အခန်း တစ်

ယခုခေတ် ကိုးကွယ်ဝတ်ပြုမှု စည်းလုံးခြင်း—အဘယ်အဓိပ္ပာယ် ရှိသနည်း

၁၊ ၂။ (က) ကျွန်ုပ်တို့ခေတ်တွင် အဘယ် ပီတိဖြစ်စရာကောင်းသော လှုပ်ရှားမှု ဖြစ်ပွားလျက်ရှိသနည်း။ (ခ) စိတ်နှလုံး ရိုးသားဖြောင့်မတ်သော လူတို့သည် အဘယ် အံ့ချီးဖွယ်ကောင်းသော မျှော်လင့်ချက် ရှိကြသနည်း။

ကမ္ဘာတစ်ဝန်းတွင် ကိုးကွယ်ဝတ်ပြုမှု စည်းလုံးခြင်းသို့ ဦးတည်သည့် ပီတိဖြစ်စရာကောင်းသော လှုပ်ရှားမှုတစ်ရပ် ရှိနေသည်။ ဤလှုပ်ရှားမှုက တိုင်းနိုင်ငံ၊ လူမျိုးနွယ်စုနှင့် ဘာသာစကား ခပ်သိမ်းမှ သန်းပေါင်းများစွာသော လူတို့ကို ပေါင်းစည်းစေလျက်ရှိသည်။ နှစ်စဉ်နှစ်တိုင်း စုစည်းလာကြသူ တိုးများလာလျက်ရှိ၏။ သမ္မာကျမ်းစာတွင် ဤသူတို့ကို ယေဟောဝါ၏ “သက်သေများ” ဟု အထင်အရှား ဖော်ပြပြီး “လူအုပ်ကြီး” ဟူ၍လည်း ခေါ်ဆိုထားသည်။ သူတို့သည် “မြင့်မြတ်သော အမှုတော်ကို နေ့ညမပြတ်” ထမ်းရွက်လျက်ရှိကြ၏။ (ဟေရှာယ ၄၃:၁၀-၁၂; ဗျာဒိတ် ၇:၉-၁၅၊ ကဘ) အဘယ်ကြောင့် ဤသို့ပြုကြသနည်း။ အကြောင်းမှာ ယေဟောဝါသည် စစ်မှန်၍ တစ်ဆူတည်းသော ဘုရားသခင်ဖြစ်ကြောင်း သူတို့ သိရှိလာကြ၍ဖြစ်သည်။ သို့နှင့် သူတို့သည် မိမိတို့၏ အသက်တာကို ကိုယ်တော်၏ ဖြောင့်မတ်သော နည်းလမ်းတော်နှင့် ညီညွတ်အောင်ပြုပြင်ရန် စေ့ဆော်ခံရကြသည်။ ၎င်းပြင်၊ ကျွန်ုပ်တို့သည် လက်ရှိ ဆိုးယုတ်သည့်ကမ္ဘာ၏ “နောက်ဆုံးသော နေ့ရက်များ” အတွင်း အသက်ရှင်နေကြရကြောင်း၊ ဤဆိုးယုတ်သည့်ကမ္ဘာကို မကြာမီ ဘုရားသခင် ဖျက်ဆီးတော့မည်ဖြစ်ကြောင်း၊ ယင်းအစား ပရဒိသု ကမ္ဘာသစ်ဖြင့် အစားထိုးမည်ဖြစ်ကြောင်းတို့ကိုလည်း သူတို့သိရှိလာကြပြီ။—၂ တိမောသေ ၃:၁-၅၊ ၁၃၊ ကဘ; ၂ ပေတရု ၃:၁၀-၁၃။

^၂ “ခဏကြာပြီးမှ မတရားသောသူသည် မရှိရ။ . . . စိတ်နှိမ့်ချသော သူတို့မူကား ပြည်တော် [“ကမ္ဘာမြေကြီး၊” ကဘ] ကိုအမွေခံ၍ များပြားသောငြိမ်သက်ခြင်း၌ မွေ့လျော်ကြလိမ့်မည်” ဟူ၍ ဘုရားသခင့် နှုတ်ကပါဌ်တော်က ကတိပေးထား၏။ (ဆာလံ ၃၇:၁၀၊ ၁၁) “ဖြောင့်မတ်သောသူတို့သည် ပြည်တော် [“ကမ္ဘာမြေကြီး၊” ကဘ] ကိုအမွေခံ၍ အစဉ်အမြဲ နေရကြလိမ့်မည်။” (ဆာလံ ၃၇:၂၉) “[ဘုရားသခင်] သည် သူတို့၏မျက်စိမှ မျက်ရည်ရှိသမျှကို သုတ်တော်မူမည်။ သေခြင်းလည်း ရှိတော့မည်မဟုတ်။ ငိုကြွေးမြည်တမ်းခြင်း၊ အော်ဟစ်ခြင်း၊ နာကျင်ခြင်းတို့လည်း ရှိတော့မည်မဟုတ်။ ရှေးဟောင်းနှောင်းဖြစ်များသည် လွန်သွားလေပြီ။”—ဗျာဒိတ် ၂၁:၄၊ ကဘ။

