ဗတ္တိဇံ (နှစ်ခြင်း)

အဓိပ္ပာယ်သတ်မှတ်ချက်– “နှစ်ခြင်း” ဟူသောစကားလုံးသည် “နှစ်သည်၊ နစ်မြုပ်စေသည်” ဟုအဓိပ္ပာယ်ရှိသောဂရိစကား ဗတ္တိဇိမ်မှလာသည်။ (လစ်ဒဲလ်နှင့်စကော့တို့၏ ဂရိ-အင်္ဂလိပ်အဘိဓာန်) ခရစ်ယာန်ရေနှစ်ခြင်းမှာ နှစ်ခြင်းခံသူသည် ယေဟောဝါဘုရားသခင်၏အလိုတော်ကိုဆောင်ရွက်ရန် ယေရှုခရစ်မှတစ်ဆင့် မိမိကိုယ်ကို ခြွင်းချက်မပါ အကန့်အသတ်မထား လုံးဝအပ်နှံကြောင်း ထင်ရှားပြသည့်လက္ခဏာဖြစ်သည်။ ယောဟန်ပေးသောနှစ်ခြင်း၊ သန့်ရှင်းသောဝိညာဉ်တော်နှင့် မီး၌နှစ်ခြင်းခံခြင်း စသည့်နှစ်ခြင်းများအကြောင်းကိုလည်း ကျမ်းစာ၌ဆိုထားသည်။

ဘုရားသခင်၏နှုတ်ကပါဌ်တော်ကို တကယ်ယုံကြည်သူများသည် နှစ်ခြင်းမခံဘဲတွန့်ဆုတ်၍နေသလော

မ. ၂၈:၁၉၊ ၂၀– “သင်တို့သွား၍ လူမျိုးတကာတို့ကိုငါ့တပည့်ဖြစ်စေလျက် ခမည်းတော်၊ သားတော်၊ သန့်ရှင်းသောဝိညာဉ်တော်၏နာမ၌ ဗတ္တိဇံကိုပေးကြလော့။ ငါသည်သင်တို့အား ပေးသမျှသောပညတ်တော်တို့ကိုစောင့်ရှောက်စေခြင်းငှာဆုံးမသြဝါဒပေးကြလော့။”

တ. ၂:၄၁– “ထိုစကားကိုအသင့်နှလုံးသွင်းမိသောသူတို့သည်ဗတ္တိဇံကိုခံ [ကြ၏။]”

တ. ၈:၁၂– “ဖိလိပ္ပုသည် ဘုရားသခင်၏နိုင်ငံတော်နှင့်လည်းကောင်း၊ ယေရှုခရစ်၏နာမတော်နှင့်လည်းကောင်း စပ်ဆိုင်သောဧဝံဂေလိတရားကိုဟောပြော၍ ထိုသူတို့သည်ယုံကြည်သောအခါ၊ ယောက်ျား [ကော] မိန်းမ [ပါ] ဗတ္တိဇံကိုခံကြ၏။”

တ. ၈:၃၆-၃၈– “ထိုသို့လမ်း၌သွားကြစဉ် ရေရှိရာသို့ရောက် [သောအခါ] အမတ်ကလည်း ဤအရပ်တွင်ရေရှိပါ၏။ အကျွန်ုပ်ကိုဗတ္တိဇံမခံစေခြင်းငှာမည်သည့်အကြောင်းဆီးတားပါသနည်းဟုဆို . . . ၍ . . . ရထားကိုရပ်စေခြင်းငှာစီရင်ပြီးမှ ဖိလိပ္ပုသည် [သူ့အား] ဗတ္တိဇံကိုပေး၏။”

ခရစ်ယာန်ရေဗတ္တိဇံသည် ဖျန်းခြင်းလော၊ သို့မဟုတ် တစ်ကိုယ်လုံးနစ်မြုပ်ခြင်းလော

မာ. ၁:၉၊ ၁၀– “ယေရှုသည် . . . ယောဟန်လက်ဖြင့်ယော်ဒန်မြစ်၌ဗတ္တိဇံ [နှစ်မြှုပ်ခြင်း၊ ED, Ro] ကိုခံတော်မူ၏။ ရေမှပေါ်ထစဉ်တွင် ကောင်းကင်ကွဲ . . . သည်ကိုမြင်ရ [လေသည်။]”

တ. ၈:၃၈– “ဖိလိပ္ပုသည် ထိုအမတ်နှင့်တကွရေထဲသို့ဆင်း၍ ဗတ္တိဇံ [နှစ်ခြင်း၊ ED, Ro] ကိုပေး၏။”

