရောက်ရှိလာကြသည်။ ပေါ့ဇ်နန်နှင့်ခေါရ်ဇိုမြို့များတွင် အမိုးမရှိသောအားကစားကွင်းများ၌ မိုးရွာသော်လည်း စည်းဝေးအစီအစဉ်ကို အာရုံစူးစိုက်နားထောင်မှု မပြတ်စဲခဲ့ပါ။ ကလေးငယ်များပါအပါအဝင် လူငယ်များသည်လည်း စည်းကမ်းတကျ ငြိမ်သက်စွာဖြင့် စည်းဝေးအစီအစဉ်ကိုအာရုံစူးစိုက်နားထောင်ခဲ့သည်။ မိသားစုတို့သည် အတူတကွစုထိုင်ကြသည်။ ယေဟောဝါစားပွဲတော်ကို တန်ဖိုးထားလေးစားကြောင်း သူတို့ကျင့်ကြံပြုမူပုံသည် အလွန်အတုယူစရာကောင်းပါသည်။ သူတို့၏ပုံသက်သေမှ ကျွန်ုပ်တို့မည်သို့အကျိုးရယူမည်နည်း။

^၆ သူတစ်ပါး၏ကောင်းသောပုံသက်သေကို အတုယူခြင်းသည် ကျမ်းစာနှင့်ညီညွတ်သည်။ (၂ သက်၊ ၃:၇) ကျွန်ုပ်တို့၏ကိုယ်ရေးကိုယ်တာအခြေအနေများ တစ်ဦးနှင့်တစ်ဦးမတူသော်လည်း စည်းဝေးများမှ အကျိုးကျေးဇူးအများဆုံးရရှိလိုကြပါသည်။ စည်းဝေးခန်းမသို့အိမ်မှထွက်ချိန် နောက်ကျသည့်အတွက် စိတ်အနှောင့်အယှက်၊ စိုးရိမ်စိတ်များမဝင်စေရန် အချို့အိမ်ထောင်စုများသည် စောစောအိပ်ရာဝင်ခြင်းဖြင့်အကျိုးရှိသည်ကိုတွေ့ရှိခဲ့သည်။ အစီအစဉ်ဇယားအတိုင်း လိုက်နာလုပ်ကိုင်ခြင်းအားဖြင့် ကောင်းစွာအိပ်ပျော်ပြီး၊ နောက်နေ့ စောစောထွက်ရန် အသင့်ရှိကြပေမည်။ ယင်းသို့ပြုခြင်းဖြင့် သူတစ်ပါးအတွက်အနှောင့်အယှက်ဖြစ်စေသည့် စည်းဝေးစပြီးနောက်မှ ခန်းမသို့ရောက်လာခြင်းကို ရှောင်ကြဉ်နိုင်မည်။ ဤကိစ္စတွင် ကျွန်ုပ်တို့စာနာမှုပြခြင်းအားဖြင့် ယေဟောဝါကိုလေးစားတန်ဖိုးထားကြောင်း၊ ညီအစ်ကိုများကိုချစ်ပြီး ထောက်ထားကြောင်းတင်ပြခြင်းဖြစ်သည်။

^၇ လေးရက်စည်းဝေးပွဲ။ “စင်ကြယ်သောဘာသာစကား” ခရိုင်စည်းဝေးပွဲသည် လေးရက်ကြာရှည်မည်။ ကြာသပတေးနေ့၊ မွန်းလွဲ ၁:၃၀ အချိန်တွင်စပြီး ကြာသပတေး၊ သောကြာနှင့်စနေနေ့များတွင် ညနေ ၅:၁၀ အချိန်တွင်ပြီးဆုံးမည်။ တနင်္ဂနွေနေ့တွင်မူ ညနေ ၄ နာရီတွင်ပြီးမည်။ သောကြာနေ့မှ တနင်္ဂနွေနေ့အထိ စည်းဝေးအစီအစဉ်သည် နံနက် ၈:၃၀ အချိန်တွင်စမည်။ စင်ကြယ်သောဘာသာစကားပြောဆိုခြင်းနှင့်ပတ်သက်၍ အရေးကြီးအချက်အလက်များကို နေ့စဉ်ကြားနာရပါမည်။ ဟောပြောချက်များ၊ သရုပ်ပြခန်းများ၊ တွေ့ကြုံမှုများ၊ အခန်းဆက်ဟောပြောချက်များနှင့် ကျမ်းစာပြဇာတ်နှစ်ခုကိုတွေ့ရှိကြားနာရကြမည်။

