ဇန်နဝါရီ ၂၈–ဖေဖော်ဝါရီ ၃
‘ပေါလုက ဘုရားသခင်ကို ကျေးဇူးတင်ချီးမွမ်းပြီး အားတက်လာ’
ပေါလုလာနေပြီလို့ ရောမအသင်းတော် ကြားတဲ့အခါ အဲဒီက ညီအစ်ကိုတချို့ဟာ မိုင် ၄၀ (၆၄ ကီလိုမီတာ) လောက်သွားပြီး ကြိုကြတယ်။ သူတို့ရဲ့ ကိုယ်ကျိုးစွန့်မေတ္တာကြောင့် ပေါလု ဘယ်လို ခံစားခဲ့ရသလဲ။ “ပေါလုက သူတို့ကို မြင်တော့ ဘုရားသခင်ကို ကျေးဇူးတင်ချီးမွမ်းပြီး အားတက်လာတယ်။” (တ ၂၈:၁၅) ပေါလုဟာ သူရောက်တဲ့ အသင်းတော်တွေမှာ အားပေးတတ်သူဖြစ်ပေမဲ့ အကျဉ်းသားဖြစ်နေတဲ့ ဒီအချိန်မှာတော့ ကိုယ်တိုင် အားပေးခံခဲ့ရတယ်။—၂က ၁၃:၁၀။
ယနေ့အချိန်မှာလည်း တိုက်နယ်ကြီးကြပ်မှူးတွေဟာ အသင်းတော်တွေကို လည်ပတ်ပြီး အားပေးတည်ဆောက်ကြတယ်။ ဘုရားသခင်ရဲ့ တခြားကျေးကျွန်တွေလိုပဲ သူတို့လည်း တစ်ခါတလေမှာ မောပန်းတာ၊ စိတ်ဓာတ်ကျတာ၊ စိုးရိမ်ပူပန်တာတွေ ရှိကြတယ်။ နောက်တစ်ခါ တိုက်နယ်ကြီးကြပ်မှူးနဲ့ ဇနီး လာလည်ပတ်တဲ့အခါ သူတို့အားရှိလာအောင် ဘယ်လို “အပြန်အလှန် အားပေး” နိုင်သလဲ။—ရော ၁:၁၁၊ ၁၂။
လယ်ကွင်းစုဆုံမှုမှာ ပါဝင်ပါ။ တိုက်နယ်အပတ်မှာ အပြည့်အဝ ပါဝင်ဖို့ ကြေညာသူတွေ ကိုယ်ကျိုးစွန့် လုပ်ဆောင်တဲ့အခါ တိုက်နယ်ကြီးကြပ်မှူး အားရှိတယ်။ (၁သ ၁:၂၊ ၃။ ၂:၂၀) သူလည်ပတ်ချိန်မှာ အရန်ရှေ့ဆောင်လုပ်ဖို့ စဉ်းစားပါ။ အမှုဆောင်မှာ သူတို့ ဇနီးမောင်နှံနဲ့အတူ ဟောပြောနိုင်မလား၊ ဒါမှမဟုတ် ကိုယ့်ရဲ့ ကျမ်းစာသင်အံမှုတစ်ခုကို ခေါ်သွားနိုင်မလား။ ကြေညာသူအသစ်တွေ၊ မဟောပြောတတ်ဘူးလို့ ခံစားရသူတွေနဲ့ တွဲအမှုဆောင်ရတာကို သူတို့ပျော်တယ်။
ဧည့်ဝတ်ပြုပါ။ သူတို့တည်းခိုဖို့ နေရာပေးနိုင်မလား၊ ထမင်းစား ဖိတ်နိုင်မလား။ ဒါဟာ သူတို့ဇနီးမောင်နှံကို ညီအစ်ကို/မတို့ ချစ်ကြောင်း ပြသနေတာဖြစ်တယ်။ ကြီးကြီးကျယ်ကျယ် ပြင်ဆင်ပေးဖို့ သူတို့ မမျှော်လင့်ပါဘူး။—လု ၁၀:၃၈-၄၂။
သူ့ရဲ့ ညွှန်ကြားချက်နဲ့ အကြံပြုချက်တွေကို နားထောင်ပြီး လိုက်နာပါ။ အမှုဆောင်လုပ်ငန်းမှာ ကျွန်တော်တို့ ဘယ်လို တိုးတက်နိုင်တယ်ဆိုတာ သိမြင်လာအောင် တိုက်နယ်ကြီးကြပ်မှူးက မေတ္တာပါပါ ကူညီပေးပါတယ်။ တစ်ခါတလေ ပြင်းပြင်းထန်ထန် ဆုံးမနိုင်တယ်။ (၁က ၅:၁-၅) ကျွန်တော်တို့ နာခံတယ်၊ လက်အောက်ခံတယ်ဆိုရင် သူတို့ ဝမ်းသာတယ်။—ဟီ ၁၃:၁၇။
ကျေးဇူးတင်ကြောင်း ဖော်ပြပါ။ တိုက်နယ်ကြီးကြပ်မှူးနဲ့ ဇနီးရဲ့ ကြိုးစားအားထုတ်မှုကြောင့် သင် ဘယ်လိုအကျိုးရတယ်ဆိုတာ သူတို့ကို ပြောပြပါ။ လူချင်းတွေ့ပြီး ပြောနိုင်သလို စာတို ဒါမှမဟုတ် ကတ်မှာရေးပြီးလည်း ပြောနိုင်ပါတယ်။—ကော ၃:၁၅။