သမ္မာကျမ်းစာပါ အကြံပြုချက်များကို သင် အားထားနိုင်သလော

‘ဒီပုဂ္ဂိုလ်ပြောတာတွေကို ငါ ယုံသင့်သလား။’ အရောင်းဝန်ထမ်းတစ်ဦးက သင့်အား ကားဟောင်းတစ်စီးရောင်းရန် ကြိုးစားသောအခါ၊ နိုင်ငံရေးသမားတစ်ဦးက ရွေးကောက်ပွဲအတွက် စည်းရုံးရေးကင်ပိန်းတစ်ခုတွင် ကတိ ကဝတ်များပြုသောအခါ သင့်ကိုယ်သင် အထက်ပါအတိုင်းမေးပေမည်။ တန်ဖိုးမရှိသော ပစ္စည်းများနှင့် အချက်အလက်များအတွက် သင့်ငွေ သို့မဟုတ် အချိန်ကို အလဟဿဖြုန်းတီးလိုမည်မဟုတ်ချေ။

သင် ဤသို့တွေးပေမည်– ‘သမ္မာကျမ်းစာမှာ ငါသင်ယူသင့်တဲ့အချက်တွေ ရှိသလား။ အကယ်၍ ဒီစာအုပ်ကို ငါဖတ်ရှုလေ့လာမယ်ဆိုရင် ငါ့အချိန်နဲ့ အားထုတ်မှုအတွက် အကျိုးနပ်မယ်ဆိုတာ သေချာပါ့မလား။ ဤမေးခွန်း၏အဖြေကို ကျမ်းစာကိုယ်တိုင် ကျမ်းပိုဒ်တစ်ပိုဒ်တွင် ဤသို့ဖြေဆိုသည်– “ဉာဏ်ပညာတော်သည် မှန်ကန်ကြောင်းကို ထိုပညာတော်မှ သက်ရောက်လာသည့်အကျိုးတရားများက သက်သေပြကြ၏။” (မဿဲ ၁၁:၁၉၊ ခမ) မှန်ပါသည်၊ တစ်စုံတစ်ရာသော အကြံပြုချက် သို့မဟုတ် “ဉာဏ်ပညာ” ကို လူတို့ဆည်းပူး၍ ကျင့်သုံးခြင်းမှ ရရှိသောအကျိုးကျေးဇူးများက ယင်းအကြံပြုချက် အကျိုးရှိမရှိကို သက်သေပြသည်။ အောက်ပါတို့မှာ သမ္မာကျမ်းစာကို အချိန်ယူလေ့လာခဲ့ကြသည့်ပုဂ္ဂိုလ်တို့၏ ကိုယ်တိုင်ပြောဆိုချက်များဖြစ်သည်။ သူတို့၏စကားများက ထူးခြားသည့် ၎င်းစာအုပ်ကို သင် ဖတ်ရှုလေ့လာသင့်မသင့် ဆုံးဖြတ်ရန် အထောက်အကူပြုပါလိမ့်မည်။

သေခြင်း၊ သေလွန်ပြီးနောက်နှင့်ပတ်သက်သော မေးခွန်းများ

များမကြာမီအချိန်က ကယ်ရင်၏မိခင် ဆုံးပါးသွားခဲ့သည်။ အမေရိကန်တွင် နေထိုင်ခဲ့သူကယ်ရင်သည် လူကောင်းများသေလွန်သွားသောအခါ ကောင်းကင်ဘုံသို့ရောက်သွားကြသည်ဟု ငယ်စဉ်ကတည်းက ယုံကြည်ခဲ့၏။ ဤယုံကြည်ချက်က သူ့ကို နှစ်သိမ့်မှုအနည်းငယ် ပေးသည်။ ‘အခု အမေက ကောင်းကင်ဘုံရောက်သွားပြီဆိုတော့ သူဘယ်လိုပုံစံရှိနေမလဲ။ ငါ အဲဒီကို ရောက်သွားရင်၊ အကယ်၍ ရောက်သွားခဲ့ရင် သူ့ကို ဘယ်လိုရှာရမလဲ။ ငါသေသွားရင် တခြားတစ်နေရာရာကိုများ ရောက်သွားမလား’ ဟုသူစဉ်းစားမိသည်။