^၈ စည်းဝေးအစီအစဉ်တစ်ခုမျှမလွတ်သွားစေရန် ဆုံးဖြတ်ပါ။ ယင်းသို့ပြုရန် မိမိအကြိုက်မိမိစွန့်ပြီး ကိုယ်ပိုင်အစီအစဉ်ကို အနည်းငယ်ပြုပြင်စရာလိုကောင်းလိုမည်။ အချို့မူ အလုပ်ခွင်၊ ကျောင်း၊ အစရှိသည်တို့တွင် အခွင့်တိုင်စရာ လိုကောင်းလိုပေမည်။ စည်းဝေးအစီအစဉ်အစမှအဆုံးတက်နိုင်ရန် အချို့ဆိုလျှင် ငွေရနိုင်သည့်နည်းလမ်းများကိုပင် အရှုံးခံကြသည်။ သို့ရာတွင်လွန်ခဲ့သောနှစ်က ပိုလန်နိုင်ငံတွင် စည်းဝေးပွဲတက်ရန် ညီအစ်ကိုများ မည်မျှစွန့်စားခဲ့သည်ကိုသတိရပါ။ သင့်စည်းဝေးပွဲတွင် အစမှအဆုံးရှိနေရန် တိုက်တွန်းချက်ဖြစ်စေသည်မဟုတ်လော။ ဤကိစ္စကိုအရေးပေးဆုတောင်းကာ တက်ရောက်ရန်အတတ်နိုင်ဆုံးကြိုးစားသူများကို ယေဟောဝါအမှန်ကူညီပါမည်။​—ဟေ၊ ၁၀:၂၄၊ ၂၅။

^၉ ပြီးခဲ့သောခရိုင်စည်းဝေးပွဲကိုတက်ရောက်ခဲ့ပြီးနောက် အိမ်ထောင်တစ်စုခံစားခဲ့ရသည့် ဝမ်းမြောက်မှုကို နားဆင်ပါ။ သူတို့ဤသို့ဆိုသည်။ “ကျွန်ုပ်တို့အားလုံး တန်ဖိုးထားလေးမြတ်ခဲ့သော တကယ်ကောင်းသည့်သွန်သင်ချက်များဖြစ်ပါသည်။ စာအုပ်အသစ်များကို ညီအစ်ကိုများပထမအကြိမ်ထုတ်ဝေကြေညာပုံကို အထူးသဘောကျပါသည်။ ကျွန်တော်နှင့်ကျွန်တော်.ဇနီး ယခင်နှစ်များထက် ပိုပေးကမ်းရန် တိုက်တွန်းခံခဲ့ရသည်။ ကျွန်ုပ်တို့သာမဟုတ်ပါ။ အစီအစဉ်သစ်ကြောင့် ခါတိုင်းထက်ပိုပြုလုပ်ရန် တိုက်တွန်းခံခဲ့ရသည်။ ယေဟောဝါရှင် ကျွန်ုပ်တို့အတွက်ပြုလုပ်ပေးလေသမျှနှင့် ဆက်ပြုပေးတော်မူသည့်အရာများအတွက် ပေးဆပ်၍ကုန်နိုင်မည်ကားမဟုတ်ပါ။”

^၁၀ စူးစိုက်နားထောင်။ ဆာလံ ၅၀:၇ တွင်ယေဟောဝါဤသို့ဆိုသည်။ “ငါ၏လူတို့ နားထောင်ကြ။ ငါပြောမည်။” ထိုကြောင့် စည်းဝေးပွဲအစီအစဉ်တွင် စင်မြင့်ပေါ်မှတင်ဆက်နေသည့်အကြောင်းနှင့် မဆက်စပ်သောမြင်ကွင်းများ၊ အသံဗလံများကြောင့် အာရုံမလွင့်ပါစေနှင့်။ စင်ကြယ်သောဘာသာစကားကို သွက်လက်စွာပြောတတ်ချင်စိတ်ကြောင့် ဟေရှာယ ၅၅:၂ ပါ ယေဟောဝါ၏တောင်းဆိုချက် “ငါ့စကားကိုစေ့စေ့နားထောင်ကြ” ဟူသောစကားနှင့် ကိုက်ညီနေရမည်။

