အတိတ်ကို မတမ်းတသူ

စာရာဟာ ချစ်ရတဲ့ အာဗြဟံနဲ့ အိမ်ထောင်ကျပြီး ရှိနာပြည်၊ ဥရမြို့မှာ နေတယ်။ ဥရမြို့ဟာ ယူဖရေးတီးမြစ်ကမ်းပါးမှာ ရှိတယ်။ မြို့ရိုးကြီးတွေ ကာရံထားပြီး သိပ်စည်ကားတယ်။ ရုပ်တုကိုးကွယ်မှုတွေ အပြည့်ပဲ။ အာဗြဟံကတော့ တစ်ပါးတည်းသော စစ်မှန်တဲ့ ဘုရားသခင် ယေဟောဝါကို ကိုးကွယ်တယ်။ စာရာလည်း စစ်မှန်တဲ့ ဘုရားသခင်ကို ယုံတယ်။ ဒါပေမဲ့ စာရာ ယုံကြည်ခြင်း၊ သတ္တိ ပိုရှိရမယ့်အချိန် ရောက်လာတယ်။ ဘာကြောင့်လဲ။

ယေဟောဝါ စကားလာပြောတဲ့အကြောင်း အာဗြဟံ ပြောပြတော့ စာရာ စိတ်လှုပ်ရှားသွားမှာပဲ။ ဒါပေမဲ့ ယေဟောဝါ ဘာပြောသလဲဆိုတာ သိလိုက်ရတော့ တုန်လှုပ်သွားနိုင်တယ်။ ဥရမြို့က အိမ်နဲ့ ဆွေမျိုးသားချင်းတွေကို ထားခဲ့ပြီး ရပ်ဝေး ပြောင်းရမယ်၊ ကျွန်တွေ ခေါ်၊ ကုလားအုတ်တွေ စီးပြီး ခရီးရှည် တအိအိ နှင်ရမယ်၊ တဲထိုး နေရမယ်တဲ့။ ဆိုလိုတာက မြို့ရိုးကြီးတွေ၊ အစောင့်တွေ ဝိုင်းရံထားတဲ့ မြို့မှာ မနေရတော့ဘူး။ ခြံကြီးဝင်းကြီးနဲ့ မနေရတော့ဘူး။ ရေသွယ်စနစ်ကအစ ရှိတဲ့ အိမ်ကြီးအိမ်ကောင်းမှာ မနေရတော့ဘူး။ သွားစရာ ဈေးရယ်လို့ မရှိတော့ဘူး။ အခက်အခဲတွေမှ အများကြီးပဲ။ ဒါပေမဲ့ ယေဟောဝါကို ယုံကြည်ကိုးစားတဲ့အတွက် သွားဖို့ သဘောတူလိုက်တယ်။ ဘယ်ကို သွားရမှန်း မသိပေမဲ့ ပစ္စည်းတွေ ထုပ်ပိုး၊ ဆွေမျိုးတွေ၊ မိတ်ဆွေတွေကို နှုတ်ဆက်ပြီး အာဗြဟံနောက် သတ္တိရှိရှိ လိုက်လာတယ်။

သတ္တိ ရှိကြောင်း နောက်တစ်နည်းနဲ့လည်း စာရာ ပြတယ်။ “ထွက်လာခဲ့တဲ့နေရာကို သူတို့ တမ်းတနေတယ်ဆိုရင် ပြန်သွားနိုင်တာပဲ” လို့ စာရာတို့ဇနီးမောင်နှံနဲ့ပတ်သက်ပြီး တမန်တော် ပေါလု ပြောတယ်။ (ဟီ. ၁၁:၁၅) ဥရမြို့မှာ ဘယ်လိုအိမ်နဲ့ နေခဲ့ရတယ်၊ ဘယ်လောက် လုံခြုံတယ် စသဖြင့် အတိတ်ကို စာရာ တမ်းတချင်ရင် တမ်းတနိုင်တယ်။ ဒါပေမဲ့ မတမ်းတဘူး။ အနာဂတ်ကို သတ္တိရှိရှိ ရင်ဆိုင်တယ်။

ခါနန်ပြည် ရောက်တော့ ယူဖရေးတီးလို မြစ်ကြီး မရှိမှန်း စာရာ သိလိုက်ရတယ်။ ယူဖရေးတီးမြစ်မှာဆိုရင် ဝယ်ခြမ်းစရာ စားသောက်ကုန်တွေ၊ လူသုံးကုန်တွေ တင်လာတဲ့ သင်္ဘောတွေ အပြည့်ပဲ။ ဒီတော့ ခါနန်ပြည်မှာ အငတ်ဘေးလည်း ဆိုက်ရော ရွေးချယ်စရာ မရှိဘဲ ပြောင်းရတော့တာပေါ့။ အရှေ့ဘက်မှာ ရှိတဲ့ ဥရမြို့ ပြန်ဖို့ အခွင့်အရေးပဲလို့ တွေးပြီး အာဗြဟံကို စာရာ နားပူနားဆာ မလုပ်ဘူး။ အာဗြဟံနဲ့အတူ တောင်ဘက် အီဂျစ်ပြည်ကို ကျေကျေနပ်နပ် လိုက်သွားတယ်။

