ဘုရားရှင်အား ချစ်ခြင်းဟူသည်

“ပညတ်တော်တို့ကိုစောင့်ခြင်းအရာသည် ဘုရားသခင်ကိုချစ်ရာရောက်၏။”—၁ ယောဟန် ၅:၃။

၁။ ဘုရားအပေါ်မေတ္တာကို ကျွန်ုပ်တို့မည်သို့တင်ပြသင့်သနည်း။ ရလဒ်ကားအဘယ်နည်း။

လူ သားများဘုရားကိုကိုးကွယ်ရန် တာဝန်နှင့်စပ်လျဉ်း၍ ယေရှုကသင်၏ “ဘုရား [ယေဟောဝါ] ကိုစိတ်နှလုံးအကြွင်းမဲ့ ဉာဏ်ရှိသမျှနှင့်ချစ်လော့” ဟုမိန့်ဆိုခဲ့သည်။ (မဿဲ ၂၂:၃၇) ဤမေတ္တာကိုကျွန်ုပ်တို့ မည်သို့ပြသမည်နည်း။ သမ္မာကျမ်းစာကဖြေဆိုသည်။ “ပညတ်တော်တို့ကိုစောင့်ခြင်းအရာသည် ဘုရားသခင်ကိုချစ်ရာရောက်၏။” (၁ ယောဟန် ၅:၃) ထိုသို့ပြုသူတို့ မည်သို့သောရလဒ်ကောင်းရရှိမည်နည်း။ ယောဟန်ကဆိုခဲ့သည်။“ချစ်ခြင်းမေတ္တာ၌တည်သောသူသည် ဘုရားသခင်၌တည်၏။”—၁ ယောဟန် ၄:၁၆ခ။

၂။ မည်သူသာကျွန်ုပ်တို့၏ဝတ်ပြုရေး ရထိုက်သနည်း။

^၂ ဘုရားကိုကျွန်ုပ်တို့ချစ်ပါက ရှင်သူသို့မဟုတ်သေသူ မည်သူ့ကိုမျှ ကျွန်ုပ်တို့၏ဝတ်ပြုရေးကိုပေးမည်မဟုတ်ဘဲ ဘုရားကိုသာပေးမည်။ (လုကာ ၄:၇၊ ၈) တမန်တော်ပေတရုနှင့်ကောင်းကင်တမန်တစ်ပါးပင် လူသားများမှဝတ်ပြုမှုကိုလက်မခံ ငြင်းပယ်ခဲ့သည်။ (တမန်တော် ၁၀:၂၅၊ ၂၆။ ဗျာဒိတ် ၂၂:၈၊ ၉) ယေရှုကလည်း သူ၏မယ်တော်မာရိကို မည်သို့သောဝတ်ပြုမှုဆိုင်ရာ ချီးမြှောက်မှုကိုမျှ မပေးရန်ပြသခဲ့သည်။ ယင်းသည် ဘုရားနှင့်သာစပ်ဆိုင်သောကြောင့်ဖြစ်သည်။ (လုကာ ၁၁:၂၇၊ ၂၈။ ယောဟန် ၂:၃၊ ၄။ ဗျာဒိတ် ၄:၁၁) မိမိ၏ကိုးကွယ်မှုလမ်းလွဲလျှင် ဘုရားအမိန့်တော်နှင့်ဆန့်ကျင်မှုကိုဖြစ်စေမည်။ “အဘယ်သူမျှ သခင်နှစ်ဦးအစေကို မခံနိုင်သောကြောင့်ဖြစ်သည်။”—မဿဲ ၆:၂၄။

ဘာသာရေးတွင် လက်ဝါးကပ်တိုင် အသုံးပြုခြင်း

၃။ ခရစ်ယာန်ဘောင်သည် လက်ဝါးကပ်တိုင်သုံးခြင်းကို မည်သို့ရှုမြင်သနည်း။

^၃ သက်မဲ့အရာများကိုကြည်ညိုခြင်းဖြင့် ဘုရားပညတ်တော်ကိုချိုးဖောက်စေသော အရာများလည်းရှိသည်။ အပေါ်လွင်ဆုံးမှာ လက်ဝါးကပ်တိုင်ဖြစ်သည်။ နှစ်ရာစုပေါင်းများစွာပင် ယင်းကိုခရစ်ယာန်ဘောင်ရှိသူများသည် သူတို့၏ဝတ်ပြုရေးတွင် တစ်စိတ်တစ်ပိုင်းအဖြစ်အသုံးပြုခဲ့သည်။ The New Encyclopœdia Britannica ကလက်ဝါးကပ်တိုင်ကို “ခရစ်ယာန်ဘာသာ၏အဓိကအမှတ်လက္ခဏာ” ဟုခေါ်ဆိုထားသည်။ ဂရိနိုင်ငံတရားရုံးအမှုတစ်ခု၌ ဂရိအောသဒေါက်စ်အသင်းက ‘သန့်ရှင်းသောလက်ဝါးကပ်တိုင်ကို’ ငြင်းပယ်သူသည် ခရစ်ယာန်မဟုတ်ဟုပင် အခိုင်အမာဆိုခဲ့သည်။ သို့သော် လက်ဝါးကပ်တိုင်သည် အမှန်ပင်ခရစ်ယာန်အထိမ်းအမှတ်ဖြစ်သလော။ ယင်းသည် အဘယ်ကအရင်းခံသနည်း။

၄၊ ၅။(က) အချို့အင်္ဂလိပ်ကျမ်းစာများတွင် “ခရော့စ်” ဟုဘာသာပြန်ထားသော စတောရပ်စ် စကားလုံးကိုအဘိဓာန်စာအုပ်က မည်သို့ဆိုထားသနည်း။ (ခ) လက်ဝါးကပ်တိုင်သုံးခြင်းသည် အဘယ်ကအရင်းခံသနည်း။