^၁၁ ဤစည်းဝေးပွဲတွင်တင်ဆက်မည့်အကြောင်းအရာအားလုံးသည် ကျွန်ုပ်တို့၏ဝိညာဏကောင်းစားရေးအတွက်ဖြစ်သည်။ ယေဟောဝါလုပ်ငန်း၌ သစ္စာတည်ကြည်ရန်ဆုံးဖြတ်ချက်ကိုလည်းကောင်း၊ ညီအစ်ကိုများနှင့်စည်းလုံးနေရန်လည်းကောင်း များစွာအကူအညီပေးလိမ့်မည်။ လောလောလတ်လတ် လိုအပ်ရာများကို စည်းဝေးကြီးတွင်ဖြည့်စွက်ခံရပြီး ယေဟောဝါအဖွဲ့အစည်းနှင့် ရင်ပေါင်တန်းစေပါမည်။ အာရုံမစူးစိုက်လျှင် နောက်ကျန်ရစ်ခဲ့မည်။ စည်းဝေးပွဲမှ အကျိုးအပြည့်အဝရရှိရန် အစီအစဉ်တွင်လုံးလုံးစိတ်ဝင်စားနေရမည်။ ထိုနောက် သင်ယူသည့်အရာကို လက်တွေ့ကျင့်သုံးရမည်။​—ယာ၊ ၁:၂၅။

^၁၂ အစီအစဉ်ကို ပိုအာရုံစူးစိုက်ကါ ကြားသိသောအကြောင်းများကို မှတ်မိနေရန် ကျွန်ုပ်တို့ပြုလုပ်နိုင်သည့်အရာ တစ်ခုခုရှိပါသလော။ ရှိပါသည်။ အစီအစဉ်အတွင်း အကျိုးရှိအကျင့်ဖြစ်သည့် မှတ်စုများယူခြင်းအကျင့်ကို စည်းဝေးပွဲလာသူအများ ပျိုးထောင်ခဲ့ပြီ။ စည်းဝေးပွဲတက်ရာတွင် ကျမ်းစာ၊ သီချင်းစာအုပ်၊ နှင့်မှတ်စုယူရန် လိုအပ်သည့်အရာများကို အမြဲယူဆောင်ထားရမည်။ မှတ်စုယူခြင်းကို အကျိုးမရှိဟုသင်အထင်ရှိခဲ့လျှင် “စင်ကြယ်သောဘာသာစကား” စည်းဝေးတွင် မှတ်စုယူ၍စမ်းကြည့်ပါ။ ဟောပြောလေသမျှကို သင်အာရုံစူးစိုက်နိုင်ပြီး စိတ်လေမလွင့်စေရန် များစွာအထောက်အကူပြုကြောင်း သင်သတိပြုမိမည်။

^၁၃ မှတ်စုများသည် အကျယ်တဝင့်၊ သို့မဟုတ် အသေးစိတ်ဖြစ်စရာမလိုပါ။ အဓိကအချက်တစ်ချက်အတွက် ဝါကျတစ်ခုနှစ်ခုသာလိုအပ်ပေမည်။ လုပ်ငန်းတော်စည်းဝေးတွင် စည်းဝေးပွဲကြီးအစီအစဉ်ကို အဓိပ္ပာယ်ရှိရှိပြန်သုံးသပ်ခြင်းငှာ အကြီးအကဲများသည် မှတ်စုများကိုစနစ်တကျစီစဉ်ထားပေးလျှင်အကျိုးရှိကြောင်း တွေ့ရှိလိမ့်မည်။ ၄င်းပြင် သူတို့၏သွန်သင်၍ သိုးထိန်းခြင်းလုပ်ငန်းအတွက် စည်းဝေးပွဲကြီးတွင်ကြားသိရသောအချက်အလက်များကို အသုံးချလိုမည်။