ကယ်ရင်သည် ယေဟောဝါသက်သေများနှင့်အတူ ကျမ်းစာကို သေသေချာချာ စတင်လေ့လာခဲ့သည်။ သေသွန်သူများသည် ကောင်းကင်ဘုံသို့မသွားဘဲ နှစ်နှစ်ခြိုက်ခြိုက်အိပ်ပျော်နေသည်နှင့်တူကြောင်း သူလေ့လာသိရှိခဲ့ရသည်။ ဒေ. ၉:၅ တွင် “သေသောသူမူကား အဘယ်အရာကိုမျှမသိ” ဟုဖော်ပြထားသည်။ သို့ဆိုလျှင် သူ မိခင်နှင့် ပြန်တွေ့နိုင်ပါဦးမည်လော။

“ဤအမှုအရာကိုအံ့သြခြင်းမရှိကြနှင့်။ သင်္ချိုင်းများမှာရှိသောသူအပေါင်းတို့သည် သားတော် [ခရစ်တော်] ၏စကားသံကိုကြား၍ ထွက်ရမည့်အချိန်ကာလရောက်လတ္တံ့” ဟူသော သမ္မာကျမ်းစာမှ ရှင်းလင်းသည့်ဖော်ပြချက်က သူ့အား နှစ်သိမ့်မှုနှင့် မျှော်လင့်ချက်ရရှိစေသည်။ (ယောဟန် ၅:၂၈၊ ၂၉) သမ္မာကျမ်းစာကို မှုတ်သွင်းတော်မူသော ဘုရားသခင်သည် သေလွန်သူများအား မိမိ၏သားတော်အားဖြင့် ဤမြေကြီးပေါ်တွင် အသက်ပြန်ရှင်စေမည်ဆိုသည်ကို ကယ်ရင် သိခဲ့၏။ “သေခြင်း၊ ရှင်ပြန်ထမြောက်ခြင်းနဲ့ပတ်သက်တဲ့ သမ္မာကျမ်းစာသွန်သင်ချက်တွေက အလွန်အဓိပ္ပာယ်ရှိပြီး ကျိုးကြောင်းညီညွတ်မှုရှိတယ်” ဟုသူက ဆိုခဲ့သည်။

မည်သည့်ဝတ်ပြုနည်းက မှန်ကန်သနည်း

ရိုမေးနီးယားမိန်းကလေးတစ်ဦးဖြစ်သူ အင်ဂျဲလာသည် အသက် ၁၄ နှစ်အရွယ်တွင် ပဲန်တီကောစတယ်လ်ဓမ္မဆရာတစ်ဦးက သူ့အား သန့်ရှင်းသောစွမ်းအားတော်ရရန် ဆုတောင်းပေးခဲ့ပြီးနောက် သူသည် ဘာသာစကားအမျိုးမျိုးကို စတင်ပြောဆိုတော့သည်။ သို့သော် သူ၏မိဘများက ပဲန်တီကောစတယ်လ်သွန်သင်ချက်များသည် သမ္မာကျမ်းစာနှင့်မကိုက်ညီကြောင်း နားလည်လာသည်။ ဤမိသားစုသည် ဘာသာရေးအခမ်းအနားများတွင် မပါဝင်တော့ဘဲ ယေဟောဝါ သက်သေများနှင့် ကျမ်းစာစလေ့လာသည်။