^၄ ယေရှုသေဆုံးရာတွင်အသုံးပြုသည့်အရာကို မဿဲ ၂၇:၃၂ နှင့် ၄၀ ကဲ့သို့သောကျမ်းပိုဒ်များတွင် ရေးမှတ်ထားခဲ့သည်။ ထိုတွင်ဂရိစကားလုံး စတောရပ်စ် (Stau․ros) ကို“ခရော့စ်” (Cross) ဟုအင်္ဂလိပ်ကျမ်းအမျိုးမျိုးတွင် ဘာသာပြန်ခဲ့သည်။ သို့သော်ပထမရာစုတွင် ဂရိကျမ်းစောင်များကိုရေးခဲ့စဉ် စတောရပ်စ် သည်မည်သို့အဓိပ္ပာယ်ရှိသနည်း။ ဒဗလျူ၊ အီး၊ ဗိုင်း(W. E. Vine) ရေးခဲ့သော An ExpositoryDictionary of New Testament Words ကဆိုသည်မှာ၊ “စတောရပ်စ်သည် . . . အဓိကတိုင်ဖြောင့် သို့မဟုတ် သစ်တိုင်ကိုရည်ညွှန်းသည်။ ထိုအရာများပေါ်တွင် ရာဇဝတ်သားများကိုသတ်ရန် သံနှင့်ရိုက်သည်။ နာမ် [စတောရပ်စ်] နှင့်ကြိယာစတောရူး နှစ်ခုစလုံးဖြစ်သော သစ်တိုင်သို့မဟုတ်တိုင်ဖြောင့်၌ စွဲနေစေခြင်းသည်၊ ဘာသာရေးဆိုင်ရာ ကန့်လန့်ဖြတ်လက်ဝါးကပ်တိုင်နှင့် ကွာခြားသည်။ လက်ဝါးကပ်တိုင်သည် ရှေးခါလဒဲမှအရင်းခံပြီး တာမုဇနတ်ဘုရား၏အထိမ်းအမှတ်အဖြစ် (သူ၏နာမည်အစဖြစ်သော နက်နဲရာ တော [Tau] ပုံသဏ္ဍန်နှင့်အညီ) ယင်းနိုင်ငံနှင့် အီဂျစ်အပါအဝင် ကပ်လျက်နိုင်ငံများတွင် အသုံးပြုကြသည်။”

^၅ ဗိုင်း (Vine) ကဆက်ပြောသည်။ “အေဒီ ၃ ရာစုအလယ်လောက်တွင် အသင်းတော်များသည် ခရစ်ယာန်ယုံကြည်ခြင်းအယူအချို့မှသွေဖည် သို့မဟုတ် တူယောင်ပြ၍အသရေဖျက်ကြသည်။ မိစ္ဆာဘာသာရေးစနစ်၏ ဂုဏ်ကိုမြှင့်တင်ရန် ဒိဌိများကိုယုံကြည်ခြင်းတွင် အသစ်မပြုပြင်ဘဲလက်ခံခဲ့ကာ သူတို့၏ဒိဌိအမှတ်လက္ခဏာအတော်များများကို စွဲကိုင်ခွင့်ပြုခဲ့သည်။ သို့နှင့်ကန့်လန့်ဖြတ်အပိုင်းကိုနှိမ့်ထားသော ပေါ်လွင်သည့် တော (Tau) သို့မဟုတ် တီ (T) ကိုခရစ်တော်၏လက်ဝါးကပ်တိုင်အဖြစ် ခံယူခဲ့ကြသည်။”

၆၊ ၇။ (က) “ခရော့စ်” စကားလုံးသည် အဘယ်ကလာသနည်း။ အင်္ဂလိပ်ကျမ်းစာများတွင် ယင်းကိုအသုံးပြုခြင်းသည် အဘယ်ကြောင့်မဆီလျော်သနည်း။ (ခ) သမ္မာကျမ်းစာက ဇိုင်လွန် စကားလုံးကိုအသုံးပြုရာတွင် စတောရပ်စ် သည်တိုင်ဖြောင့်ဖြစ်ကြောင်း မည်သို့ဖေါ်ပြသနည်း။

^၆ The Companion Bible က “လက်ဝါးကပ်တိုင်နှင့် ကားတိုင်တင်ခြင်း” ခေါင်းစဉ်အောက်တွင် “ကျွန်ုပ်တို့၏အင်္ဂလိပ်စကားလုံး ‘ခရော့စ်’(Cross) သည်လက်တင်စကားလုံး ခရုစ် (Crux) မှဘာသာပြန်ထားခြင်းဖြစ်သည်။ သို့သော် ‘တုတ်’ သည် ‘တောင်ဝှေး’ ဖြစ်သကဲ့သို့ ဂရိလို စတောရပ်စ် ဖြစ်သော ခရုစ် မှာ ထိုထက်မပိုချေ။ သာမန်သစ်တိုင် သို့မဟုတ် သစ်ချောင်းတစ်ချောင်းတည်းအတွက် စတောရပ်စ် ဟူသောစကားလုံးကို ဟိုမာ အသုံးပြုသည်။ စံတင်လောက်သော ဂရိစာပေတစ်လျှောက်တွင် ယင်းစကားလုံး၏အဓိပ္ပာယ်နှင့် အသုံးပြုပုံမှာ ထိုသို့ပင်ဖြစ်သည်။ သစ်နှစ်ချောင်းကို ကန့်လန့်ဖြတ်ထားခြင်းဟု တစ်ခါမျှမဆိုလိုချေ။ . . . ဂရိဓမ္မသစ်ကျမ်း၌ သစ်နှစ်ပိုင်းကိုဆိုလိုကြောင်း လုံးဝမဖေါ်ပြထားချေ။”

^၇ သမ္မာကျမ်းစာတွင် ယေရှုသေဆုံးရာ၌ အသုံးပြုသည့်အရာအတွက် နောက်ဂရိစကားလုံး ဇိုင်လွန် ကိုသုံးထားသည်။ ဤစကားလုံးက စတောရပ်စ် သည်ကန့်လန့်ဖြတ်မပါသော တိုင်ဖြောင့်ဖြစ်ကြောင်းပြသည်။ The Companion Bible ဖေါ်ပြသည့်အတိုင်း “ထိုစကားလုံး[ဇိုင်လွန်] သည်၊ . . . ယေဘုယျအားဖြင့် မီးဆိုက်ရန် သို့မဟုတ် အခြားရည်ရွယ်ချက်အတွက် အသုံးပြုရန် သစ်တုံးခြောက်သို့မဟုတ်သစ်ကို ဆိုလိုသည်။ . . . ဤနောက်ပိုင်းစကားလုံး[ဇိုင်လွန်] သည်ယခင်ကစကားလုံး စတောရပ်စ် အစားသုံးခြင်းဖြင့် ယင်းတို့တစ်ခုစီ၏အဓိပ္ပာယ်သည် ထပ်တူဖြစ်ကြောင်းပြသည်။ . . . ကျွန်ုပ်တို့အရှင်၏သေခြင်းနှင့်စပ်လျဉ်း၍ တမန်တော် ၅:၃၀။ ၁၀:၃၉။ ၁၃:၂၉။ ဂလာတိ ၃:၁၃။ ၁ ပေတရု ၂:၂၄၊ [King James Version] တွင် “သစ်ပင်” ဟုဖေါ်ပြထားသည်နှင့် အညီဖြစ်သည်။”