^၁၄ သီချင်းနှင့် ဆုတောင်းခြင်း။ ကိုယ်တော်အားချီးမွမ်းသီချင်းများသီဆိုခြင်းအားဖြင့် ယေဟောဝါ၏ဘုန်းတော်ထင်ရှားစေသည်။ ယင်းကား ကျွန်ုပ်တို့ဝတ်ပြုမှုအဝင်ဖြစ်သည်။ စိတ်အားထက်သန်စွာဆုတောင်းခြင်းအားဖြင့် ကိုယ်တော့်လူမျိုးချဉ်းကပ်ကြသည့်အခါ ယေဟောဝါနှလုံးရွှင်လန်းတော်မူသည်။ (သု၊ ၁၅:၈ခ) ညီအစ်ကိုညီအစ်မရာချီတို့နှင့်အတူ တစ်စည်းတစ်လုံး ဆုတောင်းသီချင်းဆိုခြင်းအားဖြင့် ယေဟောဝါအားချီးမွမ်းခွင့်ကို ခရိုင်စည်းဝေးပွဲကြီးများတွင် ပြုလုပ်နိုင်ကြသည်။ သို့ရာတွင် ဝတ်ပြုရေးအဝင်ဖြစ်သော ဤအမှုများကို ကျွန်ုပ်တို့တွင်အချို့သူတို့သည် လေးစားမှုပြရန် ပျက်ကွက်ခဲ့ကြပြီ။ မည်သို့အားဖြင့်နည်း။ စည်းဝေးပွဲသို့ ဆုတောင်းနေစဉ်၊ သို့မဟုတ် အစသီချင်းဆိုနေစဉ် နောက်ကျရောက်လာကြခြင်းအားဖြင့်ဖြစ်သည်။ သို့မဟုတ်လျှင်လည်း စည်းဝေးအစီအစဉ်အပြီးတွင် သီချင်းဆိုနေစဉ် သို့မဟုတ် ဆုမတောင်းမီ ထိုင်ခုံများမှထွက်သွားတတ်ကြသည်။ အဘယ်ကြောင့်နည်း။ တစ်ခါတစ်ရံ ဤသို့ပြုရန် အရေးအကြောင်းပေါ်လာမည်။ သို့ရာတွင် စောစောအိမ်ပြန်နိုင်ရန်၊ အစာစားနိုင်ရန်၊ သီချင်းဆိုခြင်း၊ ဆုတောင်းခြင်းအခွင့်အရေးကိုစွန့်လွှတ်ခြင်းသည် ယေဟောဝါ၏စားပွဲတော်ကို လျောက်ပတ်စွာတန်ဖိုးထားလေးစားခြင်းဖြစ်ပါမည်လော။​—မ၊ ၆:၃၃။

^၁၅ ကျွန်ုပ်တို့၏ဝိညာဏတိုးတက်မှုကို လောဘစိတ်နှင့် ကိုယ်ကျိုးရှာစိတ်အစရှိသည့် လောကီဆန်သော၊ ဘုရားဝတ်၌မွေ့လျော်ခြင်းနှင့်မအပ်စပ်သော ငါသာပဓာနစိတ်ထားကို ကိုယ်၌မရှိစေရန် အထူးသတိပြုသင့်သည်။ လွန်ခဲ့သောနှစ်က ပိုလန်နိုင်ငံတွင် ကျွန်ုပ်တို့ညီအစ်ကိုများသည် မွန်မြတ်သောအရာများကို တန်ဖိုးထားလေးမြတ်ခဲ့သည့်နည်းတူ ပြုမူကြစို့။ ကျွန်ုပ်တို့၏ဝတ်ပြုမှုတွင် အလွန်မြင့်မြတ်လှသည့် ဆုတောင်းခြင်းနှင့် ယေဟောဝါအားချီးမွမ်းသီချင်းများဆိုခြင်းကို လျောက်ပတ်စွာလေးစားမှုပြခြင်းအားဖြင့် ထိုညီအစ်ကိုများနှင့်အတူ ရင်ပေါင်တန်းသွားလာကြစို့။​—ဆာ၊ ၆၉:၃၀။