အစပိုင်းတွင် အင်ဂျဲလာစိတ်ပျက်ခဲ့သော်လည်း မကြာမီတွင် သူ၏ယခင်ဘာသာရေးဓလေ့ထုံးတမ်းများသည် သမ္မာကျမ်းစာသွန်သင်ချက်များနှင့် မကိုက်ညီကြောင်း သိလာလေသည်။ ဥပမာ “ထာဝရအသက်ဟူမူကား၊ မှန်သောဘုရားသခင်တစ်ဆူတည်းဖြစ်တော်မူသော ကိုယ်တော်ကိုလည်းကောင်း၊ စေလွှတ်တော်မူသော ယေရှုခရစ်ကိုလည်းကောင်း သိကျွမ်းခြင်းတည်း” ဟူသော ယောဟန် ၁၇:၃ ကိုသူဖတ်ရသည်။ ဘုရားသခင့်နှစ်သက်လက်ခံမှုရသူသည် ဦးစွာ ကိုယ်တော်နှင့်ပတ်သက်သောအသိပညာရှိရမည်ကို အင်ဂျဲလာ သဘောပေါက်လာသည်။ “ဘုရားသခင်အကြောင်း ဘာမှမသိတဲ့ကျွန်မက ဘယ်လိုလုပ်ပြီး ဘုရားသခင့်စွမ်းအားတော်ကို ထူးခြားတဲ့နည်းနဲ့ ရရှိမှာလဲ” ဟုသူမေးခွန်းထုတ်ခဲ့သည်။ “ယေဟောဝါဟာ သူ့နှုတ်မြွက်တော်အားဖြင့် စစ်မှန်တဲ့ဝတ်ပြုရေးကို တွေ့ရှိနိုင်အောင် ကျွန်မကို ကူညီပေးခဲ့တဲ့အတွက် ကိုယ်တော်ကို ကျေးဇူးတင်တယ်” ဟုပြောခဲ့သည်။

အသက်တာကိုပြောင်းလဲစေသော အကြံပြုချက်

“ကျွန်တော်က အရမ်းစိတ်တိုတတ်တယ်” ဟုအိန္ဒိယမှ ဂါဘရီရယ်ကပြောသည်။ “ကျွန်တော်စိတ်တိုလာတဲ့အခါ အသံကုန်အော်ဟစ်တယ်၊ ပစ္စည်းတွေကို လွှင့်ပစ်တဲ့အပြင် လူတွေကိုလည်း ကိုယ်ထိလက်ရောက်ရိုက်ပုတ်တယ်။ သမ္မာကျမ်းစာကိုလေ့လာတာက ကျွန်တော့်ဒေါသကို ထိန်းချုပ်နိုင်ဖို့ အကူအညီဖြစ်စေတယ်။ အခုဆိုရင် အခြေအနေတင်းမာနေရင်တောင် ကျွန်တော် တည်တည်ငြိမ်ငြိမ်ရှိတယ်။”

“စိတ်ရှည်သောသူသည် ခွန်အားကြီးသောသူထက်လည်းကောင်း၊ မိမိစိတ်ကိုချုပ်တည်းသောသူသည် မြို့ကိုတိုက်ယူသောသူထက်လည်းကောင်း သာ၍ကောင်း၏” ဟူသည့် နယပုံပြင် ၁၆:၃၂ ကဲ့သို့သောကျမ်းချက်များကို ဂါဘရီရယ် ဖတ်ရှုသည်။ ဒေါသစိတ်ကို ချိုးနှိမ်နိုင်ခဲ့သော ဒီရာ့ချ်အမည်ရှိ နောက်ပုဂ္ဂိုလ်တစ်ဦးက “စိတ်တိုတယ်ဆိုတာ ပျော့ညံ့ခြင်းရဲ့လက္ခဏာဖြစ်ပြီး ထိန်းချုပ်နိုင်တယ်ဆိုတာ ကြံ့ခိုင်ခြင်းရဲ့လက္ခဏာဖြစ်တယ်ဆိုတာ သိမြင်လာအောင် အဲဒီကျမ်းချက်ကပဲ ကျွန်တော့်ကို ကူညီပေးခဲ့တယ်။”