၈။ လက်ဝါးကပ်တိုင်နှင့် ယင်း၏အရင်းခံနှင့်စပ်လျဉ်း၍ အခြားပင်မများက မည်သို့ဆိုသနည်း။

^၈ ပြင်သစ် Dictionnaire Encyclopédique Universel (စကြဝဠာစွယ်စုံအဘိဓာန်) က “လက်ဝါးကပ်တိုင်သည် အထူးသဖြင့်ခရစ်ယာန်များအတွက် ဘာသာရေးအထိမ်းအမှတ်အဖြစ် ကျွန်ုပ်တို့ယူမှတ်ခဲ့သည်မှာ ကြာရှည်ခဲ့ပြီ။ ယင်းသည် မမှန်ချေ” ဟုဆိုထားသည်။ Dual Heritage—The Bible and the British Museum စာအုပ်က ဤသို့ဖေါ်ပြသည်။ “ဂရိဓမ္မသစ်ကျမ်းတွင် ‘လက်ဝါးကပ်တိုင်’ ဟူသောစကားလုံးမရှိသည်ကိုသိလျှင် အံ့သြထိတ်လန့်မိမည်။ ‘လက်ဝါးကပ်တိုင်’ ဟုပြန်ဆိုထားသောစကားသည်အမြဲပင် ဂရိစကားလုံး [စတောရပ်စ်] ဖြစ်၍ ‘သစ်တိုင်’ သို့မဟုတ် ‘တိုင်ဖြောင့်’ ဟုအဓိပ္ပာယ်ရှိသည်။ လက်ဝါးကပ်တိုင်သည် မူလခရစ်ယာန်အထိမ်းအမှတ်မဟုတ်ချေ။ ယင်းကိုအီဂျစ်နှင့်ကောန်စတင်တိုင်း ထံမှရယူထားသည်။ New Catholic Encyclopedia က“ဂေါလဂေါသတွင် ခရစ်တော်၏ရွေးနှုတ်ဖိုးသေခြင်းပုံဆောင်ချက်ကို ပထမရာစုခရစ်ယာန်များ၏ အထိမ်းအမှတ်ရုပ်ပုံများတွင်မတွေ့ရချေ။ ကနဦးခရစ်ယာန်များသည် ထုလုပ်ထားသောရုပ်ပုံများကို တားမြစ်ထားသည့်ဓမ္မဟောင်းကျမ်း၏ လွှမ်းမိုးမှုကြောင့် အရှင်၏[သေဆုံး] ရာကိုပုံဖေါ်ရန် တွန့်ဆုတ်ခဲ့ကြသည်။ . . . လက်ဝါးကပ်တိုင်သည် ကောန်စတင်တိုင်းလက်ထက်တွင် ကိုယ်စားပြုရာဖြစ်လာခဲ့လေသည်။”

ကောန်စတင်တိုင်း၏ လက်ဝါးကပ်တိုင်

၉။ ဧကရာဇ်မင်းကောန်စတင်တိုင်းသည် လက်ဝါးကပ်တိုင်နှင့် မည်သို့ဆက်နွယ်ခဲ့သနည်း။

^၉ ကောန်စတင်တိုင်းသည် ၃၂၅ စီအီးတွင် နိုက်စီအာကောင်စီကိုစုရုံးခဲ့သူဖြစ်ပြီး ခရစ်တော်သည်ဘုရားဖြစ်သည်ဟူသည့် ကျမ်းစာနှင့်မညီညွတ်သည့်အယူကိုခံယူရန် ယင်းအားဖြင့်သြဇာလွှမ်းမိုးခဲ့သည်။ သူ၏အယူလွဲအင်ပါယာနှင့် မိစ္ဆာခရစ်ယာန်များ ခိုင်မာစေရန် ဤသို့သူပြုခဲ့ခြင်းဖြစ်သည်။ သူနှင့်စပ်လျဉ်း၍ The New Encyclopœdia Britannica က “၃၁၂ ခုနှစ်တွင် မက်စ်ဇန်တီရပ်စ် (Maxentius) ကို အောင်ပွဲခံခါနီးတွင် သူ၏အောင်ပွဲခံဘုရားပေးအထိမ်းအမှတ်ဟု သူယူဆခဲ့သော လက်ဝါးကပ်တိုင်ဖြစ်သည့် ‘ကောင်းကင်ဆိုင်ရာနိမိတ်’ ရူပါရုံကိုသူမြင်ခဲ့ရသည်။” ထို့နောက် ကောန်စတင်တိုင်းသည် လက်ဝါးကပ်တိုင်အား ကြည်ညိုလေးမြတ်မှုအပေါ် မြှင့်တင်ခဲ့ပုံကိုလည်းပြောသည်။

၁၀။ ဘုရား သို့မဟုတ် ခရစ်တော်သည် ကောန်စတင်တိုင်းအား လက်ဝါးကပ်တိုင်နှင့်စပ်လျဉ်းသော “နိမိတ်” ပေးကြောင်းယုံကြည်ခြင်းသည် အဘယ်ကြောင့်ဆင်ခြင်တုံတရားနှင့် သို့မဟုတ် ကျမ်းစောင်နှင့် မညီညွတ်သနည်း။