၃။ ကိုးကွယ်ဝတ်ပြုရေး၌ စစ်မှန်သောစည်းလုံးမှု မည်သို့ ဖြစ်မြောက်ခဲ့သနည်း။

၃ မှန်သော ကိုးကွယ်ဝတ်ပြုမှုတွင် ယခု စုစည်းခံနေရသူတို့သည် အဆိုပါ ကမ္ဘာသစ်၌ ဦးဆုံး နေထိုင်မည့်သူများ ဖြစ်ကြ၏။ သူတို့သည် ဘုရားသခင့် အလိုတော်ကို ဆည်းပူးသိရှိလာကြပြီးနောက် ထိုအလိုတော်နှင့်အညီ အတတ်နိုင်ဆုံး ကျင့်ဆောင်ကြ၏။ ဤသို့ပြုရန် အရေးကြီးကြောင်း ယေရှုက ဤသို့ဖော်ပြသည်– “ထာဝရအသက် ဟူသည်မှာ ဘုရားမှန် တစ်ဆူတည်းဖြစ်သော ကိုယ်တော်ကိုလည်းကောင်း၊ စေလွှတ်တော်မူလိုက်သော ယေရှုခရစ်ကိုလည်းကောင်း သိကျွမ်းခြင်းတည်း။” (ယောဟန် ၁၇:၃၊ သမ) တမန်တော်ယောဟန်က “ဤလောကမှစ၍ ဆိုင်ရာတပ်မက်ခြင်းသည် ပျောက်လွင့်ဆဲဖြစ်၏။ ဘုရားသခင့် အလိုတော်ကို ဆောင်ရွက်သူမူကား၊ ကာလအစဉ် တည်နေ၏” ဟူ၍ ရေးသားထား၏။—၁ ယောဟန် ၂:၁၇၊ သမ။

စင်စစ် အဘယ်အဓိပ္ပာယ် ရှိသနည်း

၄။ (က) ယခုခေတ်တွင် များပြားသောလူတို့သည် စည်းလုံးစွာ ကိုးကွယ်ဝတ်ပြုနေခြင်းကား စင်စစ်အားဖြင့် အဘယ်အဓိပ္ပာယ် ရှိသနည်း။ (ခ) ဤစုရုံးခြင်းအကြောင်းကို သမ္မာကျမ်းစာက မည်သို့ဖော်ပြသနည်း။

^၄ ကျွန်ုပ်တို့ခေတ်တွင် များပြားသောလူတို့ စည်းလုံးစွာ ကိုးကွယ်ဝတ်ပြုနေခြင်းသည် စင်စစ်အားဖြင့် အဘယ်အဓိပ္ပာယ် ရှိသနည်း။ ဤကား ကျွန်ုပ်တို့သည် ဆိုးယုတ်သည့် ဤကမ္ဘာ၏အဆုံးနှင့် အလွန် နီးကပ်လျက်ရှိကြောင်း၊ ၎င်းနောက် ဘုရားသခင့် ကမ္ဘာသစ် စတင်မည်ဖြစ်ကြောင်း ထင်ရှားသည့် သက်သေအထောက်အထားပင်ဖြစ်သည်။ အလွန်အရေးပါသော ဤစုသိမ်းခြင်းအကြောင်း ကြိုဟောထားသည့် သမ္မာကျမ်းစာ ပရောဖက်ပြုချက်များ ပြည့်စုံလျက်ရှိသည်ကို ကျွန်ုပ်တို့ မျက်ဝါးထင်ထင် မြင်တွေ့နေရ၏။ ထိုသို့သော ပရောဖက်ပြုချက်တစ်ချက်က ဤသို့ဆို၏– “နေ့ရက်များ၏ အဆုံးပိုင်း [ဤနောက်ဆုံးသော နေ့ရက်များ] တွင် ယေဟောဝါ၏အိမ်တော် တည်သောတောင် [ကိုယ်တော်၏ မြှင့်တင်ခံရသည့် မှန်သောကိုးကွယ်မှု] သည် . . . တောင်များတို့၏ ထိပ်ပေါ်တွင် [အခြားကိုးကွယ်မှု မှန်သမျှ၏အထက်၌] ခိုင်ခံ့စွာ တည်လိမ့်မည်။ ထိုတောင်သို့ လူအမျိုးမျိုးတို့သည် စီတန်းတက်ကြလိမ့်မည်။ များပြားသော လူမျိုးတို့ကလည်း ခရီးသွားလျက် ‘လာကြ၊ ယေဟောဝါ၏ တောင်တော်၊ ယာကုပ်၏ ဘုရားသခင့် အိမ်တော်သို့ တက်ကြကုန်အံ့။ နည်းလမ်းတော်များကို သွန်သင်တော်မူမည်၊ လမ်းခရီးတော်များသို့လည်း ငါတို့ လိုက်လျှောက်ကြမည်’ ဟုဆိုကြလိမ့်မည်။”—မိက္ခာ ၄:၁၊ ၂၊ ကဘ; ဆာလံ ၃၇:၃၄။

၅၊ ၆။ (က) လူမျိုးတို့သည် ယေဟောဝါထံတော်သို့ လှည့်လာလျက်ရှိသည် ဟူသောအချက်သည် မည်သို့ မှန်ကန်သနည်း။ (ခ) မိမိကိုယ်ကို အဘယ်မေးခွန်းများ မေးသင့်သနည်း။

^၅ လူမျိုးလိုက်ချီ၍ ယေဟောဝါ၏ ကိုးကွယ်ဝတ်ပြုရာ ဝိညာဉ်ရေးအိမ်တော်သို့ လာရောက်နေကြသည် မဟုတ်သော်လည်း လူမျိုးခပ်သိမ်းတို့အထဲမှ သန်းနှင့်ချီသော သူတို့သည် လာရောက်လျက်ရှိကြ၏။ ဤသူတို့သည် ယေဟောဝါ၏ မေတ္တာပြည့်ဝသည့် ရည်ရွယ်ချက်နှင့် ကိုယ်တော်၏ နှစ်သက်ဖွယ်ကောင်းသော ဥပဓိရုပ်တော်ကို သိရှိလာသည့်အခါ အလွန် ဘဝင်ခိုက်သွားကြသည်။ ထိုအခါ မိမိတို့ထံမှ ဘုရားသခင် အဘယ်အရာ တောင်းဆိုသည်ကို သိရှိရန် စိတ်နှိမ့်ချစွာဖြင့် စူးစမ်းရှာဖွေကြသည်။ ဆာလံဆရာနည်းတူ သူတို့က “အလိုတော်သို့ လိုက်စေမည်အကြောင်း သွန်သင်တော်မူပါ။ ကိုယ်တော်သည် အကျွန်ုပ်၏ ဘုရားသခင် ဖြစ်တော်မူ၏” ဟူ၍ဆုတောင်းကြသည်။—ဆာလံ ၁၄၃:၁၀။