ဖိလစ်သည် တောင်အာဖရိကမှ လူဆိုးဂိုဏ်းဝင်တစ်ဦးဖြစ်သည်။ တိုက်ခိုက်ခြင်း၊ လုယက်ခြင်းနှင့် ရင့်သီးရိုင်းစိုင်းစွာ ပြောဆိုခြင်းသည် သူ့ဘဝလမ်းစဉ်၏ အစိတ်အပိုင်းဖြစ်ခဲ့သည်။ ပြစ်မှုများကြောင့် ထောင်နန်းစံခဲ့ရ၏။ သို့သော် ဖိလစ်သည် မိမိ၏ဘဝပုံစံ မည်သို့ဖြစ်နေစေကာမူ ဘုရားသခင်အား သိလိုစိတ်ပြင်းပြခဲ့သည်။ သူသည် ယေဟောဝါသက်သေများနှင့် ကျမ်းစာလေ့လာပြီးနောက် ဘုရားသခင်၏အမှုတော်ဆောင်လိုသည့်ဆန္ဒ ပေါ်ပေါက်လာပြီး သူ့အသက်တာကို ပြုပြင်ပြောင်းလဲရန် ဆုံးဖြတ်ခဲ့သည်။ အကျင့်ဆိုးများကို ဆက်မကျင့်တော့ဘဲ သူ၏ရာဇဝတ်ဂိုဏ်းသားအပေါင်းအသင်းများနှင့် အဆက်အသွယ်ဖြတ်လိုက်သည်။ အဘယ်သမ္မာကျမ်းစာအမှန်တရားများက သူ့အား ဤသို့ပြောင်းလဲအောင် လှုံ့ဆော်ပေးခဲ့သနည်း။

ယေဟောဝါသက်သေများသည် သူ့အား ယောဟန် ၆:၄၄ ပါယေရှု၏စကားများကို ပြခဲ့သည်။ “ငါ့ကိုစေလွှတ်တော်မူသောခမည်းတော်သည် သွေးဆောင်တော်မမူလျှင်၊ အဘယ်သူမျှ ငါ့ထံသို့မလာနိုင်” ဟုဖတ်ရ၏။ “ယေဟောဝါက ကျွန်တော့်မှာရှိတဲ့ ကောင်းကွက်တစ်ခုခုကို မြင်တွေ့ခဲ့ပြီး ကျွန်တော့်ကို ကိုယ်တော့်လူမျိုးဖြစ်တဲ့ ဒီညီအစ်ကိုအသင်းအပင်းဆီကို ပို့ဆောင်ခဲ့တယ်” ဟုဖိလစ်ကပြောသည်။ ဖိလစ်သည် နောင်တရသော အမှားပြုသူများအပေါ်ထားသည့် ယေဟောဝါ၏ကြင်နာမှုနှင့်ပတ်သက်သော ကျမ်းစာမှတ်တမ်းများကိုလည်း နှလုံးသွင်းခဲ့သည်။ “ဒီမှတ်တမ်းတွေက နောင်တရတဲ့မစုံလင်သူတွေနဲ့ ဆက်ဆံရာမှာ ယေဟောဝါရဲ့ အကျိုးသင့်အကြောင်းသင့်ရှိမှုကို မြင်လာအောင် ကျွန်တော့်ကို ကူညီပေးတယ်” ဟုဖိလစ်ကပြောသည်။—၂ ဓမ္မရာဇဝင် ၁၂:၁-၁၄; ဆာလံ ၅၁။

ဝိတ်ဒ်အမည်ရှိ ဩစတြေးလျလူငယ်တစ်ဦးသည် အရက်နှင့် မူးယစ်ဆေးဝါးများကို အလွန်အကျွံသုံးစွဲကာ လောင်းကစားခြင်းနှင့် အကျင့်ပျက်ပြားမှုများစွာတွင် ပါဝင်ခဲ့သည်။ သို့သော် သူ မပျော်ရွှင်ခဲ့ချေ။ တစ်နေ့တွင် ဝိတ်ဒ်သည် ယေဟောဝါသက်သေများနှင့် စကားပြောခဲ့ပြီး အခမဲ့အိမ်တွင်းကျမ်းစာသင်အံမှုကို လက်ခံခဲ့သည်။ သူ အဘယ်အရာကို သင်ယူခဲ့သနည်း။