^၁၀ သို့သော်ဘုရားအလိုတော်မထမ်းဆောင်သော အယူလွဲခေါင်းဆောင်တစ်ဦးအား ဘုရားသည် နိမိတ်၊ အထူးသဖြင့် ဒိဌိနိမိတ်တစ်ခုကိုပေးပါမည်လော။ ယေရှုသည် မိမိ၏ပြည်သားများ နိမိတ်လိုလားမှုကြောင့် ဆုံးမခဲ့သည်။ (မဿဲ ၁၂:၃၈-၄၀) ထို့ပြင်ဤအယူလွဲအုပ်စိုးရှင်သည် နိုင်ငံရေးကြီးစိုးရေးအတွက် အပြစ်မဲ့သူများ၏အသွေးကို ဇာတိလက်နက်များဖြင့်သွန်းနေပြီး လျှို့ဝှက်ကြံစည်ကာ ဆွေမျိုးများနှင့်အခြားအပေါင်းအဖေါ်များကို သတ်ရန်စီစဉ်ခဲ့သည်။ ယင်းနှင့်မတူဘဲ ယေရှုကဆိုခဲ့သည်။ “ငါ၏နိုင်ငံသည် ဤလောကနှင့်မစပ်ဆိုင်။ ငါ၏နိုင်ငံသည် ဤလောကနှင့်စပ်ဆိုင်လျှင် ငါ၏လူတို့သည် တိုက်လှန်ကြလိမ့်မည်။” (ယောဟန် ၁၈:၃၆) ထိုကြောင့်ပင် ပေတရုကိုကိုယ်တော်က “သင့်ထားကိုသူ့နေရာ၌ ပြန်ထားလော့။ ထားကိုကိုင်သောသူရှိသမျှတို့သည် ထားဖြင့်ဆုံးခြင်းသို့ရောက်ကြလိမ့်မည်။”—မဿဲ ၂၆:၅၂။

၁၁။ ကောန်စတင်တိုင်းအား လက်ဝါးကပ်တိုင်အသုံးပြုခြင်းကို ဘာကလှုံ့ဆော်သနည်း။

^၁၁ Strange Survivals စာအုပ်က ကောန်စတင်တိုင်းနှင့် သူ၏လက်ဝါးကပ်တိုင်အကြောင်း ဤသို့ဆိုသည်။ “သူ၏အပြုအမူတွင် ဝါဒရေးရာပါဝင်သည်မှာ သံသယဖြစ်ဖို့မလိုချေ။ သူစခဲ့သောအထိမ်းအမှတ်သည် တစ်ဖက်တွင် သူ၏စစ်တပ်ရှိခရစ်ယာန်များနှင့် အခြားတစ်ဖက်တွင် ဂေါလ်စ် [ဒိဌိ] များကိုကျေနပ်စေခဲ့ပြီး၊ . . . သူတို့ကိုးကွယ်ရာနေဘုရား၏မျက်နှာသာရရေး တိုကင်ဖြစ်ခဲ့သည်။” ကောန်စတင်တိုင်း၏ ‘ကောင်းကင်ဆိုင်ရာ’ နိမိတ်သည်ဘုရားသို့မဟုတ်ခရစ်တော်နှင့် ဘာမျှမဆိုင်ဘဲ လောကီအယူထဲမှဖြစ်သည်။

သေဆုံးရာတန်ဆာကို ကြည်ညိုရမည်လော

၁၂၊ ၁၃။ အခြားအဘယ်အကြောင်းများကြောင့် လက်ဝါးကပ်တိုင်ကို မကြည်ညိုသင့်သနည်း။

^၁၂ ကျွန်ုပ်တို့သည် အထောက်အထားများကို ဥပေက္ခာပြုပြီး ယေရှုသည် လက်ဝါးကပ်တိုင်ပေါ်တွင် အသတ်ခံရသည်ထားဦးတော့ ယင်းကိုကြည်ညိုသင့်ပါသလော။ မပြုသင့်ချေ။ အကြောင်းမှာ ယေရှုသည်မိမိဘေးတွင် အသတ်ခံရသောလူနှစ်ဦးကဲ့သို့ ရာဇဝတ်ကောင်ပမာ အသတ်ခံခဲ့ရပြီး ကိုယ်တော်၏သေပုံက ကိုယ်တော်အား ဆိုးရွားလှစွာ တလွဲပုံတင်ခဲ့သည်။ ပထမရာစုခရစ်ယာန်များသည် ကိုယ်တော်အားသတ်ပစ်ရာတန်ဆာကို မြင့်မြတ်သည်ဟုယူဆခဲ့မည်မဟုတ်ချေ။ ယင်းသို့ကြည်ညိုခြင်းဖြင့် ထိုအပေါ်တွင်ယေရှုကိုသတ်ပစ်ခဲ့သော မှားယွင်းသည့်လုပ်ရပ်ကျူးလွန်မှုကို ဂုဏ်တင်ရာရောက်မည်။

^၁၃ အကယ်၍သင်၏အချစ်ဆုံးမိတ်ဆွေတစ်ဦးသည် မတရားစွဲချက်ဖြင့် အသတ်ခံရလျှင် သူ့အားသတ်ခဲ့သည့်တန်ဆာ (ဥပမာ၊ ကြိုးပေးရာကွင်းလျှော သို့မဟုတ် လျှပ်စစ်ကုလားထိုင် သို့မဟုတ် သေနပ်ပစ်သမားများ၏ရိုင်ဖယ်) ၏ရုပ်တုကိုပြုလုပ်ပြီး ယင်းကိုနမ်းခြင်း၊ ထိုရှေ့တွင် ဖယောင်းတိုင်ထွန်းခြင်း သို့မဟုတ် မြင့်မြတ်ရာတန်ဆာအဖြစ် သင်၏လည်ပင်းတွင်ဆွဲပါမည်လော။ ယင်းကဲ့သို့ပြုရန် စဉ်းစားမည်ပင်မဟုတ်ချေ။ လက်ဝါးကပ်တိုင်ကို ကြည်ညိုခြင်းသည်လည်း အလားတူပင်ဖြစ်သည်။ လက်ဝါးကပ်တိုင်သည် လောကီအရင်းခံခြင်းကြောင့် ပို၍ပင်ဆိုးရွားလေသည်။

၁၄။ ပြင်ပနှင့်ကျမ်းဆိုင်ရာအထောက်အထားများကြောင့် လက်ဝါးကပ်တိုင်နှင့်စပ်လျဉ်း၍ ကျွန်ုပ်တို့မည်သို့သဘောထိုင်ရမည်နည်း။