^၆ စည်းလုံးသော ကိုးကွယ်ဝတ်ပြုမှုတွင် ယေဟောဝါ ယခုစုရုံးနေသည့် လူအုပ်ကြီးထဲတွင် သင်ပါဝင်သည်ကို မြင်ယောင်ပါသလော။ နှုတ်ကပါဌ်တော်မှ လက်ခံရရှိသည့် သွန်သင်ချက်၏ ပင်ရင်းဇာစ်မြစ်မှာ ယေဟောဝါ ဖြစ်သည်ကို အမှန်တကယ် အသိအမှတ်ပြုကြောင်း သင်၏တုံ့ပြန်ပုံက ဖော်ပြသလော။ သင်သည် ကိုယ်တော်၏ “လမ်းခရီးတော်” တွင် အဘယ်အတိုင်းအတာအထိ “လိုက်လျှောက်” မည်နည်း။

ကိုးကွယ်ဝတ်ပြုရေး စည်းလုံးမှု ရရှိလာပုံ

၇။ (က) နောက်ဆုံးတွင် စည်းလုံးသော ကိုးကွယ်ဝတ်ပြုမှုသည် အဘယ်အတိုင်းအတာအထိ ဖြစ်လာမည်နည်း။ (ခ) ယခုပင် ယေဟောဝါအား ကိုးကွယ်ဝတ်ပြုသူဖြစ်ရန် အဘယ်ကြောင့် အရေးတကြီး လိုအပ်သနည်း။ အခြားသူတို့ကို ထိုသို့ပြုရန် မည်သို့ ကူညီပေးနိုင်မည်နည်း။

^၇ ယေဟောဝါ၏ ရည်ရွယ်ချက်မှာ အသိဉာဏ်ရှိသည့် သတ္တဝါအပေါင်းအား မှန်သော ကိုးကွယ်ဝတ်ပြုမှုတွင် စည်းလုံးစေရန်ဖြစ်သည်။ အသက်ရှင်သူအားလုံး စစ်မှန်၍ တစ်ဆူတည်းဖြစ်သော ဘုရားသခင်ကို ကိုးကွယ်ကြမည့် တစ်နေ့ကို ကျွန်ုပ်တို့ လွန်စွာ တောင့်တကြ၏! (ဆာလံ ၁၀၃:၁၉-၂၂) သို့သော် ထိုသို့ ဖြစ်မလာမီ ယေဟောဝါသည် မိမိ၏ ဖြောင့်မတ်သော အလိုတော်ကိုဆောင်ရန် ငြင်းပယ်သူအားလုံးကို ပယ်ရှင်းတော်မူမည်။ နေရာအနှံ့ရှိ လူအပေါင်းတို့အား သူတို့၏ ဘဝလမ်းစဉ်ကို ပြုပြင်ပြောင်းလဲနိုင်သည့် အခွင့်အလမ်းအနေနှင့် ကိုယ်တော်သည် မိမိလုပ်ဆောင်မည့် အမှုအကြောင်းကို သက်ညှာစွာဖြင့် ကြိုတင် အသိပေးတော်မူ၏။ (ဟေရှာယ ၅၅:၆၊ ၇) ဤသို့ဖြင့် ကျွန်ုပ်တို့ခေတ်တွင် “တိုင်းနိုင်ငံ၊ မျိုးနွယ်စု၊ ဘာသာစကားတူလူစု၊ လူမျိုးခပ်သိမ်းတို့အား” ဤမေတ္တာရပ်ခံချက်ကို အရေးတကြီး ထုတ်ပြန်နေသည်– “တရားစီရင်တော်မူရာ အချိန်နာရီ ကျရောက်ပြီဖြစ်၍ ဘုရားသခင်အား ခန့်ညားကြောက်ရွံ့၍ ဘုန်းတော်ကို ချီးမွမ်းကြလော့။ ကောင်းကင်၊ မြေကြီး၊ ပင်လယ်နှင့် စမ်းရေတွင်းတို့ကို ပြုလုပ်သောအရှင်အား ကိုးကွယ်ကြလော့။” (ဗျာဒိတ် ၁၄:၆၊ ၇၊ ကဘ) ဤဖိတ်ကြားချက်ကို သင်လက်ခံပြီးပြီလော။ လက်ခံပြီးပြီဆိုလျှင် မှန်သော ဘုရားသခင်အား သိကျွမ်းကိုးကွယ်လာရန် အခြားသူတို့ကို ထပ်ဆင့်ဖိတ်ခေါ်ရန်မှာ သင်၏အခွင့်အရေး ဖြစ်ပေသည်။

၈။ သမ္မာကျမ်းစာ အခြေခံ သွန်သင်ချက်များကို သိရှိပြီးနောက် အဘယ် ထပ်ဆင့် တိုးတက်မှုအတွက် စိတ်ပါလက်ပါ ကြိုးပမ်းသင့်သနည်း။