“တခြားသူတွေနဲ့ ယေရှု ဆက်ဆံပုံက ကျွန်တော့်ကို အရမ်းထိမိခဲ့တယ်” ဟုဝိတ်ဒ်က ပြောပြသည်။ “ကိုယ်တော်ဟာ ကလေးအပါအဝင် လူအားလုံးကို ကြင်ကြင်နာနာဆက်ဆံပြီး မေတ္တာပြခဲ့တယ်။ သူ့အကြောင်းလေ့လာလေ သူနဲ့ ပိုတူချင်လေ ဖြစ်လာတယ်။ တကယ့်ယောက်ျားပီသအောင် ဘယ်လိုနေရမယ်၊ ကျွန်တော့်ရဲ့ အကျင့်စရိုက်တွေကို ဘယ်လိုပြုပြင်ပြောင်းလဲရမယ်ဆိုတာတွေကို သမ္မာကျမ်းစာက သင်ပေးတယ်” ဟု ဝိတ်ဒ်ကဆိုသည်။ သူပြုလုပ်ခဲ့သော မကောင်းမှုများနှင့်ပတ်သက်၍ကော မည်သို့ဆိုမည်နည်း။ “အကယ်၍ အမှားတွေအတွက် ကျွန်တော်တကယ်နောင်တရပြီး အကျင့်ဆိုးတွေကို ပြုပြင်မယ်ဆိုရင် ကျွန်တော့်ကို ဘုရားသခင် ခွင့်လွှတ်မယ်လို့ သမ္မာကျမ်းစာက သင်ပေးတယ်၊ တကယ်ဆိုရင် ကျွန်တော်ဟာ မြေကြီးပရဒိသုမှာ ထာဝစဉ်နေသွားလို့ရတယ်။ နောက်ဆုံးတော့ ကျွန်တော့်မှာ အနာဂတ်မျှော်လင့်ချက် ရှိပြီ” ဟု ဆက်ပြောသည်။ (မဿဲ ၅:၅) ဝိတ်ဒ်သည် သူ့အသက်တာကို ပြုပြင်ပြောင်းလဲခဲ့ပြီး ယခုအခါ ကြည်လင်သောကိုယ်ကိုကိုယ်သိစိတ်ဖြင့် ယေဟောဝါအား ဝတ်ပြုနေပြီဖြစ်သည်။

သင် ယခုဖတ်ခဲ့ရာများမှာ မိမိတို့၏အသက်တာကို တိုးတက်ပြောင်းလဲလိုသည့် ပုဂ္ဂိုလ်များ၏ ထုတ်ဖော်ပြောဆိုချက်များဖြစ်သည်။ ဤသူတို့သည် ကျမ်းစာသွန်သင်ချက်များက မိမိတို့၏ပြဿနာများကို ဖြေရှင်းပေးနိုင်ခြင်းရှိမရှိနှင့် မေးခွန်းများကို ဖြေဆိုပေးနိုင်ခြင်းရှိမရှိ သိရှိရန် သမ္မာကျမ်းစာကို စေ့စေ့စပ်စပ် လေ့လာခဲ့ကြသူများဖြစ်သည်။ သူတို့ရရှိခဲ့သော ရလဒ်ကောင်းများကြောင့် သမ္မာကျမ်းစာ၏လက်တွေ့ကျလမ်းညွှန်မှုများသည် အားထားထိုက်ကြောင်း ယုံကြည်လက်ခံလာကြသည်။ အသင်လည်း အားထားနိုင်ပါသည်။

“ဉာဏ်ပညာကိုရှာ၍ရသောသူသည် မင်္ဂလာရှိ၏။ အကြောင်းမူကား ပညာကုန်သွယ်ခြင်းသည် ငွေကုန်သွယ်ခြင်းထက် သာ၍ကောင်း၏။ ပညာကုန်သွယ်၍ရသောအမြတ်လည်း ရွှေစင်ထက်သာ၍ကောင်း၏။ ပညာသည် ပတ္တမြားထက်သာ၍ အဖိုးထိုက်ပေ၏။ နှစ်သက်ဖွယ်သမျှသောအရာတို့သည် ထိုရတနာကို မပြိုင်နိုင်ကြ။ သူ၏လက်ယာလက်၌ အသက်တာရှည်သောကာလ၊ လက်ဝဲလက်၌ စည်းစိမ်နှင့်ဂုဏ်အသရေရှိ၏။ ပညာလမ်းတို့သည် သာယာသောလမ်း၊ ပညာလမ်းခရီးရှိသမျှတို့သည် ငြိမ်ဝပ်လျက်ရှိကြ၏။ ပညာကိုကိုင်ဆွဲသောသူသည် အသက်ပင်ကိုရပြီ။ လက်မလွှတ်သောသူသည် မင်္ဂလာရှိ၏” ဟု လွန်လေပြီးသောနှစ်များစွာကတည်းက မှုတ်သွင်းခံကျမ်းတွင် ဖော်ပြထား၏။—သု. ၃:၁၃-၁၈။