^၁၄ လက်ဝါးကပ်တိုင်ကိုကြည်ညိုခြင်းသည် ခရစ်ယာန်နည်းလမ်းမဟုတ်ချေ။ ယင်းသည် ဘုရား သို့မဟုတ် ခရစ်တော်ကိုမေတ္တာမပြဘဲ ယင်းရည်ရွယ်ချက်အတိုင်းပြက်ရယ်ပြုသည်။ ဘုရား၏ရုပ်တုပညတ်တော်များကို ချိုးဖောက်သည်။ ခရစ်ယာန်အဖြစ် မျက်နှာဖုံးစွပ်ထားသော လောကီအထိမ်းအမှတ်ကို ကိုင်းရှိုင်းခြင်းပင်ဖြစ်သည်။ (ထွက်မြောက်ရာ ၂၀:၄၊ ၅။ ဆာလံ ၁၁၅:၄-၈။ ၁ ကောရိန္သု ၁၀:၁၄) လောကီအထိမ်းအမှတ်ကိုမြင့်မြတ်သည်ဟု ယူမှတ်ခြင်းသည် ဘုရားပညတ်တော်ကို ချိုးဖောက်လေသည်။ “မယုံကြည်သောသူတို့နှင့်တွဲဖက်၍ ဆန့်ကျင်ဘက်ဖြစ်သောထမ်းဘိုးကို မထမ်းကြနှင့်။ တရားသောအမှုသည် မတရားသောအမှုကို အဘယ်သို့လက်ခံနိုင်မည်နည်း။ . . . မစင်ကြယ်သောအရာကို လက်နှင့်မျှမတို့ကြနှင့်။”—၂ ကောရိန္သု ၆:၁၄၊ ၁၇။

မှုတ်သွင်းခံနှုတ်ကပတ်တော်ကို စွဲကိုင်ထားခြင်း

၁၅။ ဘုရားနှုတ်ကပတ်တော်နှင့် ဆန့်ကျင်သောထုံးတမ်းများကို ကျွန်ုပ်တို့အဘယ်ကြောင့် ငြင်းပယ်သင့်သနည်း။

^၁၅ အသင်းတော်များက လက်ဝါးကပ်တိုင်ကိုကြည်ညိုခြင်းသည် “မြင့်မြတ်သောထုံးတမ်း” တွင်တစ်စိတ်တစ်ပိုင်းပါဝင်သည်ဟု ဆိုကြသည်။ သို့သော် ထုံးတမ်းသည် ဘုရားနှုတ်ကပတ်တော်နှင့်ဆန့်ကျင်သောအခါ ဘုရားကိုချစ်သူများသည် ထုံးတမ်းကိုစွန့်ပယ်ကြသည်။ စစ်မှန်သောဝတ်ပြုရေးအတွက် ကျွန်ုပ်တို့အမှန်လိုအပ်သောအရာသည် ဘုရားနှုတ်ကပတ်တော်တွင် ရှိပြီးဖြစ်သည်။ ပေါလုသည် တိမောသေထံရေးသကဲ့သို့ပင်။ “ယေရှုခရစ်ကိုယုံကြည်ခြင်းအားဖြင့် ကယ်တင်ခြင်းအလို့ငှာ ပညာကိုပေးနိုင်သောဓမ္မသစ်ကျမ်းစာကို ငယ်သောအရွယ်မှစ၍ လေ့ကျက်သည်ကိုလည်းကောင်းသိမှတ်သည်နှင့် အထက်ကသင်၍ နှလုံးသွင်းမိသောအယူဝါဒ၌ တည်နေလော့။ ထိုကျမ်းစာရှိသမျှသည် ဘုရားသခင်မှုတ်သွင်းတော်မူသောအားဖြင့်ဖြစ်၍ ဘုရားသခင်၏လူသည် စုံလင်သောသူ၊ ကောင်းသောအမှုအမျိုးမျိုးတို့ကို ပြုစုခြင်းအလို့ငှာ ပြင်ဆင်သောသူဖြစ်မည်အကြောင်း ဩဝါဒပေးခြင်း၊ အပြစ်ကိုဖေါ်ပြခြင်း၊ ဖြောင့်မတ်စွာပြုပြင်ခြင်း၊ တရားကိုသွန်သင်ခြင်း ကျေးဇူများကိုပြုတတ်၏။” (၂ တိမောသေ ၃:၁၅-၁၇) ဘုရားနှုတ်ကပတ်တော်နှင့်ဆန့်ကျင်သောထုံးတမ်းသည် ကယ်တင်ခြင်းအတွက် မရှိမဖြစ်ဟုသမ္မာကျမ်းစာတွင်ဖေါ်ပြထားသည့် နေရာမရှိချေ။

၁၆။ ယေရှုသည်ဂျူးဘာသာရေးခေါင်းဆောင်များကို သူတို့၏ထုံးတမ်းများနှင့်စပ်လျဉ်း၍ မည်သို့ပြောခဲ့သနည်း။

^၁၆ ကျမ်းစောင်များနှင့်လူ့ထုံးတမ်းဆန့်ကျင်ခြင်းသည် အသစ်အဆန်းမဟုတ်ချေ။ မှုတ်သွင်းခံဟေဗြဲကျမ်းစောင်များရေးပြီးချိန်နှင့် ယေရှုရောက်လာချိန်စပ်ကြားတွင် ဂျူးဘာသာရေးခေါင်းဆောင်များသည် နှုတ်နှင့်ပြောသောထုံးတမ်းများစွာကို ထပ်ထည့်ခဲ့ပြီး နောက်ပိုင်းတွင် ဘုရားမမှုတ်သွင်းပါဘဲနှင့်ရေးသားခဲ့သည်။ ထုံးတမ်းများသည်အများအားဖြင့် ကျမ်းစောင်များနှင့်ဆန့်ကျင်သည်။ ထို့ကြောင့် ယေရှုကဘာသာရေးခေါင်းဆောင်များအား “သင်တို့သည်အဆက်ဆက်ခံသော နည်းဥပဒေသကိုအမှီပြု၍ ဘုရားပညတ်တော်ကိုအဘယ်ကြောင့် လွန်ကျူးကြသနည်း။ . . . သင်တို့သည် အဆက်ဆက်ခံသော နည်းဥပဒေသအားဖြင့် ဘုရား၏ပညတ်တော်ကိုပယ်ကြ၏” ဟုမိန့်မြွက်ခဲ့သည်။ ဘုရားနှုတ်ကပတ်တော်က “လူတို့စီရင်သောပညတ်တို့ကိုသွန်သင်၍ နည်းဥပဒေသပေးလျက်ပင် ငါ့ကိုအချည်းနှီးကိုးကွယ်ကြ၏” ဟုဆိုသောအခါ သူတို့အား ကိုယ်တော်ရည်ညွှန်းခဲ့သည်။ (မဿဲ ၁၅:၁-၆၊ ၉) ကိုယ်တော်၏သွန်သင်ချက်တွင် ယေရှုသည် တစ်ခါမျှ ထိုထုံးတမ်းများမှ မကိုးကားခဲ့ချေ။ မှုတ်သွင်းရေးသားထားသော ဘုရားနှုတ်ကပတ်တော်ကိုသာ ကိုယ်တော်ရည်ညွှန်းခဲ့သည်။—မဿဲ ၄:၄-၁၀။ မာကု ၁၂:၁၀။ လုကာ ၁၀:၂၆။