ပထမရာစုခရစ်ယာန်များသည် နို့စို့သူငယ်များကိုနှစ်ခြင်းပေးလေ့ရှိသလော

မ. ၂၈:၁၉– “သင်တို့သွား၍ . . . ငါ့တပည့် ဖြစ်စေလျက် . . . ဗတ္တိဇံကိုပေးကြလော့။”

တ. ၈:၁၂– “ထိုသူတို့သည် [ဖိလိပ္ပုကို] ယုံကြည်သောအခါ ယောက်ျားမိန်းမတို့သည် ဗတ္တိဇံကိုခံကြ၏။”

သို့ရာတွင် နောက်ပိုင်း၌ ဩရီဂျင် (စီ.အီး. ၁၈၅-၂၅၄) ကဤသို့ရေးခဲ့သည်– “နို့စို့ကလေးများကို နှစ်ခြင်းပေးခြင်းသည် အသင်းတော်၏ထုံးစံဖြစ်၏။” (ဩရီဂျင်၏အဓိပ္ပာယ်ဖွင့်ချက်နှင့် တရားစာမှ ကောက်နုတ်ချက်များ  အိန္ဒိယပြည်၊ မဒရပ်စ်မြို့၊ ၁၉၂၉၊ စ. ၂၁၁) ကာသစ်ဂ်ျမြို့၌ကျင်းပသောတတိယမြောက်ညီလာခံ (စီ.အီး. ၂၅၃) က ၎င်းကျင့်ထုံးကိုအတည်ပြုလိုက်သည်။

ဘာသာရေးဆိုင်ရာသမိုင်းသုတေသီ ဩဂတ်စ်တပ်စ်နီယားဒါး ဤသို့ရေးခဲ့သည်– “ယုံကြည်ခြင်းနှင့်နှစ်ခြင်းတို့သည်အစဉ်သဖြင့် တစ်ခုနှင့်တစ်ခု ဆက်စပ်လျက်ရှိခဲ့သည်။ သို့ဖြစ်၍ နို့စို့သူငယ်များကိုနှစ်ခြင်းပေးသည့်ကျင့်ထုံးအကြောင်း ထိုအချိန် [ပထမရာစုနှစ်] က လူတို့မသိခဲ့ခြင်းမှာ . . . ကျိန်းသေသလောက်ပင်။ . . . တတိယရာစုနှစ်အတွင်း ၎င်းကိုတမန်တော်များ၏ထုံးတမ်းအဖြစ် ပထမအကြိမ်သိမှတ်ခဲ့သည်ဟူသောအချက်သည် သာဓကတစ်ရပ်ဖြစ်၍ တမန်တော်များအစပြုသည့်ကျင့်ထုံးဖြစ်သည်ဟူသောအဆိုကိုထောက်ခံသည်ထက်ဆန့်ကျင်၏။”​—တမန်တော်များ ခရစ်ယာန်အသင်းတော်ကို ပျိုးထောင်လေ့ကျင့်ခြင်းသမိုင်း (နယူးယောက်၊ ၁၈၆၄)၊ စ. ၁၆၂။

ခရစ်ယာန်ရေနှစ်ခြင်းခံလျှင် အပြစ်လွတ်ခြင်းချမ်းသာရနိုင်သလော

၁ ယော. ၁:၇– “ဘုရားသခင်သည်အလင်း၌ရှိတော်မူသကဲ့သို့ ငါတို့သည်အလင်း၌ကျင်လည်လျှင် . . . ဘုရားသခင်၏သားတော်ယေရှုခရစ်၏အသွေးတော်သည် ငါတို့အပြစ်ရှိသမျှကိုဆေးကြောတော်မူ၏။” (သို့ ဖြင့် ကျွန်ုပ်တို့၏အပြစ်ကိုဆေးကြောသောအရာမှာ နှစ်ခြင်းရေမဟုတ် ယေရှု၏အသွေးတော်တည်း။)

မ. ၃:၁၁– “ငါ [နှစ်ခြင်းဆရာယောဟန်] သည်နောင်တအဖို့အလိုငှာ သင်တို့ကိုရေနှင့်ဗတ္တိဇံပေး၏။ ငါ့နောက်ကြွလာသောသူ [ယေရှုခရစ်] သည် ငါ့ထက်တတ်စွမ်းနိုင်၏။ ထိုသူ၏ခြေနင်းတော်ကိုမျှဆောင်ခြင်းငှာ ငါမထိုက်။ (အခန်းငယ် ၅၊ ၆ အပြင် တမန်တော် ၁၃:၂၄ အရ ယောဟန်၏လုပ်ဆောင်ချက်သည် လူခပ်သိမ်းအတွက်မဟုတ် ဂျူးများအဖို့သာဖြစ်သည်။ အဘယ်ကြောင့်နည်း။ ဂျူးတို့သည် ပညတ်ပဋိညာဉ်ကိုလွန်ကျူးသောအပြစ်ရှိ၍ဖြစ်၏။ ထို့ပြင် သူတို့ကို ခရစ်တော်အတွက်ပြင်ဆင်ရန်လည်းဖြစ်သည်။)