^၈ ဘုရားသခင်ကို ယုံကြည်ပါသည်ဟု ဆိုသော်လည်း မိမိတို့၏ ကိုယ်ကျိုးစီးပွားကိုသာ ဆက်လက်လိုက်စားသူတို့၏ ကိုးကွယ်ဝတ်ပြုမှုကို ယေဟောဝါ အလိုမရှိပေ။ လူတို့သည် “အလိုတော်ကို တိကျမှန်ကန်စွာ သိကျွမ်း” ပြီးလျှင် အသက်တာတွင် ယင်းကို ထင်ဟပ်စေရန် လိုလားတော်မူ၏။ (ကောလောသဲ ၁:၉၊ ၁၀၊ ကဘ) သို့ဖြစ်သောကြောင့် သမ္မာကျမ်းစာ အခြေခံ သွန်သင်ချက်များကို သင်အံသိရှိလာသည့် ကျေးဇူးတရား သိတတ်သူတို့သည် ခရစ်ယာန်ရင့်ကျက်ခြင်းသို့ တက်လှမ်းလိုကြသည်။ သူတို့၏ လိုအင်ဆန္ဒမှာ ယေဟောဝါအား ပိုမိုရင်းနှီးစွာ သိကျွမ်းလာရန်၊ နှုတ်ကပါဌ်တော်ကို ပိုမို ကျယ်ဝန်းနက်ရှိုင်းစွာ နားလည်သဘောပေါက်ရန်နှင့် နားလည်သဘောပေါက်ရာကို အသက်တာတွင် ပိုမိုပြည့်ဝစွာ ကျင့်သုံးရန်ပင်ဖြစ်သည်။ သူတို့သည် ကောင်းကင်ခမည်းတော်၏ အရည်အသွေးများကို ရောင်ပြန်ဟပ်ရန်၊ ကိစ္စရပ်များကို ကိုယ်တော် ရှုမြင်သကဲ့သို့ ရှုမြင်တတ်ရန် အားထုတ်ကြသည်။ သို့ဖြင့် သူတို့သည် ယခုခေတ် ကမ္ဘာပေါ်တွင် ဘုရားသခင် လုပ်ဆောင်စေလျက်ရှိသည့် အသက်ကယ်လုပ်ငန်းတွင် ပါဝင်လုပ်ဆောင်နိုင်သည့် နည်းလမ်းများ ရှာကြံရန် လှုံ့ဆော်ခံရကြသည်။ အသင်လည်း ဤသို့ပြုရန် ဆန္ဒရှိသလော။—မာကု ၁၃:၁၀; ဟေဗြဲ ၅:၁၂–၆:၃။

၉။ အဘယ်နည်းများဖြင့် ယခုပင် စစ်မှန်သော စည်းလုံးမှု ရှိနေသနည်း။

^၉ ယေဟောဝါအား ဝတ်ပြုသူတို့သည် စည်းလုံးညီညွတ်သော လူမျိုးဖြစ်ရမည်ဟု သမ္မာကျမ်းစာကဆို၏။ (ဧဖက် ၄:၁-၃) ကွဲပြားသော ကမ္ဘာကြီးတွင် ကျွန်ုပ်တို့ အသက်ရှင်နေရသည့်အပြင် မိမိတို့ကိုယ်တိုင်၏ မစုံလင်မှုများနှင့်လည်း လုံးပန်းနေရစေကာမူ အဆိုပါ စည်းလုံးညီညွတ်မှုသည် ယခုပင် ရှိနေရမည်။ ယေရှုက မိမိ၏ တပည့်တော် အားလုံးသည် တစ်လုံးတစ်ဝတည်းရှိရန်နှင့် အမှန်တကယ် စည်းလုံးနေကြရန် စိတ်ပြင်းပြစွာ ဆုတောင်းပေးတော်မူခဲ့၏။ ရည်ရွယ်ချက်ကား အဘယ်နည်း။ ပထမ၊ သူတို့သည် ယေဟောဝါနှင့် ကိုယ်တော့်သားတော်တို့နှင့် ကောင်းသောဆက်ဆံရေး ရှိကြရန်အတွက် ဖြစ်သည်။ ဒုတိယ၊ သူတို့သည် အချင်းချင်း စည်းလုံးညီညွတ်ကြရန်အတွက် ဖြစ်သည်။ (ယောဟန် ၁၇:၂၀၊ ၂၁) ထိုရည်ရွယ်ချက် ပြည့်မြောက်ရေးအတွက် ခရစ်ယာန် အသင်းတော်မှတစ်ဆင့် ယေဟောဝါသည် မိမိ၏လူမျိုးတော်ကို သွန်သင်ပေးတော်မူ၏။

အဘယ် အခြေခံ အကြောင်းများကစည်းလုံးညီညွတ်မှု ရှိစေသနည်း

၁၀။ (က) ကျွန်ုပ်တို့နှင့် သက်ဆိုင်သော မေးခွန်းများ၏ အဖြေများကို ကိုယ်တိုင်ကိုယ်ကျ ကျမ်းစာသုံးလျက် ဆင်ခြင်စဉ်းစားခြင်းဖြင့် အဘယ်အရာများကို ပြုစုပျိုးထောင်ပေးသနည်း။ (ခ) ဤအပိုဒ်တွင် ဖော်ပြထားသော မေးခွန်းများကို ဖြေဆိုခြင်းဖြင့် ခရစ်ယာန် စည်းလုံးညီညွတ်မှုအား ကူပံ့ပေးသည့် အခြေခံ အချက်များကို ဆန်းစစ်လေ့လာပါ။