၁၇။ သမ္မာကျမ်းစာကို ကျွန်ုပ်တို့၏ခိုင်မာသောကျောက်ဆူးအဖြစ် အဘယ်ကြောင့်ယုံကြည်စိတ်ချနိုင်သနည်း။

^၁၇ ဘုရားသည် “အသက်နှုတ်ကပတ်တော်” ထိန်းသိမ်းရန်အတွက် မလုံခြုံသော ဘာသာထုံးတမ်းသမားများလက်၌ မအပ်ထားခဲ့ချေ။ (ဖိလိပ္ပိ ၂:၁၆) သို့အစား ကိုယ်တော်၏တန်ခိုးပါသည့် သန့်ရှင်းသောဝိညာဉ်တော်ဖြင့် ကျမ်းစာကို ကိုယ်တော်မှုတ်သွင်းရေးသားစေခဲ့သည်။ “ကျမ်းစာ၌ပါသောသက်သာခြင်းအကြောင်းကိုအမှီပြု၍ မျှော်လင့်ရသောအခွင့်ရှိစေခြင်းငှာ” ဖြစ်သည်။ (ရောမ ၁၅:၄) သမ္မာကျမ်းစာသည် မပြည့်စုံ၊ မစုံလင်သဖြင့် မှုတ်သွင်းမခံရသော၊ လူများ၏မတည်မြဲသော အတွေးအခေါ်အပေါ်လည်း ကျွန်ုပ်တို့မှီခိုရမည်ဟု ဆိုခြင်းသည် ဘုရား၏တန်ခိုးတော်ကို ငြင်းပယ်ခြင်းဖြစ်လေသည်။ အမှန်ပင်ကြီးမြတ်လှသော စကြဝဠာကိုဖန်ဆင်းသူအနန္တတန်ခိုးရှင်သည် စာအုပ်တစ်အုပ်ကို ပြုစုနိုင်မည်မှာ မလွဲချေ။ ဤသို့ကိုယ်တော်ပြုခြင်းသည် ကျွန်ုပ်တို့အနေနှင့် လူများကို ဘုရားပညတ်တော်များကို ချိုးဖောက်စေသည့် လူ့ထုံးတမ်းများကို မှီခိုဖို့မလိုဘဲ ကျွန်ုပ်တို့မျှော်လင့်ချက်အတွက် ခိုင်မာသောကျောက်ဆူးရရှိရန်ဖြစ်သည်။ ထို့ကြောင့်ဘုရားနှုတ်ကပတ်တော်က “ရေးသားထားသည်ထက် မလွန်စေနှင့်” ဟုဆိုထားသည်။ (၁ ကောရိန္တု ၄:၆၊ NW) ဘုရားကိုအမှန်ချစ်သူတို့သည် ထိုသွန်သင်ချက်ကို နာယူပေမည်။—သု၊ ၃၀:၅၊ ၆ ကိုလည်းကြည့်ပါ။

“ကိုယ်တော်၏ပညတ်တော်များကို စောင့်ရှောက်လော့”

၁၈။ ဘုရားကိုကျွန်ုပ်တို့အမှန်ချစ်ပါက မည်သည့်ပညတ်တော်ကို ကျွန်ုပ်တို့နာခံရမည်နည်း။

^၁၈ “ပညတ်တော်တို့ကို စောင့်ခြင်းအရာသည် ဘုရားသခင်ကိုချစ်ရာရောက်၏” ဟူ၍ ၁ ယောဟန် ၅:၃ ကဖေါ်ပြသည်။ ဘာသာရေးခေါင်းဆောင်များသည် ထိုပညတ်များကိုလျော့ရဲစေသောအခါ သို့မဟုတ် လျစ်လျူရှုသောအခါ သို့မဟုတ် ဆန့်ကျင်နေသောလူ့ထုံးတမ်းများကို အစားထိုးသောအခါ သူတို့သည် မိမိတို့၏နောက်လိုက်များကို ဘုရားအလိုတော်နှင့်ဆန့်ကျင်ရာသို့ဦးဆောင်သွားသည်။ ဥပမာတစ်ခုအနေနှင့် ခရစ်ယာန်ဘာသာ၏အခြေခံကျင့်စဉ် မေတ္တာကိုသုံးသပ်ကြည့်ပါ။ ယင်းသည်ယေရှု၏သွန်သင်ချက်တွင် အရေးပါသောအပိုင်းဖြစ်သည်။ ကိုယ်တော်ကမိန့်ဆိုခဲ့သည်။ “ကိုယ်နှင့်စပ်ဆိုင်သောသူကို ကိုယ်နှင့်အမျှချစ်လော့။”—မဿဲ ၂၂:၃၉။

၁၉။ (က) ခရစ်ယာန်စစ်များသည် တစ်ဦးကိုတစ်ဦးချစ်ရန် အဘယ်မျှလောက်အရေးကြီးသနည်း။ (ခ) မေတ္တာနှင့်စပ်လျဉ်း၍ ယေရှုပေးခဲ့သော “ပညတ်သစ်” သည်မည်သည့်နည်းဖြင့် ပညတ်ဟောင်းနှင့်ကွာခြားသနည်း။

