အခန်း ၁၀၉

ယေရှုသည် မိမိအားဆန့်ကျင်သူများကို အတိအလင်းထုတ်ဖော်ခြင်း

ယေရှုသည်ဆန့်ကျင်သူဘာသာရေးခေါင်းဆောင်များကို အလွန်တွေဝေသွားစေသဖြင့် သူတို့ထပ်မမေးဝံ့ကြချေ။ သို့နှင့်သူတို့၏အသိကင်းမဲ့ခြင်းကိုဖော်ထုတ်ရန် ယေရှုက “သင်တို့သည်ခရစ်တော်ကိုအဘယ်သို့ထင်မှတ်ကြသနည်း။ အဘယ်သူ၏သားဖြစ်သနည်း” ဟုမေးမြန်း၏။

“ဒါဝိဒ်၏သား” ဟုဖာရိရှဲတို့ကဖြေလေသည်။

ဒါဝိဒ်သည်ခရစ်တော်၊ သို့မဟုတ် မေရှိယ၏ဘိုးဘေးဖြစ်ကြောင်း ယေရှုမငြင်းသော်လည်း “ဒါဝိဒ်သည် ခရစ်တော်ကို ‘သခင်’ ဟူ၍ ဝိညာဉ်တော်ခံရလျက် [ဆာလံ ၁၁၀] တွင် အဘယ်ကြောင့်ခေါ်သနည်း။ ဒါဝိဒ်၏စကားမှာ ‘ထာဝရဘုရား [ယေဟောဝါ၊ ကဘ] က “သင်၏ရန်သူတို့ကို သင်၏ခြေတင်ရာ ငါမချမထားမီတိုင်အောင် ငါ့လက်ယာဖက်၌ထိုင်နေလော့”’ ဟုငါ၏သခင်အားမိန့်တော်မူသည်ဟုဒါဝိဒ်ဆိုသတည်း။ ထိုသို့ဒါဝိဒ်သည် ခရစ်တော်ကို ‘သခင်’ ဟူ၍ခေါ်လျှင် အဘယ်သို့သောသူ၏သားဖြစ်သနည်း” ဟုမေးသည်။

ခရစ်တော်၊ သို့မဟုတ် ဘိသိက်ခံသူအကြောင်း သူတို့အတိအလင်းမသိသောကြောင့် ဖာရိရှဲတို့သည် တိတ်ဆိတ်နေသည်။ မေရှိယသည် ဖာရိရှဲများထင်သည့်အတိုင်း ဒါဝိဒ်မှဆင်းသက်သောလူတစ်ဦးမျှမဟုတ်ဘဲ၊ ကောင်းကင်တွင်ရှိခဲ့ပြီး ဒါဝိဒ်ထက်ကြီးမြတ်သောသခင်ဖြစ်သည်။

ယခုလူအုပ်နှင့်တပည့်များဘက်သို့လှည့်ပြီး ကျမ်းတတ်များ၊ ဖာရိရှဲများနှင့်ပတ်သက်ပြီး ဤသူတို့သည် “မောရှေ၏ထိုင်ရာပလ္လင်ပေါ်ထိုင်၍” ဘုရားပညတ်ကိုသင်ပေးသောကြောင့် “သူတို့စီရင်ထုံးဖွဲ့သမျှတို့ကို စောင့်ရှောက်၍ပြုကြလော့။ သူတို့၏အကျင့်အတိုင်းမကျင့်ကြနှင့်။ အကြောင်းမူကား၊ သူတို့သည် စီရင်ထုံးဖွဲ့သော်လည်း ကိုယ်တိုင်မကျင့်ကြ” ဟုသတိပေးလေသည်။

သူတို့သည်အရေခြုံသူများဖြစ်၏။ လအတန်ကြာက ဖာရိရှဲတစ်ဦးအိမ်၌စားသောက်စဉ် ပြောဆိုခဲ့သကဲ့သို့ ယေရှုက “သူတို့သည်ပြုသမျှသောအကျင့်အမှုတို့ကို လူများရှေ့မှာထင်ရှားစေခြင်းငှာပြုကြ၏” ဟုမိန့်ဆိုပြီး ဆက်လက်၍ဥပမာပေးလေသည်။