^၁၀ ကိုးကွယ်ဝတ်ပြုရေး စည်းလုံးမှုကို ကူပံ့ပေးသည့် အဓိက အခြေခံအကြောင်း ခုနစ်ချက်ကို အောက်တွင်ဖော်ပြထားသည်။ ပူးတွဲဖော်ပြပါ မေးခွန်းများကို ဖြေဆိုရာတွင် အချက်တစ်ချက်စီသည် ယေဟောဝါနှင့် သင်၏ ဆက်ဆံရေးနှင့်လည်းကောင်း၊ ခရစ်ယာန်ချင်းတို့နှင့် သင်၏ ဆက်ဆံရေးနှင့်လည်းကောင်း မည်သို့သက်ဆိုင်ကြောင်း ထည့်စဉ်းစားပါ။ ဤအချက်များကို စဉ်းစားဆင်ခြင်၍ ညွှန်းထားသော်လည်း ကိုးကားဖော်ပြခြင်း မရှိသော ကျမ်းချက်များကို ဖွင့်ဖတ်ခြင်းအားဖြင့် ကျွန်ုပ်တို့အားလုံး လိုအပ်သည့် အရည်အသွေးများဖြစ်သော ဘုရားတရားဉာဏ်ပညာ၊ စဉ်းစားဆင်ခြင်နိုင်စွမ်းနှင့် ပိုင်းခြားဝေဖန်နိုင်စွမ်းတို့ ဖွံ့ဖြိုးရင့်သန်ရေးအတွက် များစွာ ထောက်ကူပေးပါလိမ့်မည်။ (သု. ၅:၁၊ ၂; ဖိလိပ္ပိ ၁:၉-၁၁) ဤအချက်များကို တစ်ချက်ချင်းစီ သုံးသပ်ပါလေ။

(၁) အကောင်းအဆိုးနှင့်ပတ်သက်၍ စံနှုန်းပြဋ္ဌာန်းပိုင်ခွင့် ယေဟောဝါ၌ရှိကြောင်း ကျွန်ုပ်တို့ အသိအမှတ်ပြုသည်။ “ထာဝရဘုရားကို စိတ်နှလုံးအကြွင်းမဲ့ ကိုးစားလော့။ ကိုယ်ဉာဏ်ကို အမှီမပြုနှင့်။ သွားလေရာရာ၌ ထာဝရဘုရားကို မျက်မှောက်ပြုလော့။ သို့ပြုလျှင် သင်၏လမ်းခရီးတို့ကို ပဲ့ပြင်တော်မူမည်။”—သုတ္တံ ၃:၅၊ ၆။

ဆုံးဖြတ်ချက်များချရာတွင် ယေဟောဝါ၏ အကြံဉာဏ်နှင့် လမ်းညွှန်မှုကို အဘယ်ကြောင့် ကြိုးစားရှာဖွေသင့်သနည်း။ (ဆာလံ ၁၄၆:၃-၅; ဟေရှာယ ၄၈:၁၇)

(၂) ကျွန်ုပ်တို့ကို ဦးဆောင်လမ်းပြရန် ဘုရားသခင့် နှုတ်ကပါဌ်တော်ရှိ၏။ “ငါတို့ဟောပြောသော ဘုရားသခင်၏ နှုတ်ကပါဌ်တရားကို သင်တို့သည် ခံယူကြသောအခါ၊ လူ၏နှုတ်ထွက်စကား [အဖြစ်] မခံမယူဘဲ၊ ဘုရားသခင်၏ နှုတ်ကပါဌ်တော် အမှန်ဖြစ်သည်နှင့်အညီ၊ ယုံကြည်ခြင်းသို့ရောက်သော သင်တို့အထဲ၌ ပြုပြင်သော ဘုရားသခင်၏ နှုတ်ကပါဌ်တရားကို ခံယူကြသည်။”—၁ သက်သာလောနိတ် ၂:၁၃။

မှန်သည်ဟု “ထင်” သည့်အတိုင်း ပြုလုပ်ခြင်းသည် အဘယ်အန္တရာယ် ရှိသနည်း။ (သုတ္တံ ၁၄:၁၂; ယေရမိ ၁၀:၂၃၊ ၂၄; ၁၇:၉)

ကိစ္စတစ်ခုတွင် သမ္မာကျမ်းစာက မည်သို့ အကြံပေးထားသည်ကို မသိလျှင် အဘယ်အရာ ပြုလုပ်သင့်သနည်း။ (သုတ္တံ ၂:၃-၅; ၂ တိမောသေ ၃:၁၆၊ ၁၇)

(၃) ကျွန်ုပ်တို့အားလုံး ဝိညာဉ်အစာ ကျွေးမွေးခြင်း အစီအစဉ် တစ်မျိုးတည်းမှ အကျိုးခံစားကြရသည်။ “သင်၏ သား . . . အပေါင်းတို့သည် ထာဝရဘုရား ဆုံးမသွန်သင်တော်မူသောသူဖြစ် . . . ကြလိမ့်မည်။” (ဟေရှာယ ၅၄:၁၃) “မေတ္တာနှင့် ကောင်းမှုကို လုံ့လထုတ်ရန် တစ်ယောက်ကိုတစ်ယောက် ထောက်ထားလျက်၊ အချို့တို့၏ ထုံးစံအတိုင်း တွေ့ဆုံစည်းဝေးခြင်းကို မစွန့်လွှတ်ဘဲ တစ်ယောက်ကိုတစ်ယောက် အားပေးကြစို့။ [ဖျက်ဆီးခြင်း] နေ့ရက် နီးကပ်သည်ကို သင်တို့ သိမြင်သည့်အလျောက် သာ၍ အားပေးကြပါစို့။”—ဟေဗြဲ ၁၀:၂၄၊ ၂၅၊ ကဘ။

ယေဟောဝါ၏ ဝိညာဉ်အစာ ကျွေးမွေးခြင်း အစီအစဉ်မှ အပြည့်အဝ အကျိုးရယူသူတို့သည် အဘယ် အကျိုးကျေးဇူးများ ခံစားကြရသနည်း။ (ဟေရှာယ ၆၅:၁၃၊ ၁၄)

