ရုသနဲ့ နောမိ

အစ္စရေးနိုင်ငံမှာ အငတ်ဘေးဆိုက်တုန်းက အစ္စရေးအမျိုးသမီး နောမိဟာ သူ့ယောက်ျား၊ သူ့သားနှစ်ယောက်နဲ့ မောဘပြည်ကို ပြောင်းရွှေ့သွားတယ်။ နောက်ပိုင်းမှာ သူ့ယောက်ျား သေသွားတယ်။ မောဘအမျိုးသမီး သြရပနဲ့ ရုသကို သားတွေ လက်ထပ်ယူထားတယ်။ တော်တော်ကြာတော့ နောမိရဲ့ သားတွေလည်း သေဆုံးသွားတယ်။

အစ္စရေးနိုင်ငံမှာ အစာရေစာ ပေါပြီလို့ နောမိသတင်းရတဲ့အခါ ပြန်သွားဖို့ ဆုံးဖြတ်တယ်။ ရုသနဲ့ သြရပလည်း လိုက်သွားတယ်။ ဒါပေမဲ့ လမ်းခရီးမှာ သူတို့ကို နောမိက ‘သမီးတို့နှစ်ယောက်စလုံးဟာ ဇနီးကောင်းတွေ၊ ချွေးမကောင်းတွေပဲ။ သမီးတို့ကို နောက်အိမ်ထောင်ပြုစေချင်တယ်။ မောဘပြည်ကို ပြန်သွားကြ’ လို့ပြောတယ်။ သူတို့က ‘ကျွန်မတို့ အမေ့ကို ချစ်တယ်။ မခွဲချင်ဘူး’ တဲ့။ နောမိကတော့ ပြန်သွားကြဖို့ ဆက်တိုက်တွန်းတယ်။ နောက်ဆုံး၊ သြရပ ပြန်သွားတယ်။ ရုသကတော့ မပြန်ဘူး။ ဒါနဲ့ ရုသကို နောမိက ‘သြရပဟာ သူ့လူမျိုး၊ သူ့ဘုရားတွေဆီ ပြန်သွားပြီ။ သူနဲ့ ပြန်လိုက်သွားပါ။ ကိုယ့်အမေအိမ်ကို ပြန်ပါ’ လို့ပြောတော့ ရုသက ‘အမေနဲ့ မခွဲဘူး။ အမေ့လူမျိုးက ကျွန်မလူမျိုးပဲ။ အမေ့ဘုရားက ကျွန်မဘုရားပါ’ လို့ဖြေတယ်။ အဲဒီလို ရုသ ပြောလိုက်တော့ နောမိ ဘယ်လိုခံစားရမလဲ။

ရုသနဲ့ နောမိဟာ မုယောစပါး ရိတ်သိမ်းခါစအချိန်မှာ အစ္စရေးနိုင်ငံကို ပြန်ရောက်လာကြတယ်။ တစ်နေ့ကျတော့ ရုသဟာ ရာခပ်ရဲ့သား ဗောဇလို့ခေါ်တဲ့သူရဲ့ လယ်ထဲမှာ ကောက်သင်းသွားကောက်တယ်။ ရုသဟာ နောမိနောက် လိုက်လာခဲ့တဲ့ သစ္စာရှိ မောဘအမျိုးသမီးဖြစ်မှန်း ဗောဇကြားထားတယ်။ ရုသအတွက် ကောက်နှံတချို့ ချထားပေးဖို့ အလုပ်သမားတွေကို ဗောဇမှာတယ်။

အဲဒီညနေမှာ ရုသကို နောမိက ‘ဒီကနေ့ ဘယ်သူ့လယ်ထဲမှာ အလုပ်လုပ်ခဲ့သလဲ’ လို့မေးတော့ ရုသက ‘ဗောဇလို့ခေါ်တဲ့သူရဲ့ လယ်ထဲမှာ’ လို့ဖြေတယ်။ ဒါနဲ့ နောမိက ‘ဗောဇဟာ အမေတို့ရဲ့ အမျိုးပဲ။ တခြားအမျိုးသမီးတွေနဲ့အတူ သူ့လယ်မှာ ဆက်အလုပ်လုပ်နေပါ။ အဲဒီမှာ လုံခြုံတယ်’ တဲ့။

ရုသလည်း ရိတ်သိမ်းချိန်ပြီးတဲ့အထိ ဗောဇရဲ့ လယ်မှာ ဆက်အလုပ်လုပ်တယ်။ ရုသဟာ အလုပ်ကြိုးစားတဲ့ မိန်းမကောင်းတစ်ယောက် ဖြစ်တာကို ဗောဇ သတိထားမိတယ်။ အဲဒီခေတ်တုန်းက ယောက်ျားတစ်ယောက် သေသွားလို့ သားမရှိဘူးဆိုရင် အမျိုးတစ်ယောက်က သူ့မိန်းမကို လက်ထပ်ရတယ်။ ဒါကြောင့် ဗောဇဟာ ရုသကို လက်ထပ်လိုက်တယ်။ သူတို့ဟာ သြဗက်လို့ခေါ်တဲ့ သားတစ်ယောက်ရတယ်။ နောက်ပိုင်းမှာ သူတို့သားက ဒါဝိဒ်မင်းကြီးရဲ့ အဘိုး ဖြစ်လာတယ်။ နောမိသူငယ်ချင်းတွေက အရမ်းဝမ်းသာကြတယ်။ သူတို့က ‘ယေဟောဝါဟာ ရှင့်ကို အရင်ဆုံး တကယ်တော်တဲ့ ရုသကို ပေးတယ်။ အခု မြေးလေးပေးပြန်ပြီ။ ယေဟောဝါကို ချီးမွမ်းကြပါ’ လို့ပြောတယ်။