တ. ၂:၃၈– “သင်တို့၏အပြစ်ကိုလွတ်စေခြင်းငှာ နောင်တရ၍ တစ်ယောက်မျှမကြွင်း ယေရှုခရစ်၏နာမ၌ဗတ္တိဇံကိုခံကြလော့။” (နှစ်ခြင်းကိုယ်နှိုက်က သူတို့အားအပြစ်လွတ်ခြင်းချမ်းသာပေးသလော။ စဉ်းစားကြည့်ပါ။ အထက်ပါစကားမှာ ခရစ်တော်ကိုသတ်သည့်ကိစ္စအတွက် တာဝန်မကင်းသောဂျူးတို့နှင့်ပြောသည့်စကားဖြစ်သည်။ [အခန်းငယ် ၂၂၊ ၂၃ ကိုကြည့်ပါ။] သူတို့နှစ်ခြင်းခံလျှင် တစ်စုံတစ်ရာကိုသာဓကပြရာရောက်၏။ အဘယ်အရာနည်း။ ယခု မိမိတို့သည် ယေရှုကို မေရှိယ၊ ခရစ်တော်အဖြစ်ယုံကြည်ပြီဟူသောအချက်တည်း။ ထိုသို့ပြုမှသာ အပြစ်လွတ်ခြင်းချမ်းသာကိုရနိုင်ကြ၏။ [တ. ၄:၁၂; ၅:၃၀၊ ၃၁])

တ. ၂၂:၁၆၊ သမ္မာ– “ထလော့၊ ကိုယ်တော်၏နာမတော်ကိုအမှီပြု၍ ပတ္ထနာပြုလျက် ဗတ္တိဇံခံ၍ သင်၏အပြစ်များကိုဆေးကြောလော့။” (တမန်တော် ၁၀:၄၃ ကိုလည်းရှု။)

မည်သူသည် သန့် ရှင်းသောဝိညာဉ်တော်ဖြင့်နှစ်ခြင်းခံသနည်း

၁ ကော. ၁:၂; ၁၂:၁၃၊ ၂၇– ယေရှုခရစ်အားဖြင့်အပြစ်နှင့်ကင်းစင်၍ သန့်ရှင်းသူအရာ၌ခန့်ထားသောသူ . . . အပေါင်းတို့ကိုကြားလိုက်ပါ၏။ . . . ယုဒလူဖြစ်စေ၊ ဟေလသလူဖြစ်စေ၊ ကျွန်ဖြစ်စေ၊ လူလွတ်ဖြစ်စေ၊ ငါတို့ရှိသမျှသည် ဝိညာဉ်တော်တစ်ပါးတည်းအားဖြင့် တစ်ကိုယ်တည်းထဲသို့ဗတ္တိဇံကိုခံကြ၏။ ငါတို့ရှိသမျှသည်တစ်စိတ်တစ်ဝိညာဉ်တည်းထဲသို့လည်းသောက်ကြ၏။ [“ယခု၊” ကဘ] သင်တို့သည်ခရစ်တော်၏ကိုယ်ဖြစ်ကြ၏။” (ဒံယေလ ၇:၁၃၊ ၁၄၊ ၂၇ ပြသည့်အတိုင်း ထို “သန့်ရှင်းသူ” များသည် လူသားယေရှုခရစ်နှင့်အတူ နိုင်ငံတော်၌ပါဝင်စိုးစံကြ၏။)

ယော. ၃:၅– ရေနှင့်ဝိညာဉ်တော် [မှ] မမွေးသောသူမည်သည်ကား၊ ဘုရားသခင်၏နိုင်ငံတော်သို့မဝင်ရ။” (လူသည်ဝိညာဉ်တော်ဖြင့်နှစ်ခြင်းခံသောအချိန်၌ ‘ထိုဝိညာဉ်တော်မှမွေးဖွားခြင်း’ ခံရလေသည်။ လုကာ ၁၂:၃၂ အရ “သိုးစုငယ်” တစ်စုသာ ထိုအခွင့်အရေးကိုရသည်။ ဗျာဒိတ် ၁၄:၁-၃ ကိုလည်းရှု။)