“အကာအကွယ်အဖြစ်ကျယ်သောလက်ဖွဲ့တို့ကိုဝတ်ဆင်ကြ၏။” ယင်းတို့သည် ထွက်မြောက်ရာ ၁၃:၁-၁၀၊ ၁၁-၁၆ နှင့် တရားဟောရာ ၆:၄-၉။ ၁၁:၁၃-၂၁ တွင်ပါပညတ်ချက်လေးချက်ရှိဘူးကလေးများဖြစ်၍ ယင်းကိုနဖူး၊ သို့မဟုတ် လက်မောင်းတွင်ဆင်မြန်းသည်။ ထိုဘူးကလေးများကိုပိုကြီးအောင်ပြုလုပ်ခြင်းဖြင့် မိမိတို့သည်ပညတ်တရားနှင့်ပတ်သက်၍ထက်သန်ကြောင်း ဖာရိရှဲများထင်ရှားပြကြသည်။

“သူတို့သည် ကြီးသောပန်းပွားတို့ကိုဝတ်လေ့ရှိ၏” ဟုယေရှုဆက်၍မိန့်ဆို၏။ တောလည်ရာ ၁၅:၃၈-၄၀ အရဣသရေလလူတို့၏အဝတ်စွန်း၌ ပန်းပွားတို့ကိုလုပ်ရ၏။ သို့သော်၊ ဖာရိရှဲတို့သည် လူမြင်ရန်အတွက် သူတစ်ပါးထက်လွန်ကဲ၍ ပန်းပွားကိုကြီးကြီးပြုလုပ်ကြ၏။ “သူတို့သည် မြင့်မြတ်သောနေရာထိုင်ရာကို နှစ်သက်ကြ၏” ဟုယေရှုရှင်းပြ၏။

ကိုယ်တော်၏တပည့်များပင် ဤပေါ်လွင်လိုသောဆန္ဒရှိခြင်းက ဝမ်းနည်းစရာဖြစ်သည်။ ထိုကြောင့် ယေရှုက “သင်တို့မူကား၊ အရှင်ဘုရားဟုခေါ်ဝေါ်ခြင်းကိုမခံကြနှင့်။ ခရစ်တော်တည်းဟူသော သင်တို့ဆရာတစ်ပါးတည်းရှိ၏။ သင်တို့အပေါင်းသည် ညီအစ်ကိုချင်းဖြစ်ကြ၏။ မြေကြီးပေါ်မှာအဘယ်သူကိုမျှ အဘဟူ၍မခေါ်ကြနှင့်။ ကောင်းကင်ဘုံ၌ သင်တို့အဘတစ်ပါးတည်းရှိတော်မူ၏။ ဆရာဟုခေါ်ဝေါ်ခြင်းကိုမခံကြနှင့်။ ခရစ်တော်တည်းဟူသောသင်တို့ဆရာတစ်ပါးတည်းရှိ၏” ဟုသွန်သင်သည်။ တပည့်တို့သည် ဦးစားပေးခံရလိုသောဆန္ဒကို ပယ်ရှားရမည်။ “သင်တို့တွင်အကြီးဖြစ်သောသူသည် သင်တို့အစေခံဖြစ်ရမည်” ဟုယေရှုဆုံးမ၏။

ထိုနောက်ဆက်တိုက်အမင်္ဂလာများကို ကျမ်းတတ်နှင့်ဖာရိရှဲတို့အပေါ်ကြေညာ၍ အရေခြုံများဟုထပ်တလဲလဲခေါ်ဆိုလေသည်။ သူတို့သည် “ကောင်းကင်နိုင်ငံတော်၏တံခါးကို လူတို့ရှေ့မှာပိတ်ထားသည်။” “မုဆိုးမအိမ်ကိုလုယူသိမ်းစား၍ အပြစ်မပေါ်စေခြင်းငှာ ရှည်စွာသောပတ္ထနာစကားကိုရွတ်တတ်ကြ၏” ဟုမိန့်မြွက်သည်။