^၁၉ ကိုယ်နှင့်စပ်ဆိုင်သောမေတ္တာသည် မည်မျှအရေးကြီးသနည်း။ ယေရှုက ခရစ်ယာန်စစ်များကို သူတို့အတွင်းရှိသော အချင်းချင်းမေတ္တာအားဖြင့် ခွဲခြားသိမြင်နိုင်မည့်အကြောင်းသွန်သင်ခဲ့သည်။ ကိုယ်တော်က “သင်တို့သည်အချင်းချင်း တစ်ယောက်ကိုတစ်ယောက်ချစ်ကြလော့။ ငါသည်သင်တို့ကိုချစ်သည်နည်းတူ အချင်းချင်းချစ်ကြလော့ဟု ပညတ်သစ်ကိုငါပေး၏။ သင်တို့သည်အချင်းချင်းချစ်ကြလျှင် လူအပေါင်းတို့သည် ထိုမေတ္တာကိုထောက်၍ သင်တို့သည် ငါ၏တပည့်ဖြစ်သည်ကို သိရကြလိမ့်မည်” ဟုမိန့်တော်မူ၏။ (ယောဟန် ၁၃:၃၄၊ ၃၅) မှန်ပါသည်။ ရှေးဣသရေလများအား ပေးခဲ့သောပညတ်တွင် “ကိုယ်နှင့်စပ်ဆိုင်သောသူကို ကိုယ်နှင့်အမျှချစ်ရမည်” ဟူသောပညတ်ပါဝင်ခဲ့သည်။ (ဝတ်ပြုရာ ၁၉:၁၈) သို့သော် ယေရှု၏ပညတ်နှင့်စပ်လျဉ်း၍ အသစ်သောအရာမှာ “ငါသည် သင်တို့ကိုချစ်သည်နည်းတူ” ဟူသည့် ကိုယ်တော်၏စကားလုံးဖြစ်သည်။ ယင်းက ခရစ်ယာန်မေတ္တာအား ပို၍တန်ခိုးပါစေသည်။ အကြောင်းမှာ ခရစ်ယာန်တစ်ဦးသည် ယေရှုကဲ့သို့ ယုံကြည်သူဘက်သားများအပေါ် မိမိအသက်ကိုစွန့်လွှတ်ရန် အသင့်ရှိရမည်ဖြစ်သောကြောင့်တည်း။

၂၀။ “တစ်ဦးကိုတစ်ဦးချစ်ရန်” ပညတ်တော်ကို မည်သူများနာခံကြောင်း ဤရာစုသမိုင်းကဖေါ်ပြသနည်း။

^၂၀ သို့ဖြင့်၊ ယနေ့ဘုရားရှင်၏ကျေးကျွန်စစ်များကို မပြတ်တောက်နိုင်သော ကမ္ဘာချီစည်းလုံးသည့် မေတ္တာနှောင်ကြိုးအားဖြင့် ပိုင်းခြားနိုင်သည်။ မေတ္တာအပေါ်ဘုရားပညတ်များကို ထိုသို့သောနာခံမှုမျိုး ကျွန်ုပ်တို့ခေတ်တွင် မည်သူများပြသနည်း။ ယုံကြည်သူဘက်သားများ သို့မဟုတ် အခြားတိုင်းနိုင်ငံများမှ မယုံကြည်သူများတစ်ဖက်၌ပင် လက်နက်မစွဲကိုင်သောကြောင့် ညှဉ်းပန်းခံရသူ၊ ထောင်ချခံရသူ၊ ချွေးတပ်စခန်းများသို့ ပို့ခံရသူများကား မည်သူများနည်း။ ယေဟောဝါသက်သေများသာဖြစ်ကြောင်း ဤရာစုသမိုင်းကဖြေဆိုသည်။

၂၁။ ခရစ်ယာန်ဘောင်အသင်းများက ယုံကြည်သူဘက်သားများအား ချစ်ခြင်းနှင့်စပ်လျဉ်း၍ မည်သည့်မှတ်တမ်းများပြုလုပ်ခဲ့သနည်း။

^၂၁ အခြားတစ်ဖက်တွင် ခရစ်ယာန်ဘောင်ဘာသာရေးများသည်၊ မေတ္တာနှင့်စပ်လျဉ်း၍ ဘုရားပညတ်တော်များကို မှန်မှန်ချိုးဖောက်ခဲ့ကြသည်။ ဤရာစုစစ်ပွဲများအားလုံးတွင် ခရစ်ယာန်ဘောင်အသင်းများ၏ ဓမ္မဆရာများသည် သန်းနှင့်ချီ၍ တစ်ဦးနှင့်တစ်ဦးသတ်ဖြတ်ရန် သူတို့၏လူများကို စစ်မြေပြင်များသို့ ဦးဆောင်ခဲ့သည်။ ဘာသာတူ၊ အချင်းချင်းကိုသတ်ခဲ့ပြီး အားလုံးကပင်မိမိတို့ကိုယ်ကို ခရစ်ယာန်ဟုဆိုကြသည်။ သို့သော် ဘုရားနှုတ်ကပတ်တော်က ဤသို့ဖေါ်ပြသည်။ “တစ်စုံတစ်ယောက်သောသူက ‘ငါသည်ဘုရားသခင်ကိုချစ်၏’ ဟုဆိုလျက်ပင်၊ မိမိညီအစ်ကိုကိုမုန်းလျှင် ထိုသူသည်မုသာသုံးသောသူဖြစ်သည်။ မိမိမြင်ရသော မိမိညီအစ်ကို ကိုမချစ်လျှင် မမြင်သေးသောဘုရားသခင်ကို အဘယ်သို့ချစ်နိုင်မည်နည်း။ ဘုရားသခင်ကိုချစ်သောသူသည် မိမိညီအစ်ကိုကို ချစ်ရမည်ဟူသောပညတ်ကို ငါတို့သည်ခရစ်တော်ထံ၌ ခံရကြပြီ။”—၁ ယောဟန် ၄:၂၀၊ ၂၁။

၂၂။ ၁ ယောဟန် ၃:၁၀-၁၂ အရ ခရစ်ယာန်အသင်းသားများသည် မည်သူ၏သားများဖြစ်ကြသနည်း။ အဘယ်ကြောင့်နည်း။