^၁၆ ကျွန်ုပ်တို့၏ခရစ်ယာန်အကျင့်များ။ စည်းဝေးပွဲကြီးများတွင် ကျွန်ုပ်တို့၏ခရစ်ယာန်အကျင့်များနှင့် ဝတ်စားဆင်ယင်မှုကြောင့် ယေဟောဝါသက်သေများအဖြစ် နာမည်ကောင်းရရှိစေခဲ့ပြီ။ ယင်းကား ယေဟောဝါကိုဝတ်ပြုကိုးကွယ်ရာတွင် ကျွန်ုပ်တို့စိတ်ထက်သန်၍ စည်းဝေးပွဲတက်ခြင်းကို အပျော်အပါးတစ်ခုကဲ့သို့သာ သဘောမထားကြခြင်းကြောင့်ဖြစ်သည်။ ဤအထူးအချိန်အခါများတွင် စုစည်းဝေးကြသောအခါ ခရစ်ယာန်သိက္ခာနှင့် ဝိညာဏစိတ်ဓာတ်ကိုမွေးမြူကာ အချိန်အခါမရွေး ဓမ္မအမှုဆောင်များပီသစွာကျင့်ကြံပြုမူသင့်သည်။​—၁ ကော၊ ၁၀:၃၁-၃၃။

^၁၇ သို့ရာတွင် စည်းဝေးပွဲလာသူအချို့သည် သူတို့၏ပြုမူကျင့်ကြံပုံ၊ ဝတ်စားပုံ၊ စကားပြောဆိုပုံတွင် လျော့ရဲပြီးမတော်လျော်သည်ကိုတွေ့ရှိရ၍ ဝမ်းနည်းစရာဖြစ်ပေသည်။ ဒေသဆိုင်ရာအသင်းတော်၊ သို့မဟုတ်စည်းဝေးပွဲကြီးတွင် ဤသို့သောအကျင့်အကြံများ ထင်ရှားလာလျှင် မည်သို့ပြုသင့်သနည်း။ ပြုပြင်ပြောင်းလဲမှုရှိစေခြင်းငှာ ဝိညာဏအရည်အချင်းရှိသူတို့သည် မေတ္တာပါပါဆုံးမပေးသင့်သည်။ (ဂလ၊ ၆:၁။ ဧ၊ ၄:၁၁၊ ၁၂) စင်ကြယ်သောဘာသာစကားကိုပြောဆိုကြသောကြောင့် ကျွန်ုပ်တို့၏နာမည်ကောင်းနှင့် မြင့်မားသောစာရိတ္တစံချိန်များကို မြှင့်တင်ထားစေသင့်သည်။

^၁၈ စည်းဝေးပွဲကြီးတစ်ခုကိုတက်ရောက်ခဲ့သူတစ်ဦး ဤစာတိုကလေးကို အလှူငွေသေတ္တာတွင်ထည့်ထားခဲ့သည်။ “စည်းဝေးအစီအစဉ်ကို ကျွန်တော်တကယ်သဘောကျတယ်။ ညီအစ်ကိုတစ်ယောက်နှင့် ကျမ်းစာသင်ယူတော့မည်။ သင်တို့စည်းဝေးများကို ပထမအကြိမ်တက်ရောက်ခဲ့ခြင်းဖြစ်သည်။ တနင်္ဂနွေနေ့တိုင်း ချာ့ချ်တက်ရသည့်အတွက် စနေနေ့တစ်ရက်သာတက်မည်ဟုကြံစည်ခဲ့သည်။ သို့သော် ကျွန်ုပ်နှလုံးထဲစွဲလန်းမှတ်သားစရာဖြစ်ရလွန်းသည့်အတွက် ဒီကနေ့လည်းစည်းဝေးပြန်တက်ခဲ့သည်။ တစ်အိမ်ထောင်လုံးကိုလည်းခေါ်လာခဲ့ပါသည်။ သို့သော် ဟောပြောသူဟောနေစဉ် လူကြီးများ အသံကျယ်လောင်စွာစကားပြောဆိုနေကြသည့်အတွက် စိတ်အနှောင့်အယှက်ဖြစ်ခဲ့ရသည်။”