“လမ်းပြသောလူကန်းတို့၊ သင်တို့သည်အမင်္ဂလာရှိကြ၏” ဟုယေရှုဆို၏။ နိုင်ထက်စီးနင်းခွဲခြားတတ်သောဖာရိရှဲများ၏ ဝိညာဏအရည်အချင်းကင်းမဲ့မှုကို ယေရှုပြစ်တင်ရှုတ်ချသည်။ ဥပမာအားဖြင့် ‘ဗိမာန်တော်ကိုတိုင်တည်၍ကျိန်ဆိုခြင်းကိုပြုလျှင်မတည်။ ဗိမာန်တော်၏ရွှေကိုတိုင်တည်၍ ကျိန်ဆိုခြင်းကိုပြုလျှင်တည်သည်’ ဟုသူတို့ဆိုကြ၏။ ဝတ်ပြုကိုးကွယ်သည့်နေရာ၏ဝိညာဏတန်ဖိုးထက် ဗိမာန်တော်ရွှေကိုအလေးအနက်ထားခြင်းဖြင့် ဝိညာဉ်ရေးဘက်သူတို့ကန်းနေကြောင်း ဖော်ထုတ်ပြလေသည်။

ဆယ်ဖို့တစ်ဖို့လှူခြင်းတွင် ပင်စိမ်း၊ စမွတ်၊ ဇီယာ၊ ဟင်းသီးဟင်းရွက် ဆယ်ဖို့တစ်ဖို့လှူခြင်းကိုမူအရေးစိုက်ပြီး “တရားသဖြင့်စီရင်ခြင်း၊ သူတစ်ပါးကိုသနားခြင်း၊ သစ္စာစောင့်ခြင်းတည်း” ဟူသောပညတ်တရားတွင်ကြီးလေးသောအရာတို့ကိုမူ ချန်လှပ်ထားသဖြင့် ဖာရိရှဲတို့ကိုယေရှုရှုတ်ချပြန်၏။

ဖာရိရှဲတို့အားယေရှုက “သင်တို့သည်ခြင်တစ်ကောင်ကိုမျှမပါစေခြင်းငှာ ရေကိုစစ်လျက်နှင့်ကုလားအုပ်ကိုမျိုကြ၏” ဟုမိန့်ဆိုသည်။ ပိုးမွှားဖြစ်နေ၍မဟုတ်ဘဲ၊ ထုံးတမ်းအရမသန့်ရှင်းသောကြောင့် သူတို့သည်စပျစ်ရည်ထဲမှခြင်ကိုစစ်ထုတ်ကြသည်။ သို့သော် ပညတ်တရား၏သာ၍ကြီးလေးသောအရာများကိုလျစ်လျူရှုခြင်းသည် ထုံးတမ်းအရမသန့်ရှင်းသောသတ္တဝါဖြစ်သည့် ကုလားအုပ်ကိုမျိုသည်နှင့်တူသည်။ မဿဲ ၂၂:၄၁–၂၃:၂၄။ မာကု ၁၂:၃၅-၄၀။ လုကာ ၂၀:၄၁-၄၇။ ဝတ်ပြုရာ ၁၁:၄၊ ၂၁-၂၄။

▪ ဆာလံ ၁၁၀ ပါဒါဝိဒ်၏စကားနှင့်ပတ်သက်၍ ယေရှုမေးခွန်းထုတ်သောအခါအဘယ်ကြောင့်ဖာရိရှဲများတိတ်ဆိတ်နေသနည်း။

▪ လက်ဖွဲ့များနှင့်ပန်းပွားများကို ဖာရိရှဲများသည် အဘယ်ကြောင့်ကြီးအောင်ပြုလုပ်သနည်း။

▪ ယေရှုသည် မိမိတမန်တော်များအား အဘယ်သွန်သင်ချက်ပေးသနည်း။

▪ ဖာရိရှဲများသည် မည်သို့သောနိုင်ထက်စီးနင်းခွဲခြားမှုများပြုလုပ်ကြပြီး၊ သာ၍ကြီးလေးသောအရာများကို လျစ်လျူရှုခြင်းကြောင့်သူတို့အား ယေရှုမည်သို့ပြစ်တင်ရှုတ်ချသနည်း။