^၂၂ ဘုရားနှုတ်ကပတ်တော်က ပြောသေးသည်။ “ထိုသို့သော လက္ခဏာအားဖြင့် ဘုရားသခင်၏သားတို့နှင့် မာရ်နတ်၏သားတို့သည် ထင်ရှားကြ၏။ ဖြောင့်မတ်ခြင်းတရားကို မကျင့်သောသူ၊ မိမိညီအစ်ကိုကို မချစ်သောသူမည်သည်ကား ဘုရားသခင်နှင့်မဆိုင်။ . . . မာရ်နတ်နှင့်ဆိုင်၍ မိမိညီကိုသတ်သော ကာဣနကဲ့သို့မဟုတ်၊ ငါတို့သည် အချင်းချင်းချစ်ရကြမည်။” (၁ ယောဟန် ၃:၁၀-၁၂)ခရစ်ယာန်ဘောင်အသင်းများက မိမိတို့သည်ဘုရား၏သားများဟုဆိုကြသည်။ သို့သော် သူတို့မဖြစ်နိုင်။ အကြောင်းမှာ သူတို့သည် မေတ္တာအပေါ်ဘုရားပညတ်ကို ကြီးလေးစွာချိုးဖောက်ကြပြီး ‘သူတို့၏ညီအစ်ကို’ အား သတ်ဖြတ်သောကြောင့်ဖြစ်သည်။ သူတို့သည် ‘ဆိုးယုတ်သူ’ ၏သားများသာဖြစ်သည်။ ထိုကြောင့် ဘုရားနှုတ်ကပတ်တော်က ထိုဘာသာရေးများတွင်ရှိ စိတ်ရိုးဖြောင့်သူများအား တိုက်တွန်းထားသည်။ “ငါ၏လူမျိုးတို့၊ သူ၏အပြစ်တို့ကို ဆက်ဆံခြင်းနှင့်လည်းကောင်း၊ သူ၏ဘေးဒဏ်များကို ခံခြင်းနှင့်လည်းကောင်း ကင်းလွတ်အံ့သောငှာ သူ၏အထဲကထွက်ကြလော့။” (ဗျာဒိတ် ၁၈:၄) မကြာမီဘုရားသည် မိမိ၏တရားစီရင်ချက်များကို မှောက်မှားသော ဘာသာများအားလုံးတစ်ဖက်၌ စီရင်တော့မည်။ ယင်းတို့တွင် တွယ်ကပ်နေသူများသည် သူတို့၏ကြမ္မာကိုခံရတော့မည်။ (ဗျာဒိတ် ၁၇:၁၆) အခြားတစ်ဖက်တွင် “ဘုရားသခင်၏ အလိုတော်နှင့်အညီ ကျင့်သောသူမူကား နိစ္စထာဝရတည်၏”။—၁ ယောဟန် ၂: ၁၇။

သင်မည်သို့ဖြေဆိုမည်နည်း

▫အင်္ဂလိပ်စကားလုံး “ခရော့စ်” (လက်ဝါးကပ်တိုင်) သည် ဂရိစကားလုံး စတောရပ်စ် ၏မှားယွင်းသော ဘာသာပြန်ချက် အဘယ်ကြောင့်ဖြစ်သနည်း။

▫ခရော့စ် (လက်ဝါးကပ်တိုင်) ကိုကြည်ညိုခြင်းသည် အဘယ်ကအရင်းခံပြီး အဘယ်ကြောင့်ကျွန်ုပ်တို့ ငြင်းပယ်သင့်သနည်း။

▫ယေရှုသည်ဘာသာရေး ထုံးတမ်းများနှင့်စပ်လျဉ်း၍ မည်သည့်ပုံနမူနာ ပြခဲ့သနည်း။

▫ညီအစ်ကိုချင်းမေတ္တာနှင့်စပ်လျဉ်း၍ ပညတ်တော်များကို နာခံသူများအား မည်သို့ခွဲခြားသိရှိနိုင်သနည်း။

ခရစ်တော်သည် လက်ဝါးကပ်တိုင်ပေါ်တွင်မဟုတ်၊ တိုင်ဖြောင့်ပေါ်၌ သေဆုံးခဲ့သည်။

[စာမျက်နှာ ၂၆ ပါ လေးထောင့်ကွက်/ရုပ်ပုံ]

လက်ဝါးကပ်တိုင် အရင်းခံများ

ခရစ်ယာန်သက္ကရစ်မတိုင်မီ လက်ဝါးကပ်တိုင်ပုံစံများကို ဘာသာရေးအထိမ်းအမှတ်များအဖြစ် ကမ္ဘာ့အစိတ်အပိုင်းအားလုံးနီးပါးတွင် အသုံးပြုခဲ့ကြသည်။

ခရုစ် အင်စတာ (Crux Ansata) ကိုရှေးအီဂျစ်များသည် အနာဂတ်အသက်တာအထိမ်းအမှတ်အဖြစ် အသုံးပြုခဲ့ကြသည်။

ခရုစ် ကွာဒြပ်တာ (Crux Quadrata) သည်အရာခပ်သိမ်းကို ယင်းမှဖန်ဆင်းသည်ဟု ယုံကြည်ခဲ့သော ဒြပ်စင်လေးမျိုးကိုပုံဆောင်သည်။

ခရုစ် ဂမ်မတာ (Crux Gammata) သည် မီး သို့မဟုတ် နေ၏အထိမ်းအမှတ်အဖြစ် ယူမှတ်ခဲ့ကြသည်။ ထို့ကြောင့် အသက်၏အထိမ်းအမှတ်ဖြစ်သည်။

ခရစ်ယာန်ဘောင်တွင်ခေတ်စားသော လက်တင် လက်ဝါးကပ်တိုင်။

ဤလက်ဝါးကပ်တိုင်သည် “ခရစ်တော်” ဟူသည့်စကားလုံးတွင် ဂရိစာလုံးမှအက္ခရာ နှစ်လုံးကိုရောယှက်ထားခြင်းဖြစ်သည်။

[စာမျက်နှာ ၂၅ ပါ ရုပ်ပုံ]

ခရစ်တော်သည် လက်ဝါးကပ်တိုင်ပေါ်တွင်မဟုတ်၊ တိုင်ဖြောင့်ပေါ်၌ သေဆုံးခဲ့သည်။

[စာမျက်နှာ ၂၇၊ ၂၈ ပါ ရုပ်ပုံများ]

“သူတို့သည်ဘုရားကို သိယောင်ဆောင်သော်လည်း အကျင့်အားဖြင့် ဘုရားကိုငြင်းပယ်ကြ၏။” —တိတု ၁:၁၆