ဘုရားသခင့်နိုင်ငံတော်အကြောင်းဟောရန် ဖွဲ့စည်းထားသည့်အသင်းတော်များ

ယေရှုခရစ်မြေကြီးပေါ်ရှိခဲ့စဉ်က ဘုရားသခင့်နိုင်ငံတော်သတင်းကို မြို့စဉ်ရွာဆက်ဝင်ထွက်ဟောပြောခဲ့သည်။ တပည့်တော်များကိုလည်းအလားတူ ဟောပြောရန်လေ့ကျင့်ပေးပြီးစေလွှတ်ခဲ့သည်။ လူမျိုးအပေါင်းတို့ထဲမှ မိမိတပည့်ဖြစ်လာစေရန် ကောင်းကင်သို့ပြန်မတက်ကြွမီ နောက်တော်လိုက်များအားမိန့်ကြားခဲ့သည်။ ထိုအချိန်မှစ၍ သတင်းကောင်းဟောပြောရန် ကနဦးခရစ်ယာန်အသင်းတော်ကိုစတင်ဖွဲ့စည်းခဲ့သည်။ တပည့်တော်များသည် ရောက်သည့်နေရာတိုင်း၌ ဘုရားသခင့်နိုင်ငံတော်အကြောင်းဟောပြောခဲ့ကြသည်။—မဿဲ ၄:၁၇၊ ၂၃၊ ၁၀:၁-၁၆၊ ၂၈:၁၉၊ ၂၀။ လုကာ ၄:၄၃၊ ၄၄၊ ၈:၁၊ ၁၀:၁-၉။ တမန်တော် ၁:၈၊ ၄:၃၁၊ ၅:၄၂၊ ၈:၁၂၊ ၁၉:၈၊ ၂၈:၂၃၊ ၃၀၊ ၃၁။ ရောမ ၁၀:၉၊ ၁၀၊ ၁၄။

ဤစနစ်ဆုံးခန်းနှင့်ပတ်သက်သောယေရှု၏ပရောဖက်ပြုချက်တွင် “လူမျိုးအပေါင်းတို့အားသက်သေဖြစ်မည့်အကြောင်း နိုင်ငံတော်နှင့်ယှဉ်သောသတင်းကောင်းကို လောကီနိုင်ငံအရပ်ရပ်ရှိသမျှတို့၌ ဟောရလိမ့်မည်။ သို့ပြီးမှအဆုံးသည်ဖြစ်လတံ့” ဟုဖော်ပြထားသည်။ ဤဟောပြောခြင်းသည် ယနေ့ခရစ်ယာန်အသင်းတော်အတွက်အဓိကတာဝန်ဖြစ်သည်။—မဿဲ ၂၄:၁၄။ မာကု ၁၃:၁၀။

မိမိတို့ဆိုင်ရာရပ်ကွက်တွင် ဘုရားသခင့်နိုင်ငံတော်သတင်းကောင်းကို စနစ်တကျဟောပြောနိုင်ရန် ကမ္ဘာတစ်ဝန်းယေဟောဝါသက်သေတို့၏အသင်းတော်များကို ဖွဲ့စည်းထားသည်။ အားလုံးအစီအစဉ်မှန်ကန်စည်းစနစ်ကျနစွာဖြစ်စေရန် နိုင်ငံအသီးသီးရှိကင်းမျှော်စင်အသင်း၏ဌာနခွဲရုံးများက အသင်းတော်များကို သက်သေခံဖို့နယ်နိမိတ်များသတ်မှတ်ပေးထားသည်။ အသင်းတော်များက တစ်ဖန်နယ်မြေကိုထပ်မံပိုင်းခြားပြီး လူများထံသွားရောက်လည်ပတ်ရန် တာဝန်ယူသူကို ခွဲဝေပေးသည်။—၁ ကောရိန္သု ၁၄:၃၃၊ ၄၀။

သက်သေခံတို့သည် တစ်အိမ်တက်ဆင်းဟောပြောခြင်းအားဖြင့် လူများနှင့်ထိတွေ့လေ့ရှိသည်။ သူတို့သည် ကျမ်းစာကိုသုံး၍တိုတောင်းသော နိုင်ငံတော်သတင်းဟောပြောနည်းကို သူတို့၏အသင်းတော်အစည်းအဝေးများတွင် လေ့ကျင့်ရထားကြသည်။ ဘုရားနှုတ်ကပါဌ်တော်ကို ပိုမိုသိကျွမ်းလိုသည့် အိမ်ရှင်များအတွက်ကျမ်းစာ,စာပေများကိုလည်း သူတို့ယူဆောင်သွားကြသည်။

