ဟောပြောခြင်းက ကျွန်ုပ်တို့ကိုခြားနားစေ

^၁ “ယေဟောဝါသက်သေတွေကို တခြားဘာသာတွေနဲ့ ကွာခြားစေတဲ့အရာကဘာလဲ” ဟူ၍လူအများမေးကြ၏။ သင်မည်သို့ပြန်ဖြေမည်နည်း။ ကျွန်ုပ်တို့၏ကျမ်းစာအခြေပြုယုံကြည်ချက်အချို့ကို သင်ရှင်းပြနိုင်သည်။ သို့သော် ကျွန်ုပ်တို့၏ဓမ္မအမှုက ကျွန်ုပ်တို့ကို အခြားဘာသာများနှင့် မည်မျှခြားနားစေသည်ကိုလည်းထောက်ပြဖို့ သင်စဉ်းစားဖူးသလော။—မ. ၂၄:၁၄; ၂၈:၁၉၊ ၂၀။

^၂ ယနေ့၊ မိမိတို့၏ယုံကြည်ချက်များကို အခြားသူများအားဝေမျှရန် လှုံ့ဆော်ခံရကြသော ဘာသာရေးကိုင်းရှိုင်းသူများမှာ နည်း၏။ သူတို့သည် ကဲသာ၏ဥပဒေများကိုနာခံလျှင်၊ ကိုယ်ကျင့်တရားကောင်းသည့်အသက်တာနှင့်နေထိုင်လျှင် သို့မဟုတ် အခြားသူတို့အား ကောင်းမှုများပြုလျှင် လုံလောက်သည်ဟု ယူဆကြပေမည်။ သို့သော် ကယ်တင်ခြင်းရဖို့နှင့်စပ်လျဉ်း၍ သမ္မာကျမ်းစာဖော်ပြထားရာများကို အခြားသူများ သိရှိရန်ကူညီပေးဖို့ တာဝန်မရှိဟု သူတို့ယူဆကြသည်။ ကျွန်ုပ်တို့မည်သို့ကွာခြားကြသနည်း။

^၃ ကျွန်ုပ်တို့၏ဇွဲရှိသောဓမ္မအမှုသည် အခြားဘာသာများ၏လုပ်ဆောင်မှုများနှင့် အလွန်ကွာခြားကြောင်း သိသာထင်ရှားသည်။ အနှစ် ၁၀၀ ကျော်တိုင်တိုင် မျက်မှောက်ခေတ်သက်သေခံများသည် ကနဦးခရစ်ယာန်များကိုတုပကာ သတင်းကောင်းကို မြေကြီးစွန်းတိုင်အောင် ဝီရိယရှိရှိဟောပြောခဲ့ကြသည်။ ထိုသို့လုပ်ဆောင်ရာတွင် ကျွန်ုပ်တို့၏ဦးတည်ချက်မှာ လူများနိုင်သလောက်များများအား သူတို့၏အသက်တာကို ဘုရားသခင်၏အလိုတော်နှင့်ညီညွတ်စေရန် ကူညီပေးဖို့ဖြစ်သည်။—၁ တိ. ၂:၄; ၂ ပေ. ၃:၉။

^၄ သင့်ဂုဏ်သတင်းကား အဘယ်နည်း။ ဘုရားသခင့်နှုတ်ကပါဌ်တော်ကို ဇွဲရှိရှိဟောပြောသူတစ်ဦးအဖြစ် သင့်ကိုသိရှိကြသလော။ (တ. ၁၇:၂၊ ၃; ၁၈:၂၅) သင့်ဟောပြောခြင်းလုပ်ငန်းကြောင့် သင့်အိမ်နီးချင်းများသည် သူတို့၏ဘာသာနှင့် သင့်ဘာသာကွာခြားချက်ကို အလွယ်တကူတွေ့ မြင်ကြသလော။ မိမိ၏မျှော်လင့်ချက်ကို အခြားသူများအားဝေမျှဖို့ စိတ်အားထက်သန်သူတစ်ဦးအဖြစ် သင့်ကို သိရှိကြသလော။ ဓမ္မအမှုတွင်ပါဝင်ရန်အတွက် ပုံမှန်လုပ်ရိုးလုပ်စဉ်တစ်ခုရှိသလော။ ကျွန်ုပ်တို့သည် ကျွန်ုပ်တို့၏နာမည်အားဖြင့်သာမက ထိုနာမည်ကဖော်ပြသည့်အရာ—ယေဟောဝါအကြောင်းသက်သေခံခြင်း—ကိုလုပ်ဆောင်ခြင်းအားဖြင့်လည်း မိမိကိုယ်ကိုခြားနားစေကြသည်။—ဟေရှာ. ၄၃:၁၀။

^၅ ဘုရားသခင်နှင့် အိမ်နီးချင်းကိုချစ်ခြင်းက ဟောပြောခြင်းလုပ်ငန်းတွင်ပါဝင်ရန် ကျွန်ုပ်တို့ကိုလှုံ့ဆော်ပေး၏။ (မ. ၂၂:၃၇-၃၉) ယင်းကြောင့် ကျွန်ုပ်တို့သည် ယေရှုနှင့်တမန်တော်များနည်းတူ အခြားသူများအား နိုင်ငံတော်သတင်းကိုဝေမျှရန် ရသမျှအခွင့်အရေးကိုအသုံးချလိုကြသည်။ သတင်းကောင်းကို နားထောင်လိုသူများအား ဇွဲနပဲဖြင့် ဆက်၍ဟောပြောကြစို့။ ထိုသို့လုပ်ဆောင်ခြင်းသည် နှလုံးရိုးဖြောင့်သူများအား “ဘုရားသခင်၏အမှုတော်ကိုဆောင်သောသူ၊ မဆောင်သောသူတို့ကို ပိုင်းခြား၍သိ” ရန်ကူညီပေးပါမည်။—မာလ. ၃:၁၈။