[စာမျက်နှာ ၂၁ ပါ လေးထောင့်ကွက်/ရုပ်ပုံ]

သမ္မာကျမ်းစာက အကျဉ်းသားတစ်ဦးအား ကူညီပေးခဲ့ပုံ

ဘီလ်အမည်ရှိ အမျိုးသားတစ်ဦးသည် အလွန်ပျော်ရွှင်သော အိမ်ထောင်သည်တစ်ဦးဖြစ်၏။ သို့သော် ပထမ မင်္ဂလာနှစ်ပတ်လည်နေ့မရောက်မီပင် သူသည် ယခင်နှစ်များက ကျူးလွန်ခဲ့သောပြစ်မှုများကြောင့် ထောင်ကျသွားလေသည်။

လွတ်လပ်မှုမရှိသည့်အခြေအနေနှင့် အသားကျသွားသောအခါ ဘီလ်သည် ရှည်လျားလှသည့်အချိန်များကို အကျိုးရှိရှိအသုံးချရန် ဆုံးဖြတ်လိုက်သည်။ “ကျွန်တော့်ရဲ့ ခုတင်ကျဉ်းကျဉ်းလေးပေါ်မှာပဲနေပြီး သမ္မာကျမ်းစာကို ဖတ်ရှုလေ့လာတယ်” ဟုသူကဆို၏။ ထို့ ပြင် လေ့လာသိရှိခဲ့သမျှကို လက်တွေ့ကျင့်သုံးခဲ့သည်။ “ကျွန်တော် သူတို့လို မကောင်းမှုတွေ မလုပ်ချင်ဘူးဆိုတာကို သိမြင်လာတဲ့ အကျဉ်းသားဖော်တွေနဲ့ ကြင်ကြင်နာနာ ရင်းရင်းနှီးနှီးဆက်ဆံတယ်။ ‘ဘီလ်က ဘုရားသခင်ကို သိကျွမ်းအောင်လုပ်ဖို့ သူ့အချိန်တွေကို အသုံးပြုတယ်၊ တခြားလူတွေကို ပြဿနာမရှာဘူး’ ဆိုပြီး ကျွန်တော့်အကြောင်း သူတို့ပြောတတ်ကြတယ်။

“ကျွန်တော့်ရဲ့နာမည်ကောင်းကြောင့် တခြားအကျဉ်းသားတွေက သူတို့ရဲ့ အငြင်းပွားမှုတွေ၊ တခြား ပြဿနာတွေမှာ ကျွန်တော့်ကို ဆွဲမထည့်ကြဘူး။ ကျွန်တော် သူတို့ကို အခက်တွေ့အောင်မလုပ်ဘူးဆိုတာ အစောင့်တွေသိလာကြတယ်။ ရလဒ်အနေနဲ့ တစ်နေ့တာရဲ့ အချိန်အတော်များများကို အကျဉ်းသားအများစုနဲ့ ဝေးတဲ့နေရာမှာ အလုပ်လုပ်ခွင့်ရအောင် ကျွန်တော့်ကို ထောက်ခံပေးကြတယ်။ ကျွန်တော့်ရဲ့အသက်တာမှာ သမ္မာကျမ်းစာသွန်သင်ချက်တွေကို လက်တွေ့ကျင့်သုံးတဲ့အတွက် အကာအကွယ်အများကြီးရရှိခဲ့တယ်။”