ဝိညာဉ်တော်ဖြင့်နှစ်ခြင်းခံသူအားလုံး ဘာသာစကားအမျိုးမျိုးပြောနိုင်စွမ်း သို့မဟုတ် ရောဂါငြိမ်းစေနိုင်ခွင့်ရှိသလော

၁ ကော. ၁၂:၁၃၊ ၂၉၊ ၃၀– “ငါတို့ရှိသမျှသည်ဝိညာဉ်တော်တစ်ပါးတည်းအားဖြင့် တစ်ကိုယ်တည်းထဲသို့ ဗတ္တိဇံကိုခံကြ၏။ . . . ရှိသမျှတို့သည် တမန်တော်ဖြစ်ကြသလော။ . . . ရှိသမျှတို့သည်တန်ခိုးကိုပြနိုင်ကြသလော။ ရှိသမျှတို့သည်အနာရောဂါကိုငြိမ်းစေနိုင်သောအခွင့်ရှိကြသလော။”

“ကုသခြင်း” နှင့် “ဘာသာစကားအမျိုးမျိုးပြောခြင်း” တို့ကိုလည်းရှု။

‘သေလွန်သူတို့ကိုယ်စားနှစ်ခြင်းခံခြင်း’​—ဘာကိုဆိုလိုသနည်း

၁ ကော. ၁၅:၂၉– “သေလွန်သောသူတို့သည် ထမြောက်ခြင်းအလျှင်းမရှိလျှင် သေလွန်သောသူတို့၏ကိုယ်စား ဗတ္တိဇံကိုခံသောသူတို့သည် အဘယ်သို့ပြုရမည်နည်း။ သေလွန်သောသူတို့၏ကိုယ်စား အဘယ်ကြောင့်ဗတ္တိဇံကိုခံရကြသနည်း။”

ဤတွင် “ကိုယ်စား” (“အတွက်၊” KJ) ဟူ၍ပြန်ဆိုသော ဂရိ ဝိဘတ် (hy·per΄ ဟစ်ပါ) သည် “အပေါ်၊” “အစား၊” “အဖို့ရည်ရွယ်လျက်” စသည့်အနက်များလည်းရှိသည်။ (လစ်ဒဲလ်နှင့်စကော့ တို့၏ ဂရိ-အင်္ဂလိပ်အဘိဓာန်) ဤကျမ်းချက်တွင် ၎င်း၏အနက်ကားအဘယ်နည်း။ နှစ်ခြင်းမခံခင်သေလွန်ခဲ့သောသူများကိုယ်စား လူရှင်များအားနှစ်ခြင်းပေးခြင်းကို ပေါလုဆိုနေခြင်းလော။

သေခြင်းကို နှစ်ခြင်းနှင့်တိုက်ရိုက်ဆက်နွှယ်လျက်ရေးထားသည့် တစ်ခုတည်းသောအခြားကျမ်းချက်က လူသေကိုယ်စား နှစ်ခြင်းခံခြင်းကိုမရည်ညွှန်းဘဲ မိမိကိုယ်တိုင်ခံယူသောနှစ်ခြင်းကိုပြောနေခြင်းဖြစ်သည်

ရော. ၆:၃– “ယေရှုခရစ်၌ဗတ္တိဇံကိုခံသောသူရှိသမျှတို့သည် အသေခံတော်မူခြင်း၌ ဗတ္တိဇံကိုခံကြသည်ဟု သင်တို့မသိသလော။” (မာကု ၁၀:၃၈၊ ၃၉ ကိုလည်းရှု။)

ကော. ၂:၁၁၊ ၁၂– “သင်တို့ [အသက်ရှင်လျက်ရှိသောကောလောသဲအသင်းတော်သားများ] သည် ဗတ္တိဇံအားဖြင့် ထိုသခင်နှင့်အတူ သင်္ဂြိုဟ်ခြင်းကိုခံကြ၏။ ခရစ်တော်ကိုသေခြင်းမှထမြောက်စေတော်မူသောဘုရားသခင်၏ ပြုပြင်အားထုတ်တော်မူခြင်းကိုယုံကြည်သောအားဖြင့် ဗတ္တိဇံကိုခံ၍ ထိုသခင်နှင့်အတူ ထမြောက်ခြင်းသို့ရောက်ကြ၏။”