ကိုယ့်ကို တစ်ယောက်ယောက် သတ်ပြီး မိန်းမချော စာရာကို သိမ်းသွားမှာ အာဗြဟံ ကြောက်တယ်။ ဒါကြောင့် ညီမအဖြစ် စာရာကို ဟန်ဆောင်ခိုင်းတယ်။ ဒါပေမဲ့ အီဂျစ်မင်း ဖာရောလက်ကနေ မလွတ်ပါဘူး။ စာရာ သိပ်လှတဲ့အကြောင်း ဖာရောနားထဲ ပေါက်သွားလို့ နန်းတော် ခေါ်သွားခံရတယ်။ တစ်နေရာပြီး တစ်နေရာ တဲထိုးနေရတာထက် နန်းတော်မှာ အများကြီး ပိုလုံခြုံဇိမ်ကျတာပေါ့။ အာဗြဟံကို စွန့်ပြီး ဖာရောဆီမှာ ဇိမ်ကျကျဘဝနဲ့ နေလိုက်ဖို့ စာရာ တွေးသလား။ မတွေးဘူး။ ခင်ပွန်းအပေါ် သစ္စာရှိဖို့၊ ဘဝခရီးကြမ်း ဆက်ဖို့ သတ္တိရှိရှိ ဆုံးဖြတ်ထားတယ်။ ယေဟောဝါ ကယ်ပေးလို့ ချစ်ရတဲ့ ခင်ပွန်းနဲ့ ပြန်ဆုံစည်းခွင့် ရသွားတယ်။a

အာဗြဟံဆီကနေ လူမျိုးကြီး ဆင်းသက်လာမယ်လို့ ယေဟောဝါ ကတိပေးထားတယ်။ ဒါပေမဲ့ စာရာ မြုံနေတယ်။ စာရာ သိပ်ဝမ်းနည်းမှာပဲ။ ဒါပေမဲ့ ခါနန်ပြည်မှာ နှစ်များစွာ နေပြီးနောက် ယေဟောဝါ ဆုချတယ်။ စာရာ အသက် ၉၀ ရှိပြီ ဖြစ်ပေမဲ့ အဖြစ်ချင်ဆုံး ဆန္ဒကို ဖြည့်ဆည်းပေးတယ်။ သားဆု ပေးလိုက်တာပါ။ သားလေးကို အိဇက်လို့ နာမည်ပေးဖို့ ယေဟောဝါ ညွှန်ကြားတယ်။ အဓိပ္ပာယ်က “ရယ်မောသူ။” သားလေး ရမယ်ဆိုတာ သိရတော့ အာဗြဟံနဲ့ စာရာ ရယ်မောပျော်ရွှင် ခဲ့ကြရတယ်။ ယေဟောဝါ လုပ်ပေးတဲ့ အံ့ဖွယ်အမှုအကြောင်း ကြားတဲ့အခါ မိမိနဲ့အတူ လူတွေ ရယ်မောပျော်ရွှင်ကြမယ်ဆိုတာ စာရာ ယုံတယ်။

သားလေး လူလားမြောက်လာတာ၊ ယေဟောဝါကို သစ္စာရှိရှိ ကိုးကွယ်တာ မြင်ရတဲ့အထိ စာရာ အသက်ရှည်တယ်။ မိခင်မေတ္တာ ကြီးမားသူ၊ သတ္တိရှိသူ ဖြစ်လို့ သားလေးကို ကာကွယ်ပျိုးထောင်နိုင်တာ။ သေတဲ့အချိန်ထိ ဇိမ်ကျကျဘဝကို လုံးဝ မတမ်းတဘူး။ တောက်ပတဲ့ အနာဂတ်ကိုပဲ ကြည့်တယ်။ ဘုရားကတိတွေ အကုန်အစင် ပြည့်စုံလာတာ စာရာတို့မိသားစု မမြင်လိုက်ရဘူး။ မကြာခင်တော့ သေချာပေါက် မြင်ကြရမှာပါ။