ဘီလ်သည် ထောင်ထဲတွင်ကျင်းပသော ယေဟောဝါသက်သေများ၏ အစည်းအဝေးများကိုတက်ပြီး သူ လေ့လာခဲ့ရသမျှကို အခြားအကျဉ်းသားများအား ထက်ထက်သန်သန်ဝေမျှသည်။ သူသည် ထောင်ကျနေစဉ်ပင် ယေဟောဝါသက်သေတစ်ဦးအဖြစ် နှစ်ခြင်းခံခဲ့သည်။ ရှေးဟောင်းနှောင်းဖြစ်များကို ပြန်ပြောင်းပြောပြရာတွင် သူက “ကျွန်တော် အနှစ် ၅၀ နီးပါး အချိန်ဖြုန်းခဲ့ပြီးပြီ၊ ကျွန်တော် တိုးတက်အောင်လုပ်ချင်တယ်။ အကျဉ်းသားတစ်ဦးလုပ်နိုင်တဲ့ တစ်ခုတည်းသောအရာက သမ္မာကျမ်းစာသွန်သင်ချက်တွေကို ကျင့်သုံးခြင်းပဲဆိုတာ ကျွန်တော်ယုံကြည်တယ်။ သမ္မာကျမ်းစာကို တိကျမှန်ကန်စွာ သင်ယူနိုင်တဲ့နည်းလမ်းက ယေဟောဝါသက်သေတွေနဲ့ လေ့လာခြင်းပဲဖြစ်တယ်။ သမ္မာကျမ်းစာအမှန်တရားကို သွန်သင်ပေးတဲ့ တစ်ခုတည်းသော ဘာသာတရားက သူတို့ရဲ့ဘာသာပဲ။ အဲဒါ ရှင်းရှင်းလေးပါ။”

ဘီလ်သည် ထောင်မှလွတ်လာပြီးနောက် ယခု အမေရိကန်ရှိ ယေဟောဝါသက်သေများ၏အသင်းတော် တစ်ခုတွင် တက်တက်ကြွကြွ အမှုဆောင်နေသည်။ သူနှင့် သူ၏ဇနီးသည် ဘုရားသခင့်နှုတ်မြွက်တော်ကို ဆက်လက်လေ့လာကြပြီး ယင်း၏သွန်သင်ချက်အတိုင်း နေထိုင်ကြသည်။ သူတို့သည် ဟေရှာယ ၄၈:၁၇၊ ၁၈ တွင် တွေ့ရသောအချက်ကို အလွန်နှစ်သက်ကြသည်– ‘သင့်ကိုရွေးနုတ်သောသူ၊ ဣသရေလအမျိုး၏ သန့်ရှင်းသောအရှင် ထာဝရဘုရားသခင်မိန့်တော်မူသည်ကား ငါသည် သင်၏အကျိုးနှင့်ယှဉ်သောအရာကိုသွန်သင်၍ သင်သွားအပ်သောလမ်းဖြင့်ပို့ဆောင်သော သင်၏ထာဝရဘုရားသခင်ဖြစ်၏။ သင်သည် ငါ၏ပညတ်တို့ကို စောင့်ရှောက်ပါစေသော။ သို့ ပြုလျှင် သင်၏ချမ်းသာသည် မြစ်ကဲ့သို့လည်းကောင်း၊ သင်၏ဖြောင့်မတ်ခြင်းသည် သမုဒ္ဒရာလှိုင်းတံပိုးကဲ့သို့လည်းကောင်း ဖြစ်ရလိမ့်မည်။’

[စာမျက်နှာ ၁၉ ပါ ရုပ်ပုံ]

ကယ်ရင်၊ အမေရိကန်

[စာမျက်နှာ ၁၉ ပါ ရုပ်ပုံ]

အင်ဂျဲလာ၊ ရိုမေးနီးယား

[စာမျက်နှာ ၂၀ ပါ ရုပ်ပုံ]

ဂါဘရီရယ်၊ အိန္ဒိယ

[စာမျက်နှာ ၂၀ ပါ ရုပ်ပုံ]

ဒီရာ့ချ်၊ အိန္ဒိယ

[စာမျက်နှာ ၂၀ ပါ ရုပ်ပုံ]

ဖိလစ်နှင့် သူ၏မိသားစု၊ တောင်အာဖရိက

[စာမျက်နှာ ၂၀ ပါ ရုပ်ပုံ]

ဝိတ်ဒ်၊ ဩစတြေးလျ