သွေးအလိုမရှိ—စိန်ခေါ်ချက်ကို ဆေးဝါးရင်ဆိုင်ခြင်း  ဗီဒီယိုခွေကို သင်ကြည့်ရမည်

သွေးမဲ့ဆေးဝါးနယ်ပယ်တွင် ရရှိနိုင်သောရွေးချယ်ပိုင်ခွင့်များအကြောင်း သင်မည်မျှသိသနည်း။ သွေးအစား အခြားကုသနည်းအချို့မှာ အဘယ်အရာများဖြစ်ကြောင်းနှင့် ယင်းတို့သည် မည်သို့ထိရောက်ကြောင်း သင်နားလည်သလော။ ဤဗီဒီယိုခွေကိုကြည့်ပြီး အောက်ပါမေးခွန်းများဖြင့် သင်၏အသိပညာကို အကဲဖြတ်ပါ။—သတိပြု– ဤဗီဒီယိုခွေတွင် တိုတုတ်သည့်ခွဲစိတ်ကုသမှုပြကွက်များပါသောကြောင့် မိဘများသည် ဤဗီဒီယိုခွေကို ကလေးငယ်များနှင့်အတူကြည့်ရာတွင် ပိုင်းခြားချင့်ချိန်သင့်သည်။

(၁) သွေးသွင်းခြင်းကို ယေဟောဝါသက်သေများငြင်းပယ်ရသည့် အဓိကအကြောင်းရင်းကား အဘယ်နည်း၊ ထိုမူကို သမ္မာကျမ်းစာတွင် မည်သည့်နေရာ၌တွေ့ရသနည်း။ (၂) ဆေးကုသမှုနှင့်စပ်လျဉ်း၍ ကျွန်ုပ်တို့၏ဆန္ဒကား အဘယ်နည်း။ (၃) လူနာများတွင် အဘယ်အခြေခံအခွင့်အရေးရှိသနည်း။ (၄) သွေးသွင်းခြင်းကိုငြင်းပယ်ရန် အဘယ်ကြောင့် ဆင်ခြင်တုံတရားနှင့်ညီညွတ်ပြီး တာဝန်ရှိသနည်း။ (၅) သွေးဆုံးရှုံးမှုများသည့်အခါ ဆရာဝန်များသည် အဘယ်ဦးစားပေးရာနှစ်ခုရှိသနည်း။ (၆) သွေးသွင်းခြင်းနှင့်ဆက်စပ်နေသည့် ကျန်းမာရေးအန္တရာယ်များကားအဘယ်နည်း။ (၇) ခွဲစိတ်ချိန်အတွင်း သွေးဆုံးရှုံးမှုနည်းစေရန် ခွဲစိတ်ဆရာဝန်များရရှိနိုင်သည့် ကိရိယာအချို့ကားအဘယ်နည်း။ (၈) သွေးအစား အခြားကုသနည်းတစ်ခုခုနှင့်စပ်လျဉ်း၍ သင် သိထားသင့်သည့်အရာကားအဘယ်နည်း။ (၉) အရေးကြီးပြီး ခက်ခဲရှုပ်ထွေးသော ခွဲစိတ်ကုသမှုများကို သွေးမသွင်းဘဲ ပြုလုပ်နိုင်သလော။ (၁၀) တိုးများလာသောဆရာဝန်များက ယေဟောဝါသက်သေများအတွက် လုပ်ဆောင်ပေးလိုသည့်အရာများကား အဘယ်နည်း၊ နောက်ဆုံးတွင် လူနာအားလုံးအတွက်ဖြစ်လာနိုင်သည့် ကုသမှုစံနှုန်းကားအဘယ်နည်း။

သွေးနှင့်ပတ်သက်၍ ကျွန်ုပ်တို့၏ရပ်တည်ချက်ကိုမေးလာနိုင်သည့် ကျမ်းစာသင်သားများ၊ သက်သေခံမဟုတ်သောအိမ်ထောင်ဖက် သို့မဟုတ် ဆွေမျိုးများ၊ အလုပ်ဖော်များ၊ ကျောင်းဆရာများ၊ ကျောင်းနေဖက်များမှ တစ်ဦးဦးနှင့်အတူ သွေးအလိုမရှိ ဗီဒီယိုခွေကိုကြည့်ခြင်းသည် အကူအညီဖြစ်စေမည်မှာ သေချာသည်။ ဗီဒီယိုခွေတွေတင်ဆက်ထားသော ကုသမှုတစ်ခုခုကို လက်ခံခြင်းသည် တစ်ဦးစီမှ အသိစိတ်ရှိရှိဆုံးဖြစ်ရမည့်အရာဖြစ်သည်—၂၀၀၀၊ ဇွန် ၁၅ နှင့် အောက်တိုဘာ ၁၅ ရက်ထုတ် ကင်းမျှော်စင် ပါ “စာရှုသူများထံမှမေးခွန်းလွှာ” ကိုရှု။