(၄) ကျွန်ုပ်တို့၏ ခေါင်းဆောင်မှာ လူသားမဟုတ်၊ ယေရှုခရစ် ဖြစ်၏။ “ရဗ္ဗိဟု အခေါ်မခံကြနှင့်၊ သင်တို့တွင် ဆရာ တစ်ပါးတည်းသာရှိလျက် သင်တို့အားလုံးသည် ညီအစ်ကိုချင်းဖြစ်ကြ၏။ မြေကြီးပေါ်ရှိ အဘယ်သူကိုမျှ အဘဟူ၍ မခေါ်ကြနှင့်၊ သင်တို့တွင် ကောင်းကင်ဘုံရှင် အဘ တစ်ပါးတည်းသာရှိ၏။ ခေါင်းဆောင်ဟူ၍လည်း အခေါ်မခံကြနှင့်၊ သင်တို့တွင် ခရစ်တော် တည်းဟူသော ခေါင်းဆောင် တစ်ပါးတည်းသာရှိ၏။”—မဿဲ ၂၃:၈-၁၀၊ ကဘ။

ကျွန်ုပ်တို့အထဲမှ တစ်ဦးဦးအနေဖြင့် မိမိသည် အခြားသူတို့ထက် သာသည်ဟု ထင်မှတ်သင့်သလော။ (ရောမ ၃:၂၃၊ ၂၄; ၁၂:၃)

(၅) ကျွန်ုပ်တို့သည် လူသားတို့အတွက် တစ်ခုတည်းသော မျှော်လင့်ချက်အဖြစ် ဘုရားသခင့် နိုင်ငံတော်အစိုးရကို မျှော်ကိုးကြသည်။ “ထို့ကြောင့် သင်တို့ ဆုတောင်းရမည်မှာ ‘ကောင်းကင်ဘုံ၌ ရှိတော်မူသော အကျွန်ုပ်တို့အဘ၊ ကိုယ်တော်၏ နာမတော်အား ရိုသေလေးမြတ်ခြင်း ရှိပါစေသော။ နိုင်ငံတော် တည်ထောင်ပါစေသော။ အလိုတော်သည် ကောင်းကင်ဘုံ၌ ပြည့်စုံသကဲ့သို့ မြေကြီးပေါ်မှာ ပြည့်စုံပါစေသော။’ ဘုရားသခင်၏ နိုင်ငံတော်နှင့် ဖြောင့်မတ်ခြင်းတရားတော်ကို ရှေ့ဦးစွာရှာကြလော့။”—မဿဲ ၆:၉၊ ၁၀၊ ၃၃။

‘နိုင်ငံတော်ကို ရှေ့ဦးစွာရှာ’ ခြင်းဖြင့် ကျွန်ုပ်တို့၏ စည်းလုံးညီညွတ်မှုကို မည်သို့ ကာကွယ်ထိန်းသိမ်းနိုင်သနည်း။ (မိက္ခာ ၄:၃; ၁ ယောဟန် ၃:၁၀-၁၂)

(၆) သန့်ရှင်းသော ဝိညာဉ်တော်သည် ခရစ်ယာန် စည်းလုံးမှုအတွက် မရှိမဖြစ်လိုအပ်သော အရည်အသွေးများကို ယေဟောဝါအား ကိုးကွယ်ဝတ်ပြုသူတို့၌ မွေးမြူပေးသည်။ “ဝိညာဉ်တော်က ဖြစ်ပေါ်စေသည့် အသီးအပွင့်မူကား ချစ်ခြင်း၊ ဝမ်းမြောက်ခြင်း၊ ငြိမ်သက်ခြင်း၊ စိတ်ရှည်သည်းခံခြင်း၊ သနားကြင်နာခြင်း၊ ကောင်းမြတ်ခြင်း၊ သစ္စာစောင့်ခြင်း၊ နူးညံ့သိမ်မွေ့ခြင်း၊ မိမိကိုယ်ကို ချုပ်တည်းခြင်းတို့ပေတည်း။”—ဂလာတိ ၅:၂၂၊ ၂၃၊ သက။

ကျွန်ုပ်တို့၌ ဘုရားသခင့် ဝိညာဉ်တော် အသီးသီးနိုင်ရန် ကျွန်ုပ်တို့ အဘယ်အရာ ပြုလုပ်ရမည်နည်း။ (တမန်တော် ၅:၃၂)

ဘုရားသခင့် ဝိညာဉ်တော် ရှိခြင်းက ခရစ်ယာန်ချင်းတို့နှင့် ကျွန်ုပ်တို့၏ ဆက်ဆံရေးအပေါ် မည်သို့ ဩဇာသက်ရောက်မှု ရှိသနည်း။ (ယောဟန် ၁၃:၃၅; ၁ ယောဟန် ၄:၈၊ ၂၀၊ ၂၁)

(၇) ဘုရားသခင်၏ မှန်သောကိုးကွယ်သူ အားလုံးတို့သည် နိုင်ငံတော် သတင်းကောင်း ဟောပြောခြင်းတွင် ပါဝင်ကြသည်။ “နိုင်ငံတော် သတင်းကောင်းကို လူမျိုးအပေါင်းတို့အား သက်သေအဖြစ် လူနေထိုင်ရာ မြေတစ်ပြင်လုံးအနှံ့ ဟောပြောပြီးမှ အဆုံးရောက်လိမ့်မည်။—မဿဲ ၂၄:၁၄၊ ကဘ။

ဤဟောပြောခြင်း လှုပ်ရှားမှုတွင် အပြည့်အဝ ပါဝင်လိုစိတ်ရှိအောင် ကျွန်ုပ်တို့ကို အဘယ်အရာက လှုံ့ဆော်ပေးသင့်သနည်း။ (မဿဲ ၂၂:၃၇-၃၉; ရောမ ၁၀:၁၀)

၁၁။ သမ္မာကျမ်းစာ အမှန်တရားများကို အသက်တာတွင် ကျင့်သုံးပါက အဘယ် အကျိုးရလဒ် ရရှိသနည်း။