^၁၉ စည်းဝေးပွဲအချို့တွင် ဆယ်ကျော်သက်အချို့သည် အတူတကွစုထိုင်ကြပြီး စည်းဝေးအစီအစဉ်ကိုအာရုံပြုကြမည့်အစား တစ်ဦးကိုတစ်ဦးစာရေး၊ တိုးတိုးစကားပြောဆို၍ အနှောင့်အယှက်ပေးကြသည်ကို တွေ့ရှိခဲ့ရပါသည်။ ဤသို့ပြုမူခြင်းကား သူတို့သည်မိဘအုပ်ထိန်းမှုလိုနေသေး၍ မိသားစုနှင့် တစ်စုတစ်ရုံးထိုင်သင့်ကြောင်း ထင်ရှားသည်။ တာဝန်သိတတ်သောမိဘများ ဤကိစ္စများ ကိုဂရုပြုကာ သူတို့သားသမီးများလိုအပ်သည့်လမ်းပြမှုကိုပေးကြမည်။ (ဧ၊ ၆:၄) ညီအစ်ကို၊ ညီအစ်မ၊ ကလေးသူငယ်များသိသင့်သည်ကား စည်းဝေးအစီအစဉ်စသည်နှင့် စကားပြောဆိုနေစရာမဟုတ်တော့ဘဲ နားထောင်နေကြရန်ဖြစ်သည်။​—တရား၊ ၃၁:၁၂။

^၂၀ စာနာမှုနှင့် ရည်မွန်သောအကျင့်များပြသင့်သည့် အခြားတစ်နေရာသည် ကျွန်ုပ်တို့တည်းခိုရာနေရာတွင်ဖြစ်သည်။ ကျေးဇူးတင်စိတ်နှင့် စာနာစိတ်ပြရမည်။ ကိုယ်မဝင်သင့်သောနေရာများသို့မဝင်ရန် သတိပြုပါ။ အခွင့်မရှိဘဲ အိမ်ရှင်၏ပစ္စည်းများကို အသုံးမပြုပါနှင့်။ စည်းဝေးပွဲကြီးတက်သည့်အခါ သင့်အပြုအမူသည် တစ်ဖွဲ့လုံးကိုကိုယ်စားပြုသည်။ သင့်အကျင့်ကိုကြည့်ကာ တစ်ဖွဲ့လုံးကိုသတ်မှတ်လိမ့်မည်။ ထိုကြောင့် ယေဟောဝါသက်သေစည်းဝေးပွဲလာသူတစ်ဦးအနေနှင့် မြို့တစ်မြို့သို့ရောက်သည့်အခါ ကောင်းစွာဆင်ခြင်းသုံးသပ်၊ ထိုးထွင်းဉာဏ်သုံးပြီး ‘သတင်းကောင်းအလိုငှာ အရာခပ်သိမ်းကိုပြုမူပါလေ။’​—၁ ကော၊ ၉:၁၉-၂၃။

^၂၁ ကျွန်ုပ်တို့ဝတ်စားပုံ၊ ကျင့်ကြံပုံ၌ သန့်ရှင်းမှုနှင့်စာနာမှုရှိရန်လိုအပ်သည်မက သူတစ်ပါးပစ္စည်းကို အသုံးပြုပုံပြုနည်းတွင်လည်း ထိုအရည်အချင်းများတင်ပြရမည်။ စာနာမှုမရှိသောအကျင့်အကြံတို့သည် ကျွန်ုပ်တို့၏နာမည်ကောင်းကို ပျက်စီးစေသည်။ လာမည့်ခရိုင်စည်းဝေးကြီးများတွင် “ငါတို့ကယ်တင်ရှင် ဘုရားသခင်၏တရားတော်အရောင်အဝါကို ပိုမို၍ထွန်းတောက်စေကြ” ရန်အားလုံးကြိုးစားကျင့်ကြံကြစို့လေ။​—တိ၊ ၂:၁၀။