အရေးကြီးသည့်နိုင်ငံတော်သတင်းကို ရပ်ကွက်တွင်းရှိလူတိုင်းကြားနာနိုင်ခွင့်ရှိစေရန် သက်သေခံတို့သည် တစ်အိမ်တက်ဆင်းသွားစဉ်အသေးစိတ်မှတ်တမ်းများထားရှိကြသည်။ လူမတွေ့ခဲ့သောအိမ်များ၊ အကြောင်း,ကြောင်းကြောင့်စေ့ငှစွာသက်သေခံခွင့်မရလိုက်သည့် နေရာများကိုမှတ်သားထားကြသည်။ နောက်တစ်ကြိမ်ထပ်မံလည်ပတ်ရန်ဖြစ်သည်။ စိတ်ဝင်စားသူများကိုလည်း မှတ်သားထားကြပြီး နောက်ထပ်ကျမ်းအသိပညာများကို ပေးကမ်းရန်ထပ်မံလည်ပတ်ကြသည်။ လိုအပ်သလိုမှန်မှန်ကျမ်းစာသင်အံမှုကျင်းပကြသည်။ အားလုံးကိုအခမဲ့ပြုလုပ်ပေးကြသည်။

ယေဟောဝါသက်သေတို့သည် လမ်းသွားလမ်းလာတို့ကိုလည်း မဂ္ဂဇင်းများဝေငှကြသည်။ ဤနည်းဖြင့် အိမ်၌မတွေ့နိုင်သောလူများစွာကို ဆက်သွယ်နိုင်သည်။ နားထောင်မည့်သူအားလုံးထံရောက်ဖို့ သူတို့ကြိုးစားအားထုတ်ကြသည်။—တမန်တော် ၁၇:၁၇။ ဗျာဒိတ် ၁၄:၆၊ ၇၊ ၂၂:၁၇။

လူအများစုစိတ်ဝင်စားမှု မပြသည့်တိုင် သက်သေခံတို့သည် အဘယ်ကြောင့် လူတို့ဆီသွားမြဲသွားနေကြသနည်း။ လူတစ်ဦးစီ၏ အခြေအနေသည် မကြာခဏပြောင်းလဲတတ်ပြီး နောက်တစ်ခေါက်လည်ပတ်သည့်အခါ လုံးဝလက်ခံတတ်သည်ကို တွေ့ကြုံခဲ့ရကြသည်။ သို့မဟုတ်စိတ်ဝင်စားသည့် အခြားအိမ်သားတစ်ယောက်ယောက်ကိုတွေ့နိုင်သည်။

ယေရှုက မိမိ၏တပည့်တော်များအားဆက်၍ “နိုင်ငံတော်နှင့်ဖြောင့်မတ်ခြင်းတရားကိုရှေးဦးရှာ” ပါဟုမိန့်တော်မူခဲ့သည်။ သို့ပြုရန် နိုင်ငံတော်အကြောင်းဟောပြောခြင်းသည် အရေးကြီးသည့်ကဏ္ဍမှပါဝင်သည်။ ယေဟောဝါသက်သေတို့သည် ဤဟောပြောခြင်းကို မိမိတို့၏ဘဝတွင်အလွန်အရေးကြီးသောပန်းတိုင်အဖြစ်ထားရှိကြသည်။—မဿဲ ၆:၃၃။ ၂ တိမောသေ ၄:၂။

• ယေရှုနှင့်ကနဦးခရစ်ယာန်များကဲ့သို့ ကျွန်ုပ်တို့ခေတ်တွင်လည်း လုပ်ရမည့်အဘယ်လုပ်ငန်းကို ကြိုပြောထားသနည်း။

• ယေဟောဝါသက်သေတို့၏ဟောပြောခြင်းလုပ်ငန်းကို မည်သို့စီမံဖွဲ့စည်းထားသနည်း။

• လူအများစိတ်ဝင်စားမှုမပြသော်လည်း ယေဟောဝါသက်သေတို့သည် အဘယ်ကြောင့်လူများထံသွားမြဲသွားနေကြသနည်း။

[စာမျက်နှာ ၁၆၊ ၁၇ ပါ ရုပ်ပုံများ]

နိုင်ငံအသီးသီးတွင်ယေဟောဝါသက်သေများဘုရားနိုင်ငံတော်အကြောင်းဟောပြောနေကြပုံ

ထိုင်း

မက္ကစီကို

နယ်သာလန်

ကိုရီးယား

ကျူရာကာအို

ဂါနာ

ဗြိတိန်

ဩစတြေးလျ