^၁၁ ယေဟောဝါအား စည်းလုံးညီညွတ်စွာ ကိုးကွယ်ခြင်းက ကျွန်ုပ်တို့ကို အထံတော်သို့ ပိုမိုချဉ်းကပ်စေသည့်အပြင် ယုံကြည်သူချင်းတို့နှင့်လည်း လန်းဆန်းကြည်သာစွာ ပေါင်းသင်းဆက်ဆံခွင့် ရရှိစေသည်။ “ညီအစ်ကိုတို့သည် စည်းလုံးညီညွတ်စွာ အတူတကွ နေထိုင်ကြသည်မှာ အလွန်ကောင်းမြတ်၍ နှစ်လိုဖွယ် ကောင်းလှပါသည်တကား!” ဟူ၍ ဆာလံ ၁၃၃:၁ (ကဘ) ကဆို၏။ ဤလောကနှင့် ယင်း၏ တစ်ကိုယ်ကောင်းဆန်ခြင်း၊ ကိုယ်ကျင့်တရားပျက်ပြားခြင်းနှင့် အကြမ်းဖက်ခြင်းတို့မှ ကင်းဝေးပြီးလျှင် ယေဟောဝါအား အမှန်ချစ်၍ ကိုယ်တော့်ပညတ်များကို လိုက်နာသူတို့နှင့် စုဝေးရသည်မှာ လန်းဆန်းကြည်သာ လှပါသည်တကား!

စိတ်ဝမ်းကွဲစေတတ်သော ဩဇာများကို ရှောင်ပါ

၁၂။ သီးခြားလွတ်လပ်စွာ နေလိုသည့်စိတ်ဓာတ်ကို အဘယ်ကြောင့် ရှောင်ကြဉ်ရန် လိုသနည်း။

^၁၂ ကျွန်ုပ်တို့၏ အဖိုးထိုက်လှသော ကမ္ဘာလုံးဆိုင်ရာ စည်းလုံးညီညွတ်မှု မပျက်ပြားရလေအောင် စိတ်ဝမ်းကွဲစေတတ်သည့် ဩဇာများကို ရှောင်ကြဉ်ကြရပေမည်။ ၎င်းတို့အနက် တစ်ခုမှာ ဘုရားသခင်နှင့် ကိုယ်တော့်ပညတ်များကို မှီခိုစရာမလိုဟူသော စိတ်ဓာတ်ပင်ဖြစ်သည်။ ယေဟောဝါသည် ၎င်းစိတ်ဓာတ်၏ ပင်ရင်းဇာစ်မြစ်ဖြစ်သည့် စာတန်မာရ်နတ်အကြောင်း လှစ်ဟဖွင့်ပြခြင်းအားဖြင့် ၎င်းစိတ်ဓာတ်ကို ရှောင်နိုင်အောင် ကူညီတော်မူ၏။ (၂ ကောရိန္သု ၄:၄; ဗျာဒိတ် ၁၂:၉) အာဒံနှင့်ဧဝတို့အား ဘုရားသခင့် မိန့်မှာချက်ကို လျစ်လျူရှုပြီး ကိုယ်တော့်အလိုတော်နှင့် ဆန့်ကျင်သည့် ဆုံးဖြတ်ချက်များ ချဖြစ်အောင် ဩဇာညောင်းခဲ့သူမှာ စာတန်ပင်ဖြစ်၏။ အကျိုးရလဒ်ကား သူတို့အတွက်ကော ကျွန်ုပ်တို့အတွက်ပါ အတိဒုက္ခ ရောက်ရခြင်းပင်ဖြစ်သည်။ (ကမ္ဘာဦး ၃:၁-၆၊ ၁၇-၁၉) ဤလောကသည် ဘုရားသခင်နှင့် ကိုယ်တော့်ပညတ်တရားများမှ သီးခြားလွတ်လပ်စွာ နေလိုသည့်စိတ်ဓာတ်နှင့် ပြည့်နှက်လျက်ရှိ၏။ ထို့ကြောင့် ကျွန်ုပ်တို့သည် ထိုစိတ်ဓာတ်မျိုး မဝင်ရအောင် ထိန်းချုပ်တားဆီးရန်လိုသည်။

၁၃။ ဘုရားသခင့် ဖြောင့်မတ်သော ကမ္ဘာသစ်တွင် အသက်ရှင်ရန် ကျွန်ုပ်တို့ စိတ်ရင်းမှန်ဖြင့် ပြင်ဆင်လျက် ရှိမရှိ အဘယ်အရာက ဖော်ပြမည်နည်း။

