ယေဟောဝါအားဂုဏ်ပြုခြင်း—⁠အဘယ်ကြောင့်နည်း၊ အဘယ်သို့နည်း

“ငါ့ကိုချီးမြှောက် [ဂုဏ်ပြု] သောသူတို့ကို ငါချီးမြှောက် [ဂုဏ်ပြု] မည်။ ငါ့ကိုမထီမဲ့မြင်ပြုသောသူတို့သည် ဂုဏ်အသရေပျက်ရကြလိမ့်မည်။”—⁠၁ ဓမ္မရာဇဝင် ၂:⁠၃၀။

၁။ မည်သူတို့သည် နိုဘယ်ဆုချီးမြှင့်ခံရကြသနည်း။ ၄င်းဆုတို့ကို လူအများက မည်သို့ယူမှတ်ကြသနည်း။

စ ကင်ဒီနေးဗီးယန်း လူ့အကျိုးဆောင်အဖွဲ့အစည်းကြီးလေးခုသည် နှစ်စဉ်နှစ်တိုင်း ‘ကုန်လွန်ခဲ့သောနှစ်အတွင်း လူသားတို့၏အကျိုးကို အထူးချွန်ဆုံးသယ်ပိုးခဲ့’ သူတို့အား နိုဘယ်ဆုများချီးမြှင့်ပေးသည်။ အဆိုပါဆုများကို သီးခြားနယ်ပယ်ခြောက်ခုတွင် ထူးချွန်အောင်မြင်ခြင်းအတွက် ပေးအပ်ခြင်းဖြစ်သည်။ နိုဘယ်ဆုသည် လူသားတစ်ဦးအား ချီးမြှင့်ပေးနိုင်သည့် အကြီးမြတ်ဆုံးဂုဏ်ဒြပ်အဖြစ် လူအများကယူမှတ်ကြသည်။

၂။ နိုဘယ်ဆုချီးမြှင့်သူများသည် မည်သူကိုလျစ်လျူရှုထားကြသနည်း။ ကိုယ်တော်သည် အဘယ်ကြောင့်အထူးချီးကျူး ဂုဏ်ပြုထိုက်သနည်း။

^၂ ထိုက်တန်သူတို့အား ထိုက်ထိုက်တန်တန်ဂုဏ်ပြုချီးမြှင့်ခြင်းသည် မှားသည်ဟုမဆိုသာသော်ငြားလည်း ထိုသို့ချီးမြှင့်သူတို့အနေဖြင့် လူသားတို့၏ အကြီးမြတ်ဆုံးကျေးဇူးရှင်အား ဂုဏ်ပြုရန်စဉ်းစားကြံဆဖူးပါသလော။ ထိုကျေးဇူးရှင်မှာ လွန်ခဲ့သောနှစ်ပေါင်း ၆၀၀၀ ခန့်က ပထမလူယောက်ျားနှင့်မိန်းမတို့ကို ဖန်ဆင်းတော်မူသည့်အချိန်မှစ၍ လူသားတို့အားမရေမတွက်နိုင်သည့် ကျေးဇူးများကို ပေးသနားတော်မူခဲ့သည့်အရှင်ဖြစ်တော်မူ၏။ ကိုယ်တော်အား ဤသို့ဂုဏ်ပြုရန် မကြာခဏပျက်ကွက်ခြင်းက ရှေးခေတ်မှယောဘ၏မိတ်ဆွေဖြစ်သူ ဧလိဟု၏စကားကိုသတိရစေကောင်းရစေပေမည်။ သူ၏သုံးသပ်ချက်မှာ ဤသို့ဖြစ်သည်။ “သို့သော်လည်း ‘ငါ့ကိုဖန်ဆင်းတော်မူထသော၊ ညဉ့်အချိန်၌ သီချင်းဆိုရသောအခွင့်ကိုပေးတော်မူထသော . . . ဘုရားသခင်သည်အဘယ်မှာရှိတော်မူသနည်း’ ဟုအဘယ်သူမျှမမေးမြန်းတတ်။” (ယောဘ ၃၅:၁၀) ကျွန်ုပ်တို့၏မဟာကျေးဇူးရှင်ကြီးသည် ဆက်လက်၍သာ “ကျေးဇူးပြုလျက် အစာအာဟာရနှင့်ဝပြော၍ဝမ်းမြောက်စေခြင်းငှာ မိုးကောင်းကင်မှမိုးရွာစေတော်မူ၍ အသီးအနှံတို့ကို သီးစေတတ်သောဥတုကိုပေး” တော်မူ၏။ (တမန်တော် ၁၄:၁၆၊ ၁၇။ မဿဲ ၅:၄၅) ယေဟောဝါသည် “ကောင်းသောဆုနှင့်စုံလင်သောကျေးဇူးရှိသမျှ” ကိုပေးသနားတော်မူသည့်အရှင် ဧကန်ဖြစ်ပေသည်။—⁠ယာကုပ် ၁:၁၇၊ သမ။

ဂုဏ်ပြုခြင်း၏အဓိပ္ပာယ်

၃။ “ဂုဏ်ပြုခြင်း” ဟူ၍ပြန်ဆိုသည့် အဓိကဟေဗြဲနှင့်ဂရိစာလုံးတို့ကားအဘယ်နည်း။ ယင်းတို့၏အနက်အဓိပ္ပာယ်ကားအဘယ်နည်း။

^၃ ဂုဏ်ပြုခြင်းအတွက်အသုံးပြုသော အဓိကဟေဗြဲစာလုံးကာဗွောဒ်ဟ် (ka·vohdh’‏) မှာစာသားအတိုင်းဆိုလျှင် “လေးလံခြင်း” ဟူ၍အဓိပ္ပာယ်ရသည်။ ထို့ကြောင့် ဂုဏ်ပြုခံရသူတစ်ဦးအား အချိန်စီးသူ၊ အရေးပါအရာရောက်သူအဖြစ် ယူမှတ်လေ့ရှိကြသည်။ ထူးခြားသည်မှာ ဤဟေဗြဲစာလုံး ကာဗွောဒ်ဟ် ကို ကျမ်းစာတွင် “ဘုန်းအသရေ” ဟူ၍လည်း မကြာမကြာဘာသာပြန်ဆိုထားသဖြင့် ဂုဏ်ပြုခံရသူကို မည်မျှအရေးပါအရာရောက်သူအဖြစ် လူတို့မှတ်ယူကြောင်း ထပ်ဆင့်သိသာစေသည်။ ကျမ်းစာ၌ “ဂုဏ်” ဟူ၍ပြန်ဆိုသည့်အခြားဟေဗြဲစာလုံး ရည်ကား(yeqar’‏) ကို “အဖိုးထိုက်သော”၊ “အဖိုးထိုက်သောအရာများ” ဟူ၍လည်းပြန်ဆိုထားသည်။ ထို့ကြောင့် ဟေဗြဲကျမ်းစာစောင်၌ ဂုဏ်ဟူသောစာလုံးသည် ဘုန်းအသရေနှင့်အဖိုးထိုက်ခြင်းတို့နှင့်ဆက်စပ်နေသည်။ သမ္မာကျမ်းစာတွင် “ဂုဏ်” ဟူ၍ဘာသာပြန်ဆိုသည့် ဂရိစာလုံးမှာ တိမဲ (ti·me’‏) ဖြစ်ပြီး ၄င်းမှာလည်း ကြည်ညိုခြင်း၊ လေးမြတ်ခြင်း၊ အဖိုးထိုက်ခြင်းဟူသောအဓိပ္ပာယ်ဆောင်သည်။