“ကမ္ဘာသစ်ဘာသာပြန်ကျမ်း” ၏ပြန်ဆိုပုံသည်သဒ္ဒါလည်းကျ၊ ဤကျမ်းချက်များနှင့်လည်းညီထွေ၏

၁ ကော. ၁၅:၂၉၊ ကဘ– “ထိုသို့မှမဟုတ်လျှင် သေသူများဖြစ်ဖို့ရည်ရွယ်လျက် နှစ်ခြင်းခံနေသူတို့သည် မည်သို့ပြုရတော့အံ့နည်း။ လူသေများအလျှင်းထမြောက်မည်မဟုတ်လျှင် သူတို့သည် အဘယ်ကြောင့် သေသူများဖြစ်ဖို့ရည်ရွယ်လျက် နှစ်ခြင်းကိုလည်း ခံလျက်နေကြသနည်း။” (ထို့ကြောင့် သူတို့သည် ခရစ်တော်နည်းတူ သေသည်တိုင်သစ္စာစောင့်သောဘဝလမ်းစဉ်အတွင်းသို့ နှစ်ခြင်း သို့မဟုတ် နှစ်မြှုပ်ခြင်းကိုခံပြီးနောက်၌လည်း ကိုယ်တော်နည်းတူ နာမ်ဝိညာဉ်ဘဝအဖြစ် ထမြောက်ကြခြင်းဖြစ်သည်။)

မီးနှစ်ခြင်း၏ရလဒ်ကားအဘယ်နည်း

လု. ၃:၁၆၊ ၁၇– “ထိုသူ [ယေရှုခရစ်] သည် . . . မီး၌ . . . သင်တို့ကိုဗတ္တိဇံပေးမည်။ လက်တော်တွင် ဆန်ကောပါလျက် မိမိကောက်နယ်တလင်းကိုရှင်းလင်းစေသဖြင့် အဖျင်းကို . . . မငြိမ်းနိုင်သောမီးနှင့် ရှို့တော်မူလတ္တံ့။” (ထာဝရပျက်စီးခြင်းဖြစ်လိမ့်မည်။)

မ. ၁၃:၄၉၊ ၅၀– “ထိုနည်းတူ ကမ္ဘာအဆုံး၌ ကောင်းကင်တမန်တို့သည် ဆင်းလာပြီးလျှင် ဖြောင့်မတ်သောသူတို့အထဲမှ ဆိုးသောသူတို့ကိုနုတ်ယူခွဲထား၍ . . . မီးဖို၌ချကြလတ္တံ့။”

လု. ၁၇:၂၉၊ ၃၀– “လောတသည်သောဒုံမြို့မှထွက်သောနေ့၌ ကောင်းကင်မှကန့်နှင့်ရောသောမီးမိုးရွာ၍ ထိုလူအပေါင်းတို့ကိုသုတ်သင်ပယ်ရှင်းသကဲ့သို့ လူသားပေါ်ထွန်းသောနေ့၌ဖြစ်လိမ့်မည်။”

တပည့်တော်များအတွက်ဖြစ်သော သန့် ရှင်းသောဝိညာဉ်တော်ဖြင့်နှစ်ခြင်းခံသည်နှင့်မတူပါ

တ. ၁:၅– “ယောဟန်သည် ရေ၌ဗတ္တိဇံကိုပေး၏။ သင်တို့ [ယေရှု၏သစ္စာရှိတမန်တော်များ] သည် မကြာမမြင့်မီ သန့်ရှင်းသောဝိညာဉ်တော်၌ ဗတ္တိဇံကိုခံရကြလိမ့်မည်။”

တ. ၂:၂-၄– “လေပြင်းမုန်တိုင်းကဲ့သို့သောအသံသည် တစ်ခဏချင်းတွင် ကောင်းကင်မှလာ၍ ထိုသူတို့နေထိုင်သောအိမ်ကိုဖြည့်လေ၏။ ထိုခဏချင်းတွင်ကွဲပြားသောလျှာတို့သည် မီးလျှာကဲ့သို့ထင်ရှား၍ ထိုသူအသီးအသီးတို့အပေါ်၌တည်နေကြ၏။ [သူတို့ကိုဝိုင်းရံလျက်၊ နှစ်မြှုပ်လျက်မနေပါ။] ထိုသူအပေါင်းတို့သည်လည်း သန့်ရှင်းသောဝိညာဉ်တော်နှင့်ပြည့်၍ ဝိညာဉ်တော်သည် ဟောပြောသောအခွင့်ကိုပေးတော်မူသည်အတိုင်း အမျိုးမျိုးသောဘာသာစကားအားဖြင့်ဟောပြောကြ၏။”