သွန်သင်ခြင်း လေးထောင့်ကွက် ၁ခ
ယေဇကျေလကျမ်း အကျဉ်း
ယေဘုယျအားဖြင့် ယေဇကျေလကျမ်းကို အောက်ပါအတိုင်း အပိုင်းခွဲနိုင်ပါတယ်–
အခန်းကြီး ၁ မှ ၃
ဘီစီ ၆၁၃။ ဗာဗုလုန်ပြည်က ပြည်နှင်ခံဂျူးတွေကြား ယေဇကျေလ နေထိုင်စဉ် ယေဟောဝါဆီက စိတ်အာရုံတွေကို မြင်တွေ့ခဲ့ရပြီး ခေဗာမြစ်နားမှာနေတဲ့ ဂျူးတွေအတွက် ပရောဖက်ပြုဖို့ တာဝန်ပေးအပ်ခံရ။
အခန်းကြီး ၄ မှ ၂၄
ဘီစီ ၆၁၃ နဲ့ ၆၀၉ ကြား။ ဂျေရုဆလင်မြို့နဲ့တကွ ပုန်ကန်သူတွေ၊ ရုပ်တုကိုးကွယ်သူတွေကို တရားစီရင်မယ့်အကြောင်း ယေဇကျေလ ကြိုဟော။
အခန်းကြီး ၂၅ မှ ၃၂
ဘီစီ ၆၀၉ မှာ အစပြု။ ဂျေရုဆလင်မြို့ကို ဗာဗုလုန်တွေ နောက်ဆုံးအကြိမ် စတင်ဝိုင်းရံ။ ဂျေရုဆလင်မြို့အပေါ် တရားစီရင်ချက် သတင်းကနေ ပတ်ဝန်းကျင်ရန်သူ အမ္မုန်၊ ဧဒုံ၊ အီဂျစ်၊ မောဘ၊ ဖိလိတိ၊ ဆိုင်ဒုန်၊ တိုင်ရာတို့အပေါ် တရားစီရင်ချက်သတင်း ပြောင်းသွား။
အခန်းကြီး ၃၃ မှ ၄၈
ဘီစီ ၆၀၆ မှာ အစပြု။ မိုင်ပေါင်းရာချီ ဝေးရာမှာ ဂျေရုဆလင်မြို့နဲ့ ဗိမာန်တော်ဟာ ပျက်စီးယိုယွင်းနေ။ ယေဟောဝါရဲ့ စင်ကြယ်တဲ့ ဝတ်ပြုကိုးကွယ်မှု စိတ်လှုပ်ရှားဖွယ် ပြန်လည်တည်ထောင်ခြင်းအကြောင်း မျှော်လင့်ချက်သတင်းကို ယေဇကျေလ အာရုံစိုက်။
ယေဇကျေလကျမ်းမှာ ဖြစ်စဉ်အလိုက်၊ အကြောင်းအရာအလိုက် စီစဉ်ဖော်ပြထားတယ်။ စင်ကြယ်တဲ့ ဝတ်ပြုကိုးကွယ်မှု ပြန်လည်တည်ထောင်ခြင်းဆိုင်ရာ ပရောဖက်ပြုချက်တွေ မလာခင်မှာ ဂျေရုဆလင်မြို့နဲ့ ဗိမာန်တော် ပျက်စီးခြင်းအကြောင်း ပရောဖက်ပြု။ ဗိမာန်တော်မှာ ဝတ်ပြုကိုးကွယ်မှု ရပ်စဲသွားမယ်ဆိုတာ ပြန်လည်တည်ထောင်ခြင်း ပရောဖက်ပြုချက်တွေက အရိပ်အမြွက် ဖော်ပြ။
ဂျေရုဆလင်မြို့ တရားစီရင်ခြင်းသတင်းနဲ့ စင်ကြယ်တဲ့ ဝတ်ပြုကိုးကွယ်မှု ပြန်လည်တည်ထောင်ခြင်းဆိုင်ရာ ပရောဖက်ပြုချက်တွေကြားမှာ ပတ်ဝန်းကျင်နိုင်ငံတွေကို တရားစီရင်ခြင်းအကြောင်း ပါရှိ။ (အခန်းကြီး ၂၅ မှ ၃၂) “ရန်သူတွေကို အပြစ်ပေးစီရင်တာဟာ ဘုရားလူမျိုးကို ကယ်တင်ဖို့ ဖြစ်တယ်။ ဒါကြောင့် ဘုရားရဲ့ အမျက်တော်သတင်း ကြေညာချက်နဲ့ ဘုရားလူမျိုးအတွက် ကရုဏာသတင်း ကြေညာချက်ကြားမှာ လူမျိုးခြားတွေကို တရားစီရင်ခြင်းသတင်း ရှိနေတာ သင့်လျော်ပါတယ်” ဆိုပြီး ကျမ်းပညာရှင်တစ်ယောက် ပြောခဲ့တယ်။