^၁၃ သာဓကအားဖြင့် လက်ရှိ ဆိုးယုတ်သော လောကကို “ဖြောင့်မတ်ခြင်းတရား တည်နေရာ” ကောင်းကင်သစ်နှင့် မြေကြီးသစ်တို့ဖြင့် အစားထိုးမည်ဟူသော ယေဟောဝါ၏ ပီတိဖြစ်ဖွယ် ကတိတော်ကို စဉ်းစားဆင်ခြင်ကြည့်ပါ။ (၂ ပေတရု ၃:၁၃) ဤအချက်က ဖြောင့်မတ်ခြင်းတရား လွှမ်းမိုးသောအချိန်ကာလတွင် အသက်ရှင်ရေးအတွက် ယခုကတည်းကပင် စတင်ပြင်ဆင်ရန် တိုက်တွန်းပေးသင့်သည် မဟုတ်လော။ ဆိုလိုသည်မှာ သမ္မာကျမ်းစာ၏ ရှင်းလင်းပြတ်သားသည့် ဤအကြံပေးချက်ကို ဂရုစိုက်ခြင်းဖြစ်သည်– “ဤလောကကိုလည်းကောင်း၊ လောက၌ရှိသော အရာတို့ကိုလည်းကောင်း မချစ်ကြနှင့်။ တစ်စုံတစ်ယောက်သောသူသည် ဤလောကကိုချစ်လျှင်၊ ထိုသူ၌ အဘခမည်းတော်ကို ချစ်ခြင်းမေတ္တာ မရှိ။” (၁ ယောဟန် ၂:၁၅၊ သမ္မာ) ထို့ကြောင့် ကျွန်ုပ်တို့သည် ဤလောက၏ စိတ်ဓာတ်ဖြစ်သော သီးခြားလွတ်လပ်လိုသည့် သဘောထား၊ ကိုယ်ကျိုးကိုသာ အလွန်အမင်း ကြည့်တတ်သည့်စိတ်၊ ကိုယ်ကျင့်တရားပျက်ခြင်း၊ အကြမ်းဖက်ခြင်းကို ရှောင်ကြဉ်ကြသည်။ မစုံလင်သည့် သွေးသားဆန္ဒက မည်သို့ပင် ဆန့်ကျင်စေကာမူ ယေဟောဝါ၏ စကားတော်ကို နားထောင်၍ နှလုံးအပြည့်ဖြင့် နာခံတတ်သည့်အကျင့်ကို ကျွန်ုပ်တို့ မွေးမြူကြ၏။ ကျွန်ုပ်တို့၏ စဉ်းစားတွေးခေါ်မှုနှင့် ရည်ရွယ်ချက်တို့သည် ဘုရားသခင့် အလိုတော်ဆောင်ခြင်းကို အဓိကထားကြောင်း ကျွန်ုပ်တို့၏ အသက်တာလမ်းစဉ် တစ်ရပ်လုံးက ထင်ရှားစေသည်။—ဆာလံ ၄၀:၈။

၁၄။ (က) ယေဟောဝါ၏ နည်းလမ်းတော်များကို သင်ယူသိရှိ၍ ဘဝတွင် လက်တွေ့ကျင့်သုံးရန် အခွင့်အလမ်းကို ယခုပင် အမိအရယူဖို့ အဘယ်ကြောင့် အရေးကြီးသနည်း။ (ခ) အပိုဒ်တွင် ရည်ညွှန်းထားသည့် ကျမ်းချက်များသည် ကျွန်ုပ်တို့ကိုယ်တိုင်အတွက် အဘယ်အဓိပ္ပာယ် ရှိသနည်း။

^၁၄ ဆိုးယုတ်သော ဤအစီအစဉ်စနစ်နှင့် ယင်း၏လမ်းစဉ်များကို နှစ်သက်သူအပေါင်းတို့ကို ဖျက်ဆီးရန် ယေဟောဝါအတွက် ချိန်းချက်ထားသည့်အချိန် ရောက်လာသောအခါ ကိုယ်တော်သည် ဖင့်နွှဲတော်မူမည်မဟုတ်။ ဘုရားသခင့် အလိုတော်ကို သင်ယူ၍ ကျင့်ဆောင်ရာ၌ စိတ်မပါ့တပါဖြစ်ပြီး ဤလောကကို ဆက်၍ ဖက်တွယ်ထားသူများအတွက် ကိုယ်တော်သည် ထိုအချိန်ကို ရွှေ့ဆိုင်းမည်မဟုတ်၊ မိမိ၏ စံနှုန်းများကိုလည်း ပြောင်းလဲမည် မဟုတ်ပေ။ ယခုအချိန်သည် လုပ်စရာရှိသည်ကို လုပ်ရမည့်အချိန်ပင်ဖြစ်သည်။ (လုကာ ၁၃:၂၃၊ ၂၄; ၁၇:၃၂; ၂၁:၃၄-၃၆) ထို့ကြောင့် အဖိုးထိုက်လှသော ဤအခွင့်အလမ်းကို မိမိရရ ဆုပ်ကိုင်ကာ နှုတ်ကပါဌ်တော်နှင့် အဖွဲ့အစည်းတော်မှတစ်ဆင့် ယေဟောဝါ ပေးသနားတော်မူသည့် ညွှန်ကြားချက်များကို စိတ်အားထက်သန်စွာ စူးစမ်းလေ့လာ၍ ကမ္ဘာသစ်သို့သွားရာ လမ်းခရီးတော်တွင် စည်းလုံးညီညွတ်စွာ လျှောက်လှမ်းနေကြသည့် “လူအုပ်ကြီး” ကိုတွေ့မြင်ရသည်မှာ ကြည်နူးစရာပင်! ယေဟောဝါအကြောင်း ပိုမို သိရှိလာသည်နှင့်အမျှ ကိုယ်တော်ကိုချစ်သော မေတ္တာနှင့် ကိုယ်တော်ကို ဝတ်ပြုလိုသည့်ဆန္ဒလည်း တိုးပွားလာပေမည်။

ပြန်လည်သုံးသပ်ဆွေးနွေးခြင်း

• ကိုးကွယ်ဝတ်ပြုမှုနှင့်ပတ်သက်၍ ယေဟောဝါ၏ ရည်ရွယ်ချက်ကား အဘယ်နည်း။

• သမ္မာကျမ်းစာ အခြေခံ သွန်သင်ချက်များကို သိရှိပြီးနောက် အဘယ် ထပ်ဆင့် တိုးတက်မှုအတွက် စိတ်ရင်းခံနှင့် ကြိုးပမ်းသင့်သနည်း။

• ယေဟောဝါအား ကိုးကွယ်သော အခြားသူတို့နှင့် စည်းလုံးရေးအတွက် ကျွန်ုပ်တို့ တစ်ဦးချင်း အဘယ်အရာ ပြုလုပ်နိုင်သနည်း။