^၂၂ မိဘများအတွက်။ “စင်ကြယ်သောဘာသာစကား” ခရိုင်စည်းဝေးကြီးသို့ ကလေးငယ်များနှင့် ဆယ်ကျော်သက်တို့ကို ဖိတ်ခေါ်ထားပါသည်။ သူတို့လည်း စင်ကြယ်သောဘာသာစကားကို သွက်လက်စွာပြောဆိုရမည်။ ခရစ်ယာန်စည်းဝေးများအားလုံးတွင် ကလေးသူငယ်များ အာရုံစူးစိုက်နေတတ်လာပြီး စည်းဝေးအစီအစဉ်တွင် စိတ်ဝင်းစားကြသည်ကိုတွေ့ရှိရခြင်းကား အလွန်ကောင်းမြတ်ပေသည်။ (ဆာ၊ ၁၄၈:၁၂၊ ၁၃) သို့သော် မိဘများ၏ပုံသက်သေနှင့် ကြီးကြပ်ကွပ်ကဲမှုပေါ် များစွာမူတည်သည်။ လူငယ်များစွာ မှတ်စုများယူရန် ကောင်းစွာလေ့ကျင့်မှုရရှိထားကြပြီ။ မိဘတစ်ဦးအနေနှင့် မှတ်စုများယူရန် သင့်ကလေးသူငယ်များကို လေ့ကျင့်မပေးရသေးပါက စည်းဝေးပွဲကြီးမတိုင်မီ ကျန်ကြွင်းသည့်အချိန်အတွင်း လေ့ကျင့်ပေးထားပါ။ ဟောပြောသူများတင်ပြပြောဆိုသည့် အဓိကစကားလုံးနှင့်ကျမ်းချက်များကို စာရေးတတ်ခါစသူငယ်များကိုပင် ရေးမှတ်ရန် သွန်သင်ပေးနိုင်ပါသည်။ မိဘအချို့သည် တည်းခိုရာအိမ် သို့မဟုတ် အိမ်ပြန်နေကြစဉ် တစ်နေ့တာအစီအစဉ်၏အဓိကအချက်များကို ပြန်ဆွေးနွေးတတ်ကြသည်။

^၂၃ ကလေးသူငယ်အများ ဆော့ကစားတတ်သည်ကို မိဘအများသဘောပေါက်ထားကြသည်။ သူတို့သည် ဘဝအတွေ့အကြုံနည်းသေး၍ မရင့်ကျက်ကြသေးချေ။ ထိုကြောင့် ဘယ်အချိန်တွင် အာရုံစူးစိုက်ရမည်၊ စည်းဝေးချိန်တွင် မည်သို့ကျင့်ကြံပြုမူရမည်ကို သွန်သင်ပေးရန်လိုအပ်သည်။ ယင်းသို့ပြုရန် မိဘများကောင်းစွာ အုပ်ထိန်းကြီးကြပ်ရန်လိုသည်။ အချို့မိဘများ ဤကိစ္စတွင် ပေါ့လျော့ခဲ့ပြီ။ တစ်ခါတစ်ရံ ဆုတောင်းနေစဉ် မိဘများရိုသေလေးမြတ်စွာနေကြသော်လည်း သူတို့ကလေးများသည် ဆော့ကစားနေတတ်သည်။ သို့မဟုတ်သူတစ်ပါးအာရုံကို အနှောင့်အယှက်ပေးနေကြသည်။ ဆုတောင်းချိန်တွင်ပင် သားသမီးများဘာလုပ်နေသည်ကို မိဘများသိသင့်သည်။ အစည်းဝေးအစီအစဉ်အတွင်း ထိုင်ခုံမှထသွားသည့်အခါလည်း သူတို့ဘာလုပ်နေကြပါသနည်း။ စည်းဝေးပွဲကြီးအစီအစဉ်အတွင်းနှင့် ၄င်းနောက်တွင် မိမိတို့ကလေးကိုကြီးကြပ်ကွပ်ကဲမှုမရှိ လွှတ်ထားပါသလော။​—သု၊ ၂၉:၁၅။

^၂၄ တစ်ခါတစ်ရံ ဟောပြောသူစကားကိုအာရုံပြု နားထောင်နေမည့်အစား မိခင်အချို့သည် ခန်းမအပြင်ဘက်တွင် အခြားနို့တိုက်မိခင်များနှင့် စကားစမြည်ပြောဆိုနေကြသည်ကိုတွေ့ရှိရ၏။

^၂၅ အစာဝယ်စားရန်လက်မှတ်များကို ကြိုတင်ရောင်းပေးမည်။ အတတ်နိုင်ဆုံးဈေးသက်သာရန် ကြိုးစားပေးပြီး နံနက် ၁၁ နာရီနှင့် ညနေ ၅ နာရီတွင် ထမင်းကျွေးပါမည်။ အားလုံးချက်ချင်းတန်းစီကြပြီး အစာစားရန်သတ်မှတ်ထားသည့်နေရာကို သန့်ရှင်းစွာထားကာ အစာစားသုံးချိန်အထူးကြာရှည်မနေစေရန် ကြိုးစားပါ။ ဤသို့ပြုခြင်းဖြင့် သန့်ရှင်းရေးဌာန၊ အစာစားရန် မိမိတို့အလှည့်ကိုတန်းစီစောင့်နေသူများအား စာနာမှုပြကြောင်း တင်ပြကြမည်။