ကျမ်းမှတ်တမ်းကို ဖတ်ပါ–

• ကမ္ဘာဦး ၁၂:၁-၂၀။ ၁၅:၁၈။ ၁၆:၁၊ ၂။ ၁၇:၃-၈၊ ၁၅-၁၉။ ၁၈:၉-၁၅။ ၂၀:၁-၁၇။ ၂၁:၁-၁၃

• တမန်တော် ၇:၁-၇

ဆွေးနွေးရန်–

သတ္တိရှိကြောင်း ဘယ်နည်းတွေနဲ့ စာရာ ပြသလဲ။

ရှာဖွေလေ တွေ့ရှိလေ

1. ၁။ အဖေတူ အမေကွဲ အစ်ကို အာဗြဟံကို စာရာ လက်ထပ်တာ မှားသလား။ (ကလ၁၇.၃ ၁၂ ပိုဒ်. ၅၊ အောက်ခြေမှတ်ချက်)

   အဖြေ

2. ၂။ ဥရမြို့မှာ စာရာ ဘာတွေ ထားခဲ့ရမလဲ။ (ကလ၁၇.၃ ၁၃ ပိုဒ်. ၄–၁၄ ပိုဒ်. ၃) ရုပ်ပုံ က

   အဖြေ

   

   Photograph taken by courtesy of the British Museum

3. ၃။ စာရာဟာ မိမိဇနီး ဖြစ်ကြောင်း အာဗြဟံ ဖုံးထားတာ ဘာကြောင့် ပညာရှိရာကျသလဲ။ (ကလ၁၇.၃ ၁၄ ပိုဒ်. ၇–၁၅ ပိုဒ်. ၂)

   အဖြေ

4. ၄။ အာဗြဟံကို စာရာ လက်အောက်ခံတယ်ဆိုတာ ရေငုံနှုတ်ပိတ်နေတာကို ဆိုလိုသလား။ ရှင်းပြပါ။ (န ၁/၀၈ ၁၇ ပိုဒ်. ၄-၅) ရုပ်ပုံ ခ

   အဖြေ

   

တွေးတောစရာ သင်ခန်းစာ

• စာရာနဲ့ လောတဇနီးကို နှိုင်းယှဉ်ကြည့်ပါ–

  • ဘာတွေ ဆင်တူသလဲ။ (က. ၁၂:၁။ ၁၃:၅-၇။ ၁၉:၁၂၊ ၁၅)

    အဖြေ

  • ဘာတွေ ကွာသလဲ။ (က. ၁၉:၁၇၊ ၂၆။ လု. ၁၇:၂၈-၃၂)

    အဖြေ

  • သူတို့နှစ်ယောက်ရဲ့ ဆုံးဖြတ်ချက်ကနေ၊ ဆုံးဖြတ်ချက်ရဲ့ အကျိုးဆက်ကနေ ဘာသင်ယူနိုင်သလဲ။

    အဖြေ

• စာရာဟာ ချောတယ်။ အာဗြဟံနဲ့ အိမ်ထောင်ကျပြီး ဥရမြို့မှာ ချမ်းချမ်းသာသာ နေရတယ်။ သင်သာ စာရာ့လို အနေအထားမှာ ရှိရင် စာရာ့ဆီကနေ ဘာသင်ယူနိုင်သလဲ။ (ပညာ. ၃၁:၃၀။ ၁ တိ. ၆:၁၇-၁၉)

  အဖြေ

• စာရာရဲ့ သတ္တိကို ဘယ်လို အတုယူနိုင်မလဲ။ ရုပ်ပုံ ဂ

  အဖြေ

  

အတွေးနယ်ချဲ့ကြည့်ပါ

• ဒီမှတ်တမ်းကနေ ယေဟောဝါအကြောင်း ဘာသိရသလဲ။

  အဖြေ

• ဒီမှတ်တမ်းက ယေဟောဝါရဲ့ ရည်ရွယ်ချက်နဲ့ ဘယ်လို ဆက်စပ်နေသလဲ။

  အဖြေ

• စာရာ အသက်ပြန်ရှင်လာတဲ့အခါ ဘာမေးချင်သလဲ။

  အဖြေ

ထပ်လေ့လာပါ

စာရာရဲ့ စံနမူနာဟာ ဇနီးသည်တွေအတွက်ပဲလား။ ခင်ပွန်းသည်တွေကော သင်ယူနိုင်တာ ရှိသလား။

သူတို့ဆီကနေ သင်ယူပါ—စာရာ (၆:၂၇)

စာရာနဲ့ အာဗြဟံ အချင်းချင်း လေးစားကြောင်း ဘယ်လို ပြသလဲ။

“‘ယေဟောဝါရဲ့ မီးလျှံ’ ဆက်တောက်လောင်နေစေပါ” (က၂၃.၀၅ ၂၄-၂၅ ပိုဒ်. ၁၅-၁၇)