သင်ခန်းစာ ၁
ဘုရားသခင် တောင်းဆိုတော်မူရာများကို သင်တွေ့ ရှိနိုင်ပုံ
သမ္မာကျမ်းစာထဲ၌ အဘယ်အရေးကြီးသတင်း ပါရှိသနည်း။ (၁)
သမ္မာကျမ်းစာ၏အာဘော်ရှင်ကား မည်သူနည်း။ (၂)
သမ္မာကျမ်းစာကို သင်အဘယ်ကြောင့်လေ့လာသင့်သနည်း။ (၃)
၁။ သမ္မာကျမ်းစာသည် ဘုရားသခင့်ထံတော်မှ အဖိုးထိုက်လှသည့်လက်ဆောင်မွန်တစ်ခုဖြစ်၏။ မေတ္တာရှင်ဖခင်တစ်ဦးက မိမိ၏သားသမီးများကိုပေးသော စာတစ်စောင်နှင့်တူ၏။ ယင်းက ဘုရားသခင်သည်မည်သူဖြစ်ကြောင်း ကိုယ်တော်၏စံနှုန်းများသည် အဘယ်အရာဖြစ်ကြောင်းစသည့် ဘုရားသခင်နှင့်ပတ်သက်သော အမှန်တရားကို ဖော်ပြ၏။ ပြဿနာများကို မည်သို့ဖြေရှင်းနိုင်ကြောင်းနှင့် စစ်မှန်သောပျော်ရွှင်မှုကို မည်သို့တွေ့ ရှိနိုင်ကြောင်းတို့ကို ရှင်းပြ၏။ ဘုရားသခင့်အလိုတော်နှင့်တွေ့ရန် ကျွန်ုပ်တို့ဘာလုပ်ရမည်ဟူသည့်အကြောင်းကို သမ္မာကျမ်းစာတစ်ခုတည်းကသာ ဖော်ပြသည်။—ဆာလံ ၁:၁-၃; ဟေရှာယ ၄၈:၁၇၊ ၁၈။
၂။ သမ္မာကျမ်းစာကို ဘီ.စီ.အီး. ၁၅၁၃ ခုနှစ်မှစ၍ နှစ်ပေါင်း ၁,၆၀၀ ကျော်ကာလအတွင်း သီးခြားပုဂ္ဂိုလ်များဖြစ်သော လူပေါင်း ၄၀ ခန့်တို့က ရေးသားခဲ့ကြ၏။ ယင်းကို စာအုပ်ငယ် ၆၆ စောင်ဖြင့် ဖွဲ့စည်းထားသည်။ သမ္မာကျမ်းစာကိုရေးသားသူတို့သည် ဘုရားသခင်၏မှုတ်သွင်းခြင်းကိုခံရကြ၏။ သူတို့၏ကိုယ်ပိုင်ယူဆချက်များကိုမဟုတ်ဘဲ၊ ကိုယ်တော်၏ယူဆချက်များကို သူတို့ရေးသားကြသည်။ ထို့ကြောင့် မြေကြီးပေါ်ရှိ မည်သည့်လူသားမျှမဟုတ်ဘဲ ကောင်းကင်ဘုံရှိ ဘုရားသခင်သည်သာ သမ္မာကျမ်းစာ၏အာဘော်ရှင်ဖြစ်တော်မူ၏။—၂ တိမောသေ ၃:၁၆၊ ၁၇; ၂ ပေတရု ၁:၂၀၊ ၂၁။
၃။ သမ္မာကျမ်းစာကို တိတိကျကျကူးရေးပြီး ထိန်းသိမ်းစောင့်ရှောက်ထားရန် ဘုရားသခင်သေချာစွာပြုလုပ်တော်မူသည်။ အခြားမည်သည့်စာအုပ်ထက်မဆို သမ္မာကျမ်းစာကို ပို၍ပုံနှိပ်ထုတ်ဝေခဲ့ပြီ။ သင်ကျမ်းစာလေ့လာနေသည်ကို လူတိုင်းဝမ်းမြောက်ကြလိမ့်မည်မဟုတ်သော်လည်း ယင်းကြောင့် မရပ်တန့်လိုက်ပါနှင့်။ အသင်၏ထာဝရအနာဂတ်သည် ဘုရားသခင်ကိုသိရှိခြင်းနှင့် မည်သည့်ဆန့်ကျင်မှုအကြား၌မဆို ကိုယ်တော်၏အလိုတော်ကိုထမ်းဆောင်နေခြင်းအပေါ် မူတည်သည်။—မဿဲ ၅:၁၀-၁၂; ယောဟန် ၁၇:၃။