^၂၆ ပြင်ဆင်ထားသည့် ဝိညာဏခဲဖွယ်စားဖွယ်ပွဲမှ အကျိုးများစွာရရှိရန် နှစ်စဉ်စည်းဝေးရာနေရာတစ်နေရာတွင် ယေဟောဝါလူမျိုးစည်းဝေးခွင့်ရခြင်းကို တန်ဖိုးထားလေးစားကြပါသည်။ ဤစည်းဝေးများတွင် စီစဉ်ပေးထားသည့် ကျွန်ုပ်တို့အတွက်အကျိုးပြုသောအရာခပ်သိမ်းတို့ကိုလည်း ကျေးဇူးတင်ကြပါသည်။ ကုန်ကျစရိတ်များစွာအကုန်ခံ၊ အသေချာစီစဉ်ပြီး ထိုင်ခုံအလုံအလောက်၊ အသံချဲ့စက်ကောင်းကောင်း၊ အဆင်ပြေသောအစားအသောက်နှင့် စည်းဝေးပွဲကြီးတက်ရောက်ခြင်းကို ပျော်ရွှင်စရာ၊ ဝိညာဏလန်းဆန်းမှုဖြစ်စေသည့် အကျိုးပေးအစီအစဉ်အမျိုးမျိုးကို ပြုလုပ်စီစဉ်ထားပါသည်။

^၂၇ ဤကုန်ကျစရိတ်များကို ကမ္ဘာချီအသင်းမလုပ်ငန်းအတွက် သင့်အလှူငွေများဖြင့် ထမ်းဆောင်ပေးပါသည်။ သင်တို့အတွက် အခန့်သင့်ဖြစ်စေရန် ရှင်းလင်းစွာရေးမှတ်ထားသည့် အလှူငွေသေတ္တာများကို စည်းဝေးပွဲခန်းမတစ်လျှောက် ထားပေးထားပါသည်။ အလှူငွေများအတွက် ကျေးဇူးတင်ပါသည်။ ဤနည်းဖြင့် နိုင်ငံတော်ရေးရာကို သင်တို့ရက်ရောစည်းလုံးစွာထောက်ပံ့ကြသည့်အတွက် အသင်းမကလည်း သင်တို့ကိုကြိုတင်ကျေးဇူးတင်လိုပါသည်။​—လု၊ ၆:၃၈။

^၂၈ “စင်ကြယ်သောဘာသာစကား” ခရိုင်စည်းဝေးပွဲသို့ လာရောက်ကြပါ။ “စင်ကြယ်သောဘာသာစကား” ခရိုင်စည်းဝေးပွဲကိုတက်ရောက်ခြင်းနှင့် စည်းဝေးအစီအစဉ်ကို အာရုံပြုဂရုစိုက်နားထောင်ခြင်းအားဖြင့် ယေဟောဝါရှင်သည် ကျွန်ုပ်တို့အားစင်ကြယ်သောဘာသာစကားကို အဘယ်ကြောင့်ပေးထားကြောင်း အပြည့်အဝသဘောပေါက်လာမည်။ ညီအစ်ကိုများနှင့် စည်းလုံးခြင်းကိုအနှောင့်အယှက်ပြုနိုင်သည့် ကိုယ်ကျိုးရှာစိတ်ထားများကို အဘယ်ကြောင့်အမြဲရှောင်ကြဉ်သင့်ကြောင်းကိုလည်းသိနားလည်လာမည်။ စည်းဝေးပွဲအဖွင့်သီချင်းမှစ တနင်္ဂနွေနေ့နိဂုံးချုပ်ဆုတောင်းချက်အထိ အစီအစဉ်အားလုံးကိုတက်ရောက်ဖြစ်ရန် ယခုကတည်းကစီစဉ်ထားပါလေ။