၄၊ ၅။ (က) လူတစ်ဦးအား ဂုဏ်ပြုသည်ဆိုရာ၌ အဘယ်အဓိပ္ပာယ်ရှိသနည်း။ (ခ) ဧသတာ ၆:၁-၉ ၌ဖော်ပြထားသည့် အဘယ်အခြေအနေက ဂုဏ်ပြုချီးမြှောက်ခြင်း၌ ပါဝင်သည့်အရာကို ထင်ရှားစေသနည်း။

^၄ ထို့ကြောင့် လူတစ်ဦးသည် အခြားသူတစ်ဦးအား အလွန်ရိုသေလေးစားမှုပြခြင်းအားဖြင့် ဂုဏ်ပြုတတ်ကြသည်။ သာဓကအနေနှင့် သစ္စာရှိယုဒအမျိုးသား မော်ဒကဲနှင့်ပတ်သက်၍ သမ္မာကျမ်းစာဖော်ပြသည့်အခြေအနေကို သုံးသပ်ကြည့်ပါ။ တစ်ခါက မော်ဒကဲသည် ရှေးခေတ်ပါးရှားရှင်ဘုရင် အာရွှေရုအား လုပ်ကြံမည့်အကြံအစည်ကို ဖော်ထုတ်ခဲ့သည်။ နောက်ပိုင်း၌ ရှင်ဘုရင်စက်တော်မခေါ်နိုင်သည့် ညတစ်ညတွင် မော်ဒကဲ၏ဆောင်ရွက်မှုကို ရှင်ဘုရင်အလေးဂရုပြုမိလာသည်။ သို့နှင့် ဘုရင်မင်းက “ထိုအတွက် မော်ဒကဲသည် မည်သည့်အရာ၊ မည်သည့်ဂုဏ်ထူးကိုခံရပြီနည်း” ဟုအပါးတော်မြဲတို့အား မေးမြန်းသော် သူတို့က “မည်သည်မျှမရသေးပါ” ဟုပြန်လျှောက်ကြ၏။ ပေါ့ဆလိုက်လေချင်း။ ဘုရင်မင်းအသက်ကို မော်ဒကဲကယ်တင်ခဲ့သော်လည်း ဘုရင်မင်းသည် ကျေးဇူးတင်လေးမြတ်ကြောင်း တုံ့ပြန်ရန်ပျက်ကွက်ခဲ့သည်။—⁠ဧသတာ ၆:၁-၃။

^၅ သို့နှင့် အာရွှေရုသည် အခန့်သင့်ရောက်ရှိလာသော နန်းရင်းဝန်ဟာမန်အား ဘုရင်မင်းနှစ်သက်သူအား အကောင်းဆုံးမည်သို့ဂုဏ်ပြုရမည်အကြောင်း မေးမြန်းလေ၏။ ဟာမန်က “ငါမှတစ်ပါး ရှင်ဘုရင်သာ၍ချီးမြှောက်လိုသောသူ တစ်စုံတစ်ယောက်ရှိနိုင်သလော” ဟုချက်ချင်းပင်အောက်မေ့လေ၏။ သို့နှင့် ဟာမန်ကထိုသူအား “မင်းမြောက်တန်ဆာ” ဝတ်ဆင်စေပြီး “စီးတော်မြင်း” ကိုစီးစေသင့်ကြောင်း တင်လျှောက်လေ၏။ နိဂုံးချုပ်အနေနှင့် သူကထိုသူအား “မြင်းတော်ကိုစီးစေပြီးလျှင် မြို့တော်လမ်းမ၌ဆောင်သွားလျက် ရှင်ဘုရင်ချီးမြှောက်ခြင်းငှာ အလိုတော်ရှိသောသူ၌ ဤသို့ပြုရသည်ဟု သူ့ရှေ့မှာကြွေးကြော်ပါစေ” ဟုလျှောက်တင်၏။ (ဧသတာ ၆:၄-၉) ဤသို့ဂုဏ်ပြုချီးမြှောက်ခြင်းခံရသူအား ပြည်သူအပေါင်းတို့သည် အလွန်ကြည်ညိုလေးစားကြပေမည်။

ယေဟောဝါအား ဂုဏ်ပြုထိုက်သည့်အကြောင်း

၆။ (က) အခြားသူအားလုံးထက် မည်သူသည် ကျွန်ုပ်တို့၏ဂုဏ်ပြုခြင်းခံထိုက်သနည်း။ (ခ) “မြင့်မြတ်သော” ဟူသည့်စာလုံးသည် ယေဟောဝါအတွက် အဘယ်ကြောင့်သင့်မြတ်သနည်း။

^၆ သမိုင်းတစ်လျှောက်အတွင်း လူသားတို့သည် ဂုဏ်ပြုချီးမြှောက်ခြင်းခံခဲ့ရကြသည်။ မကြာခဏမထိုက်မတန်ဘဲ ထိုသို့ခံခဲ့ကြသည်။ (တမန်တော် ၁၂:၂၁-၂၃) သို့သော် သူတကာထက် မည်သူဂုဏ်ပြုခြင်းခံထိုက်သနည်း။ ယေဟောဝါဘုရားသခင်မှတစ်ပါး မည်သူရှိအံ့နည်း။ ကိုယ်တော်သည် အမှန်စင်စစ် မြင့်မြတ်တော်မူသောကြောင့် ကျွန်ုပ်တို့၏ဂုဏ်ပြုခြင်းကိုခံထိုက်တော်မူ၏။ “မြင့်မြတ်သော” ဟူသောဝေါဟာရကို မကြာခဏကိုယ်တော်အားရည်ညွှန်း အသုံးပြုထားသည်။ ကိုယ်တော်သည် မြင့်မြတ်သောအရှင်၊ မြင့်မြတ်သောဖန်ဆင်းရှင်၊ မြင့်မြတ်သောမင်းကြီး၊ မြင့်မြတ်သောဥပဇ္စျာယ်ဆရာ၊ မြင့်မြတ်သောအရှင်သခင်ဖြစ်တော်မူ၏။ (ဆာလံ ၄၈:⁠၂။ ဒေသနာ ၁၂:⁠၁။ ဟေရှာယ ၃၀:၂၀။ ၄၂:⁠၅။ ၅၄:⁠၅။ ဟောရှေ ၁၂:၁၄) မြင့်မြတ်သောသူသည် ရိုသေလေးမြတ်ဖွယ်ကောင်းသော၊ ခန့်ညားဖွယ်ကောင်းသော၊ ချီးမြှောက်ထားသော၊ ဂုဏ်ကျက်သရေရှိသော၊ ထင်ရှားကျော်ကြားသော၊ စိုးရွံ့ကျိုးနွံဖွယ်ကောင်းသောသူဖြစ်သည်။ ယေဟောဝါနှင့်နှိုင်းယှဉ်အပ်သူမရှိ၊ ဂုဏ်ရည်တူသူမရှိ၊ ကိုယ်တော်သည် ရုပ်လောကအပတွင် တည်ရှိသောအရှင်ဖြစ်တော်မူ၏။ ဤအချက်ကို ကိုယ်တော်တိုင် အောက်ပါအတိုင်းမိန့်တော်မူခြင်းဖြင့် သက်သေခံတော်မူ၏။ “သင်တို့သည် ငါ့ကိုအဘယ်သူနှင့်ပုံပြကြမည်နည်း။ အဘယ်သူနှင့် တူစေကြမည်နည်း။ တူအောင် အဘယ်သူနှင့် ခိုင်းနှိုင်းကြမည်နည်း။”—⁠ဟေရှာယ ၄၆:⁠၅။

၇။ ယေဟောဝါဘုရားသခင်သည် သိသာထင်ရှားသောအချက် အနည်းဆုံးမည်မျှ၌ တုနှိုင်းဖွယ်မရှိဖြစ်တော်မူသနည်း။ ကိုယ်တော်သည် ဩဇာအာဏာဖက်၌ နှိုင်းယှဉ်စရာမရှိဟု အဘယ်ကြောင့်ဆိုနိုင်သနည်း။

^၇ ယေဟောဝါဘုရားသခင်သည် အနည်းဆုံးအားဖြင့် သိသာထင်ရှားသောအချက် ခုနစ်ချက်၌ တုနှိုင်းဖွယ်ကင်းတော်မူ၏။ ယင်းတို့သည် ကိုယ်တော်ကိုဂုဏ်ပြုရန် ထူးခြားစေသည့် အကြောင်းများဖြစ်သည်။ ဦးဆုံးအနေနှင့် ယေဟောဝါဘုရားသခင်သည် ဩဇာအာဏာ ဖက်၌ ပြိုင်ဘက်ကင်းသောကြောင့် အကြီးမြတ်ဆုံးသောဂုဏ်အသရေနှင့်ထိုက်တန်တော်မူ၏။ အရှင်သခင်ယေဟောဝါသည် စကြဝဠာအာဏာပိုင်ဖြစ်သဖြင့် အမြင့်မြတ်ဆုံးသောအရှင်ဖြစ်တော်မူ၏။ ကိုယ်တော်သည် ကျွန်ုပ်တို့၏တရားမင်း၊ တရားဥပဒေစီရင်ပြဌာန်းသောအရှင်၊ ဘုရင်မင်းမြတ်ဖြစ်တော်မူ၏။ ကောင်းကင်ဘုံနှင့်မြေကြီးပေါ် ရှိရှိသမျှပုဂ္ဂိုလ်တို့သည် ကိုယ်တော်ထံစာရင်းရှင်းရန် တာဝန်ရှိကြသည်။ ကိုယ်တော်မူကား မည်သူ့ထံတွင် စာရင်းရှင်းရန် တာဝန်မရှိပေ။ ထို့ကြောင့် ကိုယ်တော်အား “ကြီးမြတ်သောဘုရား၊ တန်ခိုးနှင့်ပြည့်စုံ၍ ကြောက်မက်ဖွယ်သောဘုရား” ဟူ၍ဖော်ကျူးထားသည်မှာ သင့်မြတ်လှပေသည်။—⁠တရားဟောရာ ၁၀:၁၇။ ဟေရှာယ ၃၃:၂၂။ ဒံယေလ ၄:⁠၃၅။

၈။ (က) ရာထူးအဆင့်အတန်းဘက်တွင်၊ (ခ) ထာဝရတည်ရှိခြင်းဘက်တွင် ယေဟောဝါသည် ပြိုင်ဘက်ကင်းသည်ဟု အဘယ်ကြောင့်ဆိုနိုင်သနည်း။

^၈ ဒုတိယအနေနှင့် ယေဟောဝါဘုရားသခင်သည် ရာထူးအဆင့်အတန်း ဘက်တွင် ပြိုင်ဘက်ကင်းသောကြောင့် အကြီးမြတ်ဆုံးသောဂုဏ်အသရေနှင့် ထိုက်တန်တော်မူ၏။ ကိုယ်တော်သည် “အထွတ်အမြတ်ဖြစ်တော်မူသောဘုရား၊” အကြီးမြင့်ဆုံးဘုရားသခင်ဖြစ်တော်မူ၏။ ခပ်သိမ်းသောမြေကြီးသတ္တဝါတို့ထက် မတွေးဆနိုင်လောက်အောင် ဂုဏ်ရည်ထူးကဲသာလွန်တော်မူ၏။ (ဟေရှာယ ၄၀:၁၅။ ၅၇:၁၅။ ဆာလံ ၈၃:၁၈) တတိယအနေနှင့် ယေဟောဝါသည် ထာဝရတည်ရှိခြင်း ဖက်၌ ပြိုင်ဘက်မရှိသောကြောင့် ခပ်သိမ်းသောသူတို့ထက်ဂုဏ်ပြုအပ်ပေသည်။ ကိုယ်တော်တစ်ပါးတည်းသာလျှင် အစမရှိသောဘုရား၊ ကာလအစဉ်အဆက် ထာဝရတည်တော်မူသောဘုရား ဖြစ်တော်မူ၏။—⁠ဆာလံ ၉၀:⁠၂။ ၁ တိမောသေ ၁:⁠၁၇။

၉။ ယေဟောဝါသည် (က) ဘုန်းတော်ဘက်တွင်၊ (ခ) အခြေခံဂုဏ်ရည်တော်များဘက်တွင် အဘယ်နည်းဖြင့်တုနှိုင်းဖွယ်မရှိသနည်း။

^၉ စတုတ္ထအနေနှင့် ယေဟောဝါဘုရားသခင်၏ ကိုယ်ကာယနှင့်ဆိုင်သော ဘုန်းတော် ၏ကြီးကျယ်ခမ်းနားခြင်းကြောင့် ကိုယ်တော်သည် အကြီးမြတ်ဆုံးသော ဂုဏ်အသရေနှင့် ထိုက်တန်တော်မူ၏။ ကိုယ်တော်သည် ကောင်းကင် “အလင်းတို့၏အဘ” ဖြစ်တော်မူ၏။ ကိုယ်တော့်ကိုယ်ကာယသည် အလွန်တောက်ပလှသဖြင့် ကိုယ်တော်ကိုမြင်၍ အသက်ရှင်နိုင်သောသူ တစ်စုံတစ်ယောက်မျှမရှိနိုင်ပေ။ ကိုယ်တော်သည် အမှန်ပင်စိုးရွံ့ထိတ်လန့်ဖွယ်ကောင်းပေသည်။ (ယာကုပ် ၁:၁၇။ ထွက်မြောက်ရာ ၃၃:၂၂။ ဆာလံ ၂၄:၁၀) ပဉ္စမအနေနှင့် ကိုယ်တော်၏အံ့မခန်းဖွယ် ဂုဏ်ရည်တော်များ ကြောင့် ယေဟောဝါဘုရားသခင်အား ကျွန်ုပ်တို့ခမ်းနားကြီးကျယ်စွာ ဂုဏ်ပြုအပ်သည်။ ကိုယ်တော်သည် တန်ခိုးတော်အနန္တနှင့်ပြည့်စုံသော အနန္တတန်ခိုးရှင်၊ တရားမျှတခြင်းဘက်တွင် အကြွင်းမဲ့စုံလင်တော်မူသောအရှင်၊ မေတ္တာ၏ပြယုဂ်ဖြစ်တော်မူ၏။—⁠ယောဘ ၃၇:၂၃။ သု၊ ၃:၁၉။ ဒံယေလ ၄:၃၇။ ၁ ယောဟန် ၄:⁠၈။

၁၀။ အဘယ်နည်းအားဖြင့် ယေဟောဝါသည် (က) ဖန်ဆင်းခြင်းလက်ရာတော်များနှင့် ပိုင်ဆိုင်မှုဘက်တွင် (ခ) နာမတော်နှင့်ကျော်ဇောကိတ္တိဘက်တွင် ပြိုင်ဘက်ကင်းသနည်း။

^၁၀ ဆဌမအနေနှင့် ယေဟောဝါဘုရားသခင်သည် မဟာဖန်ဆင်းခြင်းလက်ရာတော်များ အတွက် အကြီးမြတ်ဆုံးဂုဏ်အသရေနှင့်ထိုက်တန်တော်မူ၏။ ကောင်းကင်နှင့်မြေကြီးပေါ်ရှိ အရာခပ်သိမ်းကို ဖန်ဆင်းတော်မူသောအရှင်ဖြစ်တော်မူသဖြင့် ကိုယ်တော်သည် အရာခပ်သိမ်းကို ပိုင်သတော်မူသောအရှင်လည်း ဖြစ်တော်မူ၏။ “ကောင်းကင်နှင့်မြေကြီးသည် ကိုယ်တော်၏ဥစ္စာဖြစ်ပါ၏” ဟူ၍ဆာလံ ၈၉:၁၁ ၌ဖတ်ရ၏။ သတ္တမအနေနှင့် ယေဟောဝါဘုရားသခင်သည် နာမတော်နှင့်ကျော်ဇော်ကိတ္တိ ဘက်တွင် ဂုဏ်ရည်တူပြိုင်ဘက်မရှိသောကြောင့် သူတကာထက် ဂုဏ်ပြုခြင်းခံထိုက်ပေသည်။ ကိုယ်တော်တစ်ပါးတည်းသာလျှင် “ကိုယ်တော်ဖြစ်စေတော်မူ၏” ဟူ၍အဓိပ္ပာယ်ရှိသော ယေဟောဝါဟူသောနာမတော်ကို ပိုင်သတော်မူ၏။—⁠ကမ္ဘာဦး ၂:၄၊ NW အောက်ခြေမှတ်ချက်ကိုရှု။

ယေဟောဝါကိုဂုဏ်ပြုနည်း

၁၁။ (က) ယေဟောဝါအား ကျွန်ုပ်တို့ဂုဏ်ပြုနိုင်သည့်နည်းလမ်းအချို့ကားအဘယ်နည်း။ (ခ) ယေဟောဝါအားကိုးစားခြင်းအားဖြင့် ကိုယ်တော်အားအမှန်ချီးကျူးဂုဏ်ပြုကြောင်း မည်သို့ပြသနိုင်သနည်း။

^၁၁ ယေဟောဝါ၏ဂုဏ်တော်ရှိသမျှတို့ကိုထောက်၍ ကိုယ်တော်အား ကျွန်ုပ်တို့မည်သို့ဂုဏ်ပြုနိုင်သနည်း။ ကိုယ်တော်အား ခန့်ညားကြောက်ရွံ့ခြင်း၊ ကြည်ညိုလေးမြတ်ခြင်းအားဖြင့်လည်းကောင်း၊ ကိုယ်တော်အားနာခံခြင်းအားဖြင့်လည်းကောင်း၊ ပြုလေသမျှတို့၌ ကိုယ်တော်အား ကျေးဇူးတင်လေးမြတ်ကြောင်း ပြသခြင်းအားဖြင့်လည်းကောင်း၊ လက်ဆောင်ပဏ္ဏာဆက်သခြင်း၊ ကိုယ်တော်အားတုပခြင်း၊ ကိုယ်တော်ထံအသနားခံခြင်းအားဖြင့်လည်းကောင်း ဂုဏ်ပြုနိုင်ကြောင်းကို ကျွန်ုပ်တို့တွေ့ရပေလိမ့်မည်။ ကိုယ်တော်အားယုံကြည်ခြင်း၊ မည်သည့်အခြေအနေ၌မဆို ကိုယ်တော်အားကိုးစားခြင်းအားဖြင့်လည်း ဂုဏ်ပြုနိုင်သည်။ “[ယေဟောဝါ] ကိုစိတ်နှလုံးအကြွင်းမဲ့ကိုးစားလော့” ဟူ၍ကျွန်ုပ်တို့ကိုတိုက်တွန်းထားသည်။ ကိုယ်တော်မိန့်တော်မူသမျှကို အကြွင်းမဲ့ယုံကြည်ခြင်းအားဖြင့် ယေဟောဝါဘုရားသခင်ကို ကျွန်ုပ်တို့ဂုဏ်ပြုကြသည်။ ဥပမာအနေနှင့် ကိုယ်တော်က “မစိုးရိမ်နှင့်။ ငါသည် သင့်ဘက်မှာရှိ၏။ မကြောက်နှင့်။ သင်၏ဘုရားသခင်ငါသည် သင့်ကိုခိုင်ခံ့စေမည်။ သင့်ကိုစောင့်မမည်” ဟုမိန့်တော်မူ၏။ (သု၊ ၃:⁠၅။ ဟေရှာယ ၄၁:၁၀) ကိုယ်တော်ကိုအကြွင်းမဲ့မကိုးစားလျှင် ကိုယ်တော်အားဂုဏ်မပြုရာကျပေမည်။

၁၂။ ယေဟောဝါအား ဂုဏ်ပြုရာတွင် နာခံခြင်းနှင့်ကြောက်ရွံ့ခြင်းတို့သည် အဘယ်အပိုင်းမှပါဝင်ကြသနည်း။

^၁၂ ယေဟောဝါဘုရားသခင်အား ဂုဏ်ပြုရာတွင် ခွဲခြား၍မရနိုင်သောနည်းတစ်နည်းမှာ ကိုယ်တော်အားနာခံခြင်းအားဖြင့်ဖြစ်သည်။ နာခံခြင်းအတွက်မရှိမဖြစ်သောအရာမှာ ဘုရားရေးရာကြောက်ရွံ့ခြင်း၊ ဘုရားသခင့်စိတ်တော်ငြိုငြင်မည်ကို စိုးရွံ့ခြင်းပင်ဖြစ်သည်။ သားဖြစ်သူ ဣဇာက်အားပူဇော်ရန် အာဗြဟံနာခံမှုအပြည့်နှင့် အားထုတ်ပြီးနောက် အာဗြဟံအားယေဟောဝါမိန့်တော်မူသည့်စကားများက ကြောက်ရွံ့ခြင်းနှင့်နာခံခြင်း ဆက်စပ်နေကြောင်းထင်ရှားစေသည်။ “သင်သည် ဘုရားသခင်ကိုကြောက်ရွံ့ သည်” ဟုယေဟောဝါမိန့်တော်မူ၏။ (ကမ္ဘာဦး ၂၂:၁၂) မိဘတို့အပေါ် သားသမီးများထားရှိအပ်သည့် ဝတ္တရားအကြောင်းဆွေးနွေးရာတွင် တမန်တော်ပေါလုကလည်း စကားနားထောင်ခြင်းနှင့် ရိုသေဂုဏ်ပြုခြင်းတို့ ဒွန်တွဲနေကြောင်း တင်ပြခဲ့သည်။ (ဧဖက် ၆:၁-၃) ထို့ကြောင့် ဝန်မလေးသောဘုရားသခင့်ပညတ်တော်များကို နာခံခြင်းအားဖြင့် ကျွန်ုပ်တို့ယေဟောဝါကို ဂုဏ်ပြုကြသည်။ ယေဟောဝါဘုရားသခင်အားနာခံခြင်းသည် ကိုယ်တော်အား ဂုဏ်ပြုခြင်းပင်ဖြစ်သည်မှာ စောဒကတက်စရာအကြောင်းမရှိပေ။—⁠၁ ယောဟန် ၅:⁠၃။

၁၃။ ဘုရားသခင်အား ဂုဏ်ပြုချီးကျူးမည်ဆိုပါက လုပ်ဆောင်မှုနှင့်အစီအစဉ်တို့ကို ကျွန်ုပ်တို့မည်သို့သဘောထားရှိမည်နည်း။

^၁၃ ထိုမှတစ်ပါး “ကျင့်ကြံသမျှ၌ ကိုယ်တော်ကိုအာရုံပြု [ကျေးဇူးတင်လေးမြတ်] လျှင်သင်သွားရာလမ်းကို ညီညွတ်စေတော်မူမည်” ဟူသော သု၊ ၃:၆ (သမ ) မှသြဝါဒစကားကို နားထောင်ခြင်းအားဖြင့် ကျွန်ုပ်တို့သည်ယေဟောဝါဘုရားသခင်အား ထိုက်ထိုက်တန်တန်ဂုဏ်ပြုနိုင်ပေသည်။ ဤအကြောင်းနှင့်ပတ်သက်၍ တပည့်တော်ယာကုပ်က ကောင်းမြတ်သည့်အကြံဉာဏ်ပေးထားသည်။ တစ်ရက်ပြီးတစ်ရက် ကိုယ့်အစွမ်းအစကို အားကိုး၍စိတ်ချလက်ချ စခန်းသွားမည့်အစား “[ယေဟောဝါ] သည်အလိုတော်ရှိ၍ ငါတို့သည်လည်းအသက်ရှင်လျှင် ဤသို့ပြုကြကုန်အံ့၊ ထိုသို့ပြုကြကုန်အံ့” ဟုကျွန်ုပ်တို့ဆိုသင့်သည်။ (ယာကုပ် ၄:၁၅) လွန်ခဲ့သောနှစ်ပေါင်းများစွာက အပြည်ပြည်ဆိုင်ရာ သမ္မာကျမ်းစာကျောင်းသားများသည် အနာဂတ်နှင့်ဆိုင်သော မည်သည့်ဖော်ပြချက်၌မဆို အတိုကောက်စာလုံး D. V. ကိုထည့်သွင်းသည့်ထုံးစံကျင့်သုံးခဲ့သည်။ ၄င်းမှာ Deo volente ၏အတိုကောက်ဖြစ်ပြီး “ဘုရားသခင်အလိုတော်ရှိလျှင်” ဟူ၍အဓိပ္ပာယ်ရှိသည်။

၁၄။ (က) ဘုရားသခင်အားဂုဏ်ပြုမည်ဆိုပါက ကျွန်ုပ်တို့၏ကြိုးပမ်းမှုနှင့်စပ်လျဉ်း၍ မည်သည့်စိတ်သဘောထားမျိုးရှိရမည်နည်း။ (ခ) ကင်းမျှော်စင်အသင်းစာပေများထုတ်ဝေမှု၌ အဘယ်သဘောထားထင်ရှားသနည်း။

^၁၄ ကျွန်ုပ်တို့ရရှိသော မည်သည့်အောင်မြင်မှုမဆို ဘုရားသခင့်ကျေးဇူးတော်ကြောင့်သာဖြစ်ကြောင်း ဝန်ခံလျက်နှိမ့်ချသည့်သဘောတင်ပြခြင်းအားဖြင့်လည်း ယေဟောဝါဘုရားသခင်ကို ကျွန်ုပ်တို့ဂုဏ်ပြုနိုင်ကြသည်။ တမန်တော်ပေါလုက သူ၏ဓမ္မအမှုနှင့်ပတ်သက်၍ အောက်ပါအတိုင်း လျောက်ပတ်စွာသုံးသပ်ခဲ့သည်။ “ငါသည်စိုက်ပျိုးသောသူဖြစ်၏။ အာပေါလုသည် ရေလောင်းသောသူဖြစ်၏။ အပင်ကိုကြီးပွားစေသောသူကား ဘုရားသခင်ပေတည်း။” (၁ ကောရိန္သု ၃:၆၊ ၇) မှန်ပေသည်။ ပေါလုသည် မိမိကိုယ်ကိုဖြစ်စေ၊ အခြားလူသားတစ်ဦးဦးကိုဖြစ်စေ ဂုဏ်မပြုဘဲ ဘုရားသခင်အားထိုက်ထိုက်တန်တန်ဂုဏ်ပြုရန်သာ အာရုံစူးစိုက်ခဲ့သည်။ သို့ဖြစ်သောကြောင့် ယခုခေတ်ကင်းမျှော်စင်အသင်းထုတ်စာပေများ၌ ရေးသားသူတို့ကို မဖော်ပြခြင်းဖြစ်သည်။ မည်သည့်အကြောင်းကိုရေးသားကြောင်း စာရေးဆရာများပေးမသိကြပေ။ ဤသို့မဖော်ပြဘဲထားရခြင်းမှာ မည်သည့်လူသားကိုမျှမဟုတ်ဘဲ ယေဟောဝါအား ဂုဏ်ပြုရန်ရည်ရွယ်ရေးသားထားသည့်အကြောင်းအရာကို လူတို့အာရုံစိုက်စေရန်အတွက်ဖြစ်သည်။

၁၅။ ယေဟောဝါသက်သေများ၏ ကျိုးနွံစိတ်ကို အချို့သူများနားမလည်နိုင်ကြောင်း အဘယ်တွေ့ကြုံမှုက ထင်ရှားစေသနည်း။

^၁၅ ယေဟောဝါကိုအာရုံပြုစေခြင်းဖြင့် ကိုယ်တော်အားဂုဏ်ပြုသည့် ဤမူဝါဒကို အချို့သူများအံ့အားသင့်ကြသည်။ လွန်ခဲ့သောနှစ်အနည်းငယ်က နယူးယောက်မြို့ Central Park ဥယျာဉ်တွင် လူထုတရားဟောပြောပွဲတစ်ခုအတွက် အသံချဲ့စက်ကို တပ်ဆင်နေကြစဉ်တွင် သက်သေခံတို့သည် အစမ်းသဘောနှင့် Kingdom Melodies တိပ်ခွေကိုဖွင့်ထားသည်။ သပ်သပ်ရပ်ရပ်ဝတ်ဆင်ထားကြသည့် ဇနီးမောင်နှံနှစ်ယောက်က မည်သည့်တေးသံဖြစ်ကြောင်း သက်သေခံတစ်ဦးအားမေးမြန်းသည်။ ထိုစုံတွဲကို သက်သေခံများအထင်နှင့် ထိုသူက “ဒါ Kingdom Melodies အမှတ် ၄ ဖြစ်တယ်” ဟူ၍ဖြေလိုက်သည်။ “ဟုတ်ကဲ့၊ ဒါပေမယ့်၊ ဒီဂီတသံစဉ်တွေကို ဘယ်သူရေးဖွဲ့သလဲ” ဟုမေးပြန်ရာ သက်သေခံက “နာမည်ဖော်ပြမထားဘူး” ဟုဖြေလိုက်သည်။ ထိုစုံတွဲက “ဒီလောက်ကောင်းတဲ့ ဂီတသံစဉ်ကို ရေးဖွဲ့တဲ့လူတွေဟာ ဘယ်တော့မှနာမည်မဖော်ပြဘဲမနေဘူး” ဟုပြန်ပြောသဖြင့် သက်သေခံက “ဒါပေမယ့် ယေဟောဝါသက်သေများကတော့ ဒီလိုပဲလုပ်ကြတယ်” ဟူ၍ပြန်လည်ဖြေကြားလိုက်သည်။ မှန်ပေသည်။ သူတို့ဤသို့မဖေါ်ပြဘဲထားခြင်းမှာ ချီးမွမ်းဂုဏ်ပြုစရာမှန်သမျှကို ယေဟောဝါဘုရားသခင်သာ ခံယူစေရန်အတွက်ဖြစ်သည်။

၁၆။ အဘယ်နည်းအမျိုးမျိုးဖြင့် ကျွန်ုပ်တို့၏အသံကို အသုံးပြု၍ ယေဟောဝါဘုရားသခင်အား ဂုဏ်ပြုချီးကျူးနိုင်သနည်း။

^၁၆ ယေဟောဝါကို ဂုဏ်ပြုသည့်အခြားနည်းတစ်နည်းမှာ ကိုယ်တော့်အကြောင်း သက်သေခံရန် ကျွန်ုပ်တို့၏နှုတ်ခမ်းကို အသုံးပြုခြင်းအားဖြင့်ဖြစ်သည်။ ကိုယ်တော်အား ဂုဏ်တင်ရန် ကျွန်ုပ်တို့အမှန်စိတ်ဝင်စားလျှင် ကျွန်ုပ်တို့သည် နိုင်ငံတော်သတင်းကောင်းကို ကြေညာရာတွင် တာဝန်သိ၍ ဝတ္တရားကျေပွန်ကြမည်ဖြစ်သည်။ တစ်အိမ်တက်ဆင်းအားဖြင့်လည်းကောင်း၊ အလွတ်သဘောသက်သေခံနိုင်သည့် အခွင့်အရေးကိုလက်မလွတ်စေဘဲ ရနိုင်သမျှနည်းလမ်းများအားဖြင့်လည်းကောင်း ထိုသို့ပြုနိုင်ကြသည်။ (ယောဟန် ၄:၆-၂၆။ တမန်တော် ၅:၄၂။ ၂၀:၂၀) ၄င်းအပြင် အသင်းတော်စည်းဝေးများ၌ အဖြေပေးခြင်း၊ နိုင်ငံတော်သီချင်းများကို အားရပါးရသီဆိုခြင်းအားဖြင့် ကျွန်ုပ်တို့၏အသံနှင့်လည်း ဘုရားသခင်ကို ဂုဏ်ပြုနိုင်သည့်အခွင့်အရေးရှိသေးသည်။ (ဟေဗြဲ ၂:၁၂။ ၁၀:၂၄၊ ၂၅) နေ့စဉ်အပြန်အလှန်စကားပြောရာတွင်လည်း ကျွန်ုပ်တို့၏နှုတ်ခမ်းအားဖြင့် ယေဟောဝါဘုရားသခင်ကို ဂုဏ်ပြုနိုင်သည်။ အနည်းအကျဉ်းအားထုတ်လိုက်မည်ဆိုလျှင် အပြန်အလှန်စကားပြောခြင်းကို ဝိညာဉ်ရေးတည်ဆောက်ရာလမ်းကြောင်းအဖြစ် ပြုပြင်ဖန်တီးနိုင်ပေသည်။ ဤသို့ဖြင့် ယေဟောဝါဘုရားသခင်၏ဂုဏ်ရောင်ကို ထွန်းပြောင်စေနိုင်မည်ဖြစ်သည်။—⁠ဆာလံ ၁၄၅:⁠၂။

၁၇။ (က) ယေဟောဝါအားဂုဏ်ပြုချီးကျူးခြင်းကိစ္စတွင် မှန်ကန်သောအကျင့်သည် မည်သို့သက်ဆိုင်သနည်း။ (ခ) မှားယွင်းသောအကျင့်သည် မည်သို့သက်ဆိုင်သနည်း။

^၁၇ ယေဟောဝါဘုရားသခင်ကို ကျွန်ုပ်တို့၏နှုတ်ခမ်းဖြင့် ချီးမွမ်းဂုဏ်ပြုခြင်းသည် သင့်မြတ်လှသကဲ့သို့ ကိုယ်တော်အားကျွန်ုပ်တို့၏အကျင့်အားဖြင့် ဂုဏ်ပြုရန်လည်းလိုသည်။ ဘုရားသခင်အားနှုတ်ဖြင့် ဂုဏ်ပြုချီးကျူးသော်လည်း စိတ်နှလုံးမူကား ကိုယ်တော်နှင့်ဝေးလှသောသူတို့ကို ယေရှုပြစ်တင်ရှုတ်ချတော်မူခဲ့၏။ (မာကု ၇:⁠၆) မကောင်းသောအကျင့်သည် ယေဟောဝါဘုရားသခင့်ဂုဏ်တော်ကို မုချညှိုးနွမ်းစေမည်ဖြစ်သည်။ ဥပမာအနေနှင့် ရောမ ၂:၂၃၊ ၂၄ တွင် ဤသို့ဖတ်ရသည်။ “ပညတ်တရားတော်ကိုအမှီပြု၍ ဝါကြွားလျက်ပင် ထိုတရားကိုလွန်ကျူး၍ ဘုရားသခင်၏ဂုဏ်အသရေတော်ကို ရှုတ်ချသလော။ . . . ‘တစ်ပါးအမျိုးသားတို့သည် သင်တို့အကျင့်ကိုထောက်၍ ဘုရားသခင်၏နာမတော်ကို ကဲ့ရဲ့တတ်ကြ၏။’ ” မကြာမီနှစ်များအတွင်း နှစ်စဉ်လူထောင်ပေါင်းများစွာကို ယေဟောဝါလူမျိုးတော်၏အသင်းတော်မှ နှင်ထုတ်ခဲ့ရသည်။ ဂုဏ်အသရေယုတ်သောအကျင့်ပြုကျင့်ခဲ့သော်လည်း စစ်မှန်သောနောင်တတရားပြသကြသောကြောင့် နှင်ထုတ်ခြင်းမခံရသောအရေအတွက်မှာ ပို၍ပင်များပြားပေလိမ့်မည်။ ဤသူတို့အားလုံးသည် ယေဟောဝါအားနှုတ်ဖြင့်ချီးကျူးဂုဏ်ပြုခဲ့ကြစေကာမူ အကျင့်အားဖြင့် ထိုသို့ပြုရန်ပျက်ကွက်ခဲ့ကြသည်။

၁၈။ (က) အခွင့်ထူးခံစားရသော သူအချို့အနေဖြင့် ယေဟောဝါအား ထိုက်ထိုက်တန်တန် ဂုဏ်ပြုချီးကျူးလိုပါက မည်သို့သောပူပင်ကြောင့်ကြစိတ်ရှိရမည်နည်း။ (ခ) မာလခိလက်ထက်မှ ယဇ်ပုရောဟိတ်အချို့တို့၏အခြေအနေက ဤသို့ပူပင်ကြောင့်ကြစိတ်ရှိရန်လိုအပ်ကြောင်း မည်သို့သိသာထင်ရှားစေသနည်း။

^၁၈ ဗေသလအိမ်၌ဖြစ်စေ၊ ခရီးလှည့်လည်ခြင်း သို့မဟုတ် သာသနာပြုလုပ်ငန်း၌ဖြစ်စေ၊ ရှေ့ဆောင်များအနေနှင့်ဖြစ်စေ အချိန်ပြည့်လုပ်ငန်းတော်ကဏ္ဍအသီးသီး၌ အမှုတော်ဆောင်နေကြသူတို့သည် ယေဟောဝါ၏ဂုဏ်တော်ကို ချီးကျူးရသည့်အခွင့်ထူးကြီးရရှိထားကြသည်။ သူတို့၏တာဝန်မှာ ‘အနည်းငယ်သောအမှု၌ကော၊ ကြီးသောအမှု၌ပါ သစ္စာရှိစွာဖြင့်’ ပေးအပ်လာသမျှလုပ်ငန်းများကို စွမ်းစွမ်းတမံထမ်းဆောင်ရန်ပင်ဖြစ်သည်။ (လုကာ ၁၆:၁၀) သူတို့သည် ရှေးဣသရေလနိုင်ငံမှ ယဇ်ပုရောဟိတ်များ၊ လေဝိအမျိုးသားများနှင့် ဆင်တူသည့်ဂုဏ်အသရေရှိသောရာထူးကို ရရှိထားသည်ဟုဆိုနိုင်သည်။ သို့သော်လည်း မာလခိလက်ထက်မှ ယဇ်ပုရောဟိတ်အချို့တို့၏ဝတ္တရားပျက်ကွက်မှုကြောင့် သူတို့အားယေဟောဝါက “ငါသည်အဘမှန်လျှင် ငါ့ကိုအဘယ်သူရိုသေသနည်း။ သခင်မှန်လျှင် အဘယ်သူကြောက်ရွံ့သနည်း” ဟုမိန့်တော်မူခဲ့၏။ (မာလခိ ၁:⁠၆) ထိုယဇ်ပုရောဟိတ်တို့သည် တိရစ္ဆာန်အကျိုးအကန်း၊ အနာအဆာများကို ယဇ်ကောင်အဖြစ်ပူဇော်ခြင်းအားဖြင့် အပြစ်ဒဏ်မှလွတ်မြောက်ရန် ကြိုးစားကြသည်။ ယနေ့အမှုတော်ဘက်တွင် အခွင့်ထူးရရှိထားသူတို့အနေဖြင့် စွမ်းစွမ်းတမံမဆောင်ရွက်ကြပါက ထိုယဇ်ပုရောဟိတ်များကဲ့သို့ ယေဟောဝါ၏အပြစ်တင်ခြင်းကို အထူးသဖြင့်ခံရကြမည်ဖြစ်သည်။ သူတို့သည် ဘုရားသခင်ကို ဂုဏ်ပြုချီးကျူးရာတွင် စံမမီသူများဖြစ်ကြပေမည်။

၁၉။ (က) သု၊ ၃:၉ ၌ ဖော်ပြထားသည့်အတိုင်း ယေဟောဝါအားဂုဏ်ပြုနိုင်သည့် နည်းလမ်းနောက်တစ်မျိုးမှာအဘယ်နည်း။ (ခ) ယေဟောဝါကိုဂုဏ်ပြုသည့် အရေးပါသောနည်းလမ်း နောက်တစ်မျိုးကားအဘယ်နည်း။

^၁၉ ယေဟောဝါဘုရားသခင်အား ဂုဏ်ပြုနိုင်သည့် နောက်တစ်နည်းမှာ ကိုယ်တော်စေခိုင်းခန့်အပ်ထားသည့် ကမ္ဘာချီဟောပြောခြင်းလုပ်ငန်းအတွက် ငွေကြေးထည့်ဝင်လှူဒါန်းခြင်းအားဖြင့်ဖြစ်သည်။ “သင်တို့သည် ကိုယ်ဥစ္စာနှင့်အဦးသီးသောအသီးအနှံရှိသမျှကို [ယေဟောဝါ] အားပူဇော်လော့” ဟူ၍ ကျွန်ုပ်တို့ကိုတိုက်တွန်းထားသည်။ (သု၊ ၃:⁠၉) ဤသို့လှူဒါန်းခြင်းအခွင့်အရေးမှာ မည်သူမျှလျစ်လျူမရှုအပ်သော ယေဟောဝါဘုရားသခင်ကို ဂုဏ်ပြုသည့်အခွင့်အခါကောင်းတစ်ရပ်ဖြစ်ပေသည်။ ဆုတောင်းခြင်း၊ ကျေးဇူးတော်ချီးမွမ်းခြင်းအားဖြင့်လည်း ယေဟောဝါဘုရားသခင်ကို ဂုဏ်ပြုနိုင်သည်။ (၁ ရာဇဝင်ချုပ် ၂၉:၁၀-၁၃) စင်စစ်ဆိုလျှင် ကိုယ်တော်ထံသို့ခယဝပ်တွားရိုကျိုးလျက် ကျွန်ုပ်တို့ချဉ်းကပ်သဖြင့် ဘုရားသခင်ထံဆုတောင်းခြင်းကိုယ်နှိုက်သည် ကိုယ်တော်အားဂုဏ်ပြုချီးကျူးခြင်းပင်ဖြစ်ပေသည်။

၂၀။ (က) လောကီသားများ ဂုဏ်ပြုလေ့ရှိသောသူများကား မည်သူတို့နည်း။ မည်သို့အားဖြင့်နည်း။ (ခ) မည်သည့်သြဝါဒကို နာခံခြင်းအားဖြင့် ကျွန်ုပ်တို့ယေဟောဝါအား ထပ်ဆင့်ဂုဏ်ပြုနိုင်သနည်း။

^၂၀ ယနေ့လူအများသည် အထူးသဖြင့်လူငယ်လူရွယ်များသည် သူတို့ချီးမွမ်းအားကျသူတို့၏ပုံစံအတိုင်း ပြောဆိုပြုမူ၍ အတုယူခြင်းအားဖြင့် ထိုသူတို့ကို ချီးကျူးဂုဏ်ပြုတတ်ကြသည်။ သူတို့အတုယူသည့်ပုဂ္ဂိုလ်များမှာ များသောအားဖြင့် အားကစား သို့မဟုတ် ဖျော်ဖြေရေးလောကမှ သူရဲကောင်းများဖြစ်ကြသည်။ ကျွန်ုပ်တို့သည် ခရစ်ယာန်များအနေနှင့် သူတို့နှင့်မတူဘဲ ယေဟောဝါဘုရားသခင်ကို အတုယူခြင်းအားဖြင့် ကိုယ်တော်အားဂုဏ်ပြုသင့်ပေသည်။ တမန်တော်ပေါလုက ကျွန်ုပ်တို့အား ထိုသို့ပြုရန်နှိုးဆော်၍ ဤသို့ရေးသားထားသည်။ “ဘုရားသခင်၏ချစ်သားဖြစ်ကြသည်နှင့်အညီ ဘုရားသခင်ကျင့်တော်မူသည်နည်းတူကျင့်ကြလော့။ . . . မေတ္တာတရား၌ကျင်လည်ကြလော့။” (ဧဖက် ၅:၁၊ ၂) မှန်ပေသည်၊ ယေဟောဝါနှင့်တူအောင်ကြိုးစားခြင်းအားဖြင့် ကိုယ်တော်အား ကျွန်ုပ်တို့ဂုဏ်ပြုကြသည်။

၂၁။ (က) ယေဟောဝါအားဂုဏ်ပြုချီးကျူးနိုင်အောင် ဘာကပံ့ပိုးကူညီပေးသနည်း။ (ခ) မိမိအားဂုဏ်ပြုသူတို့အား ယေဟောဝါချီးမြှင့်သည့်ဆုများကား အဘယ်နည်း။

^၂၁ စင်စစ်ဆိုလျှင် ဘုရားသခင်ကိုဂုဏ်ပြုနိုင်သည့် ဂုဏ်ပြုအပ်သည့်နည်းလမ်း အမြောက်အမြားရှိပေသည်။ နှုတ်ကပတ်တော်ကို မှန်မှန်မှီဝဲခြင်း၊ ကိုယ်တော်နှင့် ပိုမိုအကြွမ်းဝင်အောင် ကြိုးစားခြင်းအားဖြင့် ကိုယ်တော်အား ပို၍ဂုဏ်ပြုနိုင်မည်ဟူသောအချက်ကို မည်သည့်အခါမျှမမေ့ပါနှင့်။ ဤသို့ပြုခြင်းအတွက် အဘယ်အကျိုးရရှိမည်နည်း။ “ငါ့ကိုချီးမြှောက် [ဂုဏ်ပြု] သောသူတို့ကို ငါချီးမြှောက် [ဂုဏ်ပြု] မည်” ဟုယေဟောဝါမိန့်တော်မူ၏။ (၁ ဓမ္မရာဇဝင် ၂:၃၀) ယေဟောဝါသည် မိမိအား ကိုးကွယ်သူတို့ကို ကောင်းကင်ဘုံ၌ သားတော်ယေရှုခရစ်နှင့် တွဲဖက်မင်းများအဖြစ်လည်းကောင်း၊ ပရဒိသုဘုံမြေကြီးပေါ်၌လည်းကောင်း ပျော်ရွှင်စွာ ထာဝရအသက်ရှင်ခြင်းအခွင့် ပေးတော်မူခြင်းအားဖြင့် သူတို့ကိုမုချဂုဏ်ပြုချီးမြှောက်တော်မူလတံ့။

သင်မှတ်မိသလော

▫ လူသားတို့သည် ယေဘုယျအားဖြင့် မည်သူတို့အား ဂုဏ်ပြုချီးမြှင့်တတ်ကြသနည်း။ မည်သူ့ကိုဂုဏ်ပြုချီးကျူးရန် မေ့နေလေ့ရှိသနည်း။

▫ တစ်ဦးဦးကို ဂုဏ်ပြုသည်ဆိုရာမှာ အဘယ်အဓိပ္ပာယ်ရှိသနည်း။ ထိုသို့ပြုနိုင်သည့်နည်းလမ်းများကား အဘယ်နည်း။

▫ ယေဟောဝါဘုရားသခင် ဂုဏ်ပြုချီးကျူးခြင်းခံထိုက်သည့် အခြေခံအကြောင်းအချို့ကားအဘယ်နည်း။

▫ ယေဟောဝါဘုရားသခင်အား ကျွန်ုပ်တို့ချီးကျူးဂုဏ်ပြုနိုင်သည့် နည်းလမ်းအချို့ကားအဘယ်နည်း။

▫ ယေဟောဝါသည် မိမိအားဂုဏ်ပြုချီးကျူးသူတို့အား အဘယ်နည်းများဖြင့် ဆုချတော